Nag-alagad Ka Bala Sadto? Makaalagad Ka Bala Liwat?

MAY katungdanan ka bala sang una sa Cristianong kongregasyon? Mahimo isa ka anay ka ministeryal nga alagad ukon gulang, ukon may pribilehiyo sa pila ka bahin sang bug-os tion nga pag-alagad. Pat-od gid nga nalipay ka sa imo mga asaynment, apang nag-untat ka bangod sa pila ka rason.

Ayhan nag-untat ka sa pagpangalagad sa imo pribilehiyo kay kinahanglan mo atipanon ang imo pamilya. Sa pihak nga bahin, mahimo man nga nag-untat ka bangod sa katigulangon ukon balatian. Sa sini nga mga kahimtangan, indi buot silingon nga napaslawan ka. (1 Tim. 5:8) Sang unang siglo, si Felipe nag-alagad anay subong misyonero, apang sang ulihi nagpabilin sia sa Cesarea kag gin-atipan ang iya pamilya. (Binu. 21:8, 9) Sang tigulang na si Hari David sang Israel sadto, ginpabulos niya sa trono ang iya anak nga si Solomon. (1 Hari 1:1, 32-35) Apang, ginahigugma kag ginaapresyar gihapon ni Jehova sanday Felipe kag David kag ginatahod sang mga tawo tubtob subong.

Apang, mahimo man nga ginkuha sa imo ang imo pribilehiyo bangod sa imo ginhimo ukon problema sa pamilya. (1 Tim. 3:2, 4, 10, 12) Mahimo magbatyag ka nga indi ini husto, kag nagahinakit ka gihapon tubtob subong.

Mahimo Mo Ini Panikasugan Liwat

Imposible bala nga matigayon mo liwat ang nadula mo nga pribilehiyo? Indi sa tanan nga kaso. Apang para makaalagad ka liwat, dapat mo ini panikasugan nga malab-ot. (1 Tim. 3:1) Ngaa? Bangod ginahigugma mo si Jehova kag ang mga nagaalagad sa iya. Amo man sini ang imo rason sang gindedikar mo ang imo kabuhi sa iya. Kon handa ka nga ipakita ina nga gugma paagi sa pag-alagad liwat, gamiton ka ni Jehova lakip ang tanan nga eksperiensia nga imo natigayon antes kag pagkatapos nga nadula mo ang imo pribilehiyo.

Dumduma ang pasalig ni Jehova sa Israel sa tapos nga nadula nila ang ila pinasahi nga mga pribilehiyo sa pag-alagad sa Iya. Ang iya Pulong nagasiling: “Ako nga GINOO wala nagabaylo; busa kamo, O mga anak ni Jacob, wala mapapas.” (Mal. 3:6) Ginhigugma gid ni Jehova ang mga Israelinhon kag luyag niya nga gamiton sila liwat. Amo man sini ang luyag ni Jehova para sa imo. Ano ang sarang mo mahimo sa kahimtangan mo subong? Ang pag-alagad para sa intereses sang Ginharian wala nasandig sa imo ikasarang kundi sa imo suod nga kaangtanan kay Jehova. Gani, samtang wala ka pa sing dugang nga responsibilidad sa kongregasyon, pabakura ang imo suod nga kaangtanan kay Jehova.

Agod ‘magbakod’ ang imo pagtuo, dapat mo ‘pangitaon ang GINOO kag ang iya kusug.’ (1 Cor. 16:13; Sal. 105:4) Ang isa ka paagi agod mahimo mo ini amo ang tudok nga pagpangamuyo. Kon nagapangamuyo ka kay Jehova, isugid ang imo kahimtangan kag balatyagon, kag pangabaya ang iya espiritu. Kon himuon mo ini, mapalig-on ka kag mangin suod kay Jehova. (Sal. 62:8; Fil. 4:6, 13) Ang isa pa ka paagi nga mapabakod mo ang imo kaangtanan kay Jehova amo ang pagpauswag sang imo pagtuon sa Pulong sang Dios. Bangod diutay pa subong ang imo responsibilidad, mas madamo na ang imo tion para sa personal kag pangpamilya nga pagtuon. Ayhan mahimo mo ipadayon ang imo rutina nga nabudlayan mo anay himuon.

Siempre pa, nagarepresentar ka gihapon kay  Jehova subong iya Saksi. (Isa. 43:10-12) Ang pinakadaku nga dungog nga matigayon sang isa amo ang mangin “masigkamanugpangabudlay sang Dios.” (1 Cor. 3:9) Ang paghinguyang sing daku nga tion sa pagbantala isa ka maayo nga paagi agod mangin suod ang imo kaangtanan kay Jehova kag sa imo mga kaupod sa ministeryo.

Pag-atubang sa Imo Ginabatyag

Kon madula mo ang imo pribilehiyo mahimo manugunan ka sini ukon magbatyag ka sing kahuya. Mahimo mo pa gani pakamatarungon ang imo ginhimo. Apang, paano kon ang responsable nga mga utod magdesisyon nga indi ka na kalipikado sa sina nga pribilehiyo, bisan pa ginpamatian na nila ang imo pangatarungan? Mahimo nga maghinakit ka, amo nga indi ka na magtinguha pa nga mag-uswag ukon magtuon sa imo inagihan. Binagbinagon naton kon paano ang eksperiensia nanday Job, Manases, kag Jose makabulig sa isa nga indi maghinakit.

Gintiglawas ni Job ang iban sa atubangan ni Jehova kag isa sia ka gulang ukon hukom sa tion sang mga patriarka. (Job 1:5; 29:7-17, 21-25) Dayon, sa pinakamaayo nga tion sang kabuhi ni Job, nadula ang iya manggad, napatay ang iya kabataan, kag nagbalatian sia. Dugang pa, ginpakanubo sia sang mga tawo. “Sila nga mga bataon pa sa akon,” siling ni Job, “nagayaguta sa akon.”—Job 30:1.

Para kay Job, wala gid sia sing sala, kag luyag niya nga mangatarungan sa Dios. (Job 13:15) Apang, handa sia nga maghulat kay Jehova, kag ginpakamaayo sia. Natun-an niya nga kinahanglan sia tadlungon, ilabi na bangod sa iya sayop nga pagtamod sa iya pag-antos. (Job 40:6-8; 42:3, 6) Bangod sa pagkamapainubuson ni Job, ginpakamaayo sia sang Dios sing bugana.—Job 42:10-13.

Kon nadula mo ang imo pribilehiyo bangod nakahimo ka sing sala, mahimo magbatyag ka nga indi na ini malipatan kag mapatawad ni Jehova kag sang mga kauturan. Binagbinaga ang natabo kay Hari Manases sang Juda. “Naghimo sia sing madamu gid nga malaut sa itololok sang GINOO, sa pagpaakig sa iya.” (2 Hari 21:6) Apang, si Manases napatay nga matutom nga hari. Ngaa?

Sang ulihi, ginbaton ni Manases ang disiplina. Sa tapos nga ginsikway niya ang mga paandam ni Jehova, ginpadala ni Jehova ang mga Asirianhon sa pagsalakay sa ila. Gingapos sia kag ginbihag sa Babilonia. Didto, “nagpakilooy sia sa GINOO nga iya Dios kag nagpaubus sang iya kaugalingon sing daku sa atubangan sang Dios sang iya mga ginikanan. Nagpangamuyo sia sa iya.” Bangod tudok nga naghinulsol si Manases, nanghikot sia agod tadlungon ang iya sala kag ginpatawad sia.—2 Cron. 33:12, 13.

Ang nadula nga mga pribilehiyo mahimo nga indi matigayon liwat sa gilayon. Apang sa ulihi, mahimo hatagan ka sing pila ka gagmay nga responsibilidad. Kon batunon mo ini kag himuon ang imo labing masarangan mahimo hatagan ka sa ulihi sing dugang pa gid nga asaynment. Mahimo nga indi man ini mahapos suno sa imo ginapaabot. May mga tion nga mapaslawan ka. Bisan pa amo sini, ang imo kahanda kag pagpadayon may maayo gid nga resulta.

 Lantawon naton ang halimbawa sang anak ni Jacob nga si Jose. Sa edad nga 17, wala kaluoy sia nga ginbaligya sang iya mga utod nga lalaki. (Gen. 37:2, 26-28) Indi amo sini nga pagtratar ang iya ginapaabot sa iya mga utod sa amay. Apang, nangin handa sia nga atubangon ini nga mga kahimtangan. Ginpakamaayo sia ni Jehova, amo nga “yara sia sa balay sang iya agalon.” (Gen. 39:2) Sang ulihi, ginbilanggo si Jose. Apang, nangin matutom sia gihapon kag kaupod niya si Jehova, gani gintugyan sa iya ang pagdumala sang tanan nga bilanggo.—Gen. 39:21-23.

Wala nakahibalo si Jose nga may katuyuan ang pagbilanggo sa iya. Padayon lamang niya nga ginhimo kon ano ang iya masarangan. Gani, gingamit sia ni Jehova agod maamligan ang kaliwatan nga amo ang agyan sang ginsaad nga Binhi. (Gen. 3:15; 45:5-8) Bisan pa wala kita nagapaabot nga matigayon ang importante nga papel pareho kay Jose, ginapakita sini nga hitabo nga si Jehova ang nagahatag sing mga pribilehiyo sa Iya mga alagad. Gani, padayon nga himua ang imo masarangan kag maghulat kaangay ni Jose.

Magtuon Gikan sa Mabudlay nga mga Kahimtangan

Naagyan nanday Job, Manases, kag Jose ang mabudlay nga mga kahimtangan. Ginbaton sining tatlo ka lalaki ang mga kahimtangan nga gintugutan ni Jehova nga matabo sa ila. Ang kada isa sa ila nakatuon sing importante nga mga leksion. Ano ang imo matun-an?

Hunahunaa kon ano ang luyag ni Jehova nga itudlo sa imo. Bangod sa iya daku nga pag-antos, nangin maiyaiyahon si Job kag wala niya makita ang mas importante nga hulusayon. Apang, mahigugmaon sia nga gintadlong ni Jehova, amo nga nakamarasmas sia kag nagsiling: “Namitlang ko ang wala ko mahangpi.” (Job 42:3) Kon naghinakit ka bangod nadula mo ang imo pribilehiyo, ‘indi maghunahuna sing labaw tuhoy sa imo kaugalingon sangsa dapat mo hunahunaon; kundi maghunahuna agod matigayon ang maligdong nga hunahuna.’ (Roma 12:3) Mahimo nga luyag ka tadlungon ni Jehova sa paagi nga indi mo pa bug-os nga nahangpan.

Batuna ang disiplina. Mahimo nga sang primero, nagbatyag si Manases nga indi sia takus sing tuman kasakit nga disiplina. Apang, ginbaton niya ini, ginhinulsulan, kag gintadlong ang iya malain nga ginhimo. Bisan ano man ang imo ginbatyag sa disiplina nga imo nabaton, ‘magpaubos sa atubangan ni Jehova, kag bayawon ka niya.’—1 Ped. 5:6; Sant. 4:10.

Magpailob kag mangin handa. Mahimo kuntani maghinakit kag magtimalos si Jose bangod sa iya mga inagihan. Apang, nangin mahinantupon sia kag maluluy-on. (Gen. 50:15-21) Kon napaslawan ka, mangin mapailubon kag mangin handa nga hanason ni Jehova.

May responsibilidad ka bala anay sa Cristianong kongregasyon? Mangin handa sa mga pribilehiyo nga ihatag sa imo ni Jehova sa ulihi. Pabakura ang imo kaangtanan sa iya. Kontrola ang imo balatyagon paagi sa pagpakita sang pagpailob kag pagkamapainubuson. Batuna ang ano man nga asaynment nga ihatag sa imo. Magsalig nga si Jehova “walay maayo nga butang nga idumili . . . sa mga nagaginawi sing matadlong.”—Sal. 84:11.

[Blurb sa pahina 30]

Pabakura ang imo pagtuo paagi sa tudok nga pangamuyo

[Retrato sa pahina 31]

Ang paghinguyang sing daku nga tion sa pagbantala isa ka maayo nga paagi agod mangin suod ang imo kaangtanan kay Jehova

[Retrato sa pahina 32]

Mangin handa sa mga pribilehiyo nga ihatag sa imo ni Jehova sa ulihi