¿Aski luräwinakan wasitat irnaqtʼañ munasmati?

TAMANXA, inas irpir chuymanjama, irpir chuymaninakan yanapiripjama jan ukax Diosatak sapüru irnaqtʼaskchiyäta, ukhamanak lurasax chuymas phuqtʼata kusisitaw jikxatasirïpachätaxa.

Ukampis inas chuymankipstatäxasina, usuntxäsina jan ukax mä familiaramar uñjañataki uka luräwim jaytxchiyäta. Ukhamächi ukhaxa, uka luräwitak janis wakichatäkasma ukham amuyasis janiw aynachtʼañamäkiti (1 Tim. 5:8). Nayra patak maranakanxa, Felipex misionerjamaw mä qhawqha tiempo irnaqtʼaskäna, qhipatxa Cesarea markanwa utjnuqxäna, ukanwa familiapar uñjäna (Hech. 21:8, 9). Nayra Israel markanxa, David sat reyix chuymankipstatäxäna ukhaw Salomón yuqapar jupa lanti uttʼayañatak taqi kun wakichäna (1 Rey. 1:1, 32-35). Ukhamansa jikxatasipxchïnxa, Jehová Diosax Feliperusa Davitarusa munasiskakïnwa. Diosan uka pä luqtirinakaparux aski jaqinakarjamaw jichhürkamas uñjtanxa.

Jichhasti irpir chuymaninakax inas pantjasitamata jan ukax familiaman jan walinak utjxatapat uka aski luräwinak jaytxañamaw sas sapxchiyätam (1 Tim. 3:2, 4, 10, 12). Jumatakix uka amtar puripxatapax inas jan walikchïnti ukat jichhürkamas chuymas ustʼatakïsksta.

¿Wasitat uka aski luräwinak katuqasmati?

Tiempompix uka aski luräwinak katuqxarakismawa. Ukatakix chʼamachasiñamawa (1 Tim. 3:1). ¿Kunas yanaptʼiristamxa? Diosaru ukat jilat kullakanakar munasiñaw yanaptʼätamxa, ukham munasiñanïtam laykurakiw Diosar katuyasiyätaxa. Jumatï taqi chuyma ukham lurañ munstaxa, Jehová Diosaw aski luräwinakan irnaqtʼkayäta uka experiencianïtamata ukat uka luräwi jaytxatamat aksarux experiencianïxatamat taman askipataki uka aski luräwinak wasitat kuttʼayxätamxa.

Jehová Diosax israelitanakar aski luräwinak apaqxäna ukhax kamsänsa, uk amtañamawa, Jupax akham sänwa: “Nayatwa [Jehová Diosaxa], nayasti pachpakistwa. Ukatwa jumanakax Jacobun wawanakapa jan tʼunjatäpktati” sasa (Mal. 3:6). Jehová Diosax israelitanakarux munasiskakïnwa janirakiw jupanakat armaskänti. Jumarux uka kikparakwa uñjasktamxa. Jichhax taman jan uka aski luräwinakanïxasaxa, ¿kuns luräta? Ak amtañamawa, Diosarux janiw kuntï sum lurañ yatktan ukampik yupaychktänti, jan ukasti Diosamp sum apasitasaw jukʼamp wakiskirixa. Jichhax taman jan walja luräwinïxasax tiempom jan ina chʼusar aptʼamti, jan ukasti Diosamp sum apasiñatak chʼamachasiskakiñamawa.

Iyawsäwim jilxattaskakiñapatakix Jehová Diosan ‘chʼamapar alkatañamawa’ (1 Cor. 16:13; Sal. 105:4). ¿Kunjamatsa uk lurasma? Mayax akäspawa, taqi chuyma Jehová Diosat mayisiña. Mayisisax kunjamsa jikxatasta uk sañamawa ukat qullan ajayup mayisiñamarakiwa. Ukhamatwa Jehová Diosar jukʼamp jakʼachasïta ukat yupaychañ tuqit suma saytʼatätam amuyasirakïta (Sal. 62:8; Fili. 4:6, 13). Ukatxa, Diosan Arupat yatxatañaw iyawsäwim jilxattañ yanaptʼarakïtam. Taman jan walja luräwinïxasaxa, ¿janit familiamampi jan ukax sapakis Bibliat jukʼamp yatxattʼañatak tiempo apstʼaskasma? Taman kuna lurañanakatï utjki uk phuqañatï chʼamäxchïnxa, jichhaw wasitat chʼamachasiñamax wakisispa.

 Jumax Jehová Diosan Qhanañchiripäskaktawa (Isa. 43:10-12). Jiwasax ‘Diosan yanapirinakapäpxtanwa’ ukaw taqi kunat sipansa mä aski luräwixa (1 Cor. 3:9, MT). Diosan Arupat taqi chuyma yatiyañaw Jehova Diosampi ukat jiwasamp chik yatiyir sarapki ukanakamp sum apasiñ yanaptʼistani.

¿Kunjamatsa jan wali amuyunakar atipjsna?

Jan aski luräwinakanïxasax inas phinqʼasita llakita ukham jikxatassta. Jan ukax nayax janiw juchanïkti sasin inas sissta. Ukat jan wali amuyunakas utjarakispawa, istʼapktam ukat luräwinakamat yatipki uka irpir chuymaninakax uka aski luräwinakam jaytxañamaw sas sapxiristam ukhaxa. Ukampis uka jan wali amuyunakampitï atipayasïtaxa, janiw nayrar sartkasmati, janirakiw kunatï pasktam ukatx kunsa yatiqkätati. Jichhax kunjamsa Job, Manasés ukat José tatanakan sarnaqäwipax jan wali amuyunakar atipjañatak yanaptʼistaspa uk uñjañäni.

Job tatax familia pʼiqtirinakan taypinxa, mayninakan Diosamp sum apasipxañapatak yanaptʼiri, irpir chuymani ukat taripiri ukham aski luräwinakanïnwa (Job 1:5; 29:7-17, 21-25). Ukampis mä akatjamatwa jan yänakani, usurnukstata ukat wawanakapas jiwarata ukham uñjasïna, ukatxa jan walinakwa lurpacha sasaw jupat parlapxarakïna. Ukatwa akham säna: “Nayat sullka waynanakas, larusipxituwa” sasa (Job 30:1).

Job tatax janis kuna juchanïkaspa ukhamwa Diosan nayraqatapan arsusïna (Job 13:15). Ukampisa, taqi chuymaw Diosar atinisïna, ukham luratapatwa wali askinak jikxatarakïna. Chiqanchäwix jupatak askitapwa amuyasïna, yämas yantʼatäkän ukhax pantjat amuyunak arsutap layku (Job 40:6-8; 42:3, 6). Altʼat chuymanïtap laykuw Diosan bendicionap jukʼamp katuqarakïna (Job 42:10-13).

Inas juchachasitam layku uka aski luräwinak aptʼasiwaysta, jichhasti Jehová Diosasa jilat kullakanakasa pampachtʼapxitaniti ukat kunatï paskäna uk armapxaniti sas jisktʼasisksta. Judá marka apnaqir Manasés tatat amtasiñamawa. Diosan “nayraqatapansti luratanakapax sinti jan walinakänwa, ukhamatwa [Jehová Diosar] wal colerayäna” (2 Rey. 21:6). Ukampis jiwxäna ukhaw Diosax taqi chuyma luqtir jaqit uñjxäna. ¿Kunatsa?

Kunattix Manasés reyix chiqanchatäsax istʼasirixänwa. Qalltanxa Diosan arsutanakap janiw istʼkänti, ukatwa Jehová Diosax asirionakaru jupa contra saytʼayäna, jupanakasti cadenamp ñachʼantasaw Babilonia jaya markar apxapxäna. Ukampis uka markan jikxatasisaxa, “[Jehová] Diosaparuwa artʼasïna, ukatsti nayra awkinakapan Diosap nayraqatanxa walipuniwa jiskʼaru tuktʼäna”. Ukhamawa, uka reyix taqi chuymaw arrepentisxäna ukat jan wali lurañanaksa jaytxänwa, ukatwa juchanakapat pampachatäna (2 Cró. 33:12, 13).

Maynix uka aski luräwinak aptʼasisax janiw wasitat jankʼaki taqi ukanak katuqkaspati. Jan ukasti jukʼat jukʼatwa katuqxaspa. Jumarutï taman luräwinak churapxätam ukat taqi chuym phuqäta ukhaxa, jukʼat jukʼatwa jukʼamp luräwinak churxapxatam. Chiqas ukham lurañax chʼamakïspawa, jan waltʼäwinakas utjarakispawa.  Ukampis taqi chuyma chʼamachasïta ukhaxa, tiempompix askinakwa jikxatarakïta.

Jichhax José sat Jacobun yuqapat yatxatarakiñäni. 17 maranikän ukhawa jilanakapax esclavjama aljantapxatayna (Gén. 37:2, NM; Gén 37:26-28). Jupax janiw jilanakapampi aljantatäñap amuyaskänti. Ukampisa, ukhaman jikxatasisax janiw llakimp aynachtʼkänti, ukat Jehová Diosan bendicionapampix uywiripan utapanxa suma jaqit uñtʼatäxarakïnwa (Gén. 39:2). Qhipatsti Joseyax carcelan jistʼantatäxänwa, ukhaman uñjasisas Diosat janiw jithiqtkänti, ukat Jehová Diosax jupar yanapaskakïnwa. Tiempompix carcelanx walja luräwinak katuqxarakïna (Gén. 39:21-23).

Joseyax kunatsa tʼaqhisiskäna uk janiw sum yatkänti. Jupax taqi kunansa taqi chuymaw irnaqtʼäna. Ukatwa Jehová Diosax jutaniw sat Wawax jupa tuqnam jutañapatak ajllïna (Gén. 3:15; 45:5-8). Jiwasax janis Joseyjama aski luräwinakanïkañanixa, Jehová Diosaw luqtirinakaparu aski luräwinak katuqapxañapatakix uñjaski, ukxa Joseyan sarnaqäwipaw yatichistu. Ukatwa Joseyat yatiqasisax taqi chuyma Diosar luqtañatakix jankʼakïpxañasa.

¿Kunanakatsa yatiqassna?

Job, Manasés ukat Joseyasa jan walinakanwa uñjasipxäna. Ukampisa kimspachaniw jan waltʼäwinakapat aski yatichäwinak yatiqapxäna. Ukat jumasti, ¿ukhaman jikxatasisax kunanaksa yatiqasma?

Kuntï Jehová Diosax yatichañ muktam uk amuyañamawa. Tʼaqhisiñanakan uñjasisaw Job tatax jupa pachpat sint llakisïna ukatwa kunatï jukʼamp wakiskirïki uk armtʼasïna. Ukampisa, Jehová Diosaw munasiñampi chiqañchtʼäna, ukatwa amuytatasisin akham sarakïna: “Kuntix jan amuytʼkayäta ukanakwa parlaskayätxa” sasa (Job 42:3). Jumatï aski luräwinak aptʼasitamat wali llakita jikxatästaxa, janiw juma kikpatxa “kuntï lupʼiñamäki ukat jukʼampxa” lupʼiñamäkiti (Rom. 12:3). Jumax janis qhanpach amuykchïtaxa, inas Jehová Diosax nayrar sartañamatak yanaptʼañ munaskstam.

Chiqañchapxätam ukhax janiw chuym ustʼayasiñamäkiti. Qalltanxa, Manasesax inas akham amuyaschïna, janiw ukham chiqañchatäñajax wakiskänti sasa. Ukhamäkchïnsa, chiqanchatax iyaw sasaw arrepentisïna ukat jan wali luratanakapsa jaytxarakïna. Jumatï chiqañchat uñjasïtaxa, Jehová Diosan nayraqatapan jiskʼar tukuñamawa, ukat Jupax jachʼaruw aptätamxa (1 Ped. 5:6; Sant. 4:10).

Pacienciani ukat suma chuymanïñamawa. Tʼaqhisiñanakan uñjasitap laykuxa, Joseyax jilanakapar uñisisapänwa, ukat ukhamat ukham kuttʼayañsa amtarakisapänwa, ukampis janiw uk lurkänti, jan ukasti amuytʼasirïtapa ukat khuyaptʼayasirïtapwa uñachtʼayäna (Gén. 50:15-21). Jumatï chuyma ustʼat jikxatästaxa, pacienciani ukat suma chuymanïñamawa, ukat Jehová Diosampis yatichayasiñamarakiwa.

¿Tamanxa aski luräwinakanïyätati? Ukhamächi ukhaxa, Jehová Diosat yaqha aski luräwinak katuqañatakix chʼamachasiskakim. Yupaychañ tuqit chʼamachasiskakim ukat jan wali amuyunakxa paciencianïsina ukat altʼat chuymanïsinwa atipjasma. Kuna luräwtï churapxätam ukhax taqi chuymaw lurañama. “Aski jakir jaqinakarux, [Jehová Diosax] munasiwa, jachʼaruw apti, askinakap churaraki”, uka arunakatxa janipuniw pächasiñamäkiti (Sal. 84:11).

[30 janan qhanañchäwipa]

Taqi chuyma Diosat mayisisa iyawsäwim jilxattayam

[31 janan fotopa]

Diosan Arupat taqi chuyma yatiyañaw Jehová Diosamp sum apasiñ yanaptʼistani

[32 janan fotopa]

Jehová Diosat yaqha aski luräwinak katuqañatakix chʼamachasiskakim