‘Jehofa o ba Phadimišeditše Sefahlego sa Gagwe’

SEFAHLEGO sa motho se na le mešifa e fetago e 30. Go nyakega e 14 feela yeo e šomago gotee go dira gore o myemyele! Akanya gore dipoledišano tša gago le batho ba bangwe di be di tla ba bjang ge nkabe mešifa ye e se gona. Na di be di tla kgahliša? Le gatee. Lega go le bjalo, go bao e lego difoa, mešifa ya sefahlego ga e šome feela go dira gore poledišano e kgahliše. Ge e šoma gotee le boitšhišinyo bja mmele, ke mokgwa o bohlokwa wa go botša ba bangwe seo motho a se naganago. Batho ba bantši ba ile ba tlabja ke kamoo polelo ya diatla e kgonago go hlalosa gaešita le dikgopolo tše thata gotee le dintlha tše dinyenyane.

Nywageng ya morago bjale, batho ba difoa lefaseng ka bophara ba ile ba thoma go bona sefahlego seo se nago le dipolelo le mebala e mentši go feta difahlego tša batho. Ka tsela ya seswantšhetšo, ba thomile go bona “sefahlego sa Morena.” (Dillo 2:19, PK) E be e le ka morero. Jehofa ke kgale a bontšha difoa lerato. O dirile bjalo le mehleng ya Isiraele ya bogologolo. (Lef. 19:14) Go rata ga gagwe difoa go bonagetše kudu mehleng ya lehono. ‘Thato ya Modimo ke gore mehuta yohle ya batho e phološwe gomme e fihle tsebong e nepagetšego ya therešo.’ (1 Tim. 2:4) Ka go hwetša tsebo e nepagetšego ya therešo mabapi le Modimo, batho ba bantši ba difoa, ge e le gabotse, ba kgonne go tla pele ga sefahlego sa Modimo. Go kgonegile bjang, ka ge batho ba difoa ba sa kwe? Pele ga ge re ka araba potšišo ye, a re ahla-ahleng lebaka leo ka lona polelo ya diatla e lego bohlokwa go batho ba difoa.

Go Kwa ka Mahlo

Go na le dilo tše ntši tšeo di sa kwešišwego mabapi le batho ba difoa le polelo ya diatla. Anke re hlaloseng tše dingwe tša tšona. Batho ba difoa ba ka otlela dikoloi. Go thata kudu gore ba kwešiše seo batho ba se bolelago ka go lebelela melomo ya bona ge ba bolela. Polelo ya diatla ga e swane le mongwalo wa difofu wa Braille e bile ga e fo ba pontšho ya boitšhišinyo bja mmele feela. Ga go na polelo ya diatla yeo e dirišwago lefaseng ka moka. Go feta moo, polelo ya diatla e fapane go ya ka meboto.

Na batho ba difoa ba kgona go bala? Le ge ba bangwe ba kgona go bala gabotse, therešo ke gore ba bantši ba thatafalelwa ke go bala. Ka baka la’ng? Ka baka la gore selo seo se ngwalwago letlakaleng se tšwa polelong e bolelwago ka molomo. Ela hloko kamoo ngwana yo a kgonago go kwa a ithutago polelo ka gona. Go tloga nakong yeo ngwana a belegwago ka yona, o dikologwa ke batho bao ba bolelago leleme la lefelong leo. Ka nako e kopana, o kgona go kgomaganya mantšu gomme a bopa mafoko. Se se itlela feela ka tlhago ge a e-kwa batho ba bolela. Ka gona, ge bana bao ba kgonago go kwa ba thoma go bala, ke feela taba ya gore ba ithuta gore ditlhaka tšeo di ngwadilwego letlakaleng di sepedišana le medumo le mantšu ao ba šetšego ba a tseba.

Bjale akanya o le nageng e šele ka phapošing yeo e dirilwego ka galase ya go thibela modumo. Ga se wa ka wa kwa leleme la fao le bolelwa. Letšatši le lengwe le le lengwe, batho ba moo ba tla go wena gomme ba leka go bolela le wena ba le ka ntle ga phapoši yeo ya galase. Ga o kgone go  kwa seo ba se bolelago. O bona feela gore dipounama tša bona di a bina-bina. Ge ba lemoga gore ga o kgone go ba kwa, ba ngwala mantšu ao letlakaleng gomme ba go bontšha ona galaseng ba le ka ntle. Ba nagana gore o swanetše go kgona go kwešiša seo ba se bolelago. O nagana gore o be o tla kgona go ba kwešiša gakaakang? O be o tla hwetša go le thata go boledišana le bona. Ka baka la’ng? Ka baka la gore seo se ngwadilwego ke polelo yeo o sa kago wa kwa e bolelwa. Bjo ke boemo bjoo batho ba bantši ba difoa ba ikhwetšago ba le go bjona.

Polelo ya diatla ke mokgwa o mokaone wa go bolela wa batho ba difoa. Motho o diriša boitšhišinyo bja mmele go tšweletša dikgopolo. Boitšhišinyo bja gagwe bja mmele gotee le ponagalo ya sefahlego di latela melao ya popopolelo ya diatla. Ka tsela ye, go tšwelela polelo e bonwago yeo e dirago gore go kgonege go fetišetša tsebišo mahlong.

Ge e le gabotse, boitšhišinyo bjo bongwe le bjo bongwe bja mmele bjo bo dirwago ke motho wa sefoa ka diatla, mmele goba sefahlego bo na le seo bo se bolelago. Boitšhišinyo bja mmele bjo bo dirwago ka sefahlego ga bo direlwe feela go kgahliša batho. Ke karolo e bohlokwa ya popopolelo ya diatla. Ka mohlala: Go botšiša potšišo ka go emiša dintši go ka bontšha gore potšišo yeo ke e sa nyakego karabo goba yeo e nyakago karabo ya ee goba aowa. Ge e ba dintši di išwa fase, se se ka bontšha gore potšišo e ra gore mang, eng, kae, neng, ka baka la’ng, goba bjang. Ditsela tše itšego tša go diriša molomo di ka šišinya bogolo bja selo, goba boemo bja tiragalo. Tsela yeo motho wa sefoa a šikinyago hlogo ya gagwe, a kukago magetla, a šikinyago dithama le go panya-panya mahlo a gagwe e tlaleletša go hlaloseng seo kgopolo e se tšweletšago.

Dika tše ka moka di thuša motho yo a lebeletšego go kwešiša seo se bolelwago ka tsela e kgahlišago. Ba diriša mokgwa wo wa go hlalosa dilo ka ditsela tše dintši, batho ba difoa bao ba tsebago polelo ya diatla gabotse ba kgona go tšweletša kgopolo e nngwe le e nngwe—go tloga go polelo ya theto go ya go mantšu ao a hlalosago dilo tšeo di raraganego, ao a hlalosago maikwelo a lerato le metlae gaešita le ao a hlalosago dilo tšeo di ka bonwago le tšeo di sa bonwego.

Dikgatišo tša Polelo ya Diatla di Dira Phapano

Ge tsebo ya Jehofa e tšweletšwa ka tsela e bonagalago ka polelo ya diatla, motho wa sefoa, ge e le gabotse, o kgona go kwa molaetša le go “dumela” go Mothomi wa molaetša woo. Ke baka leo, Dihlatse tša Jehofa di dirile maiteko a tseneletšego a go ruta batho ba difoa lefaseng ka bophara le go tšweletša dikgatišo tša go ba thuša. (Baroma 10:14) Ga bjale, go na le dihlopha tše 58 tša go fetolela polelo ya diatla go dikologa lefase, gomme dikgatišo tša DVD tša polelo ya diatla di hwetšagala ka dipolelo tša diatla tše 40. Na mošomo wo ka moka o hotše batho?

Jeremy yoo batswadi ba gagwe ka bobedi e lego difoa, o re: “Ke gopola tate a fetša diiri tše dintši a le ka phapošing ya gagwe ya go robala a ithuta ka mo go tseneletšego dirapa tše mmalwa tša sehlogo sa Morokami, a leka go di kwešiša.  Kapejana o ile a tšwa ka lebelo ka phapošing, a thabile a re: ‘Ke a e kwešiša! Ke a e kwešiša!’ Ke moka o ile a thoma go ntlhalosetša seo se bolelwago ke taba yeo. Ke be ke na le nywaga e 12 feela ka nako yeo. Ke ile ka gaša mahlo dirapeng tšeo gomme ka bolela le yena ka diatla gore: ‘Tate, ga ke nagane gore se ke seo di se bolelago. Di bolela gore . . . ’ O ile a emiša letsogo go mpontšha gore ke se sa tšwela pele gomme a boela ka phapošing ya gagwe gore a leke go hwetša ka boyena seo se bolelwago ke dirapa tšeo. Nka se tsoge ke lebetše tsela yeo a ilego a nyama ka yona le kamoo ke ilego ka ikwa ke mo rata ka gona ge ke be ke mmona a boela ka phapošing ya gagwe ya go robala. Lega go le bjalo, go ba le dikgatišo tša polelo ya diatla ka DVD go dirile gore ga bjale a kgone go kwešiša tsebišo gakaone. Ke tšeela godimo kudu go bona kamoo sefahlego sa gagwe se phadimago ka gona ge a bolela kamoo a ikwago ka Jehofa.”

Le gona, ela hloko phihlelo ya banyalani ba Dihlatse bao ba ilego ba boledišana le Jessenia, e lego kgarebe ya sefoa ya kua Chile. Ka morago ga go dumelelwa ke mmagwe go bontšha Jessenia Puku Ya-ka ya Ditaba tša Beibele—go DVD ka polelo ya diatla ya Chile, ba ile ba bega gore: “Ge Jessenia a be a thoma go bogela kgatišo ye, o ile a thoma go sega, ke moka a lla. Ge mmagwe a botšiša gore o llela’ng, o ile a araba ka gore ke ka gobane o rata seo a se bogetšego. Ke moka, mmagwe o ile a lemoga gore o be a kgona go kwešiša selo se sengwe le se sengwe go DVD yeo.”

Mosadi wa sefoa yo a dulago lefelong la magaeng kua Venezuela o be a e-na le ngwana o tee, gomme a imile wa bobedi. Yena le monna wa gagwe ba be ba nagana gore ba ka se kgone go hlokomela ngwana o mongwe ka mabaka a tša ditšhelete, ka gona ba be ba nagana go ntšha mpa. Di sa tsebe ka se, Dihlatse tša Jehofa di ile tša ba bontšha thuto 12 ya bidio ya Ke Eng Seo Modimo a se Nyakago go Rena? ka Polelo ya Diatla ya Venezuela. Thuto ye e hlalosa pono ya Modimo ka go ntšha mpa le go bolaya. Ka morago, mosadi yoo o ile a botša Dihlatse tšeo kamoo a lebogago ka gona gore o bone thuto yeo. O boletše gore ka baka la bidio yeo ba ile ba dira phetho ya go se sa ntšha mpa. Bophelo bja ngwana yo a sego a belegwa bo ile bja phološwa ke kgatišo ya DVD ya polelo ya diatla!

Lorraine, e lego Hlatse ya sefoa o hlalosa gore: “Go ithuta Beibele go be go swana le go bopa seswantšho se segolo o diriša diripana tšeo di betlilwego. Go be go e-na le dikgoba—diripana tšeo di hlaelago—kwešišong ya-ka ya seswantšho seo se feletšego. Lega go le bjalo, ge ditherešo tša Beibele di be di thoma go hwetšagala ka polelo ya diatla, dikgoba di ile tša thoma go tswalelega.” George, yo e lego sefoa e bile a e-na le nywaga e 38 e le Hlatse o re: “Ga go na pelaelo gore go kgona go kwešiša taba ka bowena go dira gore o be le tekanyo e itšego ya boitlhompho le boikholofelo. Ke dumela gore di-DVD tša polelo ya diatla di nthušitše kudu gore ke gole moyeng.”

“Seboka ka Polelo Ya-ka!”

Go tlaleletša dikgatišong tša polelo ya diatla, Dihlatse tša Jehofa di rulagantše diphuthego moo diboka ka moka di swarwago ka polelo ya  diatla. Ga bjale, go na le diphuthego tše 1 100 tša polelo ya diatla lefaseng ka bophara. Go bolelwa le batho ba difoa ka polelo ya bona gomme ditherešo tša Beibele di rutwa ka tsela yeo motho wa sefoa a naganago ka yona—ka polelo ya gagwe. Ditherešo tšeo di rutwa ka tsela yeo e hlomphago setšo le phihlelo ya gagwe bophelong.

Na go hlongwa ga diphuthego tša polelo ya diatla go bile le mohola? Ela hloko phihlelo ya Cyril yo a kolobeditšwego bjalo ka yo mongwe wa Dihlatse tša Jehofa ka 1955. Ka nywaga e mentši o be a ithuta ka kelohloko ka mo a bego a ka kgona dikgatišo tše di ngwadilwego gomme a e-ba gona dibokeng tša Bokriste ka mehla. Ka dinako tše dingwe go be go e-ba le batho bao ba bego ba fetolela polelong ya diatla gomme ka dinako tše dingwe ba sa be gona. Ge ba be ba se gona, o be a ithekga ka Dihlatse tšeo ka lerato di bego di thuša ka go mo ngwalela dintlha. E bile ka 1989, a šetše a e-na le nywaga e ka bago 34 e le Hlatse, moo go ilego gwa hlongwa phuthego ya mathomo ya polelo ya diatla New York City kua United States. Cyril o ile a ikwa bjang bjalo ka setho sa phuthego yeo? “Go be go le bjalo ka ge eka ke tšwile sethokgweng le bjalo ka ge eka ke tšwile ka thaneleng ya lefsifsi gomme ke tlile seetšeng. Go be go swerwe seboka ka polelo ya-ka!”

Diphuthego tša Dihlatse tša Jehofa tša polelo ya diatla ke mafelo ao go ona batho ba difoa ba ka kopanago ka mehla bakeng sa go ithuta ka Modimo le go mo rapela. Ke mafelo ao go ona batho ba Modimo ba ka hwetšago bagwera le moo ba ka kgothatšwago. Lefaseng le leo go lona batho ba difoa ba ka hlokomologwago le go se boledišwe, diphuthego tše ke mafelo a botšhabelo moo ba hwetšago sebaka sa go bolela le go dira segwera. Lefelong le bjalo, batho ba difoa ba ka ithuta, ba gola moyeng le go katanela go hwetša ditokelo tirelong ya bona go Jehofa. Dihlatse tše dintši tša difoa di kgonne go hlankela e le baebangedi ba nako e tletšego. Ba bangwe ba hudugetše dinageng dišele go yo thuša batho ba difoa go ithuta ka Jehofa. Banna ba Bakriste ba difoa ba ithuta go ba barutiši ba nago le bokgoni, barulaganyi le badiši, gomme ka go rialo ba bantši ba swanelegela go rwala boikarabelo ka phuthegong.

Kua United States, go na le diphuthego tše fetago tše 100 tša polelo ya diatla le dihlopha tše ka bago 80. Kua Brazil, go na le diphuthego tša polelo ya diatla tše e ka bago tše 300 le dihlopha tše fetago tše 400. Go na le diphuthego tše e nyakilego go ba tše 300 tša polelo ya diatla kua Mexico. Kua Russia go na le diphuthego tša polelo ya diatla tše fetago tše 30 le dihlopha tše 113. Ye ke mehlala e mmalwa feela yeo e bontšhago kgolo e diregago lefaseng ka bophara.

Le gona, Dihlatse tša Jehofa di swara dikopano tše di nyenyane le tše di kgolo ka polelo ya diatla. Ngwagola, dikopano tša selete tše fetago 120 di ile tša swarwa lefaseng ka bophara ka dipolelo tša diatla tše fapa-fapanego. Dikopano tše di thuša Dihlatse tša difoa go bona gore ke karolo ya borwarre bja Bokriste bja lefase ka bophara bjo bo holwago ke dijo tša moya tšeo di fihlago ka nako.

Leonard ke sefoa gomme o bile yo mongwe wa Dihlatse tše Jehofa ka nywaga e fetago e 25. O anega gore: “Ka mehla ke be ke tseba gore Jehofa ke Modimo wa therešo. Lega go le bjalo, ke be ke sa kwešiše gabotse lebaka leo ka lona a dumeletšego tlaišego. Ka dinako tše dingwe se se be se dira gore ke mo galefele. Eupša, mafelelong nakong ya polelo e nngwe kopanong ya selete ya polelo ya diatla, ke ile ka kwešiša ditaba tšeo di akaretšwago. Ge polelo e fela, mosadi wa-ka o ile a nkgotla-kgotla ka sejabana gomme a mpotšiša gore, ‘Na o kgotsofetše?’ Ke ile ka araba ke rerešitše gore ee! Ka morago ga nywaga e 25, ke a leboga gore ga se ka ka ka tlogela Jehofa. Ke be ke dula ke mo rata eupša ke be ke sa kgone go mo kwešiša ka mo go feletšego. Lehono ke a mo kwešiša!”

Tebogo e Tšwago Pelong

Ke dika dife tša sefahlego sa Jehofa tšeo batho ba difoa ba di bonago ka tsela ya seswantšhetšo ge ba ithuta ka yena? Ke lerato, kgaugelo, toka, potego, botho bjo lerato—le tše dingwe tše dintši.

Batho ba difoa ba Dihlatse lefaseng ka bophara ba bona sefahlego sa Jehofa gomme ba tla tšwela pele ba mmona ga kaone. Ka ge a rata batho ba difoa go tšwa pelong, ‘Jehofa o ba phadimišeditše sefahlogo sa gagwe.’ (Num. 6:25) Batho ba bjalo ba difoa ba leboga gakaakang gore ba tseba Jehofa!

[Diswantšho go letlakala 24, 25]

Go na le diphuthego tša polelo ya diatla tše fetago tše 1 100 lefaseng ka bophara

[Diswantšho go letlakala 26]

Sefahlego sa Jehofa se tloga se phadimetše tšhemo ya batho ba difoa