Bophelo bjo bo sa Felego mo Lefaseng—Na ke Kholofelo ya Bokriste?

“[Modimo] o tla phumola megokgo ka moka mahlong a bona, gomme lehu le ka se hlwe le sa ba gona.”—KUT. 21:4.

1, 2. Re tseba bjang gore Bajuda ba bantši ba lekgolong la pele la nywaga ba be ba e-na le kholofelo ya go phela ka mo go sa felego mo lefaseng?

LESOGANA le le humilego le leo le nago le maemo setšhabeng le ile la tla go Jesu gomme la khunama pele ga gagwe la mmotšiša gore: “Morutiši yo Botse, ke swanetše go dira’ng gore ke je bohwa bja bophelo bjo bo sa felego?” (Mar. 10:17) Lesogana leo le be le botšiša mabapi le go hwetša bophelo bjo bo sa felego—eupša kae? Bjalo ka ge re bone sehlogong se se fetilego, Modimo o be a neile Bajuda kholofelo ya tsogo le bophelo bjo bo sa felego mo lefaseng. Bajuda ba bantši ba lekgolong la pele la nywaga le bona ba be ba e-na le kholofelo yeo.

² Go bonala mogwera wa Jesu e lego Mareta a be a naganne ka tsogo ya bahu ge a be a bolela ka kgaetšedi ya gagwe e hwilego gore: “Ke tseba gore o tla tsoga tsogong letšatšing la mafelelo.” (Joh. 11:24) Ke therešo gore Basadutsei ba mehleng yeo ba be ba sa dumele tsogong ya bahu. (Mar. 12:18) Lega go le bjalo, ka pukung ya gagwe e bitšwago Judaism in the First Centuries of the Christian Era, George Foot Moore o re: “Dingwalwa . . . tša lekgolong la bobedi le la pele la nywaga di hlatsela tumelo ya gore ka nako e  itšego historing ya lefase, bahu ba melokong ya kgale ba tla tsošetšwa bophelong mo lefaseng.” Lesogana la mohumi leo le ilego la tla go Jesu le be le nyaka go hwetša bophelo bjo bo sa felego mo lefaseng.

3. Ke dipotšišo dife tšeo di tlago go ahla-ahlwa sehlogong se?

³ Lehono, madumedi a mantši le diithuti tše dintši tša Beibele ga ba dumele gore kholofelo ya go phela ka mo go sa felego mo lefaseng ke thuto ya Bokriste. Batho ba bantši ba holofela gore ge ba hwile ba tla phela lefelong la moya. Ka gona, ge babadi ba Mangwalo a Bakriste a Segerika ba kopana le polelwana “bophelo bjo bo sa felego,” bontši bja bona ba dumela gore ka mehla e bolela ka bophelo bja legodimong. Na seo ke therešo? Jesu o be a e-ra go reng ge a be a bolela ka bophelo bjo bo sa felego? Barutiwa ba gagwe ba be ba dumela’ng? Na Mangwalo a Bakriste a Segerika a ruta gore re ka phela ka mo go sa felego mo lefaseng?

Bophelo bjo bo sa Felego “Nakong ya go Bopša Lefsa ga Dilo”

4. Ke’ng seo se tlago go direga “nakong ya go bopša lefsa ga dilo”?

⁴ Beibele e ruta gore Bakriste ba tloditšwego ba tla tsošetšwa go tlo buša lefase ba le legodimong. (Luka 12:32; Kut. 5:9, 10; 14:1-3) Lega go le bjalo, ge Jesu a be a bolela ka bophelo bjo bo sa felego, ka mehla o be a sa bolele a naganne ka sehlopha seo. Ela hloko seo a se boditšego barutiwa ba gagwe ka morago ga ge lesogana lela la mohumi le ile la boela morago le nyamišitšwe ke taletšo ya gore le tlogele dilo tšeo le nago le tšona gomme le be molatedi wa Kriste. (Bala Mateo 19:28, 29.) Jesu o ile a botša baapostola ba gagwe gore ba be ba tla ba gare ba bao ba bego ba tla buša e le dikgoši le go ahlola “meloko e lesome-pedi ya Isiraele,” ke gore, batho bao ba sa akaretšwego sehlopheng seo se tlago go buša se le legodimong. (1 Bakor. 6:2) Le gona, o boletše ka moputso wa “yo mongwe le yo mongwe” yo a mo latelago. Batho ba bjalo le bona “[ba] tla ja bohwa bja bophelo bjo bo sa felego.” Dilo tše ka moka di tla direga “nakong ya go bopša lefsa ga dilo.”

5. O be o ka hlalosa “go bopša lefsa ga dilo” bjang?

⁵ Jesu o be a e-ra go reng ge a be a bolela ka “go bopša lefsa ga dilo”? Polelwana ye e fetoletšwe e le “lefase le lefsa” ka go The Bible—An American Translation. Ka Beibeleng ya Sepedi e fetoletšwe e le “mohla xó tl’o xo mphsafala tšohle” gomme ka go Phetolelo ya Kgale ya fetolelwa e le “mpshafatšong.” Ka ge Jesu a dirišitše polelwana ye ka ntle le go e hlalosa, go molaleng gore o be a bolela ka selo seo Bajuda ba bego ba se holofetše ka nywaga-kgolo e mentši. Maemo a be a tla mpshafatšwa mo lefaseng e le gore dilo di be ka mokgwa woo di bego di le ka wona tšhemong ya Edene pele Adama le Efa ba dira sebe. Go bopša lefsa ga dilo go tla phethagatša kholofetšo ya Modimo ya go “hlôla maxodimo a mafsa le lefase le lefsa.”—Jes. 65:17.

6. Papišo ya dinku le dipudi e re ruta’ng mabapi le kholofelo ya bophelo bjo bo sa felego?

⁶ Jesu o boletše gape ka bophelo bjo bo sa felego ge a be a bolela ka bofelo bja tshepedišo ya dilo. (Mat. 24:1-3) O itše: “Ge Morwa wa motho a  fihla ka letago la gagwe, le barongwa ka moka ba e-na le yena, o tla dula sedulong sa gagwe sa bogoši sa letago. Ditšhaba ka moka di tla kgobokanywa pele ga gagwe, gomme o tla kgethologanya batho go etša ge modiši a kgethologanya dinku go dipudi.” Bao ba newago kahlolo e sehlogo “ba tla ya phedišong ya ka mo go sa felego, eupša baloki ba tla ya bophelong bjo bo sa felego.” “Baloki” bao ba newago bophelo bjo bo sa felego ke bao ka potego ba thekgago ‘bana babo’ Kriste ba tloditšwego ka moya. (Mat. 25:31-34, 40, 41, 45, 46) Ka ge batlotšwa ba kgethwa gore ba buše Mmušong wa legodimong, “baloki” e swanetše go ba balata ba lefaseng ba Mmušo woo. Beibele e boletše e sa le pele gore: “[Kgoši ya Jehofa e] tla ba le balata go fihla magomong a lewatle le go tloga Nokeng go ya dipheletšong tša lefase.” (Ps. 72:8, NW) Balata ba ba tla thabela bophelo bjo bo sa felego mo lefaseng.

Ebangedi ya Johane e Bontšha’ng?

7, 8. Jesu o boletše le Nikodemo ka dikholofelo dife tše pedi tše sa swanego?

⁷ Bjalo ka ge go ngwadilwe Diebangeding tša Mateo, Mareka le Luka, Jesu o diriša polelwana “bophelo bjo bo sa felego” ditirigalong tšeo go boletšwego ka tšona ka mo godimo. Ebangedi ya Johane e tsopola mantšu a Jesu a mabapi le go phela ka mo go sa felego ka makga a ka bago 17. Anke re ahla-ahleng tše dingwe tša dipolelwana tšeo gomme re boneng seo Jesu a se boletšego mabapi le kholofelo ya go phela ka mo go sa felego mo lefaseng.

⁸ Go ya ka Johane, Jesu o boletše la mathomo ka bophelo bjo bo sa felego ge a be a bolela le Mofarisei yo a bitšwago Nikodemo. O boditše Nikodemo gore: “Ka ntle le gore motho a tswalwe gape, a ka se ke a bona mmušo wa Modimo.” Bao ba tsenago Mmušong wa magodimo ba swanetše gore ba “tswalwe gape.” (Joh. 3:3-5) Jesu ga se a ka a felela moo. Ka morago ga moo o ile a bolela ka kholofelo yeo e bulegetšego lefase ka moka. (Bala Johane 3:16.) Jesu o be a bolela ka kholofelo ya balatedi ba gagwe ba tloditšwego ya go phela ka mo go sa felego legodimong le ka ya ba bangwe ya go phela mo lefaseng.

9. Jesu o boletše le mosadi wa Mosamaria ka kholofelo efe?

⁹ Ka morago ga go bolela le Nikodemo kua Jerusalema, Jesu o ile a tšea leeto la go ya leboa ka thoko ya Galilea. Ge a le tseleng, o ile a kopana le mosadi yo a itšego sedibeng sa Jakobo kgaufsi le motse wa Sikara kua Samaria. O ile a mmotša gore: “Mang le mang yo a nwago meetse ao ke tlago go mo nea ona a ka se ke a ba a nyorwa, eupša meetse ao ke tlago go mo nea ona e tla ba mothopo wa meetse o runyago bakeng sa go nea bophelo bjo bo sa felego.” (Joh. 4:5, 6, 14) Meetse a a emela ditokišetšo tša Modimo tša go tsošološetša batho ka moka bophelong bjo bo sa felego, go akaretša le bao ba tlago go phela mo lefaseng. Ka pukung ya Kutollo, Modimo ka boyena o hlaloswa a re: “Mang le mang yo a nyorilwego ke tla mo nweša mothopong wa meetse a bophelo ka ntle le tefo.” (Kut. 21:5, 6; 22:17) Ka gona, Jesu ga se a bolela le mosadi wa Mosamaria ka bophelo bjo bo sa felego bakeng sa bajabohwa ba Mmušo wa legodimong feela, eupša boletše le ka bophelo bjo bo sa felego bakeng sa ba batho ba dumelago bao ba nago le kholofelo ya go phela mo lefaseng.

10. Ke’ng seo Jesu a ilego a se botša baganetši ba bodumedi mabapi le bophelo bjo bo sa felego ka morago ga go fodiša monna yo mongwe bodibeng bja Bethesida?

¹⁰ Ngwageng o latetšego, Jesu o ile a ya Jerusalema gape. Ge a le moo, o ile a fodiša monna yo a babjago bodibeng bja Bethesida. Jesu o ile a hlalosetša Bajuda bao ba bego ba mo swaya phošo ka baka la seo a se dirilego gore “Morwa a ka se dire selo le se tee ka la gagwe, eupša o dira feela seo a bonago Tate a se dira.” Ka morago ga go ba botša gore Tate “o gafetše kahlolo ka moka go Morwa,” Jesu o itše: “Yo a kwago lentšu la-ka e bile a dumela yo a nthomilego o na le bophelo bjo bo sa felego.” Jesu o boletše gape gore: “Nako e a tla yeo ka yona bohle bao ba lego mabitleng a kgopotšo ba tlago go kwa lentšu la [Morwa wa motho] gomme ba tšwa, bao ba dirilego dilo tše dibotse ba tla tsogela bophelong, bao ba tlwaetšego go dira dilo tše mpe ba tla tsogela kahlolo.” (Joh. 5:1-9, 19, 22, 24-29) Jesu o be a botša Bajuda ba batlaiši gore ke yena yo a kgethilwego ke Modimo gore a phethagatše  kholofelo ya Bajuda ya bophelo bjo bo sa felego mo lefaseng le gore o tla dira bjalo ka go tsoša bahu.

11. Re tseba bjang gore kholofelo ya go phela ka mo go sa felego mo lefaseng e a akaretšwa polelong ya Jesu yeo e begilwego go Johane 6:48-51?

¹¹ Kua Galilea, batho ba dikete bao ba bego ba nyaka gore Jesu a ba nee senkgwa ka mohlolo ba ile ba mo latela. Jesu o ile a ba botša ka mohuta o mongwe wa senkgwa—“senkgwa sa bophelo.” (Bala Johane 6:40, 48-51.) O itše: “Senkgwa seo ke tlago go se nea ke nama ya-ka.” Jesu ga se a gafa bophelo bja gagwe feela bakeng sa bao ba tlago go buša le yena Mmušong wa gagwe wa legodimong, eupša o bo gafile gape le “bakeng sa bophelo bja lefase” la batho bao ba ka lopollwago. “Ge e ba motho le ge e le ofe a e-ja senkgwa se,” ke gore, a bontšha tumelo matleng a phološago a sehlabelo sa Jesu, o tla ba le kholofelo ya go phela ka mo go sa felego. Ka kgonthe, polelwana ya go ‘phela ka mo go sa felego’ e be e akaretša kholofelo yeo e bego e le kgale Bajuda ba e-na le yona, ya bophelo bjo bo sa felego nakong ya pušo ya Mesia.

12. Jesu o be a bolela ka kholofelo efe ge a be a botša baganetši gore ‘o tla nea dinku tša gagwe bophelo bjo bo sa felego’?

¹² Ka morago ge Jesu a le Monyanyeng wa Kgakolo kua Jerusalema, o ile a botša baganetši ba gagwe gore: “Ga le dumele gobane le se dinku tša-ka. Dinku tša-ka di theetša lentšu la-ka e bile ke a di tseba, gomme di a ntatela. Le gona, ke di nea bophelo bjo bo sa felego.” (Joh. 10:26-28) Na Jesu o be a bolela feela ka bophelo bja legodimong, goba na o be a naganne ka bophelo lefaseng la paradeise? Jesu o be a sa tšwa go homotša balatedi ba gagwe ka mantšu a rego: “Se boife, wena mohlatswana, gobane Tatago lena o kgahlilwe ke go le nea mmušo.” (Luka 12:32) Lega go le bjalo, nakong ya Monyanya woo wa Kgakolo Jesu o itše: “Ke na le dinku tše dingwe tšeo e sego tša lešaka le; le tšona ke swanetše go di tliša.” (Joh. 10:16) Ka gona, ge Jesu a be a bolela le baganetši bao, mantšu a gagwe a be a akaretša kholofelo ya go phela legodimong bakeng sa “mohlatswana” le ya go phela ka mo go sa felego mo lefaseng bakeng sa “dinku tše dingwe” tše dimilione.

Kholofelo Yeo e Bego e sa Nyake go Hlaloswa

13. Jesu o be a e-ra go reng ge a be a re: “O tla ba le nna Paradeiseng”?

¹³ Nakong ya ge a be a tlaišega koteng ya tlhokofatšo, Jesu o ile a nea kgonthišetšo e ka se kego ya ganetšwa ya mabapi le kholofelo ya batho. Sesenyi seo se bego se kokotetšwe kgaufsi le yena se ile sa re: “Jesu, o nkgopole ge o tsena mmušong wa gago.” Jesu o ile a se holofetša gore: “Ruri ke go botša lehono, o tla ba le nna  Paradeiseng.” (Luka 23:42, 43) Ka ge go le molaleng gore monna yo e be e le Mojuda, go be go sa nyakege gore a hlalosetšwe ka Paradeise. O be a tseba ka kholofelo ya go phela mo lefaseng nakong e tlago.

14. (a) Ke’ng seo se bontšhago gore go be go le thata gore baapostola ba kwešiše mantšu a mabapi le kholofelo ya legodimong? (b) Ke neng moo balatedi ba Jesu ba ilego ba kwešiša gabotse kholofelo ya legodimong?

¹⁴ Lega go le bjalo, seo se bego se nyaka tlhaloso e be e le mantšu a Jesu a mabapi le kholofelo ya legodimong. Ge a be a bolela le barutiwa ba gagwe mabapi le go ya ga gagwe legodimong go yo ba lokišetša madulo, ba be ba sa kwešiše gore o ra go reng. (Bala Johane 14:2-5.) Ka morago o ile a ba botša gore: “Ke sa na le dilo tše dintši tšeo nka le botšago tšona, eupša ga le kgone go di rwala ga bjale. Lega go le bjalo, ge yoo a fihla, e lego moya wa therešo, o tla le hlahla therešong ka moka.” (Joh. 16:12, 13) Ke feela ka morago ga Pentekoste ya 33 C.E., ge ba tloditšwe ka moya o mokgethwa wa Modimo gore e be dikgoši tša nakong e tlago, moo balatedi ba Jesu ba ilego ba kwešiša gore didulo tša bona tša bogoši di be di tla ba legodimong. (1 Bakor. 15:49; Bakol. 1:5; 1 Pet. 1:3, 4) Kholofelo ya go ba bajabohwa ba legodimong e be e le thuto e mpsha gomme Mangwalo a Bakriste a Segerika a buduletšwego a ile a lebiša tlhokomelo go yona. Eupša, na mangwalo a a kgonthišetša kholofelo ya batho ya go phela ka mo go sa felego mo lefaseng?

Mangwalo a Buduletšwego a Re’ng?

15, 16. Lengwalo le buduletšwego le yago go Baheberu le mantšu a Petro di hlalosa kholofelo ya go phela mo lefaseng bjang?

¹⁵ Lengwalong la gagwe le le yago go Baheberu, moapostola Paulo o boletše ka badumedi-gotee le yena a re ke “bana bešo ba bakgethwa, bao ba nago le kabelo pitšong ya legodimo.” Lega go le bjalo, o boletše gape gore Modimo o beile “lefase le le tlago leo go agilwego go lona” ka tlase ga Jesu. (Baheb. 2:3, 5; 3:1) Ka Mangwalong a Bakriste a Segerika, lentšu leo le fetoletšwego e le ‘lefase leo go agilwego go lona’ ka mehla le bolela lefase leo le dulwago ke batho. Ka baka leo, “lefase le le tlago leo go agilwego go lona” ke tshepedišo ya dilo ya nakong e tlago ya mo lefaseng ka tlase ga pušo ya Jesu Kriste. Ka nako yeo, Jesu o tla phethagatša kholofetšo ya Modimo e rego: “Baloki e ba beng ba naxa, ba dula mo xo yôna ka mehla le ka mehla.”—Ps. 37:29.

¹⁶ Moapostola Petro le yena o ile a budulelwa go ngwala ka bokamoso bja batho. O ngwadile gore: “Magodimo le lefase tše di lego gona, gona bjale di boloketšwe mollo gomme di lotetšwe letšatši la kahlolo le la tshenyego ya batho ba sa boifego Modimo.” (2 Pet. 3:7) Mebušo yeo e lego magodimo le lekoko la batho ba kgopo tšeo di lego gona ga bjale di tla tšeelwa legato ke’ng? (Bala 2 Petro 3:13.) Di tla tšeelwa legato ke “magodimo a mafsa”—Mmušo wa Modimo wa Mesia—le “lefase le lefsa”—lekoko la batho ba lokilego bao e lego barapedi ba therešo.

17. Kholofelo ya batho e hlaloswa bjang go Kutollo 21:1-4?

¹⁷ Puku ya mafelelo ya Beibele e kgoma dipelo tša rena ka pono ya yona ya mabapi le moloko wa batho o tsošološeditšwego phethegong. (Bala Kutollo 21:1-4.) Ye e bile kholofelo ya batho ba dumelago ga e sa le go tloga ge batho ba lahlegelwa ke phethego tšhemong ya Edene. Batho ba lokilego ba tla phela ka mo go sa felego ba sa tšofale Paradeiseng mo lefaseng. Kholofelo ye e theilwe ka mo go tiilego Mangwalong a Seheberu le Mangwalong a Bakriste a Segerika gomme e tšwela pele go matlafatša bahlanka ba Modimo go fihla le lehono.—Kut. 22:1, 2.

Na o ka Hlalosa?

• Jesu o be a e-ra go reng ge a be a bolela ka “go bopša lefsa ga dilo”?

• Jesu o boletše le Nikodemo ka’ng?

• Ke’ng yeo Jesu a e holofeditšego sesenyi seo se bego se kokotetšwe kgaufsi le yena?

• Lengwalo le yago go Baheberu le mantšu a Petro a kgonthišetša kholofelo ya go phela mo lefaseng bjang?

[Dipotšišo tša Thuto]

[Seswantšho go letlakala 8]

Batho ba bjalo ka dinku ba tla hwetša bophelo bjo bo sa felego

[Seswantšho go letlakala 10]

Jesu o boditše ba bangwe ka bophelo bjo bo sa felego mo lefaseng