Aníkena mbaʼeve ñandejoko ñamombeʼu hag̃ua marandu porã

PE TÁVA Samáriape jaikétavo, oĩ cuatro lepróso ombaʼejerurevahína péro mbaʼevetéanga noñemeʼẽi chupekuéra. Mbaʼérepa upéva? Umi Siriaygua ningo omongora Samaria ha umi hénte ndaikatuvéima osẽ ha iñembyahyipáma hikuái. Ha maʼerã voi piko umi lepróso ohovéta upépe ko hepyetereimava la tembiʼu. Oĩma voi ñembyahýigui imemby jepe hoʼúva (2 Rey. 6:​24-29).

Ha umi lepróso ndoikuaavéimarõ mbaʼépa ojapóta, oho hikuái peteĩ pyharépe umi soldádo Siriaygua opytahápe. Péro upépe ndotopái avavetére, kavaju ha vúrromante otopa iñapytĩhápe. Upémarõ oikuaaseterei hikuái mbaʼépa la oikóva ha oho omaña mávapa oĩ umi óga kárpa guýpe. Péro ndaipóri avei avavete upépe ha oike hoʼupaite hikuái la ojuhumíva. Umi lepróso otopa avei heta mbaʼe ojejapóva óro ha plátagui. Oĩ avei ao ha ambue mbaʼe hepy ha iporãmba jepéva. Ha ogueraha hikuái la ikatumíva, oho oñomi ha ou jey oguerahave. Péro mbaʼe piko oikopáraʼe umi Siriayguágui? Jehová ningo peteĩ milágro rupive ohesareapákuri chupekuéra. Umi Siriaygua ningo ohendúvaicha ouha chupekuéra heta soldádo oñorairõ hag̃ua. Upévare ohejapaite hikuái ikosakuéra ha osẽ ohopa hese.

Umi lepróso ogueraha guerahave la otopamíva ha upéi imanduʼa sapyʼa umi Samariaygua omanomba potaitemaha ñembyahýigui. Ha upéva oguapy hesekuéra ha heʼi: ‘Naiporãi ningo ko jajapóva. Kóva hína ára jaraha hag̃ua marandu porã’. Upémaramo oho meme omombeʼu umi Samariayguápe mbaʼépa otopa hikuái (2 Rey. 7:​1-11).

Ñande ningo ko árape ñamombeʼuvaʼerã avei peteĩ ‘marandu porã’. Yma Jesús omombeʼuvaʼekue voi mbaʼépa oikovaʼerã oñeĩ vove ára pahápe. Ha upérõ haʼe heʼi: ‘Ñandejára marandu porã Rréino rehegua ojekuaaukavaʼerã opárupi ikatu hag̃uáicha opa tetãnguéra oikuaa ha upe rire ouvaʼerã pe fín’ (Mat. 24:​3, 14, JMP). Mbaʼépa jajapovaʼerã upévare?

Ndovaléi jajepyʼapyeterei

Umi lepróso ningo ohecharamoiterei umi mbaʼe otopavaʼekue. Ha hesarái hikuái umi hapicha oĩvagui Samáriape, umi ohasa asyetereíva hikóni. Haʼekuéra ijehénte ojepyʼapy. Ha ñanderehe ikatueténte avei oikohína upéva. Jesús ningo heʼivaʼekue voi ára pahápe oĩtaha “ñembyahýi” (Luc. 21:​7, 11). Ha heʼi avei hemimboʼekuérape: ‘Peñangarekóke ha ani peʼa mbaʼeveichagua mbaʼe vaípe, jekaʼu ha umi mbaʼe ñande rekovépe ñandepyʼapývape’ (Luc. 21:34). Upéicharõ ñañeñangarekovaʼerã ani hag̃ua ñapensaiterei umi mbaʼe ñandepyʼapývarente. Upéva ningo ikatu hína ñanembyesarái ko árape ñamombeʼuvaʼerãha pe ‘marandu porã’.

Jahechamína mbaʼépa ojapovaʼekue peteĩ ermána hérava Blessing. Haʼe ningo akóinte omotenonde Jehová rembipota. Yma koléhiope oikeha tiémpope voi ojapóma iprekursorádo. Upéi ou omenda peteĩ betelita rehe ha oñeinvita chupe oho hag̃ua avei Betel de Benínpe. Ko ermána heʼi: “Che ningo amopotĩ kotykuéra Betélpe ha chegustaiterei upe che  rembiapo”. Blessing doce áñoma oiporupaite hague itiémpo Jehová servísiope ha ovyʼaiterei ohechakuaa haguére ko árape omombeʼuvaʼerãha pe ‘marandu porã’.

Umi mbaʼe ikatúva oipeʼa rei ñandehegui ñane tiémpo

Jesús omondórõ guare 70 hemimboʼépe opredika hag̃ua, heʼi chupekuéra: “Heta oĩ pe temitỹngue, ombaʼapovaʼerã katu mbovy. Upévare pejerurevaʼerã kóga járape tombou mbaʼapoharakuéra omonoʼõ hag̃ua” (Luc. 10:​2, JMP). Peteĩ chokokue nomonoʼõiramo itiémpope hemitỹngue ikatu oñehundipa chugui. Upéicha avei ñande ndajapredikáiramo kyreʼỹme ikatu heta ñande rapicha oñehundi. Upévare Jesús heʼi: “Ani pepyta tapére pemomaitei hag̃ua avavépe” (Luc. 10:​4, ÑÑB). Pe ñeʼẽ griégogui ojetradusíva “maitei” ningo heʼise hína “mbaʼéichapa” ha upéi pe oporomomaiteíva ohoreíma hese, órare opyta oñemongeta. Péro Jesús remimboʼekuéra ningo pyaʼe omombeʼuvaʼerã pe marandu. Upévare nomakaneaivaʼerã ha oiporu porã hikuái itiémpo.

Heta mbaʼe ningo oĩ hoʼureíva ñandehegui ñane tiémpo! Ymaiterei guivéma pe téle oipeʼa rei ñande rapichakuéragui itiémpo. Upéicha avei umi selulár ha komputadóra. Pór ehémplo, Gran Bretáñape oñeporandu 1.000 tapichápe mbaʼéichapa oiporu itiémpo. Ha upéva rupive ojehecha “káda día oiporuha hikuái 88 minúto oñeʼẽ hag̃ua teléfonope, 62 minúto selulárpe ha 22 minúto omondo hag̃ua mensáhe. Avei oiporu hikuái 53 minúto omondo hag̃ua mensáhe Internet rupive”. Ñasumambaitéramo koʼã tiémpo oiporúva hikuái jahechakuaáta hetaveha oiporu hikuái itiémpo káda día umi precursor auxiliar oiporúvagui opredika hag̃ua. Upévare iporã ñañeporandu: “Mboy piko che aiporu che tiémpo koʼã mbaʼerã?”.

Ernst ha hembireko Hildegard Seliger ningo oiporu porã vaʼekue itiémpo. Cuarenta áño ohasa hikuái oñondive umi campo de concentración nazi ha comunista poguýpe. Upégui osẽ rire ojapo hikuái iprekursorádo omano meve.

Heta ermáno ningo omondo chupekuéra kárta. Upévare haʼekuéra ikatu kuri oiporu heta itiémpo olee ha ombohovái hag̃ua umi kárta, péro haʼekuéra omombaʼetereive Ñandejára servísio.

Ndaivaíri ningo pyʼỹinte ñañemongeta ñane pariénte térã ñane amigokuéra ndive. Ha iporã voi jajapo jepi upéicha. Péro naiporãinte ningo jaiporueterei ñane tiémpo umiarã, pórke ñande ñaikotevẽ tiémpo ñamombeʼu hag̃ua ko árape pe ‘marandu porã’.

Ñamombeʼúkena kyreʼỹme pe marandu porã

Ñamombaʼeterei ningo ñande ikatu haguére ko árape ñamombeʼu pe ‘marandu porã’. Aníkena jahecharamoiterei ambue mbaʼe umi lepróso ojapo haguéicha. Haʼekuéra ningo upe riréma ohechakuaákuri noĩporãi hague la ojapóva. Upévare aníkena ñapensaiterei ñandejehénte ha jaiporu rei ñane tiémpo jaiporurangue japredika hag̃ua.

Apóstol Pablo ningo ehémplo ñandéve upévape. Haʼe imanduʼávo pe veinte áño ohasavaʼekuére predikasiónpe heʼi: ‘Opárupi aguerahavaʼekue Cristo marandu porã’ (Rom. 15:​19, JMP). Pablo ningo ndohejaivaʼekue mbaʼeve ojoko chupe opredika hag̃ua kyreʼỹme. Jajapókena Pablo ojapo haguéicha ha kyreʼỹme ñamombeʼu ko árape pe ‘marandu porã’.

[Nóta oĩva taʼanga ndive páhina 28]

Blessing omotenondevaʼekue Jehová servísio ha oiporupaite itiémpo upearã

[Nóta oĩva taʼanga ndive páhina 29]

Ernst ha Hildegard Seliger oiporu porã vaʼekue itiémpo