Kopae i te Au Tamanamanata i Teia “Rā Tuatua Meitaki”

KUA akamanako te au repera toko a i ta ratou au ikianga. Kare e tangata i oronga atu ana i tetai apinga aroa na ratou i ko i te ngutupa o te oire. Kua araiia e te nuku o Arama kia kore te kai e apaiia ki roto ia Samaria, kia tuku te tangata i te au me kore kia mate i te onge. Kare e puapinga i te aere ki roto i te oire; e oko maata tikai oki te kai. Kua ripoti takereia mai tetai atianga tei tupu ana te kai tangata.​—2 Ari. 6:​24-29.

‘Eaa tatou ka kore ei e aere ki ko i te aua o Arama?’ i manako ei te au repera. ‘Kare a tatou apinga e ngere.’ I te poiri anga, kare e tangata e kite atu ana ia ratou, kua aere atu ratou i taua aiai ra. I to ratou tae atu anga ki ko i te aua, te muteki ua ra a reira. Kare e au vaeau tiaki. Kua tapekaia te au oroenua e te au atini, inara kare e au vaeau. Kua akara te au repera toko a ki roto i tetai puakapa. Kare e tangata i reira, inara e maata tikai te kai e te apinga inu e vai ua ra. Kua kai ratou e kua inu. Kua kite katoa atu te au repera i te auro, te ario e te au kakau, e tetai atu au apinga oko maata. Kua tari ratou i ta ratou i inangaro, kua uuna i te reira e kua oki mai i te tiki akaou kia maata atu. Kare e tangata i roto i te aua katoa. Kua akatupu temeio a Iehova kia akarongo te nuku o Arama i tetai tangianga no tetai nuku vaeau. I te manakoanga e te tamakiia mai nei ratou, kua oro te nuku o Arama. Kua akaruke mai i te au apinga ravarai na tetai ua atu e inangaro ra!

Kua tari te au repera i te au apinga oko maata e kua uuna i te reira. Inara, i te manakoanga i to Samaria i te pae ua mai e mate maira i te pongi, kua tamanamanataia to ratou akava ngakau. Kua tuatua ratou tetai ki tetai e: “Kare ta tatou i te mea meitaki, e rā tuatua meitaki oki teia rā!” Kua oki viviki atu te au repera ki Samaria e kua akakite atu i te tuatua meitaki o ta ratou i kite.​—2 Ari. 7:​1-11.

Te noo katoa nei tatou i roto i tei kapikiia e “e rā tuatua meitaki.” Te tou anga ki tetai tuanga puapinga rava atu o “te akairo o . . . te akaopengaanga o te akatereanga o te au mea nei,” kua tuatua a Iesu e: “Kia tutu aereia teia tuatua meitaki o te patireia ki te au enua tei tangataia ei kite ki te au pa enua ravarai; i reira e tae mai ei te openga.” (Mata. 24:​3, 14, NW) Akapeea tera i te akakeu anga ia tatou?

Ka Akateimaa to Tatou Uaorai Manako ia Tatou

No to ratou mataora maata i ta ratou i kite, kua ngaropoina poto ua i te au repera to Samaria. Kua pou to ratou manako ki runga i ta ratou ka rauka mai. Ka tupu ainei tetai apinga aiteite mei teia kia tatou? Ko “te onge” tetai tuanga o te akairo tei akataka mai i te akaopengaanga o te akatereanga o te au mea nei. (Luka 21:​7, 11) Kua akamatakite mai a Iesu ki tana au pipi e: “E matakite ra ia kotou, ko te opue aea to kotou ngakau i te maata o te kai e te kona, e te pekapeka o teianei ao.” (Luka 21:34) Ei au Kerititiano, ka tau tatou kia matakite e auraka tatou kia akatika i to tatou uaorai au manako apiapi no runga i te oraanga i te au ra ravarai, kia akangaropoina i te tika e te noo nei tatou i roto i te “rā tuatua meitaki.”

Kare tetai Kerititiano ko Blessing te ingoa i akatika i tona uaorai au anoano kia akateimaa iaia. Kua tavini aia ei painia, kua akaoti i tetai tuatau apiianga, i te openga kua akaipoipo i tetai tane no Betela, e kua arikiia ei mema no te pamiri i Betela i Penini. Kua karanga aia e: “E tama are ana au e e inangaro tikai ana au i taku tukuanga angaanga.” Ka rauka ia Blessing i te akara  rekareka ki muri i tetai 12 mataiti i roto i te tavinianga tamou, e te mataora e kua tamou aia i tona manako ki runga i te “rā tuatua meitaki” e noo nei tatou i teia tuatau tikai.

Matakite i te Au Tamanamanata Akapou Taime

I te tono anga i te au pipi e 70, kua tuatua a Iesu e: “Te maata ua nei te mou, te iti nei ra te aronga e kokoti: e teianei, e pure kotou i te Atu o te mou, kia unga mai aia i tetai aronga ei rave i taua mou nana ra.” (Luka 10:2) Mei te taroaroa anga rai i te tuatau kokotianga te ka kaimoumou i tetai pae o te kai, te kopae i te rave anga i te angaanga tutu aere, ka akatupu i te mate ki tetai au tangata. No reira a Iesu i tuatua atu ei e: “Auraka e aroa ua atu i te tangata i te arataa ra.” (Luka 10:4) Penei te reo mua no te kupu “aroa” e maata atu te aiteanga no te tuatua e “kia orana.” Te o katoa maira te takaveanga e te pukapukaanga roa penei ka tupu mai me aravei atu tatou i tetai oa. No reira a Iesu i ikuiku ei ki tana au pipi kia kopae i te au tamanamanata kare e anoanoia e kia taangaanga meitaki i to ratou taime. E karere rapurapu ta ratou ka tutu aere.

E akamanako ana i te taime ka pou i te au tamanamanataanga. No te au mataiti, ko te tivi te tuanga maata roa ia a te tangata e akapou ana i to ratou taime va. Akapeea i reira te au tereponi apaipai e te au komupiuta? I roto i tetai kimikimianga i tetai au tangata mamaata e 1,000 i Peritane, kua kiteia mai e “e akapou ana tetai au tangata i Peritane e 88 miniti i te ra ki runga i te tereponi, e 62 atu miniti ki runga i te tereponi apaipai, e 53 miniti i te i-mere e e 22 miniti i te patupatu karere.” Ko te katoaanga, e maata atu i te rua taime o te ora a tetai painia tauturu ka rave i roto i te angaanga orometua i te ra okotai! Eaa te maata o te taime e pou ana ia koe i te taangaanga i te tereponi, te i-mere, e te patupatu karere?

E akamanako meitaki ana a Ernst e Hildegard Seliger e akapeea i te taangaanga i to raua taime. Kua pou ia raua roa ai tetai 40 tuma mataiti i roto i te puakapa tapekaanga o te Nazi e te au are auri Komuniti. I muri ake i to raua mataraanga mai, kua tavini raua ei nga painia e tae roa atu ki te openga o to raua oraanga i te enua nei.

E manganui te aronga tei inangaro i te tata atu ki te nga taeake Seliger. Ka rauka ua i teia nga tokorua i te akapou i te maataanga o to raua taime i te tatau e te tata pepa. Inara, ko ta raua akamorianga ia Iehova te mea puapinga rava atu i roto i to raua oraanga.

E tika rai, e akaperepere ana tatou katoatoa i te au komunikeitianga ki te aronga e inangaroia ra e tatou, e kare tera e tarevake ana. E puapinga te akatukeanga tau i roto i ta tatou au angaanga i te au ra ravarai. Tera ra, ka tau tatou kia matakite i te akatere meitaki i te au tamanamanataanga akapou taime, i roto i teia tuatau tutu aere i te tuatua meitaki.

Tutu Meitaki Aereia te Tuatua Meitaki

Mei teaa atura te akameitakianga i te nooanga i roto i teia “rā tuatua meitaki.” Auraka rava to tatou manako kia apai keia mei to te au repera toko a rai i te akamataanga. Akamaara e kua taopenga ratou e: “Kare ta tatou i te mea meitaki.” Mei te reira rai, kare e tau ia tatou kia akatika i te au aruaruanga uaorai me kore i te tamanamanata akapou taime, kia arai ia tatou mei te rave pu tikai anga i te angaanga orometua.

I roto i teia turanga, e akaraanga meitaki tikai ta tatou ka aru. I te akamaaraanga no runga i te 20 mataiti mua o tana angaanga orometua, kua tata te apotetoro ko Paulo e: “Kua akakite pu ua oki au i te evangelia o te Mesia.” (Roma 15:19) Kare rava a Paulo i akatika ana i tetai apinga kia akaparuparu i tona maroiroi. Kia aite katoa to tatou maroiroi mei tona rai, ia tatou e akakitekite aere atura i te karere o te Patireia i roto i teia “rā tuatua meitaki.”

[Tutu i te kapi 28]

Kare a Blessing i akatika ana i tona uaorai au anoano kia tamanamanata i tana tavinianga tamou

[Tutu i te kapi 29]

E akamanako meitaki ana te nga taeake Seliger e akapeea i te taangaanga i to raua taime