“Ia Tumau Outou i le Alofa o le Atua”
“Ia Tumau Outou i le Alofa o le Atua”
“Ia tumau outou i le alofa o le Atua, a o faatalitali atu i le alofa mutimutivale o lo tatou Alii o Iesu Keriso, lea e iʻu ai i le ola e faavavau.”—IUTA 21.
1, 2. Ua faapefea ona faaalia e Ieova lona alofa iā i tatou, ma e faapefea ona tatou iloa e lē faafuaseʻi ona ia faatumau i tatou i lona alofa?
E ANOANOAʻI auala ua faaalia ai e Ieova le Atua lona alofa iā i tatou. O lea la, e lē fesiligia le faamaoniga aupito sili o le alofa o Ieova, ua ia saunia ai le taulaga togiola. E matuā tele lava lona alofa i le fanau a tagata, ua ia auina mai ai lona Alo pele i le lalolagi ina ia maliu mo i tatou. (Ioa. 3:16) Na faia e Ieova lenei mea ona e finagalo o ia, ia tatou ola e faavavau, ma ia tatou maua aogā e faavavau mai i lona alofa!
2 Ae peitaʻi, pe e tatou te manatu o le a faafuaseʻi ona faatumau i tatou e Ieova i lona alofa, e tusa lava po o ā filifiliga e tatou te faia? E leai. Auā i le Iuta fuaiupu e 21, ua tatou faitau ai i lenei apoapoaʻiga: “Ia tumau outou i le alofa o le Atua, a o faatalitali atu i le alofa mutimutivale o lo tatou Alii o Iesu Keriso, lea e iʻu ai i le ola e faavavau.” O le faaupuga “ia tumau outou i le alofa o le Atua,” e faaalia ai e manaʻomia ona tatou faia se gaoioiga. O le ā la e ao ona tatou faia ina ia tumau ai i le alofa o le Atua?
E Faapefea Ona Tatou Tumau i le Alofa o le Atua?
3. O le ā le mea na fetalai i ai Iesu e tāua iā te ia, ina ia tumau ai i le alofa o lona Tamā?
3 E tatou te maua le tali i lenā fesili, i fetalaiga a Iesu i le pō mulimuli o lona soifuaga i le lalolagi. Na ia fetalai e faapea: “Afai tou te tausi i aʻu poloaʻiga, tou te tumau ai i loʻu alofa, e pei ona ou tausi i poloaʻiga a le Tamā, ma ou tumau ai i lona alofa.” (Ioa. 15:10) Na silafia e Iesu o le tausia o poloaʻiga a Ieova, sa tāua i le faatumauina o se faiā lelei ma lona Tamā. Afai o le tulaga lenā i le Alo lelei atoatoa o le Atua, pe e lē o le tulaga foʻi lenā e ao ona iā i tatou?
4, 5. (a) O le ā le auala sili e faaalia ai e tatou te alolofa iā Ieova? (e) Aiseā e leai ai se māfuaaga e lē fiafia ai i le manatu, ia usitaʻia poloaʻiga a Ieova?
4 O le auala sili e faaalia ai e tatou te alolofa iā Ieova, o le usiusitaʻi lea iā te ia. Ua faaupu e le aposetolo o Ioane e faapea: “Auā o le alofa lenei i le Atua, ia tatou tausi i ana poloaʻiga; ma e lē mamafa ana poloaʻiga.” (1 Ioa. 5:3) O le mea moni, o le usiusitaʻi e lē o se mea e fiafia i ai le toʻatele o tagata i aso nei. Ia mātau foʻi le fuaitau, “e lē mamafa ana poloaʻiga.” E lē o talosaga mai Ieova iā i tatou e faia se mea e faigatā.
5 O se faataʻitaʻiga: Pe e mafai ona e fai atu i sau uō pele e ave se mea e te iloa e mamafa tele mo ia? E leai! E sili atu le agalelei o Ieova nai lo i tatou, ma e sili atu lona silafia o mea e gata mai ai lo tatou mafai. Ua faamautinoa mai e le Tusi Paia, “ua manatu [Ieova] o le efuefu lava i tatou.” (Sala. 103:14) E lē taitai ona ia talosaga mai i se mea e tatou te lē mafaia. E leai la se māfuaaga e tatou te lē fiafia ai i le manatu, ia usitaʻia poloaʻiga a Ieova. I le isi itu, e tatou te talisapaia le avanoa lelei e faaalia ai lo tatou alolofa i lo tatou Tamā i le lagi, ma mananaʻo e tumau ai i lona alofa.
Se Meaalofa Faapitoa Mai iā Ieova
6, 7. (a) O le ā lea mea e taʻu o le lotofuatiaifo? (e) Faataʻitaʻi mai le auala e fesoasoani ai le lotofuatiaifo iā i tatou ia tumau i le alofa o le Atua.
6 I lenei lalolagi fenuminumiaʻi o loo tatou ola ai, e tele filifiliga e manaʻomia ona fai e aofia ai lo tatou usiusitaʻi i le Atua. E faapefea ona tatou mautinoa ua ōgatusa nei filifiliga ma le finagalo o le Atua? Ua foaʻi mai e Ieova iā i tatou se meaalofa, e mafai ona fesoasoani tele iā i tatou i lenei mataupu o le usiusitaʻi. O le lotofuatiaifo lea. O le ā lea mea e taʻu o le lotofuatiaifo? O se ituaiga o tomai faapitoa e mafai ona fua i ai a tatou gaoioiga, uiga ma a tatou filifiliga. Ua avea le lotofuatiaifo e pei o se faamasino i totonu o i tatou, e mafai ai ona tatou iloa filifiliga o loo tatou fesagaʻi i le olaga, pe mafaufau ai foʻi i gaoioiga ua tatou faia ma fua i ai pe e lelei pe e leaga, pe e saʻo pe sesē.—Faitau le Roma 2:14, 15.
7 E faapefea ona tatou faaaogā lelei le lotofuatiaifo? Seʻi manatu i se faataʻitaʻiga. O se tagata malaga o loo savali i se togāvao telē e leai ni auala savali, leai ni auala tetele, ma e leai ni faailoilo. Peitaʻi, ua mafai lava ona taunuu i le mea e alu i ai. E faapefea? Auā sa iai sana tapasā. O se tamaʻi masini ua uma ona faatulaga e faailoa mai ai itulagi e fā, ma se nila e faasaga pea i le itu i mātū. Pe a na leai sana tapasā, semanū e na te lē iloa lona auala. E faapena foʻi se tagata e leai se lotofuatiaifo, e matuā lē mafai lava ona ia faia ni filifiliga tonu i tulaga tau amio, ma amioga tatau i le olaga.
8, 9. (a) O ā tapulaa o o tatou lotofuatiaifo e ao ona tatou manatua? (e) O le ā e ao ona fai ina ia faamautinoa ai o loo aogā o tatou lotofuatiaifo iā i tatou?
8 Peitaʻi, e pei lava o se tapasā, e iai foʻi tapulaa o o tatou lotofuatiaifo. Pe a tuu e se tagata malaga o loo savali se sila i autafa o le tapasā, o le a sipa ese le nila mai le itu i mātū. Pe a tatou faataga faanaunauga o o tatou loto e pulea faaiʻuga e tatou te faia, o le ā le iʻuga? O le a faasesēina foʻi o tatou lotofuatiaifo e o tatou faanaunauga manatu faapito. O loo lapataʻi mai le Tusi Paia e faapea, “E sili le faaʻoleʻole o le loto i mea uma, ma ua matuā leaga lava.” (Iere. 17:9; Faata. 4:23) E lē gata i lea, pe afai e leai se faafanua e saʻo ma maufaatuatuaina a le tagata malaga, o le a leai foʻi se aogā o lana tapasā. I se tulaga tutusa, pe afai e tatou te lē faalagolago i taʻiala mautū ma lē masuia a le Afioga a le Atua, o le a lē aogā o tatou lotofuatiaifo. (Sala. 119:105) E faanoanoa lava ona e toʻatele tagata o lenei lalolagi ua soona faamuamua faanaunauga o le loto, ae e itiiti pe e leai foʻi se uaʻi atu i tapulaa o loo maua i le Afioga a le Atua. (Faitau le Efeso 4:17-19.) O le māfuaaga lenā e faia ai e le toʻatele o tagata mea leaga, e ui o loo iai se lotofuatiaifo.—1 Timo. 4:2.
9 E tatau ona tatou maumauaʻi ia aua nei o tatou faapena! A ia faaauau pea ona tatou faataga le Afioga a le Atua, e aʻoaʻoina ma toleniina o tatou lotofuatiaifo ina ia aogā iā i tatou. E ao ona tatou faalogo i o tatou lotofuatiaifo ua uma ona aʻoaʻoina i le Tusi Paia, nai lo o le faataga o o tatou faanaunauga manatu faapito e puleaina le lotofuatiaifo. Ae i le taimi e tasi, e ao foʻi ona tatou taumafai e amanaʻia lotofuatiaifo o o tatou uso ma tuafāfine. Ia tatou ʻalofia le faia o mea e latou te tausuai ai, ma ia manatua, atonu e iai mea e lē faatagaina e o latou lotofuatiaifo e fai, e ese mai iā i tatou.—1 Kori. 8:12; 2 Kori. 4:2; 1 Pete. 3:16.
10. O ā vala e tolu o le olaga o le a tatou talanoaina nei?
10 Seʻi o tatou iloiloina nei ni vala se tolu o le olaga, e tatou te faaalia ai le alofa iā Ieova e ala i le usiusitai. I na vala taʻitasi, e iai se vaega fai a le lotofuatiaifo, ae e tatau ona taʻitaʻia e tapulaa tau amio o le Tusi Paia. O vala nei e tolu e ao ona tatou usiusitai ai iā Ieova: (1) E tatou te alolofa i ē e alofa i ai Ieova, (2) e tatou te faaaloalo i ē ua tuu atu i ai le pule, ma (3) e tatou te taumafai ia tumau ona mamā i le silafaga a le Atua.
Alolofa i Ē e Alofa i ai Ieova
11. Aiseā e ao ai ona tatou alolofa i ē e alofa i ai Ieova?
11 Muamua, e ao ona tatou alolofa i ē e alofa i ai Ieova. Pe a oo i faatasitasiga, e pei tagata o ni omomi. E taaʻina i tatou i mea o loo siʻomia ai i tatou. Ua silafia lelei e Lē na faia i tatou le tulaga lamatia, faapea ma aogā o faatasitasiga i tagata lē lelei atoatoa. O le māfuaaga lea na ia aumaia ai le fautuaga atamai lenei: “O lē latou te feoaʻi ma tagata popoto, e poto lava ia; a o le uō a ē valelea, e leaga ai lava ia.” (Faata. 13:20; 1 Kori. 15:33) E leai ma se tasi o i tatou e manaʻo ia “leaga.” E tatou te mananaʻo uma ia “popoto.” E leai se tasi e sili atu lona atamai nai lo o Ieova, ma e lē mafai lava ona faia e se isi se mea e leaga ai o ia. A ua ia faataatia se faaaʻoaʻoga lelei mo i tatou pe a oo i faatasitasiga. Seʻi manatu foʻi, o ai tagata lē lelei atoatoa na filifilia e Ieova e fai ma ana uō?
12. O ā ituaiga tagata e filifilia e Ieova e fai ma ana uō?
12 Sa taʻua e Ieova le augātamā o Aperaamo o “laʻu uō.” (Isa. 41:8) O ia o se tagata e mataʻina lona faamaoni, amiotonu, ma usiusitai, ma o ia foʻi o se tagata faatuatua. (Iako. 2:21-23) O le ituaiga tagata lenā e filifilia e Ieova e fai ma ana uō. E na te filifilia foʻi tagata faapena i aso nei, e fai ma ana uō. Pe afai o loo filifilia e Ieova na ituaiga o uō, pe e lē tatau la iā i tatou ona filifili lelei e savavali ma ē popoto e tatou te popoto ai?
13. Pe a filifilia ni uō, o le ā e fesoasoani iā i tatou ina ia faia ni filifiliga lelei?
13 O le ā e fesoasoani iā te oe i le faia o ni filifiliga lelei e tusa ai o lenei tulaga? O le suʻesuʻeina o faaaʻoaʻoga o loo i le Tusi Paia, e mafai ona atiaʻe ai. Seʻi manatu i le faauōga a Ruta ma Naomi le tinā o lana tane, le faauōga a Tavita ma Ionatana, ma le faauōga a Timoteo ma Paulo. (Ruta 1:16, 17; 1 Samu. 23:16-18; Fili. 2:19-22) E tasi le māfuaaga na māfana ai a latou faauōga: Sa faavae i le alofa moni iā Ieova. Po o e maua ni uō o ē e alolofa iā Ieova e pei o oe? E mautinoa e te maua le toʻatele o uō faapena i totonu o le faapotopotoga. E lē mafai e na uō ona uunaʻia oe e faia se mea e faaleagaina ai lou tulaga faaleagaga. Nai lo lea, o le a latou fesoasoani iā te oe ina ia usiusitai iā Ieova, ia malosi faaleagaga, ma ia lūlū e tusa ma le agaga. (Faitau le Kalatia 6:7, 8.) E latou te fesoasoani iā te oe ina ia tumau i le alofa o le Atua.
Faaaloalo i Ē ua Tuu Atu i ai le Pule
14. O ā vala e faigatā ai mo i tatou ona faaalia le faaaloalo i ē ua tuu atu i ai le pule?
14 O le auala lona lua e faaalia ai lo tatou alofa iā Ieova, e aofia ai le pule. E tatau ona tatou faaalia le faaaloalo i ē ua tuu atu i ai le pule. Aiseā ua matuā faigatā ai mo i tatou ona faia lenā mea i nisi o taimi? O se tasi o itu, ona o tagata o loo pule, e lē lelei atoatoa. E lē gata i lea, e lē lelei atoatoa foʻi i tatou. O loo tatou tauivi ma se faanaunauga fouvale na fananau mai ma i tatou.
15, 16. (a) Aiseā e tāua ai ona tatou faaaloalo iā i latou, ua tuu atu i ai e Ieova le tiute tauave e tausia ona tagata? (e) O le ā se lesona tāua e tatou te aʻoaʻo mai, i le auala na silasila ai Ieova i le fouvale o tagata Isaraelu iā Mose?
15 Atonu e te taumānatu, ‘Pe afai e faigatā ona tatou faaalia le faaaloalo i le pule, aiseā la e tatau ai ona tatou faia?’ O le tali, e fesootaʻi atu i le finauga i le pule silisili ese. O ai o le a e filifilia e avea ma ou pule? Afai tatou te filifilia Ieova, e manaʻomia ona tatou faaaloalo i lana pule. Afai e leai, pe e tatou te faapea moni atu la o ia o lo tatou Pule? E lē gata i lea, e masani ona faatino e Ieova lana pule e ala i tagata lē lelei atoatoa, ua ia tuu atu i ai le tiute tauave e tausia ona tagata. Afai e tatou te tetee i na tagata, o le ā le silafaga a Ieova iā i tatou?—Faitau le 1 Tesalonia 5:12, 13.
16 O se faaaʻoaʻoga, ina ua muimui ma fouvale tagata Isaraelu iā Mose, sa silasila Ieova e tusa o ia lea ua latou fouvale atu i ai. (Nu. 14:26, 27) E lē suia lava le Atua. Pe afai e tatou te tetee iā i latou ua tuu atu i ai le pule, ua tatou fouvale la iā te ia!
17. O le ā le uiga saʻo e ao ona tatou taumafai e atiaʻe i ē ua tuu atu i ai le pule i le faapotopotoga?
17 Ua faaalia mai e le aposetolo o Paulo le uiga saʻo e atiaʻe i ē ua tuu atu i ai le pule i le faapotopotoga. Na ia tusi: “Ia usiusitai i ē o taʻitaʻia outou ma ia gauaʻi iā i latou, auā o loo latou leoleoina o outou ola talu ai e tatau ona fai atu sa latou tali; ina ia latou faia ma le olioli ae e lē ma le ōi, auā e leaga lea mo outou.” (Epe. 13:17) E moni e tatau ona tatou galulue mamafa ina ia atiaʻe le agaga o le usiusitai ma le gauaʻi. Ae peitaʻi, ia manatua o loo tatou taumafai e tumau i le alofa o le Atua. Pe e lē manaʻomia ai ea la a tatou taumafaiga uma, ina ia ausia lenā sini?
Ia Tumau Ona Mamā i le Silafaga a Ieova
18. Aiseā e finagalo ai Ieova ina ia tumau ona tatou mamā?
18 O le auala lona tolu e faaalia ai lo tatou alofa iā Ieova, o lo tatou tauivi ina ia tumau ona mamā i lana silafaga. E masani ona taumafai malosi mātua e faamautinoa ua mamā a latou fanau. Aiseā? Auā o le mamā, e talafeagai mo le soifua mālōlōina ma le ola lelei o le tamaitiiti. E lē gata i lea, o se tamaitiiti e mamā, e taʻu atu ai le aiga, e faaalia ai le alofa ma le tausiga a mātua. O māfuaaga faapena, ua finagalo ai Ieova ia tatou mamā. Ua silafia e ia, o le mamā, e tatau mo lo tatou ola lelei. Ua ia silafia foʻi, o lo tatou mamā e atagia atu ai o ia o lo tatou Tamā faalelagi. E matuā tāua tele lenā mea, auā e ono tosina atu ai tagata i le Atua o loo tatou auauna i ai, auā ua latou mātauina le tulaga ua ese ai i tatou, mai le toʻatele o isi tagata i lenei lalolagi leaga.
19. E faapefea ona tatou iloa e tāua ona mamā faaletino?
19 O ā vala e manaʻomia ona tatou tumau ai i le mamā? I vala uma lava o le olaga. I Isaraelu anamua, na faamanino atu e Ieova i ona tagata e faapea, e tāua ona mamā faaletino. (Levi. 15:31) Na aofia i le Tulafono a Mose ia āiāiga e faatatau i le lafoaʻia o otaota, le faamamāina o ipu, le fufuluina o lima ma vae, ma le faamamāina o lavalava. (Eso. 30:17-21; Levi. 11:32; Nu. 19:17-20; Teu. 23:13, 14) Na faamanatu atu i tagata Isaraelu o lo latou Atua o Ieova, e paia lava ia, o lona uiga e “mamā” ma “lē ponā.” E manaʻomia foʻi ona paia auauna a le Atua.—Faitau le Levitiko 11:44, 45.
20. O ā auala e manaʻomia ina ia tumau ai ona tatou mamā?
20 E manaʻomia ona tatou mamā i totonu ma fafo. E tatou te taumafai pea ia mamā o tatou mafaufau. E tatou te pipii atu ma le faamaoni i tapulaa a Ieova i le mamā tau amio, e ui lava i le paʻū maulalo o tulaga tau i feusuaʻiga i lenei lalolagi. O le mea e sili ona tāua, ia tatou maumauaʻi e tumau pea ona mamā i la tatou tapuaʻiga, ma ia ʻalofia le pisipisia i lotu sesē. Ia tatou manatua pea le lapataʻiga o loo i le Isaia 52:11: “Ō ese ia, ina ō ese outou, ia outou ō atu nai lea mea; aua neʻi paʻi atu i se mea leaga; ō atu ia outou nai totonu iā te ia; ia mamā outou.” I aso nei, e tumau ona tatou mamā faaleagaga e ala i le faamamao mai le papaʻi atu i mea e lē mamā ai la tatou tapuaʻiga, i le silafaga a lo tatou Tama faalelagi. O le māfuaaga lenā e tatau ai ona tatou ʻalofia le aafia i aso faamanatu ma aso mālōlō a lotu sesē, o loo taatele i lenei lalolagi. Ioe, o se luʻi le taumafai e tumau ona mamā. Peitaʻi, e taumafai tagata o Ieova e faia lenā tulaga ina ia tumau ai i latou i le alofa o le Atua.
21. E faapefea ona tatou mautinoa o le a tatou tumau i le alofa o le Atua?
21 E finagalo Ieova ia tatou tumau e faavavau i lona alofa. Ae e manaʻomia ona tatou faamautinoa, ua tatou faia le mea aupito sili e tumau ai i le alofa o le Atua. E tatou te faia lenei mea i le mulimuli i le faaaʻoaʻoga a Iesu, ma faamaonia ai, e tatou te alolofa iā Ieova e ala i le usiusitai atu i Ana poloaʻiga. O le faia faapea, o le a tatou mautinoa ai e leai lava se mea e “mafai . . . ona faateʻaeseina i tatou mai le alofa o le Atua ua iā Keriso Iesu, lo tatou Alii.”—Roma 8:38, 39.
Pe E te Manatua?
• E faapefea ona fesoasoani o tatou lotofuatiaifo, ia tatou tumau ai i le alofa o le Atua?
• Aiseā e ao ai ona tatou alolofa i ē e alofa i ai Ieova?
• Aiseā e tāua ai le faaaloalo i ē ua tuu atu i ai le pule?
• O le ā le tāua o le mamā i tagata o le Atua?
[Fesili mo le Suʻesuʻega]
[Pusa/Ata i le itulau 20]
Se Tusi E Siitia Ai Amioga Lelei
A o faagasolo le polokalame o le tauaofiaga itumalo 2008/2009, sa tatalaina ai le tusi e 224 itulau, ua taʻua o le “Keep Yourselves in God’s Love.” O le ā le fuafuaga o lenei tusi fou? Ua fuafuaina lenei tusi ina ia iloa ma naunau ai Kerisiano i tapulaa a Ieova, ma e taulaʻi patino atu i amioga faa-Kerisiano. O le suʻesuʻeina lelei o le tusi “Keep Yourselves in God’s Love,” o le a faatalitonuina atili ai i tatou, o le ola e ōgatusa ma tapulaa a Ieova, o le auala sili lea ona lelei e ola ai i le taimi nei, ma taʻitaʻiina atu ai i le ola e faavavau i le lumanaʻi.
E lē gata i lenā, ua fuafuaina foʻi lenei tusi ina ia tatou iloa ai e lē o se avega mamafa le usitaʻi iā Ieova. Peitaʻi, o se auala e faaali atu ai le tele o lo tatou alofa iā te ia. O lea la, o le a uunaʻia e lenei tusi i tatou ina ia fesili e faapea, ‘Aiseā ou te usiusitai ai iā Ieova?’
Pe a faia e nisi le mea sesē e faanoanoa ai, o le ō ese mai i le alofa o Ieova, e masani ona māfua mai i se amioga sesē na fai, ae lē o se aʻoaʻoga. Maʻeu la le tāua o le faamalosia o lo tatou naunau ma le talisapaia o tulafono ma mataupu silisili a Ieova, e taʻitaʻia ai o tatou olaga i aso uma! E matou te mautinoa, o le a fesoasoani lenei tusi fou i mamoe uma a Ieova i le lalolagi aoao ina ia tutumau ai e fai le mea saʻo, ia faamaonia le pepelo a Satani, ma o le mea e sili ona tāua, o le tumau i le alofa o le Atua!—Iuta 21.
[Ata i le itulau 18]
“Afai tou te tausi i aʻu poloaʻiga, tou te tumau ai i loʻu alofa, e pei ona ou tausi i poloaʻiga a le Tamā, ma ou tumau ai i lona alofa”