‘Beno Zinga Kaka na Zola ya Nzambi’
‘Beno Zinga Kaka na Zola ya Nzambi’
“Beno zinga kaka na kuzola yina ya Nzambi ke zolaka beno ntangu beno ke vingila nde Mfumu na beto Yesu Kristo, sambu na mawa na yandi, yandi kupesa beno moyo ya mvula na mvula.”—YUDE 21.
1, 2. Inki mutindu Yehowa kumonisaka zola na yandi sambu na beto, mpi nki mutindu beto kezaba nde yandi tabika beto ve ntangu yonso na zola na yandi?
YEHOWA NZAMBI memonisilaka beto zola na yandi na mitindu mingi kibeni. Ntembe kele ve nde, nzikisa ya kuluta nene ya zola ya Yehowa sambu na beto kele kimenga ya nkudulu ya yandi mepesaka. Yandi kezolaka bantu mingi mpenza yo yina yandi tindaka nkutu Mwana na yandi ya yandi kezolaka mingi na ntoto na kufwa sambu na mambote na beto. (Yoa. 3:16) Yehowa kusalaka yo sambu yandi kezola nde beto zinga kimakulu, yandi kezola mpi nde beto baka mambote ya zola na yandi kimakulu!
2 Kansi, keti beto lenda yindula nde Yehowa tabika beto ntangu yonso na zola na yandi kukonda kutadila mambu yina beto kepona na kusala? Ve. Sambu na Yude verse 21, beto ketanga ndongisila yai: “Beno zinga kaka na kuzola yina ya Nzambi ke zolaka beno ntangu beno ke vingila nde Mfumu na beto Yesu Kristo, sambu na mawa na yandi, yandi kupesa beno moyo ya mvula na mvula.” Bangogo “beno zinga kaka na kuzola yina ya Nzambi ke zolaka beno” kemonisa nde beto fwete sala mwa mambu. Kana mpidina, inki beto fwete sala sambu na kuzinga kaka na zola ya Nzambi?
Inki Mutindu Beto Lenda Zinga Kaka na Zola ya Nzambi?
3. Yezu kutubaka nde inki kuvandaka mfunu sambu yandi zinga kaka na zola ya Tata na yandi?
3 Beto kebaka mvutu na ngyufula yina na bangogo ya Yezu yandi mosi, yina yandi tubaka na mpimpa ya nsuka ya luzingu na yandi awa na ntoto. Yezu tubaka nde: “Kana beno landa bansiku na mono, beno ta zinga na kuzola na mono, mutindu mono me landaka bansiku ya Tata na mono ti ke zingaka na kuzola na yandi.” (Yoa. 15:10) Ya kyeleka, Yezu kubakisaka nde kulanda bansiku ya Yehowa kuvandaka mfunu sambu na kuvanda ti bangwisana ya mbote ti Tata na yandi. Ntangu yai, kana yo vandaka kyeleka sambu na Mwana ya kukuka ya Nzambi, keti yo fwete vanda mpi ve kyeleka sambu na beto?
4, 5. (a) Inki kele mutindu ya ntete yina beto lenda monisa nde beto kezolaka Yehowa? (b) Sambu na nki beto kele ve ti kikuma ya kumenga dibanza ya kulemfuka na bansiku ya Yehowa?
4 Ya ntete, beto kemonisaka nde beto kezolaka Yehowa na kulemfukilaka yandi. Ntumwa Yoane kutubaka yo mutindu yai: “Kana beto ke zolaka Nzambi, yo ke songa nde beto ke landaka bansiku na yandi. Ebuna bansiku na yandi kele mpasi ve beto na kulanda yo.” (1 Yoa. 5:3) Yo ke kyeleka nde bantu yonso ve na nsi-ntoto ya bubu kesepelaka ti dibanza ya kulemfuka. Kansi, simba nsa yai: “Ebuna bansiku na yandi kele mpasi ve beto na kulanda yo.” Yehowa kelombaka beto ve na kusala kima mosi yina kele mpasi mingi sambu na beto.
5 Beto baka mbandu: Keti nge talomba nduku mosi ya ngolo na kunata kima mosi ya kizitu mingi yina nge mezaba nde yandi takuka ve na kunangula yo? Ata fyoti ve! Yehowa kele ntima-mbote mingi kuluta beto mpi yandi kebakisaka bandilu na beto mbote mpenza. Biblia kendimisa beto nde Yehowa kevilaka ve nde “beto kele kaka putulu.” (Nk. 103:14) Yandi lenda lomba beto ve mambu mingi kuluta yina beto lenda sala. Yo yina, beto kele ve ti kikuma ya kumenga dibanza ya kulemfuka na bansiku ya Yehowa. Kansi, beto kebakisaka nde bulemfu kele dibaku ya kitoko ya kumonisa Tata na beto ya zulu nde beto kezolaka yandi mpenza mpi kezolaka kuzinga kaka na zola na yandi.
Dikabu Mosi ya Sipesiali ya Mekatuka na Yehowa
6, 7. (a) Kansansa kele inki? (b) Pesa mbandu ya kemonisa mutindu kansansa lenda sadisa beto na kuzinga kaka na zola ya Nzambi.
6 Na nsi-ntoto yai ya beto kezingaka ya kusalamaka na mutindu mosi ya kuyituka, beto fwete baka balukanu mingi yina ketadila bulemfu na beto na Nzambi. Inki mutindu beto lenda zikisa nde balukanu yai kele na kuwakana ti luzolo ya Nzambi? Yehowa mepesaka beto dikabu mosi yina lenda sadisa beto mingi mpenza na dyambu yai ya metala bulemfu. Dikabu yango kele kansansa. Kansansa kele inki? Yo kele mutindu mosi ya sipesiali ya kudizaba beto mosi. Yo kesalaka bonso zuzi ya kele na kati na beto, sambu na kusadisa beto na kutala mambu ya beto kesola na luzingu to na kuyindula mambu ya beto mesalaka dezia mpi na kutadila kana yo kele mbote to mbi.—Tanga Roma 2:14, 15.
7 Inki mutindu beto lenda sadila mbote kansansa? Beto baka mbandu mosi. Muntu mosi kesala nzyetolo na makulu na ntoto ya zelo na zelo. Kuna banzila ya fyoti ti ya nene mpi bidimbu ya kesongaka nzila kele ve. Kansi, yandi kelemba ve na kupasula nzila sambu na kukuma kisika ya yandi kekwenda. Inki mutindu? Yandi kele ti busole. Yo kevandaka ti cadran ya kenikanaka ve ya kele ti mafula 4 (points cardinaux) disongidila nordi, sudi, esti, ti westi na zulu na yo, mpi ti ntunga ya kele ti ema yina kesongaka ntangu yonso na ndambu ya nordi. Kukonda busole na yandi, muntu yai tavila mpenza nzila. Kiteso mosi, muntu yina kele ve ti kansansa tazaba ve mbala mingi kima ya kusala na ntangu yandi kesosa kusala bansola na luzingu na mambu ya metala bikalulu ya mbote, mpi mambu ya lunungu.
8, 9. (a) Inki bandilu ya kansansa na beto beto fwete vila ve? (b) Inki beto lenda sala sambu na kuzikisa nde kansansa na beto kesadisaka beto mpenza?
8 Kansi, bonso busole, kansansa na beto kevandaka ti bandilu. Kana muntu yina kesala nzyetolo kutula ema penepene ya busole na yandi, ntunga tasonga dyaka ve ndambu ya nordi. Mutindu mosi, kana beto bika nde bampusa ya ntima na beto kutwadisa badesizio na beto, inki tasalama? Bampusa na beto ya bwimi lenda bebisa kansansa na beto. Biblia kekebisa beto nde ‘ntima ya muntu me fulukaka na luvunu; yo ke na maladi mingi.’ (Yer. 17:9; Bing. 4:23) Dyaka, kana muntu ya kesala nzyetelo kele ve ti karti ya sikisiki mpi ya mefwana na kutudila ntima, busole na yandi tasadisa yandi ve mingi to nkutu yo tasadisa yandi ve ata fyoti. Mutindu mosi, kana beto tula ve ntima na lutwadisu ya Ndinga ya Nzambi, Biblia, yina kele ya kyeleka mpi kesobaka ve, ziku kansansa na beto lenda sadisa beto ve ata fyoti. (Nk. 119:105) Yo ke mawa na kumona nde bantu mingi na nsi-ntoto yai kebikaka nde bampusa ya ntima na bo kutwadisa bo to bo kelandaka ve minsiku yina kele na Ndinga ya Nzambi. (Tanga Efezo 4:17-19.) Yo yina, bantu mingi kesalaka mambu ya mbi mpenza, ata bo kele ti kansansa.—1 Tim. 4:2.
9 Beto fwete baka lukanu ya kuvanda ve bonso bantu yina! Kansi, bika nde Ndinga ya Nzambi kulanda na kulonga kansansa na beto na mpila nde yo sadisa beto mpenza. Beto fwete widikila kansansa na beto ya melongamaka na Biblia na kisika ya kubika nde bampusa na beto ya kinsuni kuyala yo. Kaka na ntangu yina, beto fwete sala ngolo na kuzitisa kansansa ya bampangi na beto ya babakala ti ya bankento ya kimpeve yina beto kezolaka mingi. Beto kesalaka ngolo mpenza na kubudisa bo ve dibaku, mpi keyibukaka ntangu yonso nde kansansa ya bampangi na beto lenda vanda pete to kebuyisa bo mambu mingi kuluta kansansa na beto.—1 Kor. 8:12; 2 Kor. 4:2; 1 Pie. 3:16.
10. Inki kele mambu tatu ya luzingu ya beto tatadila ntangu yai?
10 Bika beto tadila ntangu yai mambu tatu ya luzingu yina beto lenda monisa zola na beto sambu na Yehowa na nzila ya bulemfu. Ya kyeleka, na konso dyambu, yo talomba kusadila kansansa, kansi yo kele mfunu nde kansansa yango kutwadisama ntetentete na minsiku ya kupemama ya bikalulu ya mbote yina kele na Biblia. Mitindu tatu ya beto lenda lemfukila Yehowa na zola yonso kele: (1) Beto kezolaka bantu yina Yehowa kezolaka, (2) beto kezitisaka bantu yina kele ti kiyeka, mpi (3) beto kesalaka ngolo na kubikala bunkete na meso ya Nzambi.
Zola Bantu Yina Yehowa Kezolaka
11. Sambu na nki beto fwete zola bantu yina Yehowa kezolaka?
11 Ya ntete, beto fwete zola bantu yina Yehowa kezolaka. Na yina metala kinduku, bantu kele bonso kinuka. Beto kevandaka ti kikalulu ya kumina konso kima yina kele na nzyunga na beto. Ngangi na beto mezaba mbote malanda ya mbi ti ya mbote yina kinduku lenda vanda na yo sambu na bantu ya kukonda kukuka. Yo yina yandi kepesa beto ndongisila yai ya mayele: “Kana nge landa bantu ya mayele, nge ta kuma mpi mayele; kana nge landa bazoba, nge mpi ta kuma zoba.” (Bing. 13:20; 1 Kor. 15:33) Ata muntu mosi ve na kati na beto kezola ‘kukuma zoba.’ Beto yonso kezola ‘kukuma mayele.’ Yehowa lenda kuma dyaka ve mayele kuluta mutindu yandi kele, mpi muntu ata mosi ve lenda bebisa yandi. Kansi, yandi kepesa beto mbandu ya mbote na yina metala kinduku. Yindula fyoti, bantu ya kukonda kukuka ya nki mutindu Yehowa keponaka bonso banduku na yandi?
12. Inki mutindu ya banduku Yehowa keponaka?
12 Yehowa kubingaka Abrahami nde “nduku na mono.” (Yez. 41:8) Abrahami kuvandaka muntu ya kwikama, ya lunungu mpi ya bulemfu mingi kibeni—muntu ya lukwikilu. (Yak. 2:21-23) Yai kele mutindu ya bantu yina Yehowa keponaka bonso banduku. Yandi keponaka mpi bantu ya mutindu mosi bubu yai. Kana Yehowa keponaka banduku ya mutindu yai, keti yo kele ve mfunu nde beto mpi kupona mbote banduku na beto, nde beto tambula ti bantu ya mayele mpi kukuma mayele?
13. Na yina metala kupona banduku, inki lenda sadisa beto na kupona banduku ya mbote?
13 Inki lenda sadisa nge na kupona banduku ya mbote? Kulonguka bambandu ya bantu yina kele na Biblia lenda sadisa nge. Tadila kinduku ya vandaka na kati ya Ruti ti bokilo na yandi Noemi, na kati ya Davidi ti Yonatani, to na kati ya Timoteo ti Polo. (Ruti 1:16, 17; 1 Sam. 23:16-18; Filp. 2:19-22) Bantu yai kuvandaka banduku sambu na kikuma mosi ya mfunu kuluta bikuma yankaka: Kinduku na bo kusimbamaka na zola ya kyeleka sambu na Yehowa. Keti nge lenda zwa banduku yina kezolaka Yehowa mingi bonso nge? Beto kendimisa nge nde nge lenda zwa banduku ya mutindu yina na dibundu ya Yehowa. Banduku yai tanata nge ve na kukuma zoba na kimpeve. Kansi, bo tasadisa nge na kulemfukila Yehowa, na kuyela na kimpeve, mpi na kukuna na kimpeve. (Tanga Galatia 6:7, 8.) Bo tasadisa nge na kuzinga kaka na zola ya Nzambi.
Zitisa Bantu Yina Kele ti Kiyeka
14. Inki mambu kesalaka mbala mingi nde beto mona mpasi na kuzitisa bantu yina kele ti kiyeka?
14 Mutindu ya zole ya beto kemonisaka zola na beto sambu na Yehowa ketadila kiyeka. Beto fwete zitisa bantu yina kele ti kiyeka. Sambu na nki yo kevandaka mpasi bantangu yankaka na kusala yo? Sambu, bantu yina kele ti kiyeka kele bantu ya kukonda kukuka. Dyaka, beto mosi kele ya kukonda kukuka. Beto kenwanaka ti mpusa ya kukolama ya beto kebutukaka ti yo.
15, 16. (a) Sambu na nki yo kele mfunu nde beto zitisa bantu yina Yehowa mepesaka mukumba ya kukeba bantu na yandi? (b) Inki dilongi ya mfunu beto kebaka na mutindu Yehowa kutadilaka kukolama yina bantu ya Izraele kukolamaka na Moize?
15 Yo yina, nge lenda kudiyula nde, ‘Kana yo kele mpasi mutindu yina sambu beto zitisa bantu yina kele ti kiyeka, sambu na nki beto fwete sala yo?’ Mvutu ketadila mingimingi ntembe ya metala luyalu. Nani nge tapona bonso mfumu na nge? Kana beto pona Yehowa bonso Mfumu na beto, beto fwete zitisa kiyeka na yandi. Kana beto kesala yo ve, keti beto lenda binga yandi na masonga yonso nde Mfumu na beto? Dyaka, mbala mingi Yehowa ketwadisaka beto na nzila ya bantu ya kukonda kukuka yina yandi kepesaka mukumba ya kukeba bantu na yandi. Kana beto kolama na bantu yina, nki mutindu Yehowa tatadila dyambu yina?—Tanga 1 Tesalonika 5:12, 13.
16 Mu mbandu, ntangu bantu ya Izraele kubokutaka mpi kukolamaka na Moize, Yehowa kumonaka nde bo kolamaka na yandi. (Kut. 14:26, 27) Nzambi mesobaka ve. Kana beto kolama na bantu yina yandi mepesaka kiyeka, pana beto kekolama na yandi!
17. Inki nkadilu ya mbote beto fwete sala kikesa na kuyedisa sambu na bantu yina kele ti kiyeka na dibundu?
17 Ntumwa Polo kemonisa nkadilu ya mbote ya kuvanda na yo na ntwala ya bantu yina kele ti mikumba na dibundu ya Bukristu. Yandi sonikaka nde: “Beno lemfuka na bambuta na beno ya Dibundu, beno wila bo mpi. Bo ke langidilaka moyo na beno, sambu bo fweti futa rapore na Nzambi sambu na kisalu na bo. Kana beno ke lemfukila bo, bo ta sala kisalu na bo na kiese; kana mpidina ve, bo ta sala kisalu na bo na mawa, ebuna mambu ya mutindu yina ta sadisa beno ve ata fioti.” (Baeb. 13:17) Ya kyeleka, yo kelombaka bikesa ya masonga sambu na kuyedisa bulemfu ya mutindu yai mpi kuvanda ti kikalulu ya kulemfuka. Kansi, beto fwete vila ve nde beto kesalaka ngolo sambu na kuzinga kaka na zola ya Nzambi. Keti lukanu yai mefwana ve nde beto sala mpenza bikesa?
Bikala Bunkete na Meso ya Yehowa
18. Sambu na nki Yehowa kezolaka nde beto bikala bunkete?
18 Mutindu ya tatu ya beto kemonisaka zola na beto sambu na Yehowa kele yo yai: beto kesalaka ngolo na kubikala bunkete na meso na yandi. Mbala mingi bibuti kesalaka yonso sambu bana na bo kuvanda bunkete. Sambu na nki? Kikuma mosi kele nde, kuvanda bunkete kele mfunu sambu na mavimpi mpi mambote ya mwana. Dyaka, bunkete ya mwana kepesaka lukumu na dibuta, yo kemonisaka zola ti dikebi ya bibuti. Sambu na bikuma ya mutindu mosi, Yehowa kezolaka nde beto vanda bunkete. Yandi mezaba nde bunkete kele mfunu sambu na mambote na beto. Yandi mezaba mpi nde bunkete na beto kepesaka yandi, Tata na beto ya zulu, lukumu. Dyambu yai kele mfunu mingi, sambu bantu lenda zola kusadila Nzambi ya beto kesadilaka sambu bo kemona mutindu beto kele ya kuswaswana ti bantu ya mvindu ya nsi-ntoto yai.
19. Inki mutindu beto kezaba nde bunkete ya nitu kele mfunu?
19 Na nki mambu beto fwete bikala bunkete? Na mambu yonso. Na Izraele ya ntama, Yehowa kumonisaka pwelele na bantu na yandi nde bunkete ya kinsuni kuvandaka mfunu. (Levi 15:31) Nsiku ya Moize vandaka kutubila mambu bonso kuzika bamvindu, kuyobisa bisadilu, kuyobisa maboko, makulu, ti bilele. (Kub. 30:17-21; Levi 11:32; Kut. 19:17-20; Kul. 23:13, 14) Bo vandaka kuyibusa bantu ya Izraele nde Nzambi na bo, Yehowa, kele santu—disongidila “bunkete” mpi “kukonda mvindu.” Bansadi ya Nzambi ya santu fwete vanda mpi santu.—Tanga Levi 11:44, 45.
20. Na nki mitindu beto fwete bikala bunkete?
20 Yo yina, beto fwete vanda bunkete na kati mpi na nganda. Beto kesalaka ngolo sambu mabanza na beto kubikala ya bunkete. Beto kelemfukaka na kwikama yonso na bansiku ya Yehowa ya metala bunkete ya bikalulu, ata bikalulu ya bantu ya nsi-ntoto na mambu ya kuvukisa nitu mebeba mingi mpenza. Kima ya kuluta mfunu kele nde, beto kesalaka yonso sambu lusambu na beto kubikala bunkete, mpi kubuya konso kima ya kekatuka na lusambu ya luvunu yina lenda bebisa yo na konso mutindu yina. Beto keyibukaka ntangu yonso lukebisu yai ya kupemama ya kele na Yezaya 52:11: “Beno basika na Babilonia, beno katuka pana beno kwenda! Beno kusimba diaka ve bima na bo ya mvindu, beno katuka na kati ya bantu yina! Beno bayina ke nataka bima ya Nzo-Nzambi, beno bika ve nsiku kusimba beno!” Bubu yai, beto kevandaka bunkete na kimpeve na kubuyaka kusimba bima yina Tata na beto ya zulu kemonaka mvindu na mambu ya lusambu. Mu mbandu, beto kebuyaka bafeti ti bankinsi ya lusambu ya luvunu yina bantu mingi kesalaka na nsi-ntoto ya bubu yai. Ya kyeleka, yo kele mpasi na kubikala bunkete. Kansi, bansadi ya Yehowa kesalaka ngolo na kusala mutindu yina sambu yo kesadisaka bo na kuzinga kaka na zola ya Nzambi.
21. Inki mutindu beto lenda ndimisama nde beto tazinga kaka na zola ya Nzambi?
21 Yehowa kezola nde beto zinga kaka na zola na yandi kimakulu. Kansi, beto yonso fwete zikisa nde beto kesala ngolo mpenza sambu na kuzinga kaka na zola ya Nzambi. Beto lenda sala yo na kulandaka mbandu ya Yezu mpi na kulemfukaka na bansiku ya Yehowa sambu na kumonisa zola na beto sambu na yandi. Kana beto sala mutindu yina, beto lenda tula ntima nde ata kima mosi ve “lenda kabula beto na kuzola yina ya Nzambi songaka beto na Mfumu na beto Yesu Kristo.”—Roma 8:38, 39.
Keti Nge Keyibuka?
• Inki mutindu kansansa na beto lenda sadisa beto na kuzinga kaka na zola ya Nzambi?
• Sambu na nki beto fwete zola bantu yina Yehowa kezolaka?
• Sambu na nki yo kele mfunu na kuzitisa bantu yina kele ti kiyeka?
• Inki kele mfunu ya bunkete sambu na bantu ya Nzambi?
[Bangyufula ya disolo ya kulonguka]
[Lupangu/Kifwanisu ya kele na lutiti 28]
MUKANDA MOSI YA KESYAMISA BIKALULU YA MBOTE
Na nsungi ya lukutakanu ya distrike ya mvu 2008/2009, bo basisaka mukanda ya balutiti 224 ya kele ti ntu-dyambu ‘Beno Zinga Kaka na Zola ya Nzambi.’ Inki kele lukanu ya mukanda yai ya mpa? Yo kele ti lukanu ya kusadisa Bakristu na kuzaba mpi kuzola bansiku ya Yehowa, na kutulaka ntetentete dikebi na bikalulu ya Bukristu. Kulonguka mukanda ‘Beno Zinga Kaka na Zola ya Nzambi’ na dikebi yonso takumisa ngolo kundima na beto nde kuzinga na kuwakana ti minsiku ya Yehowa kele luzingu ya kuluta mbote bubu yai, mpi yo tanata na luzingu ya mvula na mvula na bilumbu kekwisa.
Kuluta dyaka, lukanu ya mukanda yai kele ya kusadisa beto na kubakisa nde kulemfukila Yehowa kele ve kizitu. Kansi, yo kele mutindu ya kumonisa Yehowa kiteso yina beto kezolaka yandi. Yo yina, mukanda yai tapusa beto na kudiyula nde, ‘Sambu na nki mu kelemfukilaka Yehowa?’
Ntangu bantu yankaka kesalaka buzoba ya nene ya kuyambula zola ya Yehowa, bo kebwaka mbala mingi na mambu ya metala bikalulu, kansi na mambu ya metala malongi ve. Yo yina, yo kele mfunu mpenza nde beto kumisa ngolo zola mpi ntonda na beto sambu na bansiku mpi minsiku ya Yehowa yina ketwadisaka beto na luzingu na beto ya konso kilumbu! Beto ketula ntima nde mukanda yai ya mpa tasadisa mameme ya Yehowa na ntoto ya mvimba na kunwanina mambu ya mbote, na kumonisa nde Satana kele muntu ya luvunu, mpi kuluta yonso, na kuzinga kaka na zola ya Nzambi!—Yude 21.