Na o Kile wa Hlankela? Na o ka Hlankela Gape?

NA O kile wa hlankela ka phuthegong ya Bokriste? Mohlomongwe o be o le mohlanka wa bodiredi goba mogolo. Mohlomongwe o ile wa tsenela karolo e itšego ya tirelo ya nako e tletšego. Ga go pelaelo gore o ile wa hwetša lethabo le kgotsofalo e tseneletšego dikabelong tša gago, eupša ka mabaka a itšego o ile wa swanelwa ke go kgaotša go hlankela.

Mohlomongwe o ile wa kgaotša go hlankela e le gore o hlokomele ditho tša lapa. Ka lehlakoreng le lengwe, botšofadi goba go se phele gabotse mmeleng e ka ba e bile lebaka la gore o kgaotše go hlankela. Diphetho tše bjalo ga di bontšhe gore o paletšwe. (1 Tim. 5:8) Lekgolong la pele la nywaga, Filipi o ile a hlankela e le moromiwa, eupša ka morago o ile a dula Kesarea moo a ilego a hlokomela lapa la gagwe. (Dit. 21:8, 9) Nywageng ya gagwe ya botšofadi, Kgoši Dafida wa Isiraele ya bogologolo o ile a dira dithulaganyo tša gore morwa wa gagwe Solomone a mo hlatlame sedulong sa bogoši. (1 Dikx. 1:1, 32-35) Lega go le bjalo, Jehofa o be a sa dutše a rata Filipi le Dafida e bile a ba tšeela godimo gomme ba sa dutše ba hlompšha le lehono.

Lega go le bjalo, go ka direga gore o ile wa amogwa tokelo ya go hlankela. Na lebaka e ka ba e be e le go itshwara ka tsela e sego bohlale? Goba na lebaka e be e le mathata a lapa? (1 Tim. 3:2, 4, 10, 12) Mohlomongwe o ka ba o ile wa se dumelelane le phetho ya gore o amogwe tokelo yeo gomme o sa dutše o bolokile sekgopi go fihla le lehono.

O ka Katanela go Hlankela Gape

Na ge o amogilwe tokelo ya go hlankela o ka se sa e hwetša gape? Gantši ga go bjalo. Lega go le bjalo, e le gore o hlankele gape, o swanetše go katanela gore o swanelege. (1 Tim. 3:1) Eupša ke ka baka la’ng o swanetše go kganyoga go dira bjalo? Ka lebaka lona leo le dirilego gore o neele bophelo bja gago go Modimo—go rata Jehofa le bao ba mo hlankelago. Ge e ba o ikemišeditše go bontšha lerato leo ka go hlankela gape, se se tla dira gore Jehofa a diriše phihlelo yeo o e hweditšego pele le ka morago ga go lahlegelwa ke tokelo ya go hlankela.

Gopola kgonthišetšo yeo Jehofa a e neilego setšhaba sa Isiraele ka morago ga gore a se amoge ka mo go swanetšego ditokelo tša sona tša tirelo. Lentšu la gagwe le re: “Gobane Nna Jehofa ga k’ešo ka fetoga, le lena barwa ba Jakobo, ga l’ešo la fela.” (Mal. 3:6, PK) Jehofa o be a rata Baisiraele gomme a kganyoga go ba diriša ka mo go oketšegilego. Ka mo go swanago, Jehofa o kgahlegela go go diriša nakong e tlago. Ke’ng seo o ka se dirago boemong bja gago bja gona bjale? Go hlankela ka phuthegong go ithekgile kudu ka go ba le tswalano e botse le Jehofa go feta bokgoni bja rena bja tlhago. Ka gona, ge o sa dutše o se na boikarabelo bjo bo oketšegilego ka phuthegong, lebiša tlhokomelo tabeng ya go matlafatša tswalano ya gago le Jehofa.

E le gore o ‘tie matla’ tumelong, o swanetše go ‘nyaka Jehofa le matla a gagwe.’ (1 Bakor. 16:13; Ps. 105:4) Tsela e nngwe yeo o ka dirago se ka yona ke ka go rapela go tšwa pelong. Ge o hlalosetša Jehofa boemo bja gago, mmotše kamoo o ikwago ka gona gomme o kgopele moya wa gagwe. Ge o dira bjalo, o tla batamela kgaufsi le Jehofa gomme se se tla dira gore o tie. (Ps. 62:8; Bafil. 4:6, 13) Tsela e nngwe yeo o ka matlafatšago tswalano ya gago le Jehofa ka yona ke ka go ba le thuto e kaonafetšego ya Lentšu la Modimo. Ka ge ga bjale o se na boikarabelo bjo bontši, o ka kgona go dira mo gontši mabapi le thuto ya motho  ka noši le ya lapa, mohlomongwe wa tsošološa mokgwa woo go bego go le thata go o boloka.

Go ba gona, o sa dutše o emela Jehofa o le yo mongwe wa Dihlatse tša gagwe. (Jes. 43:10-12) Tokelo e kgolo kudu yeo yo mongwe le yo mongwe wa rena a ka bago le yona ke go ba yo mongwe wa “badirišani ba Modimo.” (1 Bakor. 3:9) Go fetša nako e ntši tirelong ya tšhemo ke tsela e botse kudu ya go matlafatša tswalano ya gago le Jehofa le go matlafatša tswalano ya gago le bao o šomago le bona bodireding.

Go Lebeletšana ka Katlego le Maikwelo a Gago

Go lahlegelwa ke tokelo ya go hlankela go ka dira gore o ikwe o hlabja ke dihlong goba o itshola. O ka ba le tshekamelo ya go lokafatša ditiro tša gago. Lega go le bjalo, go thwe’ng ge e ba bagolo ba ile ba go theetša ge o ikemela, eupša ba bona gore o sa dutše o swanela ke go kgaotša go hlankela? O ka thoma go ba le maikwelo a sa lokago ka bana beno, e lego seo se ka go thibelago go katanela go swanelega goba sa dira gore o thatafalelwe ke go ithuta go seo se go diragaletšego. Anke re hlahlobeng kamoo diphihlelo tša Jobo, Manase le Josefa di ka thušago motho go lebeletšana le maikwelo a sa lokago.

Jobo o be a ile a emela ba bangwe pele ga Jehofa gomme o be a ile a hlankela bjalo ka yo mongwe wa banna ba bagolo le moahlodi setšhabeng sa bapatriareka. (Jobo 1:5; 29:7-17, 21-25) Ke moka, nakong e itšego ya bohlokwa bophelong bja gagwe, Jobo o ile a lahlegelwa ke lehumo la gagwe le bana ba gagwe gomme a thoma go babja. Ka baka leo, o ile a lahlegelwa gape ke botumo bja gagwe bjo bobotse mahlong a batho ba bangwe. Jobo o itše: “Ke thsêxwa ke ba e lexo bašemana.”—Jobo 30:1.

Jobo o be a ikwa a se na molato le ga nyenyane gomme a nyaka go itokafatša pele ga Modimo. (Jobo 13:15) Lega go le bjalo, o be a ikemišeditše go letela Jehofa gomme se se ile sa mo tlišetša ditšhegofatšo. O ile a lemoga gore o be a swanetše go kgalemelwa, kudu-kudu mabapi le kamoo a ilego a arabela ka gona ditekong tšeo a ilego a lebeletšana le tšona. (Jobo 40:6-8; 42:3, 6) Mafelelong go ikokobetša ga Jobo go ile gwa feleletša ka gore Modimo a mo šegofatše kudu.—Jobo 42:10-13.

Ge e ba o ile wa lahlegelwa ke tokelo ya go hlankela ka baka la sebe seo o se dirilego, o ka ipotšiša ge e ba Jehofa le bana beno ba Bakriste ba ka go lebalela e le ka kgonthe. Ge e le gabotse, ela hloko phihlelo ya Kgoši Manase wa Juda. O ile a “dira tše nthši tše di befetšexo Morêna, a mo rumola.” (2 Dikx. 21:6) Lega go le bjalo, Manase o ile a hwa a botega, a buša bjalo ka kgoši. Se se ile sa direga bjang?

Mafelelong Manase o ile a amogela kgalemelo. Ka morago ga gore a hlokomologe ditemošo, Jehofa o ile a mo tlišetša Baasiria bao ba ilego ba mo tlema ka diketane gomme ba mo iša kgolegong nageng ya kgole ya Babilona. Ge a le moo, Manase o ile “a rapêla Modimo wa xaxwe, a ikokobetša ruri pele xa Modimo wa bôtat’axwe.” Go itshola ga Manase go tšwa pelong go ile gwa dira gore a lokiše diphošo tša gagwe gomme o ile a lebalelwa.—2 Kor. 33:12, 13.

Ga se ka mehla o ka bušetšwago ditokelo ka moka ka nako e tee. Lega go le bjalo, ge nako e dutše e e-ya, o ka newa boikarabelo bjo itšego bjo bo lekanyeditšwego. Go bo amogela le go dira  sohle seo o ka se kgonago gantši go tla dira gore o hwetše dikabelo tše oketšegilego. Se ga se bolele gore go tla ba bonolo. Go ka ba le dilo tšeo di go nyamišago. Lega go le bjalo, go ikemišetša le go kgotlelela go tšweletša mafelelo a mabotse.

Ka mohlala, nagana ka Josefa morwa wa Jakobo. Ge Josefa a be a e-na le nywaga e 17, bana babo ba ile ba mo rekiša ka tsela yeo e se nago toka gore e be lekgoba. (Gen. 37:2, 26-28) Ge e le gabotse, o be a sa letela gore barwa ba tatagwe ba mo sware ka tsela ye. Lega go le bjalo, o be a ikemišeditše go šoma ka tlase ga maemo a gomme ka baka la tšhegofatšo ya Jehofa o ile “a okamela ntlo ya mong wa gagwe.” (Gen. 39:2, NW) Ka morago, Josefa o ile a išwa kgolegong. Eupša o ile a dula a botega gomme Jehofa o be a e-na le yena, moo mafelelong a ilego a bewa gore a okamele bagolegwa ba bangwe.—Gen. 39:21-23.

Josefa o be a sa tsebe gore dilo tše ka moka di tla phetha morero o itšego. O ile a fo tšwela pele a dira seo a bego a ka se kgona. Ka go rialo, Jehofa o ile a kgona go mo diriša go boloka lešika leo le bego le tla tšweletša Peu e holofeditšwego. (Gen. 3:15; 45:5-8) Gaešita le ge re ka se letele go phetha karolo yeo e phethilwego ke Josefa, pego ye e buduletšwego e bontšha gore Jehofa o tsenya letsogo ditokelong tšeo bahlanka ba Gagwe ba di hwetšago. Ekiša Josefa e le gore Jehofa a kgone go go diriša.

Go Ithuta Diphihlelong tše Thata

Jobo, Manase le Josefa ba ile ba ba le diphihlelo tše kwešago bohloko. Banna ba ba bararo ba ile ba amogela seo Jehofa a se dumeletšego gore se direge, gomme yo mongwe le yo mongwe wa bona o ile a ithuta thuto ya bohlokwa. O ka ithuta’ng go se?

Lebelela seo Jehofa a ka bego a leka go go ruta sona. Nakong ya ge a be a katana le maikwelo a go nyama, Jobo o ile a ba le boithati gomme a lahlegelwa ke pono ya ditaba tša bohlokwa. Lega go le bjalo, ka baka la kgalemelo e lerato ya Jehofa o ile a hlaphogelwa gomme a dumela ka gore: ‘Ke boletše ke sa hlaologanye.’ (Jobo 42:3) Ge o e-kwa bohloko ka baka la go lahlegelwa ke ditokelo, ‘o se ke wa ikgopola kudu go feta kamoo go nyakegago gore a nagane ka gona; eupša o nagane e le gore o be le monagano o hlaphogetšwego.’ (Baroma 12:3) Jehofa a ka ba a leka go go lokiša ka tsela yeo ga bjale o sa e kwešišego ka mo go feletšego.

Amogela tayo. Mathomong Manase a ka ba a ile a ikwa eka o be a sa swanelwe ke kotlo e šoro bjalo. Lega go le bjalo, o ile a e amogela, a itshola gomme a tlogela tsela ya gagwe e sa lokago. Go sa šetšwe gore o ikwa bjang ka tayo yeo o e hweditšego, ‘ikokobetše mahlong a Jehofa, gomme o tla go godiša.’—1 Pet. 5:6; Jak. 4:10.

O se fele pelo gomme o ikemišetše. Phihlelo ya Josefa e ka ba e ile ya dira gore a tšwele pele a e-na le maikwelo a lehloyo le go nyaka go itefeletša. Go e-na le moo, o ile a ba le temogo le kgaugelo. (Gen. 50:15-21) Ge e ba o ile wa nyamišwa ke go lahlegelwa ke tokelo ya go hlankela, o se ke wa fela pelo. Ikemišetše go tlwaetšwa ke Jehofa.

Na o kile wa hlankela ka phuthegong ya Bokriste? Nea Jehofa sebaka sa gore a go nee ditokelo nakong e tlago. Matlafatša tswalano ya gago le Jehofa. Laola maikwelo a gago ka go se fele pelo le go ba yo a ikokobeditšego. Ikemišetše go amogela kabelo le ge e le efe yeo o ka e newago. Kgodišega gore “Morêna . . . ba sepelaxo ka xo loka a ka se ba hlokiše tše di botse.”—Ps. 84:11.

[Ntlhakgolo go letlakala 30]

Tia matla tumelong ka go rapela go tšwa pelong

[Seswantšho go letlakala 31]

Go fetša nako e ntši tirelong ya tšhemo ke tsela e botse kudu ya go matlafatša tswalano ya gago le Jehofa

[Seswantšho go letlakala 32]

Nea Jehofa sebaka sa gore a go nee ditokelo nakong e tlago