‘Jaikókena Ñandejára mborayhúpe’

‘Peikókena Ñandejára mborayhúpe, pehaʼarõ aja Jesucristo poriahuvereko ha pe jeikove opaʼỹva.’ (JUD. 21.)

1, 2. a) Mbaʼéichapa Jehová ohechauka ñandéve ñanderayhuha? b) Ohechaukáta piko ñandéve Jehová imborayhu jajapóramo jepe ivaíva? Emombeʼu mbaʼérepa ere upéicha.

 JEHOVÁ ningo heta hendáicha ohechauka ñandéve ñanderayhuha. Itaʼýra jepe omboʼuvaʼekue omano ñanderehehápe ikatu hag̃uáicha ñandesalva. Ndaipóri voi Haʼéicha ñanderayhúva (Juan 3:16). Jehová ningo ojapovaʼekue upéicha oipotágui jaikove opa ára g̃uarã. Ha akóinte ohechauka hag̃ua ñandéve ñanderayhuha.

² Ohechaukáta piko ñandéve Jehová imborayhu jajapóramo jepe ivaíva? Nahániri. Pe Judas versíkulo 21-pe heʼi voi ñandéve: ‘Peikókena Ñandejára mborayhúpe, pehaʼarõ aja Jesucristo poriahuvereko ha pe jeikove opaʼỹva’. Heʼívo koʼápe ‘Peikókena Ñandejára mborayhúpe’ ohechauka ñandéve tekotevẽha jajapo heta mbaʼe. Upévare jaikuaase mbaʼépa jajapovaʼerã jaiko hag̃ua Ñandejára mborayhúpe.

Mbaʼépa jajapovaʼerã jaiko hag̃ua Ñandejára mborayhúpe?

3. Mbaʼépa tekotevẽvaʼekue Jesús ojapo oiko hag̃ua itúva mborayhúpe?

³ Jahechamína mbaʼépa heʼivaʼekue Jesús omano mboyve. Haʼe heʼi: ‘Pejapóramo che rembipota, peikóta che mborayhúpe. Péicha avei che, ajapóvo che Ru rembipota aiko imborayhúpe’ (Juan  15:10). Jesús ohechakuaavaʼekue oiko hag̃ua itúva mborayhúpe tekotevẽha ojapo hembipota. Ha Jesús jepe tekotevẽramo iñeʼẽrendu, koʼýte ñande yvypóra imperfékto jajapovaʼerã upéicha.

4, 5. a) Mbaʼéichapa jahechaukáta Jehovápe jahayhuha? b) Mbaʼérepa ndajajeplageaivaʼerã jajapo hag̃ua Jehová heʼíva?

⁴ Ñaneñeʼẽrendúramo jahechaukañaína Jehovápe jahayhuha. Apóstol Juan ningo heʼi voi: ‘Jahayhu Ñandejárape heʼise jajapo iléi, ha iléi ndahaʼéi mbaʼe pohýi’ (1 Juan 5:3). Hetápe ningo añete ndogustái ojeʼe chupe mbaʼépa ojapovaʼerã. Péro ko téysto ohechauka porã ‘ndaipohyiriha’ Jehová ojeruréva ñandéve. Haʼe ningo arakaʼeve voi ndojeruremoʼãi peteĩ mbaʼe ndaikatumoʼãiva jajapo.

⁵ Ikatu ñambojoja ko mbaʼére: Ajépa nderejeruremoʼãi ne amígope ohupi hag̃ua peteĩ mbaʼe ipohyietereíva ha reikuaa porãva ndaipuʼakamoʼãiha hese. Upéicha avei Jehová ndojeruremoʼãi ñandéve peteĩ mbaʼe oikuaa porãva ndaikatumoʼãiha jajapo, Haʼe ningo imbaʼerechakuaa hína. Ha la Biblia heʼi voi hese ‘oikuaa porãha yvynteha ñande’ (Sal. 103:14). Upévare ndajajeplageaivaʼerã jajapo hag̃ua heʼíva ñandéve. Ñaneñeʼẽrenduvaʼerã katu Jehovápe jahechauka hag̃ua mbaʼeichaitépa jahayhu chupe ha jaikoseha avei imborayhúpe.

Jehová omeʼẽ ñandéve peteĩ jopói ijojahaʼỹva

6, 7. a) Mbaʼépa hína ñane konsiénsia? b) Emoĩ peteĩ ehémplo ohechaukáva mbaʼéichapa ñane konsiénsia ñanepytyvõ.

⁶ Koʼág̃a rupíngo jadesidivaʼerã heta mbaʼe. Mbaʼépa ñanepytyvõta jadesidi porã hag̃ua Jehová oipotaháicha? Jehová ningo omeʼẽ voi ñandéve peteĩ jopói ñanepytyvõtava ñaneñeʼẽrendu hag̃ua chupe. Upéva hína ñane konsiénsia. Péro, mbaʼépa hína ñane konsiénsia? Ñane konsiénsia ningo haʼe hína pe ñanepytyvõva jajepyʼamongeta hag̃ua. Ha haʼete peteĩ hués heʼíva ñandéve pe jajapóvapa iporã térã ivai. Ikatu avei ñanepytyvõ jadesidi hag̃ua ha ñaneatõi jajapose jave ivaíva (jaleemína Romanos 2:​14, 15).

⁷ Ñamoĩmína peteĩ ehémplo: Ñapensamína jahaha yvýrupi ñúre ha ñanepytũ tapére. Mbaʼépa ñaikotevẽta ani hag̃ua ñañepysanga ha jaʼa? Tuichaiterei ningo ñanepytyvõta jarekóramo peteĩ lintérna jahesape hag̃ua ñande rape. Péro ndajarekóiramo ndajahechamoʼãi mbaʼeve ha ikatu jaʼa vai. Upéicha avei ñane konsiénsia, heseʼỹ ningo ñakañyetéta ha ndaikatumoʼãi jadesidi porã mbaʼeve.

8, 9. a) Mbaʼérepa sapyʼánte ñane konsiénsia ikatu ñandegueraha vai? b) Mbaʼépa jajapovaʼerã jadesidi porã hag̃ua?

⁸ Péro sapyʼánte ñane konsiénsia ikatu ñandegueraha vai. Mbaʼérepa upéva? Ñapensami jeýna pe lintérnare. Opáramo ipíla ndohesapemoʼãi ñande rape. Upéicha avei ñane konsiénsia. Ndajastudiáiramo Ñandejára Ñeʼẽ ndaikatumoʼãi jaikuaa mbaʼépa iporã térã ivai. Ha ñamombaʼetereíramo ñandéve ñandegustávante ñane konsiénsia ndohechaukamoʼãi ñandéve pe tape porã. Ani avei ñanderesarái ñane korasõ ikatuha ipuʼaka ñane konsiénsiare. La Biblia heʼi voi: “Kuimbaʼe ha kuñanguéra [korasõ] hovamokõi ha iñañaite; máva piko ikatu oikuaa porã ichupe” (Jer. 17: 9, ÑÑB; Pro. 4:23). Ha ndajaiporúiramo Ñandejára Ñeʼẽ ningo ndaikatumoʼãi voi jaikuaa iporãpa hína umi mbaʼe jadesidítava (Sal. 119:105). Péro ñambyasýramo jepe oĩ heta opensáva iporãha  jajapo ñane korasõ heʼíva ha ndohechái mbaʼépa heʼi Ñandejára Ñeʼẽ (jaleemína Efesios 4:​17-19). Upéicha rupi oĩ heta ñande rapicha ojapóva opa mbaʼe vai (1 Tim. 4:2).

⁹ Ñande ningo ndajajoguaséi umívape. Upévare jaheja Ñandejára Ñeʼẽ ñanemboʼe ha upéicha ñane konsiénsia ñanepytyvõta jadesidi porã hag̃ua. Ha jajaporangue umi mbaʼe ñandegustávante, ñahenduvaʼerã ñane konsiénsia heʼíva. Jarrespetavaʼerã avei ñane ermanokuéra konsiénsia ha ani jajapo umi mbaʼe ombopochýtava chupekuéra. Ikatu ningo haʼekuéra nopensaihína ñande ñapensaháicha peteĩ mbaʼére (1 Cor. 8:12; 2 Cor. 4:2; 1 Ped. 3:16).

10. Mbaʼépa ñahesaʼỹijóta koʼág̃a?

¹⁰ Jahechamína koʼág̃a mbaʼéichapa ikatu jahechauka Jehovápe ñaneñeʼẽrendu ha jahayhuha chupe. Upearã ningo tekotevẽ: 1) jahayhu Jehová amigokuérape 2) ñamombaʼe umi ñanemoakãvape ha 3) ñañehaʼãmbaite ñanepotĩ Jehová renondépe. Ñahesaʼỹijóvo koʼã mbaʼe jahecháta jahejavaʼerãha la Biblia ñanemboʼe ikatu hag̃uáicha ñane konsiénsia ñanepytyvõ.

Jahayhu Jehová amigokuérape

11. Mbaʼérepa jahayhuvaʼerã Jehová amigokuérape?

¹¹ Primero, jahayhuvaʼerã Jehová amigokuérape. Pór ehémplo, peteĩ espónha oipyte oimeraẽ líkido oĩva ijerére. Upéicha avei ñande yvypóra haʼete ku jaipytéva umi mbaʼe oĩva ñandejerére. Ñandejára ningo oikuaa porã ovaha ñanderehe ñane irũnguéra lája, tahaʼe heʼíva térã ojapóva,  iporãva térã ivaíva. Upévare la Biblia heʼi porã voi: “Upe oikóva iñarandúva ndive iñaranduvaʼerã, ha upe oikóva ivýrova ndive oñembohekovaive ohóvo” (Pro. 13:​20, ÑÑB; 1 Cor. 15:33). Enterovénte ningo ñanearanduse ha jaipota osẽ porãmbaite ñandéve opa mbaʼe. Ha upearã ñañehaʼãvaʼerã jajapo opa mbaʼe Jehová ojapoháicha. Haʼe ningo iñarandu voi ha avave ndaikatúi oguerovávo hese ilája, upéicharõ jepe oiporavo porã iñamigorã. Ha mávape piko Jehová oiporavo iñamigorã?

12. Mbaʼeichaguápepa Jehová oiporavo iñamigorã?

¹² Oimevaʼerãko ñanemanduʼañaína Jehová heʼi hague Abrahán rehe “che irũ tee” (Isa. 41:8). Abrahán ningo hekojoja, avei ojeroviaitereivaʼekue Jehováre ha iñeʼẽrendu chupe (Sant. 2:​21-23). Jehová ningo peichaguápente oipota iñamigorã. Upéicharõ ñande koʼýte jaiporavo porã vaʼerã ñane amigorã. Ha péicha jajeheʼáramo umi iñarandúvare ñanearandúta avei.

13. Mbaʼépa ñanepytyvõta jaiporavo porã hag̃ua ñane amigorã?

¹³ Mbaʼépa ñanepytyvõta jaiporavo porã hag̃ua ñane amigorã? La Bíbliape oĩ heta ehémplo ñanepytyvõtava jaiporavo porã hag̃ua ñane amigorã. Umíva apytépe jahechakuaa mbaʼéichapa ojogueraha porã vaʼekue Noemí ha inuéra Rut, David ha Jonatán, avei Timoteo ha Pablo (Rut 1: 16, 17; 1 Sam. 23:​16-18; Fili. 2:​19-22). Haʼekuéra ningo ohayhueterei Jehovápe, upéicha rupi oñoamigoite hikuái. Ñandépa upéicha avei? Jahekápa ñane amigorã umi ohayhúva Jehovápe? Kongregasiónpe ningo heta ikatu jajuhu ñane amigorã upeichagua. Haʼekuéra tuichaiterei ñanepytyvõta ñamotenonde hag̃ua Jehovápe, ñaneñeʼẽrendu ha jasegi hag̃ua jaikuaa porãve chupe (jaleemína Gálatas 6:​7, 8). Ha upéicha jajapóramo jaikóta Ñandejára mborayhúpe.

Ñamombaʼe umi ñanemoakãvape

14. Mbaʼérepa sapyʼánte ijetuʼu ñandéve jarrespeta hag̃ua umi ñanemoakãvape?

¹⁴ Segundo, jahechaukáta Jehovápe jahayhuha ñamombaʼévo umi ñanemoakãvape. Sapyʼánte ningo ijetuʼu upéva. Mbaʼérepa? Mokõi mbaʼére: Umi yvypóra ñanemoakãva iñimperfékto ha ñande avei ñaneimperfékto. Upévare ñane michĩ guive ñanderreveldese.

15, 16. a) Mbaʼérepa jarrespetavaʼerã umi ñanemoakãvape? b) Mbaʼépa ñanemboʼe umi Israelgua ojapovaʼekue?

¹⁵ Ha ikatu voi oĩ oñeporandúva: “Mbaʼére piko jarrespetavaʼerã umi ñanemoakãvape?”. Ñanemanduʼavaʼerã oñepuʼã hague Jehová sãmbyhýre ha ñande jajepytasóramo ijykére ñamombaʼeñaína chupe. Upéicharõmante ikatu jaʼe ñañemoĩha ipoguýpe. Avei Jehová ojokuaihína yvypóra imperféktope ñanemoakã hag̃ua. Ha ñapuʼãramo hesekuéra ñapuʼãñaína Jehováre (jaleemína 1 Tesalonicenses 5:​12, 13).

¹⁶ Pór ehémplo, umi Israelgua opuʼãrõ guare Moisés rehe, Jehová heʼi oñepuʼãha hese voi (Núm. 14: 26, 27). Ha Jehová ningo nokambiái. Koʼág̃a avei ñapuʼãramo umi ñanemoakãvare ñapuʼãñaína Jehováre.

17. Mbaʼéichapa jatratavaʼerã umi ñanemoakãvape kongregasiónpe?

¹⁷ Apóstol Pablo ohechauka ñandéve mbaʼéichapa jatratavaʼerã umi ñanemoakãvape kongregasiónpe. Haʼe heʼi: ‘Peneñeʼẽrendúkena umi penemoakãvape ha peñemoĩ ipoguypekuéra. Haʼekuéra ningo oñangareko penderehe kaneʼõʼỹre, oikuaágui omombeʼuvaʼerãha  Ñandejárape opa ojapovaʼekue. Peñehaʼã taivevúi chupekuéra hembiapo, ani ipohýi. Ndapejapóirõ upéicha, naiporãichéne peẽme’ (Heb. 13:17). Jaikuaa ningo ijetuʼuha jepi ñaneñeʼẽrendu ha ñañemoĩ umi ñanemoakãva poguýpe. Péro jajapóramomante jaikóta Ñandejára mborayhúpe. Ha ndareíri ningo upéicharõ ñañehaʼãvaʼerã!

Ñañehaʼãmbaite ñanepotĩ Jehová renondépe

18. Mbaʼérepa Jehová oipota ñanepotĩ?

¹⁸ Tercero, jahechaukáta Jehovápe jahayhuha ñañehaʼãramo ñanepotĩ henondépe. Pór ehémplo, tuvakuéra oñehaʼã ifamília akóinte ipotĩ ha oñemonde porã hag̃ua. Maʼerãpa ojapo hikuái upéva? Oikuaágui ipotĩramo ifamiliakuéra hesãivetaha. Avei umi hénte ohecháramo pe mitã ipotĩha, heʼíta ituvakuéra ohayhuha ifamíliape ha oñangareko porãha hese. Upévare avei Jehová oipota ñanepotĩ. Ñande Ru yvágape oĩva ningo oikuaa ñanepotĩramo ñaneresãivetaha ha oñeñeʼẽ porãtaha avei Hese. Ko mbaʼe ningo iñimportantetereihína. Mbaʼérepa? Pórke umi hénte ohecháta mbaʼéichapa ñanepotĩ ha ñanediferénte. Upévare oserviséta avei hikuái Ñandejárape.

19. Mbaʼérepa tekotevẽ ñanepotĩ?

¹⁹ Ñande jaservíva Jehovápe ningo ñanepotĩvaʼerã opa mbaʼépe. Jehová heʼivaʼekue umi Israelguápe tekotevẽha ipotĩ (Lev. 15:31). Upe léi omeʼẽva chupekuéra ningo heʼi oñotỹvaʼerãha oĩ hague váñope, ojoheivaʼerãha hembiporu ha ijao, avei ojepohéi ha ojepyheivaʼerãha hikuái (Éxo. 30:​17-21; Lev. 11:32; Núm. 19:​17-20; Deu. 23:​13, 14). Ko léi omomanduʼa umi Israelguápe Jehová imarangatu ha ipotĩha opa mbaʼépe. Upévare ñande ñanepotĩvaʼẽra avei opa mbaʼépe (jaleemína Levítico 11:​44, 45).

20. Mbaʼépepa iñimportánte avei ñanepotĩ?

²⁰ Ñanepotĩ hag̃ua Ñandejára renondépe ñanepotĩvaʼerã opa mbaʼépe. Pór ehémplo, ñamoingevaʼerã iporãva ñane korasõme ha ñane akãme, ha jaipeʼavaʼerã umi mbaʼe vai. Ha iñimportantevéva katu ndajajeheʼaivaʼerã rrelihión japúre ani hag̃ua ñamongyʼa Jehová réra. Upévare ñanemanduʼa Isaías 52:​11-pe heʼívare: ‘Pemboyke, pemboyke umi mbaʼe ikyʼáva, ani pepoko umívare, pepoiete katu umívagui, peñemopotĩke’. Koʼág̃a rupi ñande ndajajeheʼái umi rrelihión japúre, péicha ñamboykete voi umi mbaʼe ikyʼáva Jehová renondépe. Upévare ndajafestehái mbaʼeveichagua arete guasu ojapoukáva umi rrelihión japu. Jaikuaa ningo ijetuʼuha ñanepotĩ hag̃ua opa mbaʼépe, péro ñañehaʼãmbaitéramo jaikóta Ñandejára mborayhúpe.

21. Mbaʼépa jajapovaʼerã jaiko hag̃ua opa ára g̃uarã Jehová mborayhúpe?

²¹ Jehová ningo oipota jaiko opa ára g̃uarã imborayhúpe. Ha upearã káda uno ñañehaʼãmbaitevaʼerã jasegi Jesús ehémplo. Jahechaukavaʼerã avei jahayhuha Ñandejárape ñaneñeʼẽrendúvo chupe. Upéicha jajapóramo, mbaʼeve ‘ndaikatumoʼãi ñandepeʼa Ñandejára mborayhúgui, Jesucristo rupi ohechaukavaʼekue ñandéve’ (Rom. 8:​38, 39, BNP).

Nemanduʼápa koʼã mbaʼére?

• Mbaʼéichapa ñane konsiénsia ñanepytyvõ jaiko hag̃ua Ñandejára mborayhúpe?

• Mbaʼérepa jahayhuvaʼerã Jehová amigokuérape?

• Mbaʼérepa ñamombaʼevaʼerã umi ñanemoakãvape?

• Mbaʼérepa ñande jaservíva Ñandejárape ñanepotĩvaʼerã opa mbaʼépe?

[Porandu ñahesaʼỹijóva]

[Taʼanga ha rrekuádro oĩva páhina 20-pe]

PETEĨ LÍVRO ÑANEPYTYVÕTAVA JAIKO HAG̃UA JEHOVÁ OIPOTAHÁICHA

Pe Aty guasu tres diaguáva ojejapovaʼekue 2008-2009-pe oñepresenta peteĩ lívro orekóva 224 páhina ha hérava: ‘Jaikókena Ñandejára mborayhúpe’. Ha maʼerãpa ojejapóraʼe ko lívro? Jaikuaave ha ñamombaʼeve hag̃ua Ñandejára heʼíva. Ñahesaʼỹijo porãramo ko lívro, jahechakuaáta iporãveha jajapo Jehová heʼíva. Ha upéva añoite ikatutaha ñandegueraha jeikove opaʼỹvape.

Ko lívro ñanepytyvõ avei jahechakuaa hag̃ua Jehová ndojeruremoʼãiha ñandéve peteĩ mbaʼe ndaikatumoʼãiva jajapo. Ñaneñeʼẽrendúramo ningo jahechaukáta jahayhuha chupe. Ha jalee rire ko lívro ñañeporandúne katuete: “Mbaʼérepa che aserviʼaína Jehovápe?

Péro oĩ ningo umi ermáno oñemomombyryvaʼekue Ñandejáragui ha ndoikovéimava imborayhúpe. Ñambyasyete ningo tuichaite ojavy haguére hikuái! Ha mbaʼérepa ojapo hikuái upéicha? Pyʼỹinte oñemomombyry hikuái ojapógui ivaíva, ndahaʼéi nontendéi haguére peteĩ mbaʼe omboʼéva pe tembiguái jeroviaha. Upévare, tekotevẽterei jahayhuve Jehovápe ha ñamombaʼeve umi mbaʼe heʼíva ñandéve jajapo hag̃ua. Jahechakuaa ko lívro tuichaiterei ñanepytyvõtaha jahechauka hag̃ua Satanás ijapuha. Ha iñimportantevéva katu, ñanepytyvõta jajepytaso hag̃ua Jehová ykére, ha akóinte jaiko hag̃ua imborayhúpe (Jud. 21).

[Nóta oĩva taʼanga ndive páhina 18]

‘Pejapóramo che rembipota, peikóta che mborayhúpe. Péicha avei che, ajapóvo che Ru rembipota aiko imborayhúpe’