Evit distraksyon dan sa “zour bon nouvel”

SA KAT lepre ti pe mazinen ki swa zot ti pou fer. Personn pa’n ofer zot lomonn oubyen lasarite kot baro lavil. Bann Siryen ti’n anserkle lavil Samari, zot ti pe anpes manze antre dan lavil pour ki bann dimoun i swa rann zot lekor oubyen mor lafen. I pa ti vo lapenn pour antre dan sa lavil, pri manze ti’n mont en kantite. I ti annan en ka ki ti’n ganny raporte kot en dimoun ti’n ganny manze.—2 Rwa. 6:24-29.

Sa bann lepre ti mazinen, ‘Akoz nou pa al kot kan bann Siryen? Nou pa pou perdi nanryen.’ Zot ti al kot kan bann Siryen ler fernwanr ti fer kot personn pa ti pou remark zot. Kan zot ti ariv laba, i ti napa okenn tapaz, ni personn pe veye. Bann seval ek bourik ti’n anmare, me ti napa solda. Sa kat lepre ti get dan en latant. I ti napa personn, me parkont i ti annan manze ek bwar annabondans. Alor zot ti manze e bwar. Sa bann lepre ti osi vwar lor, larzan, lenz ek lezot keksoz valer. Zot ti pran en pe sa bann keksoz, zot ti al kasyet e apre zot ti retournen pour pran lezot keksoz ankor. Sa kan ti’n ganny abondannen. Par mirak Zeova ti’n fer bann Siryen tann tapaz en lafors militer. Zot ti krwar ki zot ti pe ganny atake, alors bann Siryen ti sove. Zot ti kit tou keksoz deryer e nenport ki dimoun ti kapab pran sa bann keksoz.

Sa bann lepre ti pran bann keksoz valer e kasyet zot. Me ler zot ti mazinen ki ti annan bann dimoun Samari ki ti pe mor lafen, sa ti fatig zot konsyans. Zot ti konmans dir avek kanmarad: “I pa byen sa ki nou pe fer. Sa zour i en zour bon nouvel!” Sa bann lepre ti depese pour retourn Samari e rakont sa bon nouvel konsernan sa ki zot ti’n dekouver.—2 Rwa. 7:1-11.

Ozordi, nou osi nou pe viv dan sa letan ki kapab ganny apele “en zour bon nouvel.” Pour met lanfaz lo en laspe remarkab, “siny . . . lafen,” Zezi ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Mat. 24:3, 14) Ki lefe sa i devret annan lo nou?

Bann keksoz personnel i kapab detourn nou vizilans

Sa bann lepre ti telman kontan akoz zot ti’n dekouver sa bann keksoz ki zot ti’n tanporerman oubliy Samari. Zot ti pe zis mazin sa ki zot ti pou kapab gannyen. Eski menm keksoz i kapab ariv avek nou? “Lafamin” i form parti sa siny ki ti pou arive dan letan lafen sa move lemonn. (Lik 21:7, 11) Zezi ti averti son bann disip: “Fer byen atansyon zot menm, pangar zot vizilans i ganny detournen avek festen, labwason ek traka lavi.” (Lik 21:34) Konman Kretyen, nou devret fer byen atansyon pour pa les bann keksoz personnel dan nou lavi tou le zour fer nou oubliye ki nou pe viv dan sa “zour bon nouvel.”

En Kretyen ki apel Blessing pa ti les bann keksoz personnel detourn son vizilans. I ti pran servis pionye avan ki i ti fini lekol, finalman i ti marye avek en Betelit e i ti ganny aksepte konman en manm fanmir Betel Benen. I dir: “Mon fer netwayaz dan Betel, e mon vreman kontan mon responsabilite.” Aprezan  Blessing i kapab rapel avek lakontantman sa 12 lannen ki i’n pase dan servis aplentan, i kontan ki i’n reste konsantre lo sa “zour bon nouvel” ki nou pe viv ladan ozordi.

Fer atansyon bann distraksyon ki kapab pran bokou nou letan

Ler i ti pe anvoy son 70 disip prese, Zezi ti dir: “Rekolt i an labondans, me napa bokou travayer. Alor sipliy Propriyeter rekolt pour li anvoy bann travayer pou ranmas son rekolt.” (Lik 10:2) Si rekolt pa ganny fer atan sa bann keksoz ki bezwen ganny rekolte i kapab gate, pareyman si nou negliz sa travay prediksyon, sa i kapab fer dimoun perdi zot lavi. Alor Zezi ti azoute: “Pa dir bonzour personn lo semen.” (Lik 10:4) Dan langaz orizinal sa mo “bonzour” i kapab vedir plis ki fer en senp “alo.” I kapab osi enkli anmay sa dimoun e fer en gran konversasyon, en keksoz ki kapab arive ler nou zwenn en zanmi. Alor Zezi ti dir avek son bann disip pour evit bann distraksyon ki pa neseser e servi byen zot letan. Sa mesaz ki zot ti devret prese ti irzan.

Zis mazinen ki kantite letan nou kapab pase dan bann distraksyon. Dan plizyer pei, pour bokou lannen televizyon in ganny rekonnet konman sa keksoz ki’n gaspiy tro bokou letan bann dimoun. Ki nou pour dir konsernan telefonn mobil ek konpiter? Dapre en serve ki ti ganny fer Langleter kot 1,000 adilt ti ganny entervyou i montre ki “en dimoun ordiner Langleter i pas plis ki 88 minit par zour lo telefonn lakaz, 62 minit an plis lo telefonn mobil, 53 minit pour anvoy imel e 22 minit pour anvoy teks lo telefonn.” An tou, i depans de fwa plis letan ki en pionye asistan i konsakre dan son servis tou le zour. Ki kantite letan ou pase lo telefonn, pour anvoy teks e pour anvoy imel?

Ernst ek Hildegard Seliger ti fer atansyon konman zot ti servi zot letan. An tou, zot tou le de zot ti pas plis ki 40 an dan kan konsantrasyon Nazi e bann prizon Kominis. Apre ki zot ti ganny large, zot ti fer servis pionye ziska ki zot ti termin zot lavi lo later.

En kantite dimoun ti a kontan fer parey bann Seligers. Sa koup ti’n kapab pas laplipar zot letan pour lir e ekrir let. Me, zot ti met bann keksoz spirityel dan premye plas dan zot lavi.

Byensir, nou tou nou vreman kontan pour kominik avek nou fanmir, e napa nanryen mal avek sa. Nou retir byenfe ler nou byen swazir bann diferan aktivite ki nou fer sak zour. Parkont, i pou saz si nou fer byen atansyon pour annan kontrol lo bann distraksyon ki kapab pran tro bokou nou letan pandan ki sa zour bon nouvel pe ganny prese.

Pres plennman sa bon nouvel

Pa i vreman en benediksyon pour viv dan letan sa “zour bon nouvel.” Annou pa les nou ganny distrer parey sa kat lepre ki ti les zot ganny distrer premye kou. Pa bliye ki apre zot ti realize e dir: “I pa byen sa ki nou pe fer.” Pareyman, i pa byen pour les nou bann lobzektif oubyen distraksyon gaspiy nou letan e anpes nou partisip plennman dan predikasyon.

Nou annan en bon legzanp pour swiv dan sa domenn. Ler zapot Pol ti pe reflesir lo sa 20 premye lannen ki i ti’n pase dan son minister, i ti ekrir: “Mon’n alor anons plennman Bonn Nouvel konsernan Kris.” (Rom. 15:19) Zapot Pol pa ti les nanryen fer li perdi son devouman. Annou annan sa menm devouman parey li anmezir ki nou anons sa mesaz Rwayonm dan sa “zour bon nouvel.”

[Portre lo paz 31]

Blessing pa ti les son prop lentere enterfer avek son servis aplentan

[Portre lo paz 32]

Fanmir Seligers ti vreman fer atansyon konman zot ti servi zot letan