‘Yehova Er Ishigh Nagh Ki Wanger sha a Ve’

ISHIGH ki orough ki a azuugh a inyam sha mi hemba atô 30. Nahan ka a gba u or nana se yô, azuugh a inyam 14 á er tom imôngo! Hen ase er ishigh you kia lu a azuugh a inyam ne ga ve iliam you ia lu la. Ia doo ungwan kpa? Mayange ga. Nahan kpa hen mbakondonato yô, azuugh a inyam ne nga a er tom i hemba di u nan kwaghôron doon ungwan tseegh tsô la. Kwaghôron u sha ave ka una seer sha tom u azuugh a inyam ne a eren yô, kwagh ne a wase mbaakondoato u kaven kwagh u í lu ôron la. Kpiligh ior kpishi iyol er iliam i sha ave ka i pase akaa a cimin kua mbamhen man hanma ivurugh ki kwagh u i soo ér i fa la cii yô.

Ken ashighe aa a sember karen ne, mbaakondoato mba sha tar cii ve nenge a ishigh ki gen ki ki hembe pasen akaa, shi ki hemba engem a ki orumace yô. Ka inja er ve nenge a “ishigh ki TER” nahan. (Ukwe. 2:19) Kwagh ne er abur abur ga. Yehova vande tesen tsuaa je ér mbaakondoato doo un ishima. Ngise er kwagh nahan ken tar u Iserael u tsuaa la. (Lev. 19:14) Sha ayange ne kpa, mbaakondoato doo un ishima je ka ashe tugh ga. “Sar [Aôndo] u ior cii ve̱ war ve̱ ar sha mfe u fan mimi la.” (1 Tim. 2:⁠4) Er mbaakondoato ve zough a mfe u vough sha kwagh u Aôndo yô, hingir er ve nenge a Aôndo nahan. Er ve ongo ga yô, vea fatyô u zuan a mfe u vough sha kwagh u Aôndo nena? Cii man se na mlumun sha mpin ne yô, de se nenge nen er i hii ve iliam i sha ave i lu mbaakondoato a inja yô.

Ka Ashe a Mbaakondoato a Lu Ato Ve Ye

Ior kpishi fa kwagh u mbaakondoato man iliam i sha ave la burana. De se wase u u̱ zuan a iwanger sha kwagh u mbaakondoato. Mbaakondoato vea fatyô u nahan kwaghhendan. Ka i taver ve u kenger or sha zwa man kaven kwagh u nan lu ôron la. Iliam i sha ave ngi inja i môm sha tar ga. Heela tseegh ga, mbaakondoato ka vea lu tar môm je kpa, vea lu sha ajiir kposo kposo yô, iliam ve i sha ave ka i wa kahan daalaa.

Mbaakondoato vea fatyô u ôron takeradaa? Mbagenev mba er, kpa mbakpishiv ka i taver ve u ôron. Sha ci u nyi? Ityôkyaa yô, ka iliam i sha zwa la ka i nger shin takerada ye. Nenge ase er wanye u nan ongo ka nan hen zwa u lamen yô. Hii shighe u wanye nan dugh ken iyav mbu ngô u nan la je, ka nan lu hen atô u ior mba ve lamen zwa u hen ijiir i í mar nan la. Shighe a karen kpuaa yô, maa nan hii u zoron atiakaa hingir iliam. Ka nan kôr cio u henen zwa la sha ci u nan ongo ior mba lamen u. Sha nahan yô, mbayev mba ve ongo ka vea hiin u ôron takerada yô, ve hen u zuan asember aa i nger shin takerada la sha mkaanem ma ve vande fan kera la.

Tôô wer u ngu ken tar ugen, ken iyou i i maa sha ajingi, i a̱ kume indyer ken won kpa u ungwa ken atô ga, shi wea ngor ker er ma nyi kpa á ungwa ken won ga yô. Shi i gbe je kpa u ngu a vande ungwan zwa u i lamen ken tar la kpaa ga. Nahan hanma iyange yô, ior mba hen tar la ka ve va tile ken won ve lamen a we ken atô. Ú nenge ve tenger zwa, kpa ú fatyô u  ungwan kwagh u ve ôron la ga. Mba va kaven er u lu ungwan kwagh u ve er la ga yô, ve nger kwagh shon sha kwa pipaa ve tese u sha ajingi. Ve hen er we u kav. Kpa á er nan ve u kav sha wono? Á taver we u kaven ken mlu la tsô. Sha ci u nyi? Sha ci u ve nger kwagh la ken zwa u i gbe je u lu a ungwa i lam u ga yô. Kape mlu u mbaakondoato kpishi a lu vough je ne.

Iliam i sha ave ka gbenda u injaa u mbaakondoato ve lamen yô. Or ka nan yar tom a ave a nan man alegh a yolough agen sha u tesen akav. Alegh a nan man mtenger u iyol i nan man kwagh u ishigh ki nan ki lu tesen la ka a dondo atindi aa iliam i sha ave. Ka a eren nahan mbaakondoato vea nengen yô, ashe a ve a hingir ato, nahan ve ungwa kwagh u í lu ôron la.

Sha kpôô yô, hanma ikyav i orakondoato nan er sha ave shin sha iyol shin sha ishigh ki nan shighe u nan lu lamen iliam i sha ave la cii ngi a mpase. Mbá tesen akav sha ishi sha ci u i doo u nengen tsô ga. Akav a sha ishi ne nga a inja kpishi ken iliam i sha ave. U tesen ikyav yô, aluer or pine u mpin ken iliam i sha ave man nan bon ashe sha a we yô, nan soo er we u kaa wer een gayô ei, shin we u gbidye kwar sha kwagh u nan lu ôron la. Kpa aluer nan pine u mpin man nan nyula ishigh sha yô, nan ngu pinen ér ka an, shin kanyi, shin ka hana, shin ka hanma shighe, shin ka sha ci u nyi, shin ka nena. Orakondoato nana fatyô u tenger zwa sha gbenda u tesen ér kwagh kehe shin a ndahar, gayô í er kwagh doo shin vihi, gayô kpilighyol shin ka beerkwagh. Gbenda u orakondoato nan tenger ityough, nan yoghul akende, nan tenger ahenge shin nan felegh ashe la cii ka u wase u pasen inja i kwagh u nan lu ôron la sha er á kav wang yô.

Alegh a iyolough ne cii nga a er tom imôngo ken iliam i sha ave sha u nan ashe kwaghyan. Ka a tesen akav kposo kposo sha iliam i sha ave nahan yô, mbaakondoato mba ve fe iliam i sha ave i kom ve la ve kav kwagh u í lu ôron la, ka a lu icam shin ishember i ken kwaghfan u sangen yeke, shin a lu kwagh u kwase a nomsoor shin kwagh u hômon, shin kwagh u akaa a i nengen a mi shin aa í nengen a mi ga kpaa.

Icer i Vidio i i Er ken Iliam i sha Ave la Ngi Wasen Mbaakondoato

Zum u ka a tese orakondoato mkaanem ma Aôndo sha iliam i sha ave yô, nan fatyô u ungwan loho la shi “nan” Un u loho la u dugh her a Na la “jighjigh.” Sha nahan yô, Mbashiada mba Yehova mba nôngon kpoghuloo pasen mbaakondoato kwagh tar sha won cii shi mba eren icer i vidio sha u wasen ve kpaa. (Rom. 10:14) Hegen ne, iniongo 58 ngi geman kwagh ken iliam i sha ave tar sha won cii, shi i er icer i DVD ken iliam i sha ave kposo kposo 40. Tom ne ngu umen atam kpa?

Jeremy, u mbamaren nav ve lu mbaakondoato la kaa ér: “M umbur er iyange igen terem vihi ahwa imôngo shin atô iyou na, lu nôngon kpoghuloo ér una hen Iyoukura una kav yô. Ica i gbe ga yô, a due ayem saan saan, á tese sha ave wener: ‘M zua a mi ve! M zua a mi ve!’ Maa a pasem inja i kwagh u á ôr ken Iyoukura  la. Hen shighe la m lu di anyom 12 tsô. Tsô m kenger shin takerada shon kpase maa m tese un sha ave mer: ‘Baba, beem er ka kwagh u ngeren la á lu ôron la ga nahan.’ M hiin mer me pase un yô, a kurem wegh ér m tile, maa a hide a nyôr shin iyou sha er una za time sha ngeren la una fa inja na yô. Yange doom a baba kpishi shighe u kpishigh ishigh sha hide lu nyôron ken iyou la; kwagh ne una hungur mo mayange ga. Nahan kpa, er iliam i sha ave i lu sha tser u DVD hegen yô, kwagh ne wase un u hemban kaven mkaanem ma Aôndo wang. Ka mea nenge ishigh nagh ki a saan sha, zum u una pasen er i doo un a Yehova nahan, m nenge kwagh ne mer ka beerkwagh ga.”

Shi time ase sha kwagh u anmgbian ugen vea kwase na mba yange ve lam a Jessenia, gumkwase u kondon ato u ken tar u Chile la. Ngô na yange na ve ian ve tese un Takerada wam u Akaaôron a Bibilo sha tser u DVD u Iliam i sha Ave i ken Chile la. Nahan ve kaa er: “Zum u Jessenia hii u nengen tser la yô, a se shi a vaa. Ngô na pin un ityôkyaa i lu vaan yô, a kaa ér ka sha ci u kwagh u un lu nengen la doo un. Ngô na maa fa je ér a kav hanma kwagh u a lu nengen sha tser u DVD la yô.”

Kwase-akondoato ugen ken tar u Venezuela lu a wan môm, shi hide lu iyav mbu wan na u sha uhar. Un vea nom na cii ve hen ér vea fatyô u nengen sha ônov uhar ga, sha ci u mtaver u inyar, nahan lu ve pe vihin iyav mbura. Tsô Mbashiada mba Yehova za u pasen ve kwagh hen ya ve, shin er ve vande fan ér or ne vea kwase wa ishima u vihin iyav ga nahan cii kpa, ve tese ve ityough ki sha 12 ken takerada u Kanyi Aôndo a Soo Hen a Vese la sha tser u DVD ú Iliam i sha Ave i ken Venezuela la. Ityough ki ve hen ne pase mnenge u Yehova sha kwagh u vihin iyav sha apera la man iwoo or. Shighe kar yô, kwase la pase iwuese na hen Mbashiada mbara er un hen kwagh ken ityough kira yô. A kaa ér kwagh la yange na yô, ve kera vihi iyav mbura ga. Nahan i war uma u wan u ken uya la sha iwasen i takerada u iliam i sha ave i sha tser u DVD.

Orakondoato ugen u a lu Orshiada yô mba yer un ér Lorraine, a kaa ér: “Yange mea henen Bibilo yô, i hemban tsumen mo a tsume cii. Yange m kav kwagh u i̱ lu ôron jighilii ga. Nahan kpa, er i gem pasen mimi u Bibilo ken iliam i sha ave hegen yô, ka kera tsumen mo ga.” Anmgbian George ka orakondoato, shi ngu Orshiada hegen anyom 38. A kaa ér: “Akperan nga ga, ka wea kôr cio u kaven kwagh iyol you yô, i hemba maan we iyol a mi shi u lu a vangertiôr sha kwagh u ú hen la kpaa. M nenge mer iliam i sha ave i ken icer i DVD la wasem kpishi u vesen ken jijingi.”

“Mkombo u I Eren ken Zwa Wam Yô!”

Kwagh ugen u Mbashiada mba Yehova ve er u seer sha ityakerada i iliam i sha ave yô, ve ver atôônanongo aa í eren mbamkombo ken iliam i sha ave tseegh yô. Hegen ne, i ver atôônanongo a eren mkombo ken iliam i sha ave sha tar hemba 1,100. Ka i tese mbaakondoato ken zwa ve, shi i pase ve mimi u Bibilo er ve henen kwagh ken iliam ve la. Ka i tese ve sha gbenda u  u tese icivir sha adini ve kua uma ve jimin cii yô.

Mver u i ver atôônanongo a eren mkombo ken iliam i sha ave la wase je he? Nenge ase kwagh u Cyril, u yange i er un batisema ken inyom i 1955, hingir Orshiada u Yehova la. Yange hen ityakerada yase sha afatyô na cii anyom ngee, kpa lu fantyô u zan mbamkombo nduuluu ga. Ashighe agen ior ve lu mba pasen un kwagh u i lu ôron ken mkombo la ken iliam i sha ave, ashighe agen di yô, ve lu ga. Yange una zua a or ga yô, anmgbianev mbagenev ve nger akaa ve na un a wasen un u kaven kwagh u i lu pasen ken mkombo la. Lu ken inyom i 1989, zum u lu orshiada anyom 34 la ve, i va mase veren tiônnongo u hiihii u iliam i sha ave ken New York City, ken tar u Amerika ye. Nahan lu Cyril, u un kpa lu ken tiônnongo shon la ken ishima nena? Cyril kaa ér: “Yange lum er m za due shin ikô, shin ken bar u a we ime mgbigh mgbigh nahan. Lu mkombo u i er ken zwa wam yô!”

Atôônanongo a iliam i sha ave a Mbashiada mba Yehova ve ver la ka ajiir a mbaakondoato vea fatyô u kumban her sha u henen kwagh u Aôndo shi civir un yô. Ka ajiir a nongoior u Aôndo u ye ikyar ayol a ve shi ve zough a ishimataver yô. Ior mba ken tar kpishi mba palegh u zuan kwagh a mbaakondoato shi lamen a ve, nahan kpa atôônanongo ne ka ajiir a injaa a ior ve zough kwagh a mbaakondoato shi ve lamen a ve yô. Ken atôônanongo ne, mbaakondoato ka ve hen kwagh, ve vese ken mcivir u Yehova shi ve lam a ior gbar gbar. Mbashiada kpishi mba ve lu mbaakondoato yô mba eren tom u pasen kwagh hanma shighe la. Mbagenev yem ken ityar igen u za wasen mbaakondoato u fan kwagh u Yehova. Mbakristu mba nomso mba ve lu mbaakondoato ka ve hen u lun mba fan ityesen tsema tsema man mba sôron akaa veren vough vough shi eren akaa a wasen ve u lun mbakuran, nahan mbagenev kpishi ken a ve ar sha ian i nengen sha ityom i ken tiônnongo.

Atôônanongo a iliam i sha ave nga ken tar u Amerika hemba 100, shi iniongo i duen kwaghpasen kuma er 80 nahan. Gema ken tar u Brazil yô, atôônanongo a iliam i sha ave ne nôngon u kuman 300, man iniongo i duen kwaghpasen di hemba 400. Ken tar u Mexico yô, atôônanongo a iliam i sha ave zurum 300. Tar u Russia gema ngu a atôônanongo ne 30 man iniongo i duen kwaghpasen 113. Se tsever a tsever kpuaa sha u tesen ikyav i mzehemen u tom ne tar sha won cii tsô.

Mbashiada mba Yehova shi mba eren mbamkohol mba kiriki man mba vesen ken iliam i sha ave. Ken inyom i i bee la, i er mbamkohol mba vesen 120 sha tar cii ken iliam i sha ave i ken itiar kposo kposo. Mbamkohol mban mba wasen Mbashiada mba ve lu mbaakondoato la u nengen ér ve kpa ve mba ken mzough u anmgbianev u tar sha won cii u a zough a kwaghyan u ken jijingi sha shighe vough la.

Leonard ka orakondoato; ngu Orshiada u Yehova hegen hemba anyom 25. A kaa ér: “Yange m fa er Yehova a lu Aôndo u mimi yô. Kpa gema taver mo u kaven er i hii ve a ne ian ér ican i er ior yô. Kwagh ne yange a na ishima i vihim a na shighe ugen kpishi. Kpa mba va ne kwaghôron ugen sha mkohol u vesen u i er ken iliam i sha ave yô, m mase kaven ityôkyaa i a ne ian ér ican i er ior yô. Zum u i na kwaghôron la i bee kera yô, kwase wam kpusugh mo gema pinem ér, ‘Ú ungwa nahan kuma u kpa?’ Nahan m kaa a na sha mimi wam cii mer een! Er anyom 25 a kar hegen ne, m wuese kpishi er m undu Yehova ga yô. Yehova yange doom ishima, kpa m fatyô u fan un kuman mo ga. Nyian yô, m fa un dedoo!”

M Wuese Kpishi

Er mbaakondoato ve hen kwagh u Yehova nahan, kanyi ishigh nagh ki lu “tesen” ve? Ki tesen ve dooshima man mhôônom ma zungwen man ijirôron i mimi man perapera man erdoo man aeren a dedoo agen kpishi.

Mbashiada mba ve lu mbaakondoato sha tar cii mba nengen a ishigh ki Yehova shi vea za hemen u nengen a ki wang seer a seer. Er mbaakondoato ve doo Yehova ishima yô, ‘Á er ishigh Nagh ki wanger sha a ve.’ (Num. 6:25) Mbaakondoato mban mba i iwuese kpishi er ve fe Yehova nahan!

[Foto u sha peeji 25]

Atôônanongo a eren mkombo ken iliam i sha ave nga sha tar hemba 1,100

[Foto u sha peeji 26]

Ishigh ki Yehova ki wanger sha mbaakondoato mba sha tar cii