“Tihlayiseni eRirhandzwini Ra Xikwembu”

“Tihlayiseni erirhandzwini ra Xikwembu, mi ri karhi mi rindzela tintswalo ta Hosi ya hina Yesu Kreste mi ri ni xikongomelo xa vutomi lebyi nga heriki.”—YUDHA 21.

1, 2. Yehovha u swi kombise njhani leswaku wa hi rhandza, naswona hi swi tivisa ku yini leswaku hi fanele hi endla swo karhi leswaku a hambeta a hi rhandza?

YEHOVHA XIKWEMBU u hi kombe rirhandzu hi tindlela to tala. Kambe, handle ko kanakana ndlela leyikulu leyi Yehovha a hi kombiseke rirhandzu ha yona i lunghiselelo ra gandzelo ra nkutsulo. U rhandze vanhu swinene lerova a rhumela N’wana wa yena la rhandzekaka laha misaveni leswaku a ta va fela. (Yoh. 3:16) Yehovha u endle leswi hikuva u lava leswaku hi hanya hilaha ku nga heriki, naswona u lava leswaku hi vuyeriwa eka rirhandzu ra yena hilaha ku nga heriki!

² Xana hi nga langutela leswaku Yehovha a hi rhandza ku nga khathariseki leswaku hi hlawula ku endla yini? Doo! Hikuva eka Yudha ndzimana 21 hi hlaya xikhutazo lexi: “Tihlayiseni erirhandzwini ra Xikwembu, mi ri karhi mi rindzela tintswalo ta Hosi ya hina Yesu Kreste mi ri ni xikongomelo xa vutomi lebyi nga heriki.” Xiga lexi nge “tihlayiseni erirhandzwini ra Xikwembu” xi kombisa leswaku hi fanele hi endla swo karhi. Kutani, xana hi fanele hi endla yini leswaku hi tshama hi ri karhi hi rhandziwa hi Xikwembu?

Xana Hi Nga Endla Yini Leswaku Hi Tshama Hi Ri Karhi Hi Rhandziwa Hi Xikwembu?

3. I yini leswi Yesu a vuleke leswaku a swi ri swa nkoka leswaku a tshama a ri karhi a rhandziwa hi Tata wa yena?

³ Nhlamulo ya xivutiso xexo hi yi kuma eka marito lama vuriweke hi Yesu hi vusiku bya yena byo hetelela loko a ri laha misaveni. U te: “Loko mi hlayisa swileriso swa mina, mi ta tshama erirhandzwini ra mina, tanihi leswi ndzi hlayiseke swileriso swa Tatana ivi ndzi tshama erirhandzwini rakwe.” (Yoh. 15:10) Hilaha ndzimana leyi yi kombisaka hakona, Yesu a a swi tiva leswaku a swi ri  swa nkoka ku yingisa milawu ya Yehovha leswaku a amukeleka eka Tata wa yena. Hikwalaho, loko N’wana wa Xikwembu la hetisekeke a yingise milawu ya Xikwembu, na hina hi fanele hi yi yingisa.

4, 5. (a) Hi yihi ndlela ya nkoka leyi hi nga kombisaka ha yona leswaku hi rhandza Yehovha? (b) Ha yini hi nga ri na xona xivangelo xo hlundzukisiwa hi mhaka ya ku yingisa swileriso swa Yehovha?

⁴ Xa nkoka swinene, hi kombisa leswaku hi rhandza Yehovha hi ku n’wi yingisa. Loko muapostola Yohane a kandziyisa mhaka leyi u te: “Ku rhandza Xikwembu, hi kona ku hlayisa swileriso swa xona; kasi loko swi ri swileriso swa xona a swi tiki.” (1 Yoh. 5:3) Vanhu vo tala namuntlha a va swi tsakeli ku yingisa munhu un’wana. Kambe, xiya xivulwa lexi nge: “Kasi loko swi ri swileriso swa xona a swi tiki.” Yehovha a nga lavi leswaku hi endla nchumu lowu nga hi tikelaka ku wu endla.

⁵ Hi xikombiso: Xana u nga kombela munghana wa wena loyi u n’wi rhandzaka leswaku a rhwala nchumu lowu u swi tivaka leswaku wu ta n’wi tikela? U nge swi endli sweswo! A nga kona la nga ni musa ni la twisisaka ku tsana ka hina ku fana na Yehovha. Bibele yi hi tiyisekisa leswaku Yehovha “wa tsundzuka leswaku hi ntshuri.” (Ps. 103:14) A nge pfuki a hi kombele ku endla nchumu lowu hi nga ta tsandzeka ku wu endla. Hikwalaho a hi na xona xivangelo xo hlundzukisiwa hi mhaka ya ku yingisa swileriso swa Yehovha. Ku hambana ni sweswo, ha swi xiya leswaku ku yingisa Tata wa hina wa le tilweni i ndlela leyinene yo n’wi komba leswaku ha n’wi rhandza naswona hi lava ku tshama hi ri karhi hi rhandziwa hi yena.

Nyiko Yo Hlawuleka Leyi Humaka Eka Yehovha

6, 7. (a) Ripfalo i yini? (b) Kombisa ndlela leyi ripfalo ri nga hi pfunaka ha yona leswaku hi tshama hi ri karhi hi rhandziwa hi Xikwembu.

⁶ Emisaveni leyi hi hanyaka eka yona leyi nga ni swiyimo leswi tlhontlhaka, hi fanele hi endla swiboho swo tala leswi katsaka ku yingisa Xikwembu. Hi nga tiyiseka njhani leswaku swiboho leswi hi swi endlaka swi fambisana ni ku rhandza ka Xikwembu? Yehovha u hi nyike nyiko leyi nga hi pfunaka swinene emhakeni leyi ya ku yingisa. Nyiko ya kona i ripfalo. Ripfalo i yini? I vuswikoti byo hlawuleka byo kota ku kambisisa swiendlo, mahanyelo ni swiboho swa hina. Ri tirha ku fana ni muavanyisi loyi a nga endzeni ka hina, ri endla leswaku hi kambisisa swiboho leswi hi bohekaka ku swi endla evuton’wini kumbe hi ehleketisisa hi swilo leswi se hi swi endleke kutani hi swi kambisisa loko swi ri leswinene kumbe swi ri leswo biha, swi lulamile kumbe swi hoxile.—Hlaya Varhoma 2:14, 15.

⁷ Xana hi nga ri tirhisa njhani ripfalo leswaku ri kota ku hi pfuna? Xiya xikombiso lexi. Muvalangi u pandza mananga lama nga riki na swindledyana, magondzo hambi ku ri mimfungho ya le magondzweni. Kambe, u hambeta a famba kukondza a ya fika laha a yaka kona. U swi kotisa ku yini? U kongomisiwa hi khampasi. Endzeni ka yona ku ni maletere ya mune lama kombisaka matlhelo ya mune ya misava ni ximhondzwana xa nsimbi lexi tshamaka xi kombe tlhelo ra n’walungu. Muvalangi a a ta lahleka swinene loko a a nga ri na yona khampasi. Hilaha ku fanaka, munhu loyi a nga riki na ripfalo a a ta tshamela ku pfilunganyeka swinene loko a ringeta ku endla swiboho malunghana ni ku hlawula mahanyelo lamanene ni lama nga riki manene.

8, 9. (a) I yini leswi hi faneleke hi swi tsundzuka malunghana ni ndlela leyi ripfalo ri nga hi kanganyisaka ha yona? (b) I yini leswi hi nga swi endlaka ku tiyisekisa leswaku ripfalo ra hina ra hi kongomisa hakunene?

⁸ Kambe ku fana ni khampasi, ripfalo ri nga hi kanganyisa. Loko muvalangi o veka khampasi ekusuhi ni maginete, ximhondzwana xa yona xi nga komba tlhelo rin’wana ku nga ri n’walungu. Hilaha ku fanaka, a ku ta endleka yini loko hi rhangisa swilo leswi naveriwaka hi timbilu ta hina? Ku navela ka hina ka vutianakanyi ku nga kanganyisa mapfalo ya hina. Bibele ya hi lemukisa leswaku “mbilu yi kanganyisa ngopfu ku tlula hinkwaswo naswona yi ni khombo.” (Yer. 17:9; Swiv. 4:23) Ku tlula kwalaho, loko muvalangi a nga ri na wona mepe lowu pakanisaka, khampasi yakwe yi nga n’wi pfuna katsongo kumbe yi nga n’wi pfuni. Hilaha ku fanaka, loko hi nga kongomisiwi hi milawu leyi tshembekaka, leyi nga hundzukiki ya Rito ra Xikwembu, ku nga Bibele, ripfalo ra hina a ri nge hi pfuni nchumu. (Ps. 119:105) Lexi vavisaka, vanhu vo tala emisaveni va pfumelela swinene ku navela ka timbilu ta vona ku lawula swiendlo swa vona kasi hi hala tlhelo a va na mhaka ni milawu leyi tsariweke eRitweni ra Xikwembu. (Hlaya  Vaefesa 4:17-19.) Hi yona mhaka leyi vanhu vo tala va endlaka swilo leswi tsemaka nhlana hambileswi va nga ni mapfalo.—1 Tim. 4:2.

⁹ Hi fanele hi tiyimisela ku nga pfuki hi fane na vona! Ku ri na sweswo, a hi hambeteni hi pfumelela Rito ra Xikwembu ri hi dyondzisa naswona ri letela mapfalo ya hina leswaku ma kota ku hi kongomisa. Hi fanele hi yingisa mapfalo ya hina lama leteriweke hi Bibele ku ri ni ku yengiwa hi ku navela ka hina ka vutianakanyi. Hi nkarhi lowu fanaka hi fanele hi tiyimisela ku xixima mapfalo ya Vakreste-kulorhi. Hi endla hinkwaswo leswi hi nga swi kotaka leswaku hi papalata ku va khunguvanyisa, hi ri karhi hi tsundzuka leswaku ripfalo ra makwerhu wo karhi ri nga ha n’wi alela ku endla nchumu wo karhi lowu hina hi wu tekaka wu nga hoxanga.—1 Kor. 8:12; 2 Kor. 4:2; 1 Pet. 3:16.

10. Hi tihi tindlela tinharhu leti hi nga ta ti kambisisa sweswi?

¹⁰ Sweswi a hi kambisiseni tindlela tinharhu leti hi nga kombisaka ha tona leswaku ha n’wi rhandza Yehovha hi ku n’wi yingisa. Eka ndlela ha yin’we, ripfalo ra hina ri ta katseka kambe ri fanele ri leteriwa swinene hi milawu ya Bibele ya mahanyelo leyi huhuteriweke leswaku ri kota ku hi kongomisa kahle. Tindlela tinharhu leti hi nga kombisaka ha tona leswaku hi yingisa Yehovha hi leswi hi n’wi rhandzaka hi leti: (1) Ku rhandza lava Yehovha a va rhandzaka, (2) ku xixima lava hi rhangelaka ni (3) ku tikarhatela ku tshama hi ri lava tengeke emahlweni ka Xikwembu.

Ku Rhandza Lava Yehovha A Va Rhandzaka

11. Ha yini hi fanele hi rhandza vanhu lava Yehovha a va rhandzaka?

¹¹ Xo sungula, hi fanele hi rhandza lava Yehovha a va rhandzaka. Loko swi ta emhakeni yo tolovelana ni vanhu van’wana, vanhu va fana ni swiponci. Hi tala ku tswonga mikhuva yin’wana ni yin’wana ya vanhu lava hi hanyaka na vona. Muvumbi wa hina u tiva ndlela leyi swi nga ni khombo ha yona loko hina vanhu lava nga hetisekangiki hi ri ni vanghana vo biha ni ndlela leyi swi nga hi pfunaka ha yona ku va ni vanghana lavanene. Hikwalaho u hi nyika ndzayo leyi ya vutlhari, leyi nge: “Loyi a fambaka ni vanhu vo tlhariha u ta tlhariha,  kambe loyi a tirhisanaka ni lavo hunguka, a swi nge n’wi fambeli kahle.” (Swiv. 13:20; 1 Kor. 15:33) A nga kona eka hina loyi a lavaka leswaku ‘swi nga n’wi fambeli kahle.’ Hinkwerhu hi lava ku va lava ‘tlhariheke.’ Yehovha u tlharihe ngopfu naswona ku hava munhu loyi a nga n’wi kanganyisaka. Nilokoswiritano, u hi vekela xikombiso lexinene loko swi ta emhakeni ya ku hlawula vanghana. Tivutise—hi vahi vanhu lava nga hetisekangiki lava Yehovha a va hlawulaka leswaku va va vanghana va yena?

12. Yehovha u hlawula vanghana va njhani?

¹² Yehovha u vule leswaku Abrahama wa khale i ‘nakulobye.’ (Esa. 41:8) Wanuna loyi a a ri xikombiso lexinene emhakeni ya ku tshembeka, ku lulama ni ku yingisa—a a ri ni ripfumelo. (Yak. 2:21-23) Yehovha u hlawula vanhu vo tano leswaku va va vanghana va yena. Ninamuntlha u hlawula vanghana vo tano. Loko Yehovha a hlawula vanghana vo tano, swi le rivaleni leswaku na hina hi fanele hi hlawula vanghana lava tlhariheke leswaku hi ta tlhariha!

13. Loko swi ta emhakeni ya ku hlawula vanghana, i yini lexi nga hi pfunaka ku hlawula vanghana lavanene?

¹³ I yini lexi nga ku pfunaka leswaku u kuma vanghana vo tano? U nga pfuniwa hi ku kambisisa swikombiso swa le Bibeleni. Anakanya hi vunghana bya Rhuti ni n’wingi wakwe Nawomi, bya Davhida na Yonathani kumbe bya Timotiya na Pawulo. (Rhu. 1:16, 17; 1 Sam. 23:16-18; Filp. 2:19-22) Lexi endleke leswaku va tshama va ri vanghana lavakulu hileswi hinkwavo a va rhandza Yehovha hi timbilu ta vona hinkwato. Xana u nga va kuma vanghana lava rhandzaka Yehovha hi ndlela leyi u n’wi rhandzaka ha yona? Ina, u nga va kuma evandlheni ra Vukreste. Vanghana vo tano a va nge ku khutazi ku endla nchumu lowu nga ta hlundzukisa Yehovha. Kambe, va ta ku pfuna leswaku u yingisa Yehovha, leswaku vuxaka bya wena na yena byi tshama byi tiyile ni ku byalela moya. (Hlaya Vagalatiya 6:7, 8.) Va ta ku pfuna leswaku u tshama u ri karhi u rhandziwa hi Xikwembu.

Ku Xixima Lava Hi Rhangelaka

14. Hi swihi swilo leswi hakanyingi swi endlaka leswaku swi hi tikela ku xixima lava hi rhangelaka?

¹⁴ Ndlela ya vumbirhi leyi hi nga kombisaka ha yona leswaku hi rhandza Yehovha i ku xixima lava hi rhangelaka. Ha yini minkarhi yin’wana swi hi tikela ku va xixima? Phela, vanhu lava hi rhangelaka a va hetisekanga. Kasi na hina a hi hetisekanga. Hi ntumbuluko a hi swi rhandzi ku va ehansi ka vanhu van’wana.

15, 16. (a) Ha yini swi ri swa nkoka leswaku hi xixima lava Yehovha a va byarhiseke vutihlamuleri byo kongomisa vanhu va yena? (b) Hi yihi dyondzo ya nkoka leyi hi yi dyondzaka eka ndlela leyi Yehovha a va languteke ha yona Vaisrayele lava xandzukeleke Muxe?

¹⁵ Kutani u nga ha tivutisa, ‘Ha yini hi fanele hi xixima lava hi rhangelaka hambiloko swi hi tikela ku endla tano?’ Nhlamulo ya xivutiso lexi yi katsa leswaku i mani loyi a nga ta fuma vanhu hi ndlela leyinene. I mani loyi u nga ta n’wi hlawula leswaku a ku fuma? Loko hi hlawula Yehovha tanihi Hosi ya hina, hi fanele hi xixima ndlela leyi a yi tirhisaka ku rhangela vanhu. Loko hi nga yi xiximi ndlela yoleyo, xana hi ta va hi tiyisile loko hi vula leswaku i Hosi ya hina? Ku tlula kwalaho, Yehovha hi ntolovelo u byarhisa vanhu van’wana lava nga hetisekangiki vutihlamuleri byo kongomisa vanhu va yena. Loko hi nga va yingisi vanhu volavo, xana Yehovha u ta hi teka hi ri vanhu va njhani?—Hlaya 1 Vatesalonika 5:12, 13.

¹⁶ Hi xikombiso, loko Vaisrayele va gungula va tlhela va xandzukela Muxe, sweswo a swi fana ni loko va xandzukela Yehovha hi ku kongoma. (Tinhl. 14:26, 27) Xikwembu a xi si cinca. Loko hi xandzukela lava xi va hlawuleke leswaku va hi kongomisa swi fana ni loko hi xandzukela xona hi ku kongoma!

17. Hi rihi langutelo lerinene leri hi faneleke hi tikarhatela ku va na rona eka lava rhangelaka evandlheni?

¹⁷ Muapostola Pawulo u hi hlamusela langutelo lerinene leri hi faneleke hi va na rona eka lava hi rhangelaka evandlheni ra Vukreste. U tsale a ku: “Yingisani lava rhangelaka exikarhi ka n’wina naswona mi titsongahata, hikuva va tshama va rindze mimoya-xiviri ya n’wina hikuva hi vona va nga ta hlamusela; leswaku va endla leswi hi ntsako ku nga ri hi ku vilela, hikuva leswi swi nga mi vavisa.” (Hev. 13:17) I ntiyiso leswaku hi fanele hi tikarhatela ku va lava yingisaka ni lava titsongahataka. Kambe, tsundzuka leswaku hi lava ku tshama hi ri lava rhandzekaka eka Xikwembu. Swoleswo a hi ku tlanga hi nkarhi.

 Ku Tikarhatela Ku Tshama Hi Ri Lava Tengeke eMahlweni Ka Yehovha

18. Ha yini Yehovha a lava leswaku hi tshama hi basile?

¹⁸ Ndlela ya vunharhu leyi hi kombisaka ha yona leswaku hi rhandza Yehovha i ku tshama hi ri lava tengeke emahlweni ka yena. Hi ntolovelo vatswari va tirha hi matimba leswaku va tiyiseka leswaku vana va vona va tshama va basile. Ha yini? Hikuva va swi tiva leswaku loko n’wana a tshama a basile swi ta endla leswaku a va ni rihanyo lerinene naswona a kula kahle. Ku tlula kwalaho, n’wana la baseke u endla leswaku vanhu va vulavula kahle hi ndyangu wa ka vona naswona sweswo swi kombisa leswaku vatswari va yena va n’wi rhandza. Hilaha ku fanaka, Yehovha u lava leswaku hi va lava baseke. Wa swi tiva leswaku loko hi tshama hi basile hi ta va ni rihanyo lerinene. Nakambe wa swi tiva leswaku loko hi basile hi endla leswaku vito ra yena ri dzunisiwa. Sweswo i swa nkoka swinene hikuva vanhu va nga ha lava ku tirhela Xikwembu lexi hi xi tirhelaka loko va vona leswaku hi hambanile ni vanhu va misava leyi, leyi thyakeke.

19. Hi swi tivisa ku yini leswaku ku basa emirini i swa nkoka?

¹⁹ Xana hi nga va lava baseke loko swi te yini? Entiyisweni, hi nga va lava baseke eka xin’wana ni xin’wana lexi hi xi endlaka. Yehovha u swi veke erivaleni eka Vaisrayele va khale leswaku a va fanele va tshama va basile emirini. (Lev. 15:31) Nawu wa Muxe wu boxe swilo swo fana ni ku celeriwa ka thyaka ra vanhu, ku basisa swibye, ku hlamba mavoko, milenge ni swiambalo. (Eks. 30:17-21; Lev. 11:32; Tinhl. 19:17-20; Det. 23:13, 14) Vaisrayele va tsundzuxiwile leswaku Yehovha Xikwembu xa vona wa kwetsima, leswi vulaka leswaku u “basile” naswona u “tengile.” Malandza ya Xikwembu lexi kwetsimaka ma fanele ma kwetsima na wona.—Hlaya Levhitika 11:44, 45.

20. Hi fanele hi va lava baseke hi tindlela tihi?

²⁰ Kutani hi fanele hi basa emianakanyweni ni le mahanyelweni ya hina. Hi tikarhatela ku tshama hi ri karhi hi anakanya swilo leswi baseke. Hi yi namarhela hi ku tshembeka milawu ya Yehovha ya mahanyelo lama baseke, ku nga khathariseki langutelo leri soholotiweke malunghana ni timhaka ta masangu leri vanhu namuntlha va nga na rona. Xa nkoka swinene, hi tikarhatela ku hlayisa vugandzeri bya hina byi ri lebyi baseke, hi ku papalata ku byi thyakisa hi tidyondzo tihi na tihi ta vukhongeri bya mavunwa. Hi tshama hi ri karhi hi anakanya hi xitsundzuxo lexi huhuteriweke lexi kumekaka eka Esaya 52:11, lexi nge: “Sukani, sukani, humani kona, mi nga khumbi nchumu lexi nga basangiki; humani exikarhi ka yena, tshamani mi basile.” Namuntlha hi papalata ku onha vuxaka bya hina na Yehovha hi ku nyenya xin’wana ni xin’wana lexi khumbaka vukhongeri bya mavunwa, lexi Tata wa hina la nge matilweni a vulaka leswaku a xi basanga. Hi xikombiso, hi yona mhaka leyi hi papalataka minkhuvo ni tiholideyi ta vukhongeri bya mavunwa leti rhandziwaka namuntlha. I ntiyiso leswaku swa tika ku tshama hi ri lava baseke. Kambe vanhu va Yehovha va tikarhatela ku tshama va basile hikuva sweswo swi va pfuna leswaku va tshama va ri karhi va rhandziwa hi yena.

21. Hi nga tiyiseka njhani leswaku hi ta tshama hi ri karhi hi rhandziwa hi Xikwembu?

²¹ Yehovha u lava ku tshama a ri karhi a hi rhandza hilaha ku nga heriki. Kambe hinkwerhu ka hina hi fanele hi tiyiseka leswaku hi endla leswi hi nga swi kotaka leswaku hi tshama hi ri karhi hi rhandziwa hi Xikwembu. Sweswo hi nga swi endla hi ku landzela xikombiso xa Yesu ni hi ku kombisa ndlela leyi hi rhandzaka Yehovha ha yona hi ku yingisa swileriso swa Yena. Loko hi endla tano hi ta tiyiseka leswaku a xi kona lexi nga ta “hi hambanisa ni rirhandzu ra Xikwembu leri nga eka Kreste Yesu Hosi ya hina.”—Rhom. 8:38, 39.

Xana Wa Tsundzuka?

• Xana ripfalo ra hina ri nga hi pfuna njhani leswaku hi tshama hi ri karhi hi rhandziwa hi Xikwembu?

• Ha yini hi fanele hi rhandza lava Yehovha a va rhandzaka?

• Ha yini swi ri swa nkoka ku xixima lava hi rhangelaka?

• Ku basa i swa nkoka ku fikela kwihi eka vanhu va Xikwembu?

[Swivutiso Swa Dyondzo]

[Bokisi/Xifaniso lexi nga eka tluka 20

BUKU LEYI KONDLETELAKA MAHANYELO LAMANENE

Eka nongonoko wa ntsombano wa muganga wa 2008/2009, ku humesiwe buku ya matluka ya 224 leyi nge “Tihlayiseni eRirhandzwini Ra Xikwembu.” Hi xihi xikongomelo xa buku leyi leyintshwa? Yi endleriwe ku pfuna Vakreste leswaku va tiva ni ku rhandza milawu ya Yehovha, naswona yi vulavula swinene hi mahanyelo ya Vakreste. Loko hi yi dyondza hi vukheta buku leyi nge “Tihlayiseni eRirhandzwini Ra Xikwembu” hi ta khorwiseka swinene leswaku ku hanya hi milawu ya Yehovha i swa nkoka swinene sweswi naswona swi ta endla leswaku enkarhini lowu taka hi kuma vutomi lebyi nga heriki.

Ku tlula kwalaho, buku leyi yi endleriwe ku hi pfuna hi vona leswaku ku yingisa Yehovha a swi tiki. Ku ri na sweswo, i ndlela yo kombisa Yehovha leswaku hi n’wi rhandza ku fikela kwihi. Hikwalaho, buku leyi yi ta hi susumetela ku tivutisa xivutiso lexi, ‘Ha yini ndzi yingisa Yehovha?’

Hi xitalo loko vanhu va tshika ku gandzela Yehovha, a swi vangiwi hileswi va nga ti twisisiki tidyondzo to karhi kambe swi vangiwa hileswi va endleke nchumu wo biha. Kutani i swa nkoka leswaku hi tiyisa ndlela leyi hi rhandzaka milawu ya Yehovha ha yona leyi hi kongomisaka evuton’wini siku ni siku hi tlhela hi yi tlangela! Ha tiyiseka leswaku buku leyi leyintshwa yi ta pfuna tinyimpfu ta Yehovha emisaveni hinkwayo leswaku ti rhandza leswinene, ti kombisa leswaku Sathana i muhembi naswona xa nkoka ngopfu ti tshama ti ri karhi ti rhandziwa hi Xikwembu!—Yudha 21.

[Xifaniso lexi nga eka tluka 18]

“Loko mi hlayisa swileriso swa mina, mi ta tshama erirhandzwini ra mina, tanihi leswi ndzi hlayiseke swileriso swa Tatana ivi ndzi tshama erirhandzwini rakwe”