Lavi eternel lo later i en lespwar pour bann Kretyen

“[Bondye] pou eswiy tou larm dan zot lizye. Lanmor pou nepli egziste.”—REV. 21:4.

1, 2. Ki mannyer nou konnen ki bokou Zwif dan premye syek ti annan lespwar pour ganny lavi eternel lo later?

EN ZENN onm ris e enportan ti tay kot Zezi, tonm azenou devan li e demann li: “Bon Met, ki mon bezwen fer pour ganny lavi eternel?” (Mark 10:17) Sa zenn onm ti pe demann Zezi konsernan ganny lavi eternel, me kote? Parey nou ti diskite dan lartik presedan, plizyer syek pli boner, Bondye ti’n donn bann Zwif sa lespwar rezireksyon ek lavi eternel lo later. Sa lespwar ti popiler parmi bokou Zwif dan premye syek.

² I paret ki Mart, zanmi Zezi ti annan sa lespwar rezireksyon lo later antet kan i ti dir sa konsernan son frer ki ti’n mor: “Mon konnen ki i pou resisite zour larezireksyon.” (Zan 11:24) I vre, bann Sadiseen sa letan pa ti krwar dan rezireksyon. (Mark 12:18) Parkont, dan son liv Judaism in the First  Centuries of the Christian Era, George Moore i dir: “Bann dokiman . . . dan dezyenm oubyen premye syek avan nou lepok, i prouve ki i ti annan en krwayans ki dan en kek moman enportan dan listwar lemonn, bann dimoun ki’n mor parmi bann zenerasyon dan lepase ti pou reganny lavi lo later.” Sa zenn onm ris ki ti apros Zezi ti anvi ganny lavi eternel lo later.

3. Ki kestyon pou ganny egzaminen dan sa lartik?

³ Denozour, plizyer larelizyon ek spesyalis Labib pa krwar ki sa lespwar pour viv pour touzour lo later i en lansennyman Kretyen. Laplipar dimoun i krwar ki ler zot mor zot pou al viv dan lesyel. Alor, kan bann lekter Lekritir Grek Kretyen i bat avek sa lekspresyon “lavi eternel,” bokou i krwar ki i touzour refer avek viv dan lesyel. Eski sa i vre? Ki Zezi ti oule dir kan i ti koz lo lavi eternel? Ki son bann disip ti krwar? Eski Lekritir Grek Kretyen i donn lespwar konsernan lavi eternel lo later?

Lavi eternel dan “monn nouvo”

4. Ki pou arive dan “monn nouvo”?

⁴ Labib i ansennyen ki bann Kretyen swazir pou ganny resisite pour viv dan lesyel e renny lo later. (Lik 12:32; Rev. 5:9, 10; 14:1-3) Parkont, kan Zezi ti koz lo lavi eternel, i pa ti pe toultan mazin zis sa group antet. Egzamin sa ki Zezi ti dir son bann disip apre ki sa zenn onm ris ti’n ale byen tris akoz i ti’n demann li pour les deryer tou son byen e vin enn son disip. (Lir Matye 19:28, 29.) Zezi ti dir son bann zapot ki zot ti pou parmi bann ki ti pou rennyen konman lerwa e ki zot ti pou ziz “sa douz tribi Izrael,” setadir bann imen ki pa form parti sa group ki pou dirize dan lesyel. (1 Kor. 6:2) I ti osi koz lo en rekonpans pour “tou bann” ki swiv li. Sa bann dimoun osi “pou erit lavi eternel.” Tou sa la pou ariv dan “monn nouvo.”

5. Ki mannyer ou kapab eksplik sa term “monn nouvo”?

⁵ Ki Zezi ti oule dir par sa term ki’n ganny tradwir “monn nouvo”? Dan The Bible—An American Translation sa lekspresyon in ganny tradwir “nouvo lemonn,” dan The Jerusalem Bible in ganny tradwir “kan tou keksoz i vin nef,” e dan The Holy Bible—New International Version in ganny tradwir “tou keksoz pou ganny refer a-nef.” Vi ki Zezi ti servi sa term san okenn leksplikasyon, i evidan ki i ti pe refer avek lespwar ki bann Zwif ti deza annan pour plizyer syek. En nouvo kondisyon ti pou egziste lo later pour ki tou keksoz ti pou parey zot ti ete dan zarden Edenn avan Adan ek Ev ti fer pese. Ler tou keksoz pou ganny refer a-nef, promes Bondye konsernan “en nouvo lesyel ek en nouvo later” pou ganny akonplir.—Iza. 65:17.

6. Ki sa legzanp lo mouton ek kabri i ansenny nou lo lespwar lavi eternel?

⁶ Zezi ti osi koz lo lavi eternel dan son diskour konsernan lafen oubyen konklizyon sa sistenm. (Mat. 24:1-3) I ti dir: “Kan Fis-de-Lonm pou vini dan son laglwar avek tou son bann lanz, i pou asiz lo son tronn laglwar. Tou nasyon pou ganny rasanble devan li e i pou separ zot an de group parey en berze i separ son mouton ek bann kabri.” Tou bann move dimoun ki pou ganny zize “pou al dan pinisyon eternel, me bann bon pou ganny lavi eternel.” “Bann bon” ki ganny lavi eternel i sa bann ki’n fidelman siport “bann frer” Kris ki ganny swazir par lespri sen. (Mat. 25:31-34, 40, 41, 45, 46) Lefet ki bann Kretyen swazir pou vin bann dirizan dan Rwayonm ki dan lesyel, alor “bann bon” i bezwen bann sitwayen sa Rwayonm. Labib ti predir: “[Lerwa Zeova] pou annan bann sitwayen depi lanmer ziska lanmer e depi Larivyer ziska kot bann bout later.” (Ps. 72:8) Sa bann sitwayen pou rezwir lavi eternel lo later.

 Ki Levanzil Zan i montre?

7, 8. Ki sa de diferan lespwar ki Zezi ti koz lo la avek Nikodenm?

⁷ Parey in ganny rikorde dan Levanzil selon Matye, Mark ek Lik, Zezi i servi sa term “lavi eternel” dan sa bann lokazyon ki nou’n mansyonnen pli boner. Levanzil selon Zan i sit parol Zezi konsernan viv pour touzour 17 fwa. Annou egzamin serten landrwa kot sa lide i aparet pour vwar ki Zezi ti dir lo lespwar lavi eternel lo later.

⁸ Dapre Zan, premye fwa ki Zezi ti koz lo lavi eternel ti avek en Farizyen ki ti apel Nikodenm. I ti dir Nikodenm: “Personn pa kapab antre dan Rwayonm Bondye si i pa ne par delo e par Lespri-sen.” Sa bann ki pou antre dan Rwayonm ki dan lesyel fodre i “ne de nouvo.” (Zan 3:3-5) Zezi pa ti aret la. Apre sa i ti koz lo sa lespwar ki posib pour tou dimoun dan lemonn. (Lir Zan 3:16.) Zezi ti pe refer avek lespwar lavi eternel pour son bann disip swazir dan lesyel e osi pour lezot ki pou viv lo later.

9. Lo ki lespwar Zezi ti koz lo la avek en madanm Samariten?

⁹ Apre ki i ti’n koz avek Nikodenm Zerizalenm, Zezi ti al dan nor ver Galile. Dan semen, i ti zwenn en madanm kot pwi Zakob o bor lavil Sikar ki ti dan Samari. I ti dir sa madanm: “Sa ki bwar delo ki mwan mon pou donn li, i pa pou zanmen swaf. Sa delo ki mon pou donn li, pou vin en sours lavi eternel ki pou koul an labondans.” (Zan 4:5, 6, 14) Sa delo i reprezant sa provizyon ki Bondye in fer pour tou bann imen ganny lavi eternel, enkli sa bann ki pou viv lo later. Dan liv Revelasyon, Bondye li menm i ganny dekrir pe dir: “Sa ki swaf, mon pou donn li drwa bwar delo dan sours delo lavi gratwitman.” (Rev. 21:5, 6; 22:17) Alor, Zezi pa ti koz avek sa madanm Samariten konsernan lavi eternel zis pour bann zeritye Rwayonm ki’n ganny swazir, me osi pour bann krwayan ki annan lespwar pour viv lo later.

10. Apre ki i ti’n geri en zonm kot basen Betzata, ki Zezi ti dir bann opozan relizye konsernan lavi eternel?

¹⁰ Son lannen apre, Zezi ti ankor enn fwa Zerizalenm. I ti geri en zonm ki ti malad o bor basen Betzata. Pour eksplik bann Zwif ki ti pe kritik sa ki i ti’n fer, Zezi ti dir: “Garson pa kapab fer nanryen lo limenm, i fer sa ki i war son Papa pe fer.” Apre ki i ti’n dir zot ki Papa in “donn son Garson drwa pour zize,” Zezi ti dir: “Tou dimoun ki ekout mon parol e krwar dan sa enn ki’n anvoy mwan i posed lavi eternel.” Zezi ti osi dir: “Sa ler pe arive kan tou bann mor ki dan tonbo pou tann . . . lavwa [Fis de lonm], e zot pou sorti dan zot tonbo. Bann ki’n fer sa ki byen, pou resisite pour resevwar lavi, me bann ki’n fer sa ki mal, pou resisite pou ganny kondannen.” (Zan 5:1-9, 19, 22, 24-29) Zezi ti pe dir sa bann Zwif ki ti pe persekit lezot ki i sa enn ki Bondye ti’n apwente pour akonplir lespwar  ki bann Zwif ti annan konsernan lavi eternel lo later e ki i ti pou fer li par resisit bann dimoun mor.

11. Ki mannyer nou konnen ki sa lespwar pour ganny lavi eternel lo later i enplike dan sa parol ki Zezi ti dir dan Zan 6:48-51?

¹¹ An Galile, plizyer milye dimoun ki ti anvi ganny dipen ki Zezi ti fer par mirak ti konmans swiv li. Zezi ti koz avek zot lo en lot kalite dipen e sa ti “dipen vivan” oubyen dipen lavi. (Lir Zan 6:40, 48-51.) I ti dir: “Dipen ki mon pou donn li se mon laser.” Zezi pa ti donn son lavi zis pour bann ki pou renny avek li dan son Rwayonm dan lesyel, me osi “pour ki lemonn i viv,” andotmo pour bann imen ki’n ganny libere. “Si en dimoun i manz sa dipen,” setadir met lafwa dan pouvwar sakrifis Zezi konman en ranson, i pou annan sa posibilite pour ganny lavi eternel. Vreman alor, ler Zezi ti pe refer avek ‘viv pour touzour’ sa ti enplik sa lespwar ki bann Zwif ti annan depi lontan pour viv lo later eternelman pandan renny Mesi.

12. Ler Zezi ti pe koz avek bann opozan, ki lespwar i ti pe refer avek kan i ti dir ki ‘i pou donn lavi eternel son bann mouton’?

¹² Pli tar, pandan Lafet Dedikasyon Zerizalenm, Zezi ti dir son bann opozan: “Me zot pa krwar akoz zot pa form parti mon bann mouton. Mon bann mouton i ekout mon lavwa, mon konn zot e zot swiv mwan. Mon donn zot lavi eternel.” (Zan 10:26-28) Eski Zezi ti pe koz zis lo lavi dan lesyel ouswa i ti pe osi mazin lavi eternel dan paradi lo later? Zezi ti’n fek rekonfort son bann disip avek sa parol: “Pa bezwen per, pti troupo, akoz zot Papa i’n war bon pour donn zot son Rwayonm.” (Lik 12:32) Parkont, zour sa menm Lafet Dedikasyon, Zezi ti dir: “Mon annan ankor [oubyen “lezot,” NW] mouton ki pa dan sa berkay. Mon bezwen anmenn zot osi.” (Zan 10:16) Sa i fer alor ki kan Zezi ti pe koz avek sa bann opozan, son parol ti enplik tou le de lespwar, setadir lespwar pour viv dan lesyel pour “pti troupo” ek lespwar pour viv pour touzour lo later pour plizyer ‘lezot mouton.’

En lespwar ki pa bezwen leksplikasyon

13. Ki Zezi ti oule dir kan i ti dir: “Ou pou avek mwan dan paradi”?

¹³ Pandan son soufrans lo poto martir, Zezi ti san okenn dout konfirm lespwar ­limanite. En bandi ki ti akote li lo en poto ti  dir: “Zezi, mazin mwan ler ou retournen konman lerwa.” Zezi ti promet li: “An verite, mon dir ou ozordi ou pou avek mwan dan paradi.” (Lik 23:42, 43) Vi ki sa zonm ti en Zwif, i pa ti bezwen okenn leksplikasyon lo Paradi. I ti konn konsernan lespwar lavi eternel lo later dan sa lemonn ki ti pou vini.

14. (a) Kwa ki montre ki referans avek lavi eternel dan lesyel ti difisil pour bann zapot konpran? (b) Kan ki bann disip Zezi ti konpran klerman konsernan lespwar pour viv dan lesyel?

¹⁴ Me i ti bezwen annan en leksplikasyon kan Zezi ti refer avek lespwar pour viv dan lesyel. Kan i ti koz avek son bann disip konsernan son depar pour al dan lesyel e prepar en plas pour zot, zot pa ti konpran ki i ti pe dir. (Lir Zan 14:2-5.) Pli tar, i ti dir zot: “Mon annan ankor en kantite keksoz pour dir zot, me zot pa kapab siport tousala pour le moman. Kan Lespri laverite i vini, i pou gid zot dan laverite an antye.” (Zan 16:12, 13) Bann disip Zezi ti vreman konpran ki zot tronn ti pou dan lesyel apre Lapannkot lannen 33 N.L., kan zot ti ganny swazir par lespri sen Bondye. (1 Kor. 15:49; Kol. 1:5; 1 Pyer 1:3, 4) Lespwar pour viv dan lesyel ti ganny revele e se sa ki bann let enspire dan Lekritir Grek Kretyen i koz plis lo la. Me eski sa bann let i konfirm lespwar lavi eternel lo later?

Ki bann let enspire i dir?

15, 16. Ki mannyer let enspire pour bann Ebre ek parol Pyer i atir latansyon lo lespwar konsernan lavi eternel lo later?

¹⁵ Dan son let pour bann Ebre, zapot Pol ti adres son bann kanmarad Kretyen konman “bann frer sen, . . . ki Bondye in apele.” Me i ti osi dir ki Bondye ti’n soumet “sa monn nouvo ki pe vini” avek Zezi. (Ebr. 2:3, 5; 3:1) Dan Lekritir Grek Kretyen, sa mo orizinal ki’n ganny tradwir “monn nouvo” i touzour refer avek later ki ranpli avek bann imen. Me “sa monn nouvo ki pe vini” i sa sistenm alavenir lo later ki pou ganny dirize anba dominasyon Zezi Kri. Apre sa, Zezi pou akonplir promes Bondye: “Bann dimoun drwat pou posed later e zot pou reste lo la pour touzour.”—Ps. 37:29.

¹⁶ Zapot Pyer ti osi ganny enspire pour ekrir lo lavenir bann imen. I ti ekrir: “Me lesyel ek later in ganny prezerve par sa menm parol, pour ganny detri par dife. I’n ganny garde pour sa zour zizman kan bann move dimoun pou ganny detri.” (2 Pyer 3:7) Kwa ki pou ranplas sa lesyel ki ganny reprezante par bann gouvernman ek sa move sosyete imen ki egziste ozordi? (Lir 2 Pyer 3:13.) Zot pou ganny ranplase avek “nouvo lesyel” setadir Rwayonm Bondye dan lanmen Kris ek “nouvo later” ki pou en sosyete imen kot pou annan zis bann vre adorater.

17. Ki mannyer lespwar bann imen i ganny dekrir dan Revelasyon 21:1-4?

¹⁷ Bann vizyon dan dernyen liv Labib osize bann imen enparfe ziska ki zot vin parfe i tous nou leker en kantite. (Lir Revelasyon 21:1-4.) Sa in lespwar bann dimoun fidel depi ki imen ti perdi perfeksyon dan zarden Edenn. Bann dimoun drwat pou viv dan Paradi lo later eternelman san vin vye. Sa lespwar i solidman baze lo Lekritir Ebre ek Lekritir Grek Kretyen e i kontinyen fortifye bann serviter fidel Zeova ziska ozordi.—Rev. 22:1, 2.

Eski ou kapab eksplike?

• Ki Zezi ti oule dir kan i ti koz lo “monn nouvo”?

• Lo kwa Zezi ti koze avek Nikodenm?

• Ki promes Zezi ti fer avek sa bandi ki ti akote li lo poto?

• Ki mannyer let pour bann Ebre ek parol Pyer i konfirm lespwar lavi eternel lo later?

[Kestyon]

[Portre lo paz 15]

Bann dimoun ki resanble mouton pou ganny lavi eternel lo later

[Portre lo paz 16]

Zezi ti koz avek lezot lo lavi eternel