Diospa kuyakuyninpiyá takyasunchik

“Diospa kuyakuyninpiyá waqaychakuychik [otaq takyaychik] Señorninchik Jesucristopa wiñay kawsaypaq kuyapayakuyninta suyastin.” (JUD. 21.)

1, 2. a) ¿Imaynatam Jehová Diosqa kuyakuyninta qawachiwarqanchik? b) ¿Hinallachu Diosqa kuyawasun imataña ruraptinchikpas? Willamuy imanasqa chayna nisqaykimanta.

JEHOVÁ DIOSQA kuyakuynintam qawachiwanchik tukuy imapi. Hatu-hatun kuyakuyninqa karqa librawananchikpaq Churinta kachamusqanmi. Payqa anchatam runakunata kuyarqa chaymi kuyasqan Churinta qomurqa kay Pachaman hamuspa llapanchikpaq wañunanpaq (Juan 3:16). Chaynatam rurarqa wiñaypaq kawsananchikta hinaspa kuyakuyninpi wiñaypaq kusikunanchikta munaspa.

² Ichaqa, ¿hinallachu Diosqa kuyawasun imataña ruraptinchikpas? Manam, Judas libropi 21 versiculopim kayna niqta leenchik: “Diospa kuyakuyninpiyá waqaychakuychik Señorninchik Jesucristopa wiñay kawsaypaq kuyapayakuyninta suyastin”. Hinaptinqa, ¿imatam rurananchik ‘Diospa kuyakuyninpi waqaychakunanchikpaq’?

¿Imatam rurananchik Diospa kuyakuyninpi waqaychakunanchikpaq?

3. ¿Imatam Jesusqa ruranan karqa Taytanpa kuyakuyninpi takyananpaq?

³ Chaymanta yachanapaq yuyarisun manaraq wañukusqan tuta Jesuspa ima nisqanmanta. Nirqam: “Taytapa kamachikuyninkunata  kasukuspaymi takyachkani paypa kuyakuyninpi, chaynayá qamkunapas kamachikuyniykunata kasukuspa kuyakuyniypi takyaychik”, nispa (Juan 15:10). Jesusqa yacharqam Taytanta kasukuspalla Paypa kuyakuyninpi takyanantaqa. Diospa Churin mana pantaq kachkaspan chayta ruraptinqa, ¡ñoqanchikqa astawanraqchá!

4, 5. a) ¿Imata ruraspataq Dios kuyasqanchikta qawachisun? b) ¿Imanasqataq mana hukmanyananchikchu Diosta kasukunapaqqa?

⁴ Dios kuyasqanchiktaqa kasukuspanchikmi qawachisun. Apostol Juanmi kaynata nirqa: “Diosta kuyaspanchikqa kamachikuyninkunatapas kasukunchikmi, kamachikuyninkunaqa manam llumpay sasachu”, nispa (1 Juan 5:3). Yaqa llapallan runakunam kasukuytaqa mana munankuchu. Bibliam ichaqa niwanchik Diospa kamachikuyninkuna ‘mana llumpay sasa’ kasqanta. Arí, ruray atisqallanchiktam Diosqa mañawanchik.

⁵ Kaypi piensarisun: ¿niwaqchu kuyasqayki amistadnikita mana apay atisqan llumpay llasaq qepita apananpaq? ¡Manamá! Chaynam Jehová Diospas, payqa llumpay llakipayakuq kaspanmi yachan atisqanchikta otaq mana atisqanchiktapas. Bibliam niwanchik: “Payqa yuyanmi allpamanta rurasqa kasqanchikta”, nispa (Sal. 103:14). Diosqa manam haykapipas mañawasunchu mana ruray atisqanchiktaqa. Chaymi mana hukmanyananchikchu kamachiwasqanchikta kasukunapaqqa. Aswanmi, kasukunchik kuyasqanchikta qawachinapaq hinaspa kuyakuyninpi takyanapaq.

Jehová Diospa sumaq regalo qowasqanchik

6, 7. a) ¿Imataq concienciaqa? b) ¿Imaynatam Diospa kuyakuyninpi takyanapaq conciencianchikqa yanapawanchik? Huk rikchanachiywan willamuy.

⁶ Kay sasa tiempopiqa imatapas ruranapaqqa tanteananchikmi. ¿Imatam rurananchik Diospa munasqanman hina tanteasqanchikkuna kananpaq? Jehová Diosqa huk sumaq regalotam qowarqanchik kasukuypi yanapawananchikpaq. Chay regaloqa conciencianchikmi. ¿Imataq concienciaqa? Imayna kasqanchikta willawaqninchik hinaspa imapas rurasqanchikmanta juzgawaqninchikmi. Allinta tanteanapaqmi yanapawanchik, chaymantapas imapas rurarusqanchik allin otaq mana allin kasqanmantam willawanchik (leey Romanos 2:14, 15).

⁷ ¿Imaynatam conciencianchikqa yanapawanchik? Huk rikchanachiywan qawasun. Allqo anyaptinmi dueñonqa ima pasakusqanta qawaq lloqsin ¿Imanasqa? Allqopa anyasqanta uyarispanmi dueñonqa musyan ima peligrokunatapas, wakinpiqa dueñonpa vidantapas salvanmanmi, chaymi yaqa llapallan runakuna allqotaqa uywanku. Chaynallataqmi, conciencianchikpas peligrokunamanta willawanchik hinaspa yanapawanchik Diospa munasqanman hina tanteaspa imatapas ruranapaq chaynataq kawsanapaqpas. Mana concienciayoq kaspaqa manam allinchu tarikuchwan.

8, 9. a) ¿Haykapitaq conciencianchik mana yanapawasunchu? b) ¿Imatam rurananchik conciencianchik allinta yanapawananchikpaq?

⁸ Ichaqa, wakin kutikunapim conciencianchikqa mana allintapas otaq pantasqatapas niwanchikman. Chayna kasqanmanta entiendenapaqqa yuyarisun rimasqanchik allqomanta. Wakinpiqa onqoruspanmi mana anyakunchu otaq yanqa-yanqallata anyakun. Chaynam pasakunman conciencianchikwanpas, manam yanapawanchikmanchu sonqonchikpa munasqanwan atipachikuptinchikqa. Manam qonqananchikchu ‘tukuy imamantapas engañakuqllaña runapa sonqon’ kasqanta (Jer. 17:9;  Pro. 4:23). Chaymi conciencianchikta yanapanapaq Diosqa Palabranta qowarqanchik. Bibliata mana estudiaptinchikqa conciencianchikqa yanqapaqmi kanman (Sal. 119:105). Llakikunapaqmi, achka runakunam sonqonkupa munasqanta ruraspanku Bibliapa nisqantaqa mana kasukunkuchu (leey Efesios 4:17-19). Chaymi qawachin imanasqam runakunaqa concienciayoq kachkaspankupas llumpay mana allinkunata rurasqankumanta (1 Tim. 4:2).

⁹ Manam chayna kaytaqa munanchikchu. Chaymi conciencianchik allinta yanapawananchikpaq Bibliata estudianchik. Hinaspapas conciencianchiktam allinta uyarinchik munasqanchikkuna mana yanqacharunanpaq. Chaynallataqmi, kuyasqanchik iñiqmasinchikkunapa concienciantapas respetanchik. Chaymi kallpanchakunchik iñiqmasinchikta mana urmachinapaq, yuyananchiktaqmi sapakamapa conciencianchik mana chaynalla kasqantapas (1 Cor. 8:12; 2 Cor. 4:2; 1 Ped. 3:16).

10. ¿Imamantam yachasun qatiqninkunapi?

¹⁰ Qawasunchik Dios kasukusqanchikta hinaspa kuyasqanchikta kaykunapi qawachinamanta: 1) Diospa kuyasqan runakunata kuyaspa, 2) Diospa churasqan runakunata kasukuspa hinaspa 3) limpio kanapaq kallpanchakuspa. Kaykunapim kayta qawasun: conciencianchik allinta yanapawananchikpaqqa Bibliapa nisqantam kasukunan.

Diospa kuyasqan runakunata kuyasun

11. ¿Imanasqataq Diospa kuyasqan runakunata kuyananchik?

¹¹ Diospa kuyasqan runakunatam kuyana.  Runakunaqa hukkunapa imayna kawsasqantawan rurasqantam qatipakunchik. Unanchaqninchikqa yachanmi amistadninchikkuna allinninchikpaq otaq mana allinninchikpaq kasqanta. Chaymi kaynata niwanchik: “Yachayniyoq runakunawan juntanakuspaykiqa yachayniyoqmi kanki. Sonso runakunawan juntanakuspam ichaqa sasachakuypi kanki”, nispa (Pro. 13:20; 1 Cor. 15:33). Llapallanchikmi munanchik yachayniyoq kayta, manam munanchikchu sasachakuypi tarikuytaqa. Chaymi Jehová Diospa ejemplonta qatikunanchik. Payqa pimantapas aswan yachayniyoqmi hinaspapas mana allin amistadkunaqa manam imananmanchu, chayna kaspanpas allin amistadkunatam akllan. ¿Pikunatam Diosqa pantaq kachkaptinkupas amistadninpaq akllarqa?

12. ¿Pikunatataq Diosqa amistadninpaq akllan?

¹² Yuyachkanchikchá Diospa ‘amistadnin’ Abraham kasqanta (Isa. 41:8). Payqa reqsisqam karqa: iñiyniyoq, Diosman sonqo, allinkunata ruraq hinaspa kasukuq kasqanwan (Sant. 2:21-23). Chayna runakunatam Diosqa akllan amistadnin kananpaq. Chaynata pay ruraptinqa, ¿manachu ñoqanchikqa amistadninchikkunata astawanraq akllananchik? Hinaptinqa, yachayniyoq runakunawan amistad kaspanchikmi yachayniyoq kasunchik.

13. ¿Imataq yanapawasun allin amistadkunata akllanapaq?

¹³ ¿Imataq yanapawasun allin amistadkunata akllanapaq? Bibliapi ejemplonkunamanta yachaymi. Chaypim willawanchik: Noemiywan llumchuynin Rut hinaspa Davidwan Jonatan chaynataq Pablowan Timoteo amistad kasqankumanta (Rut 1:16, 17; 1 Sam. 23:16-18; Fili. 2:19-22). Kay amistadkunaqa allinmi karqa Jehová Diosta tukuy sonqonkuwan kuyasqankurayku. ¿Chaynachu amistadninchikkuna? ¿Diosta kuyaq amistadkunatachu akllanchik? Segurom kachwan congregacionpi chayna amistadkuna tarinamanta. Chayna amistadkunaqa manam hikutawasunchu Dioswan amistadninchikta yanqacharunapaqqa, aswanmi yanapawasun Jehová Diosta kasukunapaq, yuyayniyoq cristiano kanapaq hinaspa chuya espirituman hina kawsanapaqpas (leey Galatas 6:7, 8). Chaynapim Diospa kuyakuyninpi takyasunchik.

Diospa churasqan runakunata kasukusun

14. ¿Imanasqataq wakinpiqa sasachakunchik Diospa churasqan runakunata kasukunapaq?

¹⁴ Dios kuyasqanchiktaqa qawachisuntaqmi paypa churasqan runakunata kasukuspa. Wakinpiqa sasam kanman. ¿Imanasqa? Ñoqanchikmanta nanachikuq runakunam pantaq kanku hinaspa ñoqanchikpas pantaqmi kanchik, chaykunam kasukunapaqqa sasachawanchik.

15, 16. a) ¿Imanasqataq llaqtanta waqaychananpaq Diospa churasqan runakunata kasukuna? b) ¿Imatam yachanchik Moisespa contranpi israelitakuna hatarisqankumanta?

¹⁵ Diospa churasqan runakunata kasukuy sasa kaptinqa, ¿imanasqataq kasukuna? Kayqa tupanmi Jehová Dios Llapallan Kamachiq kasqanwan. Kamachiqnin kananpaq Diosta akllakuqqa, respetananmi kamachisqanta. Mana chayqa, ¿imaynatataq ninman Reynin kasqantaqa? Chaymantapas, Jehová Diosqa llaqtanta waqaychananpaqmi servichikun pantaq runakunata. ¿Imatam Diosqa ninman paykunata mana kasukuptinchik? (Leey 1 Tesalonicenses 5:12, 13.)

¹⁶ Moisespa contranpi rimaspa israelitakuna hatariruptinkum Jehová Diosqa Paypa contranpi hatarirusqankuta hina qawarqa (Num. 14:26, 27). Diospa churasqan runakunapa contranpi hatariyqa Paypa contranpi hatariymi.

17. ¿Imaynatam qawananchik congregacionpi punta apaqkunata?

 ¹⁷ Apostol Pablom willawanchik congregacionpi punta apaqkunata imayna qawanamanta. Kaynatam qellqarqa: “Pusasuqnikichik runakunata kasukuspayá paykunaman sujetakuychik. Paykunaqa almaykichikmantam cuentallikuchkanku hinaspam Diosman cuentata qonqaku. Kasukuptikichikqa mana llakikuspam kusisqalla pusasunkichik, mana chayqa manam allinnikichikpaqchu kanman”, nispa (Heb. 13:17). Cheqapmá, kasukunapaqmi wakinpiqa sasachakunchik. Ichaqa, kasukuspam Diospa kuyakuyninpi takyasunchik. Chaynaqa, kallpanchakunanchikmi kasukuq kanapaq.

Diospa qawasqanman hina limpio kanapaq kallpanchakusun

18. ¿Imanasqataq Diosqa munan limpio kananchikta?

¹⁸ Jehová Dios kuyasqanchiktaqa qawachisuntaqmi paypa qayllanpi tukuy imapi limpio kaspanchik. Yaqa llapan tayta-mamakunam munanku wawa-churinku limpio hinaspa allin allichasqa kanankuta. ¿Imanasqataq limpio kanankupaq kallpanchakunku? Puntataqa, yachankum wawa-churinkupa cuerponkupaq allin kasqanta. Chaymantapas, warmanku allin allichasqa kaptinqa runakunam tayta-mamankumanta allinta rimanqaku, hinaspam cuentata qokunqaku kuyasqankumanta chaynataq allin cuidasqankumantapas. Jehová Diospas tayta-mamakuna hinam munan serviqninkuna limpio kananchikta. Hanaq pacha Taytanchikqa yachanmi chuya kayqa allinninchikpaq kasqanta hinaspa chuya kasqanchikrayku runakuna paymanta allin rimanankutapas. Runakunaqa manam kallpanchakunkuchu limpio kanankupaqqa, chaymi limpio kaptinchikqa Diosman asuykunmanku.

19. ¿Imanasqataq chuya kayqa ancha allin?

¹⁹ Cristianokunaqa tukuy imapim limpio kananchik. Jehová Diosmi israelitakunata yachachirqa limpio kayqa ancha allin kasqanta (Lev. 15:31). Moisesman qosqan Leypim nirqa: imapas mana serviqkunata wischunankupaq, servicionkuta hinaspa makinkutawan chakinkuta mayllanankupaq chaynataq pachankuta taqsanankupaqpas (Exo. 30:17-21; Lev. 11:32; Num. 19:17-20; Deu. 23:13, 14). Diospa Ley qosqanmi israelitakunata yuyarichirqa Jehová Diosninku limpio hinaspa chuya kasqanta. Chaymi ñoqanchikpas, chuya Diosta serviqkunaqa chuya kananchik (leey Levitico 11:44, 45).

20. ¿Imakunapim limpio kananchik?

²⁰ Ichaqa manam cuerpollanchikchu limpioqa kanan, yuyayninchikwan sonqonchikpas limpiom kanan. Chaymi huchapakuq runakunapa chawpinpi kaspanchikpas, kallpanchakunchik piensasqanchik chuya kananpaq chaynataq kasukunchik Jehová Diospa nisqanman hina kawsanapaq. Astawanqa, kallpanchakunchikmi pantaq religionkunapa yachachisqanmanta karunchakunapaq chaynapi Diosta yupaychasqanchik chuya kananpaq. Isaias 52:11 nisqantam kasukunchik, chaypim  nin: ‘Diospa millakusqan kaqkunata ama hapispayá lloqsiychik. Diosman asuykunaykichikpaq hinayá ruraychik’, nispa. Diosta yupaychaspam chuya kanchik, hinaspam karunchakunchik mana allin yachachikuykunamanta. Chaymi karunchakunchik religionkunapa fiestankumanta hinaspa costumbrenkumantapas. Arí, limpio kayqa sasam, ichaqa limpio kaspanchikmi Diospa llaqtanpi kaqkunaqa kuyakuyninpi takyasunchik.

21. ¿Imatam rurananchik Diospa kuyakuyninpi takyanapaq?

²¹ Jehová Diosqa munanmi kuyakuyninpi wiñaypaq takyananchikta. Chaypaqqa sapakamam kallpanchakunanchik. Jesuspa ejemplontayá hinalla qatikusun hinaspa Dios kuyasqanchikta qawachisun kamachikuyninkunata kasukuspa. Chaynapim mana imapas rakiwasunchu Jesucristowan reqsichiwasqanchik “Diospa kuyakuyninmantaqa” (Rom. 8:38, 39).

¿Yuyachkankichu?

• ¿Imaynatam conciencianchik yanapawanchik Diospa kuyakuyninpi takyanapaq?

• ¿Imanasqataq kuyananchik Diospa kuyasqan runakunata?

• ¿Imanasqataq respetananchik Diospa churasqan runakunata?

• ¿Imanasqataq Diosta serviqkunapaq limpio kayqa ancha allin?

[Kay yachachikuypa tapukuyninkuna]

[20 kaq paginapi dibujo hinaspa recuadro]

DIOSPA MUNASQANMAN HINA KAWSANAPAQ QELLQA

2008-2009 watapim kimsa punchaw kaq asambleapi ‘Diospa kuyakuyninpiyá takyasunchik’ niq 224 paginayoq librota chaskirqanchik. ¿Imapaqmi kay mosoq libroqa rurasqa kachkan? Diospa serviqninkuna paypa kamachikuyninkunata allinta yachaspa astawan chaninchanankupaqmi. Diospa munasqanman hina kawsanapaq yachachiq kay librota allinta estudiaspaqa, aswan kallpanchasqam kasunchik Jehová Diospa nisqankunata kasukunapaq, chaymi wiñay kawsayman apawasunchik.

Kay libroqa entiendechiwasunmi Jehová Diosta kasukuy mana sasa kasqanmanta, aswanqa kasukuspa kuyasqanchikta qawachinamanta. Leespanchikmi tapukunanchik: “¿Imanasqataq Jehová Diosta servichkani?”, nispa.

Ichaqa, wakin iñiqmasinchikkunam Diosmantawan kuyakuyninmanta karunchakurunku. ¿Imanasqa? Yaqa llapanpiqa manam Bibliapa yachachisqankunata mana entiendespankuchu, aswanqa mana allinkuna rurasqankuraykum. Chaymi kallpanchakunanchik Diospa kamachikuyninkunata astawan kuyanapaq hinaspa chaninchanapaqpas. Arí, Dios serviqkunatam enteron Allpapi kay mosoq libroqa yanapanqa paypa kamachisqanta defiendenankupaq, Satanas llulla kasqanta qawachinankupaq hinaspa Diospa kuyakuyninpi takyanankupaqpas (Jud. 21).

[18 kaq paginapi dibujo]

“Taytapa kamachikuyninkunata kasukuspaymi takyachkani paypa kuyakuyninpi, chaynayá qamkunapas kamachikuyniykunata kasukuspa kuyakuyniypi takyaychik”