Uvuaku ne majitu mu tshisumbu anyi? Udiku mua kuapetulula anyi?

UVUAKU ne majitu mu tshisumbu anyi? Pamuapa uvua musadidi wa mudimu anyi mukulu. Uvua mua kuikala mpanda-njila anyi muenze mushindu mukuabu wa mudimu wa ku dîba ne ku dîba. Kakuyi mpata uvua ne disanka ne diakalenga mu midimu yebe eyi, kadi mulue kuyijimija bua amue malu.

Pamuapa uvua mudilekele majitu auvua nawu bua kumona mua kutabalela bena mu dîku diebe bimpe. Peshi bivua mua kuikala bua bukulakaje anyi bua masama. Kuangata mapangadika a mushindu eu kakuena kuleja ne: udi mupangile bualu to. (1 Tim. 5:8) Tshilejilu, mu bidimu lukama bia kumpala, Filipo wakenza mudimu wa bumisionere kadi wakaya kusombela mu Kaisalia bua kulama bena mu dîku diende. (Bien. 21:8, 9) Pakavua Davidi mukalenge wa Isalele wa kale mukulakaje, wakalongolola bua muanende Solomo amupingane mu bukalenge. (1 Bak. 1:1, 32-35) Nansha nanku, Yehowa uvua anu munange Filipo ne Davidi ne ubanyisha, ne tuetu tutshidi tubanemeka too ne lelu.

Kadi bavua mua kuikala bakumbushe majitu ebe bualu uvua muenze bualu bubi anyi bua malu a mu dîku diebe. (1 Tim. 3:2, 4, 10, 12) Pamuapa uvua mua kuikala mumone ne: bualu buuvua muenze kabuvua bukumbane bua kukumbushilabu majitu to, ne utshidi unyingalala too ne lelu.

Udi mua kupetulula majitu

Padi muntu ujimija majitu ende, kena mua kuapetulula kabidi anyi? Kabitu nanku misangu yonso to. Wewe musue kupetulula majitu auvua nawu, udi ne bua kukeba bua kuapeta. (1 Tim. 3:1) Kadi bua tshinyi kuakeba kabidi? Vuluka ne: uvua mudilambule kudi Yehowa Nzambi bualu udi mumunange ne munange bantu badi bamuenzela mudimu. Udi uleja dinanga edi paudi witaba bua kuambula kabidi majitu, ne Yehowa neitabe bua wambuluishe bena mu tshisumbu ne dimanya diuvua nadi ne diudi mupete katshia wajimija majitu ebe.

Vuluka tshivua Yehowa mujadikile bena Isalele panyima pa bobu bamane kujimija diakalenga divuabu nadi. Wakabambila ne: “Meme Yehowa tshitu ngakudimuka, nunku nuenu, bana ba Yakoba, kanuena nubutuka.” (Mal. 3:6) Yehowa uvua munange bena Isalele ne uvua musue bua bamuenzele kabidi mudimu. Yehowa mmusue bua umuenzele kabidi mudimu bu muuvua wenza kumpala. Ntshinyi tshiudi mua kuenza mpindieu? Bua muntu kuambula majitu mu tshisumbu, udi ne bua kuikala mu malanda makole ne Yehowa nansha yeye kayi ne dimanya dia bungi. Nunku, muudi kuyi ne majitu mu tshisumbu, dienzeja bua kukolesha malanda ebe ne Yehowa.

Bua wewe ‘kukuatshishibua bikole’ mu ditabuja, udi ne bua ‘kukeba Yehowa ne bukole buende.’ (1 Kol. 16:13; Mus. 105:4) Nunku mbimpe wikale usambila ne muoyo mujima. Ambila Yehowa malu onso adi makutonde ne mulombe nyuma wende. Wewe muenze nunku, neusemene kudiye ne neakukoleshe. (Mus. 62:8; Filip. 4:6, 13) Bualu bukuabu buudi mua kuenza bua kukolesha malanda ebe ne Nzambi nkulonga Dîyi diende. Bu muudi mushale ne majitu makese, udi ne mushindu wa kuenza bimpe malu akavua makukolele bu mudi kudilongela bikole ne kulonga ne bena mu dîku diebe.

Umanye ne: utshidi anu muleji mpala wa Yehowa bualu udi Ntemu wende. (Yesh. 43:10-12) Diakalenga dinene ditudi tuetu  bonso nadi ndia kuikala ‘benzejanganyi ba mudimu ne Nzambi.’ (1 Kol. 3:9) Kudifila bikole mu mudimu wa kuyisha kudi kukuambuluisha bua kukolesha malanda ebe ne Yehowa ne kukolesha bena Kristo nebe.

Bundu ne kanyinganyinga kabikupitshi bukole

Udi mua kumvua bundu anyi kanyinganyinga paudi ujimija majitu ebe. Udi mua kutuadija kudibingisha bua malu auvua muenze. Kadi newenze tshinyi bikala bana betu badi bakose tshilumbu tshiebe bamone ne: kuena ukumbana bua kulama majitu ebe? Udi mua kushala mubafikile munda, ne tshiji etshi tshidi mua kukupangisha bua kupetela dilongesha ku bualu budi bukufikile. Kadi tumonayi mudi tshilejilu tshia Yobo, tshia Manashe ne tshia Yosefe mua kutuambuluisha bua bundu ne kanyinganyinga kabitupitshi bukole.

Yobo uvua wakuila bakuabu kudi Yehowa ne bavua bamuteke mukulu ne mulumbuluishi mu tshikondo tshiende. (Yobo 1:5; 29:7-17, 21-25) Kadi pakamukuata ntatu, Yobo wakajimija bubanji buende, bana bende ne makanda ende a mubidi. Wakajimija kabidi lumu luvuaye nalu ku mêsu kua bakuabu. Wakamba ne: “Bantu bandi mpita bidimu badi banseka.”​—Yobo 30:1.

Yobo uvua umona ne: kavua ne bualu ne wakasua kudibingisha kumpala kua Nzambi. (Yobo 13:15) Kadi wakatekemena Yehowa ne Yehowa wakamubenesha bua bualu abu. Wakamona ne: bivua bikengela bua bamubele nangananga bua malu avuaye muambe pavuaye mu diteta. (Yobo 40:6-8; 42:3, 6) Didipuekesha dia Yobo diakamupetesha mabenesha a bungi a kudi Nzambi.​—Yobo 42:10-13.

Biwikala uvua mujimije majitu ebe bua bualu bubi buuvua muenze, udi mua kuikala udiebeja bikala Yehowa ne bena Kristo nebe bakufuile luse ne babupue muoyo. Nunku tuangatayi tshilejilu tshia Mukalenge Manashe wa mu Yuda. ‘Wakenza malu mabi a bungi ku mêsu kua Yehowa bua kumufuisha nawu tshiji.’ (2 Bak. 21:6) Nansha nanku, Manashe wakafuila mu bukalenge muikale ne lulamatu kudi Yehowa. Mushindu kayi uvuabi biekenzeke nanku?

Manashe wakalua kuitaba dinyoka divua Yehowa mumupeshe. Pavuaye mubenge kutumikila Yehowa, Yehowa wakamufila mu bianza bia bena Ashû, kumusuikabu nkanu ne kuya nende mu bupika kule mu Babulona. Pavuaye mu bupika amu, Manashe ‘wakakeba Yehowa Nzambi wende, wakatamba kudipuekesha ku mêsu kua Nzambi wa bankambua bende. Wakamutendelela.’ Yehowa wakafuila Manashe luse bualu wakanyingalala ne muoyo mujima ne kuenza malu avua aleja dinyingalala diende adi.​—2 Kul. 33:12, 13.

Pa tshibidilu muntu katu upetulula diakamue majitu onso avuaye mujimije to. Badi mua kutuadija kumupesha midimu mikese. Wewe muitabe midimu ayi ne muyenze ne muoyo mujima, badi mua kukupesha midimu mikuabu. Abi kabiena biumvuija ne: malu adi mua kuya ne lukasa muudi wewe mutekemene to. Udi mua kupeta ntatu. Kadi umanya ne: musuminyine katu wabula.

Tuangate tshilejilu tshia Yosefe muana wa Yakoba. Pavuaye ne bidimu 17, bana babu  bakamupanyisha ku bupika kapayi bualu. (Gen. 37:2, 26-28) Kavua mumanye ne: bana ba tatuende bavua mua kumuenzela bualu bua mushindu eu to. Kadi wakitaba bionso bivua bimuenzekele ne Yehowa wakamubenesha ne wakalua mutangidi wa ‘nzubu wa mukalenge wende.’ (Gen. 39:2) Pashishe bakalua kuela Yosefe mu buloko. Kadi wakashala anu ne lulamatu ne Yehowa uvua anu nende bualu bakalua kumuteka mutangidi wa malu onso a mu buloko.​—Gen. 39:21-23.

Yosefe kavua mumanye ne: bidimu bionso bivuaye muenze mu buloko abi bivua bua tshipatshila kampanda to. Kadi wakatungunuka anu ne kuenza tshivuaye mua kuenza. Nunku Yehowa wakakuata nende mudimu bua kulama mulongo wa ndelanganyi ivua ne bua kufikisha ku Kankanunuina kavuaye mulaye. (Gen. 3:15; 45:5-8) Nansha mudi muntu nansha umue wa kutudi kayi mua kupeta diakalenga bu divua Yosefe mupete, muyuki wende mufundisha ku nyuma muimpe udi utuleja ne: Yehowa ke udi upesha basadidi bende majitu mu tshisumbu. Itaba malu adi akuenzekela anu bu Yosefe.

Longela ku ntatu idi mikukuate

Yobo, Manashe ne Yosefe bavua bapitshile mu ntatu mikole. Bonso basatu bakitaba malu avua Yehowa mulekele abakuate ne yonso wa kudibu wakapeta malongesha a mushinga mukole. Ntshinyi tshiudi mua kulongela kudibu?

Keba mua kumanya tshidi Yehowa musue kukulongesha. Pavua Yobo uluangana ne ntatu yende, wakatuadija kuditatshisha anu bua diakalenga diende ne kupanga bua kumona malu makuabu. Kadi Yehowa wakamubela ne dinanga dionso, kumonaye tshilema tshiende ne kuitaba ne: ‘Ngakuamba malu andi tshiyi mujingulule bimpe.’ (Yobo 42:3) Wewe mumvue kanyinganyinga bualu udi mujimije majitu ebe, ‘kutambi kudielangana meji mapite audi ne bua kuela, kadi ela meji adi malulame.’ (Lomo 12:3) Yehowa udi mua kuikala ukeba kukubela mu mushindu uudi kuyi mumvue bimpe to.

Itaba dinyoka. Manashe uvua mua kuikala wela meji ku ntuadijilu ne: kavua mukumbanyine dinyoka divuaye mupete to. Kadi wakaditaba, kunyingalalaye ne kulekela bienzedi bibi. Nansha wewe mumvue bishi bua dinyoka didibu bakupeshe, ‘dipuekesha ku mêsu kua Mukalenge, ne yeye neakubandishe.’​—1 Pet. 5:6; Yak. 4:10.

Ikala ne lutulu ne itaba dilongesha. Bivua bitekete bua malu avua menzekele Yosefe kumufikisha ku dikala ne lukuna ne kukeba bua kudisombuela. Kadi wakapeta busunguluji ne kufuila bavua bamuenzele bibi luse. (Gen. 50:15-21) Bikalabu bavua bakuenzele bibi, ikala ne lutulu. Itaba bua Yehowa akulongeshe.

Uvuaku ne majitu mu tshisumbu tshia bena Kristo anyi? Petesha Yehowa mushindu wa kukupeshaye kabidi majitu matuku atshilualua. Kolesha malanda ebe nende. Kuitabi bua bundu anyi kanyinganyinga bikupite bukole to, kadi ikala ne lutulu ne didipuekesha. Itaba midimu yonso idibu mua kukupesha. Ikala mujadike ne: ‘Yehowa kena upala badi benda mu buakane tshintu tshimpe nansha tshimue.’​—Mus. 84:11.

[Lungenyi lunene lua mu dibeji 30]

Sambila ne muoyo mujima bua kukolesha ditabuja diebe

[Tshimfuanyi mu dibeji 31]

Kudifila bikole mu mudimu wa kuyisha kudi kukuambuluisha bua kukolesha malanda ebe ne Yehowa

[Tshimfuanyi mu dibeji 32]

Petesha Yehowa mushindu wa kukupeshaye kabidi majitu matuku atshilualua