Maʼ u náayal k-óol tumen «u kʼiinil k-bisik maʼalob péektsiloʼob»

LE KANTÚUL máakoʼob yaan lepra tiʼoboʼ, maʼ siʼibik mix baʼal tiʼob tu yookbal le kaajoʼ. U soldadoiloʼob Siriaeʼ u baʼpachmoʼob u kaajil Samaria, le oʼolal u kajnáaliloʼobeʼ táan u kíimloʼob yéetel wiʼij. Le beetik chéen kunel ka okokoʼobiʼ, tumen jach koʼoj u koʼonol baʼal jaantbiliʼ. Tsʼoʼoleʼ yaan tak tsʼoʼok u káajal u jaantik u paalaloʼobiʼ (2 Rey. 6:24-29).

Le ka áakʼabchajeʼ, le máakoʼob yaan lepra tiʼoboʼ tu tuklaj u binoʼob teʼ tuʼux jelekbal u soldadoiloʼob Siriaoʼ, tumen tu tukloʼobeʼ teʼeloʼ maʼ xaan wa maas yaan baʼal u jaantoʼobiʼ. Ka kʼuchoʼobeʼ jach chʼenchʼenkil. Tu yiloʼobeʼ le tsíimnoʼob yéetel le burroʼoboʼ láayliʼ tiʼ kʼaxaʼanoʼobeʼ, baʼaleʼ mix utúul soldado kanáantik le kúuchiloʼ. Ka tu natsʼubaʼob chʼeeneb ichil upʼéel paseleʼ tu yiloʼob mix máak yaniʼ, ka joʼopʼ túun u jaantkoʼob yéetel u yukʼikoʼob tuláakal le baʼaxoʼob yanoʼ. Tu yiloʼob xan baʼaloʼob de oro yéetel de plataiʼ, bey xan nookʼoʼob yéetel uláakʼ baʼaloʼob koʼojtak. Tu chʼaʼajoʼob tuláakal le páajchajeʼ ka bin u taʼakoʼob, tsʼoʼoleʼ ka suunajoʼob u chʼaʼob uláakʼ. ¡U soldadoiloʼob Siriaeʼ tu pʼatoʼob le tuʼux jelekbaloʼob kaʼachoʼ! ¿Baʼaxten? Tumen Jéeobaeʼ tu beetaj u yuʼubikoʼob bey táan u taal yaʼabach soldadoʼob baʼateltikoʼobeʼ. Sajakchajoʼob túuneʼ ka púutsʼoʼob, mix upʼéel tiʼ u nuʼukuloʼob tu bisoʼob.

Le máaxoʼob yaan lepra tiʼoboʼ seguernaj u púutkoʼob u maasil baʼaloʼob, baʼaleʼ chéen ka jáan kʼaʼajtiʼobeʼ táan u kíimil yéetel wiʼij u kajnáaliloʼob Samaria, ka joʼopʼ u yaatal tu yóoloʼob yoʼolal baʼax ku beetkoʼob kaʼachi. Ka tu yaʼaloʼob: «Maʼ uts le baʼax k-beetikaʼ. Bejlaʼeʼ u kʼiinil k-bisik maʼalob péektsiloʼob». Ka bin u yáalkaboʼob utiaʼal u yaʼalikoʼob baʼax tsʼoʼok u yilkoʼob (2 Rey. 7:1-11).

Jeʼex le máakoʼob yaan lepra tiʼoboʼ, toʼoneʼ kuxaʼanoʼon xan tu «kʼiinil k-bisik maʼalob péektsiloʼob». ¿Tiʼ baʼax maʼalob péektsilil táan k-tʼaan? Tiʼ le tʼaanaj Jesús le ka tu yaʼalaj baʼax kun eʼesik taʼaytak u xuʼulul yóokʼol kaab. Letiʼeʼ ka tu yaʼalaj: «U maʼalob péektsilil le reinoaʼ bíin [kʼaʼaytaʼak] tiʼ tuláakal yóokʼol kaab, utiaʼal ka kʼaj óoltaʼak tumen tuláakal kaajoʼob; letiʼ túun ken taalak u xuul» (Mat. 24:3, 14). ¿Baʼax unaj u péekskoʼon k-beet lelaʼ?

U chiʼichnakiloʼob le kuxtalaʼ jeʼel u beetkoʼob k-náachtal tiʼ Dioseʼ

Le ka kaxtaʼab le baʼaloʼob koʼojtak u tojol tumen le máaxoʼob yaan lepra tiʼoboʼ jach kiʼimakchaj u yóoloʼobeʼ ka tak tuʼubtiʼob táan u muʼyaj u kajnáaliloʼob Samaria. Tu káajbaleʼ chéen tu tsʼáajoʼob táanil le baʼaxoʼob kʼaʼabéettiʼoboʼ. ¿Jeʼel wa xan u yúuchultoʼon beyoʼ? Utéenjeakileʼ Jesuseʼ tu yaʼaleʼ teʼ tu tsʼook kʼiiniloʼob le yóokʼol kaabaʼ yaan u muʼyajtaʼal «wiʼijiloʼob» (Luc. 21:7, 11). Baʼaleʼ tu yaʼalaj xan tiʼ u disipuloʼob: «Kanáantabaʼex, maʼ a chaʼik u chichtal a puksiʼikʼaleʼex tu yoʼolal kʼaakʼas kuxtal, káaltal yéetel u táan óolal u baʼaluba le kuxtalaʼ» (Luc. 21:34). Jeʼex túun k-ilkoʼ, maʼ unaj k-jach chiʼichnaktal yoʼolal u baʼalubaʼob le kuxtal ka tak tuʼubuktoʼon kuxaʼanoʼon tu «kʼiinil k-bisik maʼalob péektsiloʼob[iʼ]».

Tuukulnakoʼon tiʼ baʼax tu beetaj kiik Blessing, letiʼeʼ mantatsʼ ku tsʼáaik táanil u meyajtik Dios. Letiʼeʼ tu beetaj u precursorai tu kʼiiniloʼob táan u xook escuela. Ka máan kʼiineʼ tsʼoʼok u beel yéetel utúul sukuʼun ku meyaj tu Betelil Benín, letiʼ xaneʼ invitartaʼab ka xiʼik meyajiʼ. Letiʼeʼ ku yaʼalik: «In meyajeʼ in limpiartik le cuartoʼoboʼ, lelaʼ  upʼéel meyaj kin beetik yéetel kiʼimak óolal». Le kiikaʼ tsʼoʼok doce jaʼaboʼob káajak u jach tsʼáaik u yóol u meyajt Dios, letiʼeʼ jach kiʼimak u yóol tumen maʼ tuʼubuktiʼ kuxaʼan tu kʼiinil u bisaʼal «maʼalob péektsiloʼob[iʼ]».

Le baʼaxoʼob jeʼel u luʼsiktoʼon tiempooʼ

Ka tu túuxtaj Jesús le 70 disipuloʼob kʼaʼaytajoʼ, tu yaʼalajtiʼob: «Sen yaʼab le kool kʼaʼabéet u joʼocholoʼ, baʼaleʼ le j-meyajoʼoboʼ jach jumpʼíitoʼob. Le beetikeʼ kʼáat óolteʼex tiʼ u yuumil le kooloʼ ka u túuxt uláakʼ j-meyajoʼob utiaʼal jooch» (Luc. 10:2). Wa maʼ tu séeb joʼochol upʼéel kooleʼ, yaʼab tiʼ le baʼaxoʼob yanoʼoboʼ jeʼel u peʼerchajleʼ. Toʼon xaneʼ, wa maʼ k-tsʼáaik k-óol teʼ kʼaʼaytajoʼ yaʼab máakoʼob jeʼel u kíimloʼobeʼ. Le oʼolal Jesuseʼ tu yaʼalaj: «Mix a waʼataleʼex a tsikeʼex mix máak teʼ bejoʼ» (Luc. 10:4). Le tʼaan griego ku suʼutul «tsikeʼexoʼ» maʼ chéen u kʼáat yaʼal u kʼáataʼal tiʼ máak «bix u beeliʼ» wa u yaʼalik máak «buenos díasiʼ». Ku tsʼáaik xan naʼatbil u méekʼikuba yéetel u xáantal táan u tsikbal kaʼatúul máak úuch u yilubaʼob. Baʼaleʼ le disipuloʼoboʼ maʼ unaj u náayal u yóoloʼob tiʼ baʼaloʼob beyaʼ, baʼaxeʼ unaj u aprovecharkoʼob le tiempooʼ, tumen jach kʼaʼabéet u yuʼubaʼal le maʼalob péektsil ku biskoʼoboʼ.

Bejlaʼeʼ jach yaʼab tiempo ku peʼertik máak tiʼ baʼaloʼob maʼ jach kʼaʼanantakiʼ. Le televisionoʼ jach úuch joʼopʼok u luʼsik yaʼab tiempo tiʼ máak. Baʼaleʼ ¿kux túun le celularoʼob yéetel le computadoraʼoboʼ? Ka kʼáatchiʼitaʼab 1,000 máakoʼob tiʼ Gran Bretañaeʼ ilaʼabeʼ «óoliʼ tuláakloʼob ku máanskoʼob 88 minutos sáamsamal táan u tʼaanoʼob tiʼ telefóno, 62 minutos táan u tʼaanoʼob tiʼ celular, 53 minutos táan u xokikoʼob correo electronicoʼob yéetel 22 minutos táan u túuxkoʼob mensajes yéetel u celularoʼob. Wa ku láaj xoʼokol tuláakal le minutos ku máanskoʼobaʼ ken máanak upʼéel meseʼ ku yilaʼaleʼ le tiempo ku máanskoʼoboʼ maas tiʼ u kaʼatéen tiʼ le bukaʼaj ku beetaʼal tumen utúul precursor auxiliaroʼ. Le oʼolaleʼ maʼalob ka k-tukle: «¿Bukaʼaj tiempo kin máansik tiʼ baʼaloʼob beyaʼ?».

Ernst yéetel Hildegard Seligereʼ jach tu yiloʼob maʼ u chéen peʼerkoʼob tiempo. Tu kaʼatúulaloʼobeʼ tu máansoʼob maas tiʼ cuarenta jaʼaboʼob kʼalaʼanoʼob tumen le naziʼob yéetel tumen le comunistaʼoboʼ, baʼaleʼ le ka jóokʼoʼobeʼ tu beetaj u precursoriloʼob tak ka kíimoʼob.

Le sukuʼun yéetel u yatnaʼ jach yaʼab kaʼach u túuxtaʼal carta tiʼob utiaʼal u yojéeltaʼal bix yaniloʼob. Baʼaleʼ letiʼobeʼ maas tu tsʼáaj u yóoloʼob u meyajtoʼob Jéeoba ke tiʼ u xokikoʼob yéetel núukikoʼob le cartaʼob ku túuxtaʼaltiʼoboʼ.

U suukileʼ tuláakloʼon jatsʼuts k-ilik k-tsikbal yéetel k-láakʼtsiloʼob. Leloʼ maʼ kʼaas u beetaʼaliʼ. U jaajileʼ maʼalob ka u yil máak u beetik jejeláas meyajoʼob sáamsamal. Baʼaleʼ unaj k-tsʼáaik u pʼiis baʼaxoʼob k-beetik utiaʼal maʼ u xuʼulul k-kʼaʼaytaj teʼ tu «kʼiinil k-bisik maʼalob péektsiloʼob[aʼ]».

Unaj k-tsʼáaik k-óol kʼaʼayt le maʼalob péektsiloʼ

U jaajileʼ jach unaj u taasiktoʼon kiʼimak óolal kuxlikoʼon tu «kʼiinil k-bisik maʼalob péektsiloʼob». Maʼ k-chaʼik u náayal k-óol jeʼex úuchik tiʼ le kantúul máakoʼob yaan lepra tiʼoboʼ. Ka tsʼoʼokeʼ letiʼobeʼ tu yaʼaloʼob: «Maʼ uts le baʼax k-beetikaʼ». Toʼon xaneʼ maʼ uts ka xiʼikoʼon tu paach chéen baʼaxoʼob k-tsʼíiboltkiʼ wa tu paach uláakʼ baʼaloʼob jeʼel u beetik maʼ k-tsʼáaik k-óol teʼ kʼaʼaytajoʼ.

Unaj k-beetik jeʼex tu beetil apóstol Pabloeʼ. Ka joʼopʼ u kʼaʼajsik le yáax veinte jaʼaboʼob tu meyajtaj Diosoʼ, letiʼeʼ tu yaʼalaj: «Tsʼoʼok in láaj [kʼaʼaytik] u maʼalob péektsilil Cristo» (Rom. 15:19, LTN). Pabloeʼ maʼ tu chaʼaj u lúuʼsaʼal u yóol tumen mix baʼaliʼ. Unaj k-beetik jeʼex letiʼoʼ, unaj u chúukpajal k-óol k-kʼaʼayt u maʼalob péektsilil le Reino bejlaʼa tu «kʼiinil k-bisik maʼalob péektsiloʼob[oʼ]».

[U tsolajil le oochel teʼ táan juʼun 28]

Blessingeʼ tu pʼataj paachil chéen baʼaxoʼob u kʼáat utiaʼal u maas tsʼáaik u yóol u meyajt Dios

[U tsolajil le oochel teʼ táan juʼun 29]

Sukuʼun Seliger yéetel u yatneʼ tu aprovechartaj maʼalob u tiempoʼob