Papalata Ku Kavanyetiwa ‘eSikwini Leri Ra Mahungu Lamanene’

VANHU va mune lava nga ni nhlokonho va tlhele va kambisisa swilo leswi va swi hlawuleke. A nga kona munhu loyi a va pfuneke loko va ri enyangweni wa muti. Vasiriya lava a va rhendzele muti va sivele ku nghenisiwa ka swakudya emutini wa Samariya ku endlela leswaku vanhu va sika hi ndlala. A swi nga pfuni nchumu ku nghena emutini wolowo; hikuva swakudya a swi durha swinene. A ku vikiwe ni leswaku ku ni vanhu lava dyaka vanhu van’wana hikwalaho ka ndlala.—2 Tih. 6:24-29.

Vavanuna lava nga ni nhlokonho va te: ‘Hikwalaho ka yini hi nga yi enxaxeni wa Vasiriya? Hikuva hambi ha ya enxaxeni kumbe a hi yi, hi ta hetelela hi file.’ Loko se ri mphumerile, va ye enxaxeni wa Vasiriya. Loko va fika enxaxeni a ku lo whii! A ku ri hava varindzi. Tihanci ni timbhongolo a swi bohiwile, kambe a ku nga ri na masocha. Vavanuna lava va mune va langute endzeni ka tende rin’wana. Kambe a ku nga ri na munhu ni un’we, naswona swakudya ni swakunwa a swi lo vuya. Va dyile va tlhela va nwa. Vavanuna lava va nhlokonho va tlhele va vona na nsuku, silivhere, tinguvu ni swilo swin’wana swa nkoka. Va swi tekile va ya swi tumbeta va tlhela va vuya va ta teka swin’wana. Enxaxeni hinkwawo a ku nga ri na munhu. Yehovha hi singita u endle leswaku Vasiriya va twa mpfumawulo wa vuthu ra nyimpi. Leswi Vasiriya va ehleketeke leswaku a va ri eku hlaseriweni, va hume enxaxeni va baleka. Swilo leswi siyiweke hi Vasiriya volavo a swi ta tekiwa hi mani na mani loyi a ta swi kuma!

Vavanuna lava nga ni nhlokonho a va teka swilo swa nkoka va ya swi tumbeta. Hambiswiritano, loko va tsundzuka leswaku vanhu va rikwavo va le Samariya va le ku sikeni, va sungule ku vilela. Va sungule ku vulavula hi xivona va ku: “Leswi hi swi endlaka a hi swinene. Siku leri i siku ra mahungu lamanene!” Vavanuna lava va nhlokonho va tlhelele eSamariya va ya vika mahungu lamanene ya leswi va swi kumeke.—2 Tih. 7:1-11.

Na hina hi hanya enkarhini lowu vuriwaka “siku ra mahungu lamanene.” Loko Yesu a vulavula hi xiendlakalo xa “xikombiso . . . xa makumu ya mafambiselo ya swilo” u te: “Mahungu lamanene lawa ya mfumo ma ta chumayeriwa emisaveni hinkwayo leyi akiweke leswaku byi va vumbhoni ematikweni hinkwawo; kutani hi kona makumu ma nga ta fika.” (Mat. 24:3, 14) Xana sweswo swi hi khumba njhani?

Ku Karhateka Ngopfu Hi Swiphiqo Swa Hina Swi Nga Hi Heta Matimba

Vavanuna lava nga ni nhlokonho a a va tsake ngopfu hikwalaho ka swilo leswi va swi kumeke lerova va rivale muti wa Samariya swa xinkarhana. A va anakanya ngopfu hi swilo leswi va nga swi kumaka. Xana na hina hi nga humeleriwa hi nchumu lowu fanaka ni lowu? “Ku kayivela ka swakudya” hi xin’wana xa swikombiso leswi funghaka makumu ya mafambiselo lawa ya swilo. (Luka 21:7, 11) Yesu u tsundzuxe vadyondzisiwa va yena a ku: “Tivoneleni leswaku timbilu ta n’wina ti nga tshuki ti tshikileriwa hi ku dya ngopfu ni ku nwa ngopfu ni ku vilela hi vutomi.” (Luka 21:34) Tanihi Vakreste hi fanele hi tivonela leswaku a hi swi pfumeleli swiphiqo swa hina vini swa siku ni siku swi endla leswaku hi rivala leswaku hi hanya ‘esikwini ra mahungu lamanene.’

Mukreste un’wana la vuriwaka Blessing a nga swi pfumelelanga swiphiqo swa yena leswaku swi n’wi heta matimba. A a phayona a ri karhi a dyondzela ntirho naswona u hetelele a tekiwe hi munhu loyi a tirhaka eBethele ivi a amukeriwa leswaku a va xirho xa ndyangu wa Bethele ya le Benin. U ri: “Ndzi tirha ku basisa makamara naswona ndzi xi tsakela ngopfu xiavelo xa mina.” Sweswi Blessing wa tsaka hikuva u ni malembe ya 12 a ri mutirheli wa nkarhi  hinkwawo naswona u tsakisiwa hileswi a koteke ku tshama a khomekile ‘esikwini leri ra mahungu lamanene’ leri hi hanyaka eka rona.

Tivonele Eka Swilo Leswi Dyaka Nkarhi

Loko Yesu a rhuma vadyondzisiwa va 70, u te: “Hakunene, ntshovelo i wukulu, kambe vatirhi a hi vangani. Hikokwalaho kombelani N’wini wa ntshovelo leswaku a rhumela vatirhi entshovelweni wa yena.” (Luka 10:2) Tanihi leswi munhu a nga lahlekeriwaka hi ntshovelo loko o hlwela ku tshovela leswi a swi byaleke, hilaha ku fanaka loko hi nga wu endli ntirho wo chumayela swi nga endla leswaku vanhu va lahlekeriwa hi vutomi. Hikwalaho Yesu u engete a ku: “Loko mi xeweta munhu egondzweni mi nga n’wi angarhi.” (Luka 10:4) Ririmi ro sungula laha rito leri nge “xewani” ri humaka kona, ri nga ha vula swo tala ku tlula ku va munhu a ku, “xewani” kumbe “i nhlikanhi.” Ri nga ha katsa ku angarhana swin’we ni mabulo yo leha lama vaka kona loko hi hlangana ni munghana wa hina. Hikwalaho Yesu u lerise valandzeri va yena leswaku va papalata ku kavanyetiwa swi nga fanelanga nileswaku va wu tirhisa hi vutlhari nkarhi wa vona. Rungula leri a va fanele va ri chumayela a ri ri ra xihatla.

Anakanya hi nkarhi lowu swilo leswi kavanyetaka swi nga wu dyaka. Se ku hundze malembe yo tala thelevhixini yi ri nchumu lowu dyelaka vanhu nkarhi wo tala swinene. Ku vuriwa yini hi tiselfoni ni tikhompyuta? Nkambisiso lowu endliweke eka vanhu lavakulu va le Britain va 1 000 wu kume leswaku “vanhu vo tala va le Britain va heta timinete ta 88 hi siku va ri karhi va vulavula eka tinqingho, timinete tin’wana ta 62 va ti heta va ri karhi va tirhisa tiselfoni, timinete ta 53 va ti heta va ri eku rhumeleni ka marungula hi khompyuta kasi ta 22 va ti heta va ri karhi va rhumela marungula hi selfoni.” Loko nkarhi wolowo wu hlanganisiwa wu wu tlula kambirhi nkarhi lowu phayona ra nkarhinyana ri nga wu hetaka ri ri ensin’wini hi siku. Xana u heta nkarhi wo tanihi kwihi u ri karhi u tirhisa riqingho, e-mail ni ku rhumela marungula hi khompyuta kumbe hi selfoni?

Ernst na Hildegard va ka Seliger a va wu tirhisa hi vukheta nkarhi wa vona. Havambirhi ka vona va tshame malembe yo tlula 40 etikampeni ta nxaniso ta Manazi ni le makhotsweni ya Makhomunisi. Loko se va ntshunxiwile, va ve maphayona kukondza va heta pfhumba ra vona ra laha misaveni.

Vanhu vo tala a va swi lava ku tsalelana ni mpatswa wa ka Seliger. Mpatswa lowu a wu ta va wu hete nkarhi wa wona wo tala wu ri karhi wu hlaya ni ku tsala mapapila. Hambiswiritano, wu rhangise ku tirhela Yehovha evuton’wini bya wona.

Ina, hinkwerhu ha swi tsakela ku amukela mapapila ni ku beriwa tinqingho hi vanhu lava hi va rhandzaka, naswona sweswo a swi hoxanga. Hambiswiritano, ku hlawula swilo swo hambana-hambana eka leswi hi swi endlaka siku ni siku swa vuyerisa. Nilokoswiritano, hi ta va hi tlharihile loko hi kota ku lawula nkarhi lowu hi wu hetaka eka swilo leswi kavanyetaka esikwini leri ra ku chumayela mahungu lamanene.

Chumayela Mahungu Lamanene Hi Rixaladza

I nkateko lowukulu ku hanya enkarhini lowu wa “siku ra mahungu lamanene.” A hi tivoneleni leswaku hi nga kavanyetiwi ku fana ni vavanuna lavaya va mune va nhlokonho lava rhangeke va kavanyetiwa. Tsundzuka leswaku va te: “Leswi hi swi endlaka a hi swinene.” Hilaha ku fanaka, a hi fanelanga hi pfumelela swilo swa hina vini kumbe swilo leswi dyaka nkarhi swi hi sivela ku ya ensin’wini nkarhi na nkarhi.

Emhakeni leyi hi ni xikombiso lexinene ngopfu lexi hi faneleke hi xi landzela. Loko muapostola Pawulo a anakanya hi malembe yo sungula ya 20 ya vutirheli bya yena, u tsale a ku: “Ndzi chumayele mahungu lamanene hi rixaladza hi ta Kreste.” (Rhom. 15:19) Pawulo a nga pfumelelanga nchumu leswaku wu n’wi endla a nga ha hiseki. A hi hisekeni ku fana na yena loko hi ri karhi hi twarisa rungula ra Mfumo eka ‘siku leri ra mahungu lamanene.’

[Xifaniso lexi nga eka tluka 28]

Blessing a nga pfumelanga ku kavanyetiwa entirhweni wa yena wa nkarhi hinkwawo hi swilo leswi a swi rhandzaka

[Xifaniso lexi nga eka tluka 29]

Mpatswa wa ka Seliger a wu wu tirhisa hi vukheta nkarhi wa wona