«Tey me comanic o ta stojol ti scʼuxul yoʼnton ti Diose»

«Tey me comanic o ta stojol ti scʼuxul yoʼnton ti Diose. Junuc avoʼntonic malaic ti scʼacʼalil ti ta xtal ti Cajvaltic Jesucristoe, ti ta scʼuxul yoʼnton ta xacʼbotic ti jcuxlejaltic sbatel osile.» (JUD. 21, Ti Achʼ Rextomento yuʼun ti Jesucristoe, ta skʼop Chamula [ARJ])

1, 2. 1) ¿Kʼuxi yakʼoj ta ilel ti skʼanojutik li Jeovae? 2) ¿Mi ta van xakʼ jkʼupinbetik xkʼuxul yoʼonton Jeova mi kʼusiuk noʼox jpastike? Alo kʼu yuʼun ti jech cha takʼe.

 TOJ ep ta tos yakʼoj kiltik Jeova ti skʼanojutike. Ta melel, ti bu mas vinaj ti skʼanojutik tajeke jaʼo ti kʼalal laj yakʼ li xNichʼon sventa tspojutike. Toj echʼem xa noʼox skʼanoj li krixchanoetike, yuʼun ta sjunul yoʼonton la stak tal li xNichʼon ta Balumil sventa chcham ta jtojolaltike (Juan 3:16). Jaʼ jech la spas, yuʼun oy ta yoʼonton ti akʼo jtatik li kuxlejal sbatel osile xchiʼuk ti jkʼupinbetik sbatel osil li xkʼuxul yoʼontone.

² Pe ¿mi ta van xakʼ jkʼupinbetik xkʼuxul yoʼonton Jeova mi kʼusiuk xa noʼox jpastike? Moʼoj, yuʼun xi chkichʼtik albel ta versikulo 21 yuʼun Judas li ta Vivlia Ti Achʼ Rextomento yuʼun ti Jesucristoe, ta skʼop Chamula: «Tey me comanic o ta stojol ti scʼuxul yoʼnton ti Diose. Junuc avoʼntonic malaic ti scʼacʼalil ti ta xtal ti Cajvaltic Jesucristoe, ti ta scʼuxul yoʼnton ta xacʼbotic ti jcuxlejaltic sbatel osile». Kʼalal «Tey me comanic o ta stojol ti scʼuxul yoʼnton ti Diose» ti xie, chakʼ ta ilel ti mu lekuk ti te noʼox jmeyoj jkʼobtik xi jkome. ¿Kʼusi skʼan jpastik un chaʼa sventa te xi jkom-o ta stojolal li xkʼuxul yoʼonton Diose?

¿Kʼusi skʼan jpastik sventa te xi jkom-o ta stojolal li xkʼuxul yoʼonton Diose?

3. ¿Kʼusi skʼan spas Jesús sventa jech kʼanbil-o yuʼun li sTote?

³ Sventa jtakʼtik taje jkʼeltik li kʼusi laj yal  Jesús kʼalal jun xaʼox akʼobal skʼan xchame. Xi laj yale: «Me chachʼunbicun li jmantaltaque, jʼechʼel jcʼanojoxuc o. Jech chac cʼu chaʼal ta jchʼunbe smantaltac li Jtote, jech jʼechʼel scʼanojun o» (Juan 15:10). Snaʼoj lek Jesús ti skʼan xchʼunbe smantal sTot mi tskʼan ti jech kʼanbil-oe. Mi jaʼ jech skʼan spas li stukʼil Nichʼon Diose, mas to me skʼan jech jpastik li voʼotike.

4, 5. 1) ¿Kʼusi toj lek xuʼ jpastik sventa xkakʼbetik yil ti jkʼanojtik li Jeovae? 2) ¿Kʼu yuʼun muʼyuk srasonal ti chopol chkaʼitik li xchʼunbel smantal Diose?

⁴ Ti kʼuxi toj lek xuʼ xkakʼbetik yil Jeova ti jkʼanojtike jaʼ ti jchʼunbetik smantale. Xi laj yal li jtakbol Juane: «Me jcʼanojtic o li Diose, ta jchʼunbetic li smantaltaque. Muʼyuc tsots ta chʼunbel chcaʼitic li smantaltaque» (1 Juan 5:3). Jech onoʼox kakʼtik ti muʼyuk bu lek chaʼiik ta xchʼunel mantal li krixchanoetike. Pe jamal laj yal kaʼitik li versikulo ti «muʼyuc tsots ta chʼunbel» li smantaltak Diose. Jaʼ jech ta melel, li Jeovae muʼyuk tskʼanbutik li kʼusi mu spas kuʼuntike.

⁵ Xi jkoʼoltastik avaʼie: ¿mi ta van xavalbe junuk avamigo ti akʼo oy kʼusi xkuch o spet ti anaʼoj ti mu xlik yuʼune? ¡Ta melel muʼyuk bu jech chavalbe! Jaʼ jech li Jeova eke. Yuʼun toj lek yoʼonton xchiʼuk snaʼoj ti bu kʼalal xuʼ kuʼuntike. Li Vivliae chalbutik ti «snaʼ [Jeova] ti lum achʼelutic noʼoxe» (Sal. 103:14). Muʼyuk me bu chalbutik ti akʼo jpastik li kʼusi toj tsots chkaʼitik ta spasele. Jaʼ yuʼun chaʼa, muʼyuk me srasonal ti chopol chkaʼitik ta xchʼunbel li smantaltake. Moʼoj, yuʼun ti kʼusie toj lek chkiltik ti xuʼ ta jchʼunbetik smantale, yuʼun jaʼ jech xuʼ xkakʼbetik yil ti jkʼanojtik li Diose xchiʼuk ti ta jkʼantik ti akʼo skʼanutik-oe.

Jun matanal ti stuk noʼox jech yakʼojbutik li Jeovae

6, 7. 1) ¿Kʼusi jaʼ li jol koʼontontike? 2) Alo kʼusi xuʼ jkoʼoltastik-o ti kʼuxi tskoltautik li jol koʼontontik sventa te oyutik-o ta xkʼuxul yoʼonton li Diose.

⁶ Toj ep kʼusitik ta jnoptik ti skʼan jpastik li ta balumil ti toj vokole. ¿Kʼusi skʼan jpastik sventa jechuk xkʼot ta nopel kuʼuntik xchiʼuk li kʼusi tskʼan yoʼonton Diose? Li Jeovae yakʼoj jun jmotontik ti toj ep tskoltautik ta xchʼunbel smantale. Jaʼ li jol koʼontontike. ¿Kʼusi jaʼ li jol koʼontontike? Jaʼ ti kʼalal xi jtojob ta skʼelel kʼukelantike, xkoʼolaj kʼuchaʼal jun jchapanvanej ta sventa li kʼusitik ta jpastike. Tskoltautik ta snopel bu mas lek ti kʼusi ta jpastik kʼalal oy kʼusi ta jnopbetik skʼoplale, jech xtok, tskoltautik ta skʼelbel sbalil li kʼusi jpasojtik xae, chalbutik mi lek o mi chopol, mi tukʼ o mi muʼyuk (kʼelo Romanos 2:14, 15).

⁷ ¿Kʼuxi tskoltautik li jol koʼontontike? Xi jkoʼoltastike. Nopo avaʼi ti yakal ta xanbal jun krixchano ti ch-och xa akʼobale. ¿Kʼusi skʼan oy yuʼun sventa chil sbe yoʼ mu spʼosi yok xchiʼuk ti mu syayijes sbae? Tsots skʼoplal ti oy junuk sjoko sventa chil-o sbee. Jaʼ jech ek, ti manchukuk oy sjol yoʼonton li krixchanoetike chʼayemik ta jyalel jechuke xchiʼuk muʼyuk bu lek chbat ta nopel kuʼuntik jechuk li kʼusitik sventa lekil talelal, lekil kuxlejal xchiʼuk li tukʼilale.

8, 9. 1) ¿Kʼu yuʼun mu skotoluk velta tukʼ ch-abtej li jol koʼontontike? 2) ¿Kʼusi xuʼ jpastik sventa jechuk kʼuchaʼal jun lekil abtejebal li jol koʼontontike?

⁸ Pe li jol koʼontontike oy noʼox me spajeb li kʼusi spas yuʼune, jech kʼuchaʼal li jokoe. Kʼalal yalem xa li skʼakʼale mu xa stsan sventa chakʼ kil jbetik. Jaʼ jech chkʼot ta stojolal ek li jol koʼontontik mi jaʼ chkakʼ spasutik ta mantal li kʼusi tskʼan koʼontontike, taj une tsokes ti kʼuyelan lek ch-abtej li jol koʼontontike. Mu me jchʼay ta joltik ta jyalel ti «oʼntonale toj chopol, jaʼ noʼox ven jloʼlavanej ta scotol» (Jer. 17: 9; Pro. 4:23). Jech xtok, mu xa me kʼusi xtun-o li joko mi yalem xa skʼakʼale. Jaʼ jech chkʼot ta stojolal ek li jol koʼontontik mi muʼyuk ta jchantik li sKʼop Dios ti tukʼ chbeiltasvane, mu xa me masuk tskoltautik li jol koʼontontike (Sal. 119:105). Kʼux ta alel, pe jaʼ ep krixchanoetik ti chchʼunbeik smantal li yoʼontonike xchiʼuk jutuk xa tajek o muʼyuk xa ta yoʼontonik li mantaletik chal sKʼop Diose (kʼelo Efesios 4:17-19). Taje jaʼ chakʼ ta ilel ti kʼu yuʼun oy epal krixchanoetik toj ep kʼusitik chopol ta spasik akʼo mi oy li sjol yoʼontonike (1 Tim. 4:2).

 ⁹ Mu me jkʼan jechutik taje. Jaʼ yuʼun chkakʼtik ti akʼo jaʼuk xchanubtas jol koʼontontik li sKʼop Dios sventa xkʼot kʼuchaʼal jtos abtejebal ti toj jtunele. Maʼuk chkakʼtik akʼo smakbe yechʼomal ye jol koʼontontik li kʼusi ta jkʼan jtuktike, moʼoj, yuʼun ta jtsʼetanbetik lek xchikinal li kʼusi chalbutike. Jaʼ noʼox jech xtok, ta jtsakbetik ta mukʼ li kʼusi chal sjol yoʼonton kermanotaktike. Jaʼ yuʼun ta jpastik persa sventa mu smak yok ta mantal kuʼuntik, jaʼ ti jnaʼojtik ti yikʼaluk mas kʼun li sjol yoʼontonike o ti mas tsots tspasvan ta mantale (1 Cor. 8:12; 2 Cor. 4:2; 1 Ped. 3:16).

10. ¿Kʼusi ta jkʼelbetik batel skʼoplal?

¹⁰ Jkʼeltik oxtosuk ti kʼuxi xuʼ xkakʼtik ta ilel ti jkʼanojtik ta melel li Jeovae xchiʼuk ti ta jchʼunbetik smantale: 1) jkʼantik li buchʼutik kʼanbilik yuʼun Jeovae, 2) kichʼtik ta mukʼ li buchʼutik oy yabtelike xchiʼuk 3) kakʼtik persa ti sakukutik-o ta sate. Li ta oxtos taje te me ta jkʼelbetik batel skʼoplal ti skʼan stsak ta mukʼ beiltaseletik yuʼun Dios li jol koʼontontik sventa sbeiltasutik leke, taje te ta jtatik ta Vivlia.

Jkʼantik li buchʼutik kʼanbilik yuʼun Jeovae

11. ¿Kʼu yuʼun skʼan jkʼantik li buchʼutik kʼanbilik yuʼun Jeovae?

¹¹ Baʼyel, skʼan jkʼantik li buchʼutik kʼanbilik yuʼun Jeovae. Li krixchanoutike jechutik kʼuchaʼal li tuxnukʼe: ep chkuchʼtik yaʼeluk li kʼusitik ta jpat jxokontike. Li Jpasvanej kuʼuntike snaʼoj ti xuʼ tskoltautik ta slekubtasel jtalelaltik li kamigotike o xuʼ xi sokesutik xtok. Jaʼ yuʼun chakʼbutik li lekil tojobtasel liʼe: «Li bochʼo jaʼ chchiʼin li bochʼotic oy sbijilique ta xbijub batel ec; yan li bochʼo jaʼ chbat xchiʼin li bol cristianoetique te chbolib o ec» (Pro. 13:20; 1 Cor. 15:33). Jkotoltik ti ta jkʼan ti pʼijutike yuʼun ta jkʼantik lek xbat li jkuxlejaltike. Jaʼ yuʼun skʼan jchanbetik li slekil talelal Jeovae. Toj lek ta albel skʼoplal ti toj lek tstʼuj yamigotak li Jeovae, akʼo mi mu xa xpʼijub mas xchiʼuk ti muʼyuk bu tsokesbat  stalelale. Vaʼun chaʼa, ¿buchʼutik jpas mulil krixchanoal stʼujoj ta yamigotak li Diose?

12. ¿Buchʼutik ta stʼuj ta yamigotak li Jeovae?

¹² Xvul van ta joltik ta melel ti xi laj yalbe skʼoplal Abraham li Jeovae: «Lec la jcʼopan jba jchiʼu[k]» (Isa. 41:8). Li moltotil taje toj lek laj yichʼ ilel ta skoj li xchʼunel yoʼontone, li stukʼil yoʼontone, li stukʼil talelale xchiʼuk ti la xchʼun mantale (Sant. 2:21-23). Taje jaʼ jech stalelal li yamigotak tsaʼ Jeovae. Mi lek tstʼuj yamigotak li Jeovae, ¿mi mu masuk to lek skʼan jtʼujtik li voʼotike? Jaʼ yuʼun chaʼa, jaʼ me xkamigointik li krixchanoetik ti lek pʼijik sventa lek xi jpʼijub eke.

13. ¿Kʼusi tskoltautik ta stʼujel lek li kamigotaktike?

¹³ ¿Kʼusi tskoltautik ta stʼujel lek li kamigotaktike? Li kʼusi tskoltautike jaʼ ti jkʼeltik li buchʼutik te chichʼ albel skʼoplal ta Vivliae. Jnopbetik skʼoplal ti lek laj yil sbaik li Rut xchiʼuk smeʼ alib ti Noemí sbie, li David xchiʼuk Jonatane xchiʼuk li Timoteo xchiʼuk Pabloe (Rut 1:16, 17; 1 Sam. 23:16-18; Fili. 2:19-22). Li srasonal ti mas tsots skʼoplal ta skoj ti toj lek laj yamigoin sbaike jaʼ ti skʼanojik ta sjunul yoʼontonik li Jeovae. ¿Mi jaʼ jech xuʼ xkaltik ta jtojolaltik ek? ¿Mi jaʼ chkamigointik li buchʼutik skʼanojik Jeova kʼuchaʼal voʼotike? Jnaʼojtik ta melel ti xuʼ jta kamigotaktik ta tsobobbail kʼuchaʼal taje. Li kamigotaktik taje muʼyuk me chi jsok ta mantal yuʼunik, moʼoj, yuʼun tskoltautik ta xchʼunbel smantal Jeova, tskoltautik sventa xi jchʼi ta mantal kʼuchaʼal yajtsʼaklom Cristo xchiʼuk tskoltautik ta stsʼunel li kʼusi tskʼan chʼul espiritue (kʼelo Gálatas 6:7, 8). Ta melel, te me chi jkom-o ta stojolal xkʼuxul yoʼonton Dios mi jech ta jpastike.

Kichʼtik ta mukʼ li buchʼutik oy yabtelike

14. ¿Kʼu yuʼun mu kʼunuk ta chʼunbel smantal bakʼintik li buchʼutik oy yabtelike?

¹⁴ Xchibal, ti kʼuxi xuʼ xkakʼtik ta ilel ti jkʼanojtik li Jeovae jaʼ ti chkichʼtik ta mukʼ li buchʼutik oy yabtelike. Akʼo mi jech, tsots ta pasel bakʼintik. ¿Kʼu yuʼun? Yuʼun li buchʼutik tspasutik ta mantale jaʼik jpas muliletik. Jech xtok li voʼotik eke jpas mulilutik, jaʼ yuʼun te onoʼox oy ta koʼontontik ti ta jtoy jbatike.

15, 16. 1) ¿Kʼu yuʼun tsots skʼoplal ti xkichʼtik ta mukʼ li buchʼutik akʼbil yabtel yuʼun Jeova sventa chchabibeik li steklumale? 2) ¿Kʼusi ti toj tsots skʼoplal mu stakʼ jchanbetik li j-israeletik ti la stoy sbaik ta stojolal Moisese?

¹⁵ Jaʼ yuʼun xuʼ van oy buchʼu xi tsjakʼbe sbae: «¿Kʼu yuʼun skʼan jchʼunbetik smantal li buchʼutik oy yabtel mi toj tsots ta pasele?». Li stakʼobile jaʼ te tsakal skʼoplal ta sventa li mukʼul pas mantal yuʼun Diose. Mi jaʼ tstʼuj ta mukʼta jpas mantal yuʼun Jeova li jun krixchanoe, skʼan xchʼunbe smantal. Yuʼun mi muʼyuk chchʼunbe smantale, mu stakʼ chʼunel ti jaʼ ajvalil yuʼune. Jech xtok, kʼalal tspas mantal li Jeovae tstunes jpas mulil krixchanoetik sventa xchabibat li steklumale. ¿Kʼu van yelan chilutik Jeova mi ta jtoy jbatik ta stojolalike? (Kʼelo 1 Tesalonicenses 5:12, 13.)

¹⁶ Jech kʼuchaʼal liʼe, kʼalal la skʼanbeik parte Moisés li j-israeletik xchiʼuk ti la stoy sbaik ta stojolale, jaʼ muʼyuk xchʼunbat smantal stuk laj yil li Jeovae (Núm. 14:26, 27). Li Diose muʼyuk jelem-o. Mi ta jtoy jbatik ta stojolal li buchʼutik akʼbil yabtelik yuʼun Jeovae xkoʼolaj kʼuchaʼal ta jtoy jbatik ta stojolal stuk.

17. ¿Kʼu yelan skʼan jtalelaltik ta stojolal li buchʼutik oy yabtel ta tsobobbaile?

¹⁷ Li jtakbol Pabloe laj yal ti kʼuyelan skʼan jtalelaltik ta stojolal li buchʼutik oy yabtel ta tsobobbaile. Xi la stsʼibae: «Chʼunbeic me cʼusi chayalboxuc li bochʼotic sventainojoxuque; ichʼic me ta mucʼ. Yuʼun jaʼ ta xchabioxuc, yuʼun tsnaʼic ti ta onoʼox xcʼot yalic ta stojol Dios ti cʼu xʼelan ch-abtejique. Me chavichʼic ta muqʼue, xcuxet noʼox yoʼnton ch-abtejic; muʼyuc bu chloʼilaj yoʼnton avuʼunic. Yuʼun muʼyuc cʼusi chataic ec me jech chapasique» (Heb. 13:17). Melel onoʼox ti mu stekeluk velta kʼun ta chʼunel chkaʼitik li mantale xchiʼuk ti xkakʼ jbatik ta pasel ta mantale. Pe skʼan me jvules ta joltik ti jaʼ jech te oyutik-o ta stojolal xkʼuxul yoʼonton Dios mi ta jchʼuntik mantale. ¿Mi mu jechuk ti oy ep sbalil kʼalal chkakʼtik persae?

 Kakʼtik persa ti sakukutik-o ta sat Jeovae

18. ¿Kʼu yuʼun tskʼan Jeova ti sakukutik-oe?

¹⁸ Yoxibal, jkʼeltik kʼuxi chkakʼtik ta ilel ti jkʼanojtik li Diose: kakʼtik persa ti sakukutik-o ta sate. Stalel onoʼox ti tskʼan lekuk atinemik, sakuk skʼuʼ spokʼik xchiʼuk ti lekuk ta kʼelel spat xokon yalab xnichʼnab li totil-meʼiletike. ¿Kʼu yuʼun? Jtose jaʼ sventa lekuk chchʼi talel. Yan xtoke, kʼalal chil krixchanoetik ti lek ta kʼelel spat xokon li jun olole lek chkʼopojik ta stojolal li totil-meʼiletike xchiʼuk chalik ti kʼux chaʼiike xchiʼuk ti jaʼ jech skʼan chabiele. Li srasonaltak ti tskʼan sakukutik-o li Jeova eke jaʼ jechtik kʼuchaʼal taje. Li jTotik ta vinajele snaʼoj ti jaʼ sventa jlekilaltik ti kʼalal sakutike xchiʼuk ti lek chkʼopojik ta stojolal mi sak chilutik li krixchanoetike. Toj tsots skʼoplal taje, yuʼun yikʼaluk van jaʼ chtijbat yoʼontonik ti akʼo xnopajik ta stojolal Dios kʼalal chakʼik venta ti jelelutik tajek li ta ikʼal balumil liʼe.

19. ¿Kʼu yuʼun toj tsots skʼoplal ti sakukutike?

¹⁹ Li yajtsʼaklomutik Cristoe skʼan ti sakukutik-o ta sjunul jkuxlejaltike. Laj yalbe j-israeletik ta voʼne li Jeova ti toj tsots skʼoplal ti sakikuke (Lev. 15:31). Jaʼ jech, li sMantal Moisese laj yalbe skʼoplal ti skʼan smukik li yikʼobalike, ti sakuk li «jayil taqʼuin» o li spokobil skʼobike, ti akʼo spok yok skʼobike xchiʼuk ti akʼo xchukʼ li skʼuʼ spokʼike (Éxo. 30:17-21; Lev. 11:32; Núm. 19:17-20; Deu. 23:13, 14). Jaʼ jech akʼbat snaʼ li steklumal Israel ti chʼul li sDiosik ti jaʼ li Jeovae, jaʼ xkaltik, ti sake xchiʼuk ti chʼabal yikʼobale. Jaʼ jech, ta skoj ti yajtunelutik chʼul Diose skʼan me lek chʼulutik ek (kʼelo Levítico 11:44, 45, Ch).

20. ¿Kʼusitik ti skʼan sakuk kuʼuntike?

²⁰ Pe maʼuk noʼox me skʼan sakuk li jbekʼtal jtakopaltike; skʼan sakuk li jnopbentik xchiʼuk koʼontontike. Jech kʼuchaʼal liʼe, skʼan sakuk li kʼusi ta jnoptike xchiʼuk ti tukʼuk jchʼunbetik li smantaltak Jeova ta sventa li lekil talelalile, manchuk mi yakal tsok ta mulivajel li balumile. Yuʼun ti kʼusi mas tsots skʼoplale jaʼ ti chkakʼtik persa ti sakuk-o ti kʼuyelan chkichʼtik ta mukʼ Diose, muʼyuk chkikʼubtas jbatik li ta jecheʼ relijione. Jnaʼojtik lek li pʼijubtasel ti xi yakʼoj ta naʼel Jeova ta Isaías 52:11: «¡Vocʼo abaic loqʼuel, vocʼo abaic loqʼuel; mu me xapiquic li cʼusi toj chopole; locʼanic xa batel te ta Babilonia! [Tukʼulano me] [a]baic lec». Sakutik-o ta mantal, jaʼ xkaltik, muʼyuk ta jpiktik li kʼusi ibal sba yuʼun relijionetik chil li jTotik ta vinajele. Jaʼ yuʼun chkakʼtik tajek persa ti muʼyuk ta jkap jbatik li ta kʼinetik xchiʼuk li ta kʼusi nopem xaʼiik spasel ta relijionetik ti ojtikinbil tajek avi kʼakʼale. Melel onoʼox ti mu kʼunuk ti sakukutik-oe, pe mi jech ta jpastike te me oyutik-o li ta stojolal xkʼuxul yoʼonton Diose.

21. ¿Kʼusi skʼan jpastik sventa te oyutik-o ta stojolal li xkʼuxul yoʼonton Diose?

²¹ Li Jeovae tskʼan ti te oyuk-o ta jtojolaltik sbatel osil li xkʼuxul yoʼontone. Pe sventa jechuk xkʼot ta pasele skʼan me xkakʼbetik yipal ta jujuntal. Jchanbetik stalelal li Jesuse chaʼa xchiʼuk jchʼunbetik smantal Dios sventa xil ti jkʼanojtike. Mi jeche, «muʼyuc [me] cʼusi pasbil yuʼun Dios ti xuʼ tspajes ti jech mu xa xiscʼanutic o li Diose. Yuʼun jʼechʼel la scʼanutic o ta sventa li Cristo Jesuse, jaʼ li Cajvaltique» (Rom. 8:38, 39).

¿Mi xvul ta ajol liʼe?

• ¿Kʼuxi tskoltautik sventa te oyutik-o ta stojolal xkʼuxul yoʼonton Dios li jol koʼontontike?

• ¿Kʼu yuʼun skʼan jkʼantik li buchʼutik kʼanbilik yuʼun Diose?

• ¿Kʼu yuʼun tsots skʼoplal ti xkichʼtik ta mukʼ li buchʼutik oy yabtelike?

• ¿Kʼu yuʼun toj tsots skʼoplal ti sakuk li steklumal Diose?

[Sjakʼobiltak sventa xchanobil]

[Lokʼol ta pajina 18]

«Me chachʼunbicun li jmantaltaque, jʼechʼel jcʼanojoxuc o. Jech chac cʼu chaʼal ta jchʼunbe smantaltac li Jtote, jech jʼechʼel scʼanojun o»

[Rekuadro ta pajina 20]

Jlik Livro Ti Chakʼ Jchantik Lekil Talelale

Li ta mukʼta tsobajeletik ta oxib kʼakʼal ta 2008-2009 laj yichʼ lokʼesel li livro «Tey me comanic o ta stojol ti scʼuxul yoʼnton ti Diose», taje yichʼoj 224 pajina. ¿Kʼusi stu li achʼ livro taje? Sventa tskolta yajtuneltak Dios ti akʼo xojtikinbeik mas li smantaltake xchiʼuk ti akʼo xkʼuxubinbeik mase. Mi ta jchantik lek li livro taje, ti jaʼ chalbe lek skʼoplal stalelal yajtsʼaklom Cristoe, mas me chkʼot ta koʼontontik ti jaʼ mas toj lek ti jchʼunbetik smantal li Jeovae xchiʼuk ti jaʼ chakʼ jkuxlejaltik sbatel osile.

Li livro liʼ xtoke tskoltautik ta yaʼibel smelolal ti maʼuk jun ikatsil li xchʼunbel smantal Jeovae, moʼoj, yuʼun jaʼ jech chkakʼbetik yil ti jkʼanojtik tajeke. Xuʼ van xi jakʼbe jbatik kʼalal ta jkʼeltike: «¿Kʼu yuʼun ti yakal chi tun ta stojolal Jeovae?».

Kʼux ta alel, jlom yajtsʼaklomtak Cristoe namajemik ta stojolal Dios xchiʼuk li ta kʼanelal yuʼune, pe taje mu lekuk. ¿Kʼu yuʼun ti jech spasojike? Ta jutuk mu skotoluk veltae jaʼ ta skoj ti oy kʼusi chopol la spasike, maʼuk ti yuʼun muʼyuk xaʼibeik smelolal jtosuk chanubtasele. Jaʼ yuʼun chaʼa, tsots me skʼoplal ti jkʼantik mas li smantaltak Jeovae xchiʼuk li beiltaseletik yuʼun ti jaʼ tskoltautik jujun kʼakʼale. Jnaʼojtik ta melel ti tskoltabe xchijtak Jeova ta spʼejel balumil li livro liʼe, sventa xuʼ spakbeik skʼoplal li stukʼil mantaltak Diose, ti chakʼik ta ilel ti jaʼ jun jut kʼop li Satanase xchiʼuk ti te xkomik-o li ta xkʼuxul yoʼonton Dios ti jaʼ mas tsots skʼoplale (Jud. 21, ARJ).