¿Munawaqchu congregacionpi llamkaynikita kaqmanta chaskiyta?

¿YAQACHUM haykapipas congregacionpi llamkayniyoq karqanki, kunanñataq imaraykupas chinkarachinki? Ichapas anciano, siervo ministerial otaq precursorpas karqanki, chaywanqa kusikurqankichá.

Kunanqa yaqapaschá saqerunki yuyaqña kasqaykirayku, onqosqaykirayku otaq familiaykita atiendenaykirayku. Chayna kaptinqa, amayá llumpaytaqa hukmanyaruychu (1 Tim. 5:8). Punta cristianokunapa tiemponpim, Felipe misionero karqa, ichaqa Cesarea llaqtamanmi astakururqa ayllunta cuidananpaq (Hech. 21:8, 9). Rey Davidpas yuyaqña kaspanmi churin Salomonta churarqa paypa rantinpi kamachinanpaq (1 Rey. 1:1, 32-35). Chayna kaptinpas Jehová Diosqa hinallam Felipetapas Davidtapas kuyarqa. Ñoqanchikpas kunankamam paykunataqa respetanchik.

Qamqa yaqapaschá mana allinta rurarusqaykirayku otaq familiaykipi imapas karusqanrayku congregacionpi llamkaynikita saqenaykipaq ancianokuna nisurqanki (1 Tim. 3:2, 4, 10, 12). Ichapas ancianokunapa tanteasqankuwan mana acuerdopichu karqanki, chayrayku hukmanyasqaraq kachkanki.

Atiwaqmi kaqmanta chaskiytaqa

¿Haykapipas atiwaqchu congregacionpi llamkaynikita kaqmanta chaskiyta? Arí, atiwaqmi. Ichaqa kallpanchakunaykim (1 Tim. 3:1). Chaypaqqa, ¿imataq yanapasunkiman? Diosta hinaspa iñiqmasikikunata kuyasqaykim, chayraykumá Diosmanqa qokurqankipas. Chay kuyakuyniki hinalla servinaykipaq kallpanchasuptikiqa, Jehová Diosqa yapamantamá servichikusunki, qamqa experienciatamá hapirqanki congregacionpi llamkaspayki chaynataq manaña llamkasqayki tiempopipas.

Yuyariy israelitakunata Jehová Dios qepancharuspanpas kayna nisqanta: “Ñoqa Tayta Diosqa haykapipas hina kaqllam kani, chayraykum Jacobpa mirayninkunaqa manaraq pasaypaqchu chinkarunkichik”, nispa (Mal. 3:6). Jehová Diosqa hinallam israelitakunataqa kuyarqa hinaspa yanaparqapas. Chaynallataqmi qamtapas kuyasunki. Hinaptinqa, ¿imatataq rurawaq hukmanyasqa tarikuspaykiqa? Yuyariy; Diosta servinapaqqa manam imapas ruray atisqanchikmantachu penden, aswanqa paywan allin amistadninchikmantam. Chaymi kunan congregacionpi mana ancha llamkayniyoq kasqaykirayku astawan iñiynikita kallpanchay.

Chaypaqqa, Jehová Diostayá maskay hinaspa atiynintawan (Sal. 105:4; 1 Cor. 16:13). Chaytam tariwaq tukuy sonqoykimanta Jehová Diosta mañakuspa. Chaypim niwaq imayna sientikusqaykimanta, mañakuytaq chuya espirituntapas. Chaynatam Diosman astawan asuykunki, iñiynikipas qaqa hinam kanqa (Sal. 62:8; Fili. 4:6, 13). Iñiynikitaqa kallpanchawaqtaqmi Bibliata estudiaspa. Congregacionpi mana ancha llamkayniyoq kasqaykirayku, ¿imanasqataq mana kallpanchakunkichu sapayki hinaspa familiaykiwanpas Bibliata astawan estudianaykipaq? Diospaq tukuy ima ruraynikipi sasachakuruspaykiqa kunanmi astawan kallpanchakuwaq kaqmanta ruranaykipaq.

Qamqa hinallam Jehová Diospa testigon kanki (Isa. 43:10-12). Ancha kusikunapaqmi paypa ‘llamkaqmasin’ kasqanchikqa (1 Cor.  3:9). Predicaq lloqsispapas Dioswan amistadninchiktam kallpanchanchik hinaspa iñiqmasinchikpatapas.

¿Imaynatam mana allin piensaykunata atipawaq?

Congregacionpi llamkaynikita saqeruspaykiqa llakisqa otaq penqakuywanchá tarikunki. Ichapas mana allin rurarusqaykita allinpaq hapinki. Chaymantapas congregacionpi llamkaynikita saqenaykipaq ancianokuna tantearusqankuwanchá kanman mana allin piensaykuna. Chayna sientekusqaykiqa manam yanapasunkichu iñiynikipi ñawparinaykipaq nitaq allinkunata yachanaykipaqpas. Qawasun imaynatam yanapawanchikman Jobpa, Manasespa hinaspa Joseypa pasasqankuna mana allin piensaykunata atipanapaq.

Jobqa favorecesqam karqa hukkunapa rantinpi Diosman asuykunanpaq, wakchakunatapas yanapaqmi, rurarqataqmi allin arreglotapas (Job 1:5; 29:7-17, 21-25). Ichaqa qonqaymantam kapuqninkuna chinkarurqa, onqorurqa, churinkunapas wañururqa chaymantapas mana allintam paymanta rimayta qallaykurqaku. Paymi nirqa: ‘Ñoqamantapas aswan mozo kaqkunaraqmi asipayawanku’, nispa (Job 30:1).

Jobqa Diospaq mana huchayoq kasqantam defiendekurqa (Job 13:15). Ichaqa Jehová Diospim suyarqa chaymi achka bendicionkunata chaskirqa. Payqa cuentatam qokurqa corregina necesitasqanmanta, astawanraqmi sasachakuykunapi kaspan mana allin rimasqankunamanta (Job 40:6-8; 42:3, 6). Chayna humilde kaptinmi Jehová Diosqa achkanpi bendeciykurqa (Job 42:10-13).

Ichapas congregacionpi llamkaynikitaqa saqerurqanki huchallikurusqaykirayku hinaspa tapukunki: “¿Haykapillapas Jehová Dios hinaspa iñiqmasiykuna pampachawaspanku qonqarunqakuchu?”, nispa. Yuyariy Juda lawpi kamachikuq Manasesmanta. Paymi “achka mana allinkunata” ruraspan Jehová Diosta piñachirqa (2 Rey. 21:6). Chayna kaptinpas wañukunanpaqña kachkaptinmi Diosqa allin runata hina qawarqa. ¿Imanasqa?

Diospa corregisqanta chaskikusqanrayku. Qallariypiqa Diostam mana kasukurqachu, chaymi Jehová Diosqa Manasespa contranpi asiriokunata hatarichirqa hinaptinmi presocharuspanku cadenasqata Babiloniaman aparqaku. Chaypim Manasesqa ‘Tayta Diosta mañakurqa. Abuelonkunapa Diosninpa qayllanpim pasaypaqta humillakuykurqa’. Arí, payqa sonqomanta wanakusqantam rurayninpi qawachirqa, chaymi pampachasqa karqa (2 Cro. 33:12, 13).

Pipas congregacionpi llamkayninkunata saqeruspanqa manam chayllachu llapallanta chaskin. Aswanqa tiempopa risqanman hinam pisi-pisimanta. Sichu congregacionpi ancianokunapa nisusqaykita atisqaykiman hina ruraptikiqa, aswanraqchá imapas ruranaykipaq kamachisqa kanki. Ichaqa, manapaschá munasqaykiman hinachu kanqa. Sasachakuykuna kaptinpas kallpanchakusqaykiqa manam yanqapaqchu kanqa.

 Kunanñataq rimasunchik Jacobpa churin Joseymanta. Paytam 17 watanpi kachkaptin wawqenkuna sirviente kananpaq rantikururqaku (Gen. 37:2, 26-28). Manamá payqa suyarqachu wawqenkunalla chayna rurarunantaqa. Chayna kaptinpas hinallamá kallpanchakurqa, chaymi Jehová Dios bendeciykuptin “patronninpa wasinpi” kamachikuq karqa (Gen. 39:2). Tiempopa risqanman hina carcelman churaruptinkupas Diosta kasukusqanraykum bendecisqa karqa. Hinaspam carcelpi kamachikuq karqa (Gen. 39:21-23).

Joseyqa manam yacharqachu tukuy ñakarisqan allinpi tukunantaqa. Ichaqa kallpanchakurqam allin kaqta rurananpaq. Chayraykum Jehová Dios payta servichikurqa Juda aylluta yanapaptin prometesqa Miray mana chinkarunanpaq (Gen. 3:15; 45:5-8). Joseyta hina mana servichikuwaptinchikpas, kay willakuyqa yachachiwanchikmi Dios munaptin congregacionpi imapas rurayniyoq kasqanchikta. Chaymi Josey hina kananchik Dios servichikuwananchikpaq.

Tukuy pasasqaykimanta allin kaqta yachay

Job, Manases hinaspa Joseyqa sasachakuykunapim tarikurqaku. Ichaqa chayna kananpaq Dios saqesqantaqa aguantarqakum, hinaspam allinkunata yacharqaku. Hinaptinqa, ¿imatataq pasasusqaykimanta qampas yachawaq?

Tapukuy: “¿Imatam Diosqa yachachiwayta munan?”, nispa. Jobqa llakipi tarikusqanraykum kikillanpi llumpayta piensaspan allin kaqkunata qonqarurqa. Chayna kaptinpas, kuyakuywan Dios corregiykuptinmi ‘mana entiendespa’ rimasqankunata reqsikurqa (Job 42:3). Congregacionpi llamkaynikita saqesqaykiwan llakisqa kaspaykiqa, amayá llumpaytaqa kikillaykipi piensaychu (Rom. 12:3). Lliwta mana entiendeptikipas ichaya Diosqa yanapasuchkanki allinta servinaykipaq.

Corregisqa kasqaykita chaskikuy. Qallariypiqa Manasesqa manachá piensarqachu llumpay corregina kanantaqa. Chayna kaptinpas chaskikuspanmi wanakurqa hinaspam mana allin rurayninta saqerqa. Corregisqa kasqaykimanta imaña umaykiman chayamuptinpas ‘humillakuptikiqa [Diosmi] hatunchasunki’ (1 Ped. 5:6; Sant. 4:10).

Pacienciakuy hinaspa allinta piensay. Joseyqa tukuy ñakarisqanmantaqa wawqenkunatam cheqninman otaq vengakunmanpas karqa. Ichaqa yachayniyoq hinaspa kuyapayakuq kasqantam qawachirqa (Gen. 50:15-21). Llakisqa sientikuspaykiqa pacienciakuy, allin kaqta piensay hinaspa Dioswan yachachikuy.

¿Haykapipas congregacionpi ima rurayniyoqpas karqankichu? Chaynaqa pacienciakuyá huk llamkaykunata Jehová Dios qosunaykipaq. Iñiynikita kallpanchay, ama hukmankunata piensaspayá humillakuy hinaspa pacienciakuy. Congregacionpi ima ruranaykipaq kamachisusqaykitapas ruray. Chaymantapas amayá qonqaychu, Jehová Diosqa ‘allin kawsaqmantaqa manam qechunqachu qoykusqan allin kaqtaqa’ (Sal. 84:11).

[30 kaq paginapi suti rikuylla kaq willakuy]

Iñiynikita kallpanchay tukuy sonqomanta mañakuspa

[31 kaq paginapi dibujo]

Sapa kuti predicaspaqa iñiyninchiktam kallpanchanchik

[32 kaq paginapi dibujo]

Pacienciakuy huk llamkaykunata Jehová Dios qosunaykipaq