‘Amuliyobole Muluyando Lwa Leza’
‘Amuliyobole Muluyando Lwa Leza’
“[Amuliyobole] muluyando lwa-Leza cakulangilila lweetelelo lwa-Mwami wesu Jesu Kristo lutola kubuumi butamani.”—JUD. 21.
1, 2. Ino Jehova walutondezya buti luyando lwakwe kulindiswe, alimwi ino tuzyi buti kuti kutuyobola muluyando lwakwe kuli mpokuyeeme?
JEHOVA LEZA watondezya luyando lwakwe kulindiswe munzila zinji kapati. Pele cakutadooneka, icitondezyo cipati cakuti Jehova ulatuyanda mbubambe bwacipaizyo cacinunuzyo. Luyando lwakwe kubantu ndupati kapati cakuti mane wakatuma Mwanaakwe ngwayandisya kuti aboole anyika aano kuzyootufwida. (Joh. 3:16) Jehova wakacita boobu nkaambo uyanda kuti tupone alimwi akugwasyigwa aluyando lwakwe lyoonse mane kukabe kutamani!
2 Pele sena inga twaamba kuti Jehova uyoozumanana kutuyobola muluyando lwakwe kunyina makani anzyotusala kucita mubuumi bwesu? Peepe. Nkaambo kulugwalo lwa Juda kapango 21, tubala majwi aaya aakulwaizya aakuti: “A[muliyobole] muluyando lwa-Leza cakulangilila lweetelelo lwa-Mwami wesu Jesu Kristo lutola kubuumi butamani.” Majwi aakuti ‘amuliyobole muluyando lwa Leza’ atondezya kuti kuli ncotweelede kucita. Aboobo, ino ncinzi ncotuyandika kucita kutegwa tuzumanane kuliyobola muluyando lwa Leza?
Ino Inga Twazumanana Buti Kuliyobola Muluyando lwa Leza?
3. Ino ncinzi ncaakaamba Jesu kuti ncecakali kuyandika kutegwa azumanane kuliyobola muluyando lwa Bausyi?
3 Bwiinguzi kumubuzyo ooyu tubujana mumajwi aa Jesu mwini ngaakaamba imasiku aamamanino aabuumi bwakwe bwaanyika. Wakati: “Mwanoobamba milao yangu, munookalilila muluyando lwangu, mbubonya mbwembamba milao ya-Taata, akukalilila muluyando lwakwe.” (Joh. 15:10) Cilisalede kuti Jesu wakalizyi kuti kubamba milawo ya Jehova kulayandika kapati kutegwa azumanane kumvwana a Bausyi. Lino ikuti naa Mwana wa Leza uulondokede wakeelede kucita boobo, sena tatweelede kucita mbubonya oobo aswebo?
4, 5. (a) Ino ninzila nzi mpati mbotukonzya kutondezya kuti tulamuyanda Jehova? (b) Ino nkaambo nzi ncotutajisi kaambo kali koonse katupa kukaka kumvwida milawo ya Jehova?
4 Tulatondezya kuti tulamuyanda Jehova, ikapati kwiinda mukumumvwida. Ikaambo aaka mwaapostolo Johane wakakaamba boobu: “Oku nkokuyanda Leza, kuti twabamba milazyo yakwe, alimwi milazyo yakwe tiili miyumu.” (1 Joh. 5:3) Masimpe, ikumvwida muntu umbi takudumide pe munyika sunu. Pele amubone kaambo kakuti: “Alimwi milazyo yakwe tiili miyumu.” Jehova tatwaambili kucita cintu ciyumu kapati ncotutakonzyi kucita.
5 Mucikozyanyo, sena inga mwalomba mweenzinyoko waamoyo kunyamuna cintu ncomuzyi kuti inga takonzyi kucinyamuna? Peepe! Jehova ngusiluzyalo kapati kwiinda ndiswe alimwi ulikuzyi kapati kulezya kwesu. Ibbaibbele litusyomezya kuti Jehova ‘ulaibaluka kuti tuli bulongo buyo.’ (Int. 103:14) Takonzyi kutwaambila kucita cintu ncotutakonzyi kucita pe. Aboobo tunyina kaambo kanga katupa kukaka kumvwida milawo ya Jehova. Muciindi caboobo, tulamumvwida Jehova akaambo kakuti tulizyi kuti kucita boobo kutupa coolwe citaliboteli cakutondezya Taateesu wakujulu kuti tulamuyanda ncobeni akuti tuyanda kuzumanana kuliyobola muluyando lwakwe.
Cipego Cilibedelede Cizwa Kuli Jehova
6, 7. (a) Ino manjezyeezya ninzi? (b) Amupe cikozyanyo icaamba manjezyeezya mbwaakonzya kutugwasya kuzumanana kuliyobola muluyando lwa Leza.
6 Munyika eeyi iikataazya motukkala, kuli zyintu zyakucita zinji motweelede kusala izijatikizya mbotumumvwida Leza. Ino inga twasinizya buti kuti kusala kwesu kuleendelana akuyanda kwa Leza? Jehova wakatupa cipego icikonzya kutugwasya kapati mumakani aaya aajatikizya kumumvwida. Cipego eeco mmanjezyeezya. Ino manjezyeezya ninzi? Nkulizyiba kwaalubazu. Ali mbuli mubetesi uuli mulindiswe, uutugwasya kulanga-langa zyintu zitucitikila mubuumi akubona mbotunga twasala naa kutelaika aazyintu nzyotwakacita kale akubona naa nzibotu naa nzibi, zililuzi naa taziluzi.—Amubale Ba-Roma 2:14, 15.
7 Ino mbuti mbotunga twaabelesya kabotu manjezyeezya? Atulange-lange cikozyanyo. Amweezyeezye kuti muunka kubusena nkomutazyi kabotu. Muunka amuntu wakaliko kale kubusena oobo alimwi mulamusyoma. Ikuti naa uliizyi nzila yuunka kubusena oobo, nkokuti inga ulamusololela. Ikuti naa mwamutobela tamukonzyi kusweeka. Munzila imwi inga twaamba kuti muntu ooyu uumusololela uli mbuli cipego cibotu ncaakatupa Jehova, imanjezyeezya. Ikuti muntu katajisi manjezyeezya aabeleka kabotu ulakonzya kusweeka nasola kusala ncayelede kucita mumakani aakulilemeka, kujatikizya ciluzi acitaluzi alimwi azyakusala zili kabotu mubuumi.
8, 9. (a) Nkulezya nzi kwamanjezyeezya eesu nkotweelede kubikkila maano? (b) Ncinzi ncotunga twacita kutegwa tusinizye kuti manjezyeezya eesu alatugwasya ncobeni?
8 Pele mbubonya mbuli muntu uumusololela, zimwi ziindi manjezyeezya inga kaalubide. Ikuti muntu ooyo uumusololela wanyongana ulakonzya kumusowa. Mbubonya buyo, ikuti twalekela zilombozyegwa amoyo wesu kutweendelezya, ino ncinzi cinga cacitika? Ikulombozya zyintu zibi kwesu kulakonzya kunyonganya manjezyeezya eesu. Ibbaibbele litucenjezya kuti “moyo wamuntu uleena kwiinda zintu zyoonse, ulijisi bulwazi bukaka kupona.” (Jer. 17:9; Tus. 4:23) Kunze lyaboobo, ikuti mwacikazya ncamwaambila uumusololela akutobela nzila njomuyeeya kuti njiiluzi, mulakonzya kusweeka. Mbubonya buyo, ikuti katutatobeli busolozi busyomeka alimwi butacinci bwa Jwi lya Leza Ibbaibbele, imanjezyeezya eesu taakonzyi kutugwasya abuniini pe. (Int. 119:105) Cuusisya nsoni ncakuti bantu banji munyika eeyi batobela buyo zisusi zili mumyoyo yabo alimwi tababikkili maano kuzyeelelo zili mu Jwi lya Leza. (Amubale Ba-Efeso 4:17-19.) Aaka nkakaambo kapa kuti bantu banji kabacita zyintu zibyaabi kapati nokuba kuti balijisi manjezyeezya.—1 Tim. 4:2.
9 Tweelede kuti katukanzide kutaba mbuli mbabo! Muciindi caboobo, atuzumanane kulekela Jwi lya Leza kuti lituyiisye akutupa kuba amanjezyeezya aakonzya kutugwasya ncobeni. Tweelede kutobela ncaatwaambila manjezyeezya eesu aayiisyidwe njiisyo zyamu Bbaibbele muciindi cakulekela kulombozya kwesu kubyaabi kutweendelezya nkuko. Alimwi tweelede kusoleka kwaalemeka manjezyeezya aabakwesu abacizyi besu bakumuuya bayandwa. Tulasoleka munzila iili yoonse kutabatyompya katuyeeyede kuti manjezyeezya aamukwesu umwi alakonzya kaamukasya kucita cintu cimwi swebo ncotutaboni kuti cililubide.—1 Kor. 8:12; 2 Kor. 4:2; 1 Pet. 3:16.
10. Nimbazu nzi zyotatwe zyabuumi nzyotutiibandike lino?
10 Lino atulange-lange mbazu zyotatwe zyabuumi motukonzya kutondezya kuti tulamuyanda Jehova kwiinda mukumumvwida. Mumbazu imwi aimwi, tulabona kuti manjezyeezya alijatikizyidwe, pele ikutegwa atusololele kabotu, cakusaanguna ayelede kusololelwa azyeelelo zyakulilemeka zyakasololelwa amuuya izili mu Bbaibbele. Inzila zyotatwe mbotukonzya kutondezya kuti tulamumvwida Jehova akaambo kakuti tulamuyanda zijatikizya zyeezyi zyakuti: (1) Tuyanda baabo Jehova mbayanda, (2) tulabalemeka aabo beendelezya, alimwi (3) tulasoleka kuzumanana katusalala mubukkale bwesu mumeso aa Leza.
Amuyande Baabo Jehova Mbayanda
11. Nkaambo nzi ncotweelede kuyanda baabo Jehova mbayanda?
11 Nzila yakusaanguna njakuti, tweelede kuyanda baabo mbayanda Jehova. Caboola kumakani aajatikizya kuyanzana kwabalongwe, bantu bali mbuli cisani cinywida maanzi. Bunji bwaziindi tuyanda kucita zyintu nzyobacita aabo mbotuyanzana limwi. Mulengi wesu ulibuzyi kabotu-kabotu bubi abubotu mbobajana bantu batalondokede mukuyanzana abalongwe. Aboobo utupa lulayo oolu lukonzya kutugwasya lwakuti: “Uuenda abasongo ulasongwaala, pele muzwalani wabafubafuba ulabisizigwa.” (Tus. 13:20; 1 Kor. 15:33) Kunyina akati kesu uuyanda ‘kubisizyigwa.’ Umwi aumwi wesu uyanda ‘kusongwaala.’ Kunyina muntu uunga wapa Jehova kusongwaala kwiinda mbwabede alimwi kunyina uukonzya kumweena pe. Nokuba boobo, utupa cikozyanyo cibotu caboola kumakani aakuyanzana abalongwe. Amukkutumane muyeeye—mbantu bali buti akati kabantunsi batalondokede aabo Jehova mbasala kuba balongwe bakwe?
12. Ino Jehova usala bantu bali buti kuba balongwe bakwe?
12 Syaanene Abrahamu Jehova wakamwaamba kuti “mweenzuma.” (Izaya 41:8, BT) Imuntu ooyu wakali cikozyanyo cibotu kapati camuntu uusyomeka, mululami alimwi iwakali kumvwida Leza—wakali muntu uutobela nzyaakali kusyoma. (Jak. 2:21-23) Imuntu uuli boobo ngwasala Jehova kuti abe mulongwe wakwe. Amazubaano Jehova usala bantu bali boobo kuba balongwe bakwe. Ikuti Jehova usala bantu bali boobo kuba balongwe bakwe, sena eeci tacitondezyi mbociyandika kuti aswebo tusale kabotu, tweende abantu basongo kutegwa tusongwaale?
13. Caboola kumakani aakusala balongwe, ino ncinzi cikonzya kutugwasya kusala balongwe babotu?
13 Ino ncinzi cikonzya kumugwasya kusala balongwe babotu? Ikwiiya zikozyanyo zijanika mu Bbaibbele kulakonzya kumukulwaizya. Amuyeeye buyo cilongwe cakali akati ka Rute abanyinazyala ba Naomi, cakali akati ka Davida a Jonatani, naa cakali akati ka Timoteo a Paulo. (Rut. 1:16, 17; 1 Sam. 23:16-18; Flp. 2:19-22) Ikaambo kapati kakapa kuti bantu aaba kabali balongwe baamoyo nkakuti: Bakali kumuyanda ncobeni Jehova. Sena mulakonzya kujana balongwe ibamuyanda Jehova mbubonya mbomumuyanda? Amuzyibe kuti mulakonzya kujana bantu banji bali boobo mumbungano ya Bunakristo. Balongwe bali boobo tabakamupi kucita zyintu zikonzya kumupa kubisizyigwa kumuuya. Muciindi caboobo, bayoomugwasya kumvwida Jehova, kuzumanana kusumbuzya cilongwe canu anguwe alimwi akubyala zyintu zyakumuuya. (Amubale Ba-Galatiya 6:7, 8.) Bayoomugwasya kuzumanana kuliyobola muluyando lwa Leza.
Amubalemeke Beendelezi
14. Nzintu nzi bunji bwaziindi izipa kuti citukatazye kulemeka aabo beendelezya?
14 Inzila yabili mbotukonzya kutondezya kuti tulamuyanda Jehova ijatikizya bweendelezi. Tweelede kubalemeka aabo beendelezya. Ino nkaambo nzi ncocitukatazya kapati kucita boobo ziindi zimwi? Ikaambo kamwi nkakuti ibantu bali muzyuuno zyabweendelezi tabalondokede pe. Kuyungizya waawo, andiswe lwesu tatulondokede pe. Tujisi kampenda nkotwakazyalwa ankako kakuyanda kuzanga.
15, 16. (a) Nkaambo nzi ncociyandika kuti tubalemeke aabo Jehova mbapede mukuli wakulanganya bantu bakwe? (b) Nciiyo nzi ciyandika ncotwiiya kujatikizya mbwaakakubona Jehova kuzangila Musa nkobakacita bana Israyeli?
15 Aboobo inga mwalibuzya kuti, ‘Ino nkaambo nzi ncotweelede kubalemeka beendelezi ikuti kucita boobo kacili cintu cikatazya kapati?’ Mubwini bwiinguzu kumubuzyo ooyu bujatikizya bwami. Ino nguni ngomutiisale kuba mwami, imweendelezi wanu? Ikuti naa tuyanda kuti Jehova abe ngo Mwami wesu, tweelede kubulemeka bweendelezi bwakwe. Ikuti katutabulemeki bweendelezi bwakwe, sena inga mubwini twaamba kuti Mmweendelezi wesu? Kuyungizya waawo, Jehova bunji bwaziindi uleendelezya kwiinda mukubelesya bantu batalondokede mbapede mukuli wakulanganya bantu bakwe. Ikuti naa twabazangila bantu aabo, ino Jehova inga watubona buti?—Amubale 1 Ba-Tesalonika 5:12, 13.
16 Mucikozyanyo, bana Israyeli nobakali kutongooka akuzangila Musa, Jehova wakabona kuti bakali kuzangila nguwe kumugama. (My. 14:26, 27) Leza kunyina naacinca pe. Ikuti naa twabazangila aabo mbabikkide muzyuuno zyabweendelezi, nkokuti tuzangila nguwe!
17. Ino aabo bali muzyuuno zyabweendelezi mumbungano tweelede kusoleka kubabona munzila yeelede iili buti?
17 Imwaapostolo Paulo ulatwaambila mbotweelede kubabona munzila yeelede aabo bajisi mikuli mumbungano ya Bunakristo. Wakalemba kuti: “Kamubaswiililisya baalu banu, mulitesye kulimbabo, nkaambo mbabalangilila myuuya yanu, alimwi babaanga basikuyoolyaambilila lwabo beni. Amusungwaale kuti kabacita boobo cakubotelwa, citali cakuusa, nkaambo eco tacimuleteli kululama pe.” (Heb. 13:17) Masimpe ngakuti, tweelede kubeleka canguzu kutegwa tube amoyo wakuswiilila akulitesya naa kulibombya. Pele kamuyeeyede kuti, tucita boobo nkaambo tuyanda kuzumanana kuliyobola muluyando lwa Leza. Sena kusika ambaakani iili boobo takweeleli kuti tukubelekele canguzu?
Kamusalala Lyoonse Mumeso aa Jehova
18. Nkaambo nzi Jehova ncayanda kuti katusalala lyoonse?
18 Inzila yatatu mbotutondezya kuti tulamuyanda Jehova njakuti tulasoleka kuzumanana kusalala mumeso aakwe. Ibazyali bunji bwaziindi balabeleka canguzu kubona kuti bana babo balasumbula lyoonse. Ino nkaambo nzi? Nkaambo ikusumbula kulayandika ikutegwa mwana kali muzumi, kataciswi-ciswi. Kunze lyaboobo, mwana uusumbula takonzyi kuujazya nsoni mukwasyi wakwe alimwi citondezya kuti bazyali bakwe balamuyanda alimwi balamulanganya kabotu. Mbubonya buyo awalo Jehova uyanda kuti katusalala lyoonse. Ulizyi kuti tulakonzya kupona kabotu ikuti katusalala. Alimwi ulizyi kuti mbwali Taateesu wakujulu, ikusalala kwesu kulamulemeka. Eeci cilayandika kapati nkaambo bantu balakonzya kuyanda kukomba Leza ngotukomba akaambo kakubona mbotwiindene abantu bali munyika eeyi iisofweede.
19. Ino tuzyi buti kuti kusalala kwakumubili kulayandika?
19 Ino muumbazu nzi motweelede kusalala lyoonse? Mubwini tweelede kusalala mumbazu zyoonse. Mu Israyeli yansiku, Jehova wakacisalazya kubantu bakwe kuti ikusalala kumubili cakali kuyandika kapati. (Lev. 15:31) Mulawo wa Musa wakajisi makani aajatikizya bulondo mbuli kusowa tombe, kusanzya zibelesyo alimwi akusamba kumaanza, kumaulu akucapa zisani. (Kul. 30:17-21; Lev. 11:32; My. 19:17-20; Dt. 23:13, 14) Bana Israyeli bakayeezyegwa kuti Leza wabo Jehova, ulasalala—icaamba kuti “mmulondo” alimwi “ulisetekene.” Ibabelesi ba Leza uusalala beelede kusalala abalo.—Amubale Levitiko 11:44, 45.
20. Mmuumbazu nzi motweelede kusalala lyoonse?
20 Aboobo tweelede kusalala munzila zyoonse, mukati alimwi aanze. Tulasoleka canguzu kuyeeya buyo zyintu zisalala. Tulasyomeka kupona kweelana azyeelelo zya Jehova zyakulilemeka nokuba kuti bantu banji mbotukkala limwi munyika tabalilemeki caboola kumakani aakoonana. Ikwiinda zyoonse, tukakatide buyo kubona kuti bukombi bwesu bwazumanana kusalala, tatubulekeli kusofwaazyigwa munzila iili yoonse abukombi bwakubeja. Lyoonse tulakubikkila maano kucenjezya kwakasololelwa amuuya kulembedwe kuli Isaya 52:11 kwakuti: “Amunyamuke, amunyamuke, muzwe okuno. Mutaampi cintu niciba cimwi cisofweede. Amuzwe mulinguwo, musalale.” Mazubaano, tulazumanana kusalala kumuuya kwiinda mukutacita nokuba kutazyiguma buya izyintu eezyo Taateesu uuli kujulu nzyabona kuti tazisalali munzila yabukombi. Nkakaambo kaako, mucikozyanyo swebo tatutoli lubazu mumapobwe aabukombi bwakubeja alimwi amazuba aakulyookezya aadumide kapati mazubaano munyika. Mmasimpe, cilakatazya ikusalala lyoonse. Pele bantu ba Jehova balasoleka kucita boobo nkaambo eeci cibagwasya kuzumanana kuliyobola muluyando lwa Leza.
21. Ino inga twasinizya buti kuti tulazumanana kuliyobola muluyando lwa Leza?
21 Jehova uyanda kuti tuzumanane kuliyobola muluyando lwakwe kukabe kutamani. Pele umwi aumwi wandiswe toonse weelede kubona kuti wacita kusikila mpagolela kuzumanana kuliyobola muluyando lwa Leza. Eeci tulakonzya kucicita kwiinda mukutobela cikozyanyo ca Jesu alimwi akusinizya luyando ndotujisi kuli Jehova kwiinda mukutobela milazyo yakwe. Ikuti naa twacita boobo, tulakonzya kusinizya kuti kunyina cintu niciba cimwi “cikonzya kutwaandaanya kuluyando lwa-Leza lwamuli-Kristo Jesu Mwami wesu.”—Rom. 8:38, 39.
Sena Muciyeeyede?
• Mbuti manjezyeezya eesu mbwaakonzya kutugwasya kuzumanana kuliyobola muluyando lwa Leza?
• Nkaambo nzi ncotweelede kuyanda aabo mbayanda Jehova?
• Nkaambo nzi ncociyandika kubalemeka beendelezya?
• Ino kusalala kuyandika buti kubantu ba Leza?
[Mibuzyo yaciiyo]
Kabbokesi/[Cifwanikiso icili apeeji 20]
Ibbuku Likulwaizya Bukkale Bubotu
Kumuswaangano wacooko wamu 2008/2009, kwakamwaigwa bbuku ilijisi mapeeji aali 224 lyamutwe wakuti: ‘Amuliyobole Muluyando lwa Leza.’ Ino bbuku eeli lipya lyakalembelwa nzi? Lyakabambilwa kugwasya Banakristo kuzizyiba akuziyanda zyeelelo zya Jehova, ikubikkila maano ikapati kubukkale bwa Bunakristo. Ikwiiya bbuku eeli lyakuti ‘Amuliyobole Muluyando lwa Leza’ cakusitikila kuyootugwasya kusinizya ncobeni kuti ikutobela njiisyo zya Jehova mbobuumi bwiinda kubota mbotweelede kupona cino ciindi alimwi busololela kubuumi butamani kumbele.
Kuyungizya waawo, ibbuku eeli lyakabambilwa kutugwasya kuzyiba kuti kumvwida Jehova takuminyi pe. Muciindi caboobo, kumumvwida nenzila mbotutondezya Jehova kuti tulamuyanda kapati. Aboobo, ibbuku eeli litupa kulibuzya kuti: ‘Ino nkaambo nzi ncondimumvwida Jehova?’
Eelyo bamwi nobasala kuzwa muluyando lwa Jehova, ibunji bwaziindi icipa kuti basale nzila eeyi iilubide inga cijatikizya bukkale, ikutali njiisyo pe. Aboobo cilayandika kapati ikuyumya luyando lwesu alimwi akulumba kujatikizya milawo ya Jehova anjiisyo zyakwe eezyo zitusololela mubuumi bwesu bwabuzuba abuzuba! Tusyoma kuti bbuku eeli lipya liyoogwasya bantu ba Jehova ibali mbuli mbelele munyika yoonse ikuzumanana kucita zyintu ziluzi, kutondezya kuti Saatani mmubeji, alimwi kwiinda zyoonse kuzumanana kuliyobola muluyando lwa Leza!—Jud. 21.
[Cifwanikiso icili apeeji 18]
“Mwanoobamba milao yangu, munookalilila muluyando lwangu, mbubonya mbwembamba milao ya-Taata, akukalilila muluyando lwakwe”