Ħajja Taʼ Dejjem fuq l-Art—Tama Kristjana?
“[Alla] jixxottalhom kull demgħa minn għajnejhom, u ma jkunx hemm iżjed mewt.”—RIV. 21:4.
1, 2. Kif nafu li ħafna Lhud tal-ewwel seklu kellhom it-tama taʼ ħajja taʼ dejjem fuq l-art?
ŻAGĦŻUGĦ għani u prominenti avviċina lil Ġesù, niżel għarkopptejh quddiemu, u staqsa: “Għalliem Tajjeb, xi rrid nagħmel biex niret il-ħajja taʼ dejjem?” (Mk. 10:17) Iż-żagħżugħ kien qed jistaqsi dwar kif jiret il-ħajja taʼ dejjem—imma fejn? Bħalma ddiskutejna fl-artiklu taʼ qabel, sekli qabel, Alla kien ta lil-Lhud it-tama taʼ rxoxt u ħajja taʼ dejjem fuq l-art. Ħafna mil-Lhud tal-ewwel seklu kien għad kellhom din it-tama.
2 Marta, il-ħabiba taʼ Ġesù, milli jidher kellha f’moħħha rxoxt fuq l-art meta qalet dwar ħuha li kien miet: “Naf li jqum fl-irxoxt fl-aħħar jum.” (Ġw. 11:24) Huwa minnu, is-Sadduċej taʼ dak iż-żmien ma kinux jemmnu fl-irxoxt. (Mk. 12:18) Madankollu, fil-ktieb tiegħu Judaism in the First Centuries of the Christian Era, George Foot Moore jgħid: “Xi kitbiet . . . tat-tieni jew l-ewwel seklu qabel żmienna jikkonfermaw it-twemmin li f’ċertu żmien dawk li kienu mietu fil-passat kienu se jiġu rxoxtati għall-ħajja fuq l-art.” Iż-żagħżugħ għani li avviċina lil Ġesù ried jikseb ħajja taʼ dejjem fuq l-art.
3. Liema mistoqsijiet se jiġu kunsidrati f’dan l-artiklu?
3 Illum, ħafna reliġjonijiet u studjużi tal-Bibbja jgħidu li Ġesù m’għallimx it-tama taʼ ħajja taʼ dejjem fuq l-art. Il-biċċa l-kbira min-nies jittamaw li wara l-mewt jibqgħu jgħixu fil-qasam tal-ispirti. Għalhekk, meta qarrejja tal-Iskrittura Griega Kristjana jiltaqgħu mal-espressjoni “ħajja taʼ dejjem,” ħafna minnhom jaħsbu li dejjem tirreferi għall-ħajja fis-sema. Huwa minnu dan? Ġesù x’ried ifisser meta tkellem dwar il-ħajja taʼ dejjem? Id-dixxipli tiegħu x’kienu jemmnu? Tgħallem l-Iskrittura Griega Kristjana li jistaʼ jkollna t-tama li ngħixu għal dejjem fuq l-art?
Ħajja taʼ Dejjem “fit-Tiġdid taʼ Kollox”
4. X’se jseħħ “fit-tiġdid taʼ kollox”?
4 Il-Bibbja tgħallem li l-Kristjani midlukin se jiġu rxoxtati biex jaħkmu mis-sema għal fuq l-art. (Lq. 12:32; Riv. 5:9, 10; 14:1-3) Madankollu, meta Ġesù tkellem dwar ħajja taʼ dejjem ma kellux dejjem dan il-grupp biss f’moħħu. Ikkunsidra x’qal lid-dixxipli tiegħu wara li ż-żagħżugħ għani telaq imnikket meta ġie mistieden biex iħalli l-ġid kollu tiegħu warajh u jsir segwaċi taʼ Kristu. (Aqra Mattew 19:28, 29.) Ġesù qal lill-appostli tiegħu li kienu se jkunu fost dawk li kellhom jaħkmu bħala slaten u jiġġudikaw lit-“tnax-il tribù taʼ Israel,” jiġifieri, id-dinja tal-umanità minbarra dawk li kienu se jaħkmu fis-sema. (1 Kor. 6:2) Tkellem ukoll dwar premju għal “kulmin” isegwih. Dawn l-individwi wkoll ‘se jirtu l-ħajja taʼ dejjem.’ Dan kollu se jseħħ “fit-tiġdid taʼ kollox.”
5. Kif tispjega “t-tiġdid taʼ kollox”?
5 Ġesù x’ried ifisser bit-“tiġdid taʼ kollox”? It-terminu hu tradott “it-tiġdid tad-dinja” fil-Bibbja taʼ Karm Żammit u “fid-dinja l-ġdida” fil-Bibbja Għaqda Biblika Maltija. Ladarba Ġesù uża dan it-terminu mingħajr spjegazzjoni, milli jidher kien qed jirreferi għal dik it-tama li kellhom il-Lhud għal sekli sħaħ. Kellu jkun hemm tiġdid tal-kundizzjonijiet fuq l-art, sabiex l-affarijiet ikunu kif kienu fil-ġnien tal-Għeden qabel ma dinbu Adam u Eva. It-tiġdid taʼ kollox se jwettaq il-wegħda t’Alla taʼ “smewwiet ġodda u art ġdida.”—Is. 65:17.
6. It-tixbiha tan-nagħaġ u l-mogħoż x’tgħallimna dwar it-tama taʼ ħajja taʼ dejjem?
6 Ġesù reġaʼ semma l-ħajja taʼ dejjem meta tkellem dwar il-konklużjoni tas-sistema. (Mt. 24:1-3) Hu qal: “Meta Bin il-bniedem jasal fil-glorja tiegħu, u l-anġli kollha miegħu, imbagħad joqgħod bil-qiegħda fuq it-tron glorjuż tiegħu. U l-ġnus kollha jinġabru quddiemu, u hu jifred lin-nies, wieħed mill-ieħor, bħalma ragħaj jifred in-nagħaġ mill-mogħoż.” Dawk li se jiġu ġudikati bħala ħżiena se “jmorru fil-qtugħ taʼ dejjem, imma n-nies sewwa fil-ħajja taʼ dejjem.” “In-nies sewwa” li se jirċievu l-ħajja taʼ dejjem huma dawk li jappoġġaw lealment lil “ħut” Kristu midlukin bl-ispirtu. (Mt. 25:31-34, 40, 41, 45, 46) Ladarba l-midlukin huma magħżulin biex jaħkmu fis-Saltna tas-smewwiet, “in-nies sewwa” bilfors li huma s-sudditi tas-Saltna fuq l-art. Il-Bibbja bassret: “[Is-Sultan taʼ Ġeħova] ikollu sudditi minn baħar sa baħar u mix-Xmara sa truf l-art.” (Salm 72:8) Dawn is-sudditi se jgawdu l-ħajja taʼ dejjem fuq l-art.
X’Juri l-Evanġelju taʼ Ġwanni?
7, 8. Ġesù rigward liema żewġ tamiet differenti tkellem maʼ Nikodemu?
7 Bħalma hu mniżżel fl-Evanġelji taʼ Mattew, Marku, u Luqa, Ġesù juża t-terminu “ħajja taʼ dejjem” fl-okkażjonijiet li ssemmew qabel. L-Evanġelju skont Ġwanni jikkwota l-kliem taʼ Ġesù dwar il-ħajja taʼ dejjem xi 17-il darba. Ejja neżaminaw xi ftit minn dawn l-eżempji biex naraw dak li qal Ġesù dwar it-tama taʼ ħajja taʼ dejjem fuq l-art.
8 Skont Ġwanni, l-ewwel darba li Ġesù tkellem dwar il-ħajja taʼ dejjem kien maʼ Fariżew jismu Nikodemu. Hu qal lil Nikodemu: “Jekk wieħed ma jitwilidx mill-ilma u mill-ispirtu, ma jistax jidħol fis-saltna t’Alla.” Dawk li jidħlu fis-Saltna tas-smewwiet iridu ‘jitwieldu mill-ġdid.’ (Ġw. 3:3-5) Ġesù ma waqafx hemm. Imbagħad tkellem dwar it-tama li hi miftuħa għall-umanità kollha. (Aqra Ġwanni 3:16.) Ġesù kien qed jirreferi għat-tama taʼ ħajja taʼ dejjem għas-segwaċi midlukin tiegħu fis-sema u għal oħrajn fuq l-art.
9. Ġesù dwar liema tama kellem lill-mara Samaritana?
9 Wara li kellem lil Nikodemu f’Ġerusalemm, Ġesù vvjaġġa lejn il-Galilija li kienet fit-Tramuntana. Fit-triq, iltaqaʼ maʼ mara ħdejn l-għajn taʼ Ġakobb qrib il-belt taʼ Sikar fis-Samarija. Hu qalilha: “Kulmin jixrob mill-ilma li nagħtih jien qatt iktar ma jaqbdu għatx, imma l-ilma li nagħtih jien isir fih għajn taʼ ilma ġieri biex jagħtih il-ħajja taʼ dejjem.” (Ġw. 4:5, 6, 14) Dan l-ilma jirrappreżenta l-provvedimenti t’Alla għat-tiġdid tal-umanità kollha għall-ħajja taʼ dejjem, inkluż dawk li se jgħixu fuq l-art. Fil-ktieb tar-Rivelazzjoni, Alla nnifsu hu deskritt bħala li qed jgħid: “Lil kulmin hu bil-għatx nagħtih jixrob b’xejn mill-għajn taʼ l-ilma tal-ħajja.” (Riv. 21:5, 6; 22:17) B’hekk, Ġesù kellem lill-mara Samaritana dwar il-ħajja taʼ dejjem mhux biss għall-werrieta midlukin tas-Saltna imma wkoll għall-umanità li temmen u li għandha t-tama għall-art.
10. Wara li fejjaq raġel ħdejn l-għadira taʼ Betzata, Ġesù x’qal lill-opponenti reliġjużi dwar il-ħajja taʼ dejjem?
10 Is-sena taʼ wara, Ġesù reġaʼ kien Ġerusalemm. Hemmhekk fejjaq raġel marid ħdejn l-għadira taʼ Betzata. Lil-Lhud li kkritikaw dak li għamel, Ġesù spjegalhom li “l-Iben ma jistaʼ jagħmel xejn minn rajh, imma jagħmel biss dak li jara lill-Missier jagħmel.” Wara li qalilhom li l-Missier “ħalla f’idejn l-Iben biex jiġġudika lil kulħadd,” Ġesù qal: “Min jismaʼ kelmti u jemmen lil dak li bagħatni għandu l-ħajja taʼ dejjem.” Ġesù qal ukoll: “Ġejja s-siegħa li fiha dawk kollha li qegħdin fl-oqbra tat-tifkira jisimgħu leħnu [dak taʼ Bin il-bniedem] u joħorġu, dawk li għamlu t-tajjeb għal irxoxt taʼ ħajja, dawk li pprattikaw affarijiet vili għal irxoxt taʼ ġudizzju.” (Ġw. 5:1-9, 19, 22, 24-29) Ġesù kien qed jgħid lil-Lhud li kienu jopponu li hu kien il-wieħed maħtur minn Alla biex iwettaq it-tama tal-Lhud taʼ ħajja taʼ dejjem fuq l-art u li kien se jagħmel dan billi jqajjem lill-mejtin.
11. Kif nafu li t-tama taʼ ħajja taʼ dejjem fuq l-art hija inkluża f’dak li qal Ġesù kif insibu fi Ġwanni 6:48-51?
11 Fil-Galilija, bdew isegwuh eluf taʼ nies li riedu l-ħobż li Ġesù pprovda mirakolożament. Ġesù kellimhom dwar tip ieħor taʼ ħobż—“il-ħobż tal-ħajja.” (Aqra Ġwanni 6:40, 48-51.) “Il-ħobż li se nagħti hu laħmi,” qal hu. Ġesù ta ħajtu mhux biss għal dawk li kienu se jaħkmu miegħu fis-Saltna tiegħu tas-sema imma wkoll “għall-ħajja tad-dinja” tal-umanità li setgħet tiġi mifdija. “Jekk xi ħadd jiekol minn dan il-ħobż,” jiġifieri, jeżerċita l-fidi fil-qawwa li tifdi tas-sagrifiċċju taʼ Ġesù, ikollu t-tama taʼ ħajja taʼ dejjem. Tabilħaqq, ir-referenza għal “ħajja taʼ dejjem” inkludiet it-tama, li l-Lhud kienu ilhom iħaddnu, taʼ ħajja taʼ dejjem fuq l-art matul il-ħakma tal-Messija.
12. Ġesù għal liema tama kien qed jirreferi meta qal lil dawk li opponewh li ‘se jagħti ħajja taʼ dejjem lin-nagħaġ tiegħu’?
12 Iktar tard, fil-Festa tad-Dedikazzjoni f’Ġerusalemm, Ġesù qal lil dawk li opponewh: “Intom ma temmnux, għax ħadd minnkom m’hu min-nagħaġ tiegħi. In-nagħaġ tiegħi jisimgħu leħni, u jien nafhom, u huma jiġu warajja. U nagħtihom il-ħajja taʼ dejjem.” (Ġw. 10:26-28) Kien Ġesù qed jitkellem biss dwar ħajja fis-sema, jew kellu f’moħħu wkoll ħajja eterna f’ġenna tal-art? Ġesù kien għadu kif farraġ lis-segwaċi tiegħu bil-kliem: “Tibżgħux, merħla żgħira, għax Missierkom approva li jagħtikom is-saltna.” (Lq. 12:32) Madankollu, fi żmien din l-istess Festa tad-Dedikazzjoni Ġesù qal: “Għandi nagħaġ oħrajn, li m’humiex minn dan il-maqjel; lil dawn ukoll irrid inġibhom.” (Ġw. 10:16) Għalhekk, meta Ġesù kellem lil dawk li opponewh, kliemu inkluda kemm it-tama taʼ ħajja fis-sema għall-“merħla żgħira” u kemm it-tama taʼ ħajja taʼ dejjem fuq l-art għal miljuni taʼ “nagħaġ oħrajn.”
Tama li Ma Kellha Bżonn Ebda Spjegazzjoni
13. Ġesù x’ried ifisser meta qal: “Int tkun fil-Ġenna miegħi”?
13 Matul l-agunija tiegħu fuq iz-zokk tat-tortura, Ġesù pprovda konferma tat-tama tal-umanità li ħadd ma jistaʼ jiċħadha. Raġel ħażin li ġie msammar maʼ zokk ħdejh qal: “Ġesù, ftakar fija meta tidħol fis-saltna tiegħek.” Ġesù wiegħdu: “Tassew ngħidlek illum, Int tkun fil-Ġenna miegħi.” (Lq. 23:42, 43) Ladarba dan ir-raġel milli jidher kien Lhudi ma kellu bżonn ebda spjegazzjoni dwar il-Ġenna tal-art. Hu kien jaf dwar it-tama taʼ ħajja taʼ dejjem fuq l-art f’dinja fil-futur.
14. (a) X’juri li r-referenza għal tama fis-sema kienet diffiċli għall-appostli biex jifhmuha? (b) Is-segwaċi taʼ Ġesù meta kisbu fehma ċara tat-tama tas-sema?
14 Madankollu, xi ħaġa li kellha bżonn spjegazzjoni kienet ir-referenza taʼ Ġesù għat-tama tas-sema. Meta kellem lid-dixxipli tiegħu dwar it-tlugħ tiegħu fis-sema biex jipprepara post għalihom, ma fehmux x’ried ifisser. (Aqra Ġwanni 14:2-5.) “Għad għandi ħafna x’ngħidilkom,” qalilhom iktar tard, “imma fil-preżent ma tifilħux għalih. Madankollu, meta jasal, l-ispirtu tal-verità, jiggwidakom lejn il-verità kollha.” (Ġw. 16:12, 13) Kien biss wara Pentekoste tas-sena 33 E.K. meta ġew midlukin bl-ispirtu t’Alla biex ikunu slaten fil-futur li s-segwaċi taʼ Ġesù fehmu li t-tronijiet tagħhom kienu se jkunu fis-sema. (1 Kor. 15:49; Kol. 1:5; 1 Pt. 1:3, 4) It-tama taʼ wirt fis-sema kienet rivelazzjoni, u l-ittri mnebbħin fl-Iskrittura Griega Kristjana ffokaw fuqha. Imma dawn l-ittri jikkonfermawha t-tama tal-umanità taʼ ħajja taʼ dejjem fuq l-art?
L-Ittri Mnebbħin X’Jgħidu?
15, 16. L-ittra mnebbħa lill-Ebrej u l-kliem taʼ Pietru kif jippontaw lejn it-tama taʼ ħajja taʼ dejjem fuq l-art?
15 Fl-ittra tiegħu lill-Ebrej, l-appostlu Pawlu indirizza lil sħabu fit-twemmin bħala ‘aħwa qaddisin, li għandhom sehem fis-sejħa tas-sema.’ Madankollu, stqarr ukoll li Alla kien issuġġetta “l-art abitata li ġejja” lil Ġesù. (Ebr. 2:3, 5; 3:1) Fl-Iskrittura Griega Kristjana, il-kelma oriġinali għal “art abitata” dejjem tirreferi għall-art abitata mill-bnedmin. Għalhekk, “l-art abitata li ġejja” hija s-sistema dinjija futura fuq l-art taħt il-ħakma taʼ Ġesù Kristu. Ġesù mbagħad se jwettaq il-wegħda t’Alla: “Il-ġusti se jirtu l-art, u jgħammru fiha għal dejjem.”—Salm 37:29.
16 L-appostlu Pietru wkoll ġie mnebbaħ biex jikteb dwar il-futur tal-umanità. Hu kiteb: “Is-smewwiet u l-art t’issa huma merfugħin għan-nar u qed jinżammu għal jum il-ġudizzju u l-qerda taʼ nies bla devozzjoni lejn Alla.” (2 Pt. 3:7) X’se jieħu post is-smewwiet governattivi u s-soċjetà umana mill-agħar li huma preżenti issa? (Aqra t-2 Pietru 3:13.) Flokhom se jkun hemm “smewwiet ġodda”—is-Saltna Messjanika t’Alla—u “art ġdida”—soċjetà umana ġusta t’aduraturi veri.
17. It-tama tal-umanità kif inhi deskritta f’Rivelazzjoni 21:1-4?
17 L-aħħar ktieb tal-Bibbja jmissilna qalbna bil-viżjoni li fiha l-umanità kollha terġaʼ tasal għall-perfezzjoni. (Aqra Rivelazzjoni 21:1-4.) Din kienet it-tama tal-bnedmin li jemmnu minn mindu ntilfet il-perfezzjoni umana fil-ġnien tal-Għeden. Nies ġusti se jgħixu f’Ġenna fuq l-art għal dejjem mingħajr ma jixjieħu. Din it-tama hija bbażata fis-sod kemm fuq l-Iskrittura Ebrajka u kemm fuq l-Iskrittura Griega Kristjana, u għadha ssaħħaħ lill-qaddejja leali taʼ Ġeħova sal-lum il-ġurnata.—Riv. 22:1, 2.
Tistaʼ Tispjega?
• Ġesù x’ried ifisser bit-“tiġdid taʼ kollox”?
• Ġesù rigward xiex tkellem maʼ Nikodemu?
• Ġesù x’wegħda għamel lir-raġel ħażin li kien imsammar maʼ zokk ħdejh?
• L-ittra lill-Ebrej u l-kliem taʼ Pietru kif jikkonfermaw it-tama taʼ ħajja taʼ dejjem fuq l-art?
[Mistoqsijiet taʼ Studju]
[Stampa f’paġna 8]
Uħud bħal nagħaġ se jirċievu l-ħajja taʼ dejjem fuq l-art
[Stampi f’paġna 10]
Ġesù kellem lil oħrajn dwar il-ħajja taʼ dejjem