No meki sani tapu yu fu fruteri „a bun nyunsu” na ini a ten disi

DEN fo gwasiman ben e luku san den ben o du. Di den ben e begi sma sani na a portu fu a foto, dan den no ben kisi noti. Èn den Siriasma di ben lontu Samaria, ben e tapu pasi gi sma fu tyari nyanyan kon na ini a kondre dati. Den ben wani taki den Samariasma ben musu gi densrefi abra. Sobun, fu di nyanyan ben diri srefisrefi, meki den gwasiman bosroiti fu no go na ini a foto. A nyunsu ben panya kaba taki sma ben nyan wan pikin.​—2 Kow. 6:24-29.

Den gwasiman prakseri: ’Fu san ede wi no e go na a kampu fu den Siriasma? Awinsi san wi du, toku wi o dede.’ Di dungru fadon, dan den teki pasi go na a kampu dati. Di den doro drape, ala sani ben tiri. Waktiman no ben de. Asi nanga buriki ben tai, ma nowan enkri srudati ben de drape. Den fo gwasiman luku go na ini wan tenti. Nowan sma ben de drape, ma bogobogo nyanyan nanga dringi ben de. Den bigin nyan èn dringi. Den gwasiman si sosrefi gowtu, solfru, krosi, nanga tra diri sani. Den tyari den sani dati go kibri, èn den drai go baka fu teki moro. Nowan sma ben de na ini a kampu. Na wan wondru fasi, Yehovah ben meki den Siriasma yere a babari fu wan legre di ben de na pasi e kon. Fu di den Siriasma ben e denki taki a legre ben e kon feti nanga den, meki den lon gowe libi a kampu fu den. Den ben libi ala sani na baka, èn iniwan sma ben kan go teki san den wani!

Den gwasiman ben e teki den diri sani go kibri. Ma te fu kaba den konsensi bigin fon den, fu di den ben e prakseri den sma na ini a foto Samaria di ben de krosibei. Den sma drape ben de nanga angribere. Den gwasiman taigi makandra: „A no bun san wi e du. Meki wi go fruteri den trawan a bun nyunsu disi!” Den gwasiman lon go esi-esi baka na Samaria, èn den go fruteri den sma drape san den ben feni.​—2 Kow. 7:1-11.

Na ini a ten disi, wi abi „bun nyunsu” tu fu fruteri trawan. Yesus ben taki fu wan tumusi prenspari sani di abi fu du nanga „a marki . . . fu a kaba fu a grontapu sistema disi”. Yesus ben taki: „A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon”(Mat. 24:3, 14). Sortu krakti a sani disi musu abi na wi tapu?

Den sorgu fu wi kan gi wi broko-ede

Fu di den gwasiman ben breiti so te nanga den sani di den ben feni, meki den ben frigiti Samaria. Den ben e poti prakseri soso na den sani di den ben kan kisi. A sani disi kan pasa nanga wi tu? „Angriten” na wan fu den sani di abi fu du nanga a marki fu a kaba fu a grontapu sistema (Luk. 21:7, 11). Yesus ben gi den disipel fu en a warskow disi: „Poti prakseri na unsrefi taki noiti un ati e kon hebi fu di unu e nyan pasa marki, noso fu di unu e dringi tumusi furu, noso fu di unu e broko un ede nanga den sorgu fu na aladei libi” (Luk. 21:34). Leki Kresten, wi no musu gi pasi taki den sorgu fu na aladei libi e meki wi frigiti taki wi abi „bun nyunsu” fu fruteri sma.

Wan Kresten di nen Blessing, no ben gi pasi taki den sorgu fu en gi en broko-ede. Aladi a ben e dini leki pionier, a klari a skoro pe a ben e go, èn te fu kaba a trow nanga wan brada di e dini na Bethel. A kisi a grani tu fu tron wan memre fu a Bethelfamiri fu Benin. Blessing e taki: „Mi e krin den kamra na Bethel, èn mi e du a wroko  dati nanga prisiri.” Now, Blessing e du furuten diniwroko 12 yari kaba, èn a breiti taki a tan hori na prakseri taki a abi „bun nyunsu” fu fruteri sma na ini a ten disi.

Luku bun nanga sani di e teki tumusi furu fu yu ten

Di Yesus seni den 70 disipel fu en fu go preiki, dan a taigi den: „Fu tru, a kotiwroko bigi, ma furu wrokoman no de. Fu dati ede, begi a Masra fu a kotiwroko meki a seni wrokoman go du a kotiwroko fu en” (Luk. 10:2). Te sma ben e draidrai fu du a kotiwroko, dan sma ben kan lasi furu. Na so a de tu taki sma kan lasi den libi te wi ben o draidrai fu du a preikiwroko. Fu dati ede, Yesus ben taki moro fara: „Te unu de na pasi, un no musu brasa nowan sma fu gi en odi” (Luk. 10:4). A Griki wortu di vertaal nanga „odi” no abi fu du nomo nanga a taki di wi e taki sma odi. A wortu disi kan abi fu du tu nanga den brasa di wi e gi wan mati di wi e miti, noso nanga den tori di wi e taki nanga en. Sobun, Yesus ben e gi den bakaman fu en a rai fu no lasi ten tapu sani di no de prenspari, èn fu gebroiki den ten bun. A boskopu di den ben musu preiki ben prenspari srefisrefi.

Prakseri o furu ten wi e lasi te wi e poti prakseri na sani di no e tyari wini kon gi wi. Furu yari kaba, telefisi na a moro prenspari sani di sma na heri grontapu e lasi ten na tapu. Ma fa a de nanga den cellulair, èn nanga den computer di sma abi na oso? Na ini Ingrisikondre, 1000 sma ben teki prati na wan ondrosuku, èn na ondrosuku dati sori taki „furu sma na ini a kondre dati e gebroiki 88 miniti wan dei fu bel nanga telefon, 62 miniti fu bel nanga cellulair, 53 miniti fu seni e-mail, èn 22 miniti fu seni sms gi trawan”. Ibri dei, den sma disi e gebroiki tu tron so furu ten leki san wan yepi pionier e gebroiki na ini a diniwroko! Omeni ten yu e lasi tapu yu telefon, yu computer, noso yu cellulair?

Ernst nanga Hildegard Seliger, ben e luku bun fa den ben e gebroiki den ten. Den ala tu makandra ben koti strafu moro leki 40 yari langa na ini den Nazi strafuman-kampu, èn na ini strafu-oso na ini den Communist kondre. Baka di den kon fri, dan den dini leki pionier, teleki a libi fu den na grontapu kon na wan kaba.

Furu sma ben wani skrifi brifi seni go gi den Seligers. A trowpaar disi ben kan gebroiki furu fu den ten fu leisi èn fu skrifi brifi. Ma na anbegi fu den ben de a moro prenspari sani na ini den libi.

A no de fu taki dati wi alamala lobi fu taki nanga den lobiwan fu wi, efu na brifi wi e seni go gi den, noso efu na bel wi e bel den. A bun fu du den sortu sani dati. A bun taki wi e gebroiki wi ten fu du difrenti sortu bun sani. Ma toku a de wan koni sani te wi e luku bun taki wi no e lasi ten tapu sani di no de so prenspari, so taki wi kan preiki a bun nyunsu.

Preiki a bun nyunsu dorodoro

A de wan blesi trutru taki wi abi „bun nyunsu” fu fruteri trawan na ini a ten disi. Wi no musu de leki den fo gwasiman di ben frigiti den sma na ini Samaria. Memre san den ben taki: „A no bun san wi e du.” Èn a no bun tu te wi e gi pasi taki den afersi fu wi, noso sani di e teki tumusi furu fu wi ten, e tapu wi fu teki prati dorodoro na a diniwroko.

Te a abi fu du nanga a tori dati, dan Paulus gi wi wan tumusi bun eksempre. Luku san Paulus ben taki fu den fosi 20 yari di a ben e teki prati na a diniwroko: ’Mi preiki a bun nyunsu fu Krestes finifini’ (Rom. 15:19). Paulus no ben e meki nowan enkri sani tapu en fu preiki fayafaya. Meki wi de fayafaya neleki Paulus te wi e meki a „bun nyunsu” fu a Kownukondre bekènti na ini a ten disi.

[Prenki na tapu bladzijde 28]

Blessing no ben gi pasi taki den broko-ede fu en, tapu en fu du a furuten diniwroko

[Prenki na tapu bladzijde 29]

Den Seliger ben e luku bun fa den ben e gebroiki a ten fu den