Li Jeovae «jaʼ te oy sat ta stojol[ik]»

OY MAS ta 30 yuni chʼuxuvil sat li jun krixchanoe. Kʼalal chi jtseʼine chtun kuʼuntik chanlajuneb li uni chʼuxuv taje. Ti chʼabaluk yuni chʼuxuvil li jsatike muʼyuk me kʼupil sba jechuk ti kʼalal chi jloʼilaje. Pe li krixchanoetik ti pakʼchikinetike maʼuk noʼox kʼupil-o sba sloʼilik kʼalal ch-abtej li yuni chʼuxuvil satike. Moʼoj, yuʼun kʼalal jmoj ch-abtej li satik xchiʼuk ti kʼuyelan tsbakʼes sjunul li sbekʼtalike, xuʼ me xakʼik ta aʼiel kʼusiuk noʼox loʼilal. Epal krixchanoetik ti labal tajek chilik ti toj lek kʼusi tspas yuʼun li senya kʼop sventa chichʼ alel li kʼusitik toj tsotsik ta aʼibel smelolale.

Achʼtik toe, epal pakʼchikinetik ta spʼejel Balumile xkoʼolaj kʼuchaʼal oy buchʼu laj yilbeik sat ti mu xkoʼolaj kʼuchaʼal sat jun krixchanoe. Jaʼ xkaltik, yilojbeik «sat li Jeovae» (Lam. 2:19, NM). Pe mu ta jechuk noʼox kʼotem ta pasel taje. Yakʼoj onoʼox tal ta ilel Jeova ti skʼanoj li krixchanoetik ti mu xaʼiik kʼoponele. Taj xa onoʼox ta skʼakʼalil voʼneal Israel ti chakʼ ta ilel ti jech kʼanvaneme (Lev. 19:14). Jaʼ jech chkiltik avi ek ti skʼanoj tajek pakʼchikinetik li Jeovae, «yuʼun li stuque tscʼan ti acʼo coluc scotol cristianoetique, xchiʼuc ti acʼo lic yotquinic li cʼusi melele» (1 Tim. 2:4). Koliyal ti jech laj yojtikinik lek Jeova li pakʼchikinetike, yilojbeik xa sat xkaltik. Pe ¿kʼuxi laj yojtikinik ti mu xaʼiik li melel aʼyeje? Sventa jtakʼtik taje jchantik baʼyel kʼu yuʼun toj tsots skʼoplal chaʼiik li senya kʼope.

Chaʼiik kʼoponel ta sbekʼ satik

Toj ep kʼusitik jecheʼ chalik ta sventa li pakʼchikinetike xchiʼuk ta sventa ti kʼuyelan chkʼopojike. Li pakʼchikinetike stsʼot yuʼunik karo. Vokol chaʼiik ta kʼelel li kʼusi chal yanal ketike. Li senya kʼope mu xkoʼolaj kʼuchaʼal li brailee, mi jaʼuk ti jech noʼox te xyeʼyun skʼob ti muʼyuk kʼusi chakʼ ta aʼiel li jun krixchanoe. Mu junuk noʼox li senya kʼop ta spʼejel Balumil xtoke, moʼoj, ep ta chop, yuʼun jelajtik ti kʼuyelan chkʼopojik ta jujun lume.

¿Mi xkʼel yuʼunik vun li pakʼchikinetike? Junantike xkʼel yuʼunik, pe ti kʼusie jaʼ mas ep ti toj vokol chaʼiike. ¿Kʼu yuʼun? Yuʼun li kʼusi tsʼibabile jaʼ sletrail jun kʼop ti ta eal skʼan xichʼ alele. Jnoptik avaʼi kʼuxi chchan kʼop jun olol ti xaʼi kʼoponele. Kʼalal chvokʼe te xa onoʼox xchiʼuk krixchanoetik ti nopajtik noʼox chkʼoponate, jaʼ yuʼun mu ta sjaliluk ti chlik xa kʼopojuk pʼelantike xchiʼuk ti mas xa ep kʼusitik chlik yale. Kʼalal chaʼi kʼuyelan chkʼopoj li krixchanoetike jech chlik xchan kʼopojel ek. Jaʼ yuʼun kʼalal chlik xchan skʼelel vun li olole, jaʼ noʼox skʼan skʼelbe li sletrail ta vun ti kʼusi snaʼ xa onoʼox kʼuyelan yechʼomal ta alele.

Avie jnoptik ti cha yikʼoxuk batel ta jun namal balumil ti mu xa nabe ta jyalel li skʼopik tee, vaʼun cha sbajik ta jun kuarto ti naka ta nen pasbil ti mu kʼusi xavaʼi ta jyalel li ta yute. Skotol kʼakʼal chtal krixchanoetik ti cha skʼoponik ta spat nene, pe mi jaʼuk xavaʼi li kʼusi chalike, jaʼ noʼox xavil ti chnik yanal yeike. Kʼalal chakʼik venta ti mu xavaʼi ta jyalel li kʼusi  chalike, tstsʼibaik ta uni vun, yalojik mi jaʼ to jech xuʼ xavaʼi li kʼusi chalike. ¿Mi jaʼ van jech xuʼ chavaʼi un? Ta melel, tsots chavaʼi ta yaʼibel smelolal. ¿Kʼu yuʼun? Yuʼun li kʼusi la stsʼibaboxuk ta vune jaʼ sletrail jun kʼop ti mu xa naʼe. Jaʼ jech epal pakʼchikinetik kʼuchaʼal taje.

Li senya kʼope jaʼ jech xuʼ lek xichʼ-o kʼoponel li pakʼchikinetike. Li pakʼchikine tstunes li kʼu sjamlej xokol ta spat xokon sventa chakʼ ta aʼiel li kʼusitike. Ti kʼuyelan tsbakʼes li sbekʼtale xchiʼuk li sate jaʼ jech chichʼ ilel li kʼusi chichʼ alel ti lek sgramatikaile. Koliyal ti jaʼ jech xuʼ xkʼopoje, xuʼ me xalbe yantik li kʼusitik tskʼane.

Jech, kʼalal chkʼopoj li jun pakʼchikine jutuk mu stekeluk velta oy kʼusi tskʼan chakʼ ta aʼiel kʼalal tsnikes skʼobe, li sbekʼtale xchiʼuk li sate. Li kʼusi chakʼ ta ilel ta sate maʼuk noʼox sventa chakʼbe mas yip li kʼusi chale, moʼoj, jaʼ te tsakal xtok li ta sgramatikail skʼope. Jech kʼuchaʼal liʼe, ta junantik senya kʼope skʼan smuyes smotsobik kʼalal oy kʼusi tsjakʼik ti mu persauk chichʼik takʼbele, o kʼalal tsjakʼik li kʼusi jechuk o moʼoj xi noʼox stakʼobile. Pe skʼan syales smotsobik kʼalal tsjakʼik «buchʼu», «kʼusi», «bu», «kʼusi ora», «kʼu yuʼun», o «kʼuxi». Jech xtok, ti kʼuyelan tsnikes yeik bateltike jaʼ sventa chakʼik ta aʼiel kʼu smukʼul li kʼusi chalbeik skʼoplale o kʼu to yelan li kʼusi yakal chalike. Ti kʼuyelan tsnikes sjol li pakʼchikine, li snekebe, li xokon sate, kʼalal tsmakʼulan li sate o ti kʼuyelan tspas li sbekʼ sate chakʼbe mas yipal li kʼusi chale.

Stekel ti kʼusi chichʼ pasel ta satile xchiʼuk ti kʼuyelan chichʼ nikesel jbekʼtaltike jaʼ tspas-o ta jun kʼupil sba kʼop xchiʼuk ti toj ep kʼusi chakʼ ta ilel li senya kʼope, xuʼ xakʼ ta aʼyel kʼusiuk, mi jaʼ sventa nichimal kʼop, skʼoplal kʼanbail, skʼoplal akʼob tseʼej, kʼusitik stakʼ kʼelel o stakʼ pikel, skʼoplal kʼusitik mu xkiltik o mu stakʼ jpiktik o yan kʼusitik.

Li kʼusitik chichʼ lokʼesel ta senya kʼope jaʼ koltavan

Kʼalal chichʼ albel skʼoplal Jeova li ta senya kʼope xuʼ xaʼi xkaltik pakʼchikin li kʼusi chile xchiʼuk x-ayan xchʼunel yoʼonton ta stojolal Dios ti jaʼ te likem talel li mantal taje. Jaʼ yuʼun li yajrextikotak Jeovae chakʼik persa ta xcholbel mantal li pakʼchikinetik ta spʼejel Balumil xchiʼuk ta xchapanel li kʼusitik sventa Vivlia ti tstabeik sbalile (Rom. 10:14). Ta epal mukʼta lumetik avie oy 58 ta chop tsjelubtasik li senya kʼope xchiʼuk ta 40 li ta kʼopetik taje oy xa DVD yuʼunik ti chalbe skʼoplal Vivliae. ¿Mi tojem li vokolil taje?

Li Jeremy ti pakʼchikin stot smeʼe, xi chale: «Kʼalal lajcheb toʼox jabilale xvul to ta jol ti te bajal jayibuk ora ta skuarto li jtot sventa chaʼibe smelolal uni jayibuk parafo li revista Li Jkʼel osil ta toyole. Vaʼun xmuyubaj xa lokʼ talel li ta skuartoe, xi laj yalbun ta senya kʼope: “¡Laj xa kaʼibe smelolal! ¡Laj xa kaʼibe smelolal!”, laj une lik yalbun ti kʼusi laj yaʼibe smelolal li ta parafoetike. Laj kani kʼel ta anil li kʼusi chal li revistae, vaʼun xi laj kalbe ta senyae: “Tot,  chkil noʼoxe maʼuk jech taje”. Kʼalal skʼan toʼox xkalbe smelolale, laj yalbun ti mu xa xkalbe mase, joyij batel xchiʼuk la sbaj sba ta skuarto yan velta sventa chaʼibe smelolal ta stuk noʼox li mantale. Muʼyuk ta jchʼay-o ta jol ti toj chopol laj yaʼi laj kile xchiʼuk ti toj yan sba yutsil laj kil ti muʼyuk te laj yikta-o sbae. Li avi ti oy xa li kʼusitik ti chalbe skʼoplal Vivlia ta DVD li ta senya kʼope mas xa lek chaʼibe smelolal li mantaletike. Ti chkil ti toj echʼ xa noʼox xmuyubaj kʼalal chal li kʼusi oy ta yoʼonton ta stojolal Jeovae, solel xi muyubaj-o ta jyalel ek».

Tana une jkʼelbetik skʼoplal jun nupultsʼakal yajrextiko Jeova ti la xchiʼinik ta loʼil jun tseb ti Jessenia sbi ti nakal ta Chilee, taje pakʼchikin. Kʼalal la skʼanbeik permiso smeʼ li tseb taje, laj yakʼbeik yil li DVD ta senya kʼop ta Chile li Jlivro ti chal loʼiletik ta Vivliae. Li nupultsʼakale xi chalik li kʼusi kʼot ta pasele: «Kʼalal lik skʼel video li Jesseniae lik tseʼinuk, laje lik okʼuk. Li smeʼe la sjakʼbe kʼu yuʼun ti ch-okʼe, li stuke laj yal ti yuʼun la toj kʼupil sba chil li kʼusi yakal tskʼele. Ta anil noʼox laj yakʼ venta smeʼ ti yakal chaʼibe smelolal skotol li kʼusi yakal tskʼele».

Ta jun paraje ta Venezuelae te nakal jun nupultsʼakal ti oy jun stsebike. Li ants ti pakʼchikine xchiʼuk xa yol yan velta, ta skoj ti muʼyuk lek stakʼinike, li nupultsʼakal taje snopoj xa tsyales li sneneʼike. Te kʼot jcholmantaletik ta sna li ants taje, akʼo mi mu snaʼik li kʼusi yakal chkʼot ta pasele, laj yakʼbeik yil li video ta xchanobil 12 li ta ¿Kʼusi tskʼanbutik ti Diose? li ta senya kʼop ta Venezuelae, ti te chalbe skʼoplal kʼusi tsnop Dios ta sventa li syalesel olole xchiʼuk li milvaneje. Ta mas tsʼakale, laj yal ti xmuyubaj tajek li ants ta skoj ti laj yil li mantale, yuʼun jel li kʼusi snopojik xchiʼuk smalale. Jaʼ jech, koliyal li kʼusi yichʼoj lokʼesel ta sventa Vivlia ta senya kʼope muʼyuk xa bu smil li yuni neneʼike.

Li Lorraine jun yajrextiko Jeova ti pakʼchikine, xi chale: «Xchanel li Vivliae xkoʼolaj kʼuchaʼal chichʼ tsʼakilanel jun mukʼta rompekabesa. Ti kʼusie jaʼ ti oy to jayibuk kʼusitik chʼabal sventa stsʼaki kuʼune, jaʼ yuʼun oy kʼusitik mu xkaʼibe smelolal xchiʼuk ti mu xkʼot lek ta jsat skʼelel skotole. Pe kʼalal lik yakʼbikun videoetik ta senya kʼope, te lik jta li kʼusitik skʼan to kuʼune». Li George ti pakʼchikin eke, ti oy xa ta 38 jabil yochel ta yajrextiko Jeovae, xi chale: «Kʼalal oy kʼusi chavaʼibe smelolal atuke mas cha pat avoʼonton xchiʼuk mas cha kʼuxubin aba. Ti kʼusitik lokʼesbil ta senya kʼop ta DVD kiloj lek ta melel ti jaʼ li kʼusi skoltaojun sventa xi chʼi li ta mantale».

«¡Jun tsobajel ta jkʼop jtuk!»

Li yajrextikotak Jeovae maʼuk noʼox tspukik li kʼusitik ta sventa Vivlia ta senya kʼope, moʼoj, yuʼun oy tsobobbailetik yuʼunik ti ta senya kʼop ch-echʼ skotol li mantal tee. Li avie oy xa mas ta 1,100 tsobobbailetik ta spʼejel Balumil. Li ta tsobobbailetik taje xuʼ te staik li kʼusi melel chal Vivlia ti ta skʼop stukik li ermanoetike, jun sbatsʼi kʼopik ti jaʼ jech kʼuchaʼal snopbenike xchiʼuk ti kʼuyelan stalel xkuxlejalike.

 ¿Mi xtoj-o van vokolil ti oy tsobobbailetik ta senya kʼope? Te ta jtabetik stakʼobil ta sventa ti kʼusi kʼot ta stojolal Cyrile. Laj yichʼ voʼ ta 1955 li ermano taje xchiʼuk echʼ jayibuk jabil ti tskʼan chaʼibe smelolal li kʼusi chal vunetike xchiʼuk chkʼot ta skotol tsobajeltik manchuk mi muʼyuk buchʼu xjelubtasbat ta senya kʼop bakʼintik. Kʼalal chʼabal buchʼu xjelubtasbat ta senya kʼop li mantal ta tsobajele, tstsʼibabat yuʼun ermanoetik ta uni vunetik li kʼusi chalik li buchʼutik chetʼesik mantale. Jaʼ to ta 1989 —kʼalal oy xaʼox ta 34 jabil chtun ta stojolal Jeova li Cyrile—, ti lik jun tsobobbail ta senya kʼop ta Nueva York, jaʼ li sba tsobobbail ta senya kʼop ta sjunul Estados Unidose. ¿Kʼu yelan chaʼi Cyril ti kʼalal lik batuk ta tsobobbail ta senya kʼope? Xi chal kaʼitike: «Xkoʼolaj kʼuchaʼal li lokʼ tal ta pimil teʼtik, xkoʼolaj kʼuchaʼal li lokʼ tal ta jun ikʼal jomol balumil. Nopo xa noʼox avaʼi: ¡jun tsobajel ta jkʼop jtuk!».

Li tsobobbailetik ta senya kʼope jaʼ me ti bu xuʼ xkʼotilanik ta tsobajel li pakʼchikinetik sventa chichʼik ta mukʼ li Diose xchiʼuk sventa chojtikinik mas. Ta skoj ti pʼajbil li pakʼchikinetike, jaʼ me jun spojobbail chaʼiik li tsobobbailetike, yuʼun te chpatbat yoʼontonik, te chloʼilajik xchiʼuk tsta yamigotakik. Kʼalal jech taje, xuʼ me chchanik mas kʼusitik, chlekub xkuxlejalik xchiʼuk mas me ep tspasbeik yabtel li Diose xchiʼuk mas me lek tspasik. Ep pakʼchikinetik ti chtunik xa ta spasbel yabtel Dios ta tsʼakal orae. Jlome batemik ta yan balumil sventa tskoltaik yan pakʼchikinetik ta yojtikinel li Jeovae. Oy yantik xtoke xtojobik lek ta jchanubtasvanej, lek snaʼik xchapanel li kʼusitik tspasike xchiʼuk lek chchabiik li xchij Diose, jaʼ yuʼun staoj yabtelik ta tsobobbail.

Li ta Estados Unidose oy mas ta 100 tsobobbailetik li ta senya kʼope xchiʼuk te van 80 grupoetik. Li ta Brasile oy mas ta 300 tsobobbailetik xchiʼuk mas ta 400 grupoetik. Li ta Mexicoe oy xa jutuk mu 300 tsobobbailetik, yan li ta Rusiae oy mas ta 30 tsobobbailetik xchiʼuk 113 grupoetik. Taje jaʼ noʼox juteb yuni vinajem ti yakal chchʼi ta jyalel li abtelal ta chol mantal ta spʼejel Balumile.

Jech xtok, chichʼ pasel mukʼta tsobajeletik li ta senya kʼope. Li echʼ jabile laj yichʼ chapanel mas ta 120 mukʼta tsobajeltik ta oxib kʼakʼal ta spʼejel Balumil. Jaʼ me te chakʼik venta li yajrextikotak Jeova ti pakʼchikinetik ti toj ep yermanotakik ta spʼejel Balumile, ti ta yorail chichʼik makʼlinel ta mantal ti xchapanoj li organisasione.

Jun ermano ti pakʼchikin ti Leonard sbie xchiʼuk ti oy xa ta 25 jabil yichʼoj voʼe, xi chal kaʼitike: «Manchuk mi jnaʼoj xa onoʼox ti jaʼ melel Dios li Jeovae, muʼyuk toʼox bu kabinojbe lek smelolal kʼu yuʼun chakʼ ti akʼo oyuk vokolile. Ta skoj taje jaʼ toʼox chi ilin-o ta stojolal Jeova bakʼintik. Pe te laj kaʼibe smelolal ta jun mantal ta jun mukʼta tsobajel ta oxib kʼakʼal ta senya kʼop ti toj lek la xchap kaʼie. Kʼalal laj li mantale, la stijun ta xukʼub li kajnile xchiʼuk xi tstseʼin laj yalbune: “¿Mi xa muyubaj yaʼel un ti kʼuyelan la xchapbeik smelolale?”. Sba to velta laj kal ti jeche. Jkʼanoj onoʼox tajek li Jeovae, pe mu toʼox xkaʼibe lek smelolal un ti kʼu yuʼun chakʼ akʼo oyuk li choplejale. Li avi une xkaʼibe xa smelolal. ¡Batsʼi lek ta jyalel ti muʼyuk bu xi namaj ta stojolal li Jeovae!».

Oy ta yoʼontonik ta jyalel tstojik ta vokol

¿Kʼusi chilbeik ta sat Jeova kʼalal chchanik melel mantal li pakʼchikinetike? Chilik kʼanelal, kʼuxul oʼontonal, tukʼilal, stukʼil oʼontonal, slekil oʼontonal xchiʼuk ep to kʼusitik chilik.

Li epal yajrextikotak Jeova ta spʼejel Balumil ti pakʼchikinetike yakal chilbeik sat Jeova xchiʼuk mas to me lek chilbeik batel. Ta skoj ti toj echʼem kʼanbilik yuʼun Jeovae, xi chal Vivlia ta stojolalike: «Acʼo lecuc yiloxuc li Mucʼul Diose» (Núm. 6:25). ¡Oy ta yoʼontonik ta jyalel ta stojel ta vokol ti xojtikinik xa li Jeovae!

[Lokʼol ta pajina 25]

Oy mas ta 1,100 tsobobbailetik ta spʼejel Balumil li ta senya kʼope

[Lokʼol ta pajina 26]

Li Jeovae «jaʼ te oy sat ta stojol[ik]» li pakʼchikinetike