Yu ben e dini fosi? Yu man dini baka?

A DE so taki fosi, yu ben abi frantwortu na ini a Kresten gemeente? Kande yu ben e dini leki dinari ini a diniwroko, noso leki owruman. Kande yu ben de na ini a furuten diniwroko. A no de fu taki, dati den frantwortu di yu ben abi, ben e gi yu furu prisiri èn yu ben e firi koloku trutru. Ma baka wan pisi ten, wan sani meki taki yu bosroiti fu no tyari den frantwortu dati moro.

Kande yu teki a bosroiti dati, fu di yu ben musu sorgu gi yu osofamiri. Noso kande yu du dati fu di yu kon owru, noso fu di yu ben kon siki. Te sma e teki den bosroiti dati, dan dati a no wan syen (1 Tim. 5:8). Na ini a fosi yarihondro, Filipus ben e dini leki zendeling. Ma bakaten, a go tan na ini Sesarea, pe a ben e sorgu gi en osofamiri (Tori. 21:8, 9). Di Kownu David fu owruten Israel ben kon owru, dan a seti sani, so taki en manpikin Salomo ben kan tron kownu na ini a presi fu en (1 Kow. 1:1, 32-35). Ma aladi Filipus nanga David ben teki den bosroiti dati, toku Yehovah ben lobi den, èn sma abi lespeki gi den tu man disi te na a dei fu tide.

Ma a kan tu taki yu lasi a grani di yu ben abi fu du wan spesrutu sortu diniwroko. Na fu di yu ben tyari yusrefi na wan fasi di no fiti? Noso, na fu di yu ben abi problema na ini yu osofamiri? (1 Tim. 3:2, 4, 10, 12) Kande yu no ben agri srefisrefi nanga a bosroiti di den brada teki fu puru a grani di yu ben abi. Kande yu e mandi ete fu a tori.

Yu kan du muiti fu dini baka

Te yu lasi a grani di yu ben abi fu du wan spesrutu sortu diniwroko, dan dati wani taki dati yu noiti no o man kisi en baka? Nofo tron, dati no de so. Ma efu yu wani dini baka, dan yu musu du muiti fu kisi a grani dati (1 Tim. 3:1). Ma fu san ede yu ben o wani dini baka? Gi a srefi reide fu san ede yu gi yusrefi abra na Gado. Yu gi yusrefi abra na Yehovah fu di yu lobi en èn sosrefi den sma di e dini en. Efu yu de klariklari fu dini baka, dan a sa de krin taki yu abi a lobi dati ete. Disi sa gi Yehovah na okasi fu gebroiki yu nanga ala ondrofeni di yu kon abi now.

Memre a dyaranti di Yehovah ben gi Israel. Yehovah ben teki a pipel disi leki en eigi pipel, ma a ben puru a grani fu den, fu di den no ben e gi yesi moro na en. Gado Wortu e taki: „Mi na Yehovah. Mi no kenki. Unu na den bakapikin fu Yakob. Dati meki unu de na libi ete” (Mal. 3:6). Yehovah ben lobi den Israelsma, èn a ben wani tan gebroiki den. Yehovah wani gebroiki yu tu na ini a ten di e kon. San yu kan du, now di yu no abi frantwortu moro na ini a gemeente? A no de so taki wan sma musu abi spesrutu koni fosi, fu man abi frantwortu na ini a gemeente. San moro prenspari, na taki wan sma musu abi wan bun matifasi nanga Yehovah. Sobun, now di yu no abi frantwortu na ini a gemeente, dan gebroiki yu ten fu kon abi wan moro bun matifasi nanga Yehovah.

Fu ’kon abi wan tranga’ bribi, dan wi musu „suku Yehovah èn a krakti fu en” (1 Kor. 16:13; Ps. 105:4). Wán fasi fa yu kan du dati, na fu begi nanga yu heri ati. Te yu e taki nanga Yehovah fu a situwâsi fu yu, dan taigi en fa yu e firi, èn aksi en fu gi yu en santa yeye. Te yu e du dati, dan yu sa kon moro krosibei na Yehovah, èn yu sa kisi krakti baka (Ps. 62:8; Fil. 4:6, 13). Wan tra sani di sa yepi yu fu kon moro krosibei na Yehovah, na te yu e studeri Gado Wortu moro bun. Fu di yu no abi so furu frantwortu now na ini a gemeente, meki yu kan gebroiki moro ten fu studeri Bijbel, èn yu kan du dati tu nanga yu osofamiri. Efu  a ben kon muilek gi yu fu studeri doronomo, dan kande yu sa kisi a gwenti dati baka.

A no de fu taki, dati yu na wan Kotoigi ete fu Yehovah (Yes. 43:10-12). A moro bigi grani di iniwan fu wi kan abi, na fu „wroko makandra nanga Gado” (1 Kor. 3:9). Te yu e du moro na ini a preikiwroko, dan dati kan de wan bigi yepi gi yu fu kon moro krosibei na Yehovah. Boiti dati, yu sa de wan deki-ati gi den brada nanga sisa di e wroko makandra nanga yu na ini a preikiwroko.

Fa yu kan basi den firi fu yu?

Te yu lasi wan grani na ini a gemeente, dan a sani dati kan meki yu firi syen, noso a kan meki yu firi sari. Kande yu feni taki den brada no ben abi leti fu puru den frantwortu di yu ben abi. Kande den brada di e teki fesi, arki san yu abi fu taki. Ma efu toku den feni en fanowdu fu puru a grani di yu ben abi, dan fa yu ben o firi? Kande yu sa atibron tapu den brada, èn yu no o wani meki muiti fu go na fesi. A sani disi kan meki en muilek srefi gi yu fu teki leri fu na ondrofeni disi. Meki wi go luku fa den sani di Yob, Manase, nanga Yosef ben ondrofeni, kan yepi wan sma fu basi den firi fu en.

Yob ben e tyari ofrandi gi Yehovah, fu a bun fu tra sma, èn a ben e dini leki owruman nanga krutuman na ini wan libimakandra pe famiri-edeman ben e teki fesi (Yob 1:5; 29:7-17, 21-25). Ma di muilek ten miti Yob, dan a lasi den gudu fu en, a lasi den pikin fu en, èn a kon siki. Fu di den sani disi pasa nanga en, meki sma lasi lespeki gi en. Yob ben taki: „Den sma di e lafu mi now na den wan di yongu moro mi.”​—Yob 30:1.

Yob ben feni taki a no ben du nowan ogri, èn a ben wani opo taki gi ensrefi na fesi Gado (Yob 13:15). Ma Yob ben de klariklari fu wakti tapu Yehovah, èn a sani disi tyari bun bakapisi kon gi en. Yob kon frustan taki a ben fiti taki a ben kisi piri-ai, spesrutu fu di a no ben handri na a yoisti fasi na a ten di a ben e kisi a tesi (Yob 40:6-8; 42:3, 6). Yob ben sori sakafasi, èn a sani dati meki taki te fu kaba, Yehovah blesi en bogobogo.​—Yob 42:10-13.

A de so taki na fu di yu ben du wan sani di no fiti, meki yu lasi wan grani di yu ben abi na ini a gemeente? Efu dati de so, dan kande yu e aksi yusrefi efu oiti Yehovah nanga den tra Kresten brada nanga sisa sa gi yu pardon nanga den heri ati. We, luku a tori fu Kownu Manase fu Yuda. A ben „du bun furu sani tu di Yehovah no feni bun, so taki Gado ati kon bron nanga en” (2 Kow. 21:6). Ma toku Manase dede leki wan reti-ati man, èn a ben e tiri leki kownu na a ten dati. Fa dati du kon?

Te fu kaba, Manase teki a trangaleri di a ben kisi. Baka di a ben weigri fu gi yesi na den warskow fu Yehovah, dan Yehovah meki den Asiriasma kon feti nanga en. Den Asiriasma bui en tyari go te na Babilon. Drape, Manase „begi Yehovah en Gado fu a yepi en. A du ala san a ben man fu sori taki a ben saka ensrefi gi a Gado fu den afo fu en. Manase tan begi Gado”. Fu di Manase ben abi trutru berow, meki a bigin du san Yehovah ben aksi fu en, èn Yehovah gi en pardon.​—2 Kron. 33:12, 13.

Nofo tron, te wan sma lasi den grani di a ben abi, dan a no e kisi den baka wantronso. Ma safrisafri a kan bigin kisi pikinpikin frantwortu. Te yu e teki den frantwortu disi na yu tapu, èn te yu e du muiti fu tyari den bun, dan nofo tron yu sa kisi moro frantwortu. Disi no wani taki dati ala  sani o go makriki. Kande wan tu sani no sa waka soleki fa yu ben wani. Ma te yu de klariklari fu dini, èn te yu e horidoro, dan dati sa tyari bun bakapisi kon gi yu.

Luku na eksempre fu Yosef, a manpikin fu Yakob. Di a ben abi 17 yari, den brada fu en seri en leki srafu, aladi den no ben abi leti fu du dati (Gen. 37:2, 26-28). A no de fu taki, dati Yosef no ben fruwakti taki en eigi brada ben o du so wan sani nanga en. Ma a tan meki muiti na ini a situwâsi fu en, èn fu di Yehovah blesi en, meki a „kisi a frantwortu fu luku na oso fu en basi” (Gen. 39:2). Bakaten, den poti Yosef na strafu-oso. Ma a tan tyari ensrefi na wan fasi di fiti, èn Yehovah ben de nanga en, so taki te fu kaba, a kisi frantwortu na ini a strafu-oso.​—Gen. 39:21-23.

Yosef no ben sabi taki ala den sani di ben e pasa nanga en, ben o tyari bun kon. A ben e du nomo san a ben man. Na so fasi Yehovah ben man gebroiki en fu sorgu taki a famirilin fu a pramisi Manpikin no ben e lasi gowe (Gen. 3:15; 45:5-8). A no de fu taki, dati nowan fu wi kan fruwakti taki a o kisi a grani fu du so wan prenspari sani leki san Yosef ben du. Ma a tori disi di skrifi na ini Gado Wortu e sori taki na Yehovah e meki taki den futuboi fu en e kisi frantwortu. Sobun, neleki Yosef, yu musu tan gi Yehovah na okasi fu gebroiki yu.

Leri wan sani fu den sani di yu ondrofeni

Yob, Manase, nanga Yosef ben ondrofeni wan tu sani di ben meki den lasi-ati. Yehovah ben gi pasi taki son sani ben miti den, èn ala dri ben de klariklari fu leri wan sani fu a situwâsi fu den. San yu kan leri fu a situwâsi fu yu?

Pruberi fu si san Yehovah wani leri yu. Fu di Yob ben lasi-ati, meki a bigin denki ensrefi nomo, èn a no ben man si moro san na den moro prenspari sani. Ma Yehovah gi Yob piri-ai na wan lobi-ati fasi, èn Yob kisi ensrefi baka te fu kaba. „Mi ben taki, ma mi no ben frustan sani”, na so a ben taki (Yob 42:3). Efu a e hati yu taki yu lasi wan grani, dan ’no denki moro fu yusrefi leki san de fanowdu, ma gebroiki yu frustan na wan koni fasi’ (Rom. 12:3). Kande Yehovah wani leri yu wani sani, aladi yu no e frustan ete san na dati.

Teki trangaleri. Kande Manase ben feni taki a no ben frudini so wan hebi strafu. Ma toku a teki a trangaleri, a sori berow, èn a kenki den fasi fu en. Awinsi fa yu feni a trangaleri di yu kisi, toku a bun fu ’saka yusrefi na ondro a makti anu fu Gado, so taki a kan hei yu’.​—1 Petr. 5:6; Yak. 4:10.

Abi pasensi, èn de klariklari fu meki Yehovah gi yu leri. Den sani di miti Yosef, ben kan meki taki a kisi bita-ati gi den brada fu en, èn a ben kan prakseri fu du ogri baka nanga den. Ma na presi fu dati, a kon frustan sani moro bun, èn a ben abi sari-ati nanga den (Gen. 50:15-21). Efu den sani di miti yu e hati yu, dan abi pasensi. De klariklari fu teki a leri fu Yehovah.

A de so taki fosi, yu ben abi frantwortu na ini a Kresten gemeente? Gi Yehovah na okasi fu gebroiki yu na ini a ten di e kon. Kon moro krosibei na en. Leri fu abi pasensi nanga sakafasi. De klariklari fu teki iniwan frantwortu di yu ben kan kisi. Yu kan abi a dyaranti taki „Yehovah srefi sa gi bun sani na den sma di e tyari densrefi sondro fowtu”.​—Ps. 84:11.

[Prenspari pisi na tapu bladzijde 30]

Begi nanga yu heri ati, so taki a bribi fu yu kan kon moro tranga

[Prenki na tapu bladzijde 31]

Te yu e du moro na ini a preikiwroko, dan dati kan de wan bigi yepi gi yu fu kon moro krosibei na Yehovah

[Prenki na tapu bladzijde 32]

Gi Yehovah na okasi fu gebroiki yu na ini a ten di e kon