Komin Berwõt ilo Yokwe eo an Anij
Komin Berwõt ilo Yokwe eo an Anij
“Bed wõt ilo yokwe eo an Anij, ilo ami kõttar ad Iroij Jesus Christ, bwe kin tiriamokake eo an, enaj lewõj mour indrio.”—JUD 21, UBS.
1, 2. Ewi wãwen Jeova ear kwalok yokwe eo an ñõn kij, im ewi wãwen ar jela bwe ejjab kajju kõmõn bwe jen berwõt ilo yokwe eo an?
JEOVA ANIJ ear kwalok yokwe eo an ñõn kij ilo elõñ wãwen ko. Bõtab, ejelok kajitõk bwe kein kamol eo elaptata kin yokwe eo an Jeova ej ikijen menin letok eo kin katok in binmour eo. Joñõn an kanuij in lap an yokwe armij, ear jilkintok Nejin ejitenburu iben ñõn lõl bwe en mij kin kij. (Jon 3:16) Jeova ear kõmõne men in kinke ekõnan bwe jen mour ñõn in drio, im bareinwõt ekõnan bwe jen bõk tokjen jen yokwe eo an ñõn in drio!
2 Bõtab, jemaroñ ke lemnok bwe Jeova enaj kajju kõmõn bwe jen berwõt ilo yokwe eo an jekron ta eo jej bebe in kõmõne? Jaab. Kinke ilo buk in Jud, jej riiti nan in rejañ kein: “Bed wõt ilo yokwe eo an Anij, ilo ami kõttar ad Iroij Jesus Christ, bwe kin tiriamokake eo an, enaj lewõj mour indrio.” (Jud 21, UBS) Ñõn “berwõt ilo yokwe eo an Anij,” men in ej kalikar bwe eor men ko jej aikwij in kõmõni. Inem, ta ko jej aikwij kõmõni bwe jen berwõt ilo yokwe eo an Anij?
Ewi Wãwen Jemaroñ Berwõt ilo Yokwe eo an Anij?
3. Ta eo Jisõs ear ba bwe ej menin aikwij ñõn an berwõt ilo yokwe eo an Jemen?
3 Jej lo uak eo ñõn kajitõk in ilo nan ko Jisõs mõke ear ba ilo boñin eo eliktata in an kar mour ion lõl. Ear ba: “Elañe komij kejbãrok kien ko Aõ, kom naj ber ilo Aõ yokwe; im einwõt I ar kejbãrok kien ko an Jema, im Ij ber ilo An yokwe.” (Jon 15:10) Alikar, Jisõs ear kile bwe an bokake kien ko an Jeova ear juõn menin aikwij ñõn an drebij juõn jutõk emõn iben Jemen. Kiõ, elañe men in ear mol iben eo Nejin Anij me ewãppen, ejjab ke bar mol iber bareinwõt?
4, 5. (a) Ta wãwen eo elaptata jemaroñ kwalok bwe jej yokwe Jeova? (b) Etke ejelok un ko iber ñõn ar drike lemnok eo bwe jej aikwij bokake kien ko an Jeova?
4 Wãwen eo elaptata me jej kwalok ar yokwe Jeova ej ikijen ar bokake e. Dri jilik Jon ear kwalok kin men in ilo wãwen in: “Eñin yokwe Anij, bwe jen kejbãrok kien ko An: im kien ko An re jab erro.” (1 Jon 5:3) Emol, elõñ armij ro ranin rejjab kõnan bokake jabrewõt armij. Bõtab, lale nan kein: “Kien ko An re jab erro.” Jeova ejjab kajitõk iber ñõn kõmõni men ko me ekanuij bin ñõn kij.
5 Ñõn wanjoñok: Kwon kar ke kajitõk iben eo jeram ñõn inek juõn men me kwojela bwe ekanuij erro ñõn an kwotake? Jaab! Elaplok an Jeova joij jen kij im elaplok an jela kin joñõn maroñ ko ar. Baibel eo ej kalimur bwe Jeova “ej kememej bwe kij bũñalñal.” (Sam 103:14, UBS) Ejamin kajitõk bwe jen kõmõni men ko elap jen ar maroñ. Inem ejelok un ko iber ñõn ar drike lemnok eo bwe jej aikwij bokake kien ko an Jeova. Jen an eindrein, jej kile bwe ar bokake Jeova ej letok ñõn kij juõn ien emõn im ebellok ñõn kwalok ñõn Jemer ilõñ bwe emol ar yokwe e im jekõnan berwõt ilo yokwe eo an.
Juõn Menin Letok Ejejuan jen Jeova
6, 7. (a) Ta in bõklikõt? (b) Kwalok juõn wanjoñok kin ewi wãwen bõklikõt eo emaroñ jibõñ kij ñõn berwõt ilo yokwe eo an Anij.
6 Ilo lõl in ekabwokbwok me jej mour ie, elõñ bebe ko jej aikwij kõmõni me rej kitibuj ar bokake Anij. Ewi wãwen ar maroñ jela bwe bebe kein rej errã iben ankilan Anij? Emwij an Jeova letok juõn menin letok me emaroñ lap an jibõñ kij ilo ar bokake. Ej bõklikõt eo. Ta in bõklikõt? Ej juõn maroñ ejej uan me ej jibõñ kij ñõn jela kin kij mõke. Ej einwõt juõn dri ekajet ej kamaroñ kij ñõn lale jokãlet ko jej jelmaiki ilo mour ak kalomõnlokjen kin jerbal ko jar kõmõni im etali elañe remõn ak nana, rejime ak bwir.—Riit Dri Rom 2:14, 15.
7 Ewi wãwen jemaroñ kajerbal bõklikõt eo ar? Lemnok kin juõn wanjoñok. Juõn armij ej etetal ñõn mweo imõn im ej jino an jok marok. Ej aikwij kejbãrok an etetal bwe en jab itak ilo wijki im mar ko im jab buñ ion dreka ko im roñ ko. Ak ejjabto ej tõbar mweo. Ewi wãwen? Eor juõn an teeñki. Elañe en kar jab or an armij in teeñki, eban kar maroñ rome ial eo an im kejbãrok jen an buñ im jorran. Eindrein, juõn armij me ejelok an bõklikõt eban maroñ kõmõni bebe ko remõn, remol, im kwojarjar ilo mour eo an.
8, 9. (a) Ta eo jej aikwij kememeje kin joñõn maroñ eo an bõklikõt eo? (b) Ta eo jemaroñ kõmõne ñõn jela bwe bõklikõt eo ar ekanuij or tokjen ñõn kij?
8 Bõtab, einwõt juõn teeñki, bõklikõt eo eor joñõn an maroñ. Elañe emaat pãtõre in teeñki eo, inem ejamin rome ial eo ar. Eindrein, elañe jejjab atartar ion tel eo emol im eban oktõk jen Nan in Anij ak Baibel eo, emaroñ ejelok tokjen bõklikõt eo ar. (Sam 119:105) Bareinwõt, elañe jej kõtlok bwe kõnan ko an buruer ren anjo ior, ta eo enaj walok? Kõnan ko ar rekibbon remaroñ kõmõn bwe en jab jime an bõklikõt eo ar tel kij. Baibel eo ej kakkõl kij bwe buruen armij “ejelã mon jen men otemjej, ejjelok en emaroñ kemouri jen mij in an.” (Jerm. 17:9, UBS; Ken. 4:23) Ekaburomõjmõj bwe elõñ armij in lõl in elã jen joñõn air kõtlok bwe kõnan ko an burueir ren anjo ioir im jidrik wõt air roñjake ak rejjab bokake kien ko an Anij me rej walok ilo Baibel eo. (Riit Dri Epesõs 4:17-19.) Eñin unin ekanuij in lõñ armij ro me meñe eor air bõklikõt ak rej kõmõni wõt men ko renana.—1 Tim. 4:2.
9 Jej aikwij jek ilo buruer ñõn jab eindrein! Jen an eindrein, jen wõnmanlok wõt im kõtlok bwe Nan in Anij en katakin im kamineneik bõklikõt eo ar bwe en maroñ lukkun or tokjen ñõn kij. Jej aikwij roñjake bõklikõt eo ar emwij an Baibel eo kamineneiki jen ar kõtlok bwe kõnan ko ar rekibbon ren anjo. Ilo ejja ien eo wõt, jej aikwij kate ñõn koutiej bõklikõt eo an ro jeer im jãter ilo tõmak. Jen kate kij joñõn wõt ar maroñ ñõn bõprae ar lõkatipi ir, ilo ar kememej bwe bõklikõt eo an ro jeer im jãter emaroñ jab kõtlok air kõmõn elõñ men ko me bõklikõt eo ar ej kamelim ar kõmõni.—1 Kor. 8:12; 2 Kor. 4:2; 1 Pit. 3:16.
10. Ta wãwen ko jilu ilo mour jenaj kiõ etali?
10 Jen etale kiõ jilu wãwen ko ilo mour me jemaroñ kwalok ar yokwe Jeova ikijen ar bokake. Emol, ilo kajjojo iair enaj kitibuj bõklikõt eo. Bõtab ñõn an tel kij ilo jime, bõklikõt eo ar ej aikwiji tel eo jen kien ko rekakõrmol jen Baibel eo ikijen mwil. Wãwen ko jilu me jemaroñ bokake Jeova rej: (1) Jej yokwe ro Jeova ej yokwe ir, (2) jej kwalok koutiej ñõn ro eor air maroñ, im (3) jej kate ñõn drebij wõt ar erreo iman mejen Anij.
Yokwe Ro Me Jeova Ej Yokwe Ir
11. Etke jej aikwij yokwe ro me Jeova ej yokwe ir?
11 Moktata, jej aikwij yokwe ro me Jeova ej yokwe ir. Ñe ej itok ñõn kõmao ko, armij rej einwõt mõtmõt ko. Ebiruru ar jorome jabrewõt men ibelakir. Dri Kõmõnmõn eo ekanuij in jela bwe kõmao ko remaroñ kauwatata im remaroñ bareinwõt jibõñ armij ro rejjab wãppen. Kin men in, ej letok nan in kakabilek in emeletlet: “Kwon etetal iben ro dri meletlet, inem kwo naj meletlet; a eo ej komao iben ro dri bwebwe, e naj jorran kake.” (Ken. 13:20; 1 Kor. 15:33) Ejelok juõn iar ekõnan bwe en “jorran.” Kajjojo iar ekõnan bwe en “meletlet.” Jeova ej meletlet otem meletlet im kin men in ejelok juõn emaroñ kõmõn bwe en meletletlok. Bareinwõt ejelok juõn emaroñ kejorran e. Lemnok mõk, wõn armij ro rejjab wãppen Jeova ej kãlet ir bwe ren jeran?
12. Kain armij rot Jeova ej kãlete bwe en jeran?
12 Jeova ear jitõñlok ñõn dri petriark eo Ebream einwõt “jera.” (Ais. 41:8) Lein ej juõn joñok ekanuij emõn kin tiljek, wãnik, im bokake kinke ear mour ekkar ñõn tõmak eo an ilo Anij. (Jem. 2:21-23) Eñin ej kain armij rot eo Jeova ej kãlete bwe en jeran. Ranin, ej jeraik ejja kain armij ro eierwõt. Elañe Jeova ej kãlet armij rot rein einwõt ro jeran, ejjab aurõk ke bwe kij bareinwõt en emõn ar kãlet, bwe jen etetal iben ro remeletlet im erom ro remeletlet?
13. Ñe ej itok ñõn kãlet ro mõtar, ta eo emaroñ jibõñ kij ñõn kõmõni jokãlet ko remõn?
13 Ta eo emaroñ jibõñ yuk ñõn kõmõni jokãlet ko remõn ilo wãwen in? Katak kin joñok ko remõn emaroñ kamakõt yuk. Lemnok kin jimjera eo ikõtan Rut im Neomai, lio jinen kar leo belen, kõtan eo an Devid im Jonetan, ak kõtan eo an Timote im Paul. (Rut 1:16, 17; 1 Sam. 23:16-18; Pil. 2:19-22) Jimjera kein rar lukkun ebak kin juõn un ej ber ilõñin men otemjej: Rar wawa ion yokwe eo emol ñõn Jeova. Kwomaroñ ke lo ro mõtõm me elap air yokwe Jeova einwõt kwe? Kwon liki bwe ilo congregation eo an Kristian ebiruru am naj lo armij rot rein im mõtaik ir. Rein reban tel yuk ñõn kõmõni men ko me renaj kaillu Jeova. Jen air eindrein, renaj jibõñ yuk ñõn bokake Jeova, ridtolok ilo jitõb, im jeor ñõn jitõb. (Riit Dri Galetia 6:7, 8.) Renaj jibõñ yuk ñõn berwõt ilo yokwe eo an Anij.
Koutiej Ro Eor Air Maroñ
14. Ta un ko me ekkã air kõmõn bwe en bin ar kwalok koutiej ñõn ro eor air maroñ?
14 Wãwen eo kein karuo jej kwalok ar yokwe Jeova ej kitibuj maroñ. Jej aikwij kwalok ar koutiej ro eor air maroñ. Etke jet ien ebin ar kõmõne men in? Juõn un ej kinke armij ro eor maroñ ibeir rejjab wãppen. Bareinwõt, kij mõke jejjab wãppen. Kin men in ebin ñõn jolok kõnan eo ñõn jumae.
15, 16. (a) Etke eaurõk bwe jen koutiej ro me Jeova ear lelok maroñ ñõn ir bwe ren lale armij ro an? (b) Ta men eo eaurõk jej katak jen wãwen Jeova ear watõk dri Israel ro me rar jumae Moses?
15 Inem, kwomaroñ lemnok, ‘Elañe ej juõn men ebin ñõn ar koutiej ro eor air maroñ, etke jej aikwij kõmõne men in?’ Uak eo ej kitibuj aituerõk eo kin wõn eo ej iroij potata. Wõn eo kwonaj kãlet e bwe en iroij eo am? Elañe jej kãlet Jeova einwõt Iroij Potata eo ar, jej aikwij koutiej maroñ eo an. Elañe jejjab kõmõn eindrein, jemaroñ ke lukkun ba bwe ej ar Iroij? Bareinwõt, ekkã an Jeova jerbale maroñ eo an ikijen armij ro rejjab wãppen me ear lelok maroñ ñõn ir bwe ren lale armij ro an. Elañe jenaj jumae armij rein, ewi wãwen an naj Jeova watõk kõmõn ko ar?—Riit 1 Dri Tessalonika 5:12, 13.
16 Ñõn wanjoñok, ke dri Israel ro rar ellotane im jumae Moses, Jeova ear watõk kõmõn ko air einwõt rar jumae e. (Bwin. 14:26, 27) Anij ejañin oktõk. Elañe jenaj jumae ro me ear lelok maroñ ñõn ir, jenaj jumae e!
17. Ta lemnok eo ejime jej aikwij kate kij ñõn kwaloke ñõn ro eor air maroñ ilo congregation eo?
17 Dri jilik Paul ej kwalok lemnok eo ejime ñõn kwalok ñõn ro me rej bõk erron jerbal ko ilo congregation eo an Kristian. Ear je: “Komin bokake im kõtãik kom ñõn ro rej tel kom, bwe rej lale ami, einwõt ro re naj kwalok kin air kõmõn, bwe ren kwalok im lõñliñ im jab buromõj. Bwe men in e jab men in kakajuror kom.” (Hib. 13:17) Emol, jej aikwij lukkun kate kij ñõn kadrek juõn jitõbõn bokake im kõtãik kij mõke. Bõtab, kememej bwe jej kate kij ñõn berwõt ilo yokwe eo an Anij. Ejjab ke or tokjen ar kate kij ñõn kõtõbar mejenkajik in?
Drebij Wõt Ar Erreo Iman Mejen Jeova
18. Etke Jeova ekõnan bwe jen drebij wõt ar erreo?
18 Wãwen eo kein kajilu me jej kwalok ar yokwe Jeova ej ilo ar kate kij ñõn drebij wõt ar erreo iman mejen. Enañin aolep ien ro jemen im jinen rej lukkun kate ir ñõn lale bwe ajiri ro nejiir ren erreo. Etke? Juõn un ej kinke erreo ej lukkun aurõk ñõn ejmour im mour eo an juõn ajiri. Bareinwõt, juõn ajiri erreo ej bõktok juõn ãt emõn ñõn baamle eo, im ej kalikar yokwe im kejbãrok eo an jemen im jinen. Kin ejja un kein wõt, Jeova ekõnan bwe jen erreo. Ejela bwe erreo ekanuij in aurõk ñõn mour ko ar. Ej bareinwõt jela bwe ar erreo ej kwalok kin e, Jemer ilõñ. Elap an men in aurõk kinke armij remaroñ kõnan jerbal ñõn Anij kinke rej kile ar oktõk jen jarlepju in armij ro ilo lõl in etton.
19. Ewi wãwen jej jela bwe erreo ilo enbwin ej aurõk?
19 Ilo wãwen it ko jej aikwij drebij wõt ar erreo? Ilo mol, ilo wãwen otemjej. Ilo Israel eo etto, Jeova ear kalikar ñõn armij ro an bwe erreo ilo enbwin ej aurõk. (Liv. 15:31) Kien Moses ear kobaik kakien ko kin wãwen kein einwõt kalibwin brij ko air, karreoik jãbi ko, amwini peir, im kwal neiir im nuknuk ko air. (Ex. 30:17-21; Liv. 11:32; Bwin. 19:17-20; Dut. 23:13, 14) Kar kakememej dri Israel ro bwe Anij eo air, Jeova, ekwojarjar, melelen bwe erreo im ejelok lipjinjin iben. Dri korijer ro an Anij eo ekwojarjar rej aikwij bareinwõt ekwojarjar.—Riit Livitikõs 11:44, 45.
20. Ilo wãwen it ko jej aikwij drebij wõt ar erreo?
20 Inem, jej aikwij erreo ituloa im itulik. Jej kate kij ñõn drebij lemnok ko rerreo. Ilo tiljek, jej edrep ñõn kien ko an Jeova ikijen mwil erreo meñe elaplok an armij ro ilo lõl in ejej im kijoñ. Men eo elap an aurõk ej bwe jen jutõk bin ilo ar kejbãrok ar kabuñ ilo erreo, im bõprae jabrewõt men ko retton jen kabuñ ko rewan. Jejjab meloklok nan in kakkõl eo ekakõrmol kar je ilo Aiseia 52:11: “Komin ilok, komin ilok, komin drioijlok jen ijo, komin jab uñire jabrewõt men etton; komin drioijlok jen e; komin mõke karreoik kom.” Ranin, jej drebij wõt ar erreo ilo jitõb ikijen ar bõprae ar uñir jabrewõt men Jemer ilõñ ej watõk bwe retton ilo jitõb. Eñin unin, ñõn wanjoñok, jej lukkun kejbãrok bwe jen jab bõk kwonad ilo ran in kwojkwoj ko an kabuñ ko im ran in kakije ko me rebuñbuñ ilo lõl in ranin. Emol, ej juõn aituerõk ñõn drebij wõt ar erreo. Bõtab, armij ro an Jeova rej kate wõt ir ñõn kõmõn eindrein kinke men in ej jibõñ ir ñõn berwõt ilo yokwe eo an Anij.
21. Ewi wãwen ar maroñ jela bwe jenaj berwõt ilo yokwe eo an Anij?
21 Jeova ekõnan bwe jen berwõt ilo yokwe eo an ñõn in drio. Bõtab kij kajjojo jej aikwij lukkun lale bwe jen kate kij joñõn wõt ar maroñ ñõn berwõt ilo yokwe eo an Anij. Jemaroñ kõmõne men in ikijen ar lor joñok eo an Jisõs im kamol ar yokwe Jeova ikijen ar bokake kien ko An. Elañe jej kõmõn eindrein, enaj or ar liki bwe ejelok “e naj maroñ in kijbil kij jen yokwe an Anij, eo ilo Kraist Jisõs ar Iroij.”—Rom. 8:38, 39.
Kwoj ke Kememej?
• Ewi wãwen bõklikõt eo ar emaroñ jibõñ kij ñõn berwõt ilo yokwe eo an Anij?
• Etke jej aikwij yokwe ro me Jeova ej yokwe ir?
• Etke eaurõk ñõn kwalok koutiej ñõn ro eor air maroñ?
• Etke erreo ej aurõk iben armij ro an Anij?
[Kajitõk ko ñan katak]
[Bo̦o̦k/Pija eo ilo peij 20]
JUÕN BUK ME EJ JIBÕÑ KOWÕNMANLOK MWIL EMÕN
Ilo kar kwelok elap eo ilo 2008, rar kejela kin buk eo me eor 224 peij ko ie etan Komin Berwõt ilo Yokwe eo an Anij. Ta un eo unin kar je buk in ekãl? Kar je ñõn jibõñ dri Kristian ro ñõn jela im yokwe kien ko an Jeova, im elaptata an kwalok kin mwilin Kristian. Ar liñõri im katak kin buk in Komin Berwõt ilo Yokwe eo an Anij enaj kamulõllok ar liki bwe ar mour ekar ñõn kien ko an Jeova ej wãwen eo emõntata ñõn mour kiõ im ej tellok ñõn mour in drio ilo ilju im jeklaj.
Elaplok jen men in, kar je buk in ñõn jibõñ kij kile bwe bokake Jeova ejjab juõn men erro. Jen an eindrein, ej juõn wãwen ñõn kwalok ñõn Jeova ewi joñõn ar yokwe e. Inem buk in enaj kamakit kij ñõn kajitõkin kij mõke, ‘Etke ij bokake Jeova?’
Ñe jet rej kõmõne bwir in ekanuij kaburomõjmõj ikijen air ilok jen yokwe eo an Jeova, ekkã wõt an abañ eo waloktok kin mwil ko renana im jab kin an drik air melele kin katak ko. Inem, ekanuij aurõk bwe jen kakajurlok ar yokwe im kamolol kin kien ko im nan in kakabilek ko an Jeova me rej tel kij ilo mour eo ar jen ran ñõn ran! Eor ar liki bwe buk in ekãl enaj jibõñ s̃ip ro an Jeova ibelakin lõl ñõn jutõk bin wõt kin men eo ejime, ñõn kamol bwe Setan ej juõn dri riõp, im ilõñin men otemjej ñõn berwõt ilo yokwe eo an Anij!—Jud 21, UBS.
[Pija eo ilo peij 18]
“Elañe komij kejbãrok kien ko Aõ, kom naj ber ilo Aõ yokwe; im einwõt I ar kejbãrok kien ko an Jema, im Ij ber ilo An yokwe”