Leia Chatuana Nunna—Pathian Pek Beiseina Chu
Leia Chatuana Nunna—Pathian Pek Beiseina Chu
“Thil siam zawng zawngte chu thil lawilo thu thua awmtîrin an awm tawh . . . beiseina neiin.”—ROM 8:20.
1, 2. (a) Engvângin nge leia chatuana nun beiseina hi kan tân a pawimawh êm êm? (b) Engvângin nge mi tam takin leia chatuan nun beiseina chu an rinhlelh?
KAN hma lâwkah chuan mite chu an tarin, an thi tawh lo vang a, leiah hian chatuanin an nung tawh zâwk dâwn tih i hriat tirha i hlimzia kha i hre chhuak mai thei a. (Joh. 17:3; Thup. 21:3, 4) Mi dangte hnêna chu Bible ṭanchhan beiseina hrilh chu nuam i tih ngei a rinawm bawk. Chatuan nun beiseina chu kan chanchin ṭha hrilha a pêng pawimawh lai ber a ni si a. Chu chuan nun kan thlîr dân leh kan hman dân, leh buaina kan hma chhawn dân te chu a thunun a ni.
2 Kristianna rama kohhran tam zâwkte chuan leia chatuan nun beiseina chu a hnâwl a. Bible-in thlarau thi thei lo mihringin a neih thu a zirtîr lo chung pawhin, sakhaw tam tak chuan Bible zirtîrna nêna inmil lo, miin a thih hnua nung chhun zawm zêl thlarau thi thei lo a nei tih a zirtîr a ni. (Thur. 9:5) Chuvâng chuan, mi tam tak chuan leia chatuan nun beiseina chu an ringhlel a. Chuvângin: Bible-in chu beiseina chu a thlâwp tak zet em? A thlâwp a nih chuan, engtik khân nge Pathianin mihringte hnêna a hrilh hmasak ber? tiin kan inzâwt thei a ni.
‘Beiseina Neia Thil Lawilo Thu Thua Awmtîr’
3. Engtin nge mihringte tâna Pathian thiltum chu mihring awm tirh aṭanga a lan?
3 Mihringte tâna Pathian Jehova thiltum chu mihring awm ṭan tirh tê aṭang khân a lang nghâl a. Pathian chuan Adama’n thu a awih chuan chatuanin a nung ang tih chiang takin a târ lang a ni. (Gen. 2:9, 17; 3:22) Adama thlah atîr lama mite khân, mihringte’n ṭhat famkimna an hlat tial tial tih hmuh theiha lang chu an hre ngei ang. Eden huan luhna tûr kawngka chu khâr a ni a, mite chu an tarin, an thi bawk a ni. (Gen. 3:23, 24) Hun a liam zêl chuan, mihringte dam chhûng hun chu a tawi ta telh telh a. Adama chu kum 930 a dam a. Tuilêta dam khawchhuak Sema chu kum 600 lek damin, a fapa Arpaksada chu kum 438 a dam a ni. Tin, Abrahama pa, Tera chu kum 205 a dam a. Abrahama chu kum 175 a dam a, a fapa Isaaka chu kum 180 damin, Jakoba chu kum 147 a dam a ni. (Gen. 5:5; 11:10-13, 32; 25:7; 35:28; 47:28) Mi tam tak chuan dam chhûng hun a tawi telh telh chhan chu an hre ngei tûr a ni—chatuan nun beiseina hloh a nih vâng a ni, tih chu! Chatuan nunna neih lêt leh beisei chhan tûr an nei em?
4. Hmân laia mi rinawmte khân Pathianin Adama hloh hnu malsâwmnate a pe kîr leh dâwn tih rin theihna tûr chhan ṭha eng nge an neih?
4 Pathian Thu chuan: “Thil siam [mihring] zawng zawngte chu thil lawilo thu thua awmtîrin an awm tawh . . . beiseina neiin,” a ti a. (Rom 8:20) Eng beiseina neiin nge? Bible-a hrilh lâwkna hmasa ber chuan ‘rûl lû la tithitlingtu tûr’ ‘thlah’ chungchâng a sawi a. (Genesis 3:1-5, 15 chhiar rawh.) Mi rinawmte tân chuan, chu thutiam Thlah chuan Pathianin mihringte tâna a thiltum chu a ṭhulh dâwn loh tih beisei chhan tûr a pe a. Chu chuan Abela leh Nova ang mite hnênah Pathianin Adama hloh hnu malsâwmnate chu a pe kîr leh dâwn tih rinna tûrin chhan ṭha tak a pe bawk a ni. Hêng mite hian ‘thlah ke artui tihthitlinnaah’ chuan thisen chhuahna a tel dâwn tih an hriat ngei a rinawm.—Gen. 4:4; 8:20; Heb. 11:4.
5. Abrahama’n thawhlehna a ring tih engin nge târ lang?
5 Abrahama chungchâng hi han ngaihtuah teh. Fiaha a awm khân, Abrahama chuan a fapa mal neih chhun Isaaka hlan chu a inhuam a ni. Engvângin nge chutianga a inhuam? (Hebrai 11:17-19 chhiar rawh.) Thawhlehna a rin tlat vâng a ni. Abrahama chuan chutianga thawhlehna rinna tûr chhan a nei. Pathian Jehova chuan Abrahama chi thlah theihna chu tinung lehin, chu chuan amah leh a nupui, Sari chu an tar hnuah fapa a neihtîr a. (Gen. 18:10-14; 21:1-3; Rom 4:19-21) Abrahama chuan Pathian Jehova thutiam pawh a nei bawk. Pathian chuan a hnênah: “Isaakaah hian i thlahte an la ti dâwn si a,” a ti a ni. (Gen. 21:12) Chuvângin, Abrahama chuan Pathianin Isaaka a kaih thawh beisei chhan tûr ṭha tak a nei a ni.
6, 7. (a) Eng thuthlung nge Jehova’n Abrahama nêna a siam? (b) Engtin nge Abrahama hnêna Jehova thutiam chuan mihringte tân beiseina a pêk?
6 Abrahama rinna langsâr tak avângin, Pathian Jehova chuan Abrahama fa, a nih loh leh ‘thlah’ chungchângah thuthlung a siam a. (Genesis 22:18 chhiar rawh.) Chu “thlah” bul ber chu Isua Krista a ni. (Gal. 3:16) Pathian Jehova chuan Abrahama hnênah chuan a “thlahte” chu “vâna arsi zât leh tuifinriat kama ṭiau vaivut zâtin”—Abrahama tâna a zât tûr chiah hriat theih lohvin—a la tipung ang tih a hrilh a. (Gen. 22:17) Mahse, a hnuah chuan a zât chu târ lan a ni ta. Chu “thlah” chu, Isua Krista leh a Lalrama a rorêlpui tûr mi 1,44,000-te hmanga din a ni. (Gal. 3:29; Thup. 7:4; 14:1) Messia Lalram chu ‘khawvêla chi tin la tithawvengtu’ tûr chu a ni.
7 Abrahama chuan Pathian Jehova’n amah nêna thuthlung a siamin a huam tel zawng zawng chu a hre kim lo mai thei a. Amaherawhchu, “khua lungphûmte nei mi . . . chu a nghâk reng si a,” tiin Bible chuan a sawi a ni. (Heb. 11:10) Chu khua chu Pathian Ram a ni a. Chu Lalram hnuaia malsâwmnate chên tûr chuan Abrahama chu a nun leh a ngai ang. A tân chu lei chatuan nunna chu thawhhlehna hmanga neih theih a ni ang. Tin, Armageddon-a dam khawchhuakte emaw, thihna aṭanga kaih thawhlehte emaw tân pawh chatuana nun chu neih theih a ni bawk ang.—Thup. 7:9, 14; 20:12-14.
“Thlarauvin Min Tur A Ni”
8, 9. Engvângin Joba bu chu mi pakhat fiahna tawh chungchâng ziakna mai a nih loh?
8 Abrahama tuchhuan Josefa leh zâwlnei Mosia te hun inkârah chuan mi pakhat Joba tih hming pu chu a awm a. Mosia ziak ni âwm tak Bible-a Joba bu hian Pathian Jehova’n Joba hrehawm tawrh a phal chhan leh a hnua a chunga thilthlengte chu a hrilhfiah a ni. Mahse, Joba bu chu mi pakhat fiahna tawh chungchâng ziakna mai ni lovin, finna nei thil siam zawng zawngte nghawngtu lei leh vâna thu buai pawimawhte chungchâng sawina pawh a ni bawk. Chu lehkhabu chuan Pathian Jehova’n a lal chungnunna fel taka a hman dân hriatthiamna a pe a, lei lama Pathian chhiahhlawh zawng zawngte rinawmna leh nun beiseina chu Eden huana chhuak thu buai nên a inkaihhnawih tih a târ lang bawk a ni. Joba chuan chu thu buai chu hre thiam lo mah se, a ṭhian pathumte’n dikna, a nih loh leh rinawmna vawng lo anga an chhuah chu a pawm lo. (Job. 27:5) Chu chuan kan rinna chu a tichak tûr a ni a, rinawmna kan vawng thei tih leh Jehova lal chungnunna kan chawisâng thei tih hre tûrin min ṭanpui tûr a ni bawk.
9 Joba thlamuantu anga inchhâl a ṭhian pathumte’n thu an sawi zawh chuan, “Barakiela fapa, Elihua, Buz mi chuan a chhâng” ve ta a. Engin nge chhâng tûra tur? Ani chuan “thusawi tûr ka ngah hle a, thlarauvin min tur a ni,” a ti. (Job. 32:5, 6, 18, NW) Pathian thlarauvin a thâwk khum avânga Elihua thusawite chu Joba’n malsâwmna a dawn khân tâwp mah se, a thusawite chuan mi dangte tân pawh awmze thûk tak a nei a. Mi rinawm zawng zawngte tân beiseina a pe bawk a ni.
10. Mi pakhat hnêna Pathian Jehova thuchah chu mi zawng zawng tâna hman theih châng a awm tih engin nge târ lang?
10 Pathian Jehova chuan mi zawng zawng tâna hman theih tûr thuchah chu mi mal hnêna pêk châng a nei a. Chu chu Babulon Lal Nebukadnezzara’n a mumanga thing lianpui kih a hmuhna Daniela hrilh lâwknaah a hmuh theih a ni. (Dan. 4:10-27) Chu mumang chuan Nebukadnezzara chungah thlen famkimna nei mah se, thlen famkimna ropui zâwk tak pawh a nei bawk. Chu chuan Lal Davida thlahte rorêlna hmanga lantîr lei lama Pathian rorêlna chu B.C.E. 607 aṭanga chhiar ṭana kum 2,520-naah a lo lang leh dâwn a ni tih a târ lang a ni. * Lei lama Pathian lalchungnunna chu kum 1914-a Isua Krista vâna Lalbera ṭhuttîr a nih hunah a thara lantîr leh a ni ang. Lalram rorêlnain thu âwih mihringte beiseina a thlen famkimtîr thuai dân tûr chu han ngaihtuah teh!
“Thlâna Liam Lovin Chhanhim Ang Che”
11. Elihua thusawi chuan Pathian chungchâng eng nge a târ lan?
11 Joba thusawi chu chhâng lêtin, Elihua chuan “mi hnêna a tâna ṭha hriattîr tûrin a tân vântirhkoh, palai pakhat, sâng zînga mi” chungchâng chu a sawi a. Chu palai chu “Pathian hnêna a ṭawngṭai” chuan eng thil nge lo thleng ang? Elihua chuan: “Tin, chu mi [Pathian] chuan amah duhsak takin, ‘Thlâna liam lovin chhanhim ang che, tlanna ka hmu ta e; a taksa hi tleirâwl thar leh sela, a vânglai chakna nîte chu lo kîr leh tawh se,’ ti sela,” tiin a sawi a. (Job. 33:23-26) Chûng thute chuan Pathianin mihring inlam lêtte tâna “tlanna” pawm a duhzia a târ lang a ni.—Job. 33:24.
12. Elihua thusawi chuan mipuite tân eng beiseina nge a pêk?
12 Zâwlneite pawhin an thu ziakte awmzia an hre thiam famkim lo ang bawkin, Elihua pawhin tlanna awmzia zawng zawng chu kimchang takin a hre thiam lo mai thei. (Dan. 12:8; 1 Pet. 1:10-12) Chuti chung chuan, Elihua thusawi chuan Pathianin engtik nîah emaw chuan tlanna chu a pawm ang a, mite chu tarna leh thihna ata a tizalên dâwn tih beiseina awm chu a târ lang a. Elihua thute chuan chatuan nun beiseina ropui tak chu a pe a ni. Joba bu chuan thawhlehna a awm dâwn tih a târ lang bawk.—Job. 14:14, 15.
13. Elihua thusawi hian Kristiante tân eng awmzia nge a neih?
13 Elihua thusawi chuan he khawvêl tihboralnaa dam khawchhuah inbeisei tûn laia Kristian maktaduai têlte tân pawh awmzia a nei chho zêl a. Dam khawchhuak zînga tarte chu an vânglai nîah an kîr leh ang. (Thup. 7:9, 10, 14-17) Chu bâkah, tho lehte an vânglai nîa an kîr leh tûr hmuh theihna chanvo pawh chu mi rinawmte hlimna tizualtu a ni bawk. Mahse, Hriak thih Kristiante tâna vâna thih theih lohna leh Krista “berâm dang” tâna leia chatuan nunna chu Krista tlanna inthawinaa rinna an neih leh neih lohvah a innghat a ni.—Joh. 10:16; Rom 6:23.
Thihna Chu Lei Ata Lem Hlen A Ni Ta
14. Israelte’n chatuan nun beiseina an neih theih nân Mosia Dân-in thiam loh a chantîrna ata tlan chhuah an ngai tih engin nge târ lang?
14 Abrahama thlahte chu Pathian nêna inlaichînna thu an thlun khân, hnam mal din an lo ni a. An hnêna Pathian Jehova’n Dân a pêk khân: “Ka dân leh ka rorêlte chu in zâwm tûr a ni: chu chu miin a tih chuan a nun phah ang,” tiin a sawi. (Lev. 18:5) Mahse, Israelte chu Dânin a phût ang thlapa an nun theih loh avângin, Dân chuan anni chu thiam loh a chantîr a, chu thiam loh channa ata chu Mosia Dân aia chungnung zâwk hmanga tlan chhuah an ngai a ni.—Galatia 3:13 chhiar rawh.
15. Davida chu eng malsâwmna lo awm tûr chungchâng nge ziak tûra thlarauva thâwk khum a nih?
15 Mosia hnuah chuan, Pathian Jehova chuan Bible ziaktu dangte pawh chatuan nun beiseina târ lang tûrin a thâwk khum a. (Sâm 21:4; 37:29) Entîr nân, fakna hla phuahtu Davida chuan Zion-a betu dikte inlungrualna chungchânga a fakna hla chu: “Chutah chuan LALPAN malsâwmna thu a pe a, kumkhuaa nunna tûr chu,” tih thuin a tlip a ni.—Sâm 133:3.
16. Pathian Jehova chuan Isaia hmangin ‘leilung luah zawng zawngte’ hma lam hun tûr chungchâng eng nge a tiam?
16 Pathian Jehova chuan Isaia chu leia chatuan nunna chungchâng hrilh lâwk tûrin a thâwk khum a. (Isaia 25:7, 8 chhiar rawh.) Mihringte thaw ipik taka ‘khuh’ bet tlattu—kawmawl—ang maiin, sualna leh thihna chuan mihringte chu a khuh bet tlat a ni. Pathian Jehova chuan a mite hnênah “leilung luah zawng zawng ata” sual leh thihna a lem hlen dâwn, a nih loh leh a la bo dâwn tih a tiam a ni.
17. Hrilh lâwk Messia chanvo eng hian nge chatuan nunna kawng hawng?
17 Mosia Dânin a phût Azazela pual kêl chunga thil tih dân tûr pawh hi han ngaihtuah teh. Kum tinin, Inremna Nîah, puithiam lal chuan ‘kêl nung lu chungah chuan a kut khinghnih a nghat a, a chungah chuan Israela thlahte khawlohna zawng zawngte chu a nghat a, kêl chuan an khawlohna zawng zawngte chu chên loh leiah a phur a, thlalêrah an chhuah ṭhîn a ni.’ (Lev. 16:7-10, 21, 22) Isaia chuan, chutiang bawka thil titu tûr, “natna,” “lungngaihna, leh “mi tam tak sualna” phur a, chatuan nunna kawng hawngtu tûr Messia lo awm tûr chu a sawi lâwk a ni.—Isaia 53:4-6, 12 chhiar rawh.
18, 19. Isaia 26:19 leh Daniela 12:13 thute hian eng beiseina nge a târ lan?
18 Pathian Jehova chuan Isaia kal tlangin a mi Israelte chu: “I mitthite chu an nung leh ang a; ka mi ruangte chu an tho leh ang. Vaivuta awmte u, harh ula, hlim takin zai rawh u: i daifîm chu thlaite daifîm ang a ni a, lei hian mitthite chu a paih chhuak dâwn si a,” tiin a hrilh a. (Is. 26:19) Hebrai Pathian Lehkha Thute chuan mitthi thawhlehna leh leia chatuan nun beiseina chu an târ lang chiang hle. Entîr nân, Daniela chu kum 100 a tlin dâwn khân Pathian Jehova chuan a hnênah: “I hahchâwl ang a, tâwpna a lo thlen hunah i awmna tûr hmun ruatah chuan i awm dâwn nia,” tiin a tiam a ni.—Dan. 12:13, The Holy Bible, Mizo (Lushai) - C.L. Re-edited.
19 Marthi pawhin thawhlehna a beisei avângin, a unaupa thi ta chungchângah: “Ni kin nia thawhlehnaah chuan a tho leh ang tih ka hria e,” tiin Isua hnênah a sawi thei a ni. (Joh. 11:24) Isua zirtîrna leh thlarauva thâwk khum a zirtîrte thuziak chuan chu beiseina chu a thlâk em? Leia chatuan nunna chu Pathianin mihringte tâna a pêk beiseina a la ni zêl em? A chhânna chu a dawta thuziakah kan ngaihtuah ang. (w09 8/15)
[Footnote]
^ par. 10 Pay Attention to Daniel’s Prophecy! (English) tih lehkhabu bung 6-na en rawh.
Kan Hrilhfiah Thei Em?
• Mihringte chu eng beiseina neiin nge “thil lawilo thu thua” awmtîr an nih?
• Engin nge Abrahama’n thawhlehna a rinzia târ lang?
• Joba hnêna Elihua thusawi chuan mihringte hnênah eng beiseina nge a pêk?
• Engtin nge Hebrai Pathian Lehkha Thute chuan thawhlehna leh leia chatuan nun beiseina chu a târ lan?
[Zirlai Atâna Zawhnate]
[Phêk 11-naa milem]
Joba hnêna Elihua thusawi chuan mite chu tarna leh thihna ata chhuah zalên an ni dâwn tih beiseina a pe
[Phêk 12-naa milem]
Daniela chu ‘tâwpna a lo thlen hunah a awmna tûr hmun ruatah chuan a awm dâwn’ tih tiam a ni