Kik Iwe Gimoro Ogali e “Ndalo mar Huma Maber”

JODHOHO moko ang’wen nochako paro gima onego gitim. Noyudo onge ng’ato mosemiyogi kony moro amora e dhoranga dala mar Samaria. Oganda lweny mar Jo-Suria nogeng’o chuth chiemo kik donj e Samaria eka mondo kech omi Jo-Samaria ochiwre e lwetgi. Ne onge tiende donjo e dalano; nengo chiemo ne ni malo ahinya. Ripode nosechako donjo manyiso ni ji ne chamo nyithindgi.​—2 Ruo. 6:⁠24-⁠29.

Jodhohogo ne oparore niya: ‘Marang’o wabedo ka nyaka watho? Ber mondo wadhi wagore e luet oganda mar Jo-Suria.’ Kapod piny ne huyuhuyu godhiambo, ne gichako wuoth ka gidhi. Kane gichopo e kambi mar Jo-Suria, ne giyudo ka kanyo oling’ thi. Ne onge jarit kata achiel. Farese koda kenjegi ema ne otwe kanyo, to jolweny to ne onge. Ne ging’iyo ei hema moro. Ne onge ng’ato kuno, to chiemo koda gik mimadho ne odhuro kuno. Ne gichiemo ma gimetho. Jodhohogo bende noneno dhahabu, fedha, koda lewini kod gik mamoko ma nengogi tek. Ne giting’o gik moko kar nyalogi mi gipandogi, mi kendo giduogo omo moko. Kambino duto te ne onge ng’ato. Noyudo Jehova osetimo hono ma nomiyo Jo-Suria owinjo koko mar oganda lweny maduong’. Ka giparo ni nyaka bed ni ne imonjogi, Jo-Suria noringo. Gik moko duto nodong’ kendo ng’ato ang’ata ne nyalo kawogi!

Jodhohogo ne kawo kendo pando gik ma nengogi ne tek. Kata kamano, kane giparo kaka kech ne dhi nego Jo-Samaria, chunygi nochako chandre. Ne gichako wacho kendgi giwegi niya: “Ok watim maber; tinende en ndalo mar huma maber.” Jodhohogo notimo piyo mi gidok Samaria chiwo huma maber kuom gima ne gifwenyono.​—2 Ruo. 7:​1-​11.

Wan bende wadak e kinde minyalo luongi ni “ndalo mar huma maber.” Kowuoyo kuom gik ma nobed “ranyis . . . mar giko mar ndalo,” Yesu nowacho kama: ‘Kendo wach maberni mar pinyruoth nolandre e pinje duto, mondo obed ranyis ni ogendini duto; eka giko nobi.’ (Math. 24:​3, 14) Mano onego omi watim ang’o?

Parruok mag Ngima Nyalo Nyoso Chunywa

To nikech mor ma ne gin-go kuom gik ma ne gifwenyo, jodhoho ang’wen-go wigi nowil matin gi chal mar Samaria. Ne giketo pachgi duto kuom gik ma ne ginyalo yako. Be gimachalo kamano nyalo timorenwa? “Kech” en achiel kuom gigo maloso ranyis manyiso ni wan e kinde giko mar ndalo. (Luka 21:​7, 11) Yesu nosiemo jopuonjrene niya: “Ritreuru uwegi, dipo ka chunyu opong’ gi ich lach, kod mer, gi parruok mag ngimani, mi ndalono upo kochopo kuomu.” (Luka 21:34) Kaka Jokristo, onego watang’ mondo parruokwa mag ngima mapile ka pile, kik mi wiwa wil ni wadak e “ndalo mar huma maber.”

Nyaminwa moro miluongo ni Blessing, ok noweyo mondo parruok mag ngimane owuon onyos chunye. Notiyo kaka painia, nosomo motieko skul, mi gikone okende gi ja Bethel,  kendo ne oyienegi bedo jokanyo mag Bethel e piny Benin. Owacho kama: “An atiyo tije mag rito ler mag udi mag Bethel, kendo ahero tija chuth.” Sani, Blessing nyalo paro higini 12 ma nosebedo kotiyo kaka painia, kendo omor ni osebedo koketo pache duto kuom “ndalo mar huma maber,” ma gin kinde mwadakiegi.

Tang’ gi Gigo Makawo Thuolo Mang’eny

Kane ooro jopuonjre 70, Yesu nowacho niya: “Keyo duong’, to jotich ema nok. E momiyo, kwauru Wuon keyo, mondo oor jotich odhi e keyone.” (Luka 10:2) Mana kaka digni e ndalo keyo nyalo miyo cham okethore mang’eny, e kaka digni e tijwa mar lendo nyalo miyo ji mathoth olal ngimagi. Nikech mano, Yesu nomedo wacho kama: “Kik umos ng’ato e yo.” (Luka 10:4) Wach ma olok ni “umos,” tiende sie ok en mana wacho ni “amosi.” Onyalo riwo koda mos mag kwakruok kaachiel gi mbaka manyalo betie sama ng’ato oromo kod osiepne. Omiyo Yesu ne chiko jolupne mondo kik gidonjre gi gik manono ma ne nyalo mayogi thuolo. Ote ma ne omigi ne en ote monego oland mapiyo.

Par ane kaka wanyalo ketho thuolo mang’eny kuom luwo gik manono. Kuom higini mang’eny, ng’iyo televison ema osebedo ka kawo thuolo mag ji ahinya. To nade wach simo mag lwedo koda kompyuta? Nonro moro ma ne otim kuom ji 1,000 e Britain, noyudo ni “e odiechieng’ achiel, inyalo wach ni ng’ato ka ng’ato kuom jo pinyno tiyo kod dakika 88 e simo mar tol, dakika 62 e simo mar lwedo, dakika 53 e oro e-mail kendo dakika 22 e oro sms.” Koriw dakikago duto, oloyo chiegni nyadiriyo, sechego ma japainia makonyo tiyogo e lendo e odiechieng’ kodiechieng’! In itiyo gi seche maromo nade e simo, simo mar lwedo, e oro e-mail, koda oro sms?

Ernst kod Hildegard Seliger chiege, ne otang’ kuom kaka ne gitiyo gi thuologi. Higini duto ma noyudo gisetieko e kambe mag jo Nazi koda jela mag jo Komunist nochopo 40 koriw. Bang’ kane osegonygi, ne gilendo kaka jopainia, nyaka ne gitieko wuodhgi e pinyka.

Ji mathoth ne dwaro mondo otudre kodgi. Ne digitiyo gi thoth kindegi e somo koda e ndiko barupe. Kata kamano, ne giketo wach tiyone Jehova obed mokwongo e ngimagi.

En adier ni waduto wahero tudore gi joma wahero, to mano ok rach. Timo gik moyier maber mopogore gi mago mwatimo e chenrowa mapile en gima nyalo konyo. Kata kamano, weuru wanyis rieko kuom tang’ kendo geng’o gik manyalo mayowa thuolowa e kindegi, ma en kinde mar lando wach maber.

Land Wach Maber e Yo Maber Chuth

Mano kaka wan joma ogwedhi nimar wadak e “ndalo mar huma maber”! Kik wawe gik moko ogal pachwa kaka ne jodhoho ang’wenka ne ogalore mokwongo. Ne ni ne ging’ado niya: ‘Gima watimoni ok ber.’ Wan bende, ok en gima kare mondo wawe yorewa kata gik makawo sechewa mang’eny omonwa kik watim tij lendo e okang’ mwanyalo.

Kaluwore gi wachni, wan kod ranyisi maber ahinya monego waluw. Ka nong’iyo higini 20 ma nosebedo kolendo, jaote Paulo nondiko kama: ‘Asetieko yalo wach maber mar Kristo.’ (Rumi 15:19) Paulo ok noweyo gimoro amora onyos kindane. Weuru wanyis kinda kaka mare e lando wach Pinyruoth e ndalogi “mar huma maber.”

[Picha manie ite mar 31]

Blessing ok noweyo mondo luwo yorege omone tiyo ne Nyasaye kuom thuolone duto

[Picha manie ite mar 32]

Ernst Seliger kod Hildegard chiege ne otang’ ahinya kuom kaka gitiyo gi thuologi