“Mansiansia Kayo ed Panangaro na Dios”
“Mansiansia Kayo ed Panangaro na Dios”
“Mansiansia kayo ed panangaro na Dios, tan manalagar kayo ed panangasi na Katawan tayo a Jesu-Kristo ya onkana ed bilay ya andi-angga.”—JUD. 21.
1, 2. Panon ya impanengneng nen Jehova so panangaro to ed sikatayo, tan panon tayon amta ya aliwan automatiko a pansiansiaen to itayo ed panangaro to?
IMPANENGNENG la nen Jehova a Dios so panangaro to ed sikatayo ed dakel a paraan. Balet, andi-duaruwan say sankabiskegan a paneknek na panangaro nen Jehova ed sikatayo et say impangitarya to na dondon bagat. Ontan lay panangaro to ed katooan ya imbaki to so inad-aro ton Anak diad dalin pian ompatey nisesengeg ed sikatayo. (Juan 3:16) Ginawa iya nen Jehova lapud labay to itayon manbilay tan nagunggonaan ed panangaro to diad andi-anggaan!
2 Balet say tepet et, automatiko kasin pansiansiaen itayo nen Jehova ed panangaro to anggan antokaman ni gawaen tayo? Andi. Ta diad Judas bersikulo 21 et oniay nabasa tayon simbawa: “Mansiansia kayo ed panangaro na Dios, tan manalagar kayo ed panangasi na Katawan tayo a Jesu-Kristo ya onkana ed bilay ya andi-angga.” Ipapatnag na balikas a “mansiansia kayo ed panangaro na Dios” a walaray kaukolan tayon gawaen. Anto sirin so kaukolan tayon gawaen pian mansiansia itayo ed panangaro na Dios?
Panon Itayon Makapansiansia ed Panangaro na Dios?
3. Unong ed si Jesus, antoy kaukolan ton gawaen pian mansiansia ed panangaro na Ama to?
3 Naamtaan tayo so ebat ed satan a tepet diad samay mismon sinalita nen Jesus ed samay unor lan labi na bilay to diad dalin. Inkuan to: “No sumpalen yo so saray ganggan ko, mansiansia kayo ed arok, salanti singa impangunor ko ed saray ganggan nen Amak, tan mansiasiansia ak ed aro to.” (Juan 15:10) Malinew ya amta nen Jesus a kakkaukolan so pangunor ed saray ganggan nen Jehova pian napansiansiay maabig a relasyon ed si Ama to. No ontan so panmoria na perpekton Anak na Dios, agta nepeg ya ontan met so panmoria tayo?
4, 5. (a) Antoy manunan paraan a nipanengneng tayoy panangaro tayo ed si Jehova? (b) Akin et anggapoy rason ya agtayo tuloken iray ganggan nen Jehova?
4 Say manunan paraan a nipanengneng tayo so panangaro tayo ed si Jehova et diad itulok ed sikato. Oniay impangibalikas nen apostol Juan ed satan: “Say panangaro’d Dios kabaliksan toy pangunor tayo ed saray ganggan to. Et aliwan mairap ya unoren iray ganggan to.” (1 Juan 5:3, Maung a Balita) Diad mundo natan, aglabay na dakel a totoo so ontulok ed arum. Balet, imanoen pa imay balikas ya “aliwan mairap ya unoren iray ganggan to.” Agkekerewen nen Jehova a gawaen tayo so sakey a bengatlan mair-irap a gawaen.
5 Pian iyilustra iya, kasin ipaalsa yo ed pinablin kaaro so sakey a bengatlan ambelat anta amta yon agto itan sarag? Siempre andi! Anggapoy toon makapipara ed kaabigan nen Jehova tan seguradon kabkabat to ray limitasyon tayo. Ipapaseguro ed sikatayo na Biblia a ‘nonodnonoten to a sapok itayo.’ (Sal. 103:14) Agton balot pagawa ed sikatayo so sakey a bengatlan agtayo sarag. Kanian, anggapoy rason ya agtayo tuloken iray ganggan nen Jehova. Imbes, momoriaen tayon say katutulok ed si Jehova et alay abig a pankanawnawa ya ipanengneng ed Ama tayon walad tawen a sikatoy peteg ya inaro tayo tan labay tayoy mansiansia ed panangaro to.
Sakey a Mablin Regalo nen Jehova
6, 7. (a) Anto so konsiensia? (b) Iyilustra no panon itayon natulongan na konsiensia a makapansiansia ed panangaro na Dios.
6 Diad sayan komplikadon mundo a pambibilayan tayo, dakel iray kaukolan tayon gawaen a desisyon a nalalanor so katutulok ed Dios. Panon tayon naseguro a saray desisyon tayo et mitunosan ed linawa na Dios? Inikdan itayo nen Jehova na regalo a makatulong a maong ed sikatayon magmaliw a matulok. Saya et say konsiensia. Anto so konsiensia? Saya so nikadkaduman abilidad ya inter na Dios pian nakabat tayoy inkasikatayon dili. Singa iya sakey ya ukom a walad akindalem tayo, ya ontutulong pian nabalanse iray bengabengatla sano mandedesisyon itayo, odino pian namolimoli iray kundang a ginawa tayo la tan nausisa no kasin maong iratan odino mauges, duga odino aliwa.—Basaen so Roma 2:14, 15.
7 Antoray paraan a natulongan itayo na konsiensia? Imanoen pa iyan ilustrasyon. Bebeltangen na sakey a hiker so maaw-awang a kadesiertoan. Ditan et anggapoy basbas, karsada, odino karatula. Ingen ta atonton toy dugan direksion kanian akasabi ed destinasyon to. Akin? Lapud walay kompas to. Sakey iyan instrumento a walaan na dagum a sensitibo’d puersa na magnet tan akaturon lanang ed amianen. Seguradon no anggapoy kompas na sayan hiker et agto amta so laen to. Mipadpara, say sakey a toon andian na konsiensia et aliling toy agto amta so laen to sano manggagawa na desisyon nipaakar ed moral, tan agto met amta no antoy duga tan aliwa.
8, 9. (a) Antoray limitasyon na konsiensia tayo a nepeg tayon nodnonoten? (b) Antoy nagawaan tayo pian naseguro a say konsiensia tayo et makanakana ed sikatayo?
8 Balet, singa say kompas, say konsiensia et walaan met na saray limitasyon. No say hiker et mangiyabay na magnet ed kompas to, sananey lan direksion so ituro na samay dagum, aliwa lan diad amianen. Anto met kasi nagawa no abuloyan tayo iray pilalek na puso tayo a mangontrol ed saray desisyon tayo? Lapud sinisiblet iran pilalek tayo, nayarin itonton itayo na konsiensia tayo ed lingon direksion. Papasakbayan itayo na Biblia a ‘say puso et manamalingo, ya alabas ni nen saray amin a bengatla tan mapalalo a mauges.’ (Jer. 17:9; Uli. 4:23) Kaaruman ni, no aliwan susto tan agnapanmatalkan so mapa ya awit na samay hiker, daiset labat so nitulong na kompas, ompan anggapo ni ingen. Mipadpara, no ag-itayo manmatalek ed susto tan agmanguuman a panangigiya na Salitay Dios, say Biblia, say konsiensia tayo et nayarin magmaliw met ya andiay kana. (Sal. 119:105) Makapaermen balet ta say tutuloken na dakel a totoo natan et saray kaliktan na puso ra, ya ibabalewala ra iray estandarte a nidatak ed Salita na Dios. (Basaen so Efeso 4:17-19.) Satan so rason no akin a dakdakel nin siansiay makakagawa na teribli iran bengatla, anggano walay konsiensia ra.—1 Tim. 4:2.
9 Nepeg ya agtayon balot aaligen iratan! Imbes, abuloyan tayo so Salitay Dios a mangibangat tan mangipasal ed konsiensia tayo pian magmaliw iyan makanakana. Kaukolan tayon dengelen so konsiensia tayon nipasal ed Biblia imbes ya abuloyan iray makasarilin pilalek a manaeg ed satan. Balet, nepeg tayo met a respetoen so konsiensia na saray inad-aro tayon agagi. Manaalwar itayon maong pian ag-ira nigapol, a lawas tayon sankanonot a say konsiensia ra et nayarin mas sensitibo nen say konsiensia tayo.—1 Cor. 8:12; 2 Cor. 4:2; 1 Ped. 3:16.
10. Antoray taloran aspekto ed bilay ya aralen tayo?
10 Aralen tayo pay taloran aspekto ed bilay a diad satan et nipanengneng tayoy panangaro ed si Jehova panamegley na katutulok. Siempre, diad balang sakey ed sarayan aspekto et nalalanor so konsiensia. Balet, kaukolan a say manunan mangigiya ed satan et say apuyanan ya estandarte na Biblia nipaakar ed kondukta. Nia ra so taloran aspekto a nipanengneng tayo so maaron katutulok ed si Jehova: (1) Aaroen tayo iramay aaroen nen Jehova, (2) rerespetoen tayo iray walaan na autoridad, tan (3) panseseetan tayoy mansiansian malinis ed imaton na Dios.
Aroen Iramay Aaroen nen Jehova
11. Akin a nepeg tayon aroen iramay aaroen nen Jehova?
11 Unona, nepeg tayon aroen iramay aaroen nen Jehova. No nipaakar ed pipiulop, saray totoo et niyaliling ed espongha. Mainomay tayon naesep so antokaman a walad kaliberliber tayo. Kabat na Manamalsa tayo a sikatayoran agperpekton totoo et naimpluensyaan na balanglan mauges odino maabig iran kaulop. Kanian, inter to ed sikatayo iyan makabat a simbawa: “Miulop ka ed saray makabat a totoo, et sika naani makabat; balet say kaiba na saray maatiw manlikna na segsegang.” (Uli. 13:20; 1 Cor. 15:33) Siempre, anggapo ’tay toon labay toy “manlikna na segsegang.” Say labay tayo et magmaliw itayon “makabat.” Si Jehova et agto la kaukolan so miulop ni’d siopaman pian magmaliw a mas makabat, ta sankakabatan la ed amin, tan agmet naimpluensyaan na siopaman a mauges. Balet, sikatoy angipanengneng ed sikatayo na alay abig ya ehemplo no nipaakar ed pipiulop. Nonoten pa, siopa ray pinili nen Jehova a magmaliw a kakaaro to?
12. Anton klase na kakaaro so pipilien nen Jehova?
12 Nanonotan yo lagi so patriarkan si Abraham, a tinawag nen Jehova a “kaarok.” (Isa. 41:8) Sayan laki et alay abig na ehemplo to ed katooran, inkatunong, tan katutulok. Talagan mabisbiskeg so pananisia to ed Dios. (Sant. 2:21-23) Ontan a klase na kaaro so pipilien nen Jehova. Tan ontan met iran totoo so pikakaaroan to natan. No si Jehova et ontan iran kakaaro so pipilien to, agta kaukolan ya ontan met so pilien tayo, pian makapiulop itayo ed saray makabat a totoo tan onkabat itayo met?
13. Anto so makatulong pian makapanpili itayo na dugan kakaaro?
13 Anto so makatulong ed sikayo pian makapanpili na dugan kakaaro? Makapaseseg so panaral ed saray ehemplo ed Biblia. Nonot yo pa iramay impankaaro di Rut tan say katulangan ton si Naomi, di David tan Jonatan, odino di Timoteo tan Pablo. (Rut 1:16, 17; 1 Sam. 23:16-18; Fil. 2:19-22) Sarayan pankakaaro et malet lapud manunan rason: Base iraya ed tuan panangaro ed si Jehova. Makaromog kayo met kasi na kakaaron mangaaro ed si Jehova a singa met ed panangaro yo ed Sikato? Seguradon makaromog kayo na ontan iran kakaaro diad loob na kongregasyon. Saray ontan a kakaaro et agmanlagyat ed sikayon manggawa na bengatlan maneral na relasyon yo ed si Jehova. Noagta, sikaray ontulong ed sikayon mangunor ed si Jehova, onapit ed sikato, tan “mantanem na nipaakar ed espiritu.” (Basaen so Galacia 6:7, 8.) Tulongan da kayon mansiansia ed panangaro na Dios.
Respetoen Iray Walaan na Autoridad
14. Akin et mairap so panrespeto ed saray walaan na autoridad?
14 Say komaduan paraan a nipanengneng tayo so panangaro ed si Jehova et nipaakar ed panmoria tayo ed autoridad. Nepeg a respetoen tayo iray walaan na autoridad. Balet, akin kasi a no maminsan et mairap itan a gawaen? Say sakey a rason et agperpekto iray totoon walaan na pakauley. Niarum ni, anggan sikatayon mismo et agperpekto. Mipupuligesgesan itayo ed nisipor lan tendensia tayon manrebelde.
15, 16. (a) Akin et importantin respetoen tayo iramay angimatalkan nen Jehova na responsabilidad a mangasikaso ed totoo to? (b) Anton importantin leksion so naaralan tayo ed no panon a minoria nen Jehova so impanrebelde na saray Israelita ed si Moises?
15 Nayarin isipen yo, ‘No talagan mairap so panrespeto ed saray walaan na autoridad, akin et kaukolan tayo nin gawaen itan?’ Lapud say nalalanor ed saya et say isyu na inkasoberano. Siopa so pilien yon soberano odino manuley yo? No pilien tayo si Jehova bilang Soberano tayo, kaukolan tayon respetoen so autoridad to. Ta no andi, nibaga tayo kasin sikato so Manuley tayo? Ontan met, uusaren nen Jehova so autoridad to panamegley na agperpekton totoo ya angimatalkan to na responsabilidad a mangasikaso ed totoo to. No manrebelde itayo ed sarayan totoo, anto kasi panmoria nen Jehova ed satan ya ikiwas tayo?—Basaen so 1 Tesalonica 5:12, 13.
16 Singa bilang, sanen nanmeremere tan nanrebelde iray Israelita ed si Moises, impasen nen Jehova a Sikaton mismoy nanrebeldean da. (Num. 14:26, 27) Ontan nin siansia so panmoria na Dios. No manrebelde itayo’d saramay pinabtangan to na autoridad, sikaton mismo so panrerebeldean tayo!
17. Anton dugan awawey so kaukolan tayon ipanengneng ed saramay walaan na responsabilidad ed kongregasyon?
17 Impaamta nen apostol Pablo so dugan awawey a kaukolan tayon ipanengneng ed saramay walaan na responsabilidad ed kongregasyon. Insulat to: “Ontulok kayo ed saray wala a manuley ed sikayo, tan pauleyan kayo ed sikara: ta manbabantay ira lapu ed saray kamarerwa yo, a singa sikara so mangiter naani pipapalinewan; pian sikato ya so gawaen da a sigagayaga, tan aliwa a sieermen, ta saya agmakapaabig ed sikayo.” (Heb. 13:17) Tua a kaukolan tayoy mansagpot pian naaralan tayoy magmaliw a matulok tan mapasakop. Balet, tandaan tayo a gagawaen tayo itan pian makapansiansia itayo ed panangaro na Dios. Agta manepeg labat sirin a pansagpotan tayo itan?
Mansiansian Malinis ed Imaton nen Jehova
18. Akin et labay nen Jehova a mansiansia itayon malinis?
18 Say komatlon paraan a nipanengneng tayoy panangaro ed si Jehova et say panseet tayo a mansiansian malinis ed imaton to. Saray atateng so mansasagpot pian mansiansian malinis iray anak da. Akin? Lapud say inkalinis et ontulong pian maabig so bunigas na ananak. Sakey ni, no malinis so ugaw, labay ton ibaga et sikatoy aasikasoen tan aaroen na atateng to. Satan met so rason no akin a labay nen Jehova a magmaliw itayon malinis. Amta ton say inkalinis et parad pankaabigan tayo. Amta to met a say inkalinis tayo et onreplekta ed sikato bilang say mangatatawen ya Ama tayo. Importante iyan maong, lapud dakel a totoo so nayarin nasagyat met a mandayew ed Dios no naiimano ran nidumaduma itayo ed sayan mauges a mundo.
19. Antoy mangipapanengneng ya importante so pagmaliw a malinis ed pisikal?
19 Diad antoran pamaakaran a kaukolan tayoy mansiansian malinis? Diad amin ya aspekto na kabibilay tayo. Diad Israel nensaman, malinlinew ya imbaga nen Jehova ed saray totoo to a kaukolan iran magmaliw a malinis ed pisikal. (Lev. 15:31) Kalaktip ed Mosaikon Ganggan iray regulasyon nipaakar ed panangibantak na dutak, panlinis ed saray pananginan, panuras na lima, sali, tan pampesak. (Exo. 30:17-21; Lev. 11:32; Num. 19:17-20; Deu. 23:13, 14) Saray Israelita et pinanonotan a say Dios dan si Jehova et masanto, a mankabaliksan na “malinis,” “dalisay,” tan “sagrado.” Kanian saray lingkor na masanto a Dios et kaukolan met a magmaliw a masanto.—Basaen so Levitico 11:44, 45.
20. Diad antoran paraan a kaukolan tayoy mansiansian malinis?
20 Kaukolan sirin a magmaliw itayon malinis ed akindalem tan ontan met ed akinpaway. Panggugunaetan tayon pansiansiaen a malinis so kanonotan tayo. Matoor tayon tutuloken iray estandarte nen Jehova ed moral a kalinisan, anggano abebbebay moralidad na totoo ed kaliberliber tayo. Sankaimportantian ed amin, determinado tayon pansiansiaen a malinis so panagdayew tayo, ya agtayo padudutakan ed palson relihyon. Lawas tayon nonodnonoten imay apuyanan a pasakbay ya akarekord ed Isaias 52:11: “Ontaynan kayo, ontaynan kayo, a manlapud’man, agkayo mangawit na anggan anto a bengatla ya agmalinis; ontaynan kayo ed pegley to; linisan yo so laman yo.” Natan, makapansiansia itayon malinis ed espiritual no paliisan tayo so antokaman a mikonektaan ed palson panagdayew. Satan so rason no akin ya agtayon balot mibabali ed saray selebrasyon tan holiday na saray palson relihyon a popular ed mundo natan. Tua, aliwan mainomay so pansiansian malinis. Ingen ta panggugunaetan itan a gawaen na saray totoo nen Jehova, lapud amta ran ontulong itan ed sikaran mansiansia ed panangaro na Dios.
21. Panon tayon naseguro a makapansiansia itayo ed panangaro na Dios?
21 Labay nen Jehova a lawas itayon mansiansia ed panangaro to. Balet, nepeg a seguroen na balang sakey ed sikatayo a gagawaen tayoy anggaay nayarian tayon mansiansia ed panangaro na Dios. Nagawaan tayo iya no tumboken tayoy ehemplo nen Jesus tan no paneknekan tayoy panangaro tayo ed si Jehova diad pangunor ed saray ganggan To. No ontan so gawaen tayo, naseguro tayon anggapoy ‘makapangisian ed sikatayo diad aro na Dios, a wala ed Kristo Jesus a Katawan tayo.’—Roma 8:38, 39.
Kasin Nanonotan Yo?
• Panon itayon natulongan na konsiensia tayo a makapansiansia ed panangaro na Dios?
• Akin a nepeg tayon aroen iray aaroen nen Jehova?
• Akin a kaukolan tayon respetoen iray walaan na autoridad?
• Akin et importante ed saray totoo na Dios so kalinisan?
[Tepetepet Parad Panagaral]
[Kahon/Litrato ed pahina 20]
LIBRON MANGIPAPASESEG ED MAABIG A KONDUKTA
Diad samay distriton kombension nen 2008/2009, walay balon paway a libron “Mansiansia Kayo ed Panangaro na Dios,” a walaan na 224 a pahina. Anto so gagala na sayan balon libro? Pian natulongan iray Kristiano ya amtaen tan aroen iray estandarte nen Jehova, nagkalautla, say nipaakar ed Kristianon kondukta. No aralen tayon maong so “Mansiansia Kayo ed Panangaro na Dios,” mas napaneknekan tayo a say pambilay unong ed saray estandarte nen Jehova so sankaabigan diad sayan panaon tan mangitonton itan ed andi-anggaan a bilay diad arapen.
Niarum ni, ginawa iyan libro pian natulongan itayon namoria a say katutulok ed si Jehova et aliwan makapabelat. Imbes, sakey itan a paraan pian nipanengneng tayo a talagan inaro tayo si Jehova. Kanian, pakiwasen itayo na sayan libro a tepetay inkasikatayo, ‘Akin et uunoren ko si Jehova?’
Makapaermen ta no walaray onsisian ed panangaro na Dios, say makasengeg et aliwan lapud agda atalosay doktrina, noagta lapud kondukta ra. Talagan importante sirin a paaralemen tayo so panangaro tan panangapresya tayo ed saray ganggan tan prinsipyo nen Jehova a mangigiya ed sikatayo diad inagew-agew! Matalek kami a sayan balon libro et ontulong ed saray lingkor nen Jehova ed sankamundoan pian natalindegan da no antoy duga, napaneknekan a matila si Satanas, tan nagkalalo ed amin, pian makapansiansia ed panangaro na Dios!—Jud. 21.
[Litrato ed pahina 18]
“No sumpalen yo so saray ganggan ko, mansiansia kayo ed arok, salanti singa impangunor ko ed saray ganggan nen Amak, tan mansiasiansia ak ed aro to”