“Diospa munakuyninpi allinta takyaychis”

“Diospa munakuyninpi allinta takyaychis, Señorninchis Jesucristoq khuyapayakuyninpi, wiñay kawsay qonasuykichista suyakuychis.” (JUD. 21.)

1, 2. a) ¿Imaynatan Jehová Dios munakuwasqanchista rikuchiwaranchis? b) ¿Takyasunmanchu Diospa munakuyninpi munasqanchisman hina imatapas ruwaqtinchis? Willay imarayku chhaynata kutichinki.

JEHOVÁ DIOSQA imaymanapin munakuyninta rikuchiwaranchis. Astawanqa huchamanta kacharichiwananchispaq Churinta kachamuspa. Runakunata anchata munakusqanraykun mana iskayaspa munakusqan Churinta kay Hallp’aman kachamuran ñoqanchisrayku wañunanpaq (Juan 3:16). Chaytaqa ruwaran wiñay kawsayman aypananchista munasqanraykun, hinallataq munakuyninpi wiñaypaq takyananchispaq.

² Ichaqa munasqanchisman hina imatapas ruwaqtinchis, ¿takyasunmanchu Diospa munakuyninpi? Manan, Judas cartan 21 versiculopi nin: “Diospa munakuyninpi allinta takyaychis, Señorninchis Jesucristoq khuyapayakuyninpi, wiñay kawsay qonasuykichista suyakuychis”, nispa. “Diospa munakuyninpi allinta takyaychis” nisqanpin yachanchis chaypaq kallpachakunanchista. ¿Imatan ruwananchis Diospa munakuyninpi takyananchispaq?

¿Imatan ruwananchis Diospa munakuyninpi takyananchispaq?

3. ¿Imatan Jesús ruwanan karan Taytanpa munakuyninpi takyananpaq?

³ Chaypaqqa qhawarisunchis wañupunanpaq pisillaña kashaqtin Jesuspa nisqanta, paymi niran: “Kamachikuyninkunata hunt’ankichis chayqa, munakushallasqaykichispunin, imaynan Yayaypa kamachikuyninkunata  hunt’aqtiy payqa munakuwan hinata”, nispa (Juan 15:10). Jesusqa yacharanmi Taytanpa munakuyninpi kananpaq kamachikuyninkunata kasukunanta. Diospa Churinqa mana huchayoqña kashaspapas kasukuqtaq karan chayqa, ñoqanchisqa astawanraqmi kasukunanchis.

4, 5. a) ¿Imata ruwaspan astawanqa rikuchinchis Jehová Diosta munakusqanchista? b) ¿Imaraykun mana sasapaqchu qhawarinanchis Diospa kamachikuyninkuna kasukuyta?

⁴ Jehová Diosta munakusqanchistaqa rikuchisunman payta kasukuspan. Chaymantan apóstol Juan niran: “Diosta munakuspanchisqa kamachikusqankunatan kasukunchis, kamachikuyninkunaqa manataqmi sinchi sasachu”, nispa (1 Juan 5:3). Yaqa llapa runakunan mana kasukuyta munankuchu. Ichaqa chay textoq nisqan hina, Diospa kamachikuyninkunaqa manan “sinchi sasachu” kasukunapaq. Arí, Jehová Diosqa manan hayk’aqpas mana atinanchistaqa mañawanchischu.

⁵ ¿Niwaqchu aswan munakusqayki amigoykita mana atinan llasa q’epita q’epinanpaq? ¡Manapunin! Chhaynallataqmi Jehová Diospas munakuq kayninpi yachan maykamalla atisqanchista. Bibliaq nisqan hina, Diosqa ‘yuyarinmi ñut’u hallp’a kasqanchista’ (Sal. 103:14). Payqa manan hayk’aqpas mañawasunmanchu mana atinanchis sinchi sasa ruwaytaqa. Chayraykun mana sasapaqchu qhawarinanchis kamachikuyninkuna kasukuyta. Aswanpas kasukuspaqa Jehová Diosta munakusqanchistan rikuchinchis, munakuyninpi takyayta munasqanchistapas.

Jehová Diospa sumaq regalon

6, 7. a) ¿Imataq concienciari? b) ¿Imaynatan conciencia yanapawanchis Diospa munakuyninpi takyananchispaq? Rikch’anachiywan willay.

⁶ Kay sasa tiempopiqa imaymanatan decidinanchis. ¿Imatan ruwananchis ima decidisqanchispas Diospa munayninman hina kananpaq? Jehová Diospa regalo qowasqanchismi anchata yanapawanchis kasukuq kananchispaq. Chayqa conciencianchismi. ¿Imataq concienciari? Ñoqanchis kikinchista qhawarikuyta atisqanchismi, juez hinan juzgawanchis ima ruwasqanchismantapas. Imatapas decidinanchis raton yanapawanchis ima ruwananchista qhawarinanchispaq, chaymantapas qhawarichiwanchismi imakunataña ruwasqanchista, niwanchistaq allinchus manachus, chaninchus mana chaninchus chayta (leeychis Romanos 2:14, 15).

⁷ ¿Imaynatan conciencia yanapawanchis? Kaywan rikch’anachisun. Huk runan karuta rispa ch’inneq cheqaspi tarikun, chaypiqa manan ñanpas nitaq ima señalpas kanchu. Ichaqa maychus chayananmanmi seguro rishan. ¿Imaynatan acertan? Brujulaq yanapayninwanmi. Chay herramientaqa muyun relojmanmi rikch’akun, imanniyoq agujantaq norte ladollaman señalan. Mana brujulan kanmanchu chayqa, chinkasqan tarikunman manan mayman riytapas atinmanchu. Chhaynallataqmi ñoqanchispas, sichus mana conciencianchis kanmanchu chayqa chinkasqa tarikusunman, manataq atisunmanchu allin kaqta chanin kaqta decidiyta.

8, 9. a) ¿Imaynapin conciencianchis waqllinman? b) ¿Imatan ruwasunman conciencianchis allinta yanapawananchispaq?

⁸ Conciencianchispas brújula hinan pantanman. Sichus ch’inneq cheqaspi tarikuq runa brujulaq kasqanman imanta churanman chayqa, manañan agujaqa nortemanchu señalanman. Chhaynallataqmi, sichus sonqonchispa munasqanwan atipachikusunman chayqa, conciencianchisqa manañan allintachu yanapawasunman. Ama qonqasunchu, “runaq sonqonqa tukuy imamantapas aswan q’otukuqmi, millay ruwaqtaq kanpas” (Jer. 17: 9; Pro. 4:23). Ichaqa ch’inneqpi tarikuq runataqa pisillatan brújula yanapanman mana mapayoq kaqtinqa. Chay hinallataqmi, Bibliawan mana yanapachikuqtinchisqa conciencianchispas mana valenmanchu (Sal. 119:105). Askha runan sonqonkuq munasqanwan aysachikunku, manataq Bibliapi Diospa kamachikuyninkunapiqa yuyaykunkuchu (leeychis Efesios 4:17-19). Chaypin yachanchis, imarayku askha runakuna concienciayoqña  kashaspapas tukuy imaymana sinchi millaykuna ruwasqankuta (1 Tim. 4:2).

⁹ Ñoqanchisqa manan chhaynachu kayta munanchis. Chayraykun Diospa Simin Qelqawan yanapachikunchis allin concienciayoq kananchispaq. Sonqonchispa munayninkuna conciencianchista waqllichinanmantaqa imatachus niwasqanchistan kasukunchis. Chaymantapas respetanchismi iñiqmasinchiskunaq conciencianta. Chayraykun kallpachakunchis mana pitapas misk’achinanchispaq, yuyaykunchismi conciencianchis hukkunaq conciencianwan mana kaqllachu kasqanpi (1 Cor. 8:12; 2 Cor. 4:2; 1 Ped. 3:16).

10. ¿Imakunamantan yachasun qatimuq parrafokunapi?

¹⁰ Kunanqa qhawarisunchis imaynatas Jehová Diosman rikuchisunman kasukusqanchista, sonqomanta munakusqanchistapas: 1) paypa munakusqan runakunata munakuspa, 2) umalliqkunata respetaspa, 3) limpio ch’uya kananchispaq kallpachakuspa. Chay kinsa ruwaykunapin qhawarisunchis conciencianchis allinta yanapawananchispaqqa Bibliaq nisqanwan pusachikunamanta.

Diospa munakusqan runakunata munakusun

11. ¿Imaraykun munakunanchis Jehová Diospa munakusqan runakunata?

¹¹ Ñawpaqta, Jehová Diospa munakusqan runakunatan munakunanchis. Imaynan esponjaqa unuta ch’onqan, chay hinatan runakunapas muyuriqninchispi kaq runakunaq ruwasqanta ruwanchis. Kamaqninchisqa yachanmi amigonchiskuna mana allinpaq samaywananchista otaq allinninchispaq kanantapas. Chayraykun yuyaychawanchis: “Yachayniyoqkunawan puriqqa yachayniyoqmi kapunqa, mana yuyayniyoqkunawan puriqmi ichaqa waqllipunqa”, nispa (Pro. 13:20; 1 Cor. 15:33). Llapanchispas yachayniyoqmi kayta munanchis, manan munasunmanchu uma nanaykunapi tarikuytaqa. Chayraykun Jehová Diosmanta  yachananchis. Jehová Diosqa manan aswan yachayniyoqman tukunmanchu nitaqmi pipas mana allinkunawanqa samayunmanchu, chhayna kaspapas allintan amigonkunata akllan. ¿Pikunatan akllaran amigonkuna kananpaq?

12. ¿Pikunatan Jehová Dios akllan amigonkuna kanankupaq?

¹² Yuyarishanchischá Jehová Dios Abrahamta “amigoy” nispa waqyasqanta (Isa. 41:8). Chay runaqa allin iñiyniyoq Diospaq hunt’aq sonqon karan, chanin kaqta ruwaq kasukuq ima (Sant. 2:21-23). Chhayna clase amigokunatan Jehová Diosqa maskhan. Payqa allinta qhawarispataq amigonkunata akllan chayqa, ¿manachu ñoqanchisqa astawanraq pay hina allin amigokunata akllananchis? Chhaynaqa, yachayniyoq runakunawan purisun yachayniyoq kananchispaq.

13. ¿Iman yanapawasun allin amigokunata akllananchispaq?

¹³ ¿Iman yanapawasunman allin amigokunata akllananchispaq? Bibliapi tarikuq ejemplokunan. Yuyaykusun, Rutwan Noemiwan, Davidwan Jonatanwan, Timoteowan Pablowan sumaq amistadta ruwasqankupi (Rut 1:16, 17; 1 Sam. 23:16-18; Fili. 2:19-22). Paykunaqa allin amigontin karanku anchata Diosta munakusqankuraykun. Ñoqanchisrí, ¿Jehová Diosta anchata munakuq runakunatachu amigonchis kanankupaq akllanchis? Congregacionpiqa askhatan chhayna amigokunata tarisunman. Paykunaqa manan kallpachasunkikuchu Diospa kamachikuyninkunata p’akinaykipaq, aswanpas yanapasunkin Diosta kasukunaykipaq, cristiano kawsayniykipi ñawparinaykipaq, espirituq munasqanman hina tarpunaykipaqpas (leeychis Gálatas 6:7, 8). Chayta ruwaspan Diospa munakuyninpiqa takyasun.

Umalliqkunata respetasun

14. ¿Imaraykun mayninpi umalliqkunata respetay sasa?

¹⁴ Chaymantapas Jehová Dios munakusqanchistaqa rikuchisun churasqan umalliqkunata respetaspa. Mayninpin ichaqa sasa kanman chay runakunata respetay. ¿Imarayku? Chay umalliqkunaqa pantaq runan kanku huchayoq kasqankurayku. Ñoqanchispas pantanchismi, chayraykun lliw runatapas sonqonchis mana kasukuq kayman aysawanchis.

15, 16. a) ¿Imaraykun respetananchis llaqtanta qhawarinankupaq Diospa churasqan umalliqkunata? b) ¿Imatan yachanchis Israel runakuna Moisespa contranpi sayarisqankumanta?

¹⁵ Chayrayku yaqapaschá pipas tapukunman: “Umalliqkunata respetayqa nishu sasataq chayqa, ¿imaraykutaq paykunata respetananchis?” nispa. Chayqa Dioslla kamachinanpaq derechoyoq kasqanwanmi tupan. Maypachachus huk runa Jehová Diosta kamachiqninta hina akllan chayqa, respetananmi payta kasukuspa. Mana chayqa, ¿imaynatan rikuchinman Reyta hina chaskisqanta? Chaymantapas, Jehová Diosqa huchayoq runakunatan umalliqta churan llaqtanta qhawarinankupaq. Paykunata mana kasukuqtinchis, ¿imaynatan Jehová Dios qhawariwasunman? (Leeychis 1 Tesalonicenses 5:12, 13.)

¹⁶ Israel runakuna Moisesta rimapakuspanku mana kasukusqankutaqa, paypa contranpipas sayarishankuman hinatan Jehová Diosqa qhawariran (Núm. 14: 26, 27). Kunanpas Diosqa kaqllatan yuyaykun. Diospa churasqan umalliqkunata mana kasukuspaqa, paytan mana kasukushanchischu.

17. ¿Imaynatan qhawarinanchis congregacionpi umalliqkunata?

¹⁷ Apóstol Pablon niwanchis Diospa llaqtanpi umalliqkunata imayna qhawarinanchista. Kaytan qelqaran: “Umalliykichiskunata uyariychis, paykunata kasuychis, paykunaqa qankunatan michishallasunkichispuni, qankunamanta Diosman cuenta qonayoq kasqankuta yachaspa. Paykunata kasuychis kusisqa llank’anankupaq, mana chayqa llakisqan kankuman, qankunapaqpas manan allinniykichispaqchu kanman”, nispa (Heb. 13:17). Yachasqanchis hina, manan facilchu huch’uyaykukuspa kasukuyqa. Ichaqa Diospa munakuyninpi takyananchispaqqa kasukuqmi kananchis. Chayraykun ¡ancha allinpuni chaypaq kallpachakusqanchisqa!

 Kallpachakusun Diospa ñawpanpi limpio ch’uya kananchispaq

18. ¿Imaraykun Jehová Dios munan limpio ch’uya kananchista?

¹⁸ Kunanqa qhawarisunchis imaynatas Jehová Dios munakusqanchista rikuchisunman, limpio ch’uya kananchispaq kallpachakuspanchis. Yaqa llapa tayta mamakunan wawankuta limpiota sumaq p’achasqata purichinku. ¿Imaraykun kallpachakunku wawanku limpio kananpaq? Wawanku mana onqonanpaqmi. Chaymantapas, huk runakuna wawata limpiota qhawarispankuqa allintan tayta mamankumanta rimanku, hinaspa yuyaykunku wawankuta anchata munakuspa allinta uywasqankuta. Chayraykun Jehová Diospas munan limpio ch’uya kananchista. Hanaq pachapi kaq Taytanchisqa yachanmi limpio kaspa mana onqonanchista, runakunapas qhawariwaspanchis paymanta sumaqta rimanankuta. Chayqa anchatan runakunata yanapanqa, qhelli kawsaypi puriq runakunamanta hukniray kasqanchista rikuspan paykunaqa Dios serviyta munanqaku.

19. ¿Imaraykun kallpachakunanchis limpio kananchispaq?

¹⁹ Cristianokunaqa tukuy imapin limpio ch’uya kananchis. Ñawpa Israel runakunatan Jehová Dios qhawarichiran limpio kay ancha importante kasqanta (Lev. 15:31). Diospa kamachisqanman hinaqa, imaymana qhellitan wikch’unanku karan, chaymantapas limpiotan serviciokunata maqchinanku karan, hinallataq makinkuta, chakinkuta, p’achankutapas t’aqsananku karan (Éxo. 30:17-21; Lev. 11:32; Núm. 19:17-20; Deu. 23:13,14). Chay kamachikuymi Israel runakunata yuyarichiran Jehová Diosqa santo kasqanta, chayqa kaqllan limpio, ch’uya, sagrado kaywan. Jehová Diosqa ch’uya Diosmi chayraykun serviqninkunapas ch’uya kananchis (leeychis Levítico 11:44, 45).

20. ¿Imakunapi limpio kananchispaqmi kallpachakunanchis?

²⁰ Ichaqa manan cuerpollanchispichu limpio kashananchis, yuyayninchispi sonqonchispipas limpion kashananchis. Kallpachakunchismi yuyayninchis ch’uya kananpaq, Diospa kamachikuyninkunata kasukunanchispaqpas, imaymana qhelli kawsaypiña runakuna purishanku chaypas. Astawanqa kallpachakunchis Dios yupaychayninchis ch’uya kananpaqmi, chayraykun mana qhellichakunchischu pantasqa religionkunaq ruwayninkunawan. Manan qonqanchischu Isaías 52:11 textoq nisqanta, chaypin nin: “¡Lloqsiychis, lloqsiychis Babiloniamanta! ¡Ama qhellitapas llamiychischu! Señor Diospa kaqninkunata apaqkuna, Babiloniamanta lloqsiychis, hinaspa ch’uyanchakuychis”, nispa. Diosman yupaychayninchispiqa limpio kanchis, pantasqa religionkunaq ima ruwasqankuwanpas mana qhellichakuspanchis. Chayraykun pantasqa religionpa fiestankunawan costumbrenkunawanpas mana chhaqrukunchischu. Sasaña kaqtinpas kallpachakushallasun ch’uya kananchispaq chayqa, Diospa munakuyninpin takyasun.

21. ¿Imatan ruwananchis Diospa munakuyninpi takyananchispaq?

²¹ Jehová Diosqa wiñaypaq munakuyninpi takyananchistan munan. Chaypaqmi ichaqa sapankanchis anchata kallpachakunanchis. Chhaynaqa tukuy yuyaywan Jesuspa ejemplonta qatikusun, Dios munakusqanchistataq rikuchisun kamachikuyninkunata kasukuspa. Chayta ruwasunchis chayqa, manan imapas “Señorninchis Jesucristopi Diospa munakuyninmantaqa t’aqawasunchischu” (Rom. 8:38, 39).

¿Yuyarishankichu?

• ¿Imaynatan conciencia yanapawanchis Diospa munakuyninpi takyananchispaq?

• ¿Imaraykun Diospa munakusqan runakunata munakunanchis?

• ¿Imaraykun umalliqkunata respetananchis?

• ¿Imaraykun Diosta serviqkuna kallpachakunanchis limpio ch’uya kananchispaq?

[Tapuykuna]

[20 paginapi foto recuadropiwan]

CRISTIANO KAWSAYNINCHISPI YANAPAWAQNINCHIS LIBRO

2008-2009 watakunapi aparikuq hatun huñunakuykunapin lloqsimuran “Diospa munakuyninpi allinta takyaychis” libro, 224 paginayoq. ¿Imapaqmi ruwakuran chay mosoq libro? Cristianokuna Diospa kamachikuyninkunata aswan allinta reqsinankupaqmi anchata munakunankupaqpas. Chay libroqa cristianokuna imayna comportakunankumantan rimashan, chayrayku tukuy yuyaywan estudiasun chayqa, allinta yachasun Diospa kamachikuyninkunata kasukuy imamantapas aswan allin kasqanta, chhaynapi wiñay kawsayman aypananchispaq.

Chaymantapas, chay libron yanapawanchis Diosta kasukuyta mana llasa q’epita hinachu qhawarinanchispaq, aswanpas kasukuspaqa Diosta munakusqanchistan rikuchinchis. Leespan tapukunanchis: “¿Imaraykun Jehová Diosta servishani?” nispa.

Wakin cristianokunaqa Diosmantan munakuyninmantawan karunchakapuranku, chayqa llakichiwanchismi. ¿Imaraykun chayta ruwaranku? Manan Bibliapi yachachikuykunata mana entiendesqankuraykuchu aswanpas mana allin ruwayman urmasqankuraykun. Chayraykun kallpachakunanchis Diospa kamachikuyninkunata aswanta valorananchispaq, chaykunaqa sapa p’unchaymi pusawanchis. Chay libroqa anchatachá yanapanqa mundontinpi Jehová Diospa ovejankunata kamachikuyninkunata kasukunankupaq, Satanás llulla kasqanta rikuchinankupaq, astawanqa Diospa munakuyninpi takyanankupaq (Jud. 21).

[18 paginapi dibujo]

“Kamachikuyninkunata hunt’ankichis chayqa, munakushallasqaykichispunin, imaynan Yayaypa kamachikuyninkunata hunt’aqtiy payqa munakuwan hinata”