Tondolwelenu Yuma Yaluwañeshaña ‘Muyinu Mpinji Yakushimuna Nsañu Yayiwahi’

AMAYALA akwambumba awana atoñojokeleña hayuma yafukwiluhu. Kwosi muntu niwumu watwesheli kuyinka yawana hawiñililu wakuchisu chamukala. Asiriya akanishili kutwalaña yakudya muSamariya kulonda antu afwi nanzala. Alekeli kuya mumusumba, muloña yakudya yaswejeli wuseya. Mujimbu wakudya antu adiña awushimuna dehi.—2 Anyanta 6:24-29.

Akwambumba atoñojokeli nawu, ‘twatela kuya kumusumba waSiriya.’ ‘Neyi tuya twakahetelamu.’ Chikwelili wufuku atachikili kuya. Chashikiluwu muchilombu, mwadiñi mwamwena kwazo-o. Himwadiña akwakuhembaku. Atuwalu niayimbulu adiñi akukasa, ilaña kwadiña kwosi amashidika. Akwambumba awana asumbilileña mwitenti. Kwosi nimuntu wadiñamu, ilaña mwadiñi hohu yakudya yayivulu niyimpwita. Adyili nikunwa. Cheñi akwambumba amweni wuru nisiliva nimahina, niyuma yikwawu yalema wuseya. Anoneli yuma yakeñeleñawu nakuyisweka nawa afuntilili yikwawu yashalili. Antu ejima amwañeli muchilombu. Muchihayamisha, Yehova wakojejeli aSiriya kutiya ipumba dawamashidika. A Siriya atemukili muloña atoñojokeli nawu anayilukuki. Yuma yejima yashiluwu yadiña kadinoneli!

Akwambumba adiña nakututulula nikusweka yuma yalema wuseya. Hela chochu, atachikili kutoñojoka hadi aSamariya adiña nanzala yayeni nawa chinleji chawu chatachikili kuyikabisha. Atachikili kudiila wumu namukwawu nawu: “Hitudi nakwila chachiwahuku. Lelu hiifuku dansañu yayiwahi.” Akwambumba afuntili lufuchi kuSamariya nakushimuna nsañu yayiwahi hayuma yawaniniwu.—2 Anyanta 7:1-11.

Ninetu tunakushakama mumpinji yitunateli kutena netu ‘ifuku dansañu yayiwahi.’ Hakutena chinjikijilu chabadika ‘chakukuma kwanyaka yamakonu,’ Yesu wahosheli nindi, “Ninsañu iyi yawanta yayiwahi akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.” (Matewu 24:3, 14) Chumanyi chitwatela kwila?

Yuma Yitwakamenaña Yinateli Kutufutisha Hanyima

Chineli aswejeli kuzañalala nayuma yawaninuwu, akwambumba avulameneni Samariya hadi kapinji kantesha. Ashili maana kuyuma yanoneluwu. Komana chuma chochimu chinateli kutumwekena? ‘Nzala’ hichuma chimu hakachi kayuma yayivulu yinakumwekesha kukuma kwanyaka yamakonu. (Luka 21:7, 11) Yesu wasoñamishili atumbanji twindi nindi: “Babalenu enu aweni, nyichima yenu yakenda kasweja kwikuta, nakusheta walwa, nikwakama yuma yawumi wunu.” (Luka 21:34) Hakwikala akwaKristu, twatela kubabala kulonda kubula kwiteja yuma yamwekanaña mafuku ejima yituleñeli kujimbesha yitoñojoka yakwila nawu tunakushakama ‘mwifuku dansañu yayiwahi.’

MukwaKristu wejina daBlessing hetejeli chiseki chimufuntishi hanyimaku. Wazatiluku mudimu wawupayiniya wampinji yejima, wamanishili shikola yindi, nkumininaku wasumbukili namana kwetu wahaBeteli, nawa ayitejeli kwikala muchisaka chaBeteli mwituña daBenini. Wahosheli nindi: “Nazataña mudimu wakuwahisha  mutupeka, nawa nakeña mudimu wami chikupu.” Ichi Blessing nakutoñojoka hayaaka 12 yinazatiyi mumudimu wampinji yejima nawa wukweti muzañalu muloña natwalekuhu kushindamena ‘hefuku dansañu yayiwahi’ ditunakushakamamu makonu.

Babalenu Nayuma Yinateli Kuyimanishila Mpinji

Hampinji yatemesheleñayi Yesu atumbanji 70, wahosheli nindi, “Mbutu yinahi yayivulu, ilaña akwakukalakala anakehi. Dichi lombenu kudi Mwanta diyi mukwakwañula, atemeshi akwakukalakala kumudimu wakwañula mbutu yindi.” (Luka 10:2) Neyi chochinateli kukisika mbutu hamuloña wakulaba kuyañula, kudiwula mudimu wakushimwina kunateli kuleñela mawumi awantu kujilumuka. Dichi Yesu wabombeleluhu nindi: “Bayi mwimusha muntu munjilaku.” (Luka 10:4) Izu dadeni dabalumunawu nawu ‘kwimusha’ hidatalisha mukumwila muntu hohu nawu ‘kolenu mwani’ hela ‘hadenu mwanuku.’ Cheñi kwabombelamu kudikumbata nikuhanjeka hampinji yayilehi neyi munadiwani nebwambu denu. Yesu wayilejeli atumbanji twindi kutondolwela yuma yaluwañeshaña nikuzatisha mpinji yawu chiwahi. Nsañu yadiña nakushimwinawu yadiña yakunyakashana.

Toñojokenu hayuma yinateli kutumanishila mpinji chikupu. Hayaaka yayivulu yinahituhu, antu amanishilaña chikupu mpinji nakutala TV. Komana jinshiña nimakompyuta nijena jatumanishilaña mpinji? Akwakusandujola akushika 1,000 mwituña daBritain aweni nawu “average yawantu amuBritain amanishaña jiminiti 88 hefuku kujinshiña, jiminiti 62 kunshiña jakwenda nachu, jiminiti 53 hakusoneka nsañu kuzatisha kompyuta nawa jiminiti 22 hakusoneka nsañu hanshiña.” Mpinji yamanishañawu antu yinabadiki kuvula mpinji yazataña payiniya wakukwasha mumudimu wakushimwina hefuku! Jiminiti jiñahi jimwamanishilaña hanshiña, hakusoneka nsañu kuzatisha kompyuta, nihakusoneka nsañu hanshiña?

Ernst niHildegard Seliger elukili chakuzatisha mpinji yawu chiwahi. Ashakamini yaaka yakubadika ha 40 muyilombu yakuyandishila yaNazi nimutuleya twawaCommunist. Hanyima yakuyumbaku, atachikili kuzata mudimu wawupayiniya kushika nimpinji yafwiluwu.

Antu amavulu akeñeleña kuhanjeka naErnst niHildegard Seliger. Adisumbula wenawa kachi amanishilileña mpinji yawu kukutaña nikusoneka nyikanda. Ilaña atwamijiluku mudimu wakumukalakela Yehova muchihandilu chawu.

Hela chochu, wejima wetu twatiyaña kuwaha kutambwila nyikanda nijinshiña kufuma kudi antu itwakeña, nawa kwila mwenimu hikwatamaku. Kusakula chiwahi yuma yakwila muchihandilu chetu chekala chachiwahi. Dichi twatela kwikala asoñama kulonda kutondolwela yuma yatumanishilaña mpinji mudinu ifuku dakushimwina nsañu yayiwahi.

Shimwinenu Nsañu Yayiwahi Chikupu

Hikukoleka kweneni hakushakama ‘mwifuku dansañu yayiwahi.’ Bayi tuluwankana neyi chaluwankenuwu akwambumba awana hakutachikaku. Anukenu nenu, akunkulwili nawu: “Hitudi nakwila chachiwahuku.” Cheñi, hichachiwahi kufwila yuma yakumujimba hela yuma yamanishaña mpinji kulonda yitukañeshi kukalakala chikupu mumudimu wakushimwinaku.

Dichi tukweti chakutalilahu chachiwahi chitwatela kwimbujola. Kapostolu Pawulu chanukiliyi hadi yaaka 20 yakalakeliyi mumudimu wakushimwina wasonekeli nindi: ‘Nashimuni chalala nsañu yaKristu yayiwahi.’ (Aroma 15:19) Pawulu hetejeli chuma chidi chejima kumumanishila mpwila yinduku. Twatela kudikita neyi chadikitileñayi Pawulu hampinji yitukushimwinaña nsañu yaWanta mudinu ‘ifuku dansañu yayiwahi.’

[Mwevulu wudi hefu 31]

Blessing hetejeli chiseki chiluwañeshi mudimu windi wampinji yejimaku

[Mwevulu wudi hefu 32]

Ernst niHildegard Seliger elukili chakuzatisha mpinji yawu chachiwahi