Kabuhi nga Walay Katapusan sa Duta—Gintudlo Bala ni Cristo nga Paglaum?
Kabuhi nga Walay Katapusan sa Duta—Gintudlo Bala ni Cristo nga Paglaum?
“Pahiran [sang Dios] ang tagsa ka luha sa ila mga mata, kag wala na sing kamatayon.”—BUG. 21:4.
1, 2. Ano ang mga pamatuod nga madamo sang mga Judiyo sang unang siglo ang nagalaum sang kabuhi nga walay katapusan sa duta?
ANG manggaranon kag prominente nga pamatan-on nga lalaki nagpalapit kay Jesus, nagluhod sa iya, kag nagpamangkot: “Maayo nga Manunudlo, ano ang dapat ko himuon agod mapanubli ang kabuhi nga walay katapusan?” (Mar. 10:17) Sang ginpamangkot ini sang pamatan-on, ginpatuhuyan bala niya ang kabuhi sa langit ukon ang kabuhi sa duta? Subong ginbinagbinag naton sa nagligad nga artikulo, ginhatagan sang Dios ang mga Judiyo sing paglaum nga pagkabanhaw kag kabuhi nga walay katapusan sa duta, siniglo na ang nagligad. Amo ini gihapon ang ginalauman sang madamo nga Judiyo sang unang siglo.
2 Mahimo ang pagkabanhaw sa duta amo ang ginpatuhuyan sang abyan ni Jesus nga si Marta sang nagsiling sia tuhoy sa iya napatay nga utod: “Nakahibalo ako nga mabanhaw sia sa pagkabanhaw sa katapusan nga adlaw.” (Juan 11:24) Matuod, ang mga Saduceo sadto wala nagapati sa pagkabanhaw. (Mar. 12:18) Apang, sa iya libro nga Judaism in the First Centuries of the Christian Era, si George Foot Moore nagsiling: “Ang mga sinulatan . . . sang ikaduha ukon una nga siglo antes sang aton dag-on nagapakita nga madamo ang nagapati nga magaabot ang tion nga ang mga napatay sang una pagabanhawon sa duta.” Ang manggaranon nga lalaki nga nagpalapit kay Jesus luyag makatigayon sing kabuhi nga walay katapusan sa duta.
3. Ano nga mga pamangkot ang pagabinagbinagon sa sini nga artikulo?
3 Sa karon, madamo nga relihion kag mga iskolar sa Biblia ang wala nagapati nga gintudlo ni Jesus ang paglaum nga kabuhi nga walay katapusan sa duta. Nagalaum ang kalabanan nga tawo nga mabuhi sila sa duog sang mga espiritu sa tapos sang kamatayon. Sang mabasahan nila sa Cristianong Griegong Kasulatan ang ekspresyon nga “kabuhi nga walay katapusan,” madamo ang naghunahuna nga nagapatuhoy ini sa kabuhi sa langit. Matuod bala ini? Ano ang buot silingon ni Jesus sang nagsiling sia tuhoy sa kabuhi nga walay katapusan? Ano ang ginapatihan sang mga disipulo? Ginatudlo bala sang Cristianong Griegong Kasulatan ang paglaum nga kabuhi nga walay katapusan sa duta?
Kabuhi nga Walay Katapusan “sa Pagtuga-liwat”
4. Ano ang mahanabo “sa pagtuga-liwat”?
4 Ginatudlo sang Biblia nga ang hinaplas nga mga Cristiano pagabanhawon sa langit agod maggahom sa duta. (Luc. 12:32; Bug. 5:9, 10; 14:1-3) Apang, sang nagsiling si Jesus tuhoy sa kabuhi nga walay katapusan, indi lamang ina nga grupo ang iya ginahunahuna. Binagbinaga ang ginsiling niya sa iya mga disipulo sa tapos magbiya sing masinulub-on ang manggaranon nga pamatan-on kay ginsilingan sia ni Jesus nga ibaligya ang tanan niya nga pagkabutang kag mangin sumulunod niya. (Basaha ang Mateo 19:28, 29.) Ginsilingan ni Jesus ang iya mga apostoles nga mahimo sila malakip sa magagahom subong mga hari kag magahukom sa “napulog-duha ka tribo sang Israel,” nga amo ang katawhan nga indi magagahom sa langit. (1 Cor. 6:2) Sang nagsiling sia nga ‘magapanubli sila sing kabuhi nga walay katapusan,’ ginpatuhuyan niya ang padya para sa “tagsatagsa” nga nagasunod sa iya. Tanan ini mahanabo “sa pagtuga-liwat.”
5. Ano ang buot silingon sang “pagtuga-liwat”?
5 Ano ang buot silingon ni Jesus sang “pagtuga-liwat”? Ini nga tinaga ginbadbad nga “bag-o nga kalibutan” sang The Bible—An American Translation. Ginbadbad man ini nga “kon ginbag-o na ang tanan” sang The Jerusalem Bible kag “ang pagbag-o sang tanan nga butang” sang The Holy Bible—New International Version. Wala ginpaathag ni Jesus ini nga tinaga sang gingamit niya ini, amo nga mahimo nga ginpatuhuyan niya ang madugay na nga ginalauman sang mga Judiyo. Nagalaum sila nga kinahanglan gid ang pagtuga-liwat agod ang kahimtangan sa duta mangin kaangay liwat sa hardin sang Eden antes pa nagpakasala sanday Adan kag Eva. Ang pagtuga-liwat magatuman sa saad sang Dios nga “nagatuga sing bag-ong mga langit kag bag-ong duta.”—Isa. 65:17.
6. Ano ang ginatudlo sa aton sang ilustrasyon sang mga karnero kag kanding tuhoy sa paglaum nga kabuhi nga walay katapusan?
6 Ginsambit liwat ni Jesus ang kabuhi nga walay katapusan sang nagsiling sia tuhoy sa katapusan sining malaut nga kalibutan. (Mat. 24:1-3) “Kon ang Anak sang tawo mag-abot sa iya himaya, kag ang tanan nga anghel kaupod niya,” siling niya, “nian magalingkod sia sa iya mahimayaon nga trono. Kag tipunon sa atubangan niya ang tanan nga pungsod, kag painpainon niya ang katawhan, subong sang manugbantay nga nagapain sang mga karnero sa mga kanding.” Yadtong magabaton sing malaglagon nga paghukom “magakadto sa silot nga walay katapusan, apang ang mga matarong sa kabuhi nga walay katapusan.” “Ang mga matarong” nga makabaton sing kabuhi nga walay katapusan amo yadtong mga matutom nga nagasakdag sa hinaplas sing espiritu nga “mga utod” ni Cristo. (Mat. 25:31-34, 40, 41, 45, 46) Bangod ginpili ang mga hinaplas nga mangin gumalahom sa Ginharian sa langit, “ang mga matarong” mahimo nga amo gid ang dutan-on nga mga sakop sina nga Ginharian. Ang Biblia nagtagna: “[Ang Hari ni Jehova] may kagamhanan man kutub sa dagat pa dagat, kag kutub sa Suba tubtub sa kaukbungan sang duta!” (Sal. 72:8) Ini nga mga sakop makatigayon sing kabuhi nga walay katapusan sa duta.
Ano ang Ginatudlo sang Ebanghelyo ni Juan?
7, 8. Ano ang duha ka paglaum nga ginatumod ni Jesus sang nagpakighambal sia kay Nicodemo?
7 Subong sang nasulat sa Ebanghelyo nanday Mateo, Marcos, kag Lucas, gingamit ni Jesus ang ekspresyon nga “kabuhi nga walay katapusan” sa mga kahimtangan nga ginsambit kaina. Masapwan sa Ebanghelyo ni Juan ang pinamulong ni Jesus tuhoy sa kabuhi nga walay katapusan sing mga 17 ka beses. Binagbinagon naton ang pila sini agod mahibaluan naton kon ano ang ginsiling ni Jesus tuhoy sa paglaum nga kabuhi nga walay katapusan sa duta.
8 Suno kay Juan, una nga ginsambit ni Jesus ang kabuhi nga walay katapusan sang nagpakighambal sia kay Nicodemo nga isa ka Fariseo. Nagsiling sia kay Nicodemo: “Kon ang isa indi mabun-ag paagi sa tubig kag espiritu, indi sia makasulod sa ginharian sang Dios.” Ang makasulod sa Ginharian sang langit kinahanglan nga “mabun-ag liwat.” (Juan 3:3-5) Apang, indi lang amo sina ang ginhambal ni Jesus. Nagsiling man sia dayon nga may paglaum nga ginatanyag para sa tanan nga katawhan. (Basaha ang Juan 3:16.) Ginatumod ni Jesus ang kabuhi nga walay katapusan sa langit para sa iya hinaplas nga mga sumulunod kag ang kabuhi nga walay katapusan sa duta para sa iban nga katawhan.
9. Ano nga paglaum ang ginpatuhuyan ni Jesus sang nakighambal sia sa Samaritana?
9 Sa tapos nga nakighambal si Jesus kay Nicodemo sa Jerusalem, naglakbay sia pakadto sa Galilea. Sa iya paglakbay, nasugilanon niya ang isa ka babayi sa bubon ni Jacob malapit sa siudad sang Sicar sa Samaria. Nagsiling sia sa babayi: “Ang bisan sin-o nga nagainom sang tubig nga akon ihatag sa iya indi na gid pag-uhawon, kundi ang tubig nga akon ihatag sa iya mangin tuburan sang tubig sa iya nga nagaibwal agod maghatag sang kabuhi nga walay katapusan.” (Juan 4:5, 6, 14) Ini nga tubig nagarepresentar sa pagpasag-uli sang Dios sang kabuhi nga walay katapusan sa katawhan, lakip na sa magapuyo sa duta. Ginalaragway sa tulun-an sang Bugna ang Dios nga nagasiling: “Ang bisan sin-o nga ginauhaw hatagan ko nga wala sing bayad gikan sa tuburan sang tubig sang kabuhi.” (Bug. 21:5, 6; 22:17) Gani, ang ginsiling ni Jesus sa Samaritana nga kabuhi nga walay katapusan indi lamang para sa mga hinaplas nga manunubli sang Ginharian kundi para man sa mga tawo nga may paglaum nga mabuhi sa duta.
10. Sa tapos gin-ayo ni Jesus ang isa ka tawo sa punong sang Betzata, ano ang ginsiling niya tuhoy sa kabuhi nga walay katapusan sa mga nagahingabot sa iya?
10 Sang masunod nga tuig, nagbalik si Jesus sa Jerusalem. Gin-ayo niya didto ang masakiton nga lalaki sa punong sang Betzata. Bangod sini, ginmulay sia sang mga Judiyo. Gani ginsilingan sila ni Jesus nga “ang Anak indi makahimo sang bisan ano sa iya lamang kaugalingon, kundi ang makita niya lamang nga ginahimo sang Amay.” Sa tapos nga nagsiling sia nga “natugyan [sang Amay] sa Anak ang bug-os nga paghukom,” si Jesus nagdugang: “Ang nagapamati sang akon pulong kag nagatuo sa nagpadala sa akon, may kabuhi nga walay katapusan.” Nagsiling pa gid sia: “Ang takna magaabot nga ang tanan nga yara sa mga lulubngan magapamati sang [tingog sang Anak sang tawo] kag magagua, ang mga nakahimo sing maayo, sa pagkabanhaw nga sa kabuhi, kag ang mga nakahimo sing malaut, sa pagkabanhaw nga sa paghukom.” (Juan 5:1-9, 19, 22, 24-29) Ginsilingan ni Jesus ang mga Judiyo nga nagahingabot sa iya nga sia amo ang gintangduan sang Dios nga magatuman sa ginalauman nila nga kabuhi nga walay katapusan sa duta kag himuon niya ini paagi sa pagbanhaw sa mga patay.
11. Paano naton nahibaluan nga ang paglaum nga kabuhi nga walay katapusan sa duta nalakip sa ginsiling ni Jesus sa Juan 6:48-51?
11 Sa Galilea, linibo ka tawo ang nagsunod kay Jesus bangod milagruso niya sila nga ginpakaon sing tinapay. Ginsilingan sila ni Jesus tuhoy sa lain nga sahi sang tinapay—“ang tinapay sang kabuhi.” (Basaha ang Juan 6:40, 48-51.) “Ang tinapay nga akon ihatag amo ang akon unod,” siling niya. Ginhatag ni Jesus ang iya kabuhi indi lamang para sa mga kaupod niya nga magagahom sa langit kundi “para sa kabuhi sang kalibutan” nga amo ang mga katawhan nga iya tubuson. “Ang bisan sin-o nga magkaon sini nga tinapay,” buot silingon ang bisan sin-o nga nagatuo sa halad gawad ni Jesus, may paglaum nga kabuhi nga walay katapusan. Gani, ang ‘kabuhi nga dayon’ nagalakip sa madugay na nga ginalauman sang mga Judiyo nga kabuhi nga walay katapusan sa duta sa paggahom sang Mesias.
12. Ano nga paglaum ang ginpatuhuyan ni Jesus sang ginsilingan niya ang mga nagapamatok nga ‘hatagan niya sing kabuhi nga walay katapusan ang iya mga karnero’?
12 Sang ulihi, sa Piesta sang Dedikasyon sa Jerusalem, si Jesus nagsiling sa mga nagapamatok sa iya: “Wala kamo magpati, bangod kamo indi akon mga karnero. Ang akon mga karnero nagapamati sa akon tingog, kag kilala ko sila, kag nagasunod sila sa akon. Kag hatagan ko sila sing kabuhi nga walay katapusan.” (Juan 10:26-28) Ginatumod lamang bala ni Jesus ang kabuhi sa langit, ukon nalakip man sa sini ang kabuhi nga walay katapusan sa duta? Bag-o lang ginlugpayan ni Jesus ang iya mga sumulunod sang sini nga mga pinamulong: “Indi magkahadlok, diutay nga panong, bangod nahamut-an sang inyo Amay nga ihatag sa inyo ang ginharian.” (Luc. 12:32) Apang, sa sini man nga tion sang Piesta sang Dedikasyon, si Jesus nagsiling: “May yara ako iban nga mga karnero, nga indi sa sini nga toril; sila man dapat ko dalhon.” (Juan 10:16) Gani, sang nakighambal si Jesus sa mga nagapamatok sa iya, ang iya pinamulong nagalakip sa kabuhi sa langit para sa “diutay nga panong” kag kabuhi nga walay katapusan sa duta para sa minilyon sang “iban nga mga karnero.”
Ang Paglaum nga Indi Na Kinahanglan nga Ipaathag
13. Ano ang buot silingon ni Jesus sang nagsiling sia: “Mangin kaupod ko ikaw sa Paraiso”?
13 Sa tion sang iya kasakit sa usok sang pag-antos, naghatag si Jesus sing indi mapanghiwala nga pamatuod sa paglaum sang katawhan. Ang malauton nga ginlansang sa tupad niya nagsiling: “Jesus, dumduma ako kon magsulod ka sa imo ginharian.” Ginsaaran sia ni Jesus: “Sa pagkamatuod ginasiling ko sa imo karon nga adlaw, Mangin kaupod ko ikaw sa Paraiso.” (Luc. 23:42, 43) Bangod ini nga tawo isa ka Judiyo, indi na kinahanglan nga ipaathag pa sa iya ang Paraiso. Nahibaluan na niya nga may paglaum nga kabuhi nga walay katapusan sa duta sa palaabuton.
14. (a) Ngaa wala anay nahangpan sang mga apostoles ang paglaum sa langit? (b) San-o nahangpan sang mga sumulunod ni Jesus ini nga paglaum?
14 Apang, ang paglaum sa langit nga ginsambit ni Jesus kinahanglan gid nga ipaathag. Sang ginsilingan niya ang iya mga disipulo nga makadto sia sa langit agod maghanda sing duog para sa ila, wala nila mahangpan ang iya buot silingon. (Basaha ang Juan 14:2-5.) “May madamo pa ako nga butang nga isiling sa inyo,” siling niya sa ila sang ulihi, “apang indi pa kamo makahangop sini karon. Apang, kon mag-abot ang manugbulig, ang espiritu sang kamatuoran, tuytuyan niya kamo sa bug-os nga kamatuoran.” (Juan 16:12, 13) Sang Pentecostes 33 C.E., ginhaplasan sila sang espiritu sang Dios agod mangin hari sa palaabuton. Sa tapos lang sadto nila nahangpan nga sa langit sila magalingkod subong hari. (1 Cor. 15:49; Col. 1:5; 1 Ped. 1:3, 4) Ang paglaum sa langit isa ka bag-o nga kapahayagan sa ila, kag amo ini ang ginapadaku sang inspirado nga mga sinulatan sa Cristianong Griegong Kasulatan. Apang ginasakdag man bala sini nga sinulatan ang paglaum nga kabuhi nga walay katapusan sa duta?
Ano ang Ginasiling sang Inspirado nga mga Sinulatan?
15, 16. Paano ang paglaum nga kabuhi nga walay katapusan sa duta ginpakita sa inspirado nga sulat sa mga Hebreo kag sa pinamulong ni Pedro?
15 Sa iya sulat sa mga Hebreo, gintawag ni apostol Pablo ang iya masigkatumuluo nga “balaan nga mga kauturan, nga mga umalambit sa langitnon nga pagtawag.” Pero, nagsiling man sia nga ginpasakop sang Dios kay Jesus “ang napuy-an nga duta nga magaabot.” (Heb. 2:3, 5; 3:1) Sa Cristianong Griegong Kasulatan, ang orihinal nga tinaga para sa “napuy-an nga duta” nagapatuhoy pirme sa duta nga ginapuy-an sang mga tawo. Gani, “ang napuy-an nga duta nga magaabot” amo ang palaabuton nga kahimtangan sang duta sa idalom sang pagginahom ni Jesucristo. Nian tumanon ni Jesus ang saad sang Dios: “Ang mga matarong magapanubli sang duta, kag magapuyo sila sa sini sa walay katubtuban.”—Sal. 37:29, NW.
16 Gin-inspirar man si apostol Pedro nga magsulat tuhoy sa palaabuton sang katawhan. Sia nagsulat: “Ang langit kag ang duta karon ginatigana sa kalayo kag ginatipigan tubtob sa adlaw sang paghukom kag sang paglaglag sa di-diosnon nga mga tawo.” (2 Ped. 3:7) Ano ang magabulos sa paggobierno sang tawo kag sa malauton nga katilingban sang katawhan subong? (Basaha ang 2 Pedro 3:13.) Pagabuslan ini sang “bag-ong langit,” ang Mesianikong Ginharian sang Dios, kag sang “bag-ong duta,” isa ka matarong nga katilingban sang matuod nga mga sumilimba sang Dios.
17. Paano ginlaragway sa Bugna 21:1-4 ang paglaum sang katawhan?
17 Nagapahalipay gid sa aton ang palanan-awon sa katapusan nga tulun-an sang Biblia nga ipasag-uli sa kahimpitan ang katawhan. (Basaha ang Bugna 21:1-4.) Amo ini ang paglaum sang katawhan sugod pa sang nadula sang tawo ang kahimpitan sa hardin sang Eden. Ang matarong nga mga tawo magakabuhi sing walay katapusan sa Paraiso nga duta kag indi na sila magtigulang. Ini nga paglaum may mabakod nga pamatuod sa Hebreong Kasulatan kag sa Cristianong Griegong Kasulatan, kag padayon ini nga nagapabakod sa matutom nga mga alagad ni Jehova tubtob karon.—Bug. 22:1, 2.
Mapaathag Mo Bala?
• Ano ang buot silingon ni Jesus sang “pagtuga-liwat”?
• Ano ang ginpatuhuyan ni Jesus sang nagpakighambal sia kay Nicodemo?
• Ano ang ginsaad ni Jesus sa malauton nga ginlansang sa tupad niya?
• Paano ang paglaum nga kabuhi nga walay katapusan sa duta ginpamatud-an sa sulat sa mga Hebreo kag sa pinamulong ni Pedro?
[Mga Pamangkot sa Pagtinuon]
[Retrato sa pahina 8]
Ang mga tulad karnero makatigayon sang kabuhi nga walay katapusan sa duta
[Mga Retrato sa pahina 10]
Naghambal si Jesus sa iban tuhoy sa kabuhi nga walay katapusan
