‘Mwilamei Mu Buswe Bwa Leza’

“Mwilamei monka mu [buswe bwa] Leza, ne kutengela kanye ka Mfumwetu Yesu Kidishitu ka ku būmi bwa nyeke.”—YUDE 21.

1, 2. Lelo Yehova i mulombole namani amba wituswele, ne tubayuka namani amba ketulamangapo kilamelame mu buswe bwandi?

 YEHOVA LEZA ulombolanga mu miswelo mivule amba wituswele. Ne kutatana kwine mpika, kitapwa kya kikūlwa i kilomboji kikatampe kya buswe bwituswele Yehova. Buswe bwa Yehova ku bantu bonso i bukatampe mpata, bwāmufikije ne ku kutuma wandi Mwana muswedibwe pano pa ntanda, amba afwe pangala petu. (Yoa. 3:16) Yehova wālongele kino mwanda usaka twikale na būmi bwa nyeke, ne kadi witusakila tumwene nyeke mu buswe bwandi!

² Ino, lelo ko kunena’mba Yehova uketulama kilamelame mu buswe bwandi nansha shi tulonga bintu bya muswelo’ka? Mhm. Mwanda tulombolwa mu Yude vese 21, amba: “Mwilamei monka mu [buswe bwa] Leza, ne kutengela kanye ka Mfumwetu Yesu Kidishitu ka ku būmi bwa nyeke.” Bino bishima “mwilamei monka mu [buswe bwa] Leza” bilombola’mba netu tufwaninwe kulonga’po kintu kampanda. Le penepa, i bika byotufwaninwe kulonga kusaka’mba twilame nyeke mu buswe bwa Leza?

Le Tukelama mu Buswe bwa Leza Namani?

3. Mungya byānene Yesu, i bika byādi na mvubu kwadi pa kusaka kwikala mu buswe bwa Shandi?

³ Tutana malondololo ku kino kipangujo mu binenwa byānenene Yesu mu bufuku bwa mfulo ya būmi bwandi pano pa ntanda. Wānenene  amba: “Shi kadi mulame bijila byami nabya mukēkalanga mu [buswe bwami] monka mo nalamina ami bijila bya Tata, ne pano ngikele mu [buswe bwandi].” (Yoa. 15:10) Bine, Yesu wāmwene amba kulama bijila bya Yehova kyo kintu kya mvubu kutabuka pa kwikala na Shandi mu kipwano nyeke. Ebiya, shi Mwana Leza, mwine wādi muntu mubwaninine wādi na uno mumweno, lelo batwe ke pepi?

4, 5. (a) Lelo i muswelo’ka umbajinji otukokeja kulomba’mba tuswele Yehova? (b) Mwanda waka ketudipo na bubinga bwa kupelela kukōkela bijila bya Yehova?

⁴ Dibajinji, tukalombola’mba tuswele Yehova na kumukōkela. Mutumibwa Yoano wālombwele’kyo uno muswelo, amba: “Ke-luntu luno namino lo lusa lwa Leza, lwa’mba tulame bijila byandi, kadi bijila byandi kebikolengapo, mhm.” (1 Yoa. 5:3) Shako na bubine, bantu bavule mu ntanda ya dyalelo kebasakangapo kukōkela. Ta mutyima ku bino binenwa bya amba: “Bijila byandi kebikolengapo.” Yehova ketunenangapo kulonga bintu bikomo kutabuka.

⁵ Tulete kimfwa: Lelo ukokeja kunena mulunda nobe wa pa mutyima kusela kintu kyoyukididile amba kabwanyapo kwikitekuna? Mhm, nansha dimo! Ebiya, Yehova udi na kanye kutabuka ne batwe bene, ne kadi uyukile ne mikalo yetu. Bible witukulupija amba Yehova ‘uyūkile amba twi luvumbi.’ (Mit. 103:14) Kabwanyapo kwitunena tulonge bintu byoketubwanyapo kashā. O mwanda ketudipo na bubinga bwa kupelela kukōkela ku bijila bya Yehova. Inoko, tusangelanga kukōkela—mwanda uno i mukenga muyampe wa kulombola Tata wetu wa mūlu amba bine tumuswele ne tusaka kwilama mu buswe bwandi.

Kyabuntu kya pa Bula Kitupele Yehova

6, 7. (a) Lelo mutyima wa mundamunda i bika? (b) Leta kimfwa kilombola mukokejija kwitukwasha mutyima wa mundamunda twilame mu buswe bwa Leza.

⁶ Mu ino ntanda mikolakane motushikete, tufwaninwe kukwata butyibi buvule bwitulomba kukōkela Leza. Ino le tukayuka namani amba butyibi bwetu i bukwatañane na kiswa-mutyima kya Leza? Yehova i mwitupe kyabuntu kibwanya kwitukwasha bininge pa kumukōkela. I mutyima wa mundamunda. Lelo mutyima wa mundamunda mwine i bika? I muswelo wa pa bula ukwashanga muntu kwiyuka aye mwine. Wingilanga pamo bwa mutyibi munda mwa muntu, witukwashanga kutonga bya kulonga umbūmi bwetu ne kulangulukila pa bilongwa byotulongele kala, kumona shi i biyampe’ni nansha i bibi, byoloke nansha bilube.—Tanga Loma 2:14, 15.

⁷ Lelo i muswelo’ka otubwanya kwingidija senene mutyima wetu wa mundamunda? Tulete’po kimfwa. Langa muntu umo wenda utyibulula mu ntanda mutuputupu. Kemudipo nkoka, mashinda, nansha biyukeno bilombola kwa kwenda. Inoko, wenda’nka kwenda. Le wenda’byo namani? Udi na kingidilwa kimo kitwa bu boussole (busole). Kikalanga na tabulo bwa nsaa palembe mitamba iná [kutunduka, kushika, kungala ne kunshi], ne kadi ikalanga na mukuki wa nzembwe ujokoloka wikalanga ufunka enka kungala. Wivwane uno ñenda abulwe busole, nabya ukokeja kujimina. Muswelo umo onka, shi muntu kādipo na mutyima wa mundamunda, wadi wa kujimina mu milangwe pa kutonga mwikadila muyampe, kuyuka biyampe nansha bibi, ne byobya byoloke umbūmi.

8, 9. (a) I mikalo’ka idi na mutyima wetu wa mundamunda otufwaninwe kulama mu ñeni? (b) Le i bika byotufwaninwe kubandaula pa kuyuka shi mutyima wetu wa mundamunda witukwashanga?

⁸ Pamo bwa busole, mutyima wa mundamunda nao udi na mikalo. Shi uno ñenda afwenye nzembwe kubwipi na busole, nabya mukuki ukafunka kungi bu kungala. Mu muswelo umo onka, shi tutangidije bilokoloko bya mutyima wetu kutabuka, le tukafula kwepi? Bilokoloko byetu bya ngitu bikokeja kunyengakanya mutyima wetu wa mundamunda. Bible witudyumuna amba “mutyima utabukile bintu byonsololo budimbañani, ubela byamwikomwiko’tu.” (Yel. 17:9; Nk. 4:23) Ne kadi, shi uno ñenda kadipo kalata ka dishinda ka bine, busole bwandi kebusapo kumukwasha ku kintu nansha kimo. Mo monka,  shiketweyaminepo ku buludiki bwa bine bwampikwa kwalamuka buleta Bible, Kinenwa kya Leza, nabya mutyima wetu wa mundamunda keukengilapo senene. (Mit. 119:105) Ino i bya bulanda, mwanda bantu bavule mu ino ntanda batangidijanga byampikwa kwendela’mo bilokoloko bya mutyima wabo ne kuta mutyima bikatampe mpika ku misoñanya ya mu Kinenwa kya Leza. (Tanga Efisesa 4:17-19.) O mwanda, bantu bavule kutabuka baloñanga bintu bibi bya malwa nansha byo badi na mutyima wa mundamunda.—1 Tem. 4:2.

⁹ Batwe’ko, tufwaninwe kusumininwa kubulwa kwikala pamo bwa abo! Inoko, tuleke Kinenwa kya Leza kifundije ne kwibidija mutyima wetu wa mundamunda kusaka’mba witukwashe bya binebine. Kadi tufwaninwe kuteja mutyima wetu wa mundamunda mufundijibwe na Bible pa kyaba kya kwiuleka ulēmenenwe na bilokoloko bya ngitu yetu. Ne kabidi, tufwaninwe kulonga buninge bwa kulēmeka mutyima wa mundamunda wa banabetu baswe ba ku mushipiditu. Tuloñanga bukomo bwetu bonso kutyina kwibakukaja, ne kuyuka’mba mutyima wa mundamunda wa banabetu ubwanya kutenekwa nansha kutuna kupita ne wetu mwine.—1 Kod. 8:12; 2 Kod. 4:2; 1 Pet. 3:16.

10. Le i miswelo’ka isatu ya umbūmi yotusa kwisambila’po pano?

¹⁰ Pano tubandaulei miswelo isatu ya umbūmi motukokeja kulombola’mba tuswele Yehova na kumukōkela. Na bubine, mu ino miswelo yonso mulomba kwingidija mutyima wa mundamunda, nao bidi ufwaninwe kuludikwa kutabukididila na misoñanya ya mu Bible ya ku bukomo bwa mushipiditu itala mwiendelejo. Miswelo isatu mine ya mwa kulombwela amba tukōkele Yehova ne kumuswa i ino: (1) Kuswa boba bobaswele kudi Yehova, (2) Kulēmeka lupusa, ne (3) Kulonga buninge bwa kushala batōka ku meso a Leza.

Swa Boba Bobaswele Kudi Yehova

11. Mwanda waka tufwaninwe kuswa boba bobaswele kudi Yehova?

¹¹ Dibajinji, tufwaninwe kuswa boba bobaswele  kudi Yehova. Pa mwanda utala balunda, bantu badingakene pamo na kikenda-mbaya. Twikalanga na mutyima wa kukokela kotudi byonso bitujokolokele. Umpangi wetu uyukile biyampe amba balunda babwanya kuleta kyaka—nansha kukwasha—ku bantu bampikwa kubwaninina. O mwanda witupa ano madingi a tunangu, amba: “Nanga ne bantu bañeni, nobe ukekala wañeni: Ino umpwani wa bivila ukamona malwa.” (Nk. 13:20; 1 Kod. 15:33) Potudi pano, i kutupu nansha umo usakanga ‘kumona malwa.’ Inoko tusakanga ‘kwikala bañeni.’ Yehova kabwanyapo kupebwa ñeni na muntu, monka mwa kabwaninyapo konwa na ngikadilo ya muntu. Inoko, i mwitupe kimfwa kilumbuluke pa bitala balunda. Langila—ku bantu bampikwa kubwaninina, Yehova utoñanga bantu ba muswelo’ka bu balunda nandi?

12. Le Yehova utoñanga balunda ba muswelo’ka?

¹² Yehova wāityile mukulutuba Abalahama amba: “Mulunda nami.” (Is. 41:8) Bine uno muntu wādi wa binebine, moloke kadi wa kikōkeji—muntu wa lwitabijo. (Yak. 2:21-23) Yehova utoñanga balunda ba uno muswelo. Ne dyalelo dine, ukipwananga’nka na bantu ba uno muswelo. Shi Yehova mwine utoñanga balunda badi namino, mwene batwe netu tufwaninwe kutonga balunda bayampe, amba tunange na bañeni ne kwikala bañeni?

13. I bika biketukwasha tutonge balunda bayampe?

¹³ I bika bikakukwasha kutonga balunda bayampe? Kwifunda bimfwa bidi mu Bible kukakukwasha pa kino. Tala kimfwa bulunda bwāsambile ba Luta ne muko wandi Naomi, bwa ba Davida ne Yonafane, nansha ke bwa Temote ne Polo. (Luta 1:16, 17; 1 Sam. 23:16-18; Fid. 2:19-22) Buno bulunda bwādi bwimanine pa kintu kimo kikatampe: Buswe bwa binebine bobādi baswele Yehova. Lelo nobe ubwanya kupwana na bantu baswele Yehova pamo na momuswidile? Kulupila’mba mu kipwilo kya Bwine Kidishitu ye mobwanya kutana balunda bavule ba uno muswelo. Bano balunda kebakakufikijapo ku kumona malwa ku mushipiditu. Inoko, bakakukwasha ukōkele Yehova, utame ku mushipiditu, ne kukuna ku mushipiditu. (Tanga Ngalatea 6:7, 8.) Bakakukwasha ushale mu buswe bwa Leza.

Lēmeka Lupusa

14. I bintu’ka bilengejanga tukomenwe kulēmeka lupusa kyaba kimo?

¹⁴ Muswelo wa bubidi otulombolanga’mba tuswile Yehova utala lupusa. Tufwaninwe kulēmeka lupusa. Mwanda waka bitukomenanga kyaba kimo kulēmeka lupusa? Bubinga bumo bidi, i pa mwanda bantu bene bapelwe lupusa i bampikwa kubwaninina. Kadi, ne batwe bene twi bampikwa kubwaninina. Tulwanga na kibutwila kya kupela kukōkela.

15, 16. (a) Mwanda waka i kya kamweno kotudi kulēmeka boba bapelwe na Yehova kiselwa kya kutala bantu bandi? (b) Le i ñeni’ka ya kamweno yotuboila ku muswelo wāmwene Yehova butomboki bwa Bene Isalela bātombokēle Mosesa?

¹⁵ Padi ubwanya kwiipangula’mba, ‘Nansha shi tukolelwanga pa kukōkela lupusa, ino mwanda waka tufwaninwe kukōkela?’ Malondololo atala mwanda wa bubikadi. Lelo i ani okatonga kwikala bu mubikadi obe, nansha bu mulopwe obe? Shi tubatonge Yehova bu Mulopwe wetu, tufwaninwe kulēmeka lupusa lwandi. Ino shi ketukōkelepo, lelo tufwaninwe kumwita binebine bu Mubikadi wetu? Pakwabo napo, Yehova wingidijanga lupusa lwandi kupityila ku bantu bampikwa kubwaninina bapele kiselwa kya kutala bantu bandi. Shi tutombokela bano bantu, lelo Yehova ukamona namani bilongwa byetu?—Tanga 1 Tesalonika 5:12, 13.

¹⁶ Kimfwa, pēuningile Bene Isalela ne kutombokela Mosesa, Yehova wāmwene bu i aye obatombokela ne obeuningila. (Umb. 14:26, 27) Leza kashintangapo. Bine, wivwane tutombokela boba bapele lupusa, nabya i aye mwine otutombokela!

17. Le tufwaninwe kwikala na mumweno’ka pa boba bapelwe lupusa mu kipwilo?

¹⁷ Mutumibwa Polo ulombola ngikadilo yotufwaninwe kutamija pa bitala boba bapelwe biselwa mu kipwilo kya Bwine Kidishitu. Wāsonekele amba: “Kadi kōkelai boba bemulelele, ne kwibakōkelelela; ke-bantu abo batengele ponka pa mityima yenu, pamo bwa boba bakapitamo mu bukalama bwabo, amba balonge kino’ki ne tusepo, ne kukālala mpika, ke-kintu kino namino bānwe kemukamwenamopo kantu, mhm.” (Bah. 13:17) Kunena na  bubine,bilomba kulonga bukomo pa kutamija mushipiditu wa kikōkeji ne kukōkelelela. Vuluka’mba, tuloñanga buninge mwanda wa kushala nyeke mu buswe bwa Leza. Mwene kulondalonda kino kitungo kudi bine na kamweno?

Tushalei Batōka ku Meso a Yehova

18. Mwanda waka Yehova usaka tushale batōka?

¹⁸ Muswelo wa busatu wa kulombola’mba tuswele Yehova i kulonga buninge bwa kushala batōka ku meso andi. Pavule bambutwile bengilanga bikatampe pa kusaka’mba babo bana bekale bampikwa biko. Mwanda waka? Dibajinji bidi, bukundwe bukwashanga mwana ekale mukomo. Ne kadi, shi mwana kadipo na biko, kino kimwekeja patōka ngikadilo ya kyabo kisaka, ne amba bambutwile bandi bamuswele ne kumuta mutyima. O mwanda mwine, Yehova usakanga twikale bampikwa biko. I muyuke amba bukundwe i bwa mvubu pa kwikala bakomo senene. Kadi uyukile amba bukundwe bwetu bumuletelanga ntumbo, aye mwine Tata wa mūlu. Budi na mvubu mikatampe, mwanda bantu babwanya kuvundamukila kudi Leza otwingidila, pa kumona’mba twibeshile na bibumbo bya bantu mu ino ntanda ya disubi.

19. Le i kika kilombola’mba butōki bwa ku ngitu budi na mvubu?

¹⁹ Lelo i mu ngikadila’ka motufwaninwe kushala batōka? Na bubine, i mu ngikadilo yonso. Mu Isalela wa kala, Yehova wālombwele bantu bandi patōkelela amba butōki bwa ku ngitu budi na mvubu. (Levi 15:31) Mukanda wa Bijila wa Mosesa wādi wīsambila pa ino myanda, kimfwa mpangiko ya kukola bityibu, kukenda bingidilwa, koya ku makasa, ku maulu, ne kukenda bivwalwa. (Div. 30:17-21; Levi 11:32; Umb. 19:17-20; Kup. 23:13, 14) Bene Isalela bādi bafwaninwe kuvuluka’mba Yehova, Leza wabo, i ujila—ko kunena’mba, “utōka,” “wampikwa kiko,” kadi “ukola.” Bengidi ba uno Leza ujila bafwaninwe nabo kwikala bajila.—Tanga Bene Levi 11:44, 45.

20. Lelo tufwaninwe kwikala batōka mu bika ne bika?

²⁰ Nanshi, tufwaninwe kwikala batōka munda ne panja pene. Tuloñanga bukomo bwa kulama ñeni yetu itōka. Tulondanga na kikōkeji misoñanya itala butōki bwa mu ngikadilo, nansha ino ntanda yotudi’mo byoyenda yoneka na busekese. Ne kintu kya mvubu kutabuka, tufwaninwe kulama mutōtelo wetu utōka, ne kupela kwisubija na mutōtelo wa bubela o-onso. Tuvulukanga nyeke kidyumu kya ku bukomo bwa mushipiditu kidi mu Isaya 52:11, kinena’mba: “Talukai, talukai, tambai papo, kemukitengai kintu kya disubi, nansha kimo kine; tambaimo umbukata mwakyo; mwikale batōka to-o.” Dyalelo nadyo, tushalanga batōka ku mushipiditu na kupela kutenga kyonso kitela Tata wetu wa mūlu amba i kya disubi mu butōtyi. O mwanda mwine, kimfwa tupelanga kusoba masobo a bipwilo ne mafuku a bwine ntanda asobanga bantu bavule mu ntanda ya dyalelo. Bine, i bikomo mpata kushala batōka. Inoko bantu ba Yehova baloñanga buninge bwa kushala batōka, mwanda kulonga namino kwibakwashanga belame mu buswe bwa Leza.

21. I muswelo’ka otubwanya kwikala na kikulupiji kya kwilama mu buswe bwa Leza?

²¹ Yehova usaka twilame nyeke mu buswe bwandi. Inoko, batwe bonso tufwaninwe kulonga bukomo bwetu bonso mwanda wa kwilama mu buswe bwa Leza. Shi tulonge nabya, tukalonda kimfwa kya Yesu ne kulombola amba tuswele Yehova na kulama bijila byandi. Shi tulonga namino, tukakulupila amba i kutupu kintu nansha kimo “shi kika, shi kika, kikamona mwakwitukalañanya ne lusa lwa Leza, ludi mudi Kidishitu Yesu Mfumwetu.”—Loma 8:38, 39.

Lelo Ubavuluka?

• Lelo mutyima wetu wa mundamunda ukokeja kwitukwasha namani twilame mu buswe bwa Leza?

• Mwanda waka tufwaninwe kuswa boba bobaswele kudi Yehova?

• Mwanda waka kulēmeka lupusa kudi na mvubu?

• Lelo butōki budi na kamweno’ka ku bantu ba Leza?

[Bipangujo bya Kifundwa]

[Kapango/Kifwatulo pa paje 28]

KITABO KIKWASHA KULETA MWIENDELEJO MUYAMPE

Ku kitango kya distrike 2008/2009, kwalupwilwe kitabo kya mapaje 224 kinena’mba ‘Mwilamei mu Buswe bwa Leza.’ Le kino kitabo kipya kidi na kitungo’ka? I kilupwilwe mwanda wa kukwasha Bene Kidishitu bayuke ne kuswa misoñanya ya Yehova, kimanine nakampata pa mwiendelejo wa Bwine Kidishitu. Kwifunda na katentekeji kitabo ‘Mwilamei mu Buswe bwa Leza’ kekukabulwepo kubaija kikulupiji kyetu amba kwikala na būmi bukwatañane na misoñanya ya Leza dyo dishinda dilumbuluke, kadi ditwala ku būmi bwa nyeke kumeso’ku.

Ne kabidi, kino kitabo i kilupwilwe mwanda wa kwitukwasha tumone amba kukōkela Yehova ke kiselwapo kilēma. Inoko, i muswelo wa kulombola Yehova amba tumuswele bikatampe. Nanshi, kino kitabo kiketutonona twiipangule amba, ‘Mwanda waka nkōkele Yehova?’

Kitatyi kiloñanga bantu kilubo kikatampe kya kuleka kuswa Yehova, pavule pene, i pa mwanda utala mwiendelejo, kekikelepo kilubo kya mu bufundiji. O mwanda nanshi, i kya mvubu kutabuka tukomeje buswe bwetu ne kusangela bijila ne misoñanya ya Yehova byendelele kwituludika mu būmi bwetu bwa mobukila mobukila! Bine, tusaka kino kitabo kipya kikwashe mikōko ya Yehova ntanda yonso imanije nshinkidingi mu kulonga byoloke, ne kujingulula Satana bu mbepai, ne kupityidila bashale nyeke mu buswe bwa Leza!—Yude 21.