Mì Gbọṣi Owanyi Jiwheyẹwhe Tọn Mẹ
Mì Gbọṣi Owanyi Jiwheyẹwhe Tọn Mẹ
“Mì yí mìde whlá to owanyi Jiwheyẹwhe tọn mẹ, bo to todo lẹblanu Jesu Klisti Oklunọ mítọn tọn hlan ogbẹ̀ madopodo.”—JUDA 21.
1, 2. Nawẹ Jehovah ko do owanyi etọn hia mí gbọn, podọ nawẹ mí wagbọn do yọnẹn dọ e ma nọ hẹn mí do owanyi etọn mẹ to jọwamọ-liho?
ALIHO susu mẹ wẹ Jehovah Jiwheyẹwhe ko do owanyi etọn hia mí te. Ṣigba matin ayihaawe, kunnudenu daho hugan owanyi he e tindo na mí tọn wẹ avọ́sinsan ofligọ tọn he e wleawuna. Owanyi he e tindo na gbẹtọvi lẹ sinyẹn sọmọ bọ e tlẹ do Ovi vivẹ etọn hlan aigba ji nado kú do ota mítọn mẹ. (Joh. 3:16) Jehovah wà ehe na e jlo dọ mí ni nọgbẹ̀ kakadoi, podọ e sọ jlo dọ mí ni duvivi owanyi etọn tọn kakadoi!
2 Ṣigba be mí sọgan donukun dọ Jehovah na hẹn mí do owanyi etọn mẹ to jọwamọ-liho mahopọnna nudepope he mí de nado wà wẹ ya? Lala. Na Juda wefọ 21 dotuhomẹna mí dọmọ: “Mì yí mìde whlá to owanyi Jiwheyẹwhe tọn mẹ, bo to todo lẹblanu Jesu Klisti Oklunọ mítọn tọn hlan ogbẹ̀ madopodo.” Hogbe lọ “mì yí mìde whlá to owanyi Jiwheyẹwhe tọn mẹ” dohia dọ mílọsu dona yí nude wà. To whelọnu lo, etẹwẹ mí dona wà nado gbọṣi owanyi Jiwheyẹwhe tọn mẹ?
Nawẹ Mí Sọgan Gbọṣi Owanyi Jiwheyẹwhe Tọn mẹ Gbọn?
3. Etẹwẹ Jesu dọ dọ eyin nujọnu na emi nado gbọṣi owanyi Otọ́ etọn tọn mẹ?
3 Mí mọ gblọndo na kanbiọ enẹ to hogbe Jesu lọsu tọn he e dọ to ozán godo tọn he e yizan to aigba ji lẹ mẹ. E dọmọ: “Eyin mì yìn osẹ́n ṣie lẹ, mì na nọ nọ̀ owanyi ṣie mẹ; yèdọ dile yẹn yìn osẹ́n Otọ́ ṣie tọn, bosọ nọ nọ̀ owanyi etọn mẹ do.” (Joh. 15:10) E họnwun dọ Jesu mọdọ gbedide Jehovah tọn lẹ hihodo yin nujọnu nado hẹn haṣinṣan dagbe de go hẹ Otọ́ etọn. Todin, eyin Ovi pipé Jiwheyẹwhe tọn wàmọ, be e ma jẹ dọ mílọsu ni wàmọ ya?
4, 5. (a) Aliho tangan tẹ mẹ wẹ mí sọgan dohia dọ mí yiwanna Jehovah te? (b) Naegbọn mí ma do tindo whẹwhinwhẹ́n depope nado vẹtolina gbedide Jehovah tọn lẹ?
4 Na taun tọn, mí nọ dohia dọ mí yiwanna Jehovah gbọn tonusisena ẹn dali. Apọsteli Johanu do ehe hia dole: “Ehe wẹ owanyi Jiwheyẹwhe tọn, dọ mí ni yìn osẹ́n etọn: osẹ́n etọn masọ yin nupẹnagbanmẹ gba.” (1 Joh. 5:3) Nugbo wẹ dọ hogbe lọ tonusise ma nọ yọ́nsè na mẹsusu to egbehe. Ṣigba doayi hogbe lọ: “Osẹ́n etọn masọ yin nupẹnagbanmẹ” go. Jehovah ma nọ biọ dọ mí ni wà nuhe sinyẹn hugan mí.
5 Di apajlẹ: Be a na biọ to họntọn vivẹ de si nado ze agbàn pinpẹn he a yọnẹn dọ e ma sọgan ze wẹ ya? Paali! Jehovah jọmẹ taun hugan mí bosọ yọ́n nugopipe mítọn lẹ hugan mílọsu. Biblu na jide mí dọ Jehovah nọ “flindọ kọ́gudu wẹ mí.” (Ps. 103:14) E ma na biọ to mí si nado wà nuhe go mí ma pé gbede. Enẹwutu, mí ma tindo whẹwhinwhẹ́n depope nado vẹtolina gbedide Jehovah tọn lẹ. To vogbingbọn mẹ, mí nọ yin tonusetọ na mí yọnẹn dọ dotẹnmẹ hundote jiawu de wẹ e yin nado dohia Otọ́ mítọn olọn mẹ tọn dọ mí yiwanna ẹn nugbonugbo bo jlo na gbọṣi owanyi etọn mẹ.
Nunina Vonọtaun de sọn Jehovah Dè
6, 7. (a) Etẹwẹ ayihadawhẹnamẹnu yin? (b) Na apajlẹ lehe ayihadawhẹnamẹnu sọgan gọalọna mí nado gbọṣi owanyi Jiwheyẹwhe tọn mẹ do tọn.
6 To aihọn doglẹ he mẹ mí to gbẹnọ te ehe, nudide susu he mí nọ basi lẹ dona sinai do tonusise mítọn na Jiwheyẹwhe ji. Nawẹ mí sọgan tindo jide dọ nudide ehelẹ sọgbe hẹ ojlo Jiwheyẹwhe tọn gbọn? Jehovah ko na mí nunina de he sọgan gọalọna mí taun nado setonu—enẹ wẹ ayihadawhẹnamẹnu. Etẹwẹ ayihadawhẹnamẹnu yin? Nugopipe vonọtaun he nọ gọalọna mí nado yọ́n míde wẹ e yin. E nọ yinuwa taidi whẹdatọ homẹ tọn bo nọ hẹn mí penugo nado lẹnnupọndo nudide he mí pannukọn to gbẹ̀mẹ lẹ ji kavi nado lẹnayihamẹpọn do nuhe mí ko wà wayi lẹ ji bo gbeje yé pọ́n vlavo eyin yé yin dagbe kavi oylan.—Hia Lomunu lẹ 2:14, 15.
7 Aliho tẹlẹ mẹ wẹ ayihadawhẹnamẹnu mítọn sọgan gọalọna mí te? Lẹnnupọndo apajlẹ de ji. Dawe de to amlọn he yì kanmẹ dọ́ to zánmẹ. To ajiji mẹ, avún etọn sè afọgbè mẹde tọn bo jẹ gbigbó ji. Danuwatọ lọ họnyi. Dawe lọ lọ́n sọn adọ́zan etọn ji bo pọ́n gbonu hlan bosọ mọdọ filẹpo ko yin tó ó. Dawe lọ gbọ fìn ìn. Etẹwẹ na ko jọ eyin dawe lọ ma tindo avún? Owhé etọn sọgan ko yin gbigbà bọ ewọ na jẹflumẹ. Mọdopolọ, gbẹtọ he ma tindo ayihadawhẹnamẹnu na nọ saba jẹflumẹ to whenuena e to tintẹnpọn nado basi nudide dagbe walọyizan tọn lẹ.
8, 9. (a) Etẹwẹ mí dona hẹn do ayiha mẹ gando ayihadawhẹnamẹnu mítọn go? (b) Etẹwẹ mí sọgan wà nado hẹn ẹn diun dọ ayihadawhẹnamẹnu mítọn gọalọna mí ganji?
8 Ṣigba to whedelẹnu, ayihadawhẹnamẹnu sọgan deanana mí nado wà nuhe ma sọgbe. Eyin avún he nọ basi hihọ́ lọ ma to aṣeji bo na dotẹnmẹ numadinu lẹ nado yinuwadeji, be e gúmẹ. Mọdopolọ, eyin ojlo ṣejannabi ahun mítọn tọn yinuwado ayihadawhẹnamẹnu mítọn ji zẹjlẹgo, etẹwẹ na jọ? Ayilinlẹn ṣejannabi tọn mítọn lẹ sọgan yinuwado ayihadawhẹnamẹnu mítọn ji to aliho agọ̀ mẹ. Biblu na mí avase dọ “[ahun] yin oklenọ hugan onú lẹpo, podọ e sọ yin awutunọ tupinpẹnnọ.” (Jẹl. 17:9; Howh. 4:23) Humọ, eyin dawe he go mí donù wayi lọ gbẹkọ awhágbe avún etọn tọn go, e sọgan hẹn owù wá. Mọdopolọ, eyin mí ma ganjẹ anademẹ dejidego Ohó Jiwheyẹwhe tọn he yin Biblu go, ayihadawhẹnamẹnu mítọn sọgan nọma gọalọna mí paali. (Ps. 119:105) E blawu dọ mẹsusu to aihọn ehe mẹ nọ na ayidonugo glanglan ojlo ahun yetọn tọn lẹ bo nọ gbẹkọ nujinọtedo he yin mimọ to Ohó Jiwheyẹwhe tọn mẹ lẹ go mlẹnmlẹn. (Hia Efesunu lẹ 4:17-19.) Nuhe zọ́n niyẹn bọ mẹsusu nọ wà onú dakandakan lẹ dile yé tlẹ tindo ayihadawhẹnamẹnu.—1 Tim. 4:2.
9 Mí dona magbe ma nado tin taidi omẹ enẹlẹ nkọ! Kakatimọ, mì gbọ mí ni dike Ohó Jiwheyẹwhe tọn ni plọn ayihadawhẹnamẹnu mítọn na e nido sọgan gọalọna mí ganji. Mí dona nọ setonuna ayihadawhẹnamẹnu mítọn he yin pinplọn gbọn Biblu dali, kakati nado dike ojlo ṣejannabi tọn mítọn lẹ ni ṣinyọnyẹ e ji. To ojlẹ dopolọ mẹ, mí dona dovivẹnu nado na sisi ayihadawhẹnamẹnu mẹmẹsunnu po mẹmẹyọnnu yiwanna mítọn lẹ po tọn. Mí nọ wà nuhe go mí pé lẹpo ma nado hẹn yé dahli, bo nọ flindọ ayihadawhẹnamẹnu mẹmẹsunnu mítọn lẹ tọn sọgan nọ kẹalọyi onú delẹ he ayihadawhẹnamẹnu mítọn ma yigbena.—1 Kọl. 8:12; 2 Kọl. 4:2; 1 Pita 3:16.
10. Aliho atọ̀n he gando gbẹzan mítọn go tẹlẹ ji wẹ mí na dọhodo todin?
10 Mì gbọ mí ni gbadopọnna aliho atọ̀n he mẹ mí sọgan do owanyi mítọn hia Jehovah te gbọn tonusise ẹn dali. Na nugbo tọn, ayihadawhẹnamẹnu wẹ na gọalọna mí to aliho ehelẹ dopodopo mẹ, ṣigba jẹnukọn whẹ́, nujinọtedo walọyizan tọn he tin to Biblu mẹ lẹ wẹ dona nọ deanana ẹn. Aliho atọ̀n he mẹ mí sọgan dohia dọ mí yiwanna Jehovah bo setonuna ẹn te lẹ wẹ: (1) Mí nọ yiwanna mẹhe Jehovah yiwanna lẹ, (2) mí nọ do sisi hia mẹhe tin to otẹn aṣẹpipa tọn mẹ lẹ, podọ (3) mí nọ dovivẹnu nado gbọṣi wiweji to nukun Jiwheyẹwhe tọn mẹ.
Yiwanna Mẹhe Jehovah Yiwanna Lẹ
11. Naegbọn mí dona yiwanna mẹhe Jehovah yiwanna lẹ?
11 Tintan, mí dona yiwanna mẹhe Jehovah yiwanna lẹ. To whẹho gbẹdido tọn mẹ, gbẹtọ lẹ taidi sékanfun he nọ yawu dọ̀n osin. Mí nọ tindo ayilinlẹn lọ nado joawuna nudepope he lẹdo mí. Mẹdatọ mítọn yọ́n lehe gbẹdido yin owùnu do sọ—podọ lehe gbẹdido sọgan gọalọna gbẹtọvi mapenọ lẹ do ganji. Enẹwutu, e na mí ayinamẹ nuyọnẹn tọn ehe dọmọ: “Ewọ he to zọnlinzin hẹ nuyọnẹntọ na yọnnuin: ṣigba ogbẹ́ nulunọ lẹ tọn na sudo.” (Howh. 13:20; 1 Kọl. 15:33) Depope to mí mẹ ma jlo na “sudo.” Mímẹpo wẹ jlo na “yọnnuin.” Jehovah tindo nuyọnẹn he yiaga hugan, podọ mẹdepope ma sọgan yinuwado e ji to aliho agọ̀ mẹ gbede. Ṣogan, e ze apajlẹ dagbe dai na mí gando gbẹdido go. Ṣigba pọ́n bo—gbẹtọvi mapenọ tẹlẹ wẹ Jehovah nọ de taidi họntọn etọn lẹ?
12. Họntọn wunmẹ tẹlẹ wẹ Jehovah nọ de?
12 Jehovah ylọ tọgbo Ablaham dọ “họntọn ṣie.” (Isa. 41:8) Dawe ehe ze apajlẹ dagbe dai taidi nugbonọ, dodonọ, podọ tonusetọ—enẹ wẹ yindọ e tindo yise. (Jak. 2:21-23) Họntọn wunmẹ he Jehovah nọ de niyẹn. Omẹ mọnkọtọn lẹ wẹ e nọ jihọntọn hẹ to egbehe. Eyin Jehovah nọ de họntọn mọnkọtọn lẹ, be e ma yin nujọnu wẹ e yin dọ mílọsu ni nọ pọ́n họntọn do de, bo nọ zinzọnlin hẹ nuyọnẹntọ lẹ nado sọgan yọnnuin ya?
13. Na nuhe dù họntọn dide, etẹwẹ sọgan gọalọna mí nado basi nudide dagbe?
13 Etẹwẹ sọgan gọalọna we nado basi nudide dagbe to aliho ehe mẹ? Dogbigbapọnna apajlẹ mẹdelẹ tọn to Biblu mẹ sọgan gọalọ. Lẹnnupọndo haṣinṣan he tin to Luti po asu-nọ̀ etọn Naomi po ṣẹnṣẹn, to Davidi po Jonatani po ṣẹnṣẹn, podọ to Timoti po Paulu po ṣẹnṣẹn ji. (Luti 1:16, 17; 1 Sam. 23:16-18; Flp. 2:19-22) Họntọn ehelẹ vẹ́ taun na whẹwhinwhẹ́n tangan de wutu: Yé tindo owanyi nujọnu tọn na Jehovah. Be a sọgan mọ họntọn he yiwanna Jehovah dile hiẹ lọsu wà do ya? Deji dọ hiẹ sọgan mọ họntọn mọnkọtọn lẹ to agun mẹ. Họntọn mọnkọtọn lẹ ma na sisẹ́ we nado wà nudepope he na hẹn homẹgble Jehovah. Kakatimọ, yé na gọalọna we nado setonuna ẹn, nado whẹ́n to gbigbọ-liho, podọ nado dó gbọn gbigbọ dali. (Hia Galatianu lẹ 6:7, 8.) Yé na gọalọna we nado gbọṣi owanyi Jiwheyẹwhe tọn mẹ.
Nọ Na Sisi Mẹhe Tin to Otẹn Aṣẹpipa Tọn mẹ Lẹ
14. Etẹlẹ wẹ nọ saba hẹn ẹn vẹawuna mí nado do sisi hia mẹhe tin to otẹn aṣẹpipa tọn mẹ lẹ?
14 Aliho awetọ he mẹ mí nọ dohia dọ mí yiwanna Jehovah te, gando aṣẹpipa go. Mí dona nọ do sisi hia mẹhe tin to otẹn aṣẹpipa tọn mẹ lẹ. Naegbọn e nọ vẹawuna mí to whedelẹnu nado wàmọ? Onú dopo wẹ yindọ, gbẹtọvi he tin to otẹn aṣẹpipa tọn mẹ lẹ yin mapenọ. Humọ, mílọsu yin mapenọ ga. Mí nọ diahi hẹ ayilinlẹn jọwamọ tọn nado ṣiatẹ.
15, 16. (a) Naegbọn e yin nujọnu na mí nado nọ na sisi mẹhe Jehovah ze azọngban do alọmẹ na nado nọ penukundo omẹ etọn lẹ go lẹ? (b) Etẹwẹ mí plọn sọn nukun he Jehovah yí do pọ́n atẹṣiṣi Islaelivi lẹ tọn do Mose go mẹ?
15 Enẹwutu a sọgan kanse dọ, ‘Eyin e nọ vẹawuna mí sọmọ nado na sisi mẹhe tin to otẹn aṣẹpipa tọn mẹ lẹ, naegbọn mí do tin to dandannu glọ nado wàmọ?’ Gblọndo lọ gando whẹho nupojipetọ-yinyin tọn go. Mẹnu wẹ a na de taidi nupojipetọ kavi ogán towe? Eyin mí de Jehovah taidi Nupojipetọ mítọn, mí dona setonuna aṣẹpipa etọn. Eyin mí ma wàmọ, be mí sọgan ylọ ẹ dọ Ogán mítọn nugbonugbo ya? Humọ, Jehovah nọ saba yí aṣẹpipa etọn zan gbọn gbẹtọvi mapenọ he e ze azọngban do alọmẹ na nado penukundo omẹ etọn lẹ go lẹ gblamẹ. Eyin mí nọ ṣiatẹ do omẹ enẹlẹ go, nukun tẹwẹ Jehovah na yí do pọ́n nuyiwa mítọn?—Hia 1 Tẹsalonikanu lẹ 5:12, 13.
16 Di apajlẹ, to whenuena Islaelivi lẹ hlunnudọ bo ṣiatẹ do Mose go, Jehovah pọ́n nuyiwa atẹṣiṣi tọn yetọn lẹ hlan taidi atẹṣiṣi do ewọ lọsu go tlọlọ. (Osọha 14:26, 27) Jiwheyẹwhe ma ko diọ. Eyin mí tẹnpọn nado ṣiatẹ do mẹhe e zedo otẹn aṣẹpipa tọn mẹ lẹ go, be mí to atẹṣi do ewọ lọsu go niyẹn!
17. Gbigbọ tẹwẹ mí dona dovivẹnu nado wleawuna gando mẹhe tin to otẹn aṣẹpipa tọn mẹ to agun mẹ lẹ go?
17 Apọsteli Paulu do lehe mí dona nọ yinuwa hẹ mẹhe tin to otẹn azọngban tọn mẹ to agun Klistiani tọn mẹ lẹ do hia. E wlan dọmọ: “Mì nọ yí mẹhe dugán to mì ji lẹ sè, bo nọ litai hlan yé: na yé to alindọn mìtọn lẹ họ́, yé he ma sọgan nọma dogbè [nuhe yé] wà lẹ tọn, na yé nido yí ayajijẹ do basi i, e yin po homẹgble po blo: na enẹ ma yin alenu na mì gba.” (Heb. 13:17) Na nugbo tọn, e nọ biọ dọ mí ni dovivẹnu vẹkuvẹku nado wleawuna gbigbọ tonusise po taliai po tọn mọnkọtọn. Ṣigba, flindọ mí to onú lẹpo wà nado gbọṣi owanyi Jiwheyẹwhe tọn mẹ. Be e ma jẹ dọ mí ni dovivẹnu lẹpo nado sọgan jẹ yanwle enẹ kọ̀n ya?
Gbọṣi Wiweji to Nukun Jehovah Tọn Mẹ
18. Naegbọn Jehovah do jlo dọ mí ni gbọṣi wiweji?
18 Aliho atọ̀ntọ he mẹ mí nọ dohia dọ mí yiwanna Jehovah te wẹ yindọ mí nọ dovivẹnu nado gbọṣi wiweji to nukun etọn mẹ. Mẹjitọ lẹ nọ saba dovivẹnu susu nado hẹn ẹn diun dọ ovi yetọn lẹ to wiweji. Etẹwutu? Onú dopo wẹ yindọ, wiwejininọ yin dandannu na agbasalilo po dagbemẹninọ ovi lọ tọn po. Humọ, ovi he tin to wiweji lọ nọ hẹn pipà wá na whẹndo lọ podọ ehe nọ do owanyi po mẹtọnhopọn mẹjitọ lọ lẹ tọn po hia. Whẹwhinwhẹ́n dopolọ lẹ wutu wẹ Jehovah jlo dọ mí ni gbọṣi wiweji. E yọnẹn dọ wiwejininọ yin dandannu na dagbemẹninọ mítọn. E sọ yọnẹn dọ wiwejininọ mítọn nọ hẹn pipà wá na ewọ he yin Otọ́ mítọn olọn mẹ tọn. Onú titengbe wẹ ehe yin, na gbẹtọ lẹ sọgan dọnsẹpọ Jiwheyẹwhe he sẹ̀n mí te na yé mọ lehe mí gbọnvona mẹhe tin to aihọn gblezọn ehe mẹ lẹ do wutu.
19. Nawẹ mí wagbọn do yọnẹn dọ wiwejininọ to agbasa-liho yin nujọnu?
19 Aliho tẹlẹ mẹ wẹ mí dona gbọṣi wiweji te? Na nugbo tọn, to adà gbẹzan tọn mítọn lẹpo mẹ wẹ. To Islaeli hohowhenu tọn, Jehovah dohia omẹ etọn lẹ hezeheze dọ wiwejininọ to agbasa-liho yin nujọnu. (Lev. 15:31) Osẹ́n Mose tọn donù onú delẹ go taidi ogbó lẹ bibẹ dlan, agbán, alọ po afọ po kiklọ, gọna avọ̀ yinyan. (Eks. 30:17-21; Lev. 11:32; Osọha 19:17-20; Deut. 23:13, 14) Islaelivi lẹ yin nuflin dọ Jiwheyẹwhe yetọn, Jehovah, yin wiwe-ṣeke to adà lẹpo mẹ. Mọdopolọ, devizọnwatọ Jiwheyẹwhe wiwe lọ tọn lẹ lọsu dona yin wiwe.—Hia Levitiku 11:44, 45.
20. Aliho tẹlẹ mẹ wẹ mí dona gbọṣi wiweji te?
20 Enẹwutu, mí dona gbọṣi wiweji to homẹ podọ to gbonu. Mí nọ dovivẹnu nado lẹnnupọndo nuhe wé lẹ ji. Mí nọ tẹdo nujinọtedo wiwejininọ walọ dagbe tọn Jehovah tọn lẹ go po nugbonọ-yinyin po mahopọnna lehe aihọnmẹnu lẹ gblezọn to zanhẹmẹ-liho do. Hú popolẹpo, mí nọ magbe nado hẹn sinsẹ̀n-bibasi mítọn do wiweji bo ma nọ dike e ni yin hinhẹnflu gbọn sinsẹ̀n lalo dali to aliho depope mẹ. Mí nọ hẹn avase gbọdo he yin kinkàndai to Isaia 52:11 mẹ do ayiha mẹ to whepoponu dọmọ: “Mì jagọ̀, mì jagọ̀, mì tọ́n sọn ṣẹnṣẹn etọn, mì doalọ onú mawé de go blo; mì tọ́n sọn ṣẹnṣẹn etọn, mì yin wiwe.” To egbehe, mí nọ gbọṣi wiweji to gbigbọ-liho gbọn tintẹnpọn nado nọla na nudepope he gando sinsẹ̀n lalo go dali. Di apajlẹ, nuhe zọ́n niyẹn bọ mí ma nọ tindo mahẹ depope to hùnwhẹ po whedudu sinsẹ̀n lalo tọn po he gbayipe to aihọn egbehe tọn mẹ lẹ mẹ. Na nugbo tọn, e nọ vẹawu nado gbọṣi wiweji. Ṣigba omẹ Jehovah tọn lẹ nọ dovivẹnu nado wàmọ, na ehe nọ gọalọna yé nado gbọṣi owanyi Jiwheyẹwhe tọn mẹ.
21. Nawẹ mí sọgan deji dọ mí na gbọṣi owanyi Jiwheyẹwhe tọn mẹ gbọn?
21 Jehovah jlo dọ mí ni gbọṣi owanyi etọn mẹ kakadoi. Ṣigba dopodopo mítọn dona hẹn ẹn diun dọ mí wà nuhe go mí pé lẹpo nado gbọṣi owanyi Jiwheyẹwhe tọn mẹ. Mí sọgan wà ehe gbọn apajlẹ Jesu tọn hihodo dali podọ mí na dohia dọ mí yiwanna Jehovah eyin mí setonuna gbedide Etọn lẹ. Eyin mí wàmọ, mí sọgan deji dọ nudepope “ma na tin sọgan nado klan mí sọn owanyi Jiwheyẹwhe tọn he tin to Klisti Jesu Oklunọ mítọn mẹ.”—Lom. 8:38, 39.
Be Hiẹ Flin Ya?
• Nawẹ ayihadawhẹnamẹnu mítọn sọgan gọalọna mí nado gbọṣi owanyi Jiwheyẹwhe tọn mẹ gbọn?
• Naegbọn mí dona yiwanna mẹhe Jehovah yiwanna lẹ?
• Naegbọn e yin nujọnu nado nọ na sisi mẹhe tin to otẹn aṣẹpipa tọn mẹ lẹ?
• Naegbọn omẹ Jiwheyẹwhe tọn lẹ dona nọ yí nukun nujọnu tọn do pọ́n wiwejininọ?
[Kanbiọ Oplọn tọn lẹ]
[Apotin/Yẹdide to weda 20]
OWE DE HE NỌGODONA WALỌ DAGBE
To plidopọ agbegbe 2008/2009 tọn whenu, owe he tindo weda 224 de he hosọ etọn yin Mì Gbọṣi Owanyi Jiwheyẹwhe Tọn Mẹ yin didetọn. Etẹwẹ yin lẹndai owe yọyọ ehe tọn? E yin awuwlena nado gọalọna Klistiani lẹ nado yọ́n nujinọtedo Jehovah tọn lẹ bo yiwanna yé, podọ na titengbe tọn, e zinnudo walọyizan Klistiani tọn ji. Eyin mí yí sọwhiwhe do plọn owe Mì Gbọṣi Owanyi Jiwheyẹwhe Tọn Mẹ, enẹ na hẹn nujikudo mítọn sinyẹn deji dọ gbẹninọ sọgbe hẹ nujinọtedo Jehovah tọn lẹ wẹ yọ́n hugan todin podọ mọwiwà na plan mí biọ ogbẹ̀ madopodo he ja mẹ.
Humọ, owe ehe yin awuwlena nado gọalọna mí nado mọdọ tonusisena Jehovah ma yin agbanpẹnmẹnu. Kakatimọ, e nọ do obá he mẹ mí yiwanna Jehovah jẹ hia. Enẹwutu, owe ehe na whàn mí nado kanse míde dọ, ‘Naegbọn yẹn do nọ setonuna Jehovah?’
To whenuena mẹdelẹ basi nudide ylankan lọ nado gbẹkọ owanyi Jehovah tọn go, to paa mẹ nuhahun lọ ma nọ yin whẹho sinsẹ̀n-nuplọnmẹ tọn gba, ṣigba awugbopo nado hẹn walọ dagbe go wẹ nọ zọ́n. Enẹwutu, lehe e yin nujọnu dọ mí ni hẹn owanyi po pinpẹn-nutọn-yinyọnẹn mítọn po na osẹ́n po nunọwhinnusẹ́n Jehovah tọn lẹ po he nọ deanana mí to gbẹzan egbesọegbesọ tọn mítọn mẹ siso deji do sọ! Mí deji dọ owe yọyọ ehe na gọalọna lẹngbọ Jehovah tọn lẹ lẹdo aihọn pé nado nọ wà nuhe sọgbe, bo do Satani hia taidi lalonọ, podọ hú popolẹpo nado gbọṣi owanyi Jiwheyẹwhe tọn mẹ!—Juda 21.
[Yẹdide to weda 18]
“Eyin mì yìn osẹ́n ṣie lẹ, mì na nọ nọ̀ owanyi ṣie mẹ; yèdọ dile yẹn yìn osẹ́n Otọ́ ṣie tọn, bosọ nọ nọ̀ owanyi etọn mẹ do”