‘Magpabilin Kamo sa Gugma sa Diyos’

“Magpabilin kamo diha sa gugma sa Diyos, samtang nagapaabot kamo sa kaluoy sa atong Ginoong Jesu-Kristo nga nagapanglantaw sa kinabuhing walay kataposan.”—JUD. 21.

1, 2. Sa unsang paagi gipakita ni Jehova ang iyang gugma kanato, ug giunsa nato pagkahibalo nga kita dili awtomatikong magpabilin sa iyang gugma?

 GIPASUNDAYAG ni Jehova nga Diyos ang iyang gugma kanato sa daghan kaayong paagi. Apan, sa walay duhaduha ang kinalabwang pamatuod sa gugma ni Jehova mao ang halad lukat. Gihigugma niya pag-ayo ang katawhan nga iya pa ganing gipadala ang iyang minahal nga Anak nganhi sa yuta aron mamatay alang kanato. (Juan 3:16) Gihimo kana ni Jehova tungod kay buot niya nga kita mabuhi sa walay kataposan ug makabenepisyo sa iyang gugma hangtod sa hangtod!

² Apan, makadahom ba kita nga si Jehova padayong mahigugma kanato bisag unsa pay atong buhaton? Dili. Kay sa Judas bersikulo 21, atong mabasa kini nga awhag: “Magpabilin kamo diha sa gugma sa Diyos, samtang nagapaabot kamo sa kaluoy sa atong Ginoong Jesu-Kristo nga nagapanglantaw sa kinabuhing walay kataposan.” Ang pamulong “magpabilin kamo diha sa gugma sa Diyos” nagpasabot nga kita adunay kinahanglang buhaton. Busa, unsay kinahanglan natong buhaton aron magpabilin sa gugma sa Diyos?

Sa Unsang Paagi Kita Magpabilin sa Gugma sa Diyos?

3. Unsay giingon ni Jesus nga hinungdanon alang kaniya aron siya magpabilin sa gugma sa iyang Amahan?

³ Atong makaplagan ang tubag nianang pangutanaha sa gipamulong ni Jesus sa iyang kataposang gabii sa yuta. Siya miingon: “Kon sundon ninyo ang akong mga sugo, kamo magpabilin sa akong gugma, ingon nga ako nagsunod sa mga sugo sa Amahan ug nagpabilin sa iyang gugma.”  (Juan 15:10) Ingon sa gipakita niining tekstoha, nahibalo si Jesus nga ang pagsugot sa mga sugo ni Jehova hinungdanon gayod aron atong mahuptan ang maayong baroganan atubangan sa iyang Amahan. Karon, kon hinungdanon kana alang sa hingpit nga Anak sa Diyos, dili ba angay usab kitang magmasinugtanon?

4, 5. (a) Unsa ang pangunang paagi nga atong ikapakita nga kita nahigugma kang Jehova? (b) Nganong wala kitay katarongan nga dili mosugot sa mga sugo ni Jehova?

⁴ Una sa tanan, atong ikapakita nga kita nahigugma kang Jehova pinaagi sa pagsugot kaniya. Gihubit kana ni apostol Juan niining paagiha: “Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at.” (1 Juan 5:3) Tinuod, ang pagkamasinugtanon wala maangayi sa kadaghanan sa kalibotan karon. Apan, matikdi ang pamulong: “Bisan pa ang iyang mga sugo dili mabug-at.” Si Jehova wala magpabuhat kanato ug usa ka butang nga lisod kaayong tumanon.

⁵ Sa pag-ilustrar: Ipaalsa ba nimo sa imong suod nga higala ang usa ka butang nga bug-at ra kaayo para niya? Dili gayod! Si Jehova mas maluloton kay kanato ug mas nahibalo sa atong mga limitasyon. Ang Bibliya nagpasalig kanato nga si Jehova “nahinumdom nga kita abog.” (Sal. 103:14) Dili gayod siya mohatag kanato ug mga sugo nga lisod kaayong tumanon. Busa wala kitay katarongan nga dili mosugot sa mga sugo ni Jehova. Sa kasukwahi, kita magmasinugtanon kay kini maoy talagsaong kahigayonan sa pagpasundayag sa atong tiunay nga gugma alang sa atong langitnong Amahan ug sa atong tinguha nga magpabilin sa iyang gugma.

Talagsaong Gasa Gikan Kang Jehova

6, 7. (a) Unsa ang tanlag? (b) Iilustrar kon sa unsang paagi ang tanlag makatabang kanato sa pagpabilin diha sa gugma sa Diyos.

⁶ Niining komplikadong kalibotan diin kita nagkinabuhi, daghan sa mga desisyon nga kinahanglan natong buhaton nalangkit sa atong pagkamasinugtanon sa Diyos. Sa unsang paagi kita makaseguro nga ang maong mga desisyon nahiuyon sa kabubut-on sa Diyos? Si Jehova naghatag kanato ug usa ka gasa nga makatabang gayod kanato nga magmasinugtanon. Kini mao ang atong tanlag. Unsa ang tanlag? Kini maoy usa ka linaing katakos sa pag-ila sa atong kaugalingon. Kini nagalihok ingong usa ka maghuhukom diha sa kahiladman, nga motabang kanato sa pagsusi sa atong mga desisyon o sa pagpamalandong sa atong nahimo kon kini ba maayo o daotan, husto o sayop.—Basaha ang Roma 2:14, 15.

⁷ Sa unsang paagi makatabang kanato ang tanlag? Tagda kini nga ilustrasyon. Ang usa ka tawo nagbaktas diha sa usa ka awaaw nga dapit. Wala siyay nakitang tunob, dalan, o karatula. Bisan pa niana, padayon siyang naglakaw paingon sa iyang destinasyon. Nganong nakahimo man siya niana? Tungod kay siya adunay kompas. Kini adunay usa ka pihong dayal nga may upat ka pangunang direksiyon ug usa ka magnetikong dagom nga nagpunting sa amihanan. Kon walay kompas ang maong tawo, dali ra siyang masaag. Sa susama, kon walay tanlag, walay makagiya sa tawo sa paghimog maayong mga desisyon.

8, 9. (a) Unsang mga limitasyon sa atong tanlag ang kinahanglan natong hinumdoman? (b) Unsay atong mahimo aron maseguro nga ang atong tanlag makatabang gayod kanato?

⁸ Apan, sama sa kompas, ang tanlag may mga limitasyon usab. Kon ang magbabaktas magbutang ug magnet duol sa iyang kompas, ang dagom dili na motudlo sa amihanan. Sa susama, kon atong tugotan ang tinguha sa atong kasingkasing nga maoy mokontrolar sa atong mga desisyon, unsa may mahitabo? Ang atong hakog nga mga tinguha mahimong modaot sa atong tanlag. Ang Bibliya nagpasidaan kanato nga “ang kasingkasing labaw nga malimbongon kay sa bisan unsa pa ug desperado.” (Jer. 17:9; Prov. 4:23) Dugang pa, kon ang magbabaktas walay tukma ug kasaligang mapa, ang iyang kompas halos wala nay kapuslanan. Sa susama, kon dili kita modangop sa segurado ug kasaligang giya sa Pulong sa Diyos, ang Bibliya, basin wala na usay kapuslanan ang atong tanlag. (Sal. 119:105) Ikasubo, daghang tawo niining kalibotana ang nagtagbaw sa mga tinguha sa ilang kasingkasing ug wala magsunod sa mga sukdanan sa Pulong sa Diyos. (Basaha ang Efeso 4:17-19.) Mao nay hinungdan nga daghan kaayong tawo ang nagbuhat ug daotang mga butang, bisag aduna silay tanlag.—1 Tim. 4:2.

 ⁹ Kita kinahanglang maningkamot nga dili mahisama kanila! Hinunoa, padayon natong tugotan ang Pulong sa Diyos nga magbansay sa atong tanlag aron kini makatabang gayod kanato. Kita kinahanglang mamati sa diktar sa atong nabansay-sa-Bibliya nga tanlag imbes magpadaog sa atong hakog nga mga tinguha. Sa samang higayon, angay natong tahoron ang tanlag sa atong minahal nga mga igsoon sa pagtuo. Kita maningkamot gayod nga dili makapandol kanila, nga maghinumdom nga ang ilang tanlag mahimong mas sensitibo kay sa atoa.—1 Cor. 8:12; 2 Cor. 4:2; 1 Ped. 3:16.

10. Unsa ang tulo ka natad sa kinabuhi nga atong pagatagdon karon?

¹⁰ Atong tagdon karon ang tulo ka natad sa kinabuhi diin atong ikapasundayag ang atong gugma kang Jehova pinaagi sa pagkamasinugtanon. Siyempre, nalangkit ang tanlag sa matag usa niini. Apan aron kini makagiya kanato sa hustong paagi, kinahanglang magiyahan kini, una sa tanan, sa inspiradong mga sukdanan sa Bibliya bahin sa panggawi. Ang tulo ka paagi nga atong ikapasundayag ang atong gugma ug pagkamasinugtanon kang Jehova mao: (1) Atong higugmaon ang gihigugma ni Jehova, (2) atong tahoron ang awtoridad, ug (3) atong paningkamotan nga magpabiling hinlo atubangan sa Diyos.

Higugmaa ang Gihigugma ni Jehova

11. Nganong angay natong higugmaon ang gihigugma ni Jehova?

¹¹ Una, kinahanglan nga atong higugmaon ang gihigugma ni Jehova. Kon bahin sa panag-ubanay, ang tawo nahisamag espongha. Kita lagmit masuphan o maapektohan kon unsay anaa sa atong palibot. Ang atong Maglalang nahibalo gayod kon unsa ka peligroso—ug kon unsa ka mapuslanon—alang sa dili-hingpit nga mga tawo ang ilang gipakig-ubanan. Busa, naghatag siya kanato niining maalamong tambag: “Siya nga nagalakaw uban sa mga tawong maalamon mahimong maalamon, apan siya nga may pakiglabot sa mga hungog mahisugamak sa kadaot.” (Prov. 13:20;  1 Cor. 15:33) Walay mausa kanato ang gustong ‘masugamak sa kadaot.’ Kitang tanan gusto nga “mahimong maalamon.” Si Jehova maalamon gayod sa ngatanan ug walay makaimpluwensiya kaniya. Bisan pa niana, siya naghatag kanato ug maayo kaayong panig-ingnan maylabot sa pagpakig-uban. Hunahunaa kini—kinsa sa dili-hingpit nga mga tawo ang gipili ni Jehova nga mahimo niyang mga higala?

12. Unsang matanga sa mga higala ang pilion ni Jehova?

¹² Si Jehova nagtawag sa patriarkang si Abraham nga “akong higala.” (Isa. 41:8) Si Abraham maoy usa ka maayong panig-ingnan sa pagkamatinumanon, pagkamatarong, ug pagkamasinugtanon—usa ka tawo nga may pagtuo. (Sant. 2:21-23) Kana ang matang sa higala nga pilion ni Jehova. Ug siya nakighigala nianang matanga sa mga tawo karon. Kon si Jehova nagpili sa maong mga higala, dili ba hinungdanon usab nga kita mopili ug maayong mga higala, nga kita molakaw uban sa mga maalamon ug mahimong maalamon?

13. Unsay makatabang kanato sa pagpilig maayong mga higala?

¹³ Unsay makatabang kanimo sa pagpilig hustong matang sa mga higala? Mapuslanon ang pagsusi sa mga panig-ingnan diha sa Bibliya. Tagda ang panaghigalaay ni Ruth ug sa iyang ugangan nga si Noemi, ang kang David ug Jonatan, o ang panaghigalaay ni Timoteo ug Pablo. (Ruth 1:16, 17; 1 Sam. 23:16-18; Filip. 2:19-22) Sila nahimong suod nga mga managhigala tungod sa usa ka hinungdanon kaayong katarongan: Ang matag usa kanila adunay tiunay nga gugma kang Jehova. Makakaplag ka bag mga higala nga nahigugma gayod kang Jehova sama kanimo? Makalaom ka nga diha sa Kristohanong kongregasyon makakaplag kag mga higala nga sama niana. Sila dili gayod modaldal kanimo sa pagbuhat ug mga butang nga makadaot sa imong relasyon kang Jehova. Hinunoa, sila motabang kanimo sa pagsugot kang Jehova, sa pagpauswag sa imong espirituwalidad, ug sa pagpugas alang sa espiritu. (Basaha ang Galacia 6:7, 8.) Sila motabang kanimo sa pagpabilin diha sa gugma sa Diyos.

Tahora ang Awtoridad

14. Nganong sagad malisdan kita sa pagpakitag pagtahod sa awtoridad?

¹⁴ Ang ikaduhang paagi nga atong ikapasundayag ang atong gugma kang Jehova nalangkit sa awtoridad. Kinahanglan nga atong tahoron ang awtoridad. Apan nganong malisdan man kita usahay sa paghimo niana? Ang usa ka hinungdan mao nga ang mga tawo nga anaa sa awtoridad dili hingpit. Dugang pa, kita usab dili hingpit. Kita nakigbisog sa kinaiyanhong kiling nga morebelde.

15, 16. (a) Nganong hinungdanon nga kita motahod niadtong gisangonan ni Jehova ug responsibilidad sa pag-atiman sa iyang katawhan? (b) Giunsa pag-isip ni Jehova ang pagrebelde sa mga Israelinhon kang Moises ug unsay atong makat-onan niana?

¹⁵ Nan, basin makapangutana ka, ‘Kon lisod ang pagtahod sa awtoridad, nganong kinahanglan man nato kanang buhaton?’ Ang tubag nalangkit gayod sa isyu sa pagkasoberano. Kinsay imong pilion nga imong soberano, o imong magmamando? Kon atong pilion si Jehova nga atong Soberano, kinahanglan nga kita motahod sa iyang awtoridad. Kon dili nato kana buhaton, makaingon ba gayod kita nga siya ang atong Magmamando? Dugang pa, si Jehova kasagarang nagpasundayag sa iyang awtoridad pinaagi sa dili-hingpit nga mga tawo nga iyang gisangonag responsibilidad sa pag-atiman sa iyang katawhan. Kon morebelde kita kanila, unsa kahay pag-isip ni Jehova niana?—Basaha ang 1 Tesalonica 5:12, 13.

¹⁶ Pananglitan, sa dihang ang mga Israelinhon nagbagulbol ug mirebelde kang Moises, giisip ni Jehova nga sila mirebelde mismo kaniya. (Num. 14:26, 27) Ang Diyos wala mausab. Kon kita morebelde niadtong iyang gihatagag awtoridad, kita nagrebelde usab kaniya!

17. Unsang husto nga tinamdan ang angay natong ugmaron maylabot sa mga igsoon nga may awtoridad diha sa kongregasyon?

¹⁷ Gipakita ni apostol Pablo ang hustong tinamdan nga angay natong ugmaron maylabot sa mga igsoon nga adunay responsibilidad diha sa kongregasyon. Siya misulat: “Magmasinugtanon kamo sa mga nagapanguna kaninyo ug magmapinasakopon, kay sila nagabantay sa inyong mga kalag ingon nga sila maoy maghatag ug husay; aron buhaton nila kini uban ang kalipay ug dili uban  ang pagpanghupaw, kay kini makadaot kaninyo.” (Heb. 13:17) Tinuod, kinahanglan kitang manlimbasog aron maugmad ang pagkamasinugtanon ug pagkamapinasakopon. Apan, hinumdomi nga kita naningkamot nga magpabilin sa gugma sa Diyos. Dili ba takos kana sa tanan natong paningkamot?

Magpabiling Hinlo Atubangan ni Jehova

18. Nganong gusto man ni Jehova nga kita magmahinlo?

¹⁸ Ang ikatulong paagi nga atong ikapasundayag ang atong gugma kang Jehova mao nga kita maningkamot nga magpabiling hinlo sa iyang atubangan. Ang mga ginikanan kasagarang maningkamot pag-ayo aron maseguro nga hinlo ang ilang mga anak. Ngano man? Ang usa ka katarongan mao nga ang kahinlo hinungdanon sa kahimsog sa bata. Dugang pa, ang kahinlo sa bata maghatag kadungganan sa pamilya, nga nagpaila nga siya gihigugma ug giatiman sa iyang ginikanan. Sa samang mga katarongan, buot ni Jehova nga kita magmahinlo. Siya nahibalo nga ang kahinlo hinungdanon sa atong kahimsog. Nahibalo usab siya nga ang atong kahinlo maghatag kadungganan kaniya, nga atong langitnong Amahan. Hinungdanon kaayo kana, kay ang mga tawo mahimong madani sa Diyos nga atong gialagaran sa dihang ilang makita nga kita lahi kaayo kon itandi sa uban niining nahugawan nga kalibotan.

19. Giunsa nato pagkahibalo nga hinungdanon ang pisikal nga kahinlo?

¹⁹ Sa unsang mga bahin nga kita kinahanglang magmahinlo? Sa tanang bahin gayod. Sa karaang Israel, giklaro ni Jehova sa iyang katawhan nga hinungdanon ang pisikal nga kahinlo. (Lev. 15:31) Ang Balaod ni Moises adunay mga instruksiyon bahin sa paglabay sa hugaw, paghugas sa mga sudlanan, ug pagpanghunaw, pagpanghimatiis, ug pagpanglaba. (Ex. 30:17-21; Lev. 11:32; Num. 19:17-20; Deut. 23:13, 14) Ang mga Israelinhon gipahinumdoman nga ang ilang Diyos nga si Jehova maoy balaan—nga nagkahulogang “hinlo,” “putli,” ug “sagrado.” Ang mga alagad sa balaan nga Diyos kinahanglang balaan usab.—Basaha ang Levitico 11:44, 45.

20. Sa unsang mga paagi kita kinahanglang magpabiling hinlo?

²⁰ Busa, kita kinahanglang magmahinlo sa sulod ug sa gawas. Kita maningkamot nga mahuptang hinlo ang atong kaisipan. Ato gayong tumanon ang mga sukdanan ni Jehova maylabot sa moral nga kahinlo, bisag unsa pa ka imoral ang mga tawo sa kalibotan karon. Labaw sa tanan, huptan gayod natong hinlo ang atong pagsimba, nga dili mahugawan sa bakak nga relihiyon. Dili nato kalimtan ang inspiradong pasidaan sa Isaias 52:11: “Pahilayo, pahilayo, gula gikan dinha, ayaw paghikap ug mahugaw; gula gikan sa iyang taliwala, pagpabilin kamong hinlo.” Karon, kita magpabiling hinlo sa espirituwal pinaagi sa dili gayod pagpakiglabot sa mga kalihokan sa bakak nga relihiyon. Mao nay hinungdan nga kita dili mosaulog sa relihiyosong mga selebrasyon ug mga pista nga popular karon sa kalibotan. Tinuod, lisod gayod ang pagpabiling hinlo. Apan ang katawhan ni Jehova naningkamot sa pagbuhat niana tungod kay kana makatabang kanila sa pagpabilin diha sa gugma sa Diyos.

21. Sa unsang paagi kita makaseguro nga kita magpabilin sa gugma sa Diyos?

²¹ Buot ni Jehova nga kita magpabilin sa iyang gugma hangtod sa hangtod. Apan ang matag usa kanato kinahanglang mohimo sa atong maarangan aron magpabilin sa gugma sa Diyos. Mahimo nato kini pinaagi sa pagsunod sa ehemplo ni Jesus ug sa pagpamatuod sa atong gugma kang Jehova pinaagi sa pagsugot sa Iyang mga sugo. Kon ato kanang buhaton, kita makaseguro nga wala gayoy “makabulag kanato gikan sa gugma sa Diyos nga anaa kang Kristo Jesus nga atong Ginoo.”—Roma 8:38, 39.

Nahinumdom Ka Ba?

• Sa unsang paagi ang atong tanlag makatabang kanato sa pagpabilin diha sa gugma sa Diyos?

• Nganong angay natong higugmaon ang gihigugma ni Jehova?

• Nganong hinungdanon nga kita motahod sa awtoridad?

• Unsa ka hinungdanon ang kahinlo alang sa katawhan sa Diyos?

[Mga Pangutana sa Pagtuon]

[Kahon/Hulagway sa panid 20]

USA KA BASAHON NGA NAGTUDLOG MAAYONG PANGGAWI

Sa 2008/2009 nga programa sa distritong kombensiyon, giluwatan ang usa ka 224-panid nga libro nga nag-ulohang Magpabilin Kamo sa Gugma sa Diyos. Nganong gipatik man kining bag-ong basahon? Kini gidisenyo sa pagtabang sa mga Kristohanon sa pagkahibalo ug paghigugma sa mga sukdanan ni Jehova, nga ilabinang nagpasiugda sa Kristohanong panggawi. Ang maampingong pagtuon sa Magpabilin Kamo sa Gugma sa Diyos magpalig-on sa atong pagtuo nga ang pagkinabuhi nga kaharmonya sa mga sukdanan ni Jehova mao ang labing maayong paagi sa pagkinabuhi karon ug motultol sa kinabuhing walay kataposan sa umaabot.

Dugang pa, kining libroha gidisenyo aron sa pagtabang kanato sa pagkakita nga dili bug-at ang pagsugot kang Jehova. Sa kasukwahi, kini maoy paagi sa pagpakita kang Jehova kon unsa ka dako ang atong gugma kaniya. Busa, kining libroha motabang kanato sa pagsukna sa atong kaugalingon, ‘Nganong mosugot ako kang Jehova?’

Sa dihang ang pipila mobiya sa gugma ni Jehova, ang kasagarang problema mao ang panggawi, dili ang doktrina. Nan, hinungdanon gayod nga atong palig-onon ang atong gugma ug pagpabili sa mga balaod ug prinsipyo ni Jehova nga naggiya kanato sa atong pagkinabuhi sa adlaw-adlaw! Kami masaligon nga kining bag-ong basahon motabang sa mga karnero ni Jehova sa tibuok kalibotan sa pagbarog nga malig-on dapig sa kon unsay matarong, sa pagpamatuod nga si Satanas bakakon, ug labaw sa tanan sa pagpabilin diha sa gugma sa Diyos!—Jud. 21.

[Hulagway sa panid 18]

“Kon sundon ninyo ang akong mga sugo, kamo magpabilin sa akong gugma, ingon nga ako nagsunod sa mga sugo sa Amahan ug nagpabilin sa iyang gugma”