‘Yehova Alilenga Icinso Cakwe Ukubabalikila’

KU CINSO ca muntu kwaba imicincili ukucila pali 30. Pa kuti fye umuntu amwentule, kano imicincili 14 yabombela pamo! Elenganyeni ifyo imilandile yenu ingaba ukwabula iyi mincincili. Bushe kuti ileumfwika bwino? Nakalya. Nomba kuli bankomamatwi iyi micincili ya ku menso tailenga fye ukuti balelanshanya bwino na banabo. Lelo nga yabombela pamo ne fishibilo bapanga ne minwe, ifyo bale-eba bambi fileshibikwa bwino bwino. Abantu abengi balapapa ifyo bankomamatwi bomfwana ukubomfya ululimi lwa bankomamatwi.

Ndakai, bankomamatwi aba mu fyalo ifingi balimona icinso icabeeka nga nshi ukucila icinso ica muntu uuli onse. Mu mampalanya, balimona “icinso ca kwa Yehova.” (Amala. 31:11) Ici tacaba fye nkuma. Ukutula fye na kale, Yehova alitemwa nga nshi bankomamatwi. Nangu fye ni mu luko lwa bena Israele, alitemenwe sana bankomamatwi. (Lebi 19:14) Na muli shino nshiku, calimoneka fye apabuuta ukuti Yehova alitemwa bankomamatwi. “[Lesa afwaya] ukuti abantu balekanalekana bakapusuke no kwishiba bwino bwino icine.” (1 Tim. 2:4) Ilyo bankomamatwi abengi baishiba bwino bwino icine pali Lesa, kuti twatila, balamona icinso cakwe. Bushe bankomamatwi kuti bacita shani ifi apo tabomfwa? Ilyo tushila-asuka ici cipusho, lekeni tumone umulandu ululimi lwa bankomamatwi lwacindamina sana kuli aba bantu.

Ukumona E Kumfwa

Ifingi ifyo abantu baishiba pali bankomamatwi na pa lulimi lwabo, te fya cine. Lekeni tumwafwe ukwishiba icishinka pali bankomamatwi. Bankomamatwi kuti baensha motoka. Cilabafya ukwishiba ifyo umuntu alelanda nga balemulolesha fye ku milomo. Mu fyalo fyalekanalekana abantu balanda indimi sha bankomamatwi ishapusanapusana. E lyo ululimi bankomamatwi mu calo cimo babomfya lulapusana na luntu aba mu calo cimbi babomfya.

Bushe bankomamatwi kuti babelenga? Kwena bankomamatwi bamo balabelenga bwino, lelo abengi balashupikwa. Mulandu nshi? Pantu ifyo tulemba ni filya tulanda. Tontonkanyeni pa fyo umwana uushakoma amatwi asambilila ukulanda. Umwana nga afyalwa fye, atampa ukwikala na bantu abalanda ululimi lwa uko kwine afyalilwa. Mu nshita fye iinono, aleshiba amashiwi no kutendeka ukuyabomfya ilyo alelanda. Asambilila ifi ukupitila mu kumfwa fye ifyo bambi balanda. Kanshi lintu umwana uushakoma amatwi atampa ukubelenga, asambilila fye ifya kubelenga ifilembo fya mashiwi ayo aishiba kale.

Nomba elenganyeni ukuti mwile ku calo cimbi e lyo bamubika mu muputule wa makalashi umo mushingomfwa ifyo abali ku nse balelanda. Tamwatala amumfwapo ululimi balanda kuli ico calo. Cila bushiku, abantu ba kuli ico calo balesa ukuti bengalanda na imwe ilyo bali ku nse ya makalashi. Tamumfwa ifyo balelanda lelo mumona fye imilomo ileima.  Lilya bailuka ukuti tamuleumfwa, balemba ifyo bacilalanda pe pepala no kumulanga. Bena balemona kwati nalimo mwalailuka ifyo balemweba. Bushe batini kuti mwaishiba ifyo balemweba? Kwena kuti camwafya ukulanshanya na bantu ba musango yo. Mulandu nshi? Pantu ifyo balembele fyebo fya mu lulimi ulo mushatala amumfwapo. Ifi fine e fyo ciba na kuli bankomamatwi abengi.

Ululimi lwa bankomamatwi e lo fye mwingalanshanishishamo na bankomamatwi. Umuntu abomfya fye amaboko pa kulondolola ifintu. Ifyo acita iminwe, amaboko, umubili na pa menso filingana na mafunde ya lulimi lwa bankomamatwi. Ifi e fyaba ulu lulimi ulwa kuti pa kuti mulumfwe kano mwamona uulelanda.

Na kuba, nalimo fyonse ifyo bankomamatwi bacita ku maboko, ifyo basesha umubili, ne fyo bacita pa menso ilyo balelanda ululimi lwabo, filapilibulapo fimo. Filya bacita pa menso te kutila bafwaya fye ukusekesha abantu. E fyo fye balanda ululimi lwa bankomamatwi. Ku ca kumwenako, ukwimya inkopyo pa kwipusha icipusho, kuti kwapilibula ukuti uleipusha icipusho ca kwasuka fye ukuti ee nelyo iyo. E lyo ukuponya inkopyo, kulanga ukuti muleipusha amuti, nani, auti shani, kwisa, lilali, nelyo mulandu nshi. Ifyo uulelanda ulu lulimi alecita ku kanwa nalimo kuti fyalanga ifyo icintu cikulile nelyo ifyo icacitike caweme nangu ifyo cabipile. Ifyo nkomamatwi asesha umutwe, ifyo emya ifipeya, ifyo acita amatobo, ne fyo alekapa na fyo filapilibulapo fimo ilyo alelondolola ifintu kabili filalenga abo alelandako baumfwa bwino bwino ifyo alelandapo.

Ifi fyonse ifyo bankomamatwi bacita ilyo balelanda ululimi lwabo filenga abalemona ukumfwikisha bwino ifyo balelanda. Bankomamatwi abaishiba bwino ululimi lwabo kanshi kuti balanda fye pa fili fyonse, kuti bashimika ilyashi nangu ukulondolola ifintu ifyakosa, kuti balanda pa citemwiko nangu fye ukusekesha abantu, kuti balanda pa fintu ifyo tumona ne fyo tushimona.

Impapulo sha mu Lulimi lwa Bankomamatwi Shilebafwa

Nga ca kuti nkomamatwi bamusambilisha pali Yehova mu lulimi lwa bankomamatwi, kuti aumfwa ubukombe no ‘kutetekela’ umwine wa ubu bukombe. Kanshi, Inte sha kwa Yehova balabombesha nga nshi ukushimikila kuli bankomamatwi mwi sonde lyonse no kubapekanishisha impapulo ishingabafwa. (Rom. 10:14) Pali ino nshita, kwaba amabumba 58 mwi sonde lyonse abapilibula impapulo sha bankomamatwi, kabili kwaliba ama DVD mu ndimi sha bankomamatwi ukucila 40 mu calo conse. Bushe mu kucita ifi mwalifuma ifisuma?

Jeremy, umwana wa bankomamatwi atile, “Ndebukisha ifyo batata balepoosa ama-awala ayengi mu muputule wabo uwa kusendamamo ninshi balebelenga fye amaparagrafu ayanono mu cipande ca mu Ulupungu lwa kwa  Kalinda, pa kuti bomfwikishe ifyo balebelenga. Limo balefuma mu muputule ulubilo no kutila: ‘Naumfwa! Naumfwa umulolele ifyo nacilabelanga!’ E lyo nomba balenondolwela ifyo bacilabelenga. Iyo nshita ninshi ndi fye ne myaka 12. Nalebelenga mu maparagrafu bwangu bwangu no kubalondolwela ukubomfya ululimi lwa bankomamatwi ati: ‘Tata ifyo mwalondolola te fyo balelandapo.’ Ilyo nshilapwa no kulanda, balendesha no kutila balayaibelengela abene pa kuti bomfwikishe. Nshakalabe ifyo balebipilwa ne fyo nalekoseleshiwa ilyo babwelelamo ku muputule wabo. Nomba apo kwaliba ama DVD yalanda pa fya mu Baibolo mu lulimi lwa bankomamatwi, balomfwikisha bwino. Ndatasha sana nga namona ifyo baba ne nsansa ilyo balelanda pa fyo bomfwa pali Yehova.”

E lyo tontonkanyeni na pali ba Nte abaupana abalandile na Jessenia, umukashana nkomamatwi uwikala ku Chile. Ilyo banyina ba uyu mukashana basuminishe aba ba Nte ukuti batambishe Jessenia ulupapulo lutila My Book of Bible Stories—On DVD (e kutila Icitabo Candi ica Malyashi ya mu Baibolo icaba pa DVD mu lulimi lwa bankomamatwi), aba ba Nte bashimike ati: “Ilyo Jessenia atendeke ukutamba, alisekele e lyo pa numa atampa ukulila. Ilyo banyina bamwipwishe ico alelilila, atile alitemenwe sana ifyo aletamba. E lyo banyina bailwike ukuti kanshi umwana wabo aleumfwa fyonse ifyo aletamba pali DVD.”

Umwanakashi umo nkomamatwi uwikala mu mushi umo uwa ku Venezuela ali no mwana umo, kabili ali na pa bukulu. Ena no mwina mwakwe balemona kwati te kuti bakumanishe ukusakamana umwana na umbi pa mulandu wa kuti tabakwete indalama, e ico baletontonkanya ukuti baponye fye ifumo. Inte sha kwa Yehova, abashaishibe ifi, balipitilepo no kubalanga isambililo 12 muli video iitila Cinshi Lesa Afwaya Kuli Ifwe? iya mu lulimi lwa bankomamatwi ulwa ku Venezuela. Ili sambililo lilanda pa fyo Lesa amona ukuponya ifumo. Pa numa, umwanakashi aebele ba Nte ukutila aletasha sana ukuti balisambilile ici cipandwa. Atile ici camulengele ukukanaponya ifumo. Ulupapulo lwa mu lulimi lwa bankomamatwi pa DVD lwalipuswishe ubumi!

Ba Lorraine, ba Nte abakoma amatwi, balondolwele ukuti: “Ukusambilila Baibolo kwaba kwati kupikulula ubwile ubwa-afya. Pali fimo ifyo nshaleumfwikisha. Ilyo ifyaba mu Baibolo fyapilibwilwe mu lulimi lwa bankomamatwi, nalifyumfwikishe.” Ba George, bankomamatwi kabili ababatishiwe imyaka 38 iyapitapo, batile: “Cishinka ukuti ukuyumfwila umo icintu cilolele kulalenga umuntu ukukanaisuula kabili kulenga aicetekela. Mona kwati ama DVD ya mu lulimi lwa bankomamatwi yalingafwa sana ukukosha bucibusa bwandi na Yehova.”

“Ukulongana mu Lulimi Nanda!”

Ukulunda pa mpapulo sha mu lulimi lwa bankomamatwi, Inte sha kwa Yehova balipanga ifilonganino umo babomfya ululimi lwa bankomamatwi. Pali ino nshita, kwaba ifilonganino  ukucila pali 1,100 mu calo conse. Pa kusambilisha icine ca mu Baibolo babomfya ululimi lwa bankomamatwi. Basambilisha mu nshila ya kuti bankomamatwi bamona ukuti balibacindika kabili balishiba ifyo bapitamo.

Bushe ukupanga ifilonganino fya mu lulimi lwa bankomamatwi kwalyafwa? Tontonkanyeni pali ba Cyril, ababatishiwe no kuba Inte ya kwa Yehova mu 1955. Pa myaka iingi baleibikilishako ukubelenga impapulo no kusangwa ku kulongana lyonse. Limo kwaleba aba kubapilibwilako e lyo limbi na lyo takwaleba. Nga takuli aba kubapilibwila, ba Nte bambi balebafwa pa kubalembelako ifishinka ifyo balelanda ku cisebele. Mu 1989, ninshi napapita imyaka 34 apo babatishiwilwe, e lyo icilonganino ca kubalilapo ica bankomamatwi capangilwe mu United States, mu musumba wa New York City. Bushe ba Cyril baleumfwa shani ukuba muli ici cilonganino? Batile: “Cali kwati nafuma mu mushitu, ukufuma umwafiita no kwingila umuli ulubuuto. Nomba nali mu cilonganino umo balanda ululimi nanda!”

Ifilonganino fya Nte sha kwa Yehova umo babomfya ululimi lwa bankomamatwi, e mo bankomamatwi balongana ku kusambilila pali Lesa no kumupepa. Ni ncende uko abantu ba kwa Lesa bengapanga ifibusa no kukoseleshiwa. Muli cino calo umo bankomamatwi bashumfwa ifyo bambi balelanda kabili umo batalalilwa, ifi filonganino e mo balanshanya sana na bambi no kubishanya. Muli ifi filonganino bankomamatwi balasambilila, balalunduluka kabili balafika na pa buyo bwabo ubwa kubomba umulimo wa kwa Yehova. Bankomamatwi abengi balabomba umulimo wa nshita yonse. Bamo balikuukila ku fyalo fimbi pa kuti bafwe bankomamatwi bambi ukusambilila pali Yehova. Abaume Abena Kristu bankomamatwi balasambilila ukuba bakasambilisha basuma, baleshiba ifya kucita bwino ifintu mu cilonganino, ne fya kusakamana ababamo, kabili abengi balafikapo ukubomba imilimo mu cilonganino.

Mu United States, mwaba ifilonganino ukucila pali 100 e lyo na mabumba 80 umo babomfya ululimi lwa bankomamatwi. Mu Brazil mwaba ifilonganino 300 umo babomfya ululimi lwa bankomamatwi e lyo na mabumba ukucila pali 400. Mu Mexico mwena ifilonganino fyalicila 300. Mu Russia ifilonganino fyalicila 30 na mabumba 113. Twalandapo fye pa filecitika mu fyalo ifinono.

Inte sha kwa Yehova balakwata ukulongana kwa citungu no kwa muputule mu lulimi lwa bankomamatwi. Umwaka wapwile, kwali ukulongana kwa citungu ukucila pali 120 mu ndimi sha bankomamatwi ishapusanapusana. Ifi fyonse filenga ba Nte bankomamatwi ukwishiba ukuti baba mu ba bwananyina ba mwi sonde lyonse abalemwenamo mu fyo Lesa asambilisha.

Ba Leonard ni bankomamatwi kabili napapita imyaka 25 apo babela ba Nte. Batile: “Ukufuma fye kale, nalishiba ukuti Yehova e Lesa wa cine. Lelo, nshaishibe bwino bwino ico asuminishisha ukucula. Limo limo, ici calenenga ukumufulilwa. Lelo, mu lyashi limo pa kulongana kwa citungu mu lulimi lwa bankomamatwi, nasukile naumfwikisha ifyalenga. Ilyo ilyashi lyapwile, umwina mwandi alinsunkile panono ku kaboyo no kunjipusha ati, ‘Bushe mwaumfwikisha nomba?’ Nalisumine no mweo onse pantu na cine nalyumfwikishe! Pa numa ya myaka 25, ndatasha ukuti nshashiile Yehova. Lyonse nalimutemenwe lelo nshaleumfwikisha fimo. Pali lelo ndomfwikisha!”

Ukutasha Ukufuma pa Nshi ya Mutima

Bankomamatwi nga basambilila pali Yehova, bamumona shani? Baleshiba ukuti ni Lesa uwaba no kutemwa, uwa cikuuku, uwa mulinganya, uwa cishinka, e lyo ne mibele imbi.

Ba Nte bankomamatwi ababa mwi sonde lyonse balamona icinso ca kwa Yehova kabili bakatwalilila ukucimona bwino. Pa mulandu wa kuti alitemwa bankomamatwi, ‘Yehova alilenga icinso cakwe ukubabalikila.’ (Impe. 6:25) Ala aba bankomamatwi balatasha sana pa kwishiba Yehova!

[Ifikope pe bula 24, 25]

Mwi sonde lyonse mwaba ifilonganino ukucila 1,100 umo babomfya ululimi lwa bankomamatwi

[Ifikope pe bula 26]

Icinso ca kwa Yehova calibalikila bankomamatwi