Mu Ambuke Lika ze Yembulula Mwa ‘Lizazi le, la Litaba ze Munati’

BAANA ba bane ba mbingwa ne ba nyakisisize muinelo wa bona. Ha ku na ya naa ba file lituso fa munyako wa munzi. Maasirya ba ne ba potolohile Samaria ne ba lapisa batu mwa munzi. Ne ku si na tuso ya ku kena mwa munzi; lico ne li tula hahulu. Mane ne se ku bihilwe kuli ne ku cilwe mutu kabakala lukupwe.—2 Mal. 6:24-29.

Baana ba mbingwa bao ba ipulelisa ba li: ‘Ha lu yeñi feela lu yo kena mwa mafulo a Maasirya. Ha ku na se lu ka luza.’ Cwale ba funduka malungasiku. Ha ba fita mwa mafulo, ne ku kuzize tuu. Ne ku si na balibeleli. Ba fumana feela lipizi ni limbongolo ze fungilwe kono masole ne ba siyo. Baana ba bane bao ba nangela mwa tende ye ñwi. Ne ku si na mutu mwateñi, kono ne ku na ni lico ni lino ze ñata. Kacwalo ba ca, ba nwa. Ba mbingwa bao hape ba bona gauda, silivera, liapalo, ni lika ze ñwi za butokwa. Ba li nga mwa tende yeo, ba yo li pata, mi ba kuta hape ku yo nga ze ñwi. Ba lemuha kuli ne ku si na mutu nihaiba a li muñwi mwa mafulo. Jehova naa utwisize Maasirya mulumo wa mpi ye tuna. Maasirya ha ba utwa mulumo wo, ba hupula kuli mpi yeo ne i ka to ba taseza, kacwalo ba mata ka mahutu. Ba siya lika kaufela mi ufi kamba ufi naa kona ku ikungela zona.

Baana ba mbingwa bao ne ba sweli ku nga tutu ni ku yo ipata. Kono ha ba hupula batu ba ne ba lapa mwa Samaria, lizwalo la bona la kala ku ba kataza. Ba kala ku ipulelisa ba li: “Ha lu ezi hande! Lizazi le, ki lizazi la litaba ze munati.” Kacwalo, ba mbingwa bao ba kutela kapili-pili kwa Samaria ku yo zibisa ba bañwi za taba ye nde yeo.—2 Mal. 7:1-11.

Ni luna lu pila mwa miteñi ye kona ku bizwa “lizazi la litaba ze munati.” Jesu ha naa bulezi za sisupo “se ne si ka supa . . . ku fela kwa lifasi,” naa ize: “Evangeli [kamba taba ye nde] ye ya mubuso i ka bulelwa mwa lifasi kaufela, ibe bupaki mwa macaba kamukana; kihona ku ka taha mafelelezo.” (Mat. 24:3, 14) Taba yeo i swanela ku lu ama cwañi?

Lipilaelo za Bupilo za Kona ku lu Yembulula

Baana ba mbingwa bao ne ba libezi ba mwa Samaria ka nakonyana kabakala tabo ya bona ya ku fumana maluo. Ne ba isize pilu ya bona kaufela kwa ku ikubukanyeza lika. Kana nto ye swana ya kona ku ezahala ku luna? “Litala” ki ze ñwi za lika ze supa kwa ku fela kwa lifasi. (Luka 21:7, 11) Jesu naa lemusize balutiwa ba hae kuli: “Mu tokomele kuli lipilu za mina li si ke za sinyiwa ki ku ca maswe, ni ku kolwa bucwala, ni ku bilaela za bupilo; mane lizazi leo li to mi tulukela mu si ka itukisa.” (Luka 21:34) Ka ku ba Bakreste, lu swanela ku tokomela kuli misebezi ya luna ya ka zazi ni zazi ha i lu libalisi taba ya kuli lu pila mwa “lizazi la litaba ze munati.”

Mukreste ya bizwa Blessing naa si ka tuhelela litaba za ka butu ku mu fokolisa. Naa sebelize sina paina, a feza sikolo sa hae, mi hamulaho a nyalwa ku muzwale wa fa Betele, mi ni yena a memiwa ku yo sebeleza fa Betele ya kwa Benin. U bulela kuli: “Musebezi wa ka ki ku kenisa mizuzu, mi luli na ikola musebezi wo.” Kaizeli Blessing u bile mwa sebelezo ya nako kaufela ka lilimo ze 12 cwale mi ki ya tabile kuli ha si ka itibaza “lizazi la litaba ze munati” le lu inzi ku lona cwale.

 Mu Tokomele Lika ze Sinya Nako

Jesu ha naa lumile balutiwa ba 70, naa ize: “Lukau ki lo lutuna, kono ba ba kutula ki ba banyinyani. Mu lapele kihona Muñaa lukau, kuli a lume babeleki mwa lukau lwa hae.” (Luka 10:2) Licalo ha li liyeha ku kutulwa, za sinyeha. Ka nzila ye swana, haiba musebezi wa ku kutaza u keshebiswa, batu ha ba na ku fumana bupilo. Kona libaka Jesu ha naa ekelize ku bulela kuli: “Mu si ke mwa itumelisa ni mutu mwa nzila.” (Luka 10:4) Linzwi la Sigerike le li tolokilwe kuli ‘ku lumelisa’ ha li talusi ku bulela feela kuli “mu lumele.” Linzwi leo hape li ama kwa ku kumbatana ni ku ambola nako ye telele ko ku banga teñi ha lu kopani ni mulikani. Kacwalo Jesu naa laela balateleli ba hae kuli ba si ke ba yembululwa mwa bukombwa kono ba itusise nako ya bona hande. Ne ba swanela ku kutaza taba ye nde ka putako.

Mu nahane lika ze yembulula mo li kona ku sinyeza nako. Ka lilimo-limo, TV ki yona ye sinyelize batu nako ye ñata mwa libaka ze ñata. Kono ku cwañi ka za mawaile a ku fumbata mwa mazoho ni likompyuta? Patisiso ye ne ezizwe kwa batu ba 1,000 mwa Britain ne i bonisize kuli ‘batu ba bahulu mwa naha yeo ka zazi ni zazi ba tandanga mizuzu ye 88 fa mawaile a mwa ndu, mizuzu ye 62 fa mawaile a ku fumbata mwa mazoho, mizuzu ye 53 fa kompyuta inze ba ñola mashango, ni mizuzu ye 22 fa luwaile lwa ku fumbata mwa mazoho inze ba ñola mashango.’ Ha ne lu ka kopanya nako yeo, ne lu ka fumana kuli i fitelela habeli nako ya kona ku tanda paina wa ku tusa mwa bukombwa ka zazi ni zazi. Mina bo, mu tandanga nako ye kuma kai kwa lika zeo?

Bo Ernst ni bo Hildegard Seliger ne ba tokomela mo ne ba itusiseza nako ya bona. Sibeli sa bona ba kile ba tamiwa mwa litolongo za ba Nazi ni za ba Komyunizimu mi lilimo ze ne ba pikile tolongo ha li kopanywa hamoho ne li fitelela 40. Ha se ba lukuluzwi, ne ba sebelize sina mapaina ku fitela ba feza sebelezo ya bona ya fa lifasi.

Ba bañata ne ba tabela ku ñolelananga ni bo Ernst ni bo Hildegard Seliger. Bo Ernst ni bo Hildegard ne ba kabe ba tandile nako ya bona kaufela inze ba bala ni ku ñola mañolo. Kono ku fita ku eza cwalo, ne ba beile lika za kwa moya mwa sibaka sa pili mwa bupilo bwa bona.

Kaufela luna lu tabela ku ñolelana ni ku lizezana ni bahabo luna ni balikani ba luna, mi ku eza cwalo ha ku si ka fosahala. Mane ku eza lika ze shutana-shutana mwahalaa lizazi kwa katulusa. Nihakulicwalo, lu swanela ku tokomela kuli ha lu yembululwi ki lika ze sinya nako mwa lizazi le la ku kutaza taba ye nde.

Mu Kutaze Taba ye Nde ka ku Tala

Lu ba ba fuyozwi luli ku pila mwa “lizazi la litaba ze munati.” Haike lu si ke lwa yembuluka sina mo ne ba yembulukezi kwa makalelo baana ba bane bani ba mbingwa. Mu hupule kuli hasamulaho ne ba ize: “Ha lu ezi hande!” Ni luna ha lu ezi hande haiba lu tuhelela misebezi ya ka butu kamba lika ze sinya nako ku lu palelwisa ku abana ka ku tala mwa bukombwa.

Lu na ni mutala o munde hahulu o lu swanela ku likanyisa. Ka ku ama kwa lilimo za pili ze 20 za naa tandile mwa bukombwa, muapositola Paulusi naa ñozi kuli: ‘Ni felize ku isa Evangeli ya Kreste.’ (Maro. 15:19) Paulusi naa si ka tuhelela nto ifi kamba ifi ku mu fokolisa. Sina Paulusi, haike lu tukufalelwe ku shaela taba ye nde ya Mubuso mwa ‘lizazi le, la litaba ze munati.’

[Siswaniso se si fa likepe 28]

Kaizeli Blessing naa si ka tuhelela misebezi ya hae ya ka butu ku mu yembulula kwa sebelezo ya hae ya nako kaufela

[Siswaniso se si fa likepe 29]

Bo Ernst ni bo Hildegard Seliger ne ba tokomezi mo ne ba itusiseza nako ya bona