Kresten kan abi a howpu fu libi fu têgo na grontapu?
Kresten kan abi a howpu fu libi fu têgo na grontapu?
„[Gado] o figi ala watra puru na den ai, èn dede no sa de moro.”—OPENB. 21:4.
1, 2. Fa wi du sabi taki furu Dyu fu a fosi yarihondro ben abi a howpu fu libi fu têgo na grontapu?
WAN prenspari yonkuman di ben gudu, ben lon go na Yesus, èn di a doro na en, a fadon na tapu en kindi. A aksi Yesus: „Bun Leriman, san mi musu du fu kisi têgo libi?” (Mark. 10:17) A yonkuman ben wani sabi fa a ben kan kisi têgo libi. Ma pe a ben wani kisi têgo libi? Na hemel noso na grontapu? Soleki fa wi ben si na ini a fosi studie-artikel, dan hondrohondro yari na fesi, Gado ben gi den Dyu a howpu fu kisi wan opobaka èn sosrefi têgo libi na grontapu. Furu fu den Dyu fu a fosi yarihondro ben abi a howpu dati ete.
2 Marta, wan uma di ben de wan mati fu Yesus, ben taki a sani disi fu en dede brada: „Mi sabi taki a o kon na libi baka te na opobaka o de na tapu a lasti dei” (Yoh. 11:24). Soleki fa a sori, dan a ben e prakseri na opobaka di en brada ben o kisi na grontapu. A tru taki den Saduseiman fu a ten dati no ben e bribi na ini na opobaka (Mark. 12:18). Ma George Foot Moore ben skrifi wan buku, èn na ini a buku dati a e taki: „Den buku . . . di sma ben skrifi na ini a di fu tu èn a fosi yarihondro bifo Krestes, e sori taki furu sma ben e bribi taki den wan di dede kaba, ben o kisi wan opobaka na grontapu te fu kaba” (Judaism in the First Centuries of the Christian Era). A guduman di ben go na Yesus, ben wani kisi têgo libi na grontapu.
3. Na sortu aksi wi sa poti prakseri na ini na artikel disi?
3 Na ini a ten disi, furu kerki nanga Bijbel sabiman e leri trawan taki libisma no abi a howpu fu libi na grontapu, fu di Yesus no ben e leri sma a sani dati. Furu sma abi a howpu taki den sa libi go doro leki yeye, baka te den dede. Sobun, te sma e leisi den wortu „têgo libi” na ini den Kresten Griki Buku fu Bijbel, dan furu fu den e denki taki a abi fu du nanga libi na hemel. A sani dati tru? San Yesus ben wani leri wi di a ben taki fu têgo libi? San den disipel fu en ben e bribi? A tru taki den Kresten Griki Buku fu Bijbel e leri sma taki den kan abi a howpu fu libi fu têgo na grontapu?
Libisma sa kisi têgo libi „te sani o meki kon nyun baka”
4. San o pasa „te sani o meki kon nyun baka”?
4 Bijbel e leri taki salfu Kresten sa kisi wan opobaka fu go na hemel, èn den sa tiri grontapu komoto fu drape (Luk. 12:32; Openb. 5:9, 10; 14:1-3). Ma di Yesus ben taki fu têgo libi, dan a no ala ten a ben abi a grupu dati wawan na prakseri. Di a ben taigi a gudu yonkuman fu libi ala den gudu fu en èn fu tron wan bakaman fu en, dan a yonkuman gowe nanga bigi sari. Luku san Yesus taigi den disipel fu en baka dati. (Leisi Mateyus 19:28, 29.) Yesus taigi den apostel fu en taki den ben o tiri leki kownu, èn den ben o krutu „den twarfu lo fu Israel”. Den lo dati e prenki a heri libisma famiri, boiti den wan di sa tiri na hemel (1 Kor. 6:2). Yesus ben taki tu dati „ibri sma” di ben o tron wan bakaman fu en, ben o kisi wan paiman. Den sma dati „sa kisi têgo libi” tu. Ala den sani disi o pasa „te sani o meki kon nyun baka”.
5. San den wortu „sani o meki kon nyun baka” wani taki?
5 San Yesus ben wani taki nanga den wortu „te sani o meki kon nyun baka”? Fu di Yesus ben gebroiki den wortu disi sondro fu fruklari san den wani taki, meki a de krin taki a ben taki fu wan howpu di den Dyu ben abi hondrohondro yari kaba. A situwâsi na grontapu ben o meki kon nyun baka, so taki sani ben o kon de baka leki fa den ben de na ini a dyari fu Eden, fosi Adam nanga Eva ben sondu. Te sani ben o meki kon nyun baka, dan dati ben o de a kontru fu a sani di Gado ben pramisi, namku taki a ben o meki „nyun hemel nanga wan nyun grontapu”.—Yes. 65:17.
6. San na agersitori fu den skapu nanga den bokoboko, e leri wi fu a howpu di wi abi fu kisi têgo libi?
6 Di Yesus ben e fruteri den disipel fu en san ben o pasa na a kaba fu a sistema disi, dan a taki baka fu têgo libi (Mat. 24:1-3). A ben taki: „Te a Manpikin fu libisma kon nanga en glori, makandra nanga ala den engel, dan a o go sidon na tapu en gran kownusturu. Den o tyari ala pipel kon na en fesi, èn a o prati den sma neleki fa wan skapuman e prati den skapu fu den bokoboko. A o poti den skapu na en reti-anusei, ma den bokoboko a o poti na en kruktu-anusei.” Den wan di Gado o strafu „o dede fu têgo, ma den regtfardikisma o kisi têgo libi”. „Den regtfardikiwan” di sa kisi têgo libi, na den wan di e tan horibaka gi den salfu „brada” fu Krestes (Mat. 25:31-34, 40, 41, 45, 46). Fu di den salfuwan sa tiri na ini a hemel Kownukondre, meki a musu de so taki „den regtfardikiwan” sa de den wan di o libi na grontapu na ondro a tiri fu a Kownukondre dati. Bijbel ben taki: „[A Kownu fu Yehovah] o tiri fu a wan se te go miti a trawan, fu a Gran Liba te go miti den moro farawe presi fu grontapu” (Ps. 72:8). Den sma di o saka densrefi na ondro a Kownu disi sa libi fu têgo na grontapu.
San na Evangelietori fu Yohanes e sori?
7, 8. Di Yesus ben e taki nanga Nikodeimus, dan fu sortu tu howpu a taki?
7 Soleki fa den Evangelietori fu Mateyus, Markus, nanga Lukas e sori, dan Yesus gebroiki den wortu „têgo libi” na den okasi di ben kari na fesi. Na ini na Evangelietori fu Yohanes wi kan leisi pikinmoro 17 leisi san Yesus ben taki fu têgo libi. Meki wi go luku wan tu fu den sani dati di Yesus ben taki fu a howpu di libisma kan abi fu libi fu têgo na grontapu.
8 Soleki fa Yohanes ben sori, dan a fosi leisi di Yesus ben taki fu têgo libi, na di a ben e taki nanga wan Fariseiman di nen Nikodeimus. A ben taigi Nikodeimus: „Efu wan sma no kon gebore baka, dan a no sa man si a kownukondre fu Gado.” Den sma di e go na ini a Kownukondre fu hemel musu „kon gebore baka” (Yoh. 3:3-5). Ma dati no ben de ala san Yesus ben taki. Baka dati, a taki fu a howpu di ala libisma kan kon abi. (Leisi Yohanes 3:16.) Yesus ben e taki fu a howpu di den salfu bakaman fu en ben o abi fu libi fu têgo na hemel, èn a ben taki tu fu a howpu di trawan ben o abi fu libi fu têgo na grontapu.
9. Fu sortu howpu Yesus ben taki nanga wan Samaria uma?
9 Baka di Yesus ben taki nanga Nikodeimus na ini Yerusalem, dan a go na Galilea di ben de na a noordsei. Di a ben de na pasi fu go drape, dan a miti wan uma na a peti fu Yakob, di ben de krosibei fu a foto Sikar, na Samaria. Yesus ben taigi na uma disi: „Efu wan sma e dringi a watra di mi o gi en, dan watra no sa kiri en noiti moro, ma a watra di mi o gi en o tron wan peti na ini en, pe watra e komopo di e gi sma têgo libi” (Yoh. 4:5, 6, 14). A watra disi e prenki den sani di Yehovah seti fu meki a heri libisma famiri kisi têgo libi, iya, sosrefi den wan di sa libi na grontapu. A buku Openbaring e sori taki Gado srefi e taki a sani disi: „Mi o meki a sma di watra e kiri en, dringi fu a peti di abi watra di e gi libi; a watra disi de fu kisi fu soso” (Openb. 21:5, 6; 22:17). Sobun, di Yesus ben taki nanga a Samaria uma fu a têgo libi di libisma kan kisi, dan a no ben e taki soso fu den salfuwan di o tiri leki kownu. Ma a ben taki sosrefi fu libisma di abi bribi èn di abi a howpu fu libi na grontapu.
10. Baka di Yesus dresi wan man na a presi fu Betsata pe watra ben de, dan san a taigi den Dyu di ben e gens en?
10 A yari baka dati, Yesus ben de baka na ini Yerusalem. Drape a dresi wan siki man di ben e didon na a presi Betsata pe watra ben de. Fu di den Dyu ben krutu a sani disi di Yesus ben du, meki a taigi den taki „a Manpikin no man du noti fu ensrefi, ma a e du soso san a si a Tata e du”. Baka di Yesus taigi den taki a Tata e „meki a Manpikin du ala a wroko fu krutu sma”, dan a taki: „Efu wan sma yere san mi taki èn a e bribi a sma di seni mi kon, dan a o kisi têgo libi.” Yesus ben taki tu: „Bika a yuru o kon te ala den sma di de na ini den grebi o yere [a sten fu a Manpikin fu libisma], èn den o komopo drape; den sma di du bun sani, o opo baka fu kisi libi èn den sma di du takru sani, o opo baka fu kisi krutu” (Yoh. 5:1-9, 19, 22, 24-29). Yesus ben taigi den Dyu di ben e frufolgu en, taki Gado ben gi en a frantwortu fu meki a howpu kon tru di den Dyu ben abi fu libi fu têgo na grontapu. Dati meki a ben o gi den dedewan wan opobaka.
11. Fa wi du sabi taki den sani di Yesus ben taki na Yohanes 6:48-51, abi fu du tu nanga a howpu di libisma kan abi fu libi fu têgo na grontapu?
11 Na ini Galilea, dusundusun sma ben wani taki Yesus du wan wondru fu gi den brede, èn fu dati ede den bigin waka baka en. Yesus fruteri den sma disi fu wan tra sortu brede, èn dati na „a brede di e gi libi”. (Leisi Yohanes 6:40, 48-51.) Yesus ben taki: „A brede na mi skin di mi o gi.” Yesus no ben gi en libi soso gi den wan di ben o tiri makandra nanga en na ini a hemel Kownukondre, ma a ben gi en libi tu „so taki grontapu, noso den sma di warti fu kisi frulusu, kan kisi libi”. „Efu wan sma e nyan a brede disi”, dati wani taki, efu wan sma e sori bribi na ini a krakti di na ofrandi fu Yesus abi fu frulusu sma, dan a sma dati sa kon abi a howpu fu kisi têgo libi. Iya, di Yesus ben taigi den Dyu taki den ben kan ’libi fu têgo’, dan a ben taki tu fu a howpu di den ben abi langa ten kaba taki den ben o man libi fu têgo na grontapu te a Mesias ben o tiri.
12. Fu sortu howpu Yesus ben e taki di a taigi den gensman fu en taki a ’sa gi têgo libi na den skapu fu en’?
12 Di Yesus ben de na ini Yerusalem, dan a go na a fesa di ben e hori fu memre a ten di den Dyu ben gi a tempel abra na Gado. Drape a taigi den gensman fu en: „Unu no e bribi, fu di unu a no mi skapu. Mi skapu e arki mi sten; mi sabi den èn den e waka na mi baka. Mi e gi den têgo libi” (Yoh. 10:26-28). A de so taki Yesus ben e taki soso fu têgo libi na hemel, noso a ben e taki tu fu têgo libi na ini a paradijs na grontapu? Wan syatu pisi ten na fesi, Yesus ben trowstu den bakaman fu en nanga den wortu disi: „No frede, un pikin ipi, bika un Tata feni en bun fu gi unu a kownukondre” (Luk. 12:32). Ma na a ten fu a srefi fesa dati, Yesus ben taki: „Mi abi tra skapu tu, di no de fu a skapu-pen disi; mi musu tyari den kon tu” (Yoh. 10:16). Fu dati ede, di Yesus ben taki nanga den gensman fu en, dan a ben e taki fu a howpu di a „ pikin ipi” abi fu libi fu têgo na hemel, èn fu a howpu di milyunmilyun „tra skapu” abi fu libi fu têgo na grontapu.
Wan howpu di de krin fu frustan
13. San Yesus ben wani taki nanga den wortu: „Yu o de nanga mi na ini Paradijs”?
13 Di Yesus ben e pina na a postu, dan a taki wan sani di gi libisma a dyaranti taki a howpu di den abi, na wan trutru howpu. Wan ogriman di ben e anga na wan postu krosibei fu en ben taki: „Yesus, memre mi te yu kon na ini yu kownukondre.” Yesus ben pramisi en: „Fu tru, mi e taigi yu tide: Yu o de nanga mi na ini Paradijs” (Luk. 23:42, 43). Fu di a ben de krin taki a man dati ben de wan Dyu, meki Yesus no ben abi fu fruklari gi a man disi san na a Paradijs. A ben sabi fu a howpu di libisma kan abi fu kisi têgo libi na ini wan nyun grontapu.
14. (a) Sortu buweisi de taki den apostel no ben e frustan krin san na a howpu di den ben kon abi fu libi na hemel? (b) O ten den bakaman fu Yesus bigin frustan krin san na a howpu di den ben kon abi fu libi na hemel?
14 Ma wan sani di den disipel no ben man frustan krin, na di Yesus ben taki fu a howpu di sma kan abi fu libi na hemel. Di Yesus ben fruteri den disipel fu en taki a ben o go na hemel fu sreka wan presi gi den, dan den no ben e frustan san a ben wani taki nanga den wortu dati. (Leisi Yohanes 14:2-5.) Bakaten, Yesus taigi den: „Furu sani de di mi musu taigi unu ete, ma unu no man tyari den now. Ma te a yepiman doro, namku a yeye fu waarheid, dan a o leri unu a heri waarheid” (Yoh. 16:12, 13). Den disipel fu Yesus no ben e frustan ete taki den kownusturu fu den ben o de na hemel. Na di a yeye fu Gado salfu den fu tron kownu, dan fosi den kon frustan a tori dati. Dati pasa baka a Pinksterfesa fu a yari 33 (1 Kor. 15:49; Kol. 1:5; 1 Petr. 1:3, 4). A howpu di den ben kon abi fu libi na hemel, ben de wan nyun sani di Gado ben tyari kon na krin gi den. Èn a tori disi tron a moro prenspari tori na ini den brifi fu den Kresten Griki Buku fu Bijbel. Ma den brifi disi e sori taki a howpu di libisma kan abi fu libi fu têgo na grontapu, na wan trutru howpu?
San den brifi di skrifi nanga yepi fu santa yeye e taki?
15, 16. Fa a brifi gi den Hebrewsma, èn den wortu fu Petrus, e poti prakseri na a howpu di wi abi fu libi fu têgo na grontapu?
15 Na ini a brifi di na apostel Paulus ben skrifi gi den Hebrewsma, a ben kari den Kresten brada nanga sisa fu en „santa brada di kisi a kari tu fu go na hemel”. Ma a ben taki tu taki Gado poti Yesus fu „tiri libisma di o libi na ini a grontapu di musu kon ete” (Hebr. 2:3, 5; 3:1). Fu dati ede, den wortu „libisma di o libi na ini a grontapu di musu kon ete” abi fu du nanga a grontapu sistema di Yesus Krestes sa tiri. Na a ten dati, Yesus sa meki a sani di Gado ben pramisi, kon tru. Gado ben taki: „Na den reti-ati sma o kisi grontapu, èn fu têgo den o tan libi drape.”—Ps. 37:29.
16 A santa yeye ben meki na apostel Petrus skrifi tu san libisma o ondrofeni na ini a ten di e kon. A ben skrifi: „Gado libi den hemel nanga a grontapu fu now fu bron den nanga faya, èn a e libi den teleki a dei te a o krutu èn pori den ogrisma” (2 Petr. 3:7). San o kon na ini a presi fu den tirimakti èn na ogri sistema fu libisma di de now? (Leisi 2 Petrus 3:13.) Na ini a presi fu den, „nyun hemel” o kon, noso Gado en Mesias Kownukondre, èn sosrefi „wan nyun grontapu”, noso wan libimakandra fu reti-ati sma di e anbegi Gado na a yoisti fasi.
17. Fa Openbaring 21:1-4 e taki fu a howpu di libisma abi?
17 A lasti buku fu Bijbel e naki wi ati fu di a e taki fa a libi sa de te libisma no abi sondu moro. (Leisi Openbaring 21:1-4.) Sma di e bribi abi a howpu disi sensi di a fosi libisma sondu na ini a dyari fu Eden. Reti-ati sma sa libi fu têgo na ini a Paradijs na grontapu, èn den no sa kon owru. A howpu disi e kruderi finifini nanga den sani di skrifi na ini den Hebrew Buku fu Bijbel èn na ini den Griki Buku fu Bijbel. Boiti dati, a howpu disi e gi den reti-ati futuboi fu Yehovah deki-ati te na a dei fu tide.—Openb. 22:1, 2.
Yu kan tyari disi kon na krin?
• San Yesus ben wani taki nanga den wortu „te ala sani o meki kon bun baka”?
• Fu sortu sani Yesus ben taki nanga Nikodeimus?
• San Yesus ben pramisi na ogriman di ben spikri na wan postu na en sei?
• Fa a brifi gi den Hebrewsma, èn den wortu fu Petrus, e sori taki a howpu di libisma kan abi fu libi fu têgo na grontapu, na wan trutru howpu?
[Aksi fu a tori disi]
[Prenki na tapu bladzijde 8]
Den wan di de leki skapu sa kisi têgo libi na grontapu
[Prenki na tapu bladzijde 10]
Yesus ben fruteri trawan fu a têgo libi