“Guutip asanninneraniittuinnaritsi”

“Guutip asanninneraniittuinnaritsi Naalakkatta Jiisusi-Kristusip nallittuinerata ilissinnik inuunermut naassaanngitsumut pisitsinissaa utaqqitillugu.” — JUDASI 21.

1, 2. Jehova uagutsinnut qanoq asannittuliorsimava, qanorlu ililluta nalunngilarput asanninnerminiititsiuarnissaa?

JEHOVAP Guutip assigiinngitsorpassuartigut asannittuliorfigaatigut. Qularutissaanngilaq Jiisusip utertitsissutitut pilliutaata Jehovap asanninneranut uppernarsaataanerpaanera. Jehova inuiannik ima asannitsigaaq ernini asasani nunarsuarmut maanga aallartillugu taassuma inuunini uagut pilluta tunniunniassammagu. (Johannesi 3:16) Jehova taamaaliorpoq asanninnini naassaanngitsumik iluaqutigisinnaaniassagatsigu aamma kissaatigigamiuk naassaanngitsumik inuussasugut!

² Qanorluunniilli ilioraluarutta Jehovap uagutsinnik asanninnerminiititsiuarnissaa naatsorsuutigisinnaavarput? Naagga. Judasi versi 21-mi ima kajumissaarneqarpugut: “Guutip asanninneraniittuinnaritsi Naalakkatta Jiisusi-Kristusip nallittuinerata ilissinnik inuunermut naassaanngitsumut pisitsinissaa utaqqitillugu.” Uiguutinit ‘Guutip asanninneraniittuinnaritsi’-mit erserpoq iliuuseqartariaqartugut. Taavami Guutimit asaneqartuarumalluta, imaluunniit Guutip asanninneraniittuinnarumalluta, qanoq iliortariaqarpugut?

Qanoq ililluta Guutip asannissusianiittuarsinnaavugut?

3. Jiisusi Ataatami asannissusianiittuarumalluni qanoq iliortariaqarnerarpa?

³ Apeqqummut tamatumunnga akissut Jiisusip nunarsuarmi inuunermini unnummi kingullermi oqaasiisa ilaanniippoq: “Inassutikka maleruarussigit asannissutsinniittuassaasi, soorlu uanga Ataatama inassutai maleruarikka asannissusianiittuarlungalu.” (Johannesi 15:10) Erseqqippoq Jiisusip paasisimagaa Ataataminut attaveqarluartuarumalluni taassuma inassutaanik maleruaasariaqarluni.  Guutip erneranut naammalluinnartumut tunngatillugu taamaappat, uagutsinnut tunngatillugu aamma taamaassimassaaq, ilaa?

4, 5. (a) Pingaarnerpaamik qanoq ersersissinnaavarput Jehova asallugu? (b) Sooq Jehovap inassutaanut naalakkumannginnissamut pissutissaqanngilagut?

⁴ Pingaarnerpaamik Jehovamut naalannitsigut ersersissavarput taanna asallutigu. Apustilip Johannesip tamanna ima allaatigaa: “[Guutimut] asanninneq tassaavoq inassutai maleruaratsigit, inassutaalu artornartuunngillat.” (1 Johannesi 5:3) Ilumoorpoq naalannissaq ullumikkut silarsuatsinni inuit amerlanersaannit orniginartinneqarpallaanngitsoq. Oqaatsilli uku maluginiariakkit: ‘Inassutai artornartuunngillat.’ Jehovap artornartitatsinnik iliuuseqaqqulluta qinnuiginngilaatigut.

⁵ Assersuuteqariarta: Ikinngutivit arlaat taassuma oqimaappallaarisaanik tigumiaqaqqullugu qinnuigissagaluarpiuk? Soorunami naamik! Jehova uagutsinnit asanninnerungaarpoq, aamma pisinnaasatta killeqarnerannik paasinnissinnaanerungaarpoq. Biibilimi neriorsoqqissaarneqarpugut Jehovap ‘eqqaamagaa pujualaasugut’. (Tussiaat 103:14) Sapikkatsinnik piumasaqarfiginavianngilaatigut. Taamaammat Jehovap inassutaanut naalakkumannginnissamut pissutissaqanngilagut. Paasivarput Jehovamut naalannerput Ataatatsinnik qilammiusumik asanninnitsinnik taassumalu asannissusianiittuarumanitsinnik ersersitsinissamut nuanningaartumik periarfissaqalissutigalugu.

Jehovap tunissutaa immikkut ittoq

6, 7. (a) Nalunngeqatiginnissut suua? (b) Assersuuteqarlutit nassuiaruk nalunngeqatiginnissut Guutip asanninneraniittuinnarnissamut qanoq iluaqutigisinnaagipput.

⁶ Silarsuarmi paasiuminaatsumi inuuffigisatsinni Guutimut naalannitsinnut attuumassuteqartunik aalajangigassarpassuaqartarpugut. Aalajangikkavut Guutip piumasaanut naapertuunnersut qanoq ililluta qulakkeersinnaavarput? Jehova imminut naalannissamut iluaqutigisinnaasatsinnik tunivaatigut — tassa nalunngeqatiginnissummik. Nalunngeqatiginnissut suugami? Imminut immikkut ittumik ilisimaarinertut oqaatigineqarsinnaavoq. Eqqartuussisutut ilutsinniittutullusooq sulisarpoq, aalajangigassatsinnik uagutsinnik isummerfiginnissinnaanngortitsisarluni, imaluunniit iliuusereriikkatsinnik eqqarsaatiginnissinnaanngortitsisarluni, aamma ajunngitsunik ajortunilluunniit, eqqortunik eqqunngitsunilluunniit naliliisinnaanngortitsisarluni. — Atuakkit Romamiut 2:14, 15.

⁷ Nalunngeqatiginnissut qanoq pitsaanerpaamik atorsinnaavarput? Assersuuteqariarta: Angut inuilaarsuarmi pisulluni angalavoq. Aqqusininnguaqaranilu allagartaqanngilaq. Taamaakkaluartoq toraakkani nigunngilaa. Qanoq ililluni taamaaliorsinnaava? Pujorsiuteqarpoq. Pujorsiut taanna kiinaasaqarpoq silarsuup sammiviinik sisamanik erseqqissaasunik saviullu kajungerisaanik tikkuutitaqarluni avannamut tikkuaqqasumik. Angut pisulluni angalasoq pujorsiuteqarnani tammassagaluarpoq. Taamatuttaaq inuk nalunngeqatiginnissuteqanngitsoq inuunermini ileqqussatigut eqqortunik naapertuilluartunillu aalajangiissagaangami amerlanertigut nalornilluinnartarpoq.

8, 9. (a) Nalunngeqatiginnissutitta pisinnaasai qanoq killeqarpat? (b) Nalunngeqatiginnissutitta uagutsinnut iluaqutaanera qanoq ililluta qulakkeersinnaavarput?

⁸ Nalunngeqatiginnissutilli pisinnaasai pujorsiutitut killeqarput. Angut pisulluni angalasoq saviup kajungerisaanik pujorsiutimi eqqaanut ilisippat, tikkuutaa avannamut tikkuaqqajunnaassaaq. Uummatitsinnut tamatumunnga assingusumik pisoqassaaq uummatitta kissaataanit sunnertippallaartarutta. Namminissarsioqqajaasarnerput nalunngeqatiginnissutitsinnik paatsiveerutsitsisinnaavoq. Biibilimi mianersoqquneqarpugut ‘tamanit annerusumik uummat tatigisassaanngitsuusoq.’ (Jeremia 17:9; Ussatit 4:23) Aamma angutip pisulluni angalasup nunap assinganik eqqoqqissaartumik tutsuiginartumillu peqanngikkuni pujorsiutini iluaqutigingaarnavianngilaa. Tamatumunnga assingusumik nalunngeqatiginnissuterput atorsinnaanngingajassaaq siunnersuutinit tutsuiginartunit allanngujuitsunillu Guutip oqaasiani Biibilimiittunit siulersortinngikkutta. (Tussiaat 119:105) Ajoraluartumik inuppassuit silarsuarmi matumaniittut uummatip kissaatigisaanit sunnertippallaartarput, Guutip oqaasiani najoqqutassiarineqartunik immannguaannaq soqutiginnittarlutik soqutiginninngilluinnartarlutilluunniit.  (Atuakkit Efesosimiut 4:17-19). Taamaattumik inuppassuit nalunngeqatiginnissuteqaraluarlutik ajortumik iliortarput. — 1 Timotheusi 4:2.

⁹ Uagut taamaalinngisaannarniarluta aalajangertariaqarpugut! Nalunngeqatiginnissuterput iluaqutigisinnaaniassagatsigu Guutip oqaasia nalunngeqatiginnissutitsinnik ilinniartitsisittuartariaqarlugulu sungiusaatittuartariaqarparput. Namminissarsioqqajaasarnitsinnit aqunneqarnata nalunngeqatiginnissuterput Biibili tunngavigalugu ilinniartinneqarsimasoq tusarnaartariaqarparput. Aammattaaq anersaakkut qatanngutitta asasatta nalunngeqatiginnissutaat eqqarsaatigalugit iliuuseqartarnissarput ilungersuutigisariaqarparput. Mamiatsatsikkumanagit sapinngisarput tamaat iliuuseqartarpugut, qatanngutitta nalunngeqatiginnissutaata uagut nammineq nalunngeqatiginnissutitsinnit malussarinnerunera killeqarneruneraluunniit eqqaamallugu. — 1 Korinthimiut 8:12; 2 Korinthimiut 4:2; 1 Petrusi 3:16.

10. Pingasut suut maanna sammissavavut?

¹⁰ Maanna naalannitsigut Jehovamik asanninnitsinnik ersersitsiniarluta periaaserisinnaasavut pingasut sammissavavut. Soorunami periaatsini pingasuni taakkunani tamani nalunngeqatiginnissut pingaaruteqarpoq, pingaarnerpaamilli ileqqussatigut najoqqutassianit isumassarsiarititaasunit Biibilimiittunit siulersorneqartariaqarpoq. Jehovamik asanninnitsinnik taassumunngalu naalannitsinnik ersersitsisinnaavugut uku pingasut aqqutigalugit: (1) Jehovap asasaanik asanninnitsigut, (2) oqartussaassusilinnik ataqqinninnitsigut aamma (3) Guutip isaani minguitsuujuarniarluta ilungersornitsigut.

Jehovap asasaanik asannigit

11. Sooq Jehovap asasaanik asanninnissaq pitsaassava?

¹¹ Siullermik, Jehovap asasaanik asannittariaqarpugut. Inuit allanik peqateqaraangamik svampitut ittarput. Sunik tamanik milluaasutut ittarpugut. Pinngortitsisup nalunngilaa ikinngutit inunnut naammalluinnanngitsunut qanoq navianartigisinnaasut — aamma qanoq iluaqutaatigisinnaasut. Taamaattumik pitsaasumik matuminnga siunnersorpaatigut: “Ilisimasunik peqateqartoq  ilisimassuseqalersarpoq, sianiitsunilli ikinnguteqartoq ajortumeertussaasarpoq.” (Ussatit 13:20; 1 Korinthimiut 15:33) Soorunami ajortumeerusunngilagut. Tamatta ‘ilisimassuseqalerusuppugut’. Jehova ilisimassuseqangaarami ilisimassuseqarnerulersinnaanngilaq, aamma kinaluunniit taassumunnga ajortumik sunniuteqarsinnaanngilaq. Taamaakkaluartorli ikinngutinik toqqaanermut tunngatillugu uagutsinnut maligassaalluarpoq. Eqqarsaatigeriaruk inuit qanoq ittut Jehovap ikinngutissamisut toqqartarnerai.

12. Jehova ikinngutinik qanoq ittunik toqqaasarpa?

¹² Jehovap ataataanerpaaq Aaperaat ‘ikinngutimisut’ eqqartorpaa. (Esaja 41:8) Aaperaap uppernera, naapertuilluartuunera naalanneralu maluginiarnarput. (Jaaku 2:21-23) Inuit taama ittut Jehovap aamma ullumikkut ikinngutigilertarpai. Ikinngutit taama ittut Jehovap toqqartarpagit, taava ilisimasunik peqateqarsinnaaniassagatta namminerlu ilisimassuseqalerniassagatta ikinngutinik eqqortunik toqqaasarnissarput pingaaruteqarpoq, ilaa?

13. Ikinngutinik eqqortunik toqqaanissamut suna iluaqutigisinnaavarput?

¹³ Ikinngutinik eqqortunik toqqaanissamut suna iluaqutigisinnaaviuk? Biibilimi oqaluttuarineqartut ilaat pillugit atuaqqissaarneq iluaqutaalluarsinnaavoq. Maluginiakkit Ruthip sakiatalu No’omip, Daavip Jonatanillu, Timotheusip Paulusillu ikinngutigiinnerat. (Ruthi 1:16, 17; 1 Samueli 23:16-18; Filippimiut 2:19-22) Taakku qanimut ikinngutigiipput una pissutaanerulluni: Ikinngutigiinnerata Jehovamut ilumoortumik asanninnerannik tunngaveqarnera. Ilittut Jehovamik asannitsigisunik ikinngutitaarsinnaavit? Qularutiginngilluinnarsinnaavat ilagiinni kristumiuni pitsaasunik ikinngutitaartorsinnaanissat. Ikinngutit taakkua anersaakkut ingerlanerliortilernatit tammartinngisaannassavaatsit. Jehovamulli naalannissannut, anersaakkut ineriartornissannut anersaamullu siaruarterinissannut ikiussavaatsit. (Atuakkit Galatiamiut 6:7, 8). Guutip asanninneraniittuinnarnissamut ikiussavaatsit.

Oqartussaassusilinnik ataqqinnigit

14. Suut pissutigalugit oqartussaassusilinnik ataqqinninnissarput sapernartikkajupparput?

¹⁴ Jehovamik asanninnitsinnik ersersitsiniarluta periaaserisinnaasatta aappaat oqartussaassutsimut tunngassuteqarpoq. Oqartussaassusilinnik ataqqinnittariaqarpugut. Sooq tamanna ilaannikkut sapernartittarparput? Siullermik, inuit uagutsinnut oqartussaassuseqartut naammalluinnanngitsuupput; aappassaanik, uagut aamma nammineq naammalluinnanngitsuuvugut. Pikitsitseqqajaasarnerput inunnguuserisarput akiugaraarput.

15, 16. (a) Sooq Jehovap innuttaminik isumaginnittussanngortissimasaanik ataqqinninnissarput pingaaruteqarpa? (b) Jehovap Israelikkut Mosesimut pikitsitsinerannut isiginnittaasia sumik ilinniarfigisinnaavarput?

¹⁵ Immaqa ima eqqarsarputit: ‘Oqartussaassusilinnik ataqqinninnissaq uagutsinnut taama sapernartigippat, taava sooq oqartussaassusilinnik ataqqinnissaagut?’ Tamanna kisimi oqartussaassuseq pillugu akerleriissummut tunngassuteqarami. Kina ilinnut Kisimi Oqartussaasutut, illit Naalakkattut, toqqarusuppiuk? Jehova Naalakkatsitut kisimi oqartussaasutut toqqarutsigu taassuma oqartussaassusia ataqqisariaqarparput. Oqartussaassusia ataqqinngikkutsigu Naalakkatsitut taasinnaanngilarput, ilaa? Aamma Jehovap amerlanertigut inuit naammalluinnanngitsut innuttaminik isumaginninnissamik akisussaaffilikkani aqqutigalugit oqartussaassutsini atortarpaa. Jehovap taakkununnga pikitsitsigutta qanoq isigissagaluarpaatigut? — Atuakkit 1 Thessalonikamiut 5:12, 13.

¹⁶ Israelikkut oqalorujullutillu Mosesimut pikitsitsimmata Jehovap taakku imminut pikitsitsisutut isigai. (4 Mosesi 14:26, 27) Guuti allanngorsimanngilaq. Taassuma oqartussaassusiligaanut pikitsitsigutta ilumoortumik taassumunnga pikitsitsissaagut!

17. Ilagiinni akisussaaffilinnut isiginnittaatsit suut ineriartortittariaqarpavut?

¹⁷ Apustilip Paulusip ersersippaa ilagiinni kristumiuni akisussaaffilinnut isiginnittaaseq qanoq ittoq ineriartortittariaqaripput. Ima allappoq: “Siulersortisi naalassigit peqqusaallu maleruarlugit, taakkuami tarnisi pigaappaat nalunnginnamikku taakku pillugit akisussaatitaajumaarlutik. Taamaaliorsinnaalit nuannaarlutik anersaarulunnatilli; taamaanngippammi ilissi tamanna atugarliuutigissavarsi.” (Hebræerit 13:17) Nassuerutigisariaqarpoq taamatut naalannermik  maniguunnermillu ineriartortitsissagaanni iliuuseqarnissaq pisariaqartoq. Eqqaamajulli Guutip asanninneraniittuarnissaq siunertaasoq. Tamatuma ilungersuutiginissaa imminut akilersinnaavoq!

Jehovap isaani minguitsuujuarit

18. Sooq Jehovap minguitsuujuarnissarput kissaatigaa?

¹⁸ Jehovamik asanninnitsinnik ersersitsiniarluta periaaserisinnaasatta pingajuat tassaavoq taassuma isaani minguitsuujuarniarneq. Angajoqqaat amerlanertigut meeqqatik ipiitsuutinniarlugit isikkorissuutinniarlugillu iliuuseqangaatsiartarput. Sooq? Eqqiluisaarluarneq meeqqat peqqissusiannut qanorlu innerannut pingaaruteqaqimmat. Aammattaaq meeraq ipiitsoq angajoqqaavinut ataqqinaataasarpoq; angajoqqaat asanninnerannut soqutiginninnerannullu ersiutaasarpoq. Jehovap uagutsinnik minguitsuutitserusunneranut pissutaasut tamatumunnga assingupput. Nalunngilaa minguissuseq inuulluataarnissatsinnut pingaaruteqartoq. Aamma nalunngilaa minguissuserput imminut, Ataatatsinnut qilammiusumut, ataqqinaataasartoq. Pingaaruteqangaarpoq, inuimmi allat silarsuarmi minguttuumi matumani inuit amerlanersaannit allaassuteqarnerput maluginiarunikku immaqa Guuti kiffartorfigisarput orniginartilissavaat.

19. Qanoq ililluta nalunngilarput timikkut minguissuseq pingaaruteqangaartoq?

¹⁹ Sutigut minguitsuujuassaagut? Inuunermi sutigut tamatigut. Itsaq Israelimi Jehovap innuttani nassuiaappai timikkut minguissuseq pingaaruteqangaartoq. (3 Mosesi 15:31) Mosesip inatsisaanut ilaapput igitat sumut iginneqartarnissaat, puugutaasanik eqqiaaneq aamma assannik, isikkanik atisanillu eqqiaaneq pillugit malittarisassiat. (2 Mosesi 30:17-21; 3 Mosesi 11:32; 4 Mosesi 19:17-20; 5 Mosesi 23:14, 15) Israelikkut eqqaasinneqarput Guutertik Jehova illernartuusoq — tassa minguitsuusoq. Guutimut illernartumut kiffartortut aamma namminneq illernartuusariaqarput. — Atuakkit 3 Mosesi 11:44, 45.

20. Sutigut minguitsuujuartariaqarpugut?

²⁰ Taamaattumik qamuuna qallikkullu minguitsuusariaqarpugut. Minguitsunik eqqarsaateqarniartarpugut. Silarsuaq inuuffigisarput kinguaassiuutitigut qanoq ajortunngorsimatigigaluartorluunniit Jehovap ileqqussatigut minguitsuussuseq pillugu najoqqutassiai maleqqissaartarpavut. Pingaarnerpaamillu, pallorfiginninnitta minguitsuutittuarnissaa aalajangiusimavarput upperisarsiornermillu eqqunngitsumit mingutsinneqarnaveersaarluinnarluta. Mianersoqqussut isumassarsiarititaasoq Esaja 52:11-miittoq una eqqaamajuarparput: “Aallaritsi, aallaritsi, illoqarfimmit aallaritsi, mingunnartumik attueqinasi! Qimanniarsiuk, minguersaritsi [minguitsuujuaritsi, NV].” Ullumikkut anersaakkut minguitsuujuartarpugut Ataatatta qilammiusup anersaakkut minguttuutut isigisaanik attuinaveersaarluinnarnitsigut. Taamaattuminguna upperisarsiornikkut nalliuttorsuit eqqunngitsut silarsuarmi nuannarineqaqisut ingalassimaniaqqissaartarivut. Minguitsuujuarniarneq unamminiarnarpoq. Jehovalli kiffaasa tamanna anguniartarpaat Guutip asanninneraniittuinnarnissamut iluaqutigisaramikku.

21. Guutip asanninneraniittuarnissarput qanoq ililluta qularutiginngilluinnarsinnaavarput?

²¹ Jehovap kissaatigaa uagut naassaanngitsumik asanninnerminiittuinnarnissarput. Tamattali immikkut Guutip asanninneraniittuarumalluta sapinngisatsinnik iliuuseqarnerluta qulakkeertariaqarparput. Qanoq ililluta? Jiisusip maligassiaanik malinninnitsigut Jehovallu inassutaanut naalannitsigut taassuminnga asanninnerput takutillugu. Taamaaliorutta qularutiginngilluinnarsinnaavarput suulluunniit “avissaartissinnaanngikkaatigut Guutip asannissusianit Kristusi-Jiisusimi Naalakkatsinni”. — Romamiut 8:38, 39. (w09 08/15-E)

Eqqaamavigit?

• Nalunngeqatiginnissut Guutip asanninneraniittuarnissamut qanoq iluaqutigisinnaavarput?

• Sooq Jehovap asasai asasariaqarpavut?

• Sooq oqartussaassusilinnik ataqqinninnissarput pingaaruteqarpa?

• Minguissuseq Guutip innuttaanut qanoq pingaaruteqartigaa?

[Atuaqqissaarnermi apeqqutit]

[Qupp. 30-mi ungalusaq/​assiliartaq]

ATUAGAQ PISSUSERISSAARNERMIK SIUARSAASOQ

2008-mi ataatsimeersuarnermi atuagaq 224-nik quppernilik ‘Bevar jer selv i Guds kærlighed’-imik qulequtalik saqqummersinneqarpoq. Atuakkamik nutaamik tamatuminnga saqqummersitsinermut suna siunertaava? Kristumiut Jehovap najoqqutassiaanik ilinniarlutillu qujamasuutiginninnissamut iluaqutissaattut naatsorsuussaavoq. Pingaarnerpaamik kristumiutut inooriaaserput sammineqarpoq. Atuakkamik tamatuminnga peqqissaarluta atuaqqissaarnerput Jehovap najoqqutassiai malillugit inuunerup pitsaanerpaaneranik taakkuninngalu malinninnerup naassaanngitsumik inuulersitsisinnaaneranik upperinninnitsinnut nakussatsissutigissavarput.

Aammattaaq atuagaq Jehovamut naalannerup artornannginneranik paasinninnissamut iluaqutigissavarput. Naalannitsigut Jehova takutissinnaavarput qanoq asatigalutigu. Taamaattumik atuagaq taanna imminut ima aperinissamut kajumississutigissavarput: ‘Sooq Jehovamut naalappunga?’

Ilaat Jehovap asanninneranik tunussillutik kukkugaangamik, ajornartorsiutigisaat amerlanertigut ileqqorlunnermik, ajoqersuutinik paasinnittaatsimiunngitsoq, pissuteqartarpoq. Taamaattumik Jehovap inatsisaanik najoqqutassiaanillu, ulluinnarni siulersortigisartakkatsinnik, nuannarinninnitsinnik qujamasuutiginninnitsinnillu nakussatsitsinissarput pingaaruteqarpoq. Qularutiginngilarput atuagaq nutaaq taanna silarsuaq tamakkerlugu Jehovap innuttaasa eqqortunik aalajangiusimanninnissamut, Saatanip sallutuneranik uppernarsaanissamut pingaarnerpaamillu Guutip asanninneraniittuinnarnissamut iluaqutigissagaat! — Judasi 21.

[Qupp. 28-mi assiliartaq]

“Inassutikka maleruarussigit asannissutsinniittuassaasi, soorlu uanga Ataatama inassutai maleruarikka asannissusianiittuarlungalu”