Leka Kupuakanibwa mu Dino “Difuku dya Myanda-Miyampe”

BAMAKOPO baná bādi balanguluka kya kulonga. I kutupu muntu wibapa bya bukwashi pa kibelo kya kibundi. Samadia wādi mu nzala ya lufu, mwanda Bene Shidea bādi bamutekele kasala. I kutupu kyobatwelela mu kibundi; lupoto lwa byakudya lupite bukomo. Bantu badi ke bashilule ne kudya bantu bakwabo.—2 Bal. 6:24-29.

Bano bamakopo bālanga’mba, ‘Mwene i biyampe’tu twende ku kitūlo kya Bene Shidea? I kutupu ne kine kyotusa kujimija.’ Mu kyolwa, kapita’ka i kaani, bataluka. Pa kufika mu kitūlo, batana’mo nyāa. Mutupu muntu nansha umo ulama’ko. Tubalwe ne bimbulu bikutwe, kwampikwa bashidika. Abo bonso buná batala mu dipema dimo. Kemwādipo muntu nansha umo, ino mwadi muyule bidibwa ne bitomibwa. Bādya ne kutoma. Kadi bano bamakopo bamona’mo ne nsahabu, ndalama, bivwalwa, ne bintu bikwabo bya bulēme. Baselasela’byo, benda bakafya’byo, bajoka ne kusela bikwabo. Kitūlo kyonso kyāshele kyampikwa muntu. I Yehova wālongele kingelengele, Bene Shidea bāivwana diwi dya kibumbo kya divita. Bene Shidea pa kulanga’mba abaiya kwibatamba, bānyema lwa panshi. Bine, bāshile byonso bilēlakene!

Bamakopo bāselele ne kukafya bintu bya bulēme. Ino pa kulanga Bene Samadia bakwabo bafwa nzala, mutyima wabo wa mundamunda washilula kwibatopeka. Bāshilula kwinena abo bene na bene amba: “Ketulongelepo biyampe, ehe, dine dino’di i difuku dya myanda-miyampe”! Ebiya bamakopo’ba bājokela bukidi ku Samadia ne kusapula ino myanda miyampe ya byobatene.—2 Bal. 7:1-11.

Netu pano tudi mu kitatyi kikokeja kwitwa bu “difuku dya myanda-miyampe.” Yesu wēsambile pa kiyukeno kya ‘kukayūkila’po pa mfulo ya pano pa ntanda,’ amba: “Īno myanda-miyampe ya buno bulopwe īkasapwila panopantanda ponso, ke kiyūkeno kya kuyūkila pa kusapwila’yo ku mizo yonso. Penepo nankyo po pakafikidila ne pamfulo pene.” (Mat. 24:3, 14) Lelo kino kitutala netu namani?

Bikambija Bikokeja Kwitulēmenena

Pa kusangela kutabuka bintu byobātene, bano bamakopo bāidilwe bidi Samadia. Bata mutyima enka ku byobādi bakokeja kwikala nabyo. Lelo kintu kya uno muswelo kikokeja kwitufikila netu? “Bipupo bya nzala” bibadilwa mu bintu biyukanya kitatyi kya ku mfulo ya ino ngikadilo ya bintu. (Luka 21:7, 11) Yesu wādyumwine bandi bana ba bwanga’mba: “Mwikale kudyumuka bānwe bene, mwanda wa kunena’mba mityima yenu yakaīle kulemenenwa, ne mu dyopolo, ne bunkolwankolwa, ne byakūmininwa bya buno būmi.” (Luka 21:34) Byotudi Bene Kidishitu, tufwaninwe kudyumuka kutyina’mba bikambija mu būmi bya mobukila mobukila byaketujimijija mulangwe wa amba tudi pano mu “difuku dya myanda-miyampe.”

Mwine Kidishitu umo witwa bu Blessing kalekelepo tumweno twa aye mwine tumulēmenene. Wadi painia, pa kupwa masomo wasongwa na tutu wingilanga ku Betele, nandi waitabijibwa mu kisaka kya Betele ya Benin. Unena’mba: “Ñingilanga mwingilo wa kukundula njibo, kadi nsenswe binebine mwingilo ompelwe.” Pano Blessing uvulukanga myaka 12 yaingile mwingilo wa kitatyi kyonso ne kusangala mwanda wadi utele nyeke mutyima pa “difuku dya myanda-miyampe” dyotudi’mo ne pano.

 Dyumuka Kupuakanibwa na Bintu Bidya Kitatyi

Yesu pa kutuma bana ba bwanga 70, wānene’mba: “Budimi bwa kwangula i bukata, nanshi bakwangula bo batyetye, ino nanshi mwikale kwisashilapo mwine wakwangwilwa atalule bakwangula bāye kwangula budimi bwandi.” (Luka 10:2) Enka na monekelanga mwangulo mwanda wa kutundululatundulula kitatyi, mo monka ne kubulwa kuta mutyima ku kuvuija mwingilo wetu wa busapudi kukokeja kujimija būmi bwa bavule. O mwanda Yesu wābwejeje’ko amba: “Ke kwimuna wa kwimuna mu dishinda.” (Luka 10:4) Kishima kibajinjibajinji kyalamwinwe bu “kwimuna” kekidipo’tu enka na buluji bwa “wakomapo” nansha “waimuka” kete. Kadi mukokeja kubadilwa ne kwipamba bīpa ne mīsambo milamila isambwanga shi tubetana ne mulunda. O mwanda mwine Yesu wāsoñenye balondi bandi baleke byonso bya kwibapuakanya mwa kwingidijija senene kitatyi kyabo. Mwanda musapu obānenwe kusapula wādi wa kampeja-bukidi.

Langulukila pa kitatyi kijiminanga ku bya kwipwija mukose. Mu myaka mivule, televijo i kintu kyadi kidila bantu kitatyi kivule kutabuka mu bifuko bivule. Le tukanena namani pa bitala matelefone a ku makasa ne makompyuta? Mu Beletanye, mu bantu batame kintu kya 1000 baipangwilwe, “Mwine Beletanye umo upityijanga difuku ne difuku minite kubwipi kwa 88 wisamba ku telefone ya nshinga, minite 62 ne musubu ku telefone ya ku makasa, minite 53 utuma mikanda ku kompyuta, ne minite 22 na misapu ya ku telefone.” Bino bitatyi byonso, shi twibisambakanye i bitabuke misunsa ibidi kitatyi kipānanga pania mukwashi mu busapudi difuku ne difuku! Le abe nobe udi na kibidiji kya kupityija kitatyi kya muswelo’ka mu mīsambo ya uno muswelo?

Ernst ne Hildegard Seliger badi batanga mutyima mwingidijijo wa kitatyi kyabo. Bapityije myaka 40 ne musubu mu makomponi a malwa a Nazi ne mu buloko bwa Kikoministe. Pa kupwa kulekelelwa, baingile bu bapania kufika ne ku mfulo ya būmi bwabo pano panshi.

Bavule badi basaka kwitumina mikanda na ba Seliger ne mukajandi. Bano ba mulume ne mukaji badi bakokeja kujimija kitatyi kivule kya lubanga batanga ne kwandikila ba mikanda. Ino, badi batangidije kumeso bintu bya ku mushipiditu mu būmi bwabo.

Na bubine, batwe bonso tusangelanga kwisamba na bantu botusenswe badi kulampe, kadi ke bibipo. Butongi buyampe bwa bintu bya kulonga mu būmi bwetu bwa mobukila mobukila i bwa kamweno. Ino, tufwaninwe kudyumuka kupityija kitatyi enka mu bya kwipwija mukose bidya kitatyi mu dino difuku dya kusapula myanda miyampe.

Sapula Myanda Miyampe ne pa Mfulo

Bine, i dyese kwikala bōmi mu dino “difuku dya myanda-miyampe.” Ketwakikalai pamo na boba bamakopo baná bāpuakanibwe dibajinji. Vuluka, bāfudile ku kunena’mba: “Ketulongelepo biyampe, ehe.” Mo monka, kebikekalapo biyampe kulondalonda bintu bya batwe bene nansha bya kwipwija mukose bidya kitatyi bitukankaje kwingila bininge mwingilo wa busapudi.

Mu uno mwanda, tudi na kimfwa kilumbuluke kya kulonda. Mutumibwa Polo paāvulukile myaka 20 imbajinji ya mwingilo wandi wāsonekele amba: “Napu kusapudidila myanda-miyampe ya Kidishitu.” (Loma 15:19) Polo kālekelepo kintu nansha kimo kitalaje bupyasakane bwandi. Nanshi twikalei na bupyasakane na bwaādi nabo bwa kusapula musapu wa Bulopwe mu dino “difuku dya myanda-miyampe.”

[Kifwatulo pa paje 31]

Blessing kalekelepo tumweno twandi tonakanye mwingilo wandi wa kitatyi kyonso

[Kifwatulo pa paje 32]

Seliger ne mukajandi badi batele mutyima ku mwingidijijo wa kitatyi kyabo