Vɩɩm sẽn kõn sa tẽngã zugã yaa Wẽnnaam n pʋlme
Vɩɩm sẽn kõn sa tẽngã zugã yaa Wẽnnaam n pʋlme
“Bõn-naandsã fãa lebga faoore, . . . Bãmb yaasdame n gũud tẽeb pidsgu.”—ROM 8:20, 21.
1, 2. a) Tõnd sẽn tẽed vɩɩm sẽn kõn sa tẽngã zugã maand-d-la bõe? b) Bõe yĩng tɩ neb wʋsg pa rat n sak n deeg rẽ?
TÕE tɩ y tẽra y sũur sẽn yɩ noog to-to, y sẽn wa n wʋm tɩ ka la bilfu, kʋʋlmã la kũumã na n saame tɩ ãdem-biisã vɩɩmd wakat sẽn kõn sa tẽngã zugã. (Zã 17:3; Wil. 21:3, 4) Vẽenega, y sũy yɩɩ noog hal tɩ y taas neb a taab pʋlem-no-kãngã. Koe-noog ning tõnd sẽn moond nebã meng pʋd n gomda vɩɩm sẽn kõn sa wã yelle. A kɩtame me tɩ d tagsg sẽn yaa to-to ne rũndã-rũndã vɩɩmã pa wõnd neb a taabã tagsg ye.
2 Tũudum wʋsg sẽn yet tɩ b tũuda Kiristã pa mi tɩ Biiblã wilgdame tɩ neb n na n wa vɩɩmd wakat sẽn kõn sa tẽngã zug ye. Baa ne Biiblã sẽn wilgd vẽeneg tɩ ninsaal yaa sɩɩg la t’a kiidame wã, wẽnd-dot wʋsg pʋsẽ, b ket n zãmsda nebã tɩ sɩɩgã yaa bũmb sẽn be ninsaal yĩngã pʋgẽ n pa kiidẽ, la tɩ ned kũum poore, a sɩɩgã kẽngda saasẽ. (Eze. 18:20, NW ) Woto kɩtame tɩ neb wʋsg pa rat n deeg tɩ ãdem-biisã na n wa vɩɩmda tẽngã zug wakat sẽn kõn sa ye. Dẽnd tõe tɩ d sokda d mens woto: Rẽ yĩnga Biiblã sɩd wilgdame tɩ nebã na n wa vɩɩmda tẽngã zug wakat sẽn kõn sa bɩ? Wakat bʋg la Wẽnnaam vẽneg rẽ n wilg ninsaalbã pipi?
‘B lebga faoore, n gũud tẽeb pidsgu’
3. Ninsaalbã naaneg poor bilf bala, wãn-wãn la Wẽnnaam wilg a sẽn dat bũmb ning ne-ba?
3 D yaab a Ãdem ne a Hawa naanegã poor bilf bala, a Zeova wilga a sẽn dat bũmb ning ne ãdem-biisã vẽenega. A wilga a Ãdem t’a sã n kell n sak yẽ, a na n vɩɩmda wakat fãa. (Sɩng. 2:9, 17; 3:22) Yaa vẽeneg t’a Ãdem kambã la a pipi yagensã paam n yãa yɛl toor-toor sẽn kɩt tɩ b bãng t’a Ãdem ne a Hawa maana yel-wẽnde, n kɩt tɩ ninsaal buudã fãa lebg koangda. Wala makre, b paam n yã b sẽn da gɩd Edɛn zẽedã zĩig noorã, n paas nebã sẽn kʋʋnd la b kiidẽ wã. (Sɩng. 3:23, 24) Rẽ tɛk n tar n watẽ, ninsaal yõorã woglem tara boogre. A Ãdem vɩɩmda yʋʋm 930. A Sɛm sẽn põs sa-kãsengã sasa wã vɩɩmda yʋʋm 600, t’a biig a Arpaksaad vɩɩmd yʋʋm 438. A Abrahaam ba a Teera vɩɩmda yʋʋm 205. A Abrahaam yõor woglem teka yʋʋm 175, t’a biig a Izaak ta yʋʋm 180, la a Zakoob ki a yʋʋm 147. (Sɩng. 5:5; 11:10-13, 32; 25:7; 35:28; 47:28) Tõe tɩ neb wʋsg sẽn wa n yã tɩ ninsaal yõorã woglem tara boogrã, b wʋma a võore. B bãngame tɩ ninsaal pa le tõe n vɩɩmd wakat sẽn kõn sa wa Wẽnnaam sẽn da ratã ye! La rẽ yĩnga b ra tara bʋʋm n na n tẽ tɩ ninsaal na n le wa tõog n vɩɩmda wakat fãa bɩ?
4. Bõe tɩ pĩnd wẽn-sakdbã ra tẽed tɩ Wẽnnaam na n wa kɩtame tɩ b paam bark nins a Ãdem sẽn bõnã?
4 Wẽnnaam Gomdã yeela woto: “Bõn-naandsã fãa [rat n yeel tɩ ãdem-biisã] lebga faoore. . . . Bãmb yaasdame n gũud tẽeb pidsgu.” (Rom 8:20, 21) Yaa tẽeb bʋgo? Biiblã pipi bãngr-gomd gomda “yageng” sẽn na n wa ‘pogl waafã zug’ yelle. (Karm-y Sɩngr 3:1-5, 15.) Woto kɩtame tɩ pĩnd wẽn-sakdbã ra miẽ tɩ Wẽnnaam sẽn pʋlem tɩ yageng n na n wa wã, wilgdame t’a sẽn da rat bũmb ning ne ninsaalbã sɩngrẽ wã pa toeem ye. Kɩtame tɩ rap wa a Abɛll la a Nowe ra tẽed tɩ Wẽnnaam na n kɩtame tɩ b lebs n paam bark nins a Ãdem sẽn kɩt tɩ b bõnã. Tõe tɩ nin-kãensã wa n bãngame me tɩ b sẽn na n wa ‘pogl yagengã na-kãsenkãarã,’ na n tũu ne zɩɩm daagre.—Sɩng. 4:4; 8:20; Heb. 11:4.
5. Bõe n wilgd t’a Abrahaam da tẽeda vʋʋgrã?
5 Bɩ d gom a Abrahaam yelle. Wẽnnaam sẽn wa n mak a Abrahaam n yeel-a t’a “kõ a Izaak tɩ yɩ maoongã,” a sakame n na n ‘kõ a meng bi-yendã.’ (Heb. 11:17) Bõe yĩng t’a sake? (Karm-y Hebre rãmb 11:19.) A ra tẽeda kũum vʋʋgrã! La a ra tara bʋʋm. Baa yẽ ne a pag a Saara sẽn da kʋʋl n pa le tõe n dogã, a Zeova kɩtame t’a Saara tõog n dɩk pʋg n doge. (Sɩng. 18:10-14; 21:1-3; Rom 4:19-21) Sẽn paase, a Abrahaam da tẽeda bũmb a Zeova sẽn pʋlm-a. Wẽnnaam da yeel-a-la woto: “Yaa a Izaak pendẽ la b sẽn na n bool a soab tɩ fo yagengã na n yi.” (Sɩng. 21:12, NW ) Dẽnd a Abrahaam da tara bʋʋm tɩ sek a na tẽ tɩ Wẽnnaam da na n vʋʋga a Izaake.
6, 7. a) A Zeova maana kaool-bʋg ne a Abrahaam? b) Bõe yĩng t’a Zeova sẽn pʋlem a Abrahaam bũmb ningã kɩt tɩ ãdem-biisã tẽed manegre?
6 A Abrahaam sẽn wilg t’a tara tẽeb-kãseng woto wã yĩnga, a Zeova maana kaool ne-a n gom a “yagensã” yelle. (Karm-y Sɩngr 22:18.) Kaoosg zugẽ, b wa n bãngame tɩ yaa a Zezi Kirist la a Abrahaam “yagengã.” (Gal. 3:16) La a Zeova ra yeela a Abrahaam t’a na n paasa a yagensã tɩ b yɩ wʋsg “wa ãds sẽn be saasẽ la wa bĩisr sẽn be ko-kãsengã noore.” Wakat kãng t’a Abrahaam da pa mi b sõorã ye. (Sɩng. 22:17) La kaoosg zugẽ, Wẽnnaam vẽenega b sõorã zãng n wilgi. Yaa a Zezi Kirist ne neb 144 000 sẽn na n naag-a n dɩ naam a Rĩungã pʋgẽ wã la a Abrahaam “yagensã.” (Gal. 3:29; Wil. 7:4; 14:1) Yaa ne Rĩung-kãng maasem la “dũniyã buud fãa na n paam barka.”
7 A Abrahaam da pa tõe n wʋm kaool ning a Zeova sẽn maan ne-a wã võor zãng ye. La baasgo, Biiblã yeelame t’a ra “gũuda tẽng sẽn tar yẽbgr sõma.” (Heb. 11:10) Tẽng sẽn tar yẽbgr sõma wã yaa Wẽnnaam Rĩungã. Sẽn na yɩl t’a Abrahaam paam bark nins Rĩungã sẽn na n wa ne wã, rẽnda b vʋʋg-a. Yaa rẽ poor la a na n wa paam n vɩɩmd wakat sẽn kõn sa tẽngã zugã. Sẽn na n põs-b Armagedõ sasa wã, n paas b sẽn na n vʋʋg-b rãmbã me na n wa paam n vɩɩmda wakat sẽn kõn sa.—Wil. 7:9, 14; 20:12-14.
‘Yaa wa bũmb n pẽdgd maam’
8, 9. Bõe yĩng tɩ d tõe n yeel tɩ Zoob sebrã pa gomd a Zoob namsgã yell bala?
8 A Abrahaam yagen-tʋbrakẽeg a Zozɛf zãmaana ne no-rɛɛs a Moiiz zãmaana sʋka, rao a ye n zĩnd t’a yʋʋr boondẽ t’a Zoobe. Wõnda yaa a Moiiz n gʋls Biiblã sebr ning b sẽn boond tɩ Zoob sebrã. Seb-kãng pʋgẽ, b bilgda bũmb ning sẽn kɩt t’a Zeova sak t’a Zoob namsã, la yellã sẽn baas to-to. La pa a Zoob namsgã yell bal la sebrã gomd ye. A gomda bũmb sẽn pak malɛgsã la ãdem-biisã fãa yell me. Sebrã sõngd-d lame me tɩ d bãng tɩ sɩd zemsame t’a Zeova yɩ yĩngr la tẽng naaba, la a wilgdẽ me tɩ segdame tɩ tõnd ned kam fãa modg n sak-a n wilg t’a Sʋɩtãan sẽn wa ne kɩɩsg ning Edɛnnã pa segd ye. Baa ne a Zoob sẽn da pa mi tɩ yaa yel-kãng poorẽ la a sẽn namsdã, a kell n pa sak t’a zo-rãmb a tãabã tõog n kɩt t’a tẽ t’a basa Wẽnnaam sakr ye. (Zoob 27:5) Woto kengda tõnd raoodo, la a sõngd-d tɩ d bãng tɩ tõnd me tõe n kell n saka a Zeova n wilg tɩ yẽ n sɩd segd n yɩ yĩngr la tẽng naaba.
9 A zo-rãmb a tãabã sẽn wa n gom n sa wã, “Buuz rao a Barakɛll biig a Elihu” leok-b lame. Yɩɩ Wẽnnaam vʋʋsem sõngã n tus-a t’a na n gome. Bala a yeela woto: “Yaa wa bũmb n be m pʋgẽ wã n pẽdgd maam.” (Zoob 32:5, 6, 18) Yaa sɩd tɩ vʋʋsem sõngã sẽn kɩt t’a Elihu togs goam ninsã paama pidsg a Zoob namsgã saab poore. La a goamã sõngda neb a taab me. A sẽn yeelã kɩtame tɩ wẽn-sakdbã fãa miẽ tɩ b na n wa paama barka.
10. Bõe n wilgd t’a Zeova mi n taasa nin-yend koɛɛg tɩ na n pids nin-kãng zugu, la wa pids ãdem-biisã fãa yĩnga?
10 Wakat ninga, a Zeova mi n taasa nin-yend koɛɛga, tɩ na n pids nin-kãng zugu, la wa pids ãdem-biisã fãa yĩnga. Ad makre. Babilon rĩm a Nebukadnezaar da zãmsa zãmsdo, tɩ b gomd rẽ yell a Daniɛll bãngr-goamã pʋgẽ. Rĩmã zãmsame n yã tɩ-kãsenga, tɩ b wa kɛ-a n lubi. (Dan. 4:7-24) Yaa sɩd tɩ zãmsdã pidsa a Nebukadnezaar zugu, la a ra gomda bũmb a to sẽn yaa kãseng n yɩɩd rẽ yelle. A ra wilgdame t’a Zeova naamã a sẽn da kɩt t’a Davɩɩd roogã rĩm dãmb dɩt a yʋʋrã yĩngã sẽn lʋɩ yʋʋmd 607 sẽn deng a Zezi rogmã na n lebs n lugla yʋʋm 2 520 loogr poore. * Yʋʋmd 1914 soabã pʋgẽ, Wẽnnaam lebs n lugla a Rĩungã saasẽ, n kɩt t’a Zezi lebg rĩma, n na n wa soog dũniyã gilli. Yãmb we n tags n ges Rĩung-kãng sẽn na n wa kɩt tɩ wẽn-sakdbã sẽn tẽed bũmb ninsã fãa pids to-to wã!
“Da bas t’a sig bokẽ ye!”
11. A Elihu sẽn yeelã wilgda bõe?
11 A Elihu sẽn leok a Zoobã, a goma “koe-taasd” bɩ “gom-dɛɛs b sẽn yãk tusr sʋk” yelle, n yeel t’a na n wilga ãdem-biig “t’a yaa tɩrga.” A Elihu wilgame tɩ koe-taasd kãng sã n “yõk Wẽnnaam sɛɛg sẽn na yɩl t’a sũur yɩ noog ne-a, [rat n yeel tɩ ne ãdem-biigã,]” bõe n na n maane? A yeelame tɩ Wẽnnaam na n zoeya a nimbãaneg n yeel woto: “Da bas t’a sig bokẽ ye! M paama rondo! Bɩ a yĩngã lebg poll n yɩɩg a bi-bɩɩlmã sasa, bɩ a lebs n paam keelem ning a sẽn da tar a bi-bɩɩlmã sasa wã.” (Zoob 33:23-26, NW ) Gom-kãensã wilgdame tɩ Wẽnnaam na n sak n deega “rondo,” n bas neb nins sẽn tek yam n kos sugrã yel-wẽnã taale.—Zoob 33:24.
12. A Elihu goamã kɩtame tɩ d bãng bõe ãdem-biisã beoog-daarã wɛɛngẽ?
12 Tõe t’a Elihu pa wʋm rondã võor sõma, wa Wẽnnaam no-rɛɛsdb wʋsg me sẽn da pa wʋm bũmb nins a sẽn kɩt tɩ b gʋlsã võor sõma wã. (Dan. 12:8; 1 Pɩɛ. 1:10-12) La baasgo, a Elihu sẽn yeelã ra wilgdame tɩ Wẽnnaam da na n wa sak n deega rondo, n kɩt tɩ ãdem-biisã tõog n paam b mens ne kʋʋlmã la kũumã. A Elihu goamã kɩtame tɩ d bãng tɩ nebã na n wa vɩɩmda wakat sẽn kõn sa. Zoob sebrã leb n wilgdame tɩ kũum vʋʋgr na n zĩndame.—Zoob 14:14, 15.
13. A Elihu sẽn yeel bũmb ningã sõnga kiris-nebã tɩ b bãng bõe?
13 Rũndã-rũndã, a Elihu goamã sõnga kiris-neb milyõ rãmbã sẽn saagd n na n wa põs dũni kãngã sãoongã sasa wã tɩ b bãng yɛl wʋsgo. Wilgdame tɩ sẽn na n põs-bã sʋka, neb nins sẽn kʋʋlã na n le lebga poala. (Wil. 7:9, 10, 14-17) Sẽn paase, hal baa rũndã-rũndã, Wẽnnaam nin-buiidã sũy nooma wʋsgo, b sẽn mi tɩ b na n kɩtame tɩ sẽn na n vʋʋg-bã me lebg poalã yĩnga. Yaa vẽeneg tɩ yaa tɩlae ne kiris-neb nins sẽn paam vʋʋsem sõngã zaeeb n na n wa tɩ vɩɩmd saasẽ n pa tol n tõe n le ki wã, la kiris-neb nins a Zezi sẽn bool t’a “piis a taab” tɩ b segd n wa vɩɩmd tẽngã zugã, tɩ b wilgdẽ tɩ b miime la b tẽedame tɩ Kiristã kũumã yɩɩ rondo.—Zã 10:16; Rom 6:23.
B na n sãama kũum wakat fãa yĩnga
14. Bõe n wilg tɩ sẽn na yɩl n wa paam vɩɩm sẽn pa satã, ra yaa tɩlae ne Israɛll nin-buiidã tɩ b paam sẽn yɩɩd a Moiiz Tõogã?
14 Wẽnnaam sẽn wa n maan kaool ne a Abrahaam yagensã, b lebga buud sẽn welg toore. A Zeova sẽn wa n kõt-b a Tõogã, a yeela woto: ‘Bɩ y sak mam tõoda ne m noorã. Ned sã n sak bãmba, a na n vɩɩmda ne bãmba.’ (Maan. 18:5) La sẽn mik tɩ Israɛll nin-buiidã ra pa tõe n tũ Tõogã sẽn zems zãngã n pa bʋdgã, ra ningd-b-la taale, tɩ ra yaa tɩlae tɩ fãagd wa yols-b ne taal-kãnga.—Gal. 3:13.
15. Wẽnnaam vẽnega a Davɩɩd t’a gom bark bʋg sẽn wat yelle?
15 A Moiiz loogr poore, a Zeova vẽnega Biiblã gʋlsdb a taab tɩ b gom vɩɩm sẽn pa satã yelle. (Yɩɩl 21:5; 37:29) Wala makre, yɩɩl-gʋlsd a Davɩɩd goma Wẽnnaam nin-buiidã sẽn lagem taab Siõ yelle, n yeel a yɩɩllã baasgẽ woto: “Yaa beenẽ la Zusoabã kõ noor ne bark ninga sẽn yaa vɩɩm wakat sẽn ka sɛtã.”—Yɩɩl 133:3.
16. A Zeova kɩtame tɩ no-rɛɛs a Ezai pĩnd n togs t’a na n wa maana bõe “dũniyã zugu”?
16 A Zeova ra vẽenega no-rɛɛs a Ezai t’a gom vɩɩm sẽn pa satã sẽn na n wa zĩnd tẽngã zugã yelle. (Karm-y Ezai 25:7, 8.) Yel-wẽndã ne kũumã yaa sũ-sãoong sẽn namsd ãdem-biisã fãa. A Zeova yeta a nin-buiidã tɩ b bas b yam t’a na n sãama kũumã sẽn be “dũniyã zugã” wakat sẽn ka sɛt yĩnga.
17. B pĩnd n wilgame tɩ Mesi wã ra na n wa maana bõe tɩ kɩt tɩ nebã wa paam vɩɩm sẽn pa satã?
17 D tẽeg a Moiiz Tõogã sẽn da wilg tɩ b maan bũmb ning ne a Azazɛll boɛɛgã me yelle. Yʋʋmd fãa, paasg daarã sã n ta, maan-kʋʋdbã kãsem segd n ‘palga a nus boe-vɩɩgã zugu, n vẽneg n togs Israɛll nebã yel-wẽnã la b kɩɩsgã ne b kongrã fãa n ning bãmb boe-vɩɩgã zugu. La boɛɛgã na n zɩɩ bãmb yel-wẽnã fãa a zug n kẽng we-zãrgẽ wã.’ (Maan. 16:7-10, 21, 22) A Ezai ra pĩnd n togsame tɩ Mesi wã ra na n wa maana a buudu. A ra na n wa reega “tõnd toodo,” d ‘sũ-sãamse,’ la a reeg “koangdb wʋsg sɩbgr” bɩ b yel-wẽna, n kɩt tɩ d wa tõog n paam vɩɩm sẽn pa satã.—Karm-y Ezai 53:4-6, 12.
18, 19. Bõe yell la b gomd Ezai 26:19 la Daniɛll 12:13 wã pʋgẽ?
18 A Zeova vẽnega a Ezai t’a yeel Israɛll nin-buiidã woto: “Sẽn ki-b yãmb maasmẽ wã na n vʋʋgame, m nebã na n nekame. Sẽn gãe-b tẽngã tomẽ wã fãa gilli, la b na n kelma b sũ-noogo. Dũni fãa Wẽnd na n kɩtame tɩ vẽenem sig wa meenem, tɩ tẽngã na n lebsa kɩɩmsã b vɩɩm.” (Ezai 26:19, Sebr Sõngo) Biiblã babg ning b sẽn da gʋls ne hebre wã wilgda vẽeneg tɩ kũum vʋʋgr la vɩɩm sẽn pa sat n wate. Wala makre, no-rɛɛs a Daniɛll sẽn wa n kolg yʋʋm 100, a Zeova yeel-a-la woto: “Kẽng n ta f tɛk raar n vʋʋse. La fo na n vʋʋgame n deeg f zĩig wakatã sɛɛb raare.”—Dan. 12:13.
19 A Mart sẽn da tẽed tɩ kũum na n vʋʋgame wã yĩnga, a kẽemã sẽn wa n ki wã, a yeela a Zezi woto: “Mam miime tɩ yẽ na n vʋʋga kũum vʋʋgr wakat sẽn yaa yaoolem daarã.” (Zã 11:24) Rẽ yĩnga a Zezi sẽn zãms nebã bũmb ninsã, n paas Wẽnnaam sẽn kɩt t’a karen-biisã gʋls sɛb ninsã wilgdame tɩ kũum vʋʋgrã pa na n le yɩ wa a Mart sẽn da tẽedã bɩ? A Zeova ket n datame tɩ ãdem-biisã wa vɩɩmd wakat sẽn kõn sa tẽngã zug bɩ? Sõsg ning sẽn pʋgdã na n leoka sogs-kãensã.
[Tẽngr note]
^ sull 10 Ges-y Prêtons attention à la prophétie de Daniel ! sebrã sak a 6.
Y tõe n wilgame bɩ?
• “Bõn-naandsã lebga faoor” n gũud tẽeb bʋg pidsgu?
• Bõe n wilgd t’a Abrahaam ra tẽeda kũum vʋʋgrã?
• A Elihu sẽn yeel a Zoob bũmb ningã wilgda bõe?
• Bõe la Biiblã babg ning b sẽn da gʋls ne hebre wã yet tɩ wilgd vẽeneg tɩ kũum na n vʋʋgame, la tɩ neb n na n vɩɩmd tẽngã zug wakat sẽn kõn sa?
[Zãmsgã sogsgã]
[Foto, seb-neng 11]
A Elihu sẽn yeel a Zoob bũmb ningã wilgdame tɩ ãdem-biisã na n wa paama b mens ne kʋʋlmã la kũumã
[Foto, seb-neng 12]
B yeela a Daniɛll vẽeneg tɩ b na n wa vʋʋg-a lame ‘t’a reeg a pʋɩɩr wakatã sɛɛb raare’