‘Jehova Wabamunikila Abusyu Bwakwe’

KULI milambi yiinda ku 30 kubusyu bwamuntu. Milambi iili 14 ibelekela antoomwe kutegwa mumwete-mwete. Amuyeeye mboikonzya kuba mibandi yanu ikuti kakunyina milambi eeyi. Sena niyali kukkomanisya? Peepe. Pele kuli basicuulutwi, imilambi yakubusyu icita zyintu zinji kwiinda kupa buyo kuti mibandi kiinoneezya. Mbobatambaika ambobacita kubusyu kupa kuti bamwi bazyibe cibandikwa. Bantu banji balagambwa mwaambo ooyu wakutambaika mbuukonzya kubelesyegwa mukupandulula nokuba twaambo tukatazya munzila iisalede cakumaninina.

Mumyaka misyoonto yainda, basicuulutwi nyika yoonse babona kuti kuli muntu omwe uubabikkila maano alimwi uubayanda kapati. Mumaambilambali, babubona “busyu bwa-Jehova.” (Malo. 2:19) Eeci tiicakalitalikila buyo pe. Kuzwa kaindi, Jehova watondezya kuti ulabayanda kapati basicuulutwi. Wakacita oobu amusyule mwini kubana Israyeli bakaindi. (Lev. 19:14) Amazuba aano, luyando ndwajisi kuli basicuulutwi lulalibonya kapati. ‘Leza uyandisya kuti bantu boonse bafutulwe akuboola kuluzibo lwakuziba lusinizyo.’ (1 Tim. 2:4) Akaambo kakuba aluzyibo lwini-lwini lwakasimpe kajatikizya Leza, basicuulutwi banji babubona busyu bwakwe. Ino eeci cacitika buti kakuli basicuulutwi tabakonzyi kumvwa? Katutana kwiingula mubuzyo ooyu, atubone mwaambo wakutambaika ncuuyandika kapati kuli basicuulutwi.

Kubona Nkokumvwa

Kuli twaambo tutaluzi tunji twaambwa kujatikizya basicuulutwi alimwi amwaambo wakutambaika. Atumupandulwide twaambo twamasimpe tumwi kujatikizya basicuulutwi. Basicuulutwi balakonzya kweenzya myootokala. Cilabakatazya kapati kumvwa caambwa ikuti kabalangilila buyo milomo yamuntu waambaula. Mwaambo wakutambaika uliindene kapati a Mwaambo wabulembo bwaboofwu alimwi takuli kutambaika buyo pe. Kunyina mwaambo wakutambaika omwe uukonzya kubelesyegwa munyika yoonse. Kunze lyaboobo, basicuulutwi balatambaika kweelana abusena nkobazwa.

Sena basicuulutwi balakonzya kubala? Nokuba kuti bamwi balakonzya kubala kabotu, masimpe ngakuti bunji bwabasicuulutwi cilabakatazya kubala. Ino nkaambo nzi? Nkaambo zilembedwe apepa zizwa kumwaambo waambaulwa. Amuyeeye buyo mwana uutajisi penzi lyakumvwa mbwaiya mwaambo. Kuzwa ciindi mwana naazyalwa, ulakkala abantu baambaula mwaambo wakubusena ooko. Muciindi buyo cisyoonto ulacikonzya kuswaanganya mabala akupanga twaambo. Eeci cilacitika kwiinda mukumvwa buyo mwaambo ooyo kawaambaulwa. Aboobo, ibana bamvwa nobatalika kubala, icini ncobaiya cijatikizya kuzyiba imabala aalembedwe apepa mbwaaswaangene amabala ngobazyi angobakamvwa kale.

Lino amweezyeezye kuti muli kucisi cimbi muŋanda yamagilazi momutakonzyi kumvwa jwi kuzwa anze. Tamunaumvwide kawaambaulwa mwaambo wakucisi ooko nkomubede. Abuzuba, bantu bakucisi ooko balaboola akusola kwaambaula andinywe kabali kunze aaŋanda eeyi. Pele nzyobaamba nywebo tamukonzyi kuzimvwa pe. Mubona buyo milomo yabo  nkwiiputauka. Akaambo kakuti babona kuti tamucimvwide ncobaamba, bamulembela apepa akumutondezya kutegwa mubale. Bayeeya kuti mulacimvwa calembwa. Sena muyeeya kuti inga camuubila? Inga camukatazya kumvwana mubukkale oobu. Nkaambo nzi? Nkaambo cilembedwe cili mumwaambo ngomutanamvwide kuubandikwa. Oobu mbobukkale bwabasicuulutwi banabunji.

Mwaambo wakutambaika ngobamvwa kabotu basicuulutwi. Imuntu ulatambaika kwaamba twaambo. Mbwatambaika ambwacita kubusyu utobela milawo yamwaambo wakutambaika. Aboobo oobu mbuupangwa mwaambo ngomukonzya kubona uupa kuti twaambo tumwvugwe kwiinda mukulanga.

Masimpe ngakuti, kutambaika koonse nkwacita sicuulutwi kubelesya maanza ambwacita amubili akubusyu kuli ncokwaamba. Mbobalibonya kubusyu nobatambaika tabaciti oobo kutegwa bakkomanisye buyo bantu. Kucita boobo ncibeela ciyandika mumilawo yamwaambo wakutambaika. Mucikozyanyo: Kubuzya mubuzyo zikoye kazinyamukide inga caamba kuti mubuzyo ooyo uyandika buyo kuyeeyesya naa uyandika kuti muntu aingule kuti inzya naa peepe. Ikuti naa zikoye kaziwide, eeci caamba kuti kubuzyigwa kuti nguni, ninzi, nkuli, lili, ino kayi, naa ino mbuti. Zimwi ziindi kweelana ambobaucita mulomo kulakonzya kutondezya mbocili cipati cintu. Sicuulutwi mbwazungaanya mutwe, mbwanyamuna makuko, mbwaacita masaya alimwi ambwalaba-laba zipa bupanduluzi bwiindene-indene kukaambo kaambwa.

Eezyi zyintu zyoonse zipa kuti muntu uulangilila azimvwe zyaambwa munzila iikondelezya. Kwiinda mukubelesya nzila eezyi zyaandeene-andeene, basicuulutwi bauzyi kabotu mwaambo wakutambaika balakonzya kweema, kupandulula zyintu zimwi zilibedelede, ikwaamba makani aaluyando, imakani aasesya, alimwi akwaamba zyintu zilibonya azitalibonyi.

Mabbuku Aamu Mwaambo Wakutambaika Mbwaagwasya

Ikuti naa luzyibo lwa Jehova lwakambaukwa mumwaambo wakutambaika, sicuulutwi ulakonzya kuumvwa mulumbe alimwi ‘akuba alusyomo’ muli yooyo Wakautalisya. Aboobo, Bakamboni ba Jehova babeleka canguzu kukambaukila basicuulutwi nyika yoonse alimwi akubapa zyintu zikonzya kubagwasya. (Rom. 10:14) Mazuba aano, kuli tubunga twabaabo basandulula mabbuku aamumwaambo wakutambaika tusika ku 58 nyika yoonse, alimwi mabbuku aaya nkwaali a DVD mumyaambo yakutambaika iili 40. Sena mulimo woonse ooyu kuli mbowagwasya?

Jeremy, uuli abazyali basicuulutwi, wakaamba kuti: “Ndilayeeya bataata nobakali kubalila Ngazi Yamulindizi kuzyuli. Bakali kubala mincali misyoonto kwamawoola aali mbwaabede kutegwa bamvwisye ncobabala. Bakazwa cakufwambaana muŋanda kabakkomene alimwi akutambaika kabati: ‘Ndacimvwa caambwa! Ndacimvwa caambwa!’ Mpoonya bakandipandulwida ncocakali kwaamba cibalo. Ndakali buyo amyaka yakuzyalwa iili 12 ciindi eeco. Ndakabala mincali cakufwambaana, ndimane ndakatambaika kwaambila bataata kuti: ‘Taata,  tandisyomi kuti ncobaamba eeco. Baamba . . . ’ Bakatambaika kundikasya kubapandulwida, bamane bakajokela muŋanda kuya kutalika kubala alimwi kutegwa bazyibe cakali kwaambwa. Tandikalubi mbobakali kulibonya kabatyompedwe alimwi ambocakandikondelezya kulangilila kabajokela muŋanda. Pele, ikuba amabbuku aamumwaambo wakutambaika aali a DVD capa kuti batalike kutumvwisya kabotu twaambo. Ikubona mbobalibonya kabakkomene nobaamba mbobalimvwa kujatikizya Jehova, ncintu ncendilumba lyoonse.”

Alimwi amulange-lange cikozyanyo ca Bakamboni banabukwetene bakakambaukila Jessenia, imusimbi sicuulutwi wakucisi ca Chile. Banyina nobakazumina kuti Jessenia bamutondezye Bbuku Lyangu lya Makani Aamu Bbaibbele lili a DVD mu Mwaambo Wakutambaika waku Chile, banabukwetene aaba bakaamba kuti: “Jessenia naakatalika kulangilila DVD eeyi, wakatalika kuseka kumane misozi yakamweenda. Banyina nobakamubuzya cakamupa kulila, wakabavwiila kuti nkaambo kakuti cakamukkomanisya ncaakali kulangilila. Mpoonya banyina bakazyiba kuti wakazimvwa zyoonse nzyaakali kulangilila a DVD.”

Mukaintu umwi sicuulutwi uukkala muminzi kucisi ca Venezuela wakajisi mwana omwe, alimwi wakali ada lyabili. Walo amulumi wakwe bakalimvwa kuti inga tabacikonzyi kuba amwana umbi akaambo kabuyumuyumu bwakubula mali, aboobo bakali kuyeeya kuti baligwisye da eeli. Kabatazyi ncobakali kuyeeya banabukwetene aaba, Bakamboni ba Jehova bakabaswaya akubatondezya ciiyo 12 muvidiyo yakuti Ncinzi Leza Ncayanda Kulindiswe? mu Mwaambo Wakutambaika waku Venezuela. Eeci ciiyo caamba mbwakubona Leza kugwisya da akujaya. Nobakamana kweebelela, imukaintu ooyu wakabalumba Bakamboni akaambo kakumuyiisya ciiyo eeci. Wakaamba kuti, akaambo kavidiyo eeyi banabukwetene aaba bakamvwana kuti bataligwisyi da eeli. Mwana wakafwutulwa akaambo kabbuku lyamumwaambo wakutambaika lili a DVD!

Lorraine, Kamboni sicuulutwi, wakapandulula kuti: “Kwiiya Bbaibbele cakali mbuli kuti nimpasulula balozi. Cakali kundikatazya kumvwisya twaambo tumwi. Mabbuku aapandulula zyamu Bbaibbele aamumwaambo wakutambaika naakavwula, ndakatalika kutumvwisya twaambo twakali kundikatazya kumvwa.” Ba George, basicuulutwi Mbaakamboni kwamyaka iili 38, baamba kuti: “Cakutadooneka, ikuti kotumvwa twaambo toonse, cipa kuti ulimvwe kabotu akuba alusyomo. Ndilimvwa kuti ma DVD aamumwaambo wakutambaika andigwasya kapati kuba acilongwe ciyumu a Jehova.”

“Muswaangano mu Mwaambo Wangu!”

Kunze lyamabbuku aamumwaambo wakutambaika, Bakamboni ba Jehova babamba mbungano kwalo ooko miswaangano yoonse nkoyeendelezyegwa mumwaambo wakutambaika. Kwacecino ciindi, kuli mbungano zyamumwaambo wakutambaika ziinda ku 1,100 nyika yoonse. Basicuulutwi baambilwa mumwaambo wabo alimwi kasimpe kamu Bbaibbele kalayiisyigwa munzila sicuulutwi mbwayeeya—mumwaambo wakwe. Balayiisyigwa munzila iitondezya  bulemu kuzilengwa alimwi abukkale bwabo.

Sena kubambwa kwambungano zibelesya mwaambo wakutambaika kuli mbokwagwasya? Amulange-lange cikozyano caba Cyril, ibakabbapatizyigwa kuba umwi wa Bakamboni ba Jehova mu 1955. Kwamyaka minji, bakali kwiiya mabbuku aalembedwe kusikila mpobagolela alimwi bakali kujanika kumiswaangano ya Bunakristo lyoonse. Zimwi ziindi basanduluzi bakali kujanika pele zimwi ziindi kwakanyina. Nokwakanyina basanduluzi, bakali kugwasyigwa a Bakamboni ibakali kusoleka kulemba cakali kwaambwa kucibumbili aapepa. Cakali boobu mane do mu 1989 kabali Bakamboni kwamyaka iibalilwa ku 34, nokwakatalisyigwa mbungano yakusaanguna mumwaambo wakutambaika mucisi ca United States mudolopo lya New York City. Ino ba Cyril bakalimvwa buti kuba umwi wambungano eeyo? “Ndakalimvwa mbuli kuti ndazwa mucisaka, naa mubulyango imusiya mbi akuboola mumumuni. Muswaangano mumwaambo wangu!”

Mbungano zibelesya mwaambo wakutambaika zya Bakamboni ba Jehova mmasena nkobaswaanganina basicuulutwi kutegwa baiye makani aajatikizya Leza akumukomba. Aaya mmasena bantu ba Leza nkobakulwaizyilwa akujana balongwe. Munyika eeyi basicuulutwi mobatalikwayi kusangana abantu bamvwa alimwi mobalimvwa kuzandulwa, imbungano eezyi ngamasena nkobakonzya kubandika cakulikwaya akujana balongwe. Mumbungano eezyi, basicuulutwi balakonzya kwiiya akuyaambele kumuuya mumulimo wabo kuli Jehova. Bakamboni banji basicuulutwi bacikonzya kuba bakambausi baciindi coonse. Bamwi balongela kumasi aambi kuyoogwasyilizya basicuulutwi kwiiya makani aajatikizya Jehova. Banakristo basankwa basicuulutwi balaiya mbobeelede kuyiisya kabotu, kweendelezya zyintu amulimo wabweembezi, aboobo banji beelela kulanganya mikuli mumbungano.

Mucisi ca United States, kuli mbungano zibelesya mwaambo wakutambaika ziinda ku 100 alimwi atubunga tubalilwa ku 80. Mucisi ca Brazil, kuli mbungano zibelesya mwaambo wakutambaika zibalilwa ku 300 alimwi atubunga twiinda ku 400. Kucisi ca Mexico kuli mbungano zibelesya mwaambo wakutambaika zitandila ku 300. Kucisi ca Russia kuli mbungano zibelesya mwaambo wakutambaika ziinda ku 30 alimwi atubunga tuli 113. Eezyi nzikozyanyo buyo zisyoonto zitondezya kusumpuka kucitika nyika yoonse.

Bakamboni ba Jehova alimwi balaba amiswaangano yaalubazu, yabbazu alimwi ayacooko mumwaambo wakutambaika. Mwakali, kwakali miswaangano yacooko yiinda ku 120 nyika yoonse mumyaambo yakutambaika iisiyene-siyene. Eeyi miswaangano ipa kuti Bakamboni basicuulutwi babone kuti abalo mbabunyina bwa Bunakristo bwanyika yoonse ibasaninwa cakulya cakumuuya cipegwa aciindi ceelede.

Leonard, ngusicuulutwi alimwi ngumwi wa Bakamboni ba Jehova kwamyaka yiinda ku 25. Wakaamba kuti: “Kuzwa kubwana ndilizyi kuti Jehova ngo Leza mwini-mwini. Nokuba boobu, tiindakazyi kaambo ncazumizya kupenga. Zimwi ziindi, ndakali kunyema akaambo kakuti ndakali kuyeeya kuti kupenga kuzwa kulinguwe. Pele makani aakabandikwa kumuswaangano wacooko umwi wamumwaambo wakutambaika akandigwasya kumvwisya kaambo Leza ncazumizya kupenga. Imakani naakamana, bakaintu bangu bakandigunta akakokola akundibuzya kuti, ‘Sena mwakkutila?’ Kakunyina kudooneka ndakati inzya! Lino kwainda myaka iili 25 alimwi ndilikkomene kuti tiindamufwutatila Jehova. Lyoonse ndali kumuyanda pele tiindalimuzyi bwini mbwabede. Mazuba aano ndilizyi.”

Kulumba Kuzwa Ansi Amoyo

Ino mbube nzi basicuulutwi mbobabona kubusyu bwa Jehova ciindi nobaiya kujatikizya nguwe? Babona luyando, luzyalo, bululami, kusyomeka, luse alimwi abube bumwi mbwajisi.

Bakamboni basicuulutwi munyika yoonse balabubona busyu bwa Jehova alimwi banoozumanana kububona kwiinda mbobabubona lino. Akaambo kaluyando ndwajisi kuli basicuulutwi, ‘Jehova wabamunikila abusyu bwakwe.’ (My. 6:25) Elo kaka basicuulutwi aaba balalumba kapati akaambo kakuti bamuzyiba Jehova!

[Zifwanikiso izili apeeji 25]

Kuli mbungano zibelesya mwaambo wakutambaika ziinda ku 1,100 nyika yoonse

[Zifwanikiso izili apeeji 26]

Busyu bwa Jehova bwamunika mucilawo cabasicuulutwi