“Ritreuru e Hera mar Nyasaye”

“Ritreuru e hera mar Nyasaye, kukiyo miwafu mar Ruodhwa Yesu Kristo nyaka uchopi e ngima manyaka chieng’.”​—JUDA 21.

1, 2. Ere kaka Jehova osenyisowa herane, to wang’eyo nade ni wan bende onego wakaw okang’?

JEHOVA NYASAYE osenyisowa herane e yore mang’eny. Kata kamano, onge kiawa ni yo maduong’ moloyo ma Jehova osenyisowa godo ni oherowa en kuom misango mar rawar ma nochiwo. Hera mohero godo dhano, duong’ ahinya mi mano nomiyo ooro Wuode mohero e pinyka mondo otho nikech wan. (Joh. 3:​16) Jehova notimo kamano nikech nodwaro mondo wadag nyaka chieng’, kendo mondo wayud gweth kuom herane nyaka chieng’!

² Kata kamano, be onego wapar apara ni Jehova biro ritowa e herane, maok odewo ni wan to wayiero mar timo ang’o? Ooyo. Nimar e bug Juda kwan matindo 21, wasomo weche majiwowa niya: “Ritreuru e hera mar Nyasaye, kukiyo miwafu mar Ruodhwa Yesu Kristo nyaka uchopi e ngima manyaka chieng’.” Wacho ni “ritreuru e hera mar Nyasaye” nyiso ni nitie okang’ ma wan bende dwarore wakaw. Kare gin ang’o monego watim eka mondo waritre e hera mar Nyasaye?

Wanyalo Ritore Nade e Hera mar Nyasaye?

3. En ang’o ma Yesu nowacho ni dwarore mondo en owuon otim mondo eka osiki e hera mar Wuon mare?

³ Wanyalo yudo dwoko mar penjono e weche ma Yesu owuon nowacho, e otieno mare mogik kaka dhano e pinyka. Nowacho niya:  “Kumako chikna, unusik e herana, kaka an bende amako chik Wuora, kendo asiko e herane.” (Joh. 15:10) Mana kaka ndikoni nyiso, Yesu noneno ni mako chike Jehova ne dwarore ahinya eka mondo ng’ato obed gi winjruok maber gi Wuon mare. Koro, ka timo kamano ne dwarore kuom Wuod Nyasaye ma ne en jal ma onge richo, to nade wan?

4, 5. (a) Yo mokwongo mwanyalo nyiso godo ni wahero Jehova en mane? (b) Ang’o momiyo ok onego watamre mako chike Jehova?

⁴ Mokwongo tiktik, wanyiso ni wahero Jehova, kuom mako chikne. Jaote Johana noketo wachno kama: “Hero Nyasaye en mako chikne, to chikne ok tek.” (1 Joh. 5:3) En adier ni e piny masani, ji mang’eny ok ohero luwo kata mako chike. Kata kamano, ne ane ni ndikono wacho kama: “To chikne ok tek.” Jehova ok nyiswa ni mondo watim gima tek mong’eyo ni ok wanyal timo.

⁵ Kuom ranyisi: Be inyalo miyo osiepni mihero mondo oting’ni gima pek ming’eyo ni ok onyal ting’o? Ooyo ngang’! Jehova to nyiso ng’wono moloyowa, kendo ong’eyo maber nyawowa. Muma singonwa ni Jehova ong’eyo kendo ‘oparowa ni wan buch lowo.’ (Zab. 103:14) Ok onyal nyisowa mondo watim gik maok nyalrenwa. Omiyo, ok onego watamre mako chike Jehova. To mopogore gi mano, wamako chike Jehova nikech timo kamano miyowa thuolo majaber mar nyiso Wuonwa me polo ni wahere gadier kendo ni wadwaro siko e hera mare.

Mich Makende Mowuok Kuom Jehova

6, 7. (a) Chuny ma iye en ang’o? (b) Chiw ane ranyisi kaka chuny ma iye nyalo konyowa siko e hera mar Nyasaye.

⁶ E piny mwadakie ma kore tekni, paro mang’eny mwang’ado dwaro ni pod wanyis ni waluwo chike Nyasaye. Ere kaka wanyalo bedo gadier ni paro mwang’ado luwore kod dwaro mar Nyasaye? Jehova osemiyowa mich manyalo konyowa ahinya kuom wachni. Michno en chunywa ma iye. Chunywa ma iyeno en ang’o? En nyalo ma dhano nigodo mar ng’eyore en owuon. Chunywa ma iyeno, ema bedo kaka jang’adnwa bura, kokonyowa nono gik mwayiero timo e ngima, koda nono e yo matut kabe gik mwasetimogo gin gik mabeyo koso maricho, makare kata maok kare.​—Som Jo Rumi 2:​14, 15.

⁷ Ere kaka wanyalo tiyo gi chunywa ma iyeno e yo maber? We wanon ane ranyisi moro. Jal moro ni e wuoth matere kuma bor ahinya gotieno. Mudhono ok mi one kama onego onyon, kata neno wang’a yo, kata ranyisi moro amora e bath ndara. Kata kamano, pod owuotho kochomo kama odhiye. Ang’o makonye? En kod toch. Ka oonge gi toch, onyalo lal ahinya. Kamano bende, dhano ma chunye ma iye ok ti, nyalo lal seche motemo yiero gik monego otim e ngimane.

8, 9. (a) Gin ang’o monego wang’e kuom wach chunywa ma iye? (b) Ang’o mwanyalo timo mondo wane ni chunywa ma iye konyowa kaka dwarore?

⁸ Mana kaka toch, chuny ma iye nigi kuonde moremie. Kapo ni jal ma ne odhi e wuothcha ok noketo betri mabeyo, ler mar toch ok diwuogi kaka dwarore. Kamano bende, kapo ni waketo pachwa duto e luwo gombowa, ang’o manyalo timore? Gombowa maricho nyalo mono chunywa ma iye tiyo maber. Muma siemowa ni “chuny dhano otimo wuond motamore nono, en gi tuwoche mang’eny: ng’ano manyalo ng’eye.” (Yer. 17:9; Nge. 4:​23) E wi mano, kapo ni jal ma ne dhi e wuothcha ok ne nigi gima konye ng’eyo yo, kata mana toch moting’ono ok ne nyal konye ahinya. Kamano bende, ka ok watiyo gi Muma ma en Wach Nyasaye migeno kendo matayowa gadier, chunywa ma iye nyalo bedo ka nono. (Zab. 119:105) Gima lit en ni thoth ji e pinyni, luwo gombo manie chunygi ahinya moloyo keto pachgi kuom chike manie Wach Nyasaye. (Som Jo Efeso 4:​17-​19.) Mano emomiyo ji mang’eny, kata obedo ni ne omigi chuny ma iye, pod timo gik maricho ahinya.​—1 Tim. 4:2.

⁹ Onego watem ahinya mondo kik wabed  kamano! Dwarore wawe Wach Nyasaye opuonjwa kendo otieg chunywa ma iye, eka mondo obed gima dikonywa gadier. Onego wawinj gima chunywa ma iye mosetieg kod Muma wacho, moloyo weyo mondo gombo maricho olo chunywa. Bende, ok onego wacha chuny ma iye mar owete koda nyiminewa ma gin joma wahero ahinya. Watimo duto mwanyalo mondo kik wachwanygi, ka wang’eyo bende ni chuny ma iye mar owetewa koda nyiminewa mamoko, nyalo bedo ni chwanyore mapiyo maloyo magwa.​—1 Kor. 8:​12; 2 Kor. 4:2; 1 Pet. 3:​16.

10. Gin yore mage adek mag ngima makoro wadwaro nono?

¹⁰ Koro weuru wane ane yore adek mag ngima, mwanyalo nyiso godo herawa ne Jehova kokalo kuom winjo kendo mako chikene. E wi moro ka moro kuom yorego, chunywa ma iye nyalo konyowa, to mokwongo nyaka tiege gi Muma ma ema oting’o chike mondik kuom much Nyasaye monego ota timbewa. Yore adekgo mwanyalo nyiso godo ni wahero Jehova gin: (1) Hero jogo ma Jehova ohero, (2) chiwo luor ne jogo moket mondo otawa, koda (3) timo kinda mondo wasiki ka waler e wang’ Nyasaye.

Her Jogo ma Jehova Ohero

11. Ang’o momiyo onego waher jogo ma Jehova ohero?

¹¹ Mokwongo, nyaka waher jogo ma Jehova ohero. Kodok korka wach osiepe, ji chalo kaka sponj. Mana kaka sponj, wathoro ywayo paro kata timbe osiepe ma olworowa. Jachwechwa ong’eyo maber kaka osiepe nyalo hinyowa kata konyowa​—wan kaka dhano monyuol e richo. Kuom mano, omiyowa puonj mariek niya: “Ng’a mawuotho kod jo mariek nobedi mariek; to ng’a ma wadgi jo mofuwo none chandruok.” (Nge. 13:20; 1 Kor. 15:33) Onge ng’ato kuomwa manyalo hero ‘neno chandruok.’ Ng’ato ka ng’ato kuomwa dwaro ‘bedo mariek.’ Onge ng’ama nyalo medo ne Jehova rieko, kata ketho rieko ma en godo. Kata  kamano, oketonwa ranyisi ma jaber kodok korka wach osiepe. Pare ane wachni​—gin dhano machalo nade ma Jehova yiero mondo obed osiepene?

12. Gin osiepe machalo nade ma Jehova yiero?

¹² Jehova noluongo Ibrahim ni “osiepna.” (Isa. 41:8) Jalni noketo ranyisi maber ahinya kuom chung’ motegno, kuom luwo tim makare kendo mako chike Nyasaye kaka dwarore​—omiyo ne en jal ma nigi yie miwuoro. (Jak. 2:​21-​23) Mago e joma Jehova yiero kaka osiepene. Omako osiep gi joma kamago ndalogi. Ka Jehova yiero osiepe machalo kamago, donge en gima dwarore ahinya mondo wan bende wayier osiepewa e yo maber, mondo wawuothi gi osiepe mariek eka wan bende wabed jo mariek?

13. Kodok korka wach yiero osiepe, ang’o manyalo konyowa yiero osiepe mabeyo?

¹³ Ang’o manyalo konyi mondo iyier osiepe mabeyo? Puonjruok ranyisi manie Muma nyalo konyi. Par ane hera ma ne nitie e kind Naomi kod Ruth chi wuode, hera ma ne nitie e kind Daudi kod Jonathan, koda ma ne nitie e kind Timotheo kod Paulo. (Ruth 1:​16, 17; 1 Sam. 23:16-​18; Fili. 2:​19-​22) Osiep ma ne nitie e kind jogi, nobedo motegno nikech gimoro achiel maduong’ maloyo mamoko: Ne gin osiep ma mise margi notenore kuom hero Jehova. Be inyalo yudo osiepe mohero Jehova mana kaka in bende ihere? Bed gadier ni kanyakla mar Jokristo opong’ gi osiepe machalo kamano. Osiepe ma kamago ok bi miyo iketh winjruok manie kindi gi Jehova. Kar mano, gibiro konyi winjo Jehova, timo dongruok e winjruok mari kode, kendo konyi timo gik moko e yo manyiso ni ichwoyo kuom roho. (Som Jo Galatia 6:​7, 8.) Gibiro konyi siko e hera mar Nyasaye.

Chiw Luor ne Jogo Moket Mondo Otawa

14. Gin ang’o mamiyo seche moko ok yot chiwo luor ne joma tayowa?

¹⁴ Yo machielo mwanyalo nyiso godo ni wahero Jehova en chiwo luor ne jogo moket e migepe mag tayowa. Nyaka wami joma tayowa luor. Ang’o momiyo timo kamano ok yot seche moko? Mokwongo, en nikech joma tayowago gin dhano morem. E wi mano, wan wawegi bende warem. Wakedo gi kido ma ne onyuolwago mar ng’anjo.

15, 16. (a) Ang’o momiyo dwarore ahinya mondo wanyis luor ne jogo ma Jehova omiyo migawo mar tayo joge? (b) Puonj mane maduong’ mwayudo kuom kaka Jehova ne oneno ng’anjo ma Jo-Israel notimo ne Musa?

¹⁵ Kuom mano, inyalo penjri ni, ‘Ka miyo joma nigi migepe mag tayowa luor ok en gima yot, to kare ang’o momiyo onego watim kamano?’ Dwoko otenore kuom ng’eyo jal ma nigi ratiro mar locho e wi gik moko duto e polo gi piny. En ng’ano mibiro yiero kaka jalno ma nigi ratiro mar bedo jaloch mari? Ka wayiero Jehova kaka Jalochwa, dwarore wachiw luor ne jogo moketo mondo otawa. Ka ok watim kamano, be wanyalo wacho gadier ni en e Jalochwa? E wi mano, ber ng’eyo ni, kinde mang’eny Jehova locho kokalo kuom dhano morem, ma omiyo migawo mar rito joge. Kapo ni wanyalo ng’anjo ne dhano moketogo, Jehova nyalo neno nade timbewago?​—Som 1 Jo Thessalonika 5:​12, 13.

¹⁶ Kuom ranyisi, kane Jo-Israel ochako ng’ur kendo ng’anjo ne Musa, Jehova ne oneno ni en owuon ema ne jogo ng’anjone. (Kwan 14:26, 27) Nyasaye podi ok olokore. Kapo ni wanyalo ng’anjo ne jogo moketo e migepe mag tayowa, mano nyalo nyiso ni en ema wang’anjone!

17. En paro mane makare monego watim kinda mar bedogo kuom jogo ma nigi migepe mag tayo kanyakla?

¹⁷ Jaote Paulo konyowa ng’eyo paro makare monego wabedgo kuom jogo ma nigi migepe mag tayo kanyakla mar Jokristo. Nondiko niya: “Winjuru jotendu, kendo migiuru duong’; nikech girito chunyu ma ok giyue, kaka jo ma biro dwoko wach kuom tich ma gisetiyonu. To tichgi mondo gitim gi mor, ok ka gijurgo, nimar mano ok dikonyu.” (Hib. 13:17) En adier  ni dwarore watim kinda ahinya mondo wanyag chuny ma kamano mawinjo wach kendo manyiso bolruok. Kata kamano, ber mondo wang’e ni gima duong’ ma walawo en siko e hera mar Nyasaye. Donge mano en gima owinjore walaw gi kinda?

Siki Kiler e Wang’ Jehova

18. Ang’o momiyo Jehova dwaro ni mondo wasiki ka waler?

¹⁸ Yo mar adek mwanyiso godo ni wahero Jehova en ni watimo kinda ahinya mondo wasiki ka waler e wang’e. Kinde mang’eny jonyuol timo matek mondo gine ni nyithindgi ler. Nikech ang’o? En nikech ler en gima dwarore e rito ngima nyathi kik yud tuoche. E wi mano, nyathi maler kelo nying’ maber ne joodgi, nimar lerne nyiso ni kare jonyuolne ohere kendo ok ojwang’e. E yo machalo kamano, Jehova bende dwaro ni mondo wabed joma ler. Ong’eyo ni ler en gima dwarore mondo warit ngimawa. Bende ong’eyo ni ler marwa kelone nying’ maber, en kaka Wuonwa me polo. Mani en gima dwarore ahinya nimar ji nyalo biro ir Nyasaye nikech gineno kaka wapogore gi jopiny maok ohero ler.

19. Wang’eyo nade ni rito ler mar ringruok en gima dwarore ahinya?

¹⁹ Gin yore mage madwarore ni wasikie ka waler? Kuom adier, ler en gima dwarore e kit ngimawa duto. E Israel machon, Jehova noketo ratiro ne joge ni, rito ler mar ringruok ne en gima dwarore ahinya. (Lawi 15:31) Chik Musa noriwo koda chike manyiso kaka onego owit yugi, lwoko gik mitiyogo, logo, lwoko tielo koda lewini. (Wuok 30:17-​21; Lawi 11:32; Kwan 19:17-​20; Rapar 23:13, 14) Ne iparo ne oganda Jo-Israel ni Jehova Nyasachgi en Nyasaye maler chuth. Jogo matiyo ne Nyasaye maler bende onego obed joma ler.​—Som Tim Jo-Lawi 11:44, 45.

20. Gin yore mage monego wasikie ka waler?

²⁰ Kuom mano, dwarore wabed joma ler ei chunywa koda e ringrewa. Watemo mondo kinde duto wabed gi paro maler. Wamakore chutho gi chike Jehova kuom wach timbe maler, mopogore gi piny molworowa mopong’ gi timbe mochido mag nindruok. To maduong’ moloyo, watimo matek ahinya mondo warit lamo marwa osiki kaler, maok wakik lamowa gi lamo mag miriambo. Kinde duto waketo e pachwa siem ma ne ondiki kuom much Nyasaye ei bug Isaiah 52:11 mawacho kama: ‘Ae uru, ae uru dhiuru ua ka, kik umul gimoro mak ler; dhiuru ua kuome, beduru maler.’ E kindegi, warito winjruokwa gi Jehova osiki ka ler kuom kwedo maok wamul gigo ma Wuonwa me polo wacho ni ochido korka wach lamo. Kuom ranyisi, mano e momiyo wakwedo chuth nyasi mag dinde ma miriambo kaachiel gi odiechienge ma ji ohero timoe nyasi mag rapar e piny masani. En adier ni rito ler ok en gima yot. Kata kamano, oganda Jehova timo duto ma ginyalo, nikech mano konyogi siko e hera mar Nyasaye.

21. Ere kaka wanyalo bedo gadier ni wabiro siko e hera mar Nyasaye?

²¹ Jehova dwaro mondo wasiki e hera mare nyaka chieng’. Kata kamano, waduto ng’ato ka ng’ato onego wane ni watimo duto mwanyalo mondo wasiki e hera mar Nyasaye. Wanyalo timo kamano kuom luwo ranyisi mar Yesu, kendo nyiso ni wahero Jehova ka warito kendo mako chikene. Ka watimo kamano, wabiro bedo gadier ni onge gimoro amora manyalo “pogowa gi hera mar Nyasaye moherowago e Kristo Yesu Ruodhwa.”​—Rumi 8:​38, 39.

Be Inyalo Iparo?

• Chunywa ma iye nyalo konyowa nade mondo wasiki e hera mar Nyasaye?

• Ang’o momiyo onego waher jogo ma Jehova ohero?

• Ang’o momiyo en gima dwarore ahinya chiwo luor ne jogo moket mondo ota kanyakla?

• Ang’o momiyo rito ler en wach maduong’ ahinya ne oganda Nyasaye?

[Penjo mag Puonjruok]

[Sanduk/Picha manie ite mar 28]

BUK MAJIWO JI BEDO GI TIMBE MABEYO

E program mar chokruog-distrikt mar higa 2008/2009, ne ochiw buk ma nigi it 224 ma wiye wacho ni, “Ritreuru e Hera mar Nyasaye.” Ang’o momiyo ne olos buk manyienni? Olose mondo okony Jokristo ng’eyo Jehova kendo hero puonj koda chikene, to moloyo, onyiso timbe ma Jakristo onego obedgo. Somo kendo nono mos bug “Ritreuru e Hera mar Nyasaye,” biro miyo wamed bedo gadier ni kare dak kaluwore gi chike Jehova e ngima maberie moloyo gie sani, kendo timo kamano terowa e ngima mochwere e kinde mabiro.

E wi mano, olos bugni mondo okonywa ng’eyo ni winjo kendo luwo kaka Jehova chikowa, ok en gima pek. Kar mano, winjo Jehova e yo mwanyisogo okang’ mwaherego. Omiyo, bugni biro miyo wapenjre wan wawegi niya, ‘Gino mamiyo awinjo kendo luwo kaka Jehova chika en ang’o?’

Sama jomoko dok chien mi giwe bedo e hera mar Jehova, pile tim moro marach ema miyo gitimo kamano, to ok ni nikech ok giwinjo tiend puonj moro. Omiyo, mano kaka en gima dwarore ahinya ni wateg hera ma wan-go kuom chike koda puonj mag Jehova matayowa e ngimawa mapile! Wan gadier ni buk manyienni biro konyo rombe Jehova manie piny mangima, mondo omi gichung’ motegno ne tim makare, ginyis ayanga ni Satan en jamiriambo, to moloyo duto, gisiki e hera mar Nyasaye!​—Juda 21.