“Mu Tiiseze Mwa Lilato La Mulimu”

“Mu tiiseze mwa lilato la Mulimu, inze mu libelezi sishemo sa Mulenaa luna Jesu Kreste, kuli mu bone bupilo bo bu sa feli.”—JUDA 21.

1, 2. Jehova u lu bonisize cwañi lilato la hae, mi lu ziba cwañi kuli lu tokwa ku eza se siñwi kuli lu zwelepili ku latiwa ki yena?

JEHOVA MULIMU u lu bonisize lilato ka linzila ze ñata hahulu. Ku si na ku kakanya, se si bonisa kuli Jehova u lu lata hahulu ki sitabelo sa tiululo sa lu file. Lilato la Jehova kwa batu ki le lituna hahulu kuli mane naa lumile Mwanaa hae ya latwa ku taha fa lifasi ku to lu shwela. (Joa. 3:16) Jehova naa lumile Mwanaa hae ku to lu shwela kakuli u bata kuli lu pile ku ya ku ile, mi hape u bata kuli lu tusiwe ki lilato la hae ku ya ku ile!

² Kana lwa swanela ku libelela kuli Jehova u ka zwelapili ku lu lata ku si na taba ni ze lu keta ku eza? Batili. Kakuli kwa Juda timana 21, lu bala kelezo ye li: “Mu tiiseze mwa lilato la Mulimu, inze mu libelezi sishemo sa Mulenaa luna Jesu Kreste, kuli mu bone bupilo bo bu sa feli.” Pulelo ye li ‘mu tiiseze mwa lilato la Mulimu’ i bonisa kuli lu tokwa ku eza se siñwi. Kacwalo lu tokwa ku ezañi kuli lu tiiseze mwa lilato la Mulimu?

Lu Kona ku Ezañi Kuli lu Tiiseze Mwa Lilato la Mulimu?

3. Ki sika mañi sa naa talusize Jesu ili sa naa swanela ku eza kuli a tiiseze mwa lilato la Ndataahe?

³ Lu fumana kalabo kwa puzo yeo mwa manzwi a Jesu ka sibili a naa bulezi fa busihu bwa mafelelezo a bupilo bwa hae bwa fa lifasi. Naa bulezi kuli: “Ha mu mamela litaelo za ka, mu  ka ina mwa lilato la ka, sina na, ha ni mamezi litaelo za Ndate, mi ni inzi mwa lilato la hae.” (Joa. 15:10) Kaniti, Jesu naa lemuhile kuli ku utwa litaelo za Jehova ne li kwa butokwa kuli a kone ku zwelapili ku tiisa silikani sa hae ni Ndataahe. Kacwalo, haiba Mwanaa Mulimu ya petehile naa tokwa ku eza cwalo, luna bo? Kaniti, ni luna lu tokwa ku eza cwalo!

4, 5. (a) Sihulu lu kona ku bonisa cwañi kuli lwa lata Jehova? (b) Ki kabakalañi ha lu sa swaneli ku hupula kuli lu ka palelwa ku utwa litaelo za Jehova?

⁴ Lu bonisa kuli lwa lata Jehova sihulu ka ku mu utwa. Muapositola Joani naa bulezi cwana: “Ku lata Mulimu, kiha lu mamela litaelo za hae; mi litaelo za hae ha li na bukiti.” (1 Joa. 5:3) Ki niti kuli mwa lifasi kacenu, batu ba bañata ha ba tabeli ku utwa Mulimu. Kono mu lemuhe pulelo ye mwa timana yeo, ye li: “Mi litaelo za hae ha li na bukiti.” Jehova ha lu laeli ku eza lika ze lu sa koni.

⁵ Ka mutala: Kana mwa kona ku kupa mulikanaa mina ye mu lata kuli a nanule nto ye bukiti ye mu ziba kuli ha koni ku i nanula? Batili! Kono mane Jehova yena u na ni sishemo hahulu ku lu fita mi wa utwisisa hahulu mapalelwi a luna. Bibele i lu kolwisa kuli Jehova u “hupula kuli lu liluli fela.” (Samu 103:14) Ha koni ku lu laela ku eza lika ze lu sa koni. Kacwalo ha ku na ze kona ku lu palelwisa ku utwa litaelo za Jehova. Kono lu utwa Mulimu bakeñisa kuli ku eza cwalo ki sisupo sa kuli lu lata hahulu Ndataa luna wa kwa lihalimu ni kuli lu bata ku tiiseza mwa lilato la hae.

Mpo ye Ipitezi ya lu File Jehova

6, 7. (a) Lizwalo kiñi? (b) Mu fe mutala o bonisa ka mo lizwalo li kona ku lu tuseza ku tiiseza mwa lilato la Mulimu.

⁶ Mwa lifasi le li taata le lu pila ku lona, lu na ni ku eza likatulo ze ñata ze ama buipeyo bwa luna ku Mulimu. Ki nto mañi ye ka lu tusa ku eza likatulo ze lumelelana ni tato ya Mulimu? Jehova u lu file mpo ye kona ku lu tusa hahulu mwa taba ye ya ku utwa Mulimu. Mpo yeo ki lizwalo. Lizwalo kiñi? Ki ku itemuha isali luna beñi. Lizwalo li swana sina muatuli ya mwahali, li lu konisa ku nyakisisa liketo za mwa bupilo kamba ku lu hupulisa likezo ze lu kile lwa eza ni ku li tatuba kuli lu bone haiba ne li ze nde kamba ze maswe, kamba haiba ne li ze lukile kamba ze si ka luka.—Mu bale Maroma 2:14, 15.

⁷ Lu kona ku tusiwa cwañi ki lizwalo la luna? Ha lu nyakisiseñi mutala wo. Ha lu ngeni kuli muzamai u falula lihalaupa le lituna. Lihalaupa leo ha li na linzila, ha li na mikwakwa mane ni lisupanzila. Kono u zwelapili ku liba kwa ya. Kabakalañi? Kakuli u zamaya ni mutu ya ziba hande nzila. Muzamai yo ha na si ke a ba ni ketelelo, naa ka lateha. Ka ku swana, mutu ya si na lizwalo naa si ke a eza liketo ze nde ka za muzamao mi naa si ke a eza likatulo ze lukile mwa bupilo.

8, 9. (a) Lizwalo li na ni mapalelwi afi e lu swanela ku hupulanga? (b) Lu kona ku ezañi kuli lizwalo la luna li kone ku lu tusa hahulu?

⁸ Kono lizwalo fokuñwi la kona ku libisa mutu mwa nzila ye si ka luka. Kabakalañi? Ha lu kuteñi kwa mutala wa luna wa mutu ya mi etelela kwa sibaka se mu sa zibi? Haiba mutu yo a lyangana nzila, wa kona ku mi latehisa. Ka nzila ye swana, haiba lu latelela feela litakazo za pilu ya luna, ku kona ku ezahalañi? Litakazo za luna za kona ku sinya lizwalo. Bibele i lu lemusa kuli “pilu ya puma ku fita linto kaufela, i sinyehile ku feleleza.” (Jer. 17:9; Liprov. 4:23) Hape haiba mu kanana ni mutu ya mi etelela, ku hanyeza ketelelo ya hae ni ku itusisa nzila ye mu nga kuli ki yona ye lukile, mwa kona ku lateha. Ni luna, haiba lu sa itingi fa ketelelo ya Bibele, lona Linzwi la Mulimu la niti ili le li sa koni ku cinca, lizwalo la luna ha li na ku lu tusa se siñwi. (Samu 119:105) Ka bumai, batu ba bañata mwa lifasi le, ba isa hahulu mamelelo kwa litakazo za pilu ku fita ku isa mamelelo ye tuna kwa likuka ze mwa Linzwi la Mulimu. (Mu bale  Maefese 4:17-19.) Kona libaka batu ba bañata hahulu ha ba ezanga lika ze maswe hahulu, niha ba na ni lizwalo.—1 Tim. 4:2.

⁹ Lu ikatulele ku sa ba sina bona! Kono lu swanela ku lumeleza Linzwi la Mulimu ku luta ni ku twaeza lizwalo la luna kuli li kone ku lu tusa hahulu. Mi lu swanela ku utwa lizwalo la luna le li lutilwe ki Bibele ku fita ku tuhelela litakazo za luna ze maswe ku li pukutisa. Ka nako ye swana hape, lu lukela ku satalala ku kuteka mazwalo a mizwale ni likaizeli za luna mwa puteho. Lu swanela ku lika ka taata ku ambuka ku ba sitatalisa, ka ku ziba kuli mwendi mazwalo a mizwale a sitatala kapili ku fita a luna.—1 Makor. 8:12; 2 Makor. 4:2; 1 Pit. 3:16.

10. Ki linzila lifi ze talu ze lu ka nyakisisa cwale?

¹⁰ Cwale ha lu nyakisiseñi linzila ze talu ze lu kona ku bonisa ka zona kuli lwa lata Jehova ka ku mu utwa. Ki niti kuli lizwalo li ka amiwa mwa linzila ze talu zeo kaufela, kono kuli li kone ku lu tusa hahulu, li tokwa ku zamaiswa ki likuka za Bibele za muzamao ze ñozwi ka ketelelo ya moya wa Mulimu. Linzila ze talu ze lu kona ku bonisa ka zona kuli lwa lata Jehova ka ku mu utwa, ki ze: (1) Ku lata batu baa lata Jehova, (2) ku kuteka ba ba lu zamaisa, ni (3) ku satalala ku ba ba ba kenile fapilaa Mulimu.

Mu Late Batu Baa Lata Jehova

11. Ki kabakalañi ha lu swanela ku lata batu baa lata Jehova?

¹¹ Nzila ya pili ki ya kuli lu lukela ku lata batu baa lata Jehova. Fa taba ya liango, batu ba swana sina siponji. Siponji ha si cupwekwa mwa mezi, si anyanga mezi. Ni luna batu lu cwalo. Lu na ni mukwa wa ku likanyisa lika kaufela ze ba eza ba bañwi. Mubupi wa luna wa ziba hande-ndende bunde ni bumaswe bwa liango za batu ba ba si ka petahala. Kona libaka ha lu fa kelezo ye butali ye li: “Ya kopana  ni ba ba butali, ni yena u ka talifa; kono ya twaelana ni matanya u ka utwa butuku.” (Liprov. 13:20; 1 Makor. 15:33) Kaufela luna, ha lu tabeli ku “utwa butuku,” lu tabela ku “talifa.” Ha ku na mutu ya kona ku talifisa Jehova kamba ku mu sinya. Kono u lu tomela mutala o munde ha ku taha ku za liango. Ha mu nahane feela taba ye: Ki batu ba ba cwañi ba keta Jehova kuli ba be balikani ba hae?

12. Jehova u ketanga balikani ba ba cwañi?

¹² Jehova naa bizize Abrahama kuli “mulatiwa wa ka.” (Isa. 41: 8) Abrahama ne li mutu ya sepahala, ya lukile, ni ya naa ipeya ku utwa. (Jak. 2:21-23) Jehova u ketanga batu ba ba cwalo ku ba balikani ba hae. Ni kacenu, u itama bulikani ni batu ba ba cwalo. Haiba Jehova u ketanga balikani ba ba cwalo, kana haki swanelo kuli ni luna batu ba ba si ka petahala lu kete hande balikani, kuli lu zamaye ni ba ba butali ilikuli ni luna lu talife?

13. Ki lika mañi ze ka lu tusa ku keta balikani ba bande?

¹³ Ki nto mañi ye kona ku mi tusa ku keta balikani ba bande? Ki ku ituta mitala ya mwa Bibele. Ha mu nahane bulikani bo bu kile bwa ba mwahalaa Ruti ni mukwenyanaa hae Naomi, ni mwahalaa Davida ni Jonatani, kamba mwahalaa Timotea ni Paulusi. (Ruti 1:16, 17; 1 Sam. 23:16-18; Mafil. 2:19-22) Batu bao kaufela ne ba bile balikani ba batuna ka libaka-tuna le: Kaufela bona ne ba lata hahulu Jehova. Kana mwa kona ku fumana balikani ba ba lata hahulu Jehova sina mina? Mu kolwe kuli mwa puteho ya Sikreste mwa kona ku fumana balikani ba ba cwalo. Balikani ba ba cwalo ha ba na ku mi susueza ku eza lika ze ka mi utwisa butuku. Kono ba ka mi tusa ku utwa Jehova, ku hula kwa moya, ni ku calela moya. (Mu bale Magalata 6:7, 8.) Ba ka mi tusa ku tiiseza mwa lilato la Mulimu.

Mu Kuteke ba ba Zamaisa

14. Ki mabaka afi a tahisanga kuli lu fumane taata ku kuteka ba ba zamaisa?

¹⁴ Nzila ya bubeli ye lu bonisa ka yona kuli lwa lata Jehova i ama tamaiso. Lu lukela ku kuteka ba ba lu zamaisa. Kono ki kabakalañi ha ku lu belanga taata ka linako ze ñwi ku kuteka ba ba lu zamaisa? Libaka kikuli batu ba ba lu zamaisa ha ba si ka petahala. Hape ni luna ba ba zamaiswa ha lu si ka petahala. Lu na ni mukwa o lu hozize wa bukwenuheli.

15, 16. (a) Ki kabakalañi ha lu swanela ku kuteka ba ba filwe buikalabelo ki Jehova kuli ba babalele batu ba hae? (b) Jehova mwa naa ngezi Maisilaele ba ne ba kwenuhezi Mushe ku lu luta tuto mañi ya butokwa?

¹⁵ Mwendi mu kana mwa ipuza kuli: ‘Bakeñisa kuli ku taata ku kuteka ba ba lu zamaisa, ki kabakalañi ha lu swanela ku eza cwalo?’ Kalabo i ama taba ya bubusi. Ki mañi ye lu ka keta kuli a lu buse? Haiba lu keta Jehova kuli a lu buse, lu tokwa ku kuteka tamaiso ya hae. Haiba lu palelwa ku kuteka tamaiso ya hae, kana lwa kona ku bulela kuli ki yena Mubusi wa luna? Ku tuha fo, Jehova kamita u busa ka ku itusisa batu ba ba si ka petahala kuli ba babalele batu ba hae. Haiba lu kwenuhela batu ba ketile, Jehova u ka nga cwañi likezo za luna?—Mu bale 1 Matesalonika 5:12, 13.

¹⁶ Ka mutala, Maisilaele ha ne ba tongokile ni ku kwenuhela Mushe, Jehova naa ikutwile kuli ki yena ye ne ba kwenuhezi. (Num. 14: 26, 27) Mulimu ha si ka cinca. Haiba lu kwenuhela batu ba ketile ku lu zamaisa, ki yena luli ye lu lwanisa.

17. Ki mubonelo mañi o lukile o lu swanela ku ba ni ona kwa neku la ba ba zamaisa mwa puteho?

¹⁷ Muapositola Paulusi u lu patululela mubonelo o lu swanela ku ba ni ona kwa neku la ba ba na ni buikalabelo mwa puteho ya Sikreste. Naa ñozi kuli: “Mu utwe bazamaisi ba mina, mi mu ipeye kwatasaa bona; kakuli ba tonela mioya ya mina, hailifo ba ka buzwa za yona. Mu ba utwe; kuli ba eze musebezi wo ka tabo, isi ka ku tonga ko ku si na ku mi tusa se siñwi.” (Maheb. 13:17) Ki niti kuli lu tokwa ku ikataza hahulu kuli lu kone ku ba ni moya wa ku utwa ni wa ku ipeya kwatasi. Kono mu  hupule kuli se lu ezeza cwalo kikuli lu tiiseze mwa lilato la Mulimu. Kana seo haki sona sikonkwani sa luna?

Mu be ba ba Kenile Fapilaa Mulimu

18. Ki kabakalañi Jehova ha tabela kuli lu be ba ba kenile?

¹⁸ Nzila ya bulalu ye lu bonisa ka yona kuli lwa lata Jehova ki ka ku satalala ku ba ba ba kenile fapilaa hae. Bashemi ba belekanga ka taata ku tapisa bana ba bona. Kabakalañi? Libaka la pili ki la kuli bukeni bu tusa mwana ku ba ni buikangulo bo bunde. Ku tuha fo, mwana ya kenile u kutekehisa lubasi lwa habo, ni ku bonisa kuli bashemi ba hae ba na ni lilato ni pabalelo ye nde kwa lubasi. Ka mabaka a swana, Jehova ni yena u bata kuli lu be ba ba kenile. Wa ziba kuli bukeni bu lu tusa ku ba ni buikangulo bo bunde. Hape wa ziba kuli ha lu ba ba ba kenile, lwa mu kutekehisa ka ku ba Ndataa luna wa kwa lihalimu. Ku eza cwalo ki kwa butokwa hahulu kakuli ku ka tusa batu ku sutelela ku Mulimu ye lu sebeleza bakeñisa kuli ba ka itemuhela mo lu shutanela hahulu ni batu ba mwa lifasi le li silafezi le.

19. Lu ziba cwañi kuli bukeni bwa kwa mubili ki bwa butokwa?

¹⁹ Ki mwa linzila lifi mo lu swanela ku ba ba ba kenile? Ki mwa mupilelo wa luna kaufela. Mwa Isilaele wa kwaikale, Jehova naa taluselize batu ba hae ka ku utwahala kuli ba swanela ku ba ba ba kenile kwa mubili. (Liv. 15:31) Mulao wa Mushe ne u na ni litaelo ze ambola fa litaba ze cwale ka mwa ku yumbela ze maswe za mutabani, ku kenisa libyana, ku tapa kwa mazoho ni kwa mahutu mane ni ku tapisa litino. (Ex. 30:17-21; Liv. 11:32; Num. 19:17-20; Deut. 23:13, 14) Maisilaele ne ba hupulisizwe kuli Mulimu wa bona, Jehova, ki ya kenile, ili ku talusa kuli ki ya twekile. Batanga ba Mulimu ya kenile ni bona ba swanela ku ba ba ba kenile.—Mu bale Livitike 11:44, 45.

20. Ki mwa linzila lifi mo lu swanela ku ba ba ba kenile?

²⁰ Kacwalo, lu tokwa ku ba ba ba kenile mwahali ni kwande. Lu swanela ku satalala ku ba ni minahano ye kenile. Lu swanela ku kumalela ka busepahali kwa likuka za Jehova za bukeni bwa mwa muzamao, ku si na taba ni kuli lu pila mwa lifasi le li tezi buhule. Mi sa butokwa ni ku fita kikuli, lu swanela ku tundamena ku buluka bulapeli bwa luna bu li bo bu kenile ka ku sa swalisana ni bulapeli bwa buhata. Kamita lu hupule temuso ye ñozwi kwa Isaya 52:11 ye li: “A mu funduke, a mu funduke, mu zwe mo, mu si ke mwa swala ze masila, a mu zwe mwa Babilona! Mu ikenise.” Kacenu, lu ba ba ba kenile kwa moya ka ku sa swala nto ifi kamba ifi ya nga Ndataa luna wa kwa lihalimu kuli ki ye masila. Kona libaka ha lu sa abani mwa mikiti ni lipumulo za bulapeli bwa buhata ze atile mwa lifasi kacenu. Kono niti kikuli ku taata hahulu ku pila lu li ba ba kenile. Niteñi, batu ba Jehova ba satalala kuli ba be ba ba kenile, kakuli ba ziba kuli ku eza cwalo ku ba tusa ku tiiseza mwa lilato la Mulimu.

21. Lu swanela ku ezañi kuli lu tiiseze mwa lilato la Mulimu?

²¹ Jehova u bata kuli lu tiiseze mwa lilato la hae ku ya ku ile. Kono mañi ni mañi wa luna u swanela ku lika ka taata kuli a tiiseze mwa lilato la Mulimu. Lu kona ku eza cwalo ka ku latelela mutala wa Jesu ni ku bonisa lilato la luna ku Jehova ka ku utwa litaelo za hae. Haiba lu eza cwalo, u zibe “ha ku na se si kona ku lu kauhanya ni lilato la Mulimu, le li li teñi ku Jesu Kreste Mulenaa luna.”—Maro. 8:38, 39.

Kana Mwa Hupula?

• Lizwalo la luna li kona ku lu tusa cwañi ku tiiseza mwa lilato la Mulimu?

• Ki kabakalañi ha lu swanela ku lata batu baa lata Jehova?

• Ki kabakalañi ha lu swanela ku kuteka ba ba lu zamaisa?

• Bukeni ki bwa butokwa cwañi kwa batu ba Mulimu?

[Lipuzo za Tuto]

[Mbokisi/Siswaniso se si fa likepe 20]

HATISO YE SUSUEZA BATU KU BA NI MUZAMAO O MUNDE

Kwa mukopano wa sikiliti wa mwa 2008, ne ku zwisizwe buka ya makepe a 224 ye na ni toho ya taba ye li “Mu Tiiseze Mwa Lilato la Mulimu.” Ki ufi mulelo wa buka ye nca ye? I lukiselizwe ku tusa Bakreste kuli ba zibe ni ku lata likuka za Jehova, mi i kanatela sihulu fa muzamao wa Sikreste. Ku ituta ka tokomelo buka ya “Mu Tiiseze Mwa Lilato la Mulimu” ku ka lu kolwisa kuli ku pila ka ku ya ka likuka za Jehova ki nzila ye nde ka ku fitisisa ya ku pila ka yona cwale mi hape ku ka lu fumanisa bupilo bo bu sa feli kwapili.

Sihulu i lukiselizwe ku lu tusa ku bona kuli ku mamela litaelo za Jehova haki nto ye taata. Kono ki nzila ya ku bonisa ka yona Jehova kuli lwa mu lata. Kacwalo, buka ye i ka lu susueza ku ipuza kuli, ‘Ki kabakalañi ha ni mamela litaelo za Jehova?’

Hañata batu ha ba fulalela Jehova haki kabakala ku sa utwisisa tuto ye ñwi kono ki kabakala ku ikenya mwa muzamao o maswe. Kacwalo, lu swanela ku lata ni ku itebuha hahulu milao ni likuka za Jehova ze lu etelela mwa bupilo bwa luna bwa ka zazi ni zazi. Lu na ni buikolwiso bwa kuli hatiso ye nca ye i ka tusa lingu za Jehova mwa lifasi kaufela ku tiyela ku ze lukile, ku bonisa kuli Satani ki lihata, mi sihulu ni ku tiiseza mwa lilato la Mulimu!—Juda 21.

[Siswaniso se si fa likepe 18]

“Ha mu mamela litaelo za ka, mu ka ina mwa lilato la ka, sina na, ha ni mamezi litaelo za Ndate, mi ni inzi mwa lilato la hae”