‘Pinasinag nen Jehova so Lupa To ed Sikara’

SAY lupa na too et walaan na masulok a 30 a muscle. Diad iyimis mo labat et 14 lan muscle so onggalaw! Isip mo pa no anto kasi itsuray lupam legan mon mitotongtong no anggapo iratan a muscle. Marakep kasi? Seguradon andi. Parad saray telek balet, sarayan muscle ed lupa et aliwa labat lan pamarakep na ekspresyon na lupa legan na pitotongtong. No tekepan na andawes, makatulong irayan muscle diad pangipasabi na saray ideya. Pandinayewan na dakel so sign language ta sarag ton ipasabi so anggan saray komplikadon ideya, pati saray angkekelag a pandurumaan na kabaliksan.

Diad agano ni, anengneng na saray telek ed interon mundo so sakey a lupa a napno na kabaliksan tan agbalot naparaan na anggan siopan too. Aliling to et anengneng da so ‘lupa nen Jehova.’ (Tag. 2:19) Lawas ya inad-aro nen Jehova iray telek, kanian ag-iya nibanbana. Impanengneng to itan a panangaro sani nen panaon na saray Israelita. (Lev. 19:14) Diad panaon tayo, sankapatnagan met so panangaro to ed saray telek. “Labay [na Dios] a saray amin a totoo nilaban ira komon, tan ondago ra ed pakapikabat ed katuaan.” (1 Tim. 2:4) Nibagan anengneng na dakel a telek so lupa na Dios ta naaralan da so katuaan nipaakar ed sikato. Panon iran akaaral anta ag-ira makarengel? Sakbay tayon ebatan iyan tepet, aralen tayo pa no akin ya importante so sign language ed saray telek.

Panaral Panamegley na Mata

Dakel iray lingon panmoria nipaakar ed saray telek tan ed sign language. Balet ta niraya so pigaran katuaan. Sarag na saray telek so manmaneho. Mair-irap dan talosan so ibabagay too diad inengneng da labat ed galaw na bibil. Say sign language et anggapoy piparaan to ed Braille tan aliwa labat itan a panangiyakto. Diad interon mundo et aliwan saksakey a sign language so uusaren. Kaaruman ni, walay daiset a panduruma na panangisenyas ed nanduruman rehyon diad sakey a bansa.

Kasin makabasa iray telek? Walaray arum a makabasa, balet maslak ed sikara et naiirapan. Akin? Lapud say uusaren ed saray babasaen et lenguahe na saray makarengel. Nengnengen tayo pa no panon a naaralan na makarengel ya ugaw so sakey a lenguahe. Manlapud inkianak to, narerengel to la so lenguahen sasalitaen na totoo ed kaliberliber to. Agmanbayag, sarag to lan panuulopen iray salita pian ibalikas so labay ton ibaga. Naaralan to iya lapud narerengel to so lenguahe. Kanian sano sikatoy onggapo lan manbasa, aralen to labat la no anton letra odino salita so kapetekan na tanol ya amta to la.

Natan, isip mo pan wala ka ed sananey a bansa. Tan say panaayaman mo et kuarton gawa ed salming ya anggapon balot so narengel mo manlapud paway. Agmo nin balot arengel so lenguahe ed satan a lugar. Inagew-agew kan lalaen na saray taga ditan, tan sasalien  da kan pitongtongan manlapud paway. Agmo narerengel so ibabaga ra. Say galaw labat na bibil da so nanenengneng mo. Lapud amoria ran agmo ira natatalosan, insulat day labay dan ibaga ed papel, insan da impanengneng ed sika. Say abaloan da et natalosan mo itan. Padesir mo, nabasam itan? Seguradon andi. Akin? Lapud samay akasulat et lenguahen agmo nin balot nadngel. Ontan ya ontan so situasyon na saray telek.

Parad saray telek, say sign language so sankaabigan a paraan na pitatalosan. Sikaray manguusar na saray sinyas pian nipasabi iray nanduruman ideya. Saray andawes tan say ekspresyon na lupa ra et unong ed grammar na sign language. Diad ontan et apawala so sakey a lenguahe a nipapasabi so impormasyon panamegley na mata.

Diad tua, kada galaw na lima, laman, tan lupa na sakey a telek legan ton mansisinyas et walaay kabaliksan. Say ekspresyon na lupa et aliwan pian pandinayewen labat iray totoo, noagta importante itan a kabiangan na grammar na sign language. Singa bilang: No mantepet kan akatagey so kirep mo, ipapanengneng na satan ya agka manaalagar na ebat, odino say labay mon ebat et on odino andi. No nanabetan so kirep mo, say itetepet mo et siopa, anto, iner, kapigan, akin, odino panon. Nayarin diad galaw na sangi et nanengneng so kabaleg na sakey a bengatla odino kadanet na sakey ya ideya. Say igalaw na ulo, takeb, aping, tan anggan say ikirem na saray telek et walaan na nanduruman kabaliksan.

Amin na saraya et ontutulong pian natalosan iray impormasyon ed makapasagyat a paraan. No kabkabisado na telek so sign language, sarag ton ipasabi so anggan anton ideya​—maanlong man odino teknikal a termino, romantiko man odino makapalek, nanengneng man odino andi.

Baleg a Tulong Iray Publikasyon ed Sign Language

Sano nipapaamta iray kakabatan nen Jehova panamegley na sign language, aliling to et ‘narerengel’ na telek so mensahe tan sirin et ‘manisia’ ed Nanlapuan na satan a mensahe. Kanian makulikulin pupulongan na saray Tasi nen Jehova iray telek diad interon mundo tan mangitatarya ira na publikasyon a pakagunggonaan da. (Roma 10:14) Diad kaplesan, walay 58 a grupo na managpatalos na sign language diad interon mundo. Tan niwala la ray aka-DVD a publikasyon ed 40 a sign language. Marakep kasi resulta na sarayan impansagpot?

Oniay inkuan nen Jeremy, a saray ateng to et telek: “Nanonotan ko imay inkagawa a pigay oras ya aaralen nen tatay so pigara labat a parapo na artikulo ed Say Panag-Bantayan. Panseseetan to kalamor a talosan itan. Kabebekta et pinmaway ed kuarto to tan malikeliket ton insinyas: ‘Atalosan ko la! Atalosan ko la!’ Insan to impaliwawa ed siak so kabaliksan  na samay inaral to. Dose años ko ni labat ed saman. Binasak ya agano iramay parapo, insan ko insinyas: ‘Tay, singa sananey amoy kabaliksan to. Kien . . .’ Insinyas ton ontunda ak la. Insan pinmawil ed kuarto to pian aralen lamet itan. Agkon balot nalingwanan so impakadismaya nen tatay tan say pandinayew ko legan kon sankanengneng ya ompapawil ed kuarto to. Balet natan ta wala la ray publikasyon ed sign language ya aka-DVD, lalo ton natatalosan so katuaan. Malikeliket ak met kapagno nanenengneng koy liket ed lupa nen tatay sano ipapaamta toy nalilikna to nipaakar ed si Jehova.”

Nia ni sakey ya eksperiensya na sanasawan Tasi a nampulong ed si Jessenia, sakey a telek a marikit a taga Chile. Inmabuloy so nanay nen Jessenia ya ipabantay ed sikato so My Book of Bible Stories​—On DVD, diad sign language na Chile. Oniay inkuan na sanasawa: “Legan a manbabantay si Jessenia, no maminsan et sikatoy makalek tan no maminsan met et makaakis. Sanen tinepet nen nanay to no akin a manakis, insinyas ton labalabay to imay babantayan to. Diman amoria nen nanay to a natatalosan to imay walad DVD.”

Walay biin telek a manaayam ed sakey a baryo diad Venezuela. Walay sakey ya anak to, tan malukon lamet. Plaplanoen dan sanasawa ya ipaekal imay lukon to ta iisipen dan agda la itan sarag a bilayen lapud irap na bilay. Binisita na saray Tasi nen Jehova iyan sanasawa. Anggaman agda amta itan a plano ra, impabantay da imay leksion 12 ed video ya Anto so Kakaukolanen na Dios ed Sikatayo? diad sign language na Venezuela. Ipapaliwawa na sayan leksion so panmoria na Dios ed panagpaekal tan panagpatey. Diad saginonor, misalsalamat imay bii ed saray Tasi ta naaral to imay leksion. Unong ed sikato, lapud satan et akapandesisyon iran agla manpaekal. Nisalbay sakey a bilay diad tulong na aka-DVD a publikasyon ed sign language!

Onia so impaliwawa nen Lorraine, sakey a Tasin telek: “Say panaral na Biblia et singa panutuop ed sakey a baleg a puzzle. Aliling to et walaray pigaran piraso a nababalang ta walaray agko natalosan. Balet sanen wala la ray publikasyon ed sign language a mangipapaliwawa ed katuaan, nalmok iratan a piraso.” Nia met so komento nen George, sakey a telek, tan Tasi ed loob la na 38 a taon: “Talagan no walay abilidad mon talosan a bukor so sakey a bengatla et nawalaan kay respeto tan talek ed sarilim. Akatulong na baleg ed siak iray publikasyon ed sign language ya aka-DVD pian mas onapit ak ed si Jehova.”

“Pantitipon ed Lenguahek!”

Nilikud ni ed saray publikasyon ed sign language, angorganisa iray Tasi nen Jehova na saray kongregasyon a sign language so uusaren ed pantitipon da. Diad kaplesan et walay masulok a 1,100 a kongregasyon a sign language diad interon mundo. Lapud say uusaren et  mismon lenguahe na saray telek, nibabangat ed sikara iray katuaan a manlalapud Biblia diad paraan a natalosan da, tan diad paraan a nipapanengneng so respeto ed kultura tan eksperiensya ra’d bilay.

Wala ta’y gunggona na impangorganisa ed saray kongregasyon a sign language? Alaen tayo pan alimbawa si Cyril, ya abautismoan bilang Tasi nen Jehova nen 1955. Diad loob la na taotaon et nanseetan ton aralen iray akaimprintan publikasyon tan regular ya onaatendi ed saray Kristianon pantitipon. No maminsan walaray managpatalos. Balet no anggapo, sikatoy mandedepende ed saray maad-aron Tasi a mangisusulat ed no antoy nipapaliwawa. Insan labat aporma nen 1989 so sankaunaan a kongregasyon a sign language diad New York, Estados Unidos. Talomplo tan apat a taon lan Tasi si Cyril ed saman. Anto kasi alikna nen Cyril bilang membro na satan a kongregasyon? “Aliwawaan ak, a singa ak akapaway ed ambilunget ya ungib. Niwalan siansiay pantitipon ed lenguahek!”

Diad saray sign language a kongregasyon na saray Tasi nen Jehova, regular a makapantitipon iray telek pian naaral day nipaakar ed Dios tan makapandayew ed sikato. Ditan et makakaromog iray kakaaro tan napapaseseg ira. Diad sayan mundo a saray telek et naiirapan a mitalosan tan ibabalewala na arum, sarayan kongregasyon et pasen a sarag day mitalosan ta miulop ed arum a too. Ditan met ira makakaaral, onaaligwas, tan nawawalaay pribilehyo diad panaglingkor ed si Jehova. Ayarian na dakel a Tasin telek so manlingkor bilang sigpot-panaon ya ebanghelisador. Walaray linma ed arum a bansa pian ontulong ed saray telek a nakabat si Jehova. Naaralan na saray Kristianon lalaki a telek so pagmaliw a maong a managbangat, manag-organisa, tan manangasikaso, diad ontan et dakel ed sikara so awalaan na saray responsabilidad ed kongregasyon.

Diad Estados Unidos, walay masulok a 100 a kongregasyon a sign language tan ngalngali 80 a grupo. Diad Brazil, walay manga 300 a kongregasyon a sign language tan masulok a 400 a grupo. Diad Mexico et ngalngali 300 so kongregasyon a sign language. Diad Russia, walay masulok a 30 a kongregasyon a sign language tan 113 a grupo. Pigara labat irayan alimbawa na ibubulaslas ed interon mundo. *

Wala met iray iyoorganisa na saray Tasi nen Jehova a sign language iran asemblea tan kombension. Nen katantaon, walay masulok a 120 a kombension ed interon mundo ed nanduruman sign language. Lapud saraya, nalilikna na saray telek a Tasi a kabiangan ira na sankamundoan a Kristianon impanaagi a minanabang ed nipanpanaon ya espiritual a tagano.

Oniay inkuan nen Leonard, sakey a telek a Tasi nen Jehova ed masulok lan 25 a taon: “Abayag ko lan amta a si Jehova so tuan Dios. Balet, agkon tanto natatalosan no akin ya iyaabuloy toy paniirap. Lapud satan et makakapasnok ak la laingen ed sikato no maminsan. Balet diad sakey a paliwawa ed distriton kombension diad sign language, atalosan kon siansiay sengegan. Kasumpal na paliwawa, sinikig to ak nen asawak, insan to ak tinepetan, ‘Malinew la’d sika?’ On, kuan kon tampol! Kayari na 25 a taon, misalsalamat ak ta agkon balot tinaynan si Jehova. Nensaman ko ni inaro si Jehova, balet ta walaray agko natalosan ed sikato. Balet natan et natatalosan ko la!”

Impapuson Pisasalamat

Antoran “ekspresyon” ed lupa nen Jehova so nanenengneng na saray telek sanen agamoran day kakabatan nipaakar ed sikato? Aro, panangabagey, inkahustisya, katooran, maaron-kaabigan, tan dakel ni ra.

Saray telek a Tasi ed interon mundo so makakanengneng ed lupa nen Jehova, tan mantutultuloy nin onlilinew itan. Lapud panangaro nen Jehova ed saray telek, ‘pinasinag to so lupa to ed sikara.’ (Num. 6:25) Agaylay pisasalamat da ta akabat day Jehova!

[Paimano ed leksab]

[Saray litrato ed pahina 24, 25]

Walay masulok a 1,100 a kongregasyon a sign language ed sankamundoan

[Saray litrato ed pahina 26]

Sinminag so lupa nen Jehova ed saray telek