“Konserbá Boso Mes den e Amor di Dios”
“Konserbá Boso Mes den e Amor di Dios”
“Konserbá boso mes den e amor di Dios, sperando ku gran antisipashon e miserikòrdia di nos Señor Hesukristu pa bida eterno.”—HUDAS 21.
1, 2. Kon Yehova a demostrá su amor pa nos, i kon nos por sa ku e no ta konserbá nos outomátikamente den su amor?
YEHOVA DIOS a demostrá su amor pa nos den masha hopi manera. Pero sin duda, e prueba di mas grandi di Yehova su amor ta e sakrifisio di reskate ku el a perkurá. Yehova su amor pa humanidat ta asina grandi ku el a asta manda su Yu stimá na tera p’e muri pa nos. (Juan 3:16) Yehova a hasi esaki pasobra e ke pa nos biba pa semper, i e ke tambe pa nos benefisiá di su amor pa semper!
2 Sinembargo, nos por asumí ku Yehova lo konserbá nos outomátikamente den su amor sin importá kiko nos hasi? Nò. Pasobra na Hudas versíkulo 21, nos ta lesa e siguiente konseho: “Konserbá boso mes den e amor di Dios, sperando ku gran antisipashon e miserikòrdia di nos Señor Hesukristu pa bida eterno.” E ekspreshon “konserbá boso mes den e amor di Dios” ta indiká ku nos tin ku dal sierto paso. Kiko nos tin ku hasi anto pa nos por keda den e amor di Dios?
Kon Nos Por Keda den e Amor di Dios?
3. Segun Hesus su palabranan, kiko tabata esensial pa e keda den e amor di su Tata?
3 Nos ta haña e kontesta pa e pregunta ei den e palabranan ku Hesus mes a ekspresá riba e último anochi di su bida aki riba tera. El a bisa: “Si boso warda mi mandamentunan, boso lo keda den mi amor; meskos ku mi a warda e mandamentunan di mi Tata, i ta keda den su amor.” (Juan 15:10) Manera e teksto akí ta mustra, Hesus tabata sa ku pa el a mantené un bon relashon ku su Tata, Yehova, e mester a warda Su mandamentunan. Awor, si esei a konta pa e Yu perfekto di Dios, lo e no konta pa nos tambe?
4, 5. (a) Kua ta e manera prinsipal ku nos ta mustra ku nos ta stima Yehova? (b) Dikon nos no tin ningun motibu pa rechasá e idea di obedesé Yehova su mandamentunan?
4 Nos ta mustra ku nos ta stima Yehova prinsipalmente dor di obedes’é. Apòstel Juan a mustra esei ku e palabranan akí: “Pasobra esaki ta e amor di Dios, ku nos ta warda su mandamentunan; i su mandamentunan no ta pisá.” (1 Juan 5:3) Ta bèrdat ku e idea di ser obediente no ta muchu popular den e mundu djawe. Pero, tuma nota di e frase: “Su mandamentunan no ta pisá.” Yehova no ta pidi nos hasi algu ku ta muchu difísil pa nos.
5 Laga nos ilustrá esei: Lo bo pidi un bon amigu di bo karga algu ku bo sa ku ta muchu pisá p’e? Klaru ku nò! Wèl, Yehova ta muchu mas bondadoso ku nos i e ta komprondé nos limitashonnan muchu mas mihó ku nos mes. Beibel ta sigurá nos ku Yehova ta “kòrda ku ta stòf nos ta.” (Sal. 103:14) Hamas lo e pidi nos hasi mas di loke nos por. Pues, nos no tin ningun motibu pa rechasá e idea di obedesé Yehova su mandamentunan. Al kontrario, nos ta mira obedensia komo un oportunidat maravioso pa mustra nos Tata selestial ku di bèrdat nos ta stim’é i ke keda den su amor.
Un Regalo Spesial for di Yehova
6, 7. (a) Kiko ta konsenshi? (b) Ilustrá kon nos konsenshi por yuda nos keda den e amor di Dios.
6 Den e mundu kompliká ku nos ta biba, hopi di e desishonnan ku nos tin ku tuma ta enbolbé nos obedensia na Dios. Kon nos por hasi sigur ku e desishonnan akí ta na armonia ku Dios su boluntat? Yehova a duna nos un regalo ku por yuda nos mashá den e asuntu di obedensia. Esei ta nos konsenshi. Kiko ta konsenshi? Konsenshi ta e kapasidat spesial ku nos tin pa analisá nos aktitut, akshon- i desishonnan. E ta funshoná manera un hues interno ku ta permití nos konsiderá e desishonnan ku nos ta enfrentá den bida òf reflekshoná riba e akshonnan ku nos a tuma kaba i evaluá nan pa wak si nan ta bon òf malu, korekto òf inkorekto.—Lesa Romanonan 2:14 i 15.
7 Kon nos por hasi bon uso di nos konsenshi? Nos por ilustrá esei ku lo siguiente. Suponé ku un persona ke krusa un mondi grandi na pia. No tin rastro di kaminda ni bòrchi di indikashon. Tòg e ta logra kana bai stret na su destinashon. Kon e ta logra hasié? E tin un kompas. Riba esaki bo por mira e kuater direkshonnan prinsipal—nort, zùit, ost i wèst—i un angua magnétiko ku semper ta mustra den direkshon nort. Sin un kompas, e persona akí lo a pèrdè kaminda sigur. Di mes manera, hopi biaha un hende sin konsenshi lo keda kompletamente desorientá ora e tin ku tuma desishonnan korekto den bida, basá riba prinsipionan moral i étiko.
8, 9. (a) Ki limitashonnan di nos konsenshi nos mester tene na mente? (b) Kiko nos por hasi pa asina nos konsenshi por ta berdaderamente útil pa nos?
8 Sinembargo, meskos ku un kompas, e konsenshi tin su limitashonnan. Si e persona ku nos a menshoná den e ilustrashon a pone un magnet banda di su kompas, esaki por stroba e angua di mustra den direkshon nort. Asina tambe, kiko lo pasa si nos duna e deseonan di nos kurason demasiado importansia? E chèns ta grandi ku nos deseonan egoista ta stroba nos konsenshi di funshoná bon. Beibel ta spièrta nos ku nos “kurason ta mas engañoso ku tur kos i ta totalmente korupto.” (Jer. 17:9; Pro. 4:23) Ademas, si e persona en kuestion no tabatin un mapa eksakto i konfiabel, su kompas lo no a yud’é mashá. Di mes manera, si nos no dependé riba e guia sigur i inkambiabel di e Palabra di Dios, esta, Beibel, nos konsenshi lo no yuda nos mashá. (Sal. 119:105) Lamentablemente, hopi hende den e mundu akí ta duna demasiado importansia na deseonan di nan kurason, miéntras ku nan ta presta masha poko òf ningun atenshon na e normanan ku e Palabra di Dios ta kontené. (Lesa Efesionan 4:17-19.) Pa e motibu ei, asina tantu hende ta hasi kosnan teribel ounke nan tin konsenshi.—1 Tim. 4:2.
9 Nos mester ta determiná pa nunka ta manera e hendenan ei! Mas bien, laga nos sigui laga e Palabra di Dios eduká i entrená nos konsenshi pa e por ta berdaderamente útil pa nos. Nos tin ku hasi kaso di nos konsenshi entrená bíblikamente en bes di laga nos deseonan egoista silensi’é. A la bes, nos mester hasi esfuerso pa respetá e konsenshi di nos kerido rumannan kristian. Nos ta hasi tur loke ta posibel pa evitá di pone nan trompeká, kòrdando ku e konsenshi di nos ruman por ta mas sensitivo òf restriktivo ku esun di nos.—1 Kor. 8:12; 2 Kor. 4:2; 1 Ped. 3:16.
10. Kua ta e tres maneranan pa demostrá amor pa Yehova ku nos lo konsiderá awor?
10 Awor, laga nos konsiderá tres manera den kua nos por demostrá nos amor pa Yehova mediante obedensia. Ta klaru ku kada un di nan tin di haber ku nos konsenshi. Pero, pa nos konsenshi por ta un bon guia pa nos, nos mester kuminsá na eduk’é a base di e normanan di komportashon ku nos ta haña den e Skritura inspirá. E tres maneranan den kua nos ta demostrá nos amor pa Yehova dor di obedes’é ta: (1) Nos ta stima e hendenan ku Yehova ta stima, (2) nos ta mustra rèspèt pa outoridat i (3) nos ta trata di keda limpi den bista di Dios.
Stima e Hendenan Ku Yehova Ta Stima
11. Dikon nos tin ku stima e hendenan ku Yehova ta stima?
11 Na promé lugá, nos tin ku stima e hendenan ku Yehova ta stima. Ora ta trata di asosiashon, hende ta manera spòns. Nos tin e tendensia di apsorbá tur loke ta rònt di nos. Nos Kreador sa hopi bon ki peligroso—i, di otro banda, ki útil—asosiashon por ta pa hende imperfekto. P’esei, e ta duna nos e spièrtamentu sabí akí: “Esun ku anda ku hende sabí lo ta sabí, ma un kompañero di hende bobo lo sufri daño.” (Pro. 13:20; 1 Kor. 15:33) Nos niun no ke “sufri daño.” Nos tur ke “ta sabí.” Den kaso di Yehova, asosiashon no tin influensia riba dje; e no por hasié mas sabí ni hasié daño. Apesar di esei, ora ta trata di asosiashon, e ta pone un bunita ehèmpel pa nos. Pensa riba e pregunta akí: Ki tipo di hende imperfekto Yehova ta skohe komo su amigu?
12. Ki tipo di hende Yehova ta skohe komo amigu?
12 Yehova a yama patriarka Abraham “mi amigu.” (Isa. 41:8) E hòmber akí tabata un ehèmpel sobresaliente di fieldat, rektitut i obedensia—un hòmber di fe. (Sant. 2:21-23) Esei ta e tipo di amigu ku Yehova ta skohe. Awe tambe ta e tipo di hendenan ei e ta skohe komo amigu. Si Yehova ta skohe hende asina komo su amigu, no ta importante pa nos tambe hasi meskos, esta, kana ku personanan sabí i bira sabí?
13. Kiko por yuda nos skohe bon ora di skohe amigu?
13 Kiko por yuda bo skohe bon amigu? Ora bo ta studia ehèmpel di personahenan bíbliko, esaki por sirbi komo guia pa bo. Konsiderá e amistat ku tabatin entre Ruth i su suegra Noemí, entre David ku Jonatan òf entre Timoteo ku Pablo. (Ruth 1:16, 17; 1 Sam. 23:16-18; Fil. 2:19-22) E motibu di mas importante pakiko e personanan akí tabata bon amigu di otro tabata pasobra kada un tabatin berdadero amor pa Yehova. Abo por haña amigunan ku ta stima Yehova mes tantu ku abo ta stim’é? Bo por ta sigur ku den e kongregashon kristian tin hopi hende asina ku por bira bo amigu. E tipo di amigunan ei lo no perhudiká bo den sentido spiritual. Mas bien, nan lo yuda bo obedesé Yehova, hala mas serka dje i sembra ku e spiritu na bista. (Lesa Galationan 6:7 i 8.) Nan lo yuda bo keda den e amor di Dios.
Mustra Rèspèt pa Outoridat
14. Ki faktornan ta pone ku ta difísil pa nos mustra rèspèt pa outoridat?
14 E di dos manera den kua nos ta demostrá nos amor pa Yehova tin di haber ku outoridat. Nos tin ku mustra rèspèt pa outoridat. Dikon esaki ta asina difísil pa nos tin biaha? Ún motibu ta ku hende ku ta den puesto di outoridat ta imperfekto. Ademas, nos mes tambe ta imperfekto i tin un lucha kontra e inklinashon natural di rebeldia.
15, 16. (a) Dikon ta importante pa nos respetá e personanan ku Yehova a konfia ku e responsabilidat di kuida su pueblo? (b) Ki lès balioso nos ta saka for di e manera ku Yehova a mira e rebelion di e israelitanan kontra Moisés?
15 Tal bes bo ta puntra bo mes: ‘Si ta asina difísil pa nos respetá outoridat, pakiko nos tin ku hasié tòg?’ Básikamente, e kontesta tin di haber ku e kuestion di soberania. Ken lo bo skohe komo bo gobernante soberano? Si nos ta skohe Yehova komo nos Soberano, nos tin ku respetá su outoridat. Si nos no ta hasi esei, ku ki derecho nos por yam’é nos Gobernante? Ademas, por lo general Yehova ta ehersé su outoridat pa medio di hende imperfekto ku e ta enkargá ku e responsabilidat pa kuida su pueblo. Si nos rebeldiá kontra e personanan ei, kon Yehova lo mira nos aktonan?—Lesa 1 Tesalonisensenan 5:12 i 13.
16 Por ehèmpel, ora e israelitanan a murmurá i rebeldiá kontra Moisés, Yehova a mira nan akto di rebeldia komo dirigí kontra dje. (Num. 14:26, 27) Dios no a kambia. Si nos yega asina leu di rebeldiá kontra esnan ku el a pone den puesto di outoridat, nos lo ta rebeldiando kontra su persona!
17. Ki aktitut nos mester hasi esfuerso pa kultivá pa ku e personanan ku tin puesto di responsabilidat den e kongregashon?
17 Apòstel Pablo a revelá ki aktitut nos mester kultivá pa ku e personanan ku tin puesto di responsabilidat den e kongregashon kristian. El a skirbi: “Obedesé boso lidernan i someté boso mes na nan; pasobra nan ta tene warda riba boso alma, komo esnan ku lo duna kuenta. Laga nan hasi esaki ku goso i no ku tristesa, pasobra esaki lo no ta bentahoso pa boso.” (Heb. 13:17) Ta bèrdat ku no ta fásil pa desaroyá e aktitut obediente i sumiso akí. Sinembargo, kòrda ku nos ta hasiendo esfuerso pa keda den e amor di Dios. E meta ei no ta bal tur nos esfuerso?
Keda Limpi den Bista di Yehova
18. Dikon Yehova ke pa nos ta limpi?
18 E di tres manera den kua nos ta demostrá nos amor pa Yehova ta ku nos ta trata pa keda limpi den su bista. Generalmente, mayornan ta traha duru pa hasi sigur ku nan yunan ta limpi. Dikon nan ta hasié? Pa kuminsá, esei ta esensial pa e mucha su salú i bienestar. Ademas, un yu limpi ta bisa algu bon di e famia; e ta revelá e amor i atenshon ku su mayornan tin p’e. Pa e mesun motibunan akí Yehova ke pa nos ta limpi. E sa ku limpiesa ta esensial pa nos bienestar. E sa tambe ku nos limpiesa ta bisa algu di dje komo nos Tata selestial. Esei ta masha importante, pasobra hende por sinti nan atraí na e Dios ku nos ta sirbi ora nan mira e kontraste entre nos i otro hende den e mundu impuru akí.
19. Kon nos por sa ku limpiesa físiko ta importante?
19 Den ki sentido nos tin ku keda limpi? Realmente, den tur sentido. Den Israel di antigwedat, Yehova a splika su pueblo ku nan mester tabata físikamente limpi. (Lev. 15:31) Por ehèmpel, e Lei di Moisés a kontené reglanan tokante kosnan manera eliminashon di sushi, limpiamentu di wea i poron i labamentu di man, pia i paña. (Eks. 30:17-21; Lev. 11:32; Num. 19:17-20; Deu. 23:13, 14) El a rekordá e israelitanan ku nan Dios, Yehova, ta santu—lokual ta nifiká “limpi,” “puru” i “sagrado.” Sirbidónan di e Dios santu tambe mester ta santu.—Lesa Levítiko 11:44 i 45.
20. Den ki maneranan nos mester keda limpi?
20 Pues anto, nos mester ta limpi tantu di paden komo di pafó. Nos ta hasi esfuerso pa keda limpi i puru den nos pensamentunan. Maske kuantu degenerashon seksual tin den e mundu rònt di nos, nos sí ta pega fielmente na Yehova su normanan di limpiesa moral. Loke ta mas importante, nos ta insistí pa tene nos adorashon limpi i ta evitá tur kontaminashon di religion falsu. Semper nos ta tene na mente e spièrtamentu inspirá ku ta pará skirbí na Isaias 52:11: “Sali, sali, bai for di einan, no mishi ku nada impuru; sali for di meimei di dje, purifiká boso mes.” Awe, nos ta keda spiritualmente limpi dor di ni sikiera mishi ku loke nos Tata selestial ta konsiderá komo impuru den sentido religioso. Pa e motibu ei, por ehèmpel, nos ta tene kuidou pa no enbolbí nos mes den selebrashon- i dianan di fiesta basá riba religion falsu ku ta asina popular den e mundu djawe. Ta bèrdat ku no ta fásil pa keda limpi. Pero e pueblo di Yehova ta hasi esfuerso pa hasi esei, pasobra esaki ta yuda nan keda den e amor di Dios.
21. Kon nos por ta sigur ku nos lo keda den e amor di Dios?
21 Yehova ke pa nos keda den su amor pa semper. Pero ta nos kada un tin ku hasi sigur di hasi nos bèst pa keda den e amor di Dios. Nos por hasi esaki dor di sigui Hesus su ehèmpel i demostrá nos amor pa Yehova dor di obedesé Su mandamentunan. Si nos ta hasi asina, nos por ta sigur ku nada “lo por separá nos for di e amor di Dios ku ta den Kristu Hesus nos Señor.”—Rom. 8:38, 39.
Bo Ta Kòrda?
• Kon nos konsenshi por yuda nos keda den e amor di Dios?
• Dikon nos tin ku stima e hendenan ku Yehova ta stima?
• Dikon ta masha importante pa respetá outoridat?
• Ki importansia limpiesa tin pa e pueblo di Dios?
[Preguntanan di Estudio]
[Kuadro na página 27]
Un Buki Ku Ta Promové Bon Kondukta
Na e kongreso di distrito 2008, a presentá un buki di 224 página titulá “Konserbá Boso Mes den e Amor di Dios,” na spañó i na algun otro idioma. Kiko ta e propósito di e buki nobo akí? E ta diseñá pa yuda kristiannan konosé i stima Yehova su normanan i ta enfoká prinsipalmente riba kondukta kristian. Un estudio kuidadoso di e buki “Konserbá Boso Mes den e Amor di Dios” sigur lo konvensé nos asta mas ainda ku un bida na armonia ku e normanan di Yehova ta e mihó manera di biba awor i ku esaki ta hiba nos na bida eterno den futuro.
Mas ku esei, e buki akí ta diseñá pa yuda nos mira ku obedensia na Yehova no ta un karga. Al kontrario, obedensia ta un manera pa mustra Yehova kuantu nos ta stim’é. P’esei, e buki akí lo pone nos puntra nos mes: ‘Dikon ami ta obedesé Yehova?’
Ora algun hende kometé e eror lamentabel di bandoná e amor di Yehova, por lo general, e problema tin di haber ku kondukta i no ku doktrina. P’esei, ta masha importante anto pa nos fortalesé nos amor i apresio pa e lei- i prinsipionan di Yehova ku ta guia nos den nos bida di tur dia! Nos ta konvensí ku e publikashon nobo akí lo yuda e karnénan di Yehova rònt mundu para firme pa loke ta korekto, pa duna prueba ku Satanas ta un mentiroso i, riba tur kos, pa keda den e amor di Dios!—Hudas 21.
[Plachi na página 25]
“Si boso warda mi mandamentunan, boso lo keda den mi amor; meskos ku mi a warda e mandamentunan di mi Tata, i ta keda den su amor”