«ចូររក្សាខ្លួនជាមនុស្សដែលព្រះស្រឡាញ់»
«ចូររក្សាខ្លួនជាមនុស្សដែលព្រះស្រឡាញ់»
«ចូររក្សាខ្លួនជាមនុស្សដែលព្រះស្រឡាញ់ កាលដែលអ្នកទន្ទឹងរង់ចាំទទួលនូវសេចក្ដីមេត្ដាករុណាពីលោកយេស៊ូគ្រិស្ត ជាម្ចាស់របស់យើង ដើម្បីឲ្យបានជីវិតដែលគ្មានទីបញ្ចប់»។ —យូ. ២១
១, ២. តើព្រះយេហូវ៉ាបានបង្ហាញក្ដីស្រឡាញ់ដល់យើងតាមវិធីណាខ្លះ? ហើយតើយើងគួរសន្មតថា ព្រះយេហូវ៉ានឹងស្រឡាញ់យើងជារៀងរហូតទេ ទោះជាយើងសម្រេចចិត្តធ្វើអ្វីក៏ដោយ?
ព្រះយេហូវ៉ាបានបង្ហាញសេចក្ដីស្រឡាញ់ដែលលោកមានចំពោះយើង តាមវិធីផ្សេងៗជាច្រើនរាប់មិនអស់។ ភ័ស្តុតាងជាក់ស្តែងបំផុតដែលបង្ហាញថា ព្រះយេហូវ៉ាស្រឡាញ់យើង គឺដោយលោកបានរៀបចំឲ្យមានគ្រឿងបូជាដែលជាថ្លៃលោះ។ ព្រះយេហូវ៉ាស្រឡាញ់មនុស្សជាតិខ្លាំងណាស់! រហូតដល់លោកបានចាត់បុត្រស្ងួនភ្ងារបស់លោកឲ្យមកផែនដី ដើម្បីស្លាប់ជំនួសយើងទាំងអស់គ្នា។ (យ៉ូន. ៣:១៦) ព្រះយេហូវ៉ាបានធ្វើដូច្នេះ ដោយព្រោះលោកចង់ឲ្យយើងរស់ជារៀងរហូត ហើយក៏ចង់ឲ្យយើងទទួលប្រយោជន៍ពីក្ដីស្រឡាញ់របស់លោកជានិរន្តរដែរ!
២ តើយើងគួរសន្មតថា ព្រះយេហូវ៉ានឹងស្រឡាញ់យើងជារៀងរហូតទេ ទោះជាយើងសម្រេចចិត្តធ្វើអ្វីក៏ដោយ? មិនមែនទេ ពីព្រោះនៅសៀវភៅយូដាសខ២១ យើងអានការដាស់តឿននេះដែលថា៖ «ចូររក្សាខ្លួនជាមនុស្សដែលព្រះស្រឡាញ់ កាលដែលអ្នកទន្ទឹងរង់ចាំទទួលនូវសេចក្ដីមេត្ដាករុណាពីលោកយេស៊ូគ្រិស្ត ជាម្ចាស់របស់យើង ដើម្បីឲ្យបានជីវិតដែលគ្មានទីបញ្ចប់»។ ឃ្លាដែលថា «ចូររក្សាខ្លួនជាមនុស្សដែលព្រះស្រឡាញ់»បង្ហាញថា យើងត្រូវចាត់វិធានការជាមុនសិន ទើបអាចធ្វើជាមនុស្សដែលព្រះស្រឡាញ់។ បើដូច្នេះ តើយើងត្រូវធ្វើអ្វីដើម្បីរក្សាខ្លួនជាមនុស្សដែលព្រះស្រឡាញ់?
តើយើងអាចរក្សាខ្លួនជាមនុស្សដែលព្រះស្រឡាញ់ជានិច្ចយ៉ាងដូចម្ដេច?
៣. តើលោកយេស៊ូមានប្រសាសន៍ថាលោកត្រូវធ្វើអ្វីដែលសំខាន់ចាំបាច់ ដើម្បីរក្សាខ្លួនជាបុគ្គលដែលព្រះស្រឡាញ់?
៣ ចម្លើយចំពោះសំណួរនេះមាននៅក្នុងប្រសាសន៍របស់លោកយេស៊ូ ដែលលោកពោលនៅរាត្រីចុងក្រោយដែលលោកនៅផែនដី។ លោកមានប្រសាសន៍ថា៖ «ប្រសិនបើអ្នករាល់គ្នាប្រព្រឹត្តតាមបង្គាប់របស់ខ្ញុំ អ្នករាល់គ្នានឹងរក្សាខ្លួនជាអ្នកដែលខ្ញុំស្រឡាញ់ ដូចខ្ញុំបានប្រព្រឹត្តតាមបង្គាប់របស់បិតាដែលនៅស្ថានសួគ៌ ហើយក៏រក្សាខ្លួនជាអ្នកដែលលោកស្រឡាញ់ដែរ»។ (យ៉ូន. ១៥:១០) ដូចខនេះបញ្ជាក់ លោកយេស៊ូបានយល់ថា ការកាន់តាមបញ្ញត្ដិនៃព្រះយេហូវ៉ា គឺសំខាន់ចាំបាច់ដើម្បីមានចំណងមិត្តភាពល្អជាមួយនឹងបិតានៅស្ថានសួគ៌។ ប្រសិនបើបុត្រល្អឥតខ្ចោះរបស់ព្រះត្រូវកាន់តាមបញ្ញត្ដិទាំងនោះ ទើបអាចមានចំណងមិត្តភាពល្អជាមួយនឹងបិតាលោក ចុះទម្រាំដល់យើងវិញនោះ? យើងពិតជាត្រូវធ្វើតាមបញ្ញត្ដិរបស់ព្រះជាដាច់ខាត!
៤, ៥. (ក) តើអ្វីជាវិធីសំខាន់បំផុតដែលយើងអាចបង្ហាញថាយើងស្រឡាញ់ព្រះយេហូវ៉ា? (ខ) ស្តីអំពីការស្ដាប់បង្គាប់ព្រះយេហូវ៉ា ហេតុអ្វីបានជាយើងគ្មានហេតុជំទាស់ពាក្យបង្គាប់របស់លោក?
៤ វិធីសំខាន់បំផុតដែលយើងបង្ហាញថា យើងស្រឡាញ់ព្រះយេហូវ៉ាគឺដោយស្ដាប់បង្គាប់លោក។ សាវ័កយ៉ូហានបានពោលថា៖ «ការស្រឡាញ់ព្រះ មានន័យថា យើងកាន់តាមបញ្ញត្ដិរបស់លោក ហើយបញ្ញត្ដិរបស់លោកមិនមែនជាបន្ទុកធ្ងន់ទេ»។ (១យ៉ូន. ៥:៣) ពិតមែន មនុស្សជាច្រើនក្នុងពិភពលោកនេះ មិនចូលចិត្តស្ដាប់បង្គាប់សោះ។ ប៉ុន្តែ សូមកត់សម្គាល់ឃ្លាដែលថា៖ «បញ្ញត្ដិរបស់លោកមិនមែនជាបន្ទុកធ្ងន់ទេ»។ ព្រះយេហូវ៉ាមិនសុំឲ្យយើងធ្វើអ្វីដែលពិបាកពេកសម្រាប់យើងឡើយ។
៥ ជាឧទាហរណ៍ តើអ្នកនឹងសុំឲ្យមិត្តភក្ដិជាទីស្រឡាញ់យួរអ្វីមួយដែលអ្នកដឹងថា ធ្ងន់ពេកសម្រាប់គាត់ទេ? ពិតជាអត់ទេ! តែព្រះយេហូវ៉ាមានចិត្តល្អជាងយើងឆ្ងាយណាស់ ហើយយល់ច្បាស់អំពីកម្រិតសមត្ថភាពរបស់យើងម្នាក់ៗ ជាងយើងទៅទៀត។ គម្ពីរប្រាប់ថា ព្រះយេហូវ៉ា«នឹកចាំថា យើងគ្រាន់តែជាធូលីដីប៉ុណ្ណោះ»។ (ទំនុក. ១០៣:១៤) ព្រះនឹងមិនសុំឲ្យយើងធ្វើអ្វីដែលយើងគ្មានសមត្ថភាពធ្វើនោះឡើយ។ ដូច្នេះ ស្តីអំពីការស្ដាប់តាមព្រះ យើងគ្មានហេតុជំទាស់ពាក្យបង្គាប់របស់លោកទេ។ ផ្ទុយទៅវិញ យើងទទួលស្គាល់ថា ការស្ដាប់បង្គាប់ព្រះជាវិធីដ៏ល្អមួយ ដែលយើងបង្ហាញបិតារបស់យើងនៅស្ថានសួគ៌ថា យើងពិតជាស្រឡាញ់លោកមែន ហើយចង់រក្សាខ្លួនជាមនុស្សដែលលោកស្រឡាញ់ដែរ។
អំណោយពិសេសពីព្រះយេហូវ៉ា
៦, ៧. (ក) តើសមត្ថភាពវិនិច្ឆ័យខ្លួនជាអ្វី? (ខ) សូមលើកឧទាហរណ៍មួយពីរបៀបដែលសមត្ថភាពវិនិច្ឆ័យអាចជួយយើងឲ្យរក្សាខ្លួនជាមនុស្សដែលព្រះស្រឡាញ់។
៦ ក្នុងពិភពលោកនេះដែលមានភាពស្មុគស្មាញ យើងត្រូវសម្រេចចិត្តរឿងជាច្រើនដែលទាក់ទងនឹងការស្ដាប់បង្គាប់ព្រះ។ តើយើងអាចប្រាកដថាការសម្រេចចិត្តទាំងនេះគឺសមស្របនឹងបំណងប្រាថ្នារបស់ព្រះយ៉ាងដូចម្ដេច? ព្រះយេហូវ៉ាបានផ្ដល់អំណោយមួយឲ្យយើងដើម្បីជួយយើងយ៉ាងច្រើនក្នុងការស្ដាប់បង្គាប់លោក។ អំណោយនេះគឺ សមត្ថភាពវិនិច្ឆ័យខ្លួន។ តើសមត្ថភាពវិនិច្ឆ័យខ្លួនជាអ្វី? គឺជាសមត្ថភាពគិតពិចារណាអំពីការប្រព្រឹត្ត ចិត្តគំនិត និងការសម្រេចចិត្តរបស់ខ្លួន។ សមត្ថភាពវិនិច្ឆ័យខ្លួននេះជួយយើងឲ្យដឹងថា ការសម្រេចចិត្តនិងការប្រព្រឹត្តរបស់យើង ល្អឬអាក្រក់ ត្រូវឬក៏ខុស។—សូមអាន រ៉ូម ២:១៤, ១៥
៧ តើសមត្ថភាពវិនិច្ឆ័យខ្លួនអាចជួយយើងយ៉ាងណា? សូមគិតពីឧទាហរណ៍មួយ។ អ្នកកំពុងតែដើរនៅជើងភ្នំ។ ស្រាប់តែថ្ងៃលិចហើយចាប់ផ្ដើមងងឹត។ តើអ្នកត្រូវការអ្វីដើម្បីធ្វើដំណើរដោយសុវត្ថិភាព? ពិតជាត្រូវការពិលដើម្បីបំភ្លឺផ្លូវ មែនទេ? ប្រសិនបើគ្មានពិល អ្នកមើលផ្លូវមិនឃើញ ហើយអាចវង្វេងផ្លូវឬមានគ្រោះថ្នាក់ដែរ។ បើមានពិល នោះអាចបំភ្លឺផ្លូវ ហើយជួយអ្នកជៀសវាងគ្រោះថ្នាក់បាន។ ស្រដៀងគ្នាដែរ ប្រសិនបើបុគ្គលម្នាក់គ្មានសមត្ថភាពវិនិច្ឆ័យខ្លួនទេ គាត់នឹងមិនដឹងថា គួរសម្រេចចិត្តយ៉ាងណាក្នុងជីវិត ទើបអាចសម្រេចចិត្តបានល្អត្រឹមត្រូវ។ គាត់អាចសម្រេចចិត្តខុស ហើយក៏អាចមានគ្រោះថ្នាក់ផងដែរ។ អាស្រ័យហេតុនេះ សមត្ថភាពវិនិច្ឆ័យខ្លួនរបស់យើងសំខាន់ណាស់!
៨, ៩. (ក) តើយើងគួរចងចាំថាសមត្ថភាពវិនិច្ឆ័យរបស់យើងមានកម្រិតយ៉ាងណា? (ខ) តើយើងអាចធ្វើអ្វីដើម្បីប្រាកដថាសមត្ថភាពវិនិច្ឆ័យពិតជាផ្ដល់ប្រយោជន៍ដល់យើង?
៨ ប៉ុន្តែ ដូចពិល សមត្ថភាពវិនិច្ឆ័យរបស់យើងមានកម្រិត។ បើសិនជាពិលរបស់យើងអស់ថ្ម ក៏មិនមានអ្វីបំភ្លឺផ្លូវរបស់យើងដែរ។ ដូចគ្នាដែរ ប្រសិនបើយើងចេះតែធ្វើតាមអារម្មណ៍និងចិត្តរបស់យើង តើអ្វីនឹងកើតឡើង? សេចក្ដីប៉ងប្រាថ្នាដែលមានក្នុងចិត្ត អាចនាំឲ្យសមត្ថភាពវិនិច្ឆ័យខ្លួនលែងបំភ្លឺផ្លូវរបស់យើង។ គម្ពីរព្រមានយើងថា «ចិត្តជាគ្រឿងបញ្ឆោតលើសជាងទាំងអស់ ហើយក៏អាក្រក់ហួសល្បត់ផង»។ (យេ. ១៧:៩; សុភ. ៤:២៣) នេះជាមូលហេតុដែលយើងត្រូវការពឹងផ្អែកលើការណែនាំក្នុងគម្ពីរ។ បើយើងមិនធ្វើដូចនេះ សមត្ថភាពវិនិច្ឆ័យនឹងលែងជួយយើង ដូចជាពិលដែលអស់ថ្ម។ (ទំនុក. ១១៩:១០៥) គួរឲ្យស្ដាយណាស់ មនុស្សជាច្រើនក្នុងពិភពលោកនេះ មិនយកចិត្តទុកដាក់ចំពោះការណែនាំក្នុងគម្ពីរ ហើយចង់ធ្វើតាមតែសេចក្ដីប៉ងប្រាថ្នារបស់ខ្លួនវិញ។ (សូមអាន អេភេសូរ ៤:១៧-១៩) នេះជាមូលហេតុដែលមនុស្សជាច្រើនដែលមានសមត្ថភាពវិនិច្ឆ័យខ្លួន នៅតែធ្វើអ្វីដែលអាក្រក់ជួជាតិ។—១ធី. ៤:២
៩ យើងគួរតាំងចិត្តមិនធ្វើដូចពួកគេឡើយ! ផ្ទុយទៅវិញ សូមយើងទុកបណ្ដាំរបស់ព្រះឲ្យណែនាំនិងអប់រំសមត្ថភាពវិនិច្ឆ័យរបស់យើង ដើម្បីឲ្យសមត្ថភាពវិនិច្ឆ័យផ្ដល់ជាប្រយោជន៍ដល់យើង។ បន្ថែមទៅទៀត យើងត្រូវធ្វើតាមសមត្ថភាពវិនិច្ឆ័យខ្លួន ជាជាងឲ្យសេចក្ដីប៉ងប្រាថ្នាដែលមានក្នុងចិត្តកាន់កាប់ទាំងស្រុងទៅលើសមត្ថភាពវិនិច្ឆ័យនោះ។ ព្រមជាមួយគ្នានេះ យើងក៏ចង់គិតពីសមត្ថភាពវិនិច្ឆ័យរបស់បងប្អូនរួមជំនឿយើងផងដែរ។ យើងព្យាយាមមិនធ្វើអ្វីដែលអាចនាំឲ្យបងប្អូនឯទៀតជំពប់ដួល ថែមទាំងចាំថា សមត្ថភាពវិនិច្ឆ័យរបស់អ្នកឯទៀតអាចប្រកាន់ច្រើនជាងសមត្ថភាពវិនិច្ឆ័យរបស់យើង។—១កូ. ៨:១២; ២កូ. ៤:២; ១ពេ. ៣:១៦
១០. ក្នុងជីវិតយើង តើមានវិធីបីណាដែលយើងអាចបង្ហាញការស្ដាប់បង្គាប់និងក្ដីស្រឡាញ់ចំពោះព្រះ?
១០ ឥឡូវនេះ សូមឲ្យយើងពិនិត្យមើលវិធីបីយ៉ាងក្នុងជីវិត ដែលយើងអាចបង្ហាញសេចក្ដីស្រឡាញ់របស់យើងចំពោះព្រះយេហូវ៉ា ដោយស្ដាប់បង្គាប់លោក។ ពិតមែនហើយ សមត្ថភាពវិនិច្ឆ័យនឹងជួយយើងធ្វើតាមវិធីទាំងបីនេះ ប៉ុន្តែគឺសំខាន់ដែលសមត្ថភាពវិនិច្ឆ័យរបស់យើងទទួលការអប់រំពីច្បាប់សីលធម៌របស់គម្ពីរជាមុនសិន។ វិធីបីយ៉ាងដែលយើងអាចបង្ហាញនូវការស្ដាប់បង្គាប់និងក្ដីស្រឡាញ់ដែលយើងមានចំពោះព្រះយេហូវ៉ាគឺ (១) ព្រះស្រឡាញ់អ្នកណា យើងស្រឡាញ់អ្នកនោះដែរ (២) យើងគោរពនិងធ្វើតាមអ្នកដែលព្រះតែងតាំង ហើយ (៣) យើងព្យាយាមរក្សាខ្លួនជាមនុស្សស្អាតស្អំស្របតាមច្បាប់របស់ព្រះ។
ព្រះស្រឡាញ់អ្នកណា យើងស្រឡាញ់អ្នកនោះដែរ
១១. បើព្រះយេហូវ៉ាស្រឡាញ់អ្នកណា ហេតុអ្វីយើងគួរស្រឡាញ់អ្នកនោះដែរ?
១១ ទី១ ព្រះស្រឡាញ់អ្នកណា យើងត្រូវស្រឡាញ់អ្នកនោះដែរ។ ស្តីអំពីការសេពគប់ មនុស្សអាចប្រៀបដូចជាអេប៉ុង។ យើងច្រើនតែស្រូបយកអ្វីៗដែលនៅជុំវិញយើង។ ព្រះដែលជាអ្នកបង្កើតយើងដឹងថា ដោយសារយើងមិនល្អឥតខ្ចោះ អ្នកដែលយើងសេពគប់ជាមួយអាចនាំឲ្យយើងធ្វើខុស ឬក៏អាចជួយយើងវិញ។ អាស្រ័យហេតុនេះ លោកឲ្យដំបូន្មានល្អនេះដែលថា៖ «អ្នកណាដែលដើរជាមួយនឹងមនុស្សប្រាជ្ញ នោះនឹងមានប្រាជ្ញាដែរ តែអ្នកណាដែលភប់ប្រសព្វនឹងមនុស្សល្ងីល្ងើ នោះនឹងត្រូវខូចបង់វិញ»។ (សុភ. ១៣:២០; ១កូ. ១៥:៣៣) គ្មានយើងណាម្នាក់ចង់«ខូចបង់»ឡើយ តែយើងគ្រប់គ្នាចង់«មានប្រាជ្ញា»វិញ។ ព្រះយេហូវ៉ាមានប្រាជ្ញាច្រើនបំផុត ហើយក៏គ្មានអ្នកណាអាចនាំឲ្យលោកក្លាយទៅជាអាក្រក់បានដែរ។ ប៉ុន្តែ លោកទុកគំរូល្អណាស់សម្រាប់យើងស្តីអំពីការសេពគប់។ សូមគិតទៅមើល តើព្រះយេហូវ៉ាជ្រើសរើសមនុស្សមិនល្អឥតខ្ចោះបែបណា ឲ្យធ្វើជាមិត្តសម្លាញ់របស់លោក?
១២. តើព្រះយេហូវ៉ាជ្រើសរើសមនុស្សបែបណាធ្វើជាមិត្តសម្លាញ់របស់លោក?
១២ ព្រះយេហូវ៉ាបានហៅអាប្រាហាំជា«សំឡាញ់»របស់លោក។ (អេ. ៤១:៨) បុរសម្នាក់នេះជាមនុស្សដែលស្មោះត្រង់ សុចរិត និងចេះស្ដាប់បង្គាប់ ពោលគឺជាមនុស្សដែលមានជំនឿទៅលើព្រះយេហូវ៉ា។ (យ៉ា. ២:២១-២៣) ព្រះយេហូវ៉ាជ្រើសរើសមិត្តសម្លាញ់ដូចនេះ។ សព្វថ្ងៃ ព្រះយេហូវ៉ានៅតែជ្រើសរើសមនុស្សបែបនេះធ្វើជាមិត្តសម្លាញ់របស់លោក។ ប្រសិនបើព្រះយេហូវ៉ាជ្រើសរើសមិត្តសម្លាញ់បែបនេះ ចុះទម្រាំដល់យើងដែលជាមនុស្សមិនល្អឥតខ្ចោះវិញ? គឺសំខាន់ណាស់ ដែលយើងជ្រើសរើសពួកម៉ាកល្អ ហើយដើរជាមួយនឹងមនុស្សប្រាជ្ញ ហើយមានប្រាជ្ញាដែរ។
១៣. តើអ្វីអាចជួយយើងឲ្យជ្រើសរើសពួកម៉ាកល្អ?
១៣ តើអ្វីអាចជួយអ្នកឲ្យជ្រើសរើសពួកម៉ាកល្អ? ការពិនិត្យមើលគំរូក្នុងគម្ពីរអាចជំរុញចិត្តយើងឲ្យចង់ធ្វើដូច្នេះ។ សូមគិតអំពីចំណងមិត្តភាពរវាងនាងរូថនិងន៉ាអូមី ដែលជាម្ដាយក្មេករបស់គាត់ ហើយរវាងដាវីឌនិងយ៉ូណាថាន ឬរវាងធីម៉ូថេនិងប៉ូល។ (រស់. ១:១៦, ១៧; ១សាំ. ២៣:១៦-១៨; ភី. ២:១៩-២២) អ្នកទាំងនេះអាចធ្វើជាមិត្តភក្ដិជិតស្និទ្ធគ្នាបាន ដោយសារមូលហេតុសំខាន់ចម្បងមួយគឺ ពួកគាត់ស្រឡាញ់ព្រះយេហូវ៉ាយ៉ាងស្មោះ។ តើអ្នកអាចស្វែងរកមិត្តភក្ដិដែលស្រឡាញ់ព្រះយេហូវ៉ាដូចអ្នកបានទេ? ក្រុមជំនុំគ្រិស្តសាសនិកពោរពេញទៅដោយបុគ្គលដែលស្រឡាញ់ព្រះយេហូវ៉ា។ ពួកម៉ាកបែបនេះ នឹងមិននាំឲ្យយើងធ្វើអ្វីដែលអាចបង្ខូចចំណងមិត្តភាពរបស់យើងជាមួយព្រះឡើយ។ ផ្ទុយទៅវិញ ពួកគេនឹងជួយអ្នកឲ្យស្ដាប់បង្គាប់ព្រះយេហូវ៉ា សាបព្រោះដោយគិតពីសកម្មពលរបស់លោក ថែមទាំងជួយអ្នកឲ្យពង្រឹងចំណងមិត្តភាពជាមួយលោកផងដែរ។ (សូមអាន កាឡាទី ៦:៧, ៨) មែនហើយ ពួកម៉ាកល្អបែបនេះ នឹងជួយអ្នកឲ្យរក្សាខ្លួនជាមនុស្សដែលព្រះស្រឡាញ់។
គោរពនិងធ្វើតាមអ្នកដែលព្រះតែងតាំង
១៤. ហេតុអ្វីពិបាកឲ្យយើងគោរពនិងធ្វើតាមអ្នកដែលព្រះតែងតាំង?
១៤ វិធីទី២ដែលយើងបង្ហាញសេចក្ដីស្រឡាញ់ដែលយើងមានចំពោះព្រះយេហូវ៉ា គឺជាប់ទាក់ទងនឹងអំណាចគ្រប់គ្រង។ យើងត្រូវគោរពនិងធ្វើតាមអ្នកដែលព្រះតែងតាំង។ នៅពេលខ្លះ ហេតុអ្វីការធ្វើតាមអ្នកដែលព្រះតែងតាំងពិបាកម្ល៉េះ? ហេតុមួយគឺដោយសារមនុស្សដែលកាន់អំណាចគ្រប់គ្រងសុទ្ធតែមិនល្អឥតខ្ចោះ។ ម្យ៉ាងទៀត យើងក៏មិនល្អឥតខ្ចោះដែរ។ យើងត្រូវព្យាយាមទប់ទល់ចំពោះទំនោរចិត្តចង់បះបោរ ដែលយើងមានតាំងតែពីកំណើតមក។
១៥, ១៦. (ក) ហេតុអ្វីសំខាន់ឲ្យយើងគោរពនិងធ្វើតាមពួកអ្នកដែលព្រះយេហូវ៉ាបានតែងតាំងឲ្យថែរក្សារាស្ត្ររបស់លោក? (ខ) តើយើងអាចទាញមេរៀនអ្វីអំពីទស្សនៈរបស់ព្រះយេហូវ៉ាពេលដែលបណ្ដាជនអ៊ីស្រាអែលបានរអ៊ូរទាំហើយបានបះបោរប្រឆាំងនឹងម៉ូសេ?
១៥ អ្នកប្រហែលជាឆ្ងល់ថា ‹បើសិនជាការគោរពមនុស្សដែលមានអំណាចគ្រប់គ្រងគឺពិបាកម្ល៉េះ ហេតុអ្វីយើងចាំបាច់គោរពពួកគេ?›។ ចម្លើយគឺជាប់ទាក់ទងនឹងសិទ្ធិគ្រប់គ្រងរបស់ព្រះ។ តើអ្នកនឹងជ្រើសរើសអ្នកណាឲ្យធ្វើជាម្ចាស់គ្រប់គ្រងលើអ្នក? ប្រសិនបើយើងជ្រើសរើសព្រះយេហូវ៉ាជាម្ចាស់គ្រប់គ្រង យើងត្រូវទទួលស្គាល់អំណាចគ្រប់គ្រងរបស់លោក។ បើយើងមិនធ្វើដូច្នេះ តើយើងពិតជាអាចនិយាយថា លោកជាអ្នកគ្រប់គ្រងលើយើងបានទេ? បន្ថែមទៅទៀត ព្រះយេហូវ៉ាច្រើនតែដឹកនាំយើងដោយប្រើមនុស្សមិនល្អឥតខ្ចោះ ដែលលោកតែងតាំងឲ្យមានភារកិច្ចថែរក្សារាស្ត្ររបស់លោក។ ប្រសិនបើយើងបះបោរប្រឆាំងនឹងបុគ្គលទាំងនេះ តើព្រះយេហូវ៉ានឹងគិតយ៉ាងណាអំពីយើង?—សូមអាន ថែស្សាឡូនិចទី១ ៥:១២, ១៣
១៦ ជាឧទាហរណ៍ នៅពេលដែលបណ្ដាជនអ៊ីស្រាអែលបានរអ៊ូរទាំហើយបានបះបោរប្រឆាំងនឹងម៉ូសេ ព្រះយេហូវ៉ាចាត់ទុកទង្វើរបស់ពួកគេជាការប្រឆាំងនឹងលោកវិញ។ (ជន. ១៤:២៦, ២៧) សព្វថ្ងៃ ព្រះនៅតែមានទស្សនៈដូចគ្នា។ ប្រសិនបើយើងបះបោរប្រឆាំងនឹងបុគ្គលដែលព្រះតែងតាំងឲ្យគ្រប់គ្រងលើយើង តាមពិតយើងកំពុងបះបោរប្រឆាំងនឹងព្រះវិញ!
១៧. តើយើងគួរមានចិត្តគំនិតយ៉ាងណាចំពោះបុគ្គលដែលព្រះតែងតាំងនៅក្នុងក្រុមជំនុំគ្រិស្តសាសនិក?
១៧ សាវ័កប៉ុលបញ្ជាក់ពីរបៀបដែលយើងគួរប្រព្រឹត្តទៅលើបុគ្គលដែលព្រះតែងតាំងនៅក្នុងក្រុមជំនុំគ្រិស្តសាសនិក។ គាត់បានសរសេរថា៖ «ចូរស្ដាប់បង្គាប់ហើយចុះចូលនឹងពួកអ្នកដែលនាំមុខអ្នករាល់គ្នា ព្រោះពួកគេកំពុងថែរក្សាអ្នករាល់គ្នា ហើយទទួលខុសត្រូវអំពីរបៀបដែលពួកគេបានធ្វើការនោះ។ ដូច្នេះ ពួកគេអាចធ្វើការនេះដោយមានអំណរ មិនមែនដោយដកដង្ហើមធំទេ ព្រោះបើដូច្នេះនឹងនាំឲ្យអ្នករាល់គ្នាបង់ប្រយោជន៍វិញ»។ (ហេ. ១៣:១៧) ត្រូវមែន ដើម្បីបណ្ដុះឲ្យមានចិត្តគំនិតល្អដែលចេះស្ដាប់បង្គាប់ និងចុះចូលចំពោះអំណាចគ្រប់គ្រង យើងត្រូវព្យាយាមអស់ពីចិត្ត។ ប៉ុន្តែ សូមចាំថា យើងកំពុងតែខំប្រឹងធ្វើជាមនុស្សដែលព្រះស្រឡាញ់។ គឺគប្បីឲ្យយើងព្យាយាមអស់ពីចិត្តដើម្បីសម្រេចគោលដៅនេះ មែនទេ?
រក្សាខ្លួនជាមនុស្សស្អាតស្អំស្របតាមច្បាប់របស់ព្រះយេហូវ៉ា
១៨. ហេតុអ្វីបានជាព្រះយេហូវ៉ាចង់ឲ្យយើងរក្សាខ្លួនជាមនុស្សស្អាតស្អំ?
១៨ វិធីទី៣ដែលយើងអាចបង្ហាញក្ដីស្រឡាញ់របស់យើងចំពោះព្រះយេហូវ៉ា គឺដោយយើងព្យាយាមធ្វើជាមនុស្សស្អាតស្អំស្របតាមច្បាប់របស់លោក។ ធម្មតា ឪពុកម្ដាយធ្វើកិច្ចការជាច្រើនដើម្បីឲ្យកូនរបស់គាត់បានស្អាតបាត។ ហេតុអ្វីឪពុកម្ដាយធ្វើដូច្នេះ? ហេតុមួយគឺ ដោយព្រោះកូនអាចមានសុខភាពល្អរឹងមាំបាន លុះត្រាតែខ្លួនវាស្អាតនិងមានអនាម័យ។ ម្យ៉ាងទៀត ពេលណាកូនស្អាតបាត នេះបង្ហាញថាឪពុកម្ដាយល្អ ហើយក៏បង្ហាញពីសេចក្ដីស្រឡាញ់និងការយកចិត្តទុកដាក់របស់ឪពុកម្ដាយចំពោះកូនទៀតផង។ ដោយសារហេតុស្រដៀងគ្នា ព្រះយេហូវ៉ាចង់ឲ្យយើងស្អាតស្អំដែរ។ លោកដឹងថា យើងអាចមានរបៀបរស់នៅដ៏ល្អបំផុតបាន លុះត្រាតែយើងស្អាតស្អំ។ លោកក៏ដឹងថា ពេលណាយើងស្អាតស្អំ នេះនាំឲ្យលោកទទួលការសរសើរ ដោយសារលោកជាបិតានៅស្ថានសួគ៌របស់យើង។ ចំណុចនេះសំខាន់មែន ពីព្រោះមនុស្សខ្លះប្រហែលជាចង់ក្លាយជាអ្នកបម្រើរបស់ព្រះ ដោយសារពួកគេកត់សម្គាល់ថា យើងខុសប្លែកពីមនុស្សក្នុងពិភពលោកដ៏ស្មោកគ្រោកនេះ។
១៩. តើយើងដឹងយ៉ាងដូចម្ដេចថា ការស្អាតស្អំខាងរាងកាយគឺសំខាន់?
១៩ តើយើងត្រូវស្អាតស្អំក្នុងរឿងណាខ្លះ? តាមពិត យើងត្រូវស្អាតស្អំក្នុងគ្រប់រឿងទាំងអស់។ ចំពោះសាសន៍អ៊ីស្រាអែលនៅសម័យបុរាណ ព្រះយេហូវ៉ាបានបញ្ជាក់ឲ្យរាស្ត្រលោកដឹងច្បាស់ថា ការស្អាតស្អំខាងរាងកាយ គឺសំខាន់ចាំបាច់។ (លេវី. ១៥:៣១) ក្រឹត្យវិន័យម៉ូសេមានច្បាប់ដែលរួមបញ្ចូលការបន្ទោបង់ ការសម្អាតគ្រឿងប្រដាប់ផ្សេងៗ ការលាងដៃនិងជើង ហើយការបោកខោអាវ។ (និក្ខ. ៣០:១៧-២១; លេវី. ១១:៣២; ជន. ១៩:១៧-២០; ចោ. ២៣:១៣, ១៤) ព្រះយេហូវ៉ាបានរំលឹកបណ្ដាជនអ៊ីស្រាអែលថា លោកជាព្រះរបស់ពួកគេ លោកបរិសុទ្ធ ហើយភាពបរិសុទ្ធបានន័យថា «ស្អាត» «ឥតសៅហ្មង» និង«ពិសិដ្ឋ»។ អ្នកដែលបម្រើព្រះដ៏បរិសុទ្ធ ក៏ត្រូវតែបរិសុទ្ធដែរ។—សូមអាន លេវីវិន័យ ១១:៤៤, ៤៥
២០. តើយើងត្រូវស្អាតស្អំក្នុងរឿងណាខ្លះ?
២០ ដូច្នេះ យើងត្រូវតែស្អាតស្អំទាំងក្នុងទាំងក្រៅ។ យើងព្យាយាមគិតពីអ្វីដែលស្អាតស្អំ។ យើងធ្វើតាមគោលការណ៍របស់ព្រះយេហូវ៉ាស្តីអំពីសីលធម៌ស្អាតស្អំ ទោះបីជាពិភពលោកនេះមានការប្រព្រឹត្តថោកទាបយ៉ាងណាក៏ដោយ។ សំខាន់បំផុត យើងរក្សាឲ្យការគោរពប្រណិប័តន៍របស់យើងស្អាតស្អំជានិច្ច ដោយបដិសេធទាំងស្រុងនូវឥទ្ធិពលនៃសាសនាមិនពិត។ យើងមិនត្រូវភ្លេចនូវពាក្យព្រមានរបស់ព្រះដែលកត់ទុកនៅអេសាយ ៥២:១១ថា៖ «ចូរចេញទៅ ចូរចេញទៅ ចូរឲ្យឯងរាល់គ្នាចេញពីទីនេះទៅចុះ កុំឲ្យពាល់របស់អ្វីដែលមិនស្អាតឡើយ ចូរចេញពីកណ្ដាលទីក្រុងនេះទៅ . . . ចូរញែកខ្លួនចេញជាស្អាតចុះ»។ សព្វថ្ងៃនេះ យើងរក្សាឲ្យការគោរពប្រណិប័តន៍របស់យើងស្អាតស្អំ ដោយមិនធ្វើអ្វីដែលទាក់ទងនឹងសាសនាមិនពិតទាល់តែសោះ។ នេះជាមូលហេតុដែលយើងមិនចូលរួមពិធីបុណ្យដែលគេនិយមក្នុងពិភពលោកនេះ ដែលជាប់ទាក់ទងនឹងសាសនាមិនពិត។ ត្រូវមែន គឺពិបាកណាស់ឲ្យយើងរក្សាភាពស្អាតស្អំ។ ប៉ុន្តែ រាស្ត្ររបស់ព្រះយេហូវ៉ាខំប្រឹងប្រែងអស់ពីសមត្ថភាព ដើម្បីរក្សាភាពស្អាតស្អំគ្រប់ជំពូក ព្រោះនោះជួយពួកគេឲ្យរក្សាខ្លួនជាមនុស្សដែលព្រះស្រឡាញ់។
២១. តើយើងអាចធ្វើយ៉ាងណាដើម្បីប្រាកដថាព្រះនឹងស្រឡាញ់យើងជានិច្ច?
២១ ព្រះយេហូវ៉ាចង់ឲ្យយើងធ្វើជាមនុស្សដែលលោកស្រឡាញ់ជានិច្ច។ ប៉ុន្តែ យើងម្នាក់ៗត្រូវប្រាកដថា យើងខំប្រឹងអស់ពីសមត្ថភាពដើម្បីរក្សាខ្លួនជាមនុស្សដែលព្រះស្រឡាញ់។ យើងអាចធ្វើដូច្នោះបានដោយធ្វើតាមគំរូរបស់លោកយេស៊ូ ហើយបង្ហាញក្ដីស្រឡាញ់ដែលយើងមានចំពោះព្រះយេហូវ៉ាដោយធ្វើតាមបង្គាប់របស់លោក។ បើយើងធ្វើដូច្នេះ យើងអាចប្រាកដថា គ្មានអ្វី«អាចធ្វើឲ្យយើងឃ្លាតចេញពីសេចក្ដីស្រឡាញ់របស់ព្រះ ដែលត្រូវសម្ដែងតាមរយៈគ្រិស្តយេស៊ូ ជាម្ចាស់របស់យើងឡើយ»។—រ៉ូម ៨:៣៨, ៣៩
តើអ្នកចាំទេ?
• តើសមត្ថភាពវិនិច្ឆ័យអាចជួយយើងឲ្យរក្សាខ្លួនជាមនុស្សដែលព្រះស្រឡាញ់យ៉ាងដូចម្ដេច?
• បើព្រះយេហូវ៉ាស្រឡាញ់អ្នកណា ហេតុអ្វីយើងគួរស្រឡាញ់អ្នកនោះដែរ?
• ហេតុអ្វីសំខាន់ឲ្យយើងគោរពនិងធ្វើតាមអ្នកដែលព្រះតែងតាំង?
• តើភាពស្អាតស្អំសំខាន់ប៉ុណ្ណាសម្រាប់រាស្ត្ររបស់ព្រះ?
[សំណួរសម្រាប់អត្ថបទសិក្សា]
[រូបភាពនៅទំព័រ២៨]
«ប្រសិនបើអ្នករាល់គ្នាប្រព្រឹត្តតាមបង្គាប់របស់ខ្ញុំ អ្នករាល់គ្នានឹងរក្សាខ្លួនជាអ្នកដែលខ្ញុំស្រឡាញ់ ដូចខ្ញុំបានប្រព្រឹត្តតាមបង្គាប់របស់បិតាដែលនៅស្ថានសួគ៌ ហើយក៏រក្សាខ្លួនជាអ្នកដែលលោកស្រឡាញ់ដែរ»