‘Nusikila Muna Zola kwa Nzambi’
‘Nusikila Muna Zola kwa Nzambi’
“Nwiyilundila (yovo nusikila) muna zola kwa Nzambi, nusiang’e vuvu kia nkenda za Mfumu eto Yesu Kristu yamu moyo a mvu ya mvu.”—YUDA 21.
1, 2. Yave aweyi kesongelanga zola kwandi muna yeto? Aweyi tuzayidi vo diambu tufwete vanga muna sikila muna zola kwa Yave?
YAVE WA NZAMBI mpila zayingi kesongelanga zola kwandi muna yeto. Ka lukatikisu ko, e nkubik’a kimenga kia lukulu i ziku kisundidi kisonganga vo Yave okutuzolanga. Yave otoma zolanga wantu, yo fila Mwan’andi anzolwa ova ntoto yo yambula vo kafwa muna wete dieto. (Yoa. 3:16) Yave wavanga wo kadi ozolele vo twazinga yakwele mvu yo bak’e nluta mia zola kwandi.
2 Nga tufwete badika vo Yave okutuyambula twakala muna zola kwandi kana nkutu tuvangidi konso edi tuzolele? Ve. Muna Yuda tini kia 21, tutanganga vo: “Nwiyilundila muna zola kwa Nzambi, nusiang’e vuvu kia nkenda za Mfumu eto Yesu Kristu yamu moyo a mvu ya mvu.” E mvovo “nwiyilundila (yovo nusikila) muna zola kwa Nzambi” misonganga vo diambu tufwete vanga. Adieyi tufwete vanga muna sikila muna zola kwa Nzambi?
Aweyi Tulenda Sikidila Muna Zola kwa Nzambi?
3. Adieyi kavova o Yesu diasund’o mfunu mu sikila muna zola kwa S’andi?
3 Tulenda solola mvutu za kiuvu kiaki muna mvovo mia Yesu muna fuku wansuka wa zingu kiandi ova ntoto. Wavova vo: “Ovo nulunda nkanikinu miame, nukala muna zola kwame; konso una ndundidi nkanikinu mi’Es’ame, nkalanga muna zola kwandi.” (Yoa. 15:10) Elo, Yesu wazaya wo vo lemvokela e nkanikinu mia Yave i diambu disundidi o mfunu muna kala ye ngwizani ambote yo S’andi. Avo, o Mwan’alunga a Nzambi wabakula diambu diadi, nga ke wau ko mpe difwete kala kwa yeto?
4, 5. (a) Aweyi tulenda songela vo Yave tuzolanga? (b) Ekuma ka tunina ye kuma ko kia lembi lemvokela nkanikinu mia Yave?
4 Diantete, tusonganga vo tuzolanga Yave muna kunlemvokela. Yoane wa ntumwa wavova vo: “I yau yiyi e nzol’a Nzambi, tulunda nkanikinu miandi: e nkanikinu miandi ke miampasi ko.” (1 Yoa. 5:3) Dialudi vo, omu nza yayi wantu ayingi ke besonganga lemvo ko. Kansi, tala e mvovo emi: “Nkanikinu miandi ke miampasi ko.” Kieleka, Yave kekutulombanga diambu ko dina katulendi vanga ko.
5 Muna bong’e nona: Nga lenda vana nkundi aku anzolwa e zitu dina ozeye vo kelenda dio nata ko? Ve kikilu! Kieleka, Yave wete dieto kevavanga, otomene zaya e tezo kieto. O Nkand’a Nzambi ukutuzayisanga vo Yave ‘osungamenanga wo vo tu ntoto.’ (Nku. 103:14) Kalendi kutulomba ko dina katulendi vanga ko. Ke tuna ye kuma ko mu lembi lemvokela e nkanikinu mia Yave. Tuzeye wo vo o lemvokela Yave kukutuvananga elau dia songa vo tuzolanga e S’eto ezulu.
Lukau Lwamfunu Katuvana Yave
6, 7. (a) Nki i ntona? (b) Yika e nona kisonganga una e ntona zilenda kutusadisila mu sikila muna zola kwa Nzambi.
6 Ova nza yayi tuzingilanga, vena ye mambu mayingi tuzolang’o vanga mevavanga vo twalemvokela Nzambi. Aweyi tulenda kadila ye ziku vo dina tuvanga ngwizani dina ye luzolo lwa Nzambi? Yave watuvana lukau lwamfunu luna lulenda kutusadisa mu songa o lemvo. Lukau lwalu i ntona. Nki i ntona? I nsiku una muna yeto, ukutusadisanga mu kuyizaya. Zisalanga nze mfundisi, zilenda kutusadisa mu zaya dina tuvanga muna zingu yovo fimpa mavangu meto yo zaya kana vo mambote yovo mambi.—Tanga Roma 2:14, 15.
7 Aweyi tulenda sadila ntona zeto mu mpila yambote? Badika nona eki. Nzenza okangalanga muna makanga. Ke muna nzila ko ngatu sinsu isonganga kuna kafwete kwenda. Kansi, olweke kuna kazola kwenda. Nki kiansadisa? Lekwa kiakete kiansadisa kiyikilwanga vo bússola. Ivwidi lolonzi isonganga e konko yá ya nza ye ntumbu ifilanga ntu kuna node. Kondwa bússola, o muntu lenda vila. Diau adimosi, kondwa e ntona, o wantu ke badi zaya dina bafwete vanga ko muna sikidisa fu ya nkal’ambote yo sola nsola zambote muna zingu.
8, 9. (a) Adieyi tufwete sungamena mu kuma kia ntona zeto? (b) Adieyi tufwete vanga mu kala ye ziku vo e ntona zeto zilenda kutusadisa?
8 Nze bússola, e ntona zilenda kutuvuna. Kele vo nzenza una muna makanga osidi imã vana ndambu a bússola, e ntumbu ka ifila ntu ku node ko. Diau adimosi, avo tuyambwidi vo e zolela yeto yatufila muna dina tuzolele vanga, adieyi dikutubwila? E zolela ya nitu ilenda yivisa e ntona zeto. Nkand’a Nzambi ukutulukisanga vo: “O ntima usundidi mawonso o tekama, wayela kikilu.” (Yer. 17:9; Nga. 4:23) Vana ntandu, kele vo e nzenza tuyikidi muna nona kena ye mapa ko, i sia vo, nkanda wa zayila nzila, e bússola ke yikala mfunu ko. Diau adimosi, avo ntona zeto kazifidilu kwa malongi ma Nkand’a Nzambi ko, ke zilenda kutusadisa ko. (Nku. 119:105) Diankenda kikilu vo, wantu ayingi omu nza yayi besiang’e zolela yau va fulu kiantete yo lembi lemvokela nkanikinu mia Nkand’a Nzambi. (Tanga Efeso 4:17-19.) Ekiaki i kuma wantu ayingi bevangilanga mambu mambi, kana una vo bena ye ntona.—1 Tim. 4:2.
9 Ka tuzolele kituka nze wantu awaya ko. Kansi, tuzolele vo Diambu dia Nzambi dialonga ntona zeto, kimana zatusadisa. Tufwete lemvokela ntona zeto vana fulu kia landa zolela yeto. Tufwete sianga mpe ngolo za zitisa ntona za mpangi zeto z’akala ye z’akento. Tuvenga kubatesa sakuba, yo sungamena vo e ntona za mpangi zeto zilenda swaswana ye zeto.—1 Kor. 8:12; 2 Kor. 4:2; 1 Pet. 3:16.
10. Nkia mambu matatu ma zingu tufimpa?
10 Yambula twafimpa mambu matatu ma zingu kieto mana tufwete songela zola kweto kwa Yave muna kunlemvokela. Muna konso diambu tufimpa, divava vo twasadila ntona zeto, kansi zifwete teka longwa kimana zakala e ngwizani ye nsiku mia nkal’ambote mia Nkand’a Nzambi. E mambu matatu mana tulenda lemvokela Yave i mama: (1) Tuzola awana kezolanga o Yave, (2) tuzitisa ana bena ye wisa ye (3) tusi’e ngolo twakala aveledi vana meso ma Nzambi.
Tuzola Awana Kezolanga o Yave
11. Ekuma tufwete zolela awana kezolanga o Yave?
11 Diantete, tufwete zola awana kezolanga o Yave. Muna diambu dia yikundi, o wantu bena nze evusu. Tusambukilanga mawonso bevanganga awana batuzungidi. O Nsemi eto otomene zaya e nluta ye mfwilu milenda twasa kikundi yo wantu alembi lunga. Ekiaki i kuma kekutuvaninanga elongi vo: “On’okangala y’akwa ngangu, okal’e ngangu: O makangu ma mazowa, mpasi kemona.” (Nga. 13:20; 1 Kor. 15:33) Ka vena mosi ko mu yeto zolele ‘mona mpasi.’ Yeto awonso tuzolele kala “akwa ngangu.” Yave kalendi diaka kudikilwa ngangu ko, ngatu vukumunwa kwa muntu. Kana una vo i wau, okutusonganga mbandu ambote mu diambu dia yikundi. Se yindudi—nkia wantu alembi lunga kesolanga o Yave mu kala akundi andi?
12. Nkia mpila akundi kesolanga Yave?
12 Yave wayikila Abarayama vo “nzodi ame.” (Yes. 41:8) Nkwa kwikizi, nsongi yo lemvo kakala. (Yak. 2:21-23) I mpila wantu kasola o Yave mu kala akundi andi. Akundi a mpila yayi mpe kesolanga o unu. Wau vo Yave wantu a mpila yayi kesolanga se akundi, nga ke diangangu ko yeto wantu alembi lunga twasolanga yikundi yambote, kimana twakangala y’akwa ngangu yo kituka akwa ngangu?
13. Muna diambu dia yikundi, adieyi dilenda kusadisa mu sola yikundi yambote?
13 Adieyi dilenda kusadisa mu sola yikundi yambote? O longoka e nona ya wantu beyikwanga mu Nkand’a Nzambi dilenda kusadisa. Badika kikundi kia Rutu ye Naomi wa ko wandi, kikundi kia Davidi ye Yonatane yovo kia Timoteo ye Paulu. (Rutu 1:16, 17; 1 Sam. 23:16-18; Fili. 2:19-22) Yikundi yayi mu zola kwakieleka bakala kwau muna Yave yatuka. Nga olenda solola akundi ana bezolanga Yave nze ngeye? Kala ye ziku vo muna nkutakani y’Akristu tulenda solola akundi ambote. Akundi awaya ke balendi kufila ko mu vanga diambu dilenda fwasa ngwizani aku yo Yave. Kansi, bekusadisa mu lemvokela Yave, nungunuka muna mwanda yo kunina muna mwanda. (Tanga Ngalatia 6:7, 8.) Balenda kusadisa wasikila muna zola kwa Nzambi.
Tuzitisa ana Bena ye Wisa
14. Ekuma ezak’e ntangwa dikadilanga diampasi dia lemvokela e wisa?
14 E diambu diazole tufwete songela zola kweto muna Yave i diambu dia wisa. Tuzitisa ana bena ye wisa. Kansi, ekuma ezak’e ntangwa dikadilanga diampasi? Kimosi muna kuma i kia sia vo ana bena ye wisa wantu alembi lunga. Vana ntandu, yeto kibeni mpe tu wantu alembi lunga. Tunwananga ye fu kia kolama twawutuka kiau.
15, 16. (a) Ekuma tufwete lemvokela awana Yave kevananga kiyekwa kia lunga-lunga nkangu andi? (b) Adieyi tulongokele mu mpila ina Yave kabadikila ukolami wa Aneyisaele kuna kwa Mose?
15 Nanga lenda kiyuvula, ‘Ekuma tufwete wo vangila, wau vo diampasi dikalanga kwa yeto dia lemvokela ana bena ye wisa?’ Mu diambu dia kimfumu. Nani osola kakala mfumu aku? Avo Yave tusolele kakala Mfumu eto, tufwete lemvokela wisa kiandi. Nga tukunyikila vo Mfumu eto, kele vo ka tulemvokele wisa kiandi ko? Vana ntandu, muna songa wisa kiandi, Yave wantu alembi lunga kesadilanga ana kevananga kiyekwa kia lunga-lunga nkangu andi. Yave aweyi kekutubadikila, kele vo tubakolamene?—Tanga 1 Tesalonika 5:12, 13.
16 Kasikil’owu, vava Aneyisaele bayidima yo kolamena Mose, Yave wabadikila dio vo yandi bakolamena. (Nta. 14:26, 27) Nzambi kasoba ko. Avo tukolamene awana kevananga e wisa o Yave, yandi tukolamena.
17. Nkia nyindu asikila tufwete kala wau mu kuma ki’awana bevitang’o ntu muna nkutakani?
17 Paulu wa ntumwa wasonga e nyindu asikila tufwete kala wau mu kuma ki’awana bevitang’o ntu muna nkutakani y’Akristu. Wasoneka vo: ‘Nulemvokel’awana ben’e wisa vovo nwina, yo kubasakalela: kadi beyingidilanga muna diambu dia mioyo mieno, nze awana bet’e mbalu; batela zo kuna kiese, ke ku bumu ko: kadi ediadi ke diamfunu kwa yeno ko.’ (Ayib. 13:17) Kieleka, ngolo divavanga muna lemvokela yo sakalela ana bena ye wisa. Sungamena vo, ekani dieto i sikila muna zola kwa Nzambi. Nga ke diau ko tufwete sila ngolo?
Tukala Aveledi Vana Meso ma Yave
18. Ekuma Yave kezolelanga vo twakala aveledi?
18 E mpila yatatu tulenda songela zola kweto muna Yave i siang’e ngolo za kala aveledi vana meso ma Yave. Mase besianga ngolo za velelesa wan’au. Ekuma? E kuma kadi, o kala wavelela disadisanga mwana mu kala ye vimpi wambote. Vana ntandu, o wana avelela zitu betwasanga kwa esi nzo, disonganga mpe o zola ye sungididi kia mase muna wan’au. Diau adimosi, Yave ozolanga vo twakala aveledi. Ozeye wo vo o kala wavelela nluta miayingi dilenda kututwasila. Ozeye wo mpe vo o velela kweto zitu kutwasanga kwa S’eto ezulu. Ediadi diamfunu, kadi dilenda fila wantu mu sadila Nzambi, vava bemonanga e mpila tuswaswanene yo wantu a nza yayi yafunzuka.
19. Aweyi tuzayidi vo o velela muna nitu mfunu kwina?
19 Mu nkia mambu tufwete kadila aveledi? Muna mambu mawonso ma zingu kieto. Muna Isaele yankulu, Yave watoma dio kiesesa vo nkangu andi ufwete kala wavelela muna nitu. (Fuka 15:31) O Nsiku a Mose wasikidisa mambu nze katula mvindu yovo titi, velelesa salanganu, sukula moko ye malu ye mvwatu. (Luv. 30:17-21; Fuka 11:32; Nta. 19:17–20; Nsi. 23:13, 14) Aneyisaele basungameswa vo Yave wa Nzambi au wavauka, i sia vo “wavelela.” E selo ya Nzambi avelela bafwete kala mpe aveledi.—Tanga Fuka 11:44, 45.
20. Mu nkia mambu tufwete kadila aveledi?
20 Tufwete kalanga aveledi tuka muna kati yaku mbazi. E ngindu zeto zifwete kalanga zavelela. Tufwete lemvokela nkanikinu mia Yave mu kuma kia velela muna fu, kana una vo e nza yazala ye mavangu ma zumba. Edi disundidi o mfunu, e nsambil’eto ifwete kala yavelela muna venganga umpukumuni wa nsambila zaluvunu. Tusiang’e ngolo za lemvokela lulukisu luna muna Yesaya 52:11: “Nukatuka, nukatuka, nuvaika kwakuna, ke nuviakana lekwa kiafunzuka ko; nuvaika vana kena, nuvelela kweno.” O unu, tulenda songa vo twavelela muna mwanda muna lembi kuyisia muna nsambila zaluvunu. Kasikil’owu, tuvenganga e nkinzi mia nsambila zaluvunu ye mia nza yayi. Kieleka, diampasi mu kala wavelela. Kansi, o nkangu a Yave usianga ngolo mu kala aveledi, kadi dilenda kubasadisa mu sikila muna zola kwa Nzambi.
21. Aweyi tulenda kadila ye ziku vo twasikila muna zola kwa Nzambi?
21 Yave ozolele vo twasikila muna zola kwandi yakwele mvu. Yeto awonso tufwete kala ye ziku vo tuvanganga wawonso mu sikila muna zola kwa Nzambi. Tulenda wo vanga muna landanga e mbandu a Yesu yo songa vo tuzolanga Yave muna lemvokelanga nkanikinu miandi. Avo tuvangidi wo, tukala ye ziku vo ke vena má ko “kilenda kutuvambula muna zolwa kwa Nzambi, kuna muna Kristu Yesu wa Mfumu eto.”—Roma 8:38, 39.
Nga Osungamenanga?
• E ntona zeto aweyi zilenda kutusadisila mu sikila muna zola kwa Nzambi?
• Ekuma tufwete zolela awana kezolanga Yave?
• Ekuma tufwete zitisila ana bena ye wisa?
• O velela kwa nkangu a Nzambi nkia mfunu kwina?
[Yuvu ya Longoka]
[Mvovo mia Fwaniswa mina muna lukaya lwa 18]
“Ovo nulunda nkanikinu miame, nukala muna zola kwame; konso una ndundidi nkanikinu mi’Es’ame, nkalanga muna zola kwandi”
Nkanda Unungununanga Fu Yambote
Muna lukutakanu lwa mvivu lwa mvu wa 2008, twatambwidi nkanda wa makaya 224 una yo ntu a diambu vo ‘Nusikila Muna Zola kwa Nzambi.’ Adieyi i kani diavaikisilwa nkanda wau wampa? Wavaikiswa mu sadisa Akristu bazaya yo zola nsiku mia Yave, musungula emi mia nkala y’Akristu. O longoka nkanda ‘Nusikila Muna Zola kwa Nzambi’ kusiamisa lukwikilu lweto lwa zaya vo o zingila ngwizani ye nsiku mia Yave i diambu dilutidi o mfunu tufwete vanga owau yo kutufila ku moyo a mvu ya mvu.
Vana ntandu, nkanda wau ukutusadisa mu zaya vo o lemvokela Yave ke diambu diampasi ko. Kansi, i mpila tulenda songela vo Yave tuzolanga. Muna kuma kiaki, nkanda wau ukutufila mu kiyuvula: ‘Ekuma ilemvokelanga Yave?’
Vava wantu bevanganga vilwa wa yambula zola Yave, ke mu kuma kia malongi ko, kansi mu kuma kia mavangu mau. Ozevo, diamfunu twawokesa zola yo luyangalalu lweto muna nsiku mia Yave emi mifilanga zingu kieto kia lumbu ke lumbu. Tusidi e vuvu vo nkanda wau wampa usadisa mameme ma Yave mu nza yawonso batatidila owu wambote mu songa vo Satana nkwa luvunu yo sikila muna zola kwa Nzambi.—Yuda 21.
[Mvovo mia Fwaniswa mina muna lukaya lwa 20]
‘NUSIKILA MUNA
ZOLA KWA NZAMBI’