‘Xoossaa Siiquwan Deˈa’
‘Xoossaa Siiquwan Deˈa’
“Nu Godai Yesuus Kiristtoosi ba maarotettan intteyyo immana merinaa de7uwaa naagiiddi, intte huuphiyaa Xoossaa siiquwan wottite.”—YIHUDAA 21.
1, 2. Yihooway nuna siiqiyoogaa waatidi bessidee? Nuuni koyidobaa oottanau dooridi a siiquwan deˈana danddayennaagaa waatidi eriyoo?
XOOSSAA YIHOOWAY zawi baynna ogetun ba siiquwaa nuussi qonccissiis. Gidoppe attin, Yihooway siiquwaa bessido oge ubbaappe aadhiyaagee, wozuwaa yarshshuwaa giigissuwaa gidiyoogee sirissenna. Yihooway asaa naata keehippe siiqiyo gishshau, nu gishshau hayqqanaadan ba siiqiyo Naˈaa ha saˈaa kiittiis. (Yohaannisa 3:16) Yihooway hegaa oottidoy nuuni merinau deˈanaadan koyiyo gishshataassa; qassi nuuni a siiquwaappe merinau goˈettanaadan koyees!
2 Gidoppe attin, nuuni ay oottanau doorikkonne Yihooway nuuni a siiquwan deˈanaadan oottees giyoogee? Yihudaa paydo 21n: “Nu Godai Yesuus Kiristtoosi ba maarotettan intteyyo immana merinaa de7uwaa naagiiddi, intte huuphiyaa Xoossaa siiquwan wottite” yaagiya zoree deˈiyo gishshau, chii hegaadaana gidenna. “Intte huuphiyaa Xoossaa siiquwan wottite” giyaagee, nuuni oottana koshshiyaabay deˈiyoogaa qonccissees. Yaatin, nuuni Xoossaa siiquwan deˈanau ay oottana koshshii?
Nuuni Xoossaa Siiquwan Waanidi Deˈana Danddayiyoo?
3. Ba Aawaa siiquwan deˈanau i ay oottiyoogee keehippe koshshiyoogaa Yesuusi yootidee?
3 Yesuusi ha saˈan deˈido wurssetta qammi haasayidobaappe ha oyshaa zaaruwaa demmoos. I: “Taani ta Aawaa azazuwaa naagada a siiquwan de7idoogaadan, inttekka ta azazuwaa naagikko, ta siiquwan de7ana” yaagiis. (Yohaannisa 15:10) Ha xiqisee bessiyoogaadan, Yihoowan sabettanau a azazuwaa naagiyoogee keehippe koshshiyoogaa Yesuusi akeekiis. Yaatin, polo gidida Xoossaa Naˈay hegaadan oottana koshshikko, nuuni shin hegaadan oottana koshshennee?
4, 5. (a) Nuuni Yihoowa siiqiyoogaa bessana danddayiyo waanna ogee aybee? (b) Yihoowa azazuwaa azazettennan ixxanau nuussi gaasoy baynnay aybissee?
4 Nuuni Yihoowa siiqiyoogaa bessiyo waannatiya ogee a azazuwaa naagiyoogaa. Kiitettida Yohaannisi: “Nuuni Xoossaa siiqiyoogee a azazuwaa naagiyoogaa; a azazoikka deexo gidenna” yaagidi hegaa qonccissiis. (1 Yohaannisa 5:3) Ha wodiyan daro asay azazettiyoogaa dosenna. Gidikkonne, “A azazoikka deexo gidenna” yaagiyaagaa akeeka. Yihooway nuuni oottana danddayennabaa oottanaadan oychenna.
5 Leemisuwau: Neessi mata lagge gidida issi ura i tookkanau danddayennabaa tookkanaadan oychuutii? Oychennaagee qoncce! Yihooway nuuppe aadhida keha; qassi nu abbiyaa loyttidi akeekees. Yihooway ‘nuuni biitta gidiyoogaa akeekiyoogaa’ Geeshsha Maxaafay yootees. (Mazamure 103:14) I nuuni danddayennabaa oottanaadan mule oychenna. Yaatiyo gishshau, nuuni Yihoowa azazuwaa azazettennan ixxiyo gaasoy baawa. Hara baggaara, nuuni Yihoowassi azazettiyoogee, saluwan deˈiya nu Aawaa wozanappe siiqiyoogaanne a siiquwan deˈanau koyiyoogaa bessiyo loˈˈo injje gidiyoogaa akeekoos.
Yihooway Immido Dumma Imotaa
6, 7. (a) Zoriya wozanay aybee? (b) Nuuni Xoossaa siiquwan deˈanau zoriya wozanay waatidi maaddana danddayiyaakko leemisuwan yoota.
6 Nuuni deˈiyo muttumurettida alamiyan, Xoossau azazettiyoogaa bessiyo darobaa kuuyanau koshshees. He kuushshati Xoossaa sheniyaara moggottiyoogaa waatidi erana danddayiyoo? Azazettiyoogaa xeelliyaagan nuna keehippe maaddana danddayiya imotaa Yihooway nuussi immiis. Hegee zoriya wozanaa. Zoriya wozanay aybee? Ba huuphiyaa eriyo dumma abbiyaa. I nu giddon deˈiya daanna mala; nuuni deˈuwan dooriyoobata akeekanaadan woykko nuuni oottidobay loˈˈokko iitakko woy likkekko balakko yiggi xeellanaadan danddayissiyaaba.—Roome 2:14, 15 nabbaba.
7 Nuuni zoriya wozanaa waatidi loytti goˈettana danddayiyoo? Issi leemisuwaa akeeka. Issisaa biya issi uri battaale bazzuwan hemettees. Baaburiyaa ogee woy hara ogeekka baawa; woykko ginaa malaatiyaabikka baawa. Gidikkokka, ba biyoosaa gakkanau yaa haa geennan sitti giidi bees. Waanidi? Ayyo komppaase giyo miishshi deˈees. Komppaasee maagineetiyaappe merettida marppe malabaynne xaafettida malaatay deˈiyo, darotoo huuphessa bagga malaatiyaaba. Komppaasee baynnaakko he bitanee bayi attana. Hegaadankka, zoriya wozanay baynnaakko, asay ba deˈuwan likke, loˈˈonne geeshsha dooruwaa dooranau metootana.
8, 9. (a) Nu zoriya wozanay suure oottennaadan diggiyaabaa aybaa nuuni hassayana koshshii? (b) Nu zoriya wozanay tumuppe goˈˈiyaagaa gidanaadan ay oottana danddayiyoo?
8 Gidikkonne, komppaasiyaagaadan zoriya wozanaykka suure oottenna wodee deˈees. He bitanee ba komppaasiyaa matan maagineetiyaa wottikko, huuphessa bagga malaatiya marppee harasaa malaatana danddayees. Hegaadankka, nu wozanaa amoy sugin issibaa kuuyikko, hananabay aybee? Nu huuphiyaa siiqiyoogee nu zoriya wozanay nuna balabau kaalettanaadan oottana danddayees. Geeshsha Maxaafay “wozani ubbabaappe aadhdhi cimmiyaabaanne keehi daro iita” yaagidi akeekissees. (Ermmaasa 17:9; Leemisuwaa 4:23) Hegaa bollikka, he bitaniyau ammanttiya loˈˈo karttay baynnaba gidikko, komppaasee a darin maaddenna. Hegaadankka, suurenne laamettenna Xoossaa Qaalaa, Geeshsha Maxaafaa kaaletuwan ammanettana xayikko, nu zoriya wozanay nuna aybanne maaddenna. (Mazamure 119:105) Ha alamiyan daro asay wozanaa koshshau xoqqa sohuwaa immidi, Xoossaa Qaalan deˈiya maara xaasayi xeelliyoogee woy aggi bayiyoogee keehippe azzanttiyaabaa. (Efisoona 4:17-19 nabbaba.) Etau zoriya wozanay deˈiyaaba gidikkonne, daro asay iitabaa oottiyoy hegaassa.—1 Ximootiyoosa 4:2.
9 Nuuni mule hegaadan hanennaadan murttana koshshees! Hegaappe, nu zoriya wozanay tumuppe maaddiyaagaa gidana mala ubbatoo Xoossaa Qaalan a loohissiyaageeta gidoos. Nu huuphiyaa siiqiyo koshshaa kaalliyoogaappe Geeshsha Maxaafan loohida nu zoriya wozanaa ezggana koshshees. Hegaadankka, nu Kiristtaane ishatunne michetu zoriya wozanaakka bonchanau baaxetana koshshees. Nuugaappe dumma hanotan nu ishatu zoriya wozanay issi issibaa oottennaadan diggana danddayiyoogaa akeekidi, eta xubbiyaabaa oottennaadan nuuyyo danddayettidabaa ubbaa oottanau baaxetoos.—1 Qoronttoosa 8:12; 2 Qoronttoosa 4:2; 1 PHeexiroosa 3:16.
10. Haˈˈi nuuni tobbana deˈo macarati heezzati awugeetee?
10 Nuuni azazettiyoogan Yihoowa siiqiyoogaa bessana danddayiyo deˈo macarata heezzata ane beˈoos. He hanotatu ubban zoriya wozanay oottiyoobi deˈiyoogee qoncce; shin zoriya wozanay nuna bessiya ogiyan kaalettanaadan Geeshsha Maxaafan deˈiya kandduwaa maaran loohidaagaa gidana koshshees. Nuuni Yihoowayyo siiquwan azazettana danddayiyo heezzu ogeti kaallidi deˈiyaageeta: (1) Nuuni Yihooway siiqiyoogeeta siiqoos, (2) aawatettaa maataa bonchoosinne (3) Xoossaa sinttan geeshsha gididi deˈanau baaxetoos.
Yihooway Siiqiyoogeeta Siiqa
11. Yihooway siiqiyoogeeta nuuni siiqana koshshiyoy aybissee?
11 Koyruwan, nuuni Yihooway siiqiyoogeeta siiqana bessees. Laggetettaara gayttidaagan, nuuni puuttuwaagaadan nu heeran deˈiyaabaa aybanne oyqqoos. Laggetettay polo gidenna asaa naata waatidi qohana woykko waatidi maaddana danddayiyaakko nuna Medhidaagee loyttidi erees. Hegaa gishshau, i nuussi: “Aadhdhida eranchcha asatuura hemettiya asi aadhdhida eranchcha gidees; shin eeyya asatuura hemettiya asi metuwan gelees” yaagiya loˈˈo zoriyaa immiis. (Leemiso 13:20; 1 Qoronttoosa 15:33) Nuuppe ooninne ‘metuwan gelana’ koyiyay baawa. Nuuni ubbaykka “aadhdhida eranchcha” gidanau koyoos. Yihoowa aadhida eratettau zawi baynna gishshau, i bau deˈiyaagaa bolli aadhida eratettaa gujjana danddayenna. Hara baggaara qassi ayba laggetettaynne a moorana danddayenna. Gidikkonne, laggetettaa xeelliyaagan i nuuyyo loˈˈo leemiso gidees. Yihooway ba lagge gidanaadan oona dooriyaakko ane issi kutti qoppa.
12. Yihooway ay mala dabbota doorii?
12 Yihooway beni wode deˈida Abrahaama “ta dabbuwaa” yaagiis. (Isiyaasa 41:8) Abrahaami ammanuwan, geeshshatettaaninne azazettiyoogan loˈˈo leemiso—i ammanuwan erettida asa. (Yaaqoobaa 2:21-23) Yihooway ba dabbo oottiyoy hegaa mala asa. I ha wodiyankka hegaa mala dabbota doorees. Yihooway hegaa mala dabbota dooriyaaba gidikko, aadhida eranchatuura hemettiyoogan aadhida erancha gidanau nuunikka hegaadan akeekan dooriyoogee koshshiyaaba gidennee?
13. Nuuni laggeta dooriyo wode, loˈˈo dooruwaa dooranaadan aybi maaddana danddayii?
13 Hegaa xeelliyaagan loˈˈo dooruwaa dooranaadan nena aybi maaddana danddayii? Geeshsha Maxaafan deˈiya asatu leemisuwaa xannaˈiyoogee hegau denttettana danddayees. Urutinne i bollotee Naˈoomi giddon, Daawitanne Yonaataana giddon woykko Ximootiyoosanne PHauloosa giddon deˈiya laggetettaabaa qoppa. (Uruto 1:16, 17; 1 Sameela 23:16-18; Piliphphisiyuusa 2:19-22) Eti mata lagge gidanaadan oottida ubbaappe aadhiyaabay, eta laggetettay baasettidoy Yihoowa wozanappe siiqiyoogaana gidiyoogaa. Neegaadan Yihoowa siiqiya laggeta demmana danddayay? Gubaˈiyan hegaa mala daro laggeta demmana danddayiyoogaa ammanetta. Hegaa mala laggeti neeni ayyaanaaban metuwan gelanaadan oottokkona. Yaatiyoogaappe, neeni Yihoowau azazettanaadan, ayyaanaaban dichaa bessanaadaaninne ayyaanan zeranaadan maaddana. (Galaatiyaa 6:7, 8 nabbaba.) Neeni Xoossaa siiquwan deˈanaadan eti maaddana.
Aawatettaa Maataa Boncha
14. Aawatettaa maataa bonchiyoogee nuussi darotoo deexxanaadan oottiyaabati aybee?
14 Nuuni Yihoowa siiqiyoogaa bessiyo naaˈˈantto ogee aawatettaa maataara gayttidaba. Nuuni aawatettaa maataa bonchana bessees. Hegaa oottiyoogee issi issitoo keehippe deexxiyoy aybissee? Issi gaasoy, aawatettaa maatay deˈiyoogeeti polo asa gidennaagaa. Hegaa bolli, nuunikka polo asa gidokko. Nuuni yeletan laattido makkaliyo koshshaara baaxetoos.
15, 16. (a) Yihooway ba asau koshshiyaabaa kunttanaadan maataa immidoogeeta nuuni bonchiyoogee keehippe koshshiyoy aybissee? (b) Isaaˈeeleti Muuse bolli makkalidoogaa Yihooway xeellido ogiyaappe ayba goˈˈiya timirtte demmiyoo?
15 Yaatiyo gishshau, ‘aawatettaa maataa bonchiyoogee keehippe deexxiyaabaa gidikko, nuuni hegaadan oottana koshshiyoy aybissee?’ gaada qoppana danddayaasa. Hegaa zaaroy ubbabaa haariyo maataa xeelliyaagan denddida oyshaara gayttidaagaa. Ubbaappe bollaara nena haaranaadan oona doorutii? Ubbaappe bollaara haaranaadan nuuni Yihoowa dooriyaaba gidikko, a maataa bonchana koshshees. Nuuni hegaadan oottana xayikko, i nuna Haariyaagaa tumuppe gaana danddayiyoo? Hegaa bollikka, Yihooway darotoo ba asaassi koshshiyaabaa kunttanaadan aawatettaa immido, polo gidenna asatu baggaara ba aawatettaa goˈettees. Nuuni he asatu bolli makkaliyaaba gidikko, he hanotaa Yihooway waatidi xeellii?—1 Tasalonqqe 5:12, 13 nabbaba.
16 Leemisuwau, Israaˈeeleti Muuse bolli zuuzummidonne makkalido wode, Yihooway eti ba bolli makkalidoogaadan xeelliis. (Qoodaabaa 14:26, 27) Xoossay laamettibeenna. I aawatettaa maataa immidoogeetu bolli nuuni makkaliyaaba gidikko, hegee a bolli makkaliyoogaa!
17. Gubaaˈiyan aawatettaa maatay deˈiyoogeeta ayba bessiya ogiyan xeellanau baaxetana koshshii?
17 Kiristtaane gubaaˈiyan aawatettaa maatay deˈiyoogeeta xeellana bessiya ogiyaa kiitettida PHauloosi qonccissiis. I: “Inttena kaalettiyaageetuyyo azazettite; qassi eti azaziyoogaakka oottite. Eti bantta oottidobaa Xoossau yootana gishshau, intte shemppuwaa mintti naagoosona; intte etau azazettikko, bantta oosuwaa ufaittidi oottana; hegee xayikko, eti yiillotiiddi oottana; hegee inttena ainne maaddenna” yaagidi xaafiis. (Ibraawe 13:17) Hegaadan azazettiyoonne haarettiyo koshshay nuussi deˈanaadan keehippe baaxetana koshshiyoogee tuma. Gidikkokka, nuuni Xoossaa siiquwan deˈanau baaxetiyoogaa hassaya. He hoollee nuuyyo danddayettiyaabaa ubbaa oottana koshshiyo hoolle gidennee?
Yihoowa Sinttan Geeshsha Gidada Deˈa
18. Nuuni geeshsha gidanaadan Yihooway koyiyoy aybissee?
18 Nuuni Yihoowa siiqiyoogaa bessiyo heezzantto ogee a sinttan geeshsha gididi deˈanau baaxetiyoogaa. Yelidaageeti darotoo bantta naati geeshsha gididi deˈanaadan baaxetoosona. Aybissi? Issi gaasoy, geeshshatettay naˈaa payyatettaunne ufayssau keehippe koshshiyaaba. Hegaa bollikka, naˈaa geeshshatettay yelidaageeti a siiqiyoogaanne loyttidi oyqqidoogaa qonccissiyo gishshau, eta bonchissees. Hegaara issi mala gaasuwan, Yihooway nuuni geeshsha gidanaadan koyees. Geeshshatettay nu ufayssaunne payyatettau keehippe koshshiyoogaa i erees. Nu geeshshatettay a, saluwan deˈiya nu Aawaa bonchissiyoogaakka erees. Nuuni ha moorettida alamiyan deˈiyaageetuppe dummatiyoogaa akeekiyoogaappe denddidaagan, asay nuuni goynniyo Xoossaakko shiiqana danddayiyo gishshau, hegee keehippe koshshiyaaba.
19. Asatettaa geeshshatettay keehippe koshshiyoogaa waatidi eriyoo?
19 Nuuni ayba ogetun geeshsha gididi deˈana koshshii? Ubba ogiyan gidana koshshiyoogee tuma. Beni Israaˈeele biittan, asatettaa geeshshatettay ba asaassi keehippe koshshiyoogaa Yihooway qonccissiis. (Wogaabaa 15:31) Muuse Higgee, sheeshsha utettaa kammiyoogaa, goˈettiyo miishshata meecciyoogaanne kushiyaanne tohuwaa meecettiyoogaanne maayuwaa meecciyoogaa malatiyaabata gujjees. (Kessaabaa 30:17-21; Wogaabaa 11:32; Qoodaabaa 19:17-20; Zaarettido Wogaa 23:13, 14) Eta Xoossay Yihooway geeshshaa woykko xillo gidiyoogaa Israaˈeeleti hassayanaadan odettiis. Geeshsha Xoossau oottiyaageetikka geeshsha gidanau koshshees.—Wogaabaa 11:44, 45 nabbaba.
20. Nuuni geeshsha gididi deˈanau koshshiyoy ayba ogetuunee?
20 Yaatiyo gishshau, nuuyyo asatettaaynne wozanay geeshsha gidana koshshees. Nu qofay geeshsha gidanaadan baaxetoos. Nu yuushuwan deˈiya alamee asho gaytotettaa xeelliyaagan moorettidaagaa gidikkonne, Yihooway kandduwaa geeshshatettau kessido maaraa wozanappe kaalloos. Aybippenne aaruwan, worddo haymaanootiyan ayba ogiyaaninne hambbalaashettiyoogaappe haakkiyoogan nu goynoy geeshsha gidanaadan koyoos. Isiyaasa 52:11n ayyaanay denttettin xaafettida: “Kichchite, kichchite; yaappe kiyite. Tunabaa bochchoppite; a giddoppe kiyiichchite. Intte huuphiyaukka geeyite” yaagiya akeekissuwaa ubbatoo hassayoos. Ha wodiyan, saluwan deˈiya nu Aaway haymaanootiyaara gayttidaagan tunabaadan xeelliyoobaa bochennan aggiyoogan ayyaanaaban geeshsha gididi deˈoos. Leemisuwau, ha wodiyan keehi erettida worddo haymaanootiyaa baalatuppe nuuni haakkiyoogee hegaassa. Geeshsha gididi deˈiyoogee deexxiyaaba gidiyoogee tuma. SHin Xoossaa siiquwan deˈanau geeshsha gididi deˈiyoogee eta maaddiyo gishshau, Yihoowa asay hegaadan oottanau baaxetees.
21. Nuuni Xoossaa siiquwan deˈana danddayiyoogaa erana danddayiyoy ayba ogiyaanee?
21 Yihooway nuuni merinau a siiquwan deˈanaadan koyees. SHin nuuni ubbay Xoossaa siiquwan deˈanau nuuyyo danddayettida ubbabaa oottana koshshees. Nuuni hegaadan oottana danddayiyoy, Yesuusa leemisuwaa kaalliyoogaananne Yihoowa siiqiyoogaa bessanau A azazota naagiyoogaana. Nuuni hegaadan oottiyaaba gidikko, aybinne “Kiristtoos Yesuusan de7iya Xoossaa siiquwaappe nuna shaakkanau danddayennaagaa” ammanettana danddayoos.—Roome 8:38, 39.
Hassayay?
• Xoossaa siiquwan deˈanaadan nu zoriya wozanay nuna maaddana danddayiyoy ayba ogiyaanee?
• Yihooway siiqiyoogeeta nuuni siiqana koshshiyoy aybissee?
• Aawatettaa maataa bonchiyoogee keehippe koshshiyoy aybissee?
• Xoossaa asau geeshshatettay keehippe koshshiyoy aybissee?
[Oyshata]
[Sinttaa 27n diya misiliyaa]
Loˈˈo Eeshshaa Minttettiya Xuufiyaa
‘Xoossaa Siiquwan Deˈa’ giya, 224 sinttay deˈiyo maxaafay, 2008/2009 awuraajjaa shiiquwaa wode kiyiis. Ha ooratta maxaafay giigido halchoy aybee? He maxaafay Kiristtaane eeshshau waanna sohuwaa immidi, Kiristtaaneti Yihoowa maarata eranaadaaninne siiqanaadan maaddanau giigiis. ‘Xoossaa Siiquwan Deˈa’ giya maxaafaa loyttidi xannaˈiyoogee, Yihoowa maaratuura moggottidi deˈiyoogee ha wodiyan deˈo oge ubbaappe aadhiyoogaunne sinttappe merinaa deˈuwaa demissiyoogau deˈiya nu ammanoy minnanaadan oottees.
Hegaappekka aaruwan, ha maxaafay Yihoowassi azazettiyoogee deexxennaagaa nuuni akeekanaadan maaddanau giigiis. Ubba Yihoowau azazettiyoogee, nuuni a ay keena siiqiyaakko bessiyo oge. Yaatiyo gishshau, ha maxaafay ‘Taani Yihoowayyo azazettiyoy aybissee?’ giidi nuna oychanaadan denttettees.
Issoti issoti Yihoowa siiquwaappe kiyiyo azzanttiya bala baliyo wode, darotoo metoy baaso timirttetuura gayttidaba gidennan, kandduwaara gayttidaba. Hegaa gishshau, galla galla nu deˈuwan nuna kaalettiya Yihoowa higgiyaanne baaso siraataa minttidi siiqiyoogeenne nashshiyoogee ay keena koshshiyaabee! Ha ooratta xuufee, alame yuushuwan deˈiya Yihoowa dorssati loˈˈo gididabaa mintti oyqqanaadan, Seexaanay worddancha gidiyoogaa bessanaadaaninne ubbaappe aaruwan Xoossaa siiquwan deˈanaadan maaddanaagaa ammanettoos!—Yihudaa 21.
[Sinttaa 25n deʼiya misiliyaa]
“Taani ta Aawaa azazuwaa naagadaa siiquwan de7idoogaadan, inttekka ta azazuwaa naagikko, ta siiquwan de7ana”