“Magpabilin Kamo sa Gugma sang Dios”
“Magpabilin Kamo sa Gugma sang Dios”
“Magpabilin kamo sa gugma sang Dios, samtang nagahulat kamo sang kaluoy sang aton Ginuong Jesucristo nga nagadul-ong sa kabuhi nga walay katapusan.”—JUD. 21.
1, 2. Paano ginpakita ni Jehova ang iya gugma sa aton, kag paano naton nahibaluan nga kinahanglan may himuon kita agod makapabilin sa gugma sang Dios?
GINPAKITA ni Jehova nga Dios ang iya gugma sa aton sa madamo nga paagi. Apang, ang labing talalupangdon nga pagpakita ni Jehova sang iya gugma amo ang pag-aman niya sang halad gawad. Daku gid ang iya gugma sa katawhan amo nga ginpadala niya ang iya hinigugma nga Anak sa duta agod mapatay para sa aton. (Juan 3:16) Ginhimo ini ni Jehova bangod luyag niya nga mabuhi kita kag manginpulos sa iya gugma sing walay katapusan!
2 Apang, matuod bala nga padayon kita nga higugmaon ni Jehova bisan ano man ang himuon naton? Indi. Ang Judas 21 nagasiling: “Magpabilin kamo sa gugma sang Dios, samtang nagahulat kamo sang kaluoy sang aton Ginuong Jesucristo nga nagadul-ong sa kabuhi nga walay katapusan.” Ang ekspresyon nga “magpabilin kamo sa gugma sang Dios” nagapakita nga kinahanglan may himuon kita. Nian, ano ang kinahanglan naton himuon agod makapabilin sa gugma sang Dios?
Paano Kita Makapabilin sa Gugma sang Dios?
3. Subong ginsiling ni Jesus, ano ang kinahanglan agod makapabilin sa gugma sang iya Amay?
3 Masapwan naton ang sabat sa sina nga pamangkot sa ginhambal mismo ni Jesus sa katapusan nga gab-i sang iya kabuhi sa duta. Sia nagsiling: “Kon ginatuman ninyo ang akon mga sugo, magapabilin kamo sa akon gugma, subong nga ginatuman ko ang mga sugo sang Amay kag nagapabilin sa iya gugma.” (Juan 15:10) Maathag nga nahibal-an ni Jesus nga kinahanglan nga tumanon ang mga sugo ni Jehova agod padayon nga matigayon ang maayo nga tindog sa iya Amay. Kon kinahanglan ini himuon sang himpit nga Anak sang Dios, indi bala nga amo man sini dapat ang aton himuon?
4, 5. (a) Ano ang una nga paagi nga mapakita naton nga ginahigugma naton si Jehova? (b) Ngaa wala kita sing rason nga sikwayon ang mga sugo ni Jehova?
4 Una, ginapakita naton nga ginahigugma naton si Jehova paagi sa pagtuman sa iya. Ginpaathag ini ni apostol Juan sang nagsiling sia: “Kay amo ini ang kahulugan sang gugma sa Dios, nga tumanon naton ang iya mga sugo; apang ang iya mga sugo indi mabug-at.” (1 Juan 5:3) Madamo nga tawo karon ang indi luyag magtuman sa iban. Apang, talupangda ini nga dinalan: “Apang ang iya mga sugo indi mabug-at.” Si Jehova wala nagasugo sa aton sang indi naton masarangan.
5 Sa pag-ilustrar: Suguon mo bala ang imo pinalangga nga abyan nga hakwaton ang isa ka butang nga nahibaluan mo nga indi niya madala? Siempre indi! Si Jehova mas maayo sangsa aton kag mas mahinangpanon sa aton mga limitasyon. Ang Biblia nagapalig-on sa aton nga si Jehova ‘nagadumdum nga kita yab-ok.’ (Sal. 103:14) Indi niya kita pagsuguon sang indi naton masarangan. Gani wala kita sing rason nga sikwayon ang mga sugo ni Jehova. Sa kabaliskaran, nahangpan naton nga ang pagtuman isa ka maayo nga kahigayunan agod mapakita naton sa aton langitnon nga Amay nga ginahigugma gid naton sia kag luyag naton magpabilin sa iya gugma.
Pinasahi nga Regalo Gikan kay Jehova
6, 7. (a) Ano ang konsiensia? (b) Iilustrar kon paano kita mabuligan sang aton konsiensia nga makapabilin sa gugma sang Dios.
6 Sa sining mabudlay nga kalibutan nga aton ginapuy-an, madamo kita sing desisyon nga dapat himuon may kaangtanan sa aton pagtuman sa Dios. Paano naton masiguro nga ang aton desisyon nahisuno gid sa kabubut-on sang Dios? Ginhatagan kita ni Jehova sing regalo nga makabulig gid sa aton nga mangin matinumanon. Amo ini ang aton konsiensia. Ano ang konsiensia? Isa ini ka pinasahi nga ikasarang nga nagausisa sang aton mga buhat, panimuot, kag desisyon. Daw kaangay ini sang hukom sa sulod naton nga nagabinagbinag sang mga desisyon nga dapat naton himuon ukon nagausisa sang aton mga hinimuan kon bala maayo ini ukon malain, husto ini ukon sala.—Basaha ang Roma 2:14, 15.
7 Paano kita mabuligan sang aton konsiensia? Binagbinaga ini nga ilustrasyon. Ang isa ka manuglakbay nagapanglakaton sa isa ka malapad nga desyerto. Wala diri sing banas, dalan, ukon mga palatandaan. Apang, sigurado gid sia nga makaabot sia sa iya kaladtuan. Ngaa? Bangod may dala sia nga kompas. Ang kompas may apat ka panguna nga direksion kag may kamot ini nga may magnet nga nagatudlo pirme sa aminhan. Kon wala sing kompas ang manuglakbay, mahimo sia magtalang. Sing kaanggid, kon wala sing konsiensia ang tawo, indi sia pirme makahimo sing husto kag matarong nga mga desisyon.
8, 9. (a) Ano nga mga limitasyon sang aton konsiensia ang dapat naton pirme hunahunaon? (b) Ano ang himuon naton agod mabuligan kita sang aton konsiensia?
8 Apang kaangay sang kompas, may mga limitasyon man ang konsiensia. Kon itupad sang manuglakbay ang iya kompas sa magnet, ang kamot sang kompas indi na magtudlo sa aminhan. Subong man, ano ang matabo kon tugutan naton ang makagod nga mga handum sang aton tagipusuon nga magdesisyon para sa aton? Mahimo nga indi kita magiyahan sing maayo sang aton konsiensia. Ang Biblia nagapaandam nga “ang tagiposoon malimbongon labaw sa tanan nga butang, kag lakas gid kadunut.” (Jer. 17:9; Hulu. 4:23) Dugang pa, kon ang manuglakbay wala sing eksakto kag masaligan nga mapa, wala man gihapon sing pulos ang iya kompas. Sing kaanggid, kon wala kita nagapagiya sa masaligan nga panuytoy sang Pulong sang Dios, ang Biblia, ang aton konsiensia halos wala man sing pulos. (Sal. 119:105) Makapasubo nga ginauna sang madamo nga tawo sa sining kalibutan ang ila mga handum sa baylo nga magpagiya sa talaksan sang Pulong Dios. (Basaha ang Efeso 4:17-19.) Amo kon ngaa nagahimo sila sing kalautan, bisan pa may konsiensia sila.—1 Tim. 4:2.
9 Dapat mangin determinado kita nga indi sila pagsundon! Sa baylo, padayon naton nga tugutan ang Pulong sang Dios nga tudluan kag hanason ang aton konsiensia agod mabuligan kita sini. Kinahanglan naton sundon ang aton nahanas sa Biblia nga konsiensia sa baylo nga pasugtan ang aton malain nga handum. Subong man, dapat naton dumdumon ang konsiensia sang aton pinalangga nga mga kauturan. Tinguhaan naton nga indi sila masandad kay mahimo ang konsiensia sang aton mga utod mas sensitibo ukon estrikto sangsa aton.—1 Cor. 8:12; 2 Cor. 4:2; 1 Ped. 3:16.
10. Ano ang tatlo ka bahin sang aton kabuhi nga pagabinagbinagon naton?
10 Binagbinagon naton subong ang tatlo ka bahin sang aton kabuhi diin mapakita naton ang aton gugma kay Jehova paagi sa pagkamatinumanon. Siempre pa, may importante diri nga papel ang aton konsiensia, apang kinahanglan ini anay giyahan sang mga talaksan sang Biblia. Amo ini ang tatlo ka paagi nga mapakita naton nga ginahigugma kag ginatuman naton si Jehova: (1) Ginahigugma naton ang mga ginahigugma ni Jehova, (2) ginatahod naton ang awtoridad, kag (3) ginatinguhaan naton nga mangin matinlo sa pagtamod sang Dios.
Higugmaa ang mga Ginahigugma ni Jehova
11. Ngaa dapat naton higugmaon ang mga ginahigugma ni Jehova?
11 Una, dapat naton higugmaon ang mga ginahigugma ni Jehova. Kon tuhoy sa pagpakig-upod, ang mga tawo daw kaangay sang espongha. Ginasuyop ukon ginailog naton ang yara sa aton palibot. Nahibaluan gid sang aton Manunuga nga ang pagpakig-upod sa iban mahimo mangin makatalagam ukon mapuslanon para sa di-himpit nga mga tawo. Gani, ginlaygayan niya kita: “Maglakat upud sa maalam nga mga tawo kag manginmaalam ka, apang ang kaupdanan sang mga buangbuang magaantus.” (Hulu. 13:20; 1 Cor. 15:33) Indi gid luyag sang bisan sin-o sa aton nga ‘mag-antos.’ Luyag naton tanan nga ‘mangin maalam.’ Wala na sing mas maalam pa kay Jehova kag indi gid sia maimpluwensiahan sang bisan sin-o sa kalainan. Apang, maayo gid sia nga halimbawa sa pagpili sang kaupod. Hunahunaa sing makadali, sin-o bala ang ginpili ni Jehova nga mangin abyan niya?
12. Ano nga sahi sang abyan ang ginapili ni Jehova?
12 Gintawag ni Jehova si Abraham nga “akon abyan.” (Isa. 41:8) Matutom gid sia, matarong, kag matinumanon, buot silingon nagkabuhi sia suno sa iya pagtuo sa Dios. (Sant. 2:21-23) Amo sina nga sahi sang abyan ang ginapili ni Jehova. Luyag gihapon ni Jehova nga mangin abyan ang amo sina nga sahi sang mga tawo subong. Kon amo sini nga mga abyan ang ginapili ni Jehova, indi bala dapat pilion man naton sing maayo ang aton mga abyan agod makalakat kita upod sa maalam nga mga tawo kag mangin maalam?
13. Paano ka makapili sing maayo nga mga abyan?
13 Paano ka makapili sing maayo nga mga abyan? Paagi sa pagtuon sa mga halimbawa sa Biblia. Binagbinaga ang pag-abyanay ni Rut kag sang iya ugangan nga si Noemi, ni David kag ni Jonatan, ukon ni Timoteo kag ni Pablo. (Rut 1:16, 17; 1 Sam. 23:16-18; Fil. 2:19-22) Nangin suod sila nga mag-abyan bangod sa isa ka importante nga rason: Matuod gid ang ila gugma kay Jehova. Makasapo ka bala sing mga abyan nga nagahigugma gid kay Jehova pareho sa imo? Makasalig ka nga madamo sing amo sina nga sahi sang abyan sa Cristianong kongregasyon. Ina nga mga abyan indi magdala sa imo sa kalainan nga magapasubo kay Jehova. Sa baylo, buligan ka nila nga magtuman kay Jehova, magsuod sa iya, kag magsab-ug para sa espiritu. (Basaha ang Galacia 6:7, 8.) Buligan ka man nila nga magpabilin sa gugma sang Dios.
Pagtahod sa Awtoridad
14. Ngaa kon kaisa nabudlayan kita magtahod sa awtoridad?
14 Ang ikaduha nga paagi nga mapakita naton nga ginahigugma naton si Jehova amo ang pagtahod sa awtoridad. Kon kaisa, mabudlay gid ini himuon. Ngaa? Bangod indi himpit ang mga tawo nga may awtoridad. Dugang pa, kita mismo indi man himpit kag may huyog nga magrebelde.
15, 16. (a) Ngaa dapat naton tahuron ang ginhatagan ni Jehova sing responsibilidad nga mag-atipan sa iya katawhan? (b) Ano ang matun-an naton sa pagtamod ni Jehova sa pagrebelde sang mga Israelinhon batok kay Moises?
15 Gani, mahimo ka mamangkot, ‘Kon ginabudlayan kita magtahod sa awtoridad, ngaa dapat pa naton ini himuon?’ Ang sabat naangot sa hulusayon sang pagkasoberano. Sin-o ang pilion mo nga soberano ukon manuggahom? Kon pilion naton si Jehova subong aton Soberano, dapat naton tahuron ang iya awtoridad. Kay kon indi, makabig bala naton sia subong aton Manuggahom? Dugang pa, ginapatuman pirme ni Jehova ang iya awtoridad paagi sa indi himpit nga mga tawo nga ginhatagan niya sing responsibilidad nga mag-atipan sa iya katawhan. Kon supakon naton ina nga mga tawo, ano ayhan ang pagkabig sini ni Jehova?—Basaha ang 1 Tesalonica 5:12, 13.
16 Halimbawa, sang nagkumod kag nagrebelde ang mga Israelinhon batok kay Moises, ginkabig ini ni Jehova nga pagrebelde batok sa iya. (Num. 14:26, 27) Wala nagbag-o ang Dios. Kon nagarebelde kita sa mga gintangduan ni Jehova sing awtoridad, nagarebelde man kita batok sa iya!
17. Anong husto nga panimuot ang dapat naton ipakita sa mga gintangduan sa Cristianong kongregasyon?
17 Ginpakita ni apostol Pablo ang husto nga panimuot kon paano tamdon ang mga gintangduan sa Cristianong kongregasyon. Nagsulat sia: “Mangin matinumanon sa mga nagapanguna sa inyo kag mangin mapinasakupon, kay ginabantayan nila ang inyo kalag subong nga sila ang manabat; agod himuon nila ini nga may kalipay kag wala nagapanghayhay, kay makahalit ini sa inyo.” (Heb. 13:17) Matuod, indi mahapos ang pagtuman kag pagpasakop. Apang, dumduma nga ginapanikasugan naton nga makapabilin sa gugma sang Dios. Indi bala takus gid ini himuon?
Magpabilin nga Matinlo sa Pagtamod ni Jehova
18. Ngaa luyag ni Jehova nga magpabilin kita nga matinlo?
18 Ang ikatlo nga paagi nga mapakita naton ang aton gugma kay Jehova amo ang pagpanikasog nga magpabilin nga matinlo sa iya pagtamod. Ginasiguro sang mga ginikanan nga matinlo pirme ang ila kabataan. Ngaa? Una, importante ang katinlo para sa ikaayong lawas sang bata. Ikaduha, ang matinlo nga bata nagapakita nga maayo gid mag-atipan ang iya ginikanan. Sing kaanggid, luyag gid ni Jehova nga mangin matinlo kita. Nahibaluan niya nga para gid sa aton kaayuhan ang katinlo. Nakahibalo man sia nga ang aton katinlo nagahatag sa iya sing kadayawan subong aton langitnon nga Amay. Importante gid ini kay kon matalupangdan sang iban nga tuhay gid kita sa nadagtaan nga kalibutan, mapahulag sila nga alagaron man ang aton Dios.
19. Ngaa importante gid ang pisikal nga katinlo?
19 Sa ano nga mga bahin sang aton kabuhi dapat kita magpabilin nga matinlo? Sa tanan nga bahin. Sa dumaan nga Israel, maathag nga ginpahibalo ni Jehova sa iya katawhan nga importante gid ang pisikal nga katinlo. (Lev. 15:31) Ang Mosaikong Kasuguan naglakip sa paglubong sang higko, pagtinlo sang mga suludlan, kag paghugas sang kamot, tiil, kag panapton. (Ex. 30:17-21; Lev. 11:32; Num. 19:17-20; Deut. 23:13, 14) Ginpahanumdom ang mga Israelinhon nga ang ila Dios nga si Jehova balaan, buot silingon “matinlo,” “putli,” kag “sagrado.” Ang mga alagad sang balaan nga Dios dapat man mangin balaan.—Basaha ang Levitico 11:44, 45.
20. Paano kita makapabilin nga matinlo?
20 Ginapakita sini nga kinahanglan naton nga mangin matinlo indi lamang sa pisikal. Tinguhaan gid naton nga mangin matinlo ang aton panghunahuna. Sundon naton sing matutom ang mga talaksan ni Jehova sa moral, bisan pa lapnag ang seksuwal nga imoralidad sa kalibutan. Importante sa tanan, huptan gid naton nga matinlo ang aton pagsimba kag likawan nga madagtaan ini sang butig nga relihion. Pirme naton hunahunaon ang inspirado nga paandam nga narekord sa Isaias 52:11: “Halin kamo, halin kamo, gowa kamo gikan diri, dili kamo magtandug sang butang nga dimatinlo; gowa kamo gikan sa tunga niya, paninloi ang inyo kaugalingon.” Sa karon, mahuptan naton nga matinlo ang aton pagsimba kon indi kita makigbahin sa bisan ano nga may labot sa butig nga pagsimba. Halimbawa, ginalikawan naton ang relihioso nga mga selebrasyon nga popular sa kalibutan subong. Matuod, mabudlay gid nga magpabilin nga matinlo. Apang ginapanikasugan gid ini sang mga sumilimba ni Jehova bangod makabulig ini nga makapabilin sila sa gugma sang Dios.
21. Paano naton mapat-od nga makapabilin kita sa gugma sang Dios?
21 Luyag ni Jehova nga magpabilin kita sa iya gugma sa walay katubtuban. Apang dapat pat-uron sang kada isa sa aton nga ginahimo niya ang iya labing masarangan agod makapabilin sa gugma sang Dios. Mahimo naton ini paagi sa pagsunod sa halimbawa ni Jesus kag sa pagtuman sa mga sugo ni Jehova nga amo ang nagapamatuod sang aton gugma sa Iya. Kon himuon naton ini, makasalig gid kita nga wala sing bisan ano nga “makapahamulag sa aton sa gugma sang Dios nga yara kay Cristo Jesus nga aton Ginuo.”—Roma 8:38, 39.
Madumduman Mo Bala?
• Paano makabulig ang aton konsiensia agod makapabilin kita sa gugma sang Dios?
• Ngaa dapat naton higugmaon ang mga ginahigugma ni Jehova?
• Ngaa importante nga tahuron ang awtoridad?
• Ngaa importante gid ang katinlo sa mga alagad sang Dios?
[Mga Pamangkot sa Pagtinuon]
[Kahon/Retrato sa pahina 20]
ANG LIBRO NGA NAGATUDLO SANG MAAYO NGA PAGGAWI
Sang 2008/2009 distrito nga kombension, ginpagua ang isa ka 224-pahina nga libro nga may tig-ulo “Magpabilin Kamo sa Gugma sang Dios.” Ano ang katuyuan sining bag-o nga libro? Tuyo sini nga buligan ang mga Cristiano nga hibaluon kag higugmaon ang mga talaksan ni Jehova, ilabi na may kaangtanan sa Cristiano nga paggawi. Ang maid-id nga pagtuon sini nga libro magapabakod sang aton pagpati nga ang pagkabuhi suno sa talaksan ni Jehova amo ang labing maayo, kag nagadul-ong ini sa kabuhi nga walay katapusan sa palaabuton.
Labaw sa tanan, ini nga libro nagapahangop sa aton nga indi mabudlay ang pagtuman kay Jehova. Kundi amo ini ang paagi agod mapakita naton ang aton gugma sa iya. Gani, ini nga libro magapahulag sa aton nga pamangkuton ang aton kaugalingon, ‘Ngaa ginatuman ko si Jehova?’
Kon ang isa makasala kag mahamulag sa gugma ni Jehova, sa masami ang kabangdanan indi ang kakulang sing ihibalo sa mga panudlo kundi ang sayop nga paggawi. Gani, importante gid nga pabakuron naton ang aton gugma kag apresasyon sa mga kasuguan kag prinsipio ni Jehova nga nagatuytoy sa aton kabuhi kada adlaw! Nagasalig kami nga ini nga publikasyon makabulig sa mga karnero ni Jehova sa bug-os nga kalibutan nga tindugan kon ano ang husto, pamatud-an nga butigon si Satanas, kag labaw sa tanan magpabilin sa gugma sang Dios!—Jud. 21.
[Retrato sa pahina 18]
“Kon ginatuman ninyo ang akon mga sugo, magapabilin kamo sa akon gugma, subong nga ginatuman ko ang mga sugo sang Amay kag nagapabilin sa iya gugma”
